Arab-Adab

| 𝗠𝗴𝗮 𝗶𝘀𝗸𝗼𝗹𝗮𝗿, 𝗻𝗮𝗴𝗹𝗮𝘁𝗮𝗴 𝗻𝗴 𝗽𝗮𝗻𝗶𝗻𝗶𝗻𝗱𝗶𝗴𝗮𝗻 𝗵𝗶𝗻𝗴𝗴𝗶𝗹 𝘀𝗮 𝗔𝗜 𝗰𝗼𝗺𝗽𝗮𝗻𝗶𝗼𝗻𝘀𝗵𝗶𝗽 𝘀𝗮 𝗛𝘂𝗺𝗮𝗻𝗶𝘁𝗶𝗲𝘀 𝗗𝗮𝘆 𝟮𝟬𝟮𝟲 𝗗𝗲𝗯𝗮𝘁𝗲

Binuksan ang hapong bahagi ng Humanities Day sa isang makabuluhan at mainit na debate ng mga iskolar hinggil sa proposisyong, “Is the rise of AI companionship a symptom of society’s failure to teach human connection?” na ginanap ala-una ng hapon noong ika-13 ng Pebrero sa himnasyo ng Pisay-Bikol.

Kinatawan nina Jasmine Minero (kapitan), Carl Nathan Rectin, at Megan Faustino ang koponan ng apirmatibo. Samantala, pinangunahan ni Bienric Pile ang koponan ng negatibo, kasama sina Froilan Besana at Brielle Orculo. Isinagawa ang palitan ng argumento sa ilalim ng modified Oxford-Oregon format, kung saan kapuwa panig ay naglatag ng matitibay na ebidensiya at lohikal na pangangatwiran upang ipagtanggol ang kani-kanilang paninindigan.

Sa pagtatapos ng tunggalian ng mga idea, itinanghal na kampeon ang koponan ng apirmatibo. Pinarangalan naman si Megan Faustino bilang Best Speaker, habang ginawaran si Carl Nathan Rectin ng Honorable Mention para sa kaniyang kahanga-hangang pagganap sa debate.

Naging tampok ang nasabing aktibidad sa pagpapalalim ng diskurso hinggil sa papel ng artificial intelligence sa makabagong lipunan at sa kahalagahan ng ugnayang pantao sa gitna ng mabilis na pag-unlad ng teknolohiya.

via Allyza Rafer at Artha Candeleja | Arab-Adab

| 𝟵-𝗣𝗹𝗮𝘁𝗶𝗻𝘂𝗺, 𝗻𝗮𝘀𝘂𝗻𝗴𝗸𝗶𝘁 𝗮𝗻𝗴 𝗸𝗮𝗺𝗽𝗲𝗼𝗻𝗮𝘁𝗼 𝘀𝗮 𝗛𝘂𝗺𝗮𝗻𝗶𝘁𝗶𝗲𝘀 𝗤𝘂𝗶𝘇 𝗕𝗼𝘄𝗹 𝟮𝟬𝟮𝟲

Nagpasiklaban ng angking talino ang mga kinatawan ng iba’t ibang seksiyon sa naganap na Humanities Quiz Bowl noong ika-13 ng Pebrero, 2026 sa himnasyo ng Pisay-Bikol.

Ang patimpalak ay binuo ng tatlong yugto: easy, medium, at difficult na rounds, na naglaman ng mga tanong na metikulosong pinili at inihanda—siyang sumasaklaw sa panitikan at balarilang Filipino at English, gayundin sa kasaysayan.

Sa pagtatapos ng patimpalak, itinanghal na kampeon ang 9-Platinum matapos nitong makuha ang pinakamataas na puntos sa bilang na 66. Sinundan ito ng 9-Silicon at 12-Chemistry na kapuwa nagkamit ng ikalawang puwesto matapos makalikom ng 61 puntos, habang nasungkit naman ng 11-Biochemistry ang ikatlong puwesto sa 59 na puntos.

Nagsilbing pagkakataon ang patimpalak upang maipamalas ng mga iskolar ang kanilang kaalamang hindi lamang saklaw ng agham at teknolohiya, kundi maging sa larangan ng humanidades at ang kanilang pagpapahalaga sa wika, panitikan, at kasaysayan.

via Kimberly Lasala at Lorenzo Bosque | Arab-Adab

| 𝗣𝗮𝗻𝗮𝗵𝗼𝗻 𝗮𝗻𝗴 𝗣𝗮𝗻𝗮𝘂𝗵𝗶𝗻

Sa pagbubukas ng Humanities Day 2026 sa temang “Humanity Through Time: Voices, Values, and Visions Across Eras,” binigyang-buhay ng anim na baitang ang kani-kanilang napiling pelikula bilang tema sa pamamagitan ng makulay na banner showcase at presentasyon ng mga yell, nitong ika-13 ng Pebrero 2026 sa himnasyo ng Pisay-Bikol.

Pinangunahan ng ikapitong baitang ang entablado sa temang Hamilton, tangan ang bandilang ipinagmalaki ng kanilang dalawang kinatawan, gayundin ang ikawalong baitang na nagbigay-diwa sa misteryo ng Enola Holmes, na sinundan ng ika-siyam na tumawid sa mito ng Orpheus at Eurydice.

Naghatid naman ng halakhak at puso sa pang-araw-araw na buhay ang ika-10 sa identidad na hango sa komedyang pelikula na Ang Tanging Ina.

Sa makabagong romansa, dumako ang Batch 2027 na kumatawan sa mga karakter ng She’s Dating the Gangster, bago tuluyang nagwakas ang pagtatanghal at panimulang programa sa isang masiglang himig na hatid ng Batch 2026, inspirado sa mga awitin sa musical na Mamma Mia!

Ayon sa Pangulo ng Nexus Club na si Ayanna Atondo, nabuo ang konsepto mula sa pagnanais na ilihis ang direksiyon ng selebrasyon sa karaniwang tema na nakasentro lamang sa romantikong pag-ibig, upang sa halip ay ituon ito sa mas malalim pang diwa ng panahon at koneksiyon. “Students or teenagers our age, minamadali nila [ang] lahat, kaya na-ra-rush ang time—also, isa sa mga love languages [ang] quality time,” pagpapaliwanag niya sa pinagmulan ng pamagat ng tema.

Dagdag pa niya, ang pangunahing layunin ng programa ay “celebrating humanity,” kung saan maipakikita ng bawat isa ang pagiging makatao sa iba’t ibang paraan at anyo.

via Deborah Gunoy, Hugo Ramirez, Artha Candaleja, Lorenzo Bosque at Bashaier Calipes | Arab-Adab

| “𝗛𝗶𝗻𝗱𝗶 𝗹𝗮𝗻𝗴 𝘀𝗶𝘆𝗮 𝗽𝗮𝗻𝗮𝗹𝗼 𝗻𝗮𝗺𝗶𝗻 𝗻𝗴𝗮𝘆𝗼𝗻, 𝗽𝗮𝗻𝗮𝗹𝗼 𝘀𝗶𝘆𝗮 𝗽𝗮𝘁𝗶 𝗻𝗴 𝗽𝗮𝘀𝘁 𝗛𝗼𝘂𝘀𝗲 𝗚𝗼𝗹𝗱 𝗺𝗲𝗺𝗯𝗲𝗿𝘀.” — 𝗥𝗮𝗻𝗰𝗲𝘀, 𝟮𝟬𝟮𝟲

Ibinahagi ng House Master ng Aurelion Sol na si Justine Rances na ang kanilang pagkakasungkit sa kampeonato sa IskoLaro 2026 Intramurals ay bunga ng malakas na house spirit at matinding teamwork.

“Ang pag-angat ng House Gold [ay] because of the collective effort of the house,” pagbibigay-diin ni Rances sa kooperasyon ng bawat miyembro ng Ginto na naging susi sa pagkapanalo matapos ang ilan taong pagiging bottom placer bago pa ang pandemic.

Nanguna ang Aurelion Sol matapos magtala ng 244 na puntos, na sinundan ng Selenic Lycans sa puntos na 219, habang pangatlo naman ang Nebula Serpents na may 205, at ikaapat ang Scarlet Supernova na may 178.

Bukod sa kabuoang pagkapanalo, nag-uwi rin ng 11 kampeonato ang Ginto sa iba’t ibang isports at paligsahan, kung saan dominante ang 40 kabuoang puntos na nakalap sa Men’s at Women’s Volleyball. Samantala, nagwagi naman sa pitong laro ang Asul, sa anim ang Puti, at sa dalawa ang P**a.

Binigyang-pugay ang Mythical 5 ng Men’s Basketball na kinabibilangan nina Sean Abando at James Lagundi ng Serpents, Nico Buenconsejo, Shaun Faeldonea, at Jaryll Goyala ng Lycans; gayundin ang Mythical 5 ng Women’s na sina Princess Aquino ng Sol, Kristine Melgar ng Supernova, at Averil Carreon, Sadie Lajara, at Joyce Zuniega ng Lycans.

Pinangaralan din ang mga manlalaro ng Serpents na sina Abando, Tobit Hilotin, at Carlos Plata; kinatawan ng Sol na sina Carljun Abilay, Lorenzo Bosque, Mark Sevilla, Shania Bachiller, Akyra Dollison, at Zoe Zapanta; at koponan ng Supernova na binubuo nina Jonamae Basmayor, Melgar, at Queenie Pandes bilang Mythical 6 ng Men’s at Women’s Volleyball.

Sa pagtatapos ng IskoLaro 2026, pinaalalahanan ni Rances ang mga natitirang miyembro at susunod na tagabunsod ng House Gold na bagaman mahalaga na sikaping manalo, sa huli ay mas mahalaga pa rin ang karakter na nahubog sa proseso, sapagkat dito makikita ang totoong ningning ng Ginto, “mananatiling ginto ang House Gold, may title [man] o wala.”

via Allyza Rafer, Thea Tambago, Kurt Lagrimas, Stephanie Vista, at Bashaier Calipes | Arab-Adab Sansinukob

Mayroon ka bang damdamin at saloobing nais mong ipahayag, ngunit hirap kang ilagay sa tamang salita? 💭✍️ O kaya naman may gusto kang sabihin, ngunit nahihiya kang iparating? 😳💌 Huwag kang mag-alala!

Nandito ang Arab-Adab at Filipino Club upang samahan ka sa bawat hakbang ng pagbuo ng mga sulat at mensaheng nagmumula sa iyong puso. 🩷🪶 Maging ito man ay tungkol sa pagmamahal, pasasalamat, o lihim na paghanga, ang aming serbisyo ay para sa’yo! ❤️‍🔥

📍 Bisitahin ang aming booth: 𝔊𝔬𝔱 𝔱𝔬 𝔅𝔢𝔩𝔦𝔢𝔳𝔢 𝔦𝔫 𝔚𝔯𝔦𝔱𝔦𝔫𝔤
🗓 Pebrero 13, 2026
📌 Himnasyo ng Pisay-Bikol

💘 Mga Serbisyo:
💌 Never Not Write You – ₱20
Ikaw ang magsusulat ng liham (oo, ikaw talaga! 😉), at kami ang magsisilbing kupido na maghahatid nito sa iyong special someone. Kami na ang bahala sa delivery ng sulat mong puno ng pagmamahal! 🕊️💞
🖋️ That Thing Called Sulat – ₱40
Ikaw ang gagawa ng mensahe at kami naman ang magsusulat, kasama na ang pagdeliver nito.📬✨ Perfect ito para sa mga nonchalant, mysterious, at lowkey oat na ayaw magpakilala. 👀
📖 100 Sulat Para Kay Stella – ₱60
Kami na ang bahala sa lahat: gagawa ng mensahe, magsusulat, at maghahatid ng liham.💝📜 Ibigay mo lamang ang mga detalye, mag-chill, at kami na ang bahala maging best wingman mo! 😌🤝💘

📝 Upang magpatala para sa aming mga serbisyo, narito ang link:
https://forms.gle/Sc6vgWDGJRAgKpU7A
https://forms.gle/Sc6vgWDGJRAgKpU7A
https://forms.gle/Sc6vgWDGJRAgKpU7A

⏰ Paunawa:
Ang form ay magsasara sa ganap na ika-3:00 PM ng Pebrero 12 ⏳❗ Kaya huwag nang magpatumpik-tumpik pa at ipasulat na ang mga damdaming matagal mo nang kinikimkim! 💖✍️ 💌

🎨🪶 Formanes at Lasala

| 𝗡𝗲𝗯𝘂𝗹𝗮 𝗦𝗲𝗿𝗽𝗲𝗻𝘁𝘀, 𝗽𝗶𝗻𝗶𝗹𝗶𝗽𝗶𝘁 𝗮𝗻𝗴 𝗦𝗲𝗹𝗲𝗻𝗶𝗰 𝗟𝘆𝗰𝗮𝗻𝘀, 𝟮-𝟬; 𝘀𝗶𝗻𝗶𝗸𝘄𝗮𝘁 𝗮𝗻𝗴 𝗴𝗶𝗻𝘁𝗼 𝘀𝗮 𝗠𝗲𝗻’𝘀 𝗕𝗮𝗱𝗺𝗶𝗻𝘁𝗼𝗻 𝗦𝗶𝗻𝗴𝗹𝗲𝘀

Rumatsada ang matatalim na smash ng pambato ng Nebula Serpents na si Jacob Capellan upang tibagin ang depensa ni John Rej Alcantara ng Scarlet Supernova, 15-9, 15-12, sa sagupaan sa kampeonato ng IskoLaro 2026 Men’s Badminton Singles.

Agad na nanalasa si Capellan gamit ang kanyang matatalim na long drives at smashes upang butasin ang depensa ni Alcantara sa bukana pa lamang ng laban.

“Masaya pero underwhelming kasi parang mas mahirap yung laro ko sa first game kaysa sa second game,” ani pa niya.

Dinomina kaagad ni Capellan ang entrada ng unang set sa pagpapaulan ng sunod-sunod na service aces at smash na agad nagbigay ng abanteng 9-2, subalit nagtala rin ito ng sunurang errors at outside shots kung kaya’t nailapit ang iskor sa 9-6.

Hindi hinayaan ni Capellan na maagaw ang kaniyang momentum at muling nagpakawala ng mga kalkuladong drop shots at backcourt smashes upang muling palayuin ang agwat, 12-6.

Sinubukang isalba ni Alcantara ang set sa pamamagitan ng mga mapanlinlang na drops, ngunit nanaig ang bagsik ng Asul upang selyuhin ang unang set sa iskor na 15-9.

Umariba muli ang pambato ng Asul nang humataw muli ito ng rumaragasang back court smash at nagpamalas ng impresibong footwork upang sirain ang pokus ni Alcantara sa simula ng ikalawang set, upang itala ang 9-3 na kalamangan.

Gayunpaman, tila dinapuan ng malas si Capellan sa kalagitnaan ng set nang magsimulang magsalansan ng errors, na naging daan para maitabla ni Alcantara ang laban sa 11-all.

Sa krusiyal na bahagi ng laro, hindi na nagpaubaya ang pambato ng Nebula Serpents nang muling nagpakawala si Capellan ng maiinit na smashes na sinabayan ng mga net errors ni Alcantara upang tuluyang tapusin ang laban sa iskor na 15-12.

via Shermaine Florin, Stephanie Vista, Bashaier Calipes, at Kurt Lagrimas | Arab-Adab Sansinukob

| 𝗕𝗼𝘀𝗾𝘂𝗲-𝗖𝗮𝗻𝗱𝗲𝗹𝗲𝗷𝗮, 𝘀𝘂𝗺𝗶𝗸𝗹𝗮𝗯 𝘀𝗮 𝗕𝗮𝗱𝗺𝗶𝗻𝘁𝗼𝗻 𝗠𝗶𝘅𝗲𝗱 𝗗𝗼𝘂𝗯𝗹𝗲𝘀: 𝗔𝘂𝗿𝗲𝗹𝗶𝗼𝗻 𝗦𝗼𝗹, 𝗽𝗶𝗻𝗮𝗯𝗮𝗴𝘀𝗮𝗸 𝗮𝗻𝗴 𝗦𝗲𝗹𝗲𝗻𝗶𝗰 𝗟𝘆𝗰𝗮𝗻𝘀, 𝟮-𝟬

Pinatumba ng Aurelion Sol ang Selenic Lycans sa mabangis na bakbakan ng tambalang Don Bosque at Artha Candeleja laban kina Niño Colina at Akeela Ante, 15-12, 16-14, sa ikalawang tapatan ng Badminton Mixed Doubles.

Sa pagbubukas ng unang set, ibinandera ni Ante ang kaniyang mapanlinlang na drop shots, na sinabayan naman ng matitinik na flicks ni Colina. Gayunpaman, agad na bumawi si Bosque matapos magpakawala ng puwersadong smashes, na sinuportahan ng high clear shots ni Candeleja, upang maagaw ang kalamangan, 12-9, pabor sa Aurelion Sol.

Bumira naman sa ikalawang set ang Selenic Lycans gamit ang mapaghiganting smashes ni Colina, kontra sa kalkuladong clears ni Candeleja, dahilan upang ipantay ang laban sa iskor na 14 at magtala ng deuce.

Nanatiling kalmado ang tambalang Bosque-Candeleja at muling umangat matapos humataw ng bumubulusok na clears, na sinamahan ng errors mula sa katunggali, upang tuluyang kandaduhan ang salpukan, 16-14, at igawad ang panalo sa Aurelion Sol tungo sa finals.

via Kezia Sandejo, Kurt Lagrimas, at Bashaier Calipes | Arab-Adab Sansinukob

| 𝗡𝗲𝗯𝘂𝗹𝗮 𝗦𝗲𝗿𝗽𝗲𝗻𝘁𝘀 𝗻𝗮𝗸𝗮𝗹𝘂𝘀𝗼𝘁 𝗸𝗼𝗻𝘁𝗿𝗮 𝗦𝗲𝗹𝗲𝗻𝗶𝗰 𝗟𝘆𝗰𝗮𝗻𝘀, 𝟮-𝟬

Puso at tiwala ang nagsilbing armas ng Nebula Serpents nang kanilang gapiin ang defending champion na Selenic Lycans, 25-23, 27-25, sa panimulang laban ng Iskolaro 2026 Men’s Volleyball.

Mata-sa-mata kaagad ang sagupaan sa unang set na pinangunahan ng palitan ng umaapoy na spikes nina Sean Abando ng Serpents at Clarence Laurio ng Lycans.

Bagama’t dikit ang iskor, naging agarang bentahe ng Serpents ang matitinding dump shots at blocks ni Abando, dahilan upang tuluyang matapos ang unang set sa iskor na 25-23.

Rumatsada naman ang tambalang Tobit Hilotin at Jian Matanguihan ng Serpents sa pagpapaulan ng sidecourt spikes upang manguna kontra Puti sa ikalawang set.

Sinubukang isalba ni Ralph Escalora ang Puti sa pamamagitan ng magkakasunod na nagliliyab na service aces at palo mula kay Mark Petajen upang makuha ang bentahe, 19-17, ngunit hindi nagpatinag ang Asul, at humataw naman ng mga atake si Joaquin Necesario upang maidala ang laro sa deuce.

Wala nang naging bawi pa ang Lycans nang magkaroon ng net error, na sinundan ng isang makamandag na spike ni Matanguihan upang tuluyang maiselyo ng Serpents ang tagumpay.

“Sa ngayon, wala naman akong ine-expect, since galing pa lang kami sa fourth place from last year. Okay na sa akin [kahit] second, basta super precious na nakikita kong close kami at nag-e-enjoy,” ayon kay Matanguihan.

via Shermaine Florin, Kurt Lagrimas, Stephanie Vista, at Thea Tambago | Arab-Adab Sansinukob

| 𝗡𝗲𝗯𝘂𝗹𝗮 𝗦𝗲𝗿𝗽𝗲𝗻𝘁𝘀, 𝗸𝘂𝗺𝗮𝘄𝗮𝗹𝗮 𝗸𝗼𝗻𝘁𝗿𝗮 𝗔𝘂𝗿𝗲𝗹𝗶𝗮𝗻 𝗦𝗼𝗹, 𝟮-𝟭

Ginapang ng tambalang Marcus Aguirre at Andrei Abelado ng Nebula Serpents ang daan tungo sa final round ng IskoLaro 2026 Badminton Men’s Doubles matapos biguin sina Clyde De Ocampo at Jerztine Zaragosa ng Aurelian Sol.

Matinik ang naging laban sa unang set nang magpamalas ng kalkuladong forehand drives si Aguirre na tinapatan naman ng smash ni Zaragosa, 9-7, ngunit nanaig pa rin sa huli ang Asul nang magpamalas ng mapanlinlang na drop shots, 15-13.

Pinantayan ng depensa ng Ginto ang sa Asul sa pangunguna ng mga pamatay na smash ni Zaragosa at matikas na depensa ni De Ocampo upang mamayagpag sa ikalawang set, 15-7.

Kumasa pa ng mga drop shots at smash ang Ginto sa ikatlong set, ngunit hindi na pinakawalan ng Asul ang tagumpay gamit ang rumaragasang forehand drives sa iskor na 15-13.

via Shermaine Florin, Stephanie Vista, at Bashaier Calipes | Arab-Adab Sansinukob

| 𝗦𝗲𝗹𝗲𝗻𝗶𝗰 𝗟𝘆𝗰𝗮𝗻𝘀, 𝗽𝗶𝗻𝗮𝘁𝗶𝗸𝗹𝗼𝗽 𝗮𝗻𝗴 𝗦𝗰𝗮𝗿𝗹𝗲𝘁 𝗦𝘂𝗽𝗲𝗿𝗻𝗼𝘃𝗮, 𝟮-𝟬

Inilaglag ng tambalang Clarence Laurio at Mark Petajen ng Selenic Lycans ang pambato ng Scarlet Supernova na sina Chance Caminar at Hendrich Bagay, 15-8, 15-7, sa elimination round ng IskoLaro 2026 Men’s Badminton Doubles na ginanap sa himnasyo ng Pisay-Bikol nitong ika-15 ng Enero, 2026.

Nagpaulan ng mga umaapoy na backcourt smash si Laurio at mapanlinlang na drop shots si Petajen upang tunawin ang depensa ng P**a sa unang set.

Tuluyang sinilaban ng Puti ang P**a sa pangunguna muli ng mga mala-kidlat na smash ni Laurio, na sinabayan pa ng mintis ng P**a, kung kaya’t nakamit ang iskor na 15-7 at naipako ng Puti ang puwesto tungo sa finals round.

via Shermaine Florin, Kurt Lagrimas, Bashaier Calipes, at Hugo Ramirez | Arab-Adab Sansinukob

| 𝗦𝗲𝗹𝗲𝗻𝗶𝗰 𝗟𝘆𝗰𝗮𝗻𝘀, 𝟮-𝟬 𝘄𝗮𝗴𝗶 𝗸𝗼𝗻𝘁𝗿𝗮 𝗦𝗰𝗮𝗿𝗹𝗲𝘁 𝗦𝘂𝗽𝗲𝗿𝗻𝗼𝘃𝗮 𝘀𝗮 𝗯𝗶𝘀𝗮 𝗻𝗴 𝘁𝗮𝗺𝗯𝗮𝗹𝗮𝗻𝗴 𝗣𝗮𝘁𝘁𝘂𝗴𝗮𝗹𝗮𝗻-𝗗𝗼𝗺𝗮𝘀𝗶𝗮𝗻

Nanaig ang tambalan nina Rianne Pattugalan at Zoe Domasian ng Selenic Lycans laban sa pares nina Jasmine Minero at Kishi Relloso ng Scarlet Supernova, 15-8, 15-13, sa unang laro ng Women’s Badminton Doubles.

Nagbukas ang laban sa dikit na palitan ng puntos sa sunurang rallies, bago tuluyang makalamang ang Puti. Patuloy na lumawak ang agwat ng mga iskor, hanggang sa tuluyang tinuldukan ng isang madiskarteng drop shot ni Domasian ang unang set, 15-8.

Sa kabila ng pitong puntos na pagkakalubog sa unang set, nanatiling matatag ang P**a at agad na kumuha ng maagang bentahe, 6-4, sa ikalawang set. Mabilis namang bumawi ang Puti sa pamamagitan ng sunod-sunod na clears at smashes upang makapagtala ng 4-0 run.

Sinubukan pang humabol ng Supernova sa bisa ng matatalas na drives ni Minero at matatag na depensa ni Relloso sa likuran, subalit hindi ito naging sapat upang magapi ang Lycans, na tuluyang nagtapos sa tapatan sa iskor na 15-13.

via Jenelle Ramirez, Kurt Lagrimas, at Bashaier Calipes | Arab-Adab Sansinukob

| 𝗔𝘂𝗿𝗲𝗹𝗶𝗼𝗻 𝗦𝗼𝗹, 𝗸𝗮𝗺𝗽𝗲𝗼𝗻 𝘀𝗮 𝗪𝗼𝗺𝗲𝗻’𝘀 𝗕𝗮𝗱𝗺𝗶𝗻𝘁𝗼𝗻 𝗙𝗶𝗻𝗮𝗹: 𝗭𝗮𝗽𝗮𝗻𝘁𝗮, 𝗽𝗶𝗻𝗮𝘄𝗶 𝗮𝗻𝗴 𝗱𝗲𝗳𝗲𝗻𝗱𝗶𝗻𝗴 𝗰𝗵𝗮𝗺𝗽𝗶𝗼𝗻 𝘁𝗶𝘁𝗹𝗲 𝗻𝗶 𝗣𝗿𝗲𝘀𝗯𝗶𝘁𝗲𝗿𝗼, 𝟮-𝟬

Napasakamay ng Aurelion Sol ang kampeonato sa Women’s Badminton Singles 𝗙𝗶𝗻𝗮𝗹 matapos dominahin ni Zoe Zapanta ang defending champion na si Rhianne Presbitero ng Selenic Lycans, 15-4, 15-8, sa Winner-Winner Match Up.

Unang dinaig ni Zapanta ang pambato ng Scarlet Supernova na si Gia Barbacena, 15-8, 15-9, gamit ang umaatikabong smashes at high clear shots upang puksain ang kumpiyansa ng katunggali.

Samantala, tinapatan naman ni Presbitero si Avryelle Ortua ng Nebula Serpents sa panimulang laro, 15-6, 15-13, bunsod ng mapanlinlang na drop shots at matitinik na kills, at tuluyang nasungkit ang panalo.

“Siguro, experience. Since [elementary] pa kasi ako naglalaro; feeling ko rin, sa practice,” saad ni Zapanta matapos tanungin tungkol sa kaniyang naging kalamangan.

Maagang itinatag ni Zapanta ang kaniyang nagliliyab na opensa sa unang set matapos magpaulan ng sunod-sunod na solidong smashes at kalkuladong clears, na bigo namang masabayan ni Presbitero, bunsod ng serye ng out at net errors, dahilan upang mabilis na maselyuhan ng Aurelion Sol ang tagumpay sa unang set, 15-4.

Pumuwersa naman bilang ganti si Presbitero nang magtangkang angkinin ang momentum sa mapanlinlang na drop shots at mabibilis na rallies, 8-5, pabor sa Lycans.

Sa huling yugto, muling nagliyab ang Aurelion Sol at nagpakawala ng 10-0 run sa likod ng umaatikabong smashes at mapaminsalang kills upang tuluyang masungkit ni Zapanta ang korona, 15-8.

via Kezia Sandejo at Kurt Lagrimas | Arab-Adab Sansinukob