Afghan Street Life

د کندهار د صنعت او سوداګرۍ ریاست وايي چې په دغه ولایت کې د رومي بانجانو د رُب د تولید یوه معیاري کارخونه، په لوړ کیفیت سره رُب تولیدوي.
د دې کارخونې مسوولین وايي چې دغه کارخونه هره ورځ تر ۱۰۰ ټنو پورې رُب تولیدوي او محصولات یې د کندهار سربېره، هلمند او فراه ولایتونو ته هم لېږدول کېږي.
مسوولین زیاتوي چې دا کارخونه د رُب تولیدولو له معیاري کارخونو څخه ګڼل کېږي او د لسګونو کسانو لپاره یې د کار زمینه برابره کړې ده.

د امريکايي رسنيو د راپور له مخې، د پنتاګون د دفاعي استخباراتو اداره (DIA) د اسرائيلو د ضدجاسوسي ګواښ کچه تر «بحراني» لوړې کړې ده.
راپور وايي، د واشنګټن او تل‌اویو ترمنځ د ایران پر سر د کړکېچ له زیاتېدو سره دا اندېښنې هم زیاتې شوې چې اسرائيل ممکن د امريکايي چارواکو د پرېکړو او داخلي بحثونو په اړه استخباراتي معلومات راټول کړي.
امریکايي چارواکي وایي، دا ارزونه د دواړو هېوادونو د اوږدې همکارۍ په اړیکو کې د باور د فشار نښه ګڼل کېږي، که څه هم تر اوسه رسمي غبرګون نه دی ورکړل شوی.

د امریکا د خزانې وزارت د رسمي معلوماتو له مخې، د امریکا ټول ملي پور په ۲۰۲۶ کال کې نږدې ۳۹ ټریلیون ډالرو ته رسېدلی دی.
اقتصادي شنونکي وایي، امریکا دا مهال د نړۍ له هغو هېوادونو څخه ده چې تر ټولو لوړ ملي پور لري.
د راپورونو له مخې، د پورونو د کچې لوړېدل د امریکا د اقتصادي او مالي پالیسو له مهمو ننګونو څخه ګڼل کېږي.

د روسیې په کوربه‌توب په «سنټ پیټرزبورګ» ښار کې مهم اقتصادي فورم جوړ شوی، بلخوا تازه نړیوالو رسنیو دغه ښار ته نږدې د ۲۵ ډرون بریدونو له شنډېدو خبر ورکړی دی.
د الجزیرې خبري شبکې په راپور کې ویل شوي چې روسیې ځواکونو «سنټ پيټرزبورګ» ښار ته نږدې ۲۵ ډرون راغورځولې دي.
تر اوسه دا نه ده روښانه شوې چې دا ډرون بریدونه له کوم لوري شوي، خو اټکل کېږي چې اوکراین به په دغو بریدونو کې لاس ولري.
بلخوا روسي رسنیو هم تر اوسه د دغو بریدونو په اړه جزییات نه دي خپاره کړي.

د ایران بهرنیو چارو وزیر عباس عراقچي د لبنان ولسمشر جوزف عون څرګندونو ته غبرګون کې وویل: ''که لبنان د ایران د چنو وهلو یوه وسیله وای، موږ به له امریکا سره ډېر مخکې توافق کړی وای.''
ښاغلي عراقچي پر ټویټر پاڼه په دې هکله یوه پیغام کې لیکلي:
''د ښاغلي عون د څرګندونو له مخې، داسې ښکاري چې ګواکې دا ایران دی چې د لبنان پنځمه برخه خاوره یې اشغال کړې، د هغه ځای د خلکو څلورمه برخه یې بې‌کوره کړې او هره ورځ یې هیواد بمباروي. ښاغلی ولسمشره، لبنان له خپل واقعي دښمنه وژغورئ.''
له دې مخکې د لبنان ولسمشر جوزف عون په خورا تونده لحجه ایران او د هغه حزب الله متحدین تورن کړل، چې د ده په وینا له امریکا سره خبرو کې لبنان د ''چنې وهلو وسیلې'' په توګه کاروي.