ZikR-e-MADINA

یہ زخم ہے طیبہ کا یہ سب کو نہیں ملتا
کوشش نہ کرے کوئی اِس زخم کو سینے کی

صلی اللہ علیہ وآلہٖ وسلم 💚

مجھے در پہ پھر بلانا مدنی مدینے والے
مئے عشق بھی پلانا مدنی مدینے والے.

نجیب الطرفین والد کی طرف سے حسنی والدہ کی طرف سے حسینی سید زادے سیدنا حضور غوثِ اعظم شیخ عبدالقادر جیلانی رحمتہ اللہ علیہ کا عرس مباک ہو 💙

تیری نسلِ پاک میں ہے بچہ بچہ نور کا
تو ہے عینِ نور تیرا سب گھرانا نور کا

💙 گیارہویں شریف مبارک ہو 💙

غوثِ اعظم امامُ التُّقٰے وَ النُّقٰے
جلوئہ شانِ قدرت پہ لاکھوں سلام

قُطبِ اَبدال و اِرشاد و رُشدُ الرَّشاد
مُحیِ دین و ملت پہ لاکھوں سلام

مردِ خیلِ طریقت پہ بے حد درود
فَردِ اہلِ حقیقت پہ لاکھوں سلام

جس کی منبر ہوئی گردنِ اَولیا
اس قدم کی کرامت پہ لاکھوں سلام

یہ نام کوئی کام بگڑنے نہیں دیتا
بگڑے بنادیتا ہے بس نام محمد ﷺ

نام محمد کتنا میٹھامیٹھا لگتا ہے
پیارے نبی کا ذکر بھی ہم کو پیارا لگتا ہے

نام محمدﷺکتنا میٹھا میٹھا لگتا ہے
دونوں جہاں سرکارﷺ کا ہم کو صدقہ لگتاہے

یاد نبی کا گلشن مہکا مہکا لگتا ہے
محفل میں موجود ہیں آقا ایسا لگتا ہے

ان کے در پہ پلنے والے اپنا آپ جواب
کوئی فرید الدین کوئی خواجہ لگتا ہے

یادنبی میں رونے والاہم دیوانوں کو
لاکھ پرایا ہو وہ پھر بھی اپنا اپنا لگتا ہے

آؤ سنائیں اپنے پیا کو اپنے غم کی بات
ان کے علاوہ کون نیازی اپنا لگتا ہے۔

وجہ نشاطِ زندگی راحت جاں تم ہی تو ہو
روحِ روانِ زندگی جانِ جہاں تم ہی تو ہو

تم جو نہ تھے توکچھ نہ تھا تم جو نہ ہو تو کچھ نہ ہو
جانِ جہاں تم ہی تو ہو جانِ جناں تم ہی تو ہو

تاجِ وقارِ خاکیاں نازشِ عرش و عرشیاں
فخر زمین و آسماں فخر زماں تم ہی تو ہو

کس سے کروں بیانِ غم کون سنے فغانِ غم
پائوں کہاں امانِ غم امن و اماں تم ہی تو ہو

روح و روانِ زندگی تاب و توانِ زندگی
امن و امانِ زندگی شاہ شہاں تم ہی تو ہو

تم ہو چراغِ زندگی تم ہو جہاں کی روشنی
مہر و مہ و نجوم میں جلوہ کناں تم ہی تو ہو

تم سے جہانِ رنگ و بو تم ہو چمن کی آبرو
جانِ بہارِ گلستاں سروِ چماں تم ہی تو ہو

تم ہو قوام زندگی تم سے ہے زندگی بنی
تم سے کہے ہے زندگی روح رواں تم ہی تو ہو

اصل شجر میں ہو تم ہی نخل و ثمر میں ہو تم ہی
ان میں عیاں تم ہی تو ہو ان میں نماں تم ہی تو ہو

تم ہو نمودِ اولیں شمع ابد بھی ہو تم ہی
شاہِ زمن یہاں، وہاں سکہ نشاں تم ہی تو ہو

اخترؔ کی ہے مجال کیا محشر میں سب ہیں دم بخود
سب کی نظر تم ہی پہ ہے سب کی زباں تم ہی تو ہو

تِرے خُلق کو حق نے عظیم کہا
تِری خلق کو حق نے جمیل کیا​
کوئی تجھ سا ہوا ہے نہ ہوگا شہا
تِرے خالقِ حسن و ادا کی قسم​
​
وہ خدا نے ہے مرتبہ تجھ کو دیا
نہ کسی کو ملے نہ کسی کو ملا​
کہ کلامِ مجید نے کھائی شہا
تِرے شہر و کلام و بقا کی قسم​
​
یہی عرض ہے خالقِ ارض و سما
وہ رسول ہیں تیرے میں بندہ تِرا​
مجھے انکے جوار میں دے وہ جگہ
کہ ہے خلد کو جس کی صفا کی قسم​
​
یہی کہتی ہے بلبلِ باغِ جناں
کہ رضا کی طرح کوئی سحر بیاں ​
نہیں ہند میں واصفِ شاہِ ہدیٰ
مجھے شوخیء طبعِ رضا کی قسم​

الصلوة والسلام علیک یا رسول اللہ
وعلی الک واصحابک یا حبیب اللہ

صَبا وہ چَلے کہ باغ پَھلے
وہ پھول کِھلے کہ دن ہوں بَھلے
لوا کہ تلے ثناء میں کُھلے
رضؔا کی زباں تمہارےؐ لیے

صَلَّی اللّٰہُ عَلَیْہِ وَ آلِہٖ وَسَلَّمْ 🌹

شہِ بغداد کی بے مثل سیرت یاد آتی ہے
ہمیں غوث الورٰی کی شان و شوکت یاد آتی ہے

حسَن کا حُسن پایا اور حُسینِ پاک کی سیرت
اُنھیں دیکھو تو دونوں کی وجاہت یاد آتی ہے

نظر میں لوحِ محفوظ اور قدم ولیوں کی گردن پر
مچل جاتا ہے دل ، جب اُن کی عظمت یاد آتی ہے

نبی کا ہاتھ اُن پر ، اور اُن کا سارے عالَم پر
شہ جیلاں کی یہ شانِ نِیابت یاد آتی ہے

جِلایا آپ نے مُردوں کولفظِ "قُم بِاِذنی" سے
ہمیں، مُردے جِلانے کی کرامت یاد آتی ہے

وہ جب چاہیں،جہاں چاہیں،پہنچ جاتے ہیں لمحوں میں
گیے ستّر کے گھر ، ہم کو وہ دعوت یاد آتی ہے

عقیدت مند کو گرنے سے پہلے تھام لیتے ہیں
ہمیں ان کی رَسائ اور حمایت یاد آتی ہے

نِکالی مدتوں کے بعد بھی بارات دریا سے
خدا نے جو اُنھیں بخشی وہ قدرت یاد آتی ہے

جمال زندگی سے حُسن خُلق مصطفی ظاہر
جلال ایسا کہ فاروقی عدالت یاد آتی ہںے

صداقت میں ، وہ اپنے وقت کے صدیق اکبر ہیں
شجاعت دیکھ کر حیدر کی جرأت یاد آتی ہے

کرم ایسا ، کہ دیدیں چور کو ابدال کا منصب
عطا ایسی کہ عثماں کی سخاوت یاد آتی ہے

کیا بے خوف اپنوں کو مُرِیدِی لَا تَخَف" کہہ کر
عَزُومٌ قَاتِلٌ" سے اُن کی نصرت یاد آتی ہے

فقط انساں ہی کیا، جِنّ ومَلَک بھی جسکو سنتے تھے
زبانِ حق بیاں کی وہ خطابت یاد آتی ہے

زمانہ سید الطرفین کے اعزاز پر قرباں
رسول اللہ سے اُن کی قَرابت یاد آتی ہے

شہِ کونین کے نقشِ قدم پر ہر قدم اُن کا
ہمیں ان کی قیادت اور امامت یاد آتی ہے

چمک اُٹھّے در و دیوار ، سارا گھر مہک اُٹھّا
مرے گھر غوث کے آنے کی برکت یاد آتی ہے

ٹپکتی ہے فریدی کے قلم سے غوث کی اُلفت
پڑھو اشعار تو اُن کی فضیلت یاد آتی ہے