AI RI

“Mukammal trening” loyihasiga start berildi

Bugun Toshkent shahridagi INHA universiteti hamda Raqamli texnologiyalar va sun’iy intellektni rivojlantirish ilmiy-tadqiqot instituti hamkorligida yo‘lga qo‘yilgan “Mukammal trening” loyihasiga start berildi.

Mazkur loyiha “Ilmiy-tadqiqot institutlari va oliy o‘quv muassasalari professor-o‘qituvchilarining malakasini oshirish, o‘qitishning zamonaviy uslublariga e’tibor qaratish, o‘quv jarayonini raqamlashtirish hamda ilg‘or ilmiy yondashuvlarni joriy etish” maqsadida tashkil etilmoqda.

Loyiha doirasida ishtirokchilarning sun’iy intellekt sohasiga oid zamonaviy bilimlarini mustahkamlash, ularni ilg‘or xalqaro tajribalar bilan tanishtirish, ta’lim hamda ilmiy faoliyatda sun’iy intellektga asoslangan yondashuv va vositalardan samarali foydalanish ko‘nikmalarini shakllantirish ko‘zda tutilgan.

Ushbu tashabbus ilm-fan sohasida raqamli transformatsiyani jadallashtirish, ilmiy salohiyatni oshirish hamda sun’iy intellekt texnologiyalarini amaliy jarayonlarga tatbiq etishda amaliy ahamiyat kasb etadi.

“Mukammal trening” - zamonaviy bilim, amaliy ko‘nikma va innovatsion tafakkur sari muhim qadamdir.

Diplom topshirish marosimi bo'lib o'tdi

Raqamli texnologiyalar va sun'iy intellektni rivojlantirish ilmiy-tadqiqot institutining faollar zalida 05.01.03 - “Informatikaning nazariy asoslari” ixtisosligi bo‘yicha Nabiyeva Sevara hamda Axmedjanova Zarrinaga Texnika fanlari bo'yicha falsafa doktori (PhD) diplomi topshirildi.

Ma'lumot o'rnida, Nabiyeva Sevara “Noravshan mantiqqa asoslangan tibbiy tashxislash modeli va algoritmlari (bolalarda surunkali tonzilit kasalligi misolida)” hamda Axmedjanova Zarrina “Evolyutsion gibrid qidiruv asosida transport logistikasi axborot tizimi ma’lumotlarning o’zaro ta’sir modellari va algoritmlari” mavzusidagi ilmiy tadqiqotini muvaffaqiyatli himoya qilib, Texnika fanlari bo'yicha falsafa doktori (PhD) darajasiga ega bo'ldi.

Samarqandda “M360 Eurasia 2026” xalqaro forumi bo'lib o’tdi

Tadbir Yevrosiyo mintaqasidagi telekommunikatsiya, AT va raqamli texnologiyalar sohasining yetakchi vakillari, xalqaro ekspertlar, investorlar hamda davlat tashkilotlari rahbarlarini bir maydonda jamladi.

Forumda Raqamli texnologiyalar va sun'iy intellektni rivojlantirish ilmiy-tadqiqot institutining AKT startaplarini qo'llab-quvvatlash bo'limi boshlig'i Toxirova Maftuna "AI & Edge Intelligence: Milliy SI strategiyalaridan aqlli sanoat natijalarigacha” mavzusidagi ma'ruzasi bilan ishtirok etdi.

Shuningdek, tadbirda SI texnologiyalarining mobil telekommunikatsiya sohasida qo‘llanilishi, jumladan tarmoqlarni avtomatlashtirish, SI yechimlari orqali texnik nosozliklarni oldindan aniqlash va xizmat ko‘rsatish samaradorligini oshirish masalalari muhokama qilindi.

Institut xodimi "Mirzo Ulug'bek vorislari" tanlovining respublika bosqichida g'oliblikni qo'lga kiritdi

Joriy yilning 18-22-may kunlari Toshkent shahrida iste’dodli yoshlarni qo‘llab-quvvatlash “Ulug‘bek” jamg‘armasi, Yoshlar ishlari agentligi, Oliy ta’lim, fan va innovatsiyalar vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimligi tomonidan tashkil etilgan, “Mirzo Ulugʻbek vorislari” tanlovning respublika bosqichi bo'lib o'tdi.

Mazkur tanlovda Raqamli texnologiyalar va sun'iy intellektni rivojlantirish ilmiy-tadqiqot instituti AKT startaplarini qo'llab-quvvatlash bo'limi yetakchi mutaxassisi Otabek Usmonov faol ishtirok etib, respublika bosqichida g'oliblikni qo'lga kiritdi.

🎉 Hamkasbimizni ushbu g'alaba bilan tabriklaymiz!

Oʻzbekiston Respublikasi Huquqni muhofaza qilish akademiyasi tomonidan "Raqamli davrda qonun ustuvorligini ta'minlash: innovatsiyalar, inson huquqlari va xavfsizlik mutanosibligi" mavzusidagi "TASHKENT CYBERLEX–2026" xalqaro ilmiy-amaliy forumi o’tkazilmoqda

Konferensiyada bir qator xalqaro tashkilot vakillari, shuningdek, huquqni muhofaza qilish organlari, vazirlik va idoralari rahbarlari, sohada faoliyat yuritayotgan yetakchi milliy hamda xorijiy olimlar va mutaxassislar ishtirok etdi.

Forumning 3-parallel sessiyasida Institut direktori Anvarxo‘ja Asatullayevich "Sun’iy intellekt va jinoiy protsessning raqamli transformatsiyasi: taraqqiyot, xavf-xatarlar va shaxs huquqlarining kafolatlari" mavzusida ma’ruza qildi.

Ushbu forum doirasida Raqamli texnologiyalar va sun’iy intellektni rivojlantirish ilmiy-tadqiqot instituti hamda Oʻzbekiston Respublikasi Huquqni muhofaza qilish akademiyasi o‘rtasida hamkorlik memorandumi imzolandi.

Memorandum qo‘shma loyihalarni amalga oshirish, texnologik ishlanmalar va innovatsion yechimlar almashinuvini yo‘lga qo‘yish, ilmiy hamda amaliy tashabbuslarni qo‘llab-quvvatlash, innovatsion platformalarni rivojlantirish va sohaga zamonaviy texnologiyalarni joriy etish masalalarini o'z ichiga oladi.

Ushbu memorandum hamkorlik aloqalarini yanada mustahkamlash, innovatsion hamda texnologik tadqiqotlarni rivojlantirish va ularni qo‘llab-quvvatlashga xizmat qiladi.

Institutda bitiruvchilarning diplom loyihalari himoyasi bo'lib o'tdi

Raqamli texnologiyalar va sun’iy intellektni rivojlantirish ilmiy-tadqiqot institutida Toshkent axborot texnologiyalari universiteti "Dasturlash texnologiyalari" kafedrasi bitiruvchi talabalarining "60610400 - Dasturiy injiniring" ta’lim yo‘nalishi bo'yicha diplom loyihalari himoyasi bo'lib o'tdi.

Himoya jarayonlari Davlat attestatsiya komissiyasi a’zolari, tajribali professor-o‘qituvchilar va soha mutaxassislari ishtirokida yuqori saviyada o‘tkazildi.

9-may – Xotira va qadrlash kuni

Raqamli texnologiyalar va sun’iy intellektni rivojlantirish ilmiy-tadqiqot instituti jamoasi O’zbekiston ahlini 9-may "Xotira va qadrlash kuni" bayrami munosabati bilan samimiy muborakbod etadi.

Hech shubhasiz, tinch va farovon hayot posbonlari ulug‘lanadigan ushbu munavvar ayyomda mustaqillik yillarida Vatanimiz ozodligi, xalqimiz osoyishtaligini himoya qilish yo‘lida qahramonlarcha halok bo‘lgan jasur harbiylarimiz xotirasiga hurmat bajo keltirish barchamiz uchun ham qarz, ham farzdir.

Kasb bayrami munosabati bilan bir guruh xodimlar taqdirlandi

Bugun Raqamli texnologiyalar va sun’iy intellektni rivojlantirish ilmiy-tadqiqot institutining majlislar zalida “7-may — O‘zbekiston Respublikasi axborot-kommunikatsiya texnologiyalari sohasi xodimlari kuni” munosabati bilan ma’naviy-ma’rifiy tadbir tashkil qilindi.

Tadbirni institut direktori A.Kadirov ochib berdi va institut jamoasining ushbu yo‘nalishdagi fidokorona mehnatini alohida e’tirof etib, barchani kasb bayrami munosabati bilan samimiy tabrikladi.

Tadbir so’ngida institutda samarali faoliyat olib borayotgan bir guruh xodimlar esdalik sovg’alari hamda tashakkurnoma bilan taqdirlandi.

🇺🇿 Hurmatli axborot-kommunikatsiya texnologiyalari sohasi vakillari!

Raqamli texnologiyalar va sun'iy intellektni rivojlantirish ilmiy-tadqiqot instituti jamoasi sizlarni 7-may — O‘zbekiston Respublikasi axborot-kommunikatsiya texnologiyalari sohasi xodimlari kuni munosabati bilan samimiy muborakbod etamiz!

Zamonaviy raqamli texnologiyalar jamiyat hayotining barcha jabhalariga chuqur kirib bormoqda. Yurtimizda amalga oshirilayotgan keng ko‘lamli raqamli islohotlar, innovatsion yechimlar va texnologik taraqqiyot aynan siz – sohaga fidokorona xizmat qilayotgan mutaxassislar mehnati bilan bog‘liq.

Axborot-kommunikatsiya texnologiyalari taraqqiyoti mamlakatimizning iqtisodiy o‘sishi, davlat boshqaruvida ochiqlik va samaradorlik hamda fuqarolarimiz hayot sifatini yuksaltirishda muhim omil bo‘lib xizmat qilmoqda. Sizlarning mehnatkashligingiz, professionalligingiz va yangilikka intilishingiz tufayli bu yo‘nalishda katta yutuqlarga erishilmoqda.

Ushbu qutlug‘ sana munosabati bilan sizlarga mustahkam sog‘lik, kuch-g‘ayrat, yangi g‘oyalar va faoliyatingizda ulkan muvaffaqiyatlar tilaymiz!

Institutda sun’iy intellekt va raqamlashtirish yo‘nalishlariga bag‘ishlangan tadbir bo‘lib o‘tdi

Raqamli texnologiyalar va sun’iy intellektni rivojlantirish ilmiy-tadqiqot instituti xodimlari hamda amaliyot o‘tayotgan yosh mutaxassislar ishtirokida sun’iy intellekt va raqamlashtirish yo‘nalishlariga bag‘ishlangan tadbir bo‘lib o‘tdi.

Tadbir davomida sohadagi dolzarb muammolar atroflicha tahlil qilinib, ularni bartaraf etish bo‘yicha taklif va yechimlar muhokama qilindi. Shuningdek, innovatsion g‘oyalar va istiqbolli loyihalar yuzasidan o‘zaro fikr almashildi, yosh mutaxassislar tomonidan ilgari surilgan tashabbuslar ko‘rib chiqildi hamda ularga nisbatan amaliy tavsiyalar bildirildi.

Shuningdek, yosh mutaxassislarning kreativ yondashuvi, zamonaviy fikrlashi va yangicha qarashlari yuqori baholandi. Ular tomonidan ilgari surilgan g‘oyalar kelgusida ilmiy-amaliy loyihalarni shakllantirishda muhim asos bo‘lib xizmat qilishi ta’kidlandi.

Mazkur tadbir ilmiy salohiyatni yanada oshirish, innovatsion muhitni rivojlantirish hamda o‘zaro hamkorlikni mustahkamlash yo‘lida muhim ahamiyat kasb etdi.