Baskog Radyo

LOKAL | CAPIZ, 1ST RUNNER-UP SA BEST BOOTH SA 37TH PHILIPPINE TRAVEL MART

CAPIZ — Bugal liwat sang Capiz matapos makakuha sang 1st Runner-Up nga pwesto sa Best Booth – Regional/Provincial Level sa ginpatigayon nga 37th Philippine Travel Mart sa SMX Convention Center, Pasay City, Metro Manila.

Nakigbahin ang Province of Capiz sa isa sa pinakadaku nga tourism events sa Pilipinas, kun sa diin nagpakita sang nagkanarisari nga destinasyon, kultura kag identity sang probinsya.

Nakuha sang Capiz ang ikaduha nga pwesto sa Best Booth competition, nga nagapakita sang pangin mapisan kag ang creativity sang probinsya sa pagpromote sang turismo.

Isa sa mga naghatag sang identity sa booth amo ang “Balay Kawayanan,” nga ginpresentar bilang simbolo sang Capisnon tourism identity kag resilience.

Paagi sa konsepto sang Balay Kawayanan, ginpabutyag ang kultura, pagkakilala kag abilidad sang mga Capisnon nga magbangon kag magpadayon bisan ano pa ang mga pagtilaw.

Ang pagkilala sa Capiz bilang Best Booth 1st Runner-Up nagdugang sa nagapadayon nga kampanya sang probinsya nga ipakita sa mas madamo nga Pilipino kag turista ang mga atraksyon, kultura kag mga eksperyensya nga matanyag sang Capiz.

LOKAL | 6 KA PAMILYA NGA NASUNUGAN SA BLISS CAGAY, NAKABATON SANG BULIG HALIN SA SYUDAD

ROXAS CITY — Nakabaton sang inisyal nga bulig-pinansyal kag iban pa nga kinahanglanon ang anom ka pamilya nga naapektuhan sang sunog sa Bliss Cagay, Roxas City.

Kahapon, personal nga ginpadala kag gintugyan ni Mrs. Joanne Dadivas, asawa sang alkalde sang syudad, ang inisyal nga bulig-pinansyal sang lokal nga panguluhan sa mga pamilya nga nasunugan, kaupod ang City Social Welfare and Development (CSWD).

Personal nga ginhibalo ni Dadivas ang kahimtangan sang mga pamilya agud mahibaluan ang iban pa nila nga kinahanglanon, ilabi na ang mga magagmay nga kabataan nga nasunog ang mga kagamitan para sa ila pag-eskwela.

Samtang, naghatag man sang dugang nga ayuda ang Department of Social Welfare and Development (DSWD), lakip ang Family Food Packs, Family Shelter Kits kag Family Kitchen Kits para sa mga apektado sang sunog.

Padayon naman nga ginamonitor sang mga nagakaigo nga ahensya ang kahimtangan sang mga pumuluyo nga naapektuhan sang insidente.

LOKAL | LALAKI PATAY MATAPOS NGA GINLUTHANG SA SAPIAN, SUSPEK ARESTADO

Patay ang isa ka lalaki matapos gin-alegar nga ginluthang sa Sitio Intadtaran, Barangay Bilao, Sapian, Capiz, pasado alas-7:10 sang aga, Setyembre 6, 2026.

Ginkilala ang biktima sa alyas nga “Bert,” residente sang amo nga barangay. Ang suspetsado ginkilala naman sa alyas nga “Sansan,” 57-anyos, mangunguma kag residente sang Sitio Lag-it, Barangay Bilao.

Suno sa inisyal nga imbestigasyon sang Sapian Municipal Police Station, nagapakaon sang karabaw ang isa ka testigo sang hinali sini nga nabatian ang duha ka lupok sang armas-luthang nga ginpahayag nga naghalin sa lugar kon sa diin yara ang biktima kag ang suspetsado.

Nag-angkon sang pilas sa nawala nga bahin sang likod ang biktima bangud sa insidente.

Pagkatapos sang pagpangluthang, ginpahayag nga madasig nga nagpalagyo ang suspek dala sini ang wala pa matumod nga klase sang armas-luthang.

Gilayon naman nga nagpatigayon sang hot pursuit operation ang kapulisan nga nagresulta sa madinalag-on nga pagdakop sa suspetsado.

Sa karon, yara na sa kustodiya sang Sapian MPS ang suspek kag ginahulat ang nagakaigo nga pagsaka sang kaso.

Padayon naman ang imbestigasyon sang kapulisan agud mahibaluan ang motibo kag bug-os nga sirkumstansya sa nagluntad nga insidente.

LOKAL | 48-ANYOS NGA LALAKI,
PRESU, MATAPOS MA-ARESTO SA FRUSTRATED MURDER

PILA­R, CAPIZ —Wala gid ginpaabot sang 48-anyos nga lalaki ang pag-abot sang kapulisan sa iya puluy-an matapos ini maaresto bangud sa kaso nga Frustrated Murder sa Barangay Dulangan, Pilar, Capiz, Setyembre 6, 2026.

Ang gin-aresto ginkilala sa alyas nga “Larry,” 48-anyos kag residente sang amo nga lugar.

Base sa warrant of arrest, nagapangatubang si Larry sang kaso nga Frustrated Murder. Ang warrant gin-isyu kag ginpirmahan sang Pairing Judge sang Regional Trial Court Sixth Judicial Region, Branch 16, Roxas City, kag napetsahan Abril 7, 2015.

Kapin 11 na ka tuig na ang nagligad halin sang pag-isyu sang warrant antes ini ang nadakpan.

Ginrekomendar naman sang korte ang P200,000 nga piyansa para sa temporaryo nga kahilwayan sang akusado.

Sa karon, yara na si Larry sa kustodiya sang Pilar Municipal Police Station (Pilar MPS) samtang ginahanda ang pag-turnover sa iya sa court of origin para sa nagakaigo nga proseso sang korte.

LOKAL | 18-ANYOS NGA MOTORISTA PATAY, 16-ANYOS NGA BACKRIDER SINI, PILASON SA AKSIDENTE SA ROXAS CITY

Patay ang 18-anyos nga motorista kag pilason naman ang iya 16-anyos nga backrider matapos magbunggo ang ila motorsiklo sa isa ka Nissan Navara sa Pueblo de Panay Road, Barangay Dinginan, Roxas City, pasado alas-8:50 sang gab-i, Setyembre 5, 2026.

Ginkilala ang motorista sa alyas nga “Mark,” 18-anyos, samtang ang iya backrider nga si “Ras,” 16-anyos. Lunsay sila residente sang Barangay Cudian, Ivisan.

Ang driver sang Nissan Navara naman ginkilala sa alyas nga “Ven,” 27-anyos, residente sang Barangay Gabuan, Roxas City.

Suno sa Roxas City PNP, nagikan sa Barangay Cudian kag magapadulong na kuntani sa Pueblo de Panay ang duha ka biktima sakay sang Rusi nga motorsiklo kag pag-abot sa lugar hinali nga nagliko ang Nissan Navara, nga amo ang gintunaan sang pagbunggo sang motorsiklo.

Bangud sa mabaskog nga impact, nag-angkon sang malubha nga pilas sa ulo si Mark, samtang nag-angkon naman sang nagkanarisari nga samad sa parte sang lawas si Ras. Gindala sila gilayon sa Roxas Memorial Provincial Hospital para sa pagbulong.

Apang, pasado alas-10:00 sang gab-i, ginbawian sang kabuhi si Mark bangud sa iya mga pilas.

Suno naman sa pahayag sang 16-anyos nga backrider, wala sang headlights ang motorsiklo nga ila ginasakyan kag flashlight sang cellphone lamang ang ila gin-gamit samtang nagabiyahe. Ginakonsiderar ini nga posible nga rason nga wala gilayon nakita sang driver sang salakyan ang motorsiklo.

Sa karon, yara na sa kustodiya sang Roxas City PNP ang duha ka salakyan nga naangut sa aksidente para sa nagakaigo nga imbestigasyon kag disposisyon.

Gina-imbestigahan pa sang kapulisan ang eksakto nga sirkumstansya sang aksidente.

LOKAL | 26-ANYOS NGA LALAKI, ARESTADO SA PAGBALIGYA SANG INDI-LISENSYADO NGA ARMAS SA ROXAS CITY

Arestado ang isa ka 26-anyos nga lalaki matapos ginpatigayon sang Roxas City Police Station ang isa ka buy-bust operation bangud sa ginatudlo nga pagbaligya sang indi lisensyado nga armas-luthang sa Barangay Punta Tabuc, Roxas City.

Ginhimo ang operasyon pasado alas-12:31 sang udto sang Setyembre 5, 2026 sa Cassandra Street, Barangay Punta Tabuc.

Ginkilala sang kapulisan ang nadakpan kay Fernando Jose Cañelaso y Ubal, 26-anyos, residente sang Sitio Masadyahon, Barangay X, Roxas City, Capiz.

Suno sa kapulisan, natigayon nga mabaklan sang operatiba nga nagpakuno kuno bilang poseur-buyer ang subject sang isa ka kalibre 38 nga revolver nga may unod nga duha ka live am******on.

Ginbayaran ang armas sang P3,000, nga amo ang gin-gamit bilang buy-bust money sa operasyon.

Pagkatapos sang transaksyon, gilayon nga gin-aresto sang mga operatiba ang suspek kag ginkumpiska ang armas kag mga bala bilang ebidensya.

Sa karon, yara na sa kustodiya sang Roxas City PNP si Cañelaso para sa nagakaigo nga proseso kag disposisyon.

Ginalauman nga magapangatubang ini sang kaso may kaangtanan sa ginapatihan paglapas sa Republic Act No. 10591 ukon Comprehensive Fi****ms and Am******on Regulation Act.

Padayon naman ang imbestigasyon sang kapulisan sa kaso.