PMG

မိစ္ဆာတို့ရဲ့ ဘိုးဘေး
အခန်း(၁၃၂)

သုံးနှစ်…
နောက်သုံးနှစ်ကြာပြီးလျှင် အနယ်နယ်အရပ်ရပ်မှ ပါရမီရှင်များက ကောင်းကင်မိစ္ဆာလျှို့ဝှက်နယ်မြေထဲမှာ စုဝေးသွားကြလိမ့်မည်ဖြစ်ကြောင်း သံသယရှိရန် မလိုပေ။
ချူမိသားစုတစ်ခုတည်း မဟုတ်ပေ။ တခြားနေရာများတွင်လည်း ကောလဟာလမျိုးစုံ ထွက်ပေါ်လာသည်။ မည်သို့ဖြစ်ပါစေ ချူထျန်နန်နှင့် သူ့အုပ်စုသာလျှင် တောင်ပိုင်းမြေရိုင်းဒေသထဲမှ လွတ်မြောက်သွားခဲ့ကြခြင်း မဟုတ်ပေ။ တခြားကျင့်ကြံသူများသည်လည်း ထွက်ပြေးလွတ်မြောက်သွားခဲ့ကြသည်။ ထိုကျင့်ကြံသူများ လွတ်မြောက်သွားသည်နှင့် တောင်ပိုင်းမြေရိုင်းဒေသ၏ သတင်းက မသေမျိုးကျင့်ကြံခြင်းလောကမှာ ချက်ချင်း ပျံ့နှံ့သွားသည်။
ရာထောင်ချီသော ကျင့်ကြံသူများက တောင်ပိုင်းမြေရိုင်းဒေသထဲမှာ စုဝေးနေခဲ့ကြသည်။ မိစ္ဆာသားရဲဘုရင်များသည် မည်သည့်နေရာကမှန်းမသိ တစ်ပြိုင်နက် စုပြုံထွက်ပေါ်လာကြသည်။ ထို့နောက် ရက်စက်ကြမ်းကြုတ်သော တိုက်ပွဲက ဖြစ်ပွားလာပြီး ကျင့်ကြံသူအများအပြား အစုလိုက်အပြုံလိုက် သေဆုံးသွားခဲ့ကြသည်။
လူတိုင်း အထင်သေးခဲ့ကြသော တောင်ပိုင်းမြေရိုင်းဒေသဆီမှာ ထိုသို့အင်အားရှိနေမည်ဟု မည်သူမှ မတွေးထားကြချေ။ မိစ္ဆာသားရဲဘုရင်များ၏ ကြောက်မက်ဖွယ်ကောင်းသော စွမ်းအားသည် အမြူတေဖွဲ့စည်းခြင်းနယ်ပယ် မည်သည့်ကျင့်ကြံသူထက်မှ အားမနည်းချေ။ သူတို့၏ အံ့ဖွယ်ကောင်းသော မွေးရာပါသဘာဝစွမ်းရည်များက ကျင့်ကြံသူအများအပြားကို အံ့ဩထိတ်လန့်စေသည်။
အချိန်ကာလတစ်ခုကြာအောင် ကျင့်ကြံသူများ၏ မျက်လုံးထဲမှာ မိစ္ဆာမျိုးနွယ်စုက အမြူတေဓာတ်လုံး ထုတ်ယူရန် အလွယ်တကူ သတ်ပစ်နိုင်သော သို့မဟုတ် ဝိညာဉ်သားရဲများအဖြစ် အလွယ်တကူ ထိန်းကျောင်းနိုင်သော သက်ရှိများထက် မပိုခဲ့ပေ။ သို့သော် သူတို့အထင်သေးခဲ့သော မိစ္ဆာမျိုးနွယ်စုက သူတို့ကို ခြိမ်းခြောက်နိုင်သော အင်အားရှိကြောင်း ယခု ထုတ်ဖော်ပြလာသည့်အခါ မသေမျိုးကျင့်ကြံသူများက အံ့ဩထိတ်လန့်သွားကြသည်။
လေလွင့်ကျင့်ကြံသူတစ်ထောင်ကျော်က အစုလိုက်အပြုံလိုက် အသတ်ခံလိုက်ကြရသည်။
သူတို့က တစ်ကိုယ်တော်လေလွင့်ကျင့်ကြံသူများသာ ဖြစ်သော်လည်း သူတို့အားလုံးကို စုပေါင်းလိုက်သည့်အခါ အလွန်သန်မာသော အင်အားစုတစ်ခု ဖြစ်လာလိမ့်မည်။
ထိုသို့အင်အားစုက မိစ္ဆာသားရဲဘုရင်များ၏ အရှေ့မှာ လက်ဝါးတစ်ချက်မှောက်လှန်ရုံမျှဖြင့် ဖျက်ဆီးနိုင်သော ပုရွက်ဆိတ်အုံထက် မပိုပေ။
ထိုအချက်အလက်က ကျင့်ကြံသူအများအပြားကို လုံးဝ ဆူပူအုံကြွသွားစေသည်။ သူတို့က အံ့ဩထိတ်လန့်သွားကြသည်။
သို့သော်လည်း အံ့ဩထိတ်လန့်ပြီးနောက် ဒေါသက ထွက်ပေါ်လာသည်။ ကျင့်ကြံသူရာထောင်ချီကို တစ်ခါတည်း အစုလိုက်အပြုံလိုက် သတ်ဖြတ်ခြင်းက သူတို့၏ အမြင်မှာ မသေမျိုးကျင့်ကြံခြင်းလောကကို ရန်စလိုက်ခြင်း ဖြစ်သည်။ မသေမျိုးကျင့်ကြံသူများသည် သူတို့၏ လူသားမျိုးနွယ်သာလျှင် အမြင့်မြတ်ဆုံးဖြစ်သည်ဟု အမြဲတမ်း တွေးထင်ခဲ့ကြသည်။ သို့ဖြစ်၍ သူတို့က ယခုကဲ့သို့ ရန်စခံလိုက်ရသောအခါ တောင်ပိုင်းမြေရိုင်းဒေသကို ဖျက်ဆီးပစ်ရန် အလွန်စိတ်ဓာတ်ပြင်းထန်လာကြသည်။
မှန်ပေသည်။ ဆူပူအုံကြွသူများက တစ်ကိုယ်တော်လေလွင့်ကျင့်ကြံသူတချို့၊ ဂိုဏ်းငယ်တချို့နှင့် ကျင့်ကြံခြင်းမိသားစုငယ်တချို့သာ ဖြစ်ကြသည်။ အစစ်အမှန် ဂိုဏ်းကြီးများနှင့် ထိပ်တန်းအဆင့် ကျင့်ကြံခြင်းမိသားစုများသည်တော့ သူတို့က ရည်ရွယ်ချက်ရှိစွာ နှုတ်ဆိတ်နေကြသည်။ သူတို့က ဤကိစ္စအပေါ် မည်သည့်တုံ့ပြန်မှုမှ မပြုလုပ်ကြချေ။ ယင်းက အလွန်ထူးဆန်းသည်။
ဂိုဏ်းကြီးများသည် ဤကိစ္စအပေါ် မည်သည့်တုံ့ပြန်မှုမှ မပြုလုပ်ဘဲ နှုတ်ဆိတ်နေကြသည်။ ယင်းက တောင်ပိုင်းမြေရိုင်းဒေသကို သူတို့ကြောက်ရွံ့သောကြောင့် မဟုတ်ပေ။ ယင်းအစား နောက်သုံးနှစ်နေလျှင် ဖွင့်လှစ်မည့် ကောင်းကင်မိစ္ဆာလျှို့ဝှက်နယ်မြေအတွက် သူတို့ ကြိုပြင်ဆင်နေသောကြောင့် တခြားကိစ္စများကို အာရုံမစိုက်နိုင်သေးခြင်းသာ ဖြစ်သည်။
သို့သော် တောင်ပိုင်းမြေရိုင်းဒေသ၏ ကိစ္စသည် တစ်ကိုယ်တော်လေလွင့်ကျင့်ကြံသူတချို့၏ အမြင်မှာတော့ မျက်စိစပါးမွှေးစူးစရာ ဖြစ်နေဆဲပင်။ ယင်းက လူသိရှင်ကြား ရန်စခြင်း ဖြစ်သည်။ ထိုအကြောင်းကို ကြားသောအခါ သူတို့က ဒေါသထွက်သွားကြသည်။ စိတ်မထိန်းနိုင်သော ကျင့်ကြံသူအနည်းစုသည် တောင်ပိုင်းမြေရိုင်းဒေသဆီသို့ ချက်ချင်း ထွက်သွားကြလိမ့်မည်။
သို့သော် စစ်မှန်သော ဂိုဏ်းကြီးများ၏ အမြင်သည်တော့ သူတို့နှင့် ကွဲပြားခြားနားသည်။ ထို့ကြောင့် သူတို့၏ တုံ့ပြန်ပုံသည်လည်း လုံးဝ ကွဲပြားသည်။
ဤသို့ဆိုးရိုးစကား ရှိ၏။
တစ်စုံတစ်ယောက်၏ အပြုအမူက ထိုသူ၏ အတွေးများကို ဖော်ပြပေးလိမ့်မည်။
ယင်းက လူတစ်ယောက်နှင့်တစ်ယောက် မတူညီခြင်းကို အဓိက ဆိုလိုသည်။ ဥပမာ ရှင်ဘုရင်တစ်ပါးနှင့် သာမန်ပြည်သူတစ်ယောက်၏ အတွေးအခေါ်များက တူညီနိုင်မည်လော။ ထို့နည်းတူပင် သာမန်ကျင့်ကြံသူများနှင့် အတွေ့အကြုံကြွယ်ဝသော ပညာရှင်များ၏ အတွေးအခေါ်များက မည်သို့မှ မတူညီနိုင်ပေ။ ပညာရှင်များသည် ကိစ္စများကို ကိုင်တွယ်ဖြေရှင်းရာတွင် သာမန်ရှုထောင့်၊ သာမန်အမြင်ကို မည်သို့ အသုံးပြုကြမည်နည်း။ ယင်းက မဖြစ်နိုင်ပေ။
မသေမျိုးကျင့်ကြံခြင်းလောက၏ ဂိုဏ်းကြီးများသည် တောင်ပိုင်းမြေရိုင်းဒေသ၏ ကိစ္စနှင့်ပတ်သက်၍ လျစ်လျူရှုကြလိမ့်မည် မဟုတ်ချေ။ သို့သော်လည်း သူတို့က အဓိကနှင့် သာမညကို ခွဲခြားသိမြင်ကြသည်။
ကောင်းကင်မိစ္ဆာလျှို့ဝှက်နယ်မြေနှင့် နှိုင်းယှဉ်သော် တောင်ပိုင်းမြေရိုင်းဒေသ၏ ရန်စမှုက အလွန်သေးငယ်သော ကိစ္စဖြစ်သည်။ ထိုသို့ကိစ္စသေးသေးလေးကို အနာဂတ်တွင် မည်သည့်အချိန်မဆို သူတို့ဖြေရှင်းနိုင်ပေသည်။ လောလောဆယ်တွင် သူတို့အတွက် အဓိကအရေးကြီးဆုံးက လျှို့ဝှက်နယ်မြေဖွင့်လှစ်ခြင်း ဖြစ်သည်။
သူတို့က သုံးနှစ်ကြာအောင် စောင့်ဆိုင်းကြလိမ့်မည်။
ယင်းက မသေမျိုးကျင့်ကြံခြင်းလောကမှ ဂိုဏ်းကြီးများ၏ တူညီသော တုံ့ပြန်မှု ဖြစ်သည်။
သို့သော်လည်း မသေမျိုးကျင့်ကြံခြင်းလောက၏ ဂိုဏ်းငယ်လေးများနှင့် ကျင့်ကြံခြင်းမိသားစုငယ်များသည် ဒေါသူပုန်ထသော အပြုအမူကို ထုတ်ဖော်ကြသည်။ သို့တိုင် သူတို့က မကျေနပ်ကြောင်း ထုတ်ဖော်ရုံမှလွဲ၍ တခြားဘာမှမတတ်နိုင်ကြပေ။ မည်သို့ဖြစ်ပါစေ သူတို့၏ အင်အားစုသေးသေးလေးဖြင့် တောင်ပိုင်းမြေရိုင်းဒေသကို အမြစ်ဖြတ်ချေမှုန်းရန်သည် ကျောက်ဆောင်ကို ကြက်ဥနှင့် ပေါက်သကဲ့သို့ အလွန်ရယ်စရာကောင်းပေသည်။
မည်သူက ယခုအချိန်မှာ တောင်ပိုင်းမြေရိုင်းဒေသဆီသို့ အမှန်တကယ် သွားရောက်ဝံ့မည်နည်း။ တောင်ပိုင်းမြေရိုင်းဒေသထဲမှ မိစ္ဆာသားရဲဘုရင်များက ရူးသွပ်သွားကြပြီး နောက်တစ်ကြိမ် အစုလိုက်အပြုံလိုက် သတ်ဖြတ်ခြင်းကို မလုပ်ဆောင်ဘူးဟု မည်သူက သေချာပြောနိုင်မည်နည်း။
ကျင့်ကြံသူများသည် မည်သည့်အရာနှင့်မဆို အလောင်းအစား ပြုလုပ်ဝံ့ကြသည်။ သို့သော် ထိုထဲမှာ သူတို့၏ အသက်မပါပေ။ သူတို့၏ အသက်ထက် ပိုပြီးအရေးကြီးသောအရာ မရှိပေ။
ထို့ကြောင့် ဤအတောအတွင်း၌ ထူးဆန်းသော ဖြစ်စဉ်က မသေမျိုးကျင့်ကြံခြင်းလောကထဲမှာ ထွက်ပေါ်လာသည်။ မသေမျိုးကျင့်ကြံသူအများအပြားသည် သေဆုံးသွားကြသော လေလွင့်ကျင့်ကြံသူများအတွက် လက်စားပြန်ချေပေးရန် တောင်ပိုင်းမြေရိုင်းဒေသကို သူတို့ဖျက်ဆီးပစ်မည်ဟု အော်ဟစ်ကြွေးကြော်နေကြသည်။ သို့တိုင် ယင်းက ပါးစပ်ပြောမျှသာ ဖြစ်၏။ မိုးခြိမ်းသံက ကျယ်လောင်သော်လည်း မိုးရေစက်က သေးငယ်ပေသည်။ သို့ဖြစ်၍ ထူးဆန်းသော လေထုက မသေမျိုးကျင့်ကြံခြင်းလောကမှာ ဖြစ်ပေါ်လာသည်။
… … …
“ ရှောင်ပိုင်… နင်ပြောတဲ့နေရာက ဘယ်မှာလဲ… ငါတို့လမ်းလျှောက်နေတာ တစ်လပြည့်တော့မယ်… နင်ပြောတဲ့ တောအုပ်ကြီးကို ဘာလို့ ရှာမတွေ့သေးတာလဲ… နင် လမ်းမှားနေတာလား ”
တောင်ပိုင်းမြေရိုင်းဒေသထဲမှ တိုက်ပွဲပြီးဆုံးသွားသည်မှာ တစ်လကြာမြင့်သွားပြီ ဖြစ်၏။ ဂိုဏ်းကြီးများက နှုတ်ဆိတ်နေသောကြောင့် တစ်ကိုယ်တော်လေလွင့်ကျင့်ကြံသူများသည် တောင်ပိုင်းမြေရိုင်းဒေသကို ယာယီတားမြစ်နယ်မြေအဖြစ် သတ်မှတ်လိုက်ကြသည်။
သို့ဖြစ်၍ အတွေ့အကြုံရှာဖွေရန် တောင်ပိုင်းမြေရိုင်းဒေသထဲသို့ ဝင်ရောက်လာကြသော ကျင့်ကြံသူများက လုံးဝ မရှိတော့လုနီးပါး နည်းပါးသွားသည်။ မည်သည့်ကျင့်ကြံသူမှ တောင်ပိုင်းမြေရိုင်းဒေသထဲသို့ မသွားဝံ့တော့ချေ။ လွန်ခဲ့သော တစ်လတွင် ဖြစ်ပွားခဲ့သော တိုက်ပွဲက သူတို့ကို ကြောက်ရွံ့ထိတ်လန့်စေသည်။
ဤအခိုက်အတန့်တွင် ကျားရဲတောင်တန်းဒေသနှင့် အတန်ငယ် ဝေးကွာသော တောအုပ်တစ်ခုထဲတွင် အသက်ဆယ့်နှစ်နှစ် ဆယ့်သုံးနှစ်ခန့်သာ ရှိသေးသော မိန်းကလေးငယ်တစ်ယောက်သည် ရိုးရှင်းသော ဝတ်စုံဖြင့် တောအုပ်ထဲမှာ လမ်းလျှောက်နေသည်။ မိန်းကလေးသည် သာလွန်ထူးခြားပုံမပေါ်ချေ။ သို့သော် သူ၏ အသွင်သဏ္ဍာန်နှင့် အမူအရာမှာ ချစ်စဖွယ်ကောင်းမှုဖြင့် ပြည့်နှက်နေသည်။ သူက အပြစ်ကင်းစင်သော ညီမလေးတစ်ယောက်နှင့် တူညီသည်။ သူ၏ ခန္ဓာကိုယ်ပေါ်တွင် ဆွဲဆောင်မှုအရှိဆုံးက ကြီးမားဝိုင်းစက်သော မျက်လုံးများ ဖြစ်သည်။ ယင်းတို့က အရာရာကို စူးစမ်းချင်နေသည့်အလား တောက်ပသည်။ ထို့ပြင် သူ၏ မျက်လုံးများက မည်သည့်ညစ်ညမ်းမှုမှ တွယ်ကပ်မနေဘဲ အလွန်သန့်စင်သည်။
သူ၏ လက်မောင်းနှစ်ဖက်ပေါ်တွင် ခွေးပေါက်အရွယ်အစားရှိသော ကျားပေါက်လေးတစ်ကောင်ကို ဖက်ထားသည်။ ထိုကျားပေါက်လေး၏ အရောင်သည် အဖြူရောင်ဖြစ်သည်။ အံ့ဩဖွယ်ကောင်းစွာ ၎င်းက ရှားပါးသော ကျားဖြူပေါက်စလေး ဖြစ်သည်။
ထိုမိန်းကလေး အစောနက ပြောခဲ့သော စကားက သူ့လက်မောင်းထဲမှ ကျားဖြူလေးကို ရည်ရွယ်ကြောင်း ထင်ရှား၏။ ထို့ပြင် အကယ်၍ ဤနေရာမှာ တစ်စုံတစ်ယောက် ရှိနေလျှင် ထိုမိန်းကလေး၏ ပါးစပ်ထဲမှ ထွက်လာသော စကားများက လူသားဘာသာစကားမဟုတ်ကြောင်း အံ့ဩဖွယ်ကောင်းစွာ သတိပြုမိကြလိမ့်မည်။ ယင်းအစား သူက မည်သူမှ နားမလည်နိုင်သော ဘာသာစကားကို ပြောသည်။ လူသားများက ယင်းကို နားမလည်နိုင်သော်လည်း တိရိစ္ဆာန်များက နားလည်နိုင်ပေသည်။ မှန်ပေသည်။ သူက သားရဲဘာသာစကားကို ပြောနေခြင်း ဖြစ်သည်။
ဤကုန်းမြေတွင် လူသားမျိုးနွယ်ဆီမှာ သူတို့၏ ကိုယ်ပိုင်ဘာသာစကားရှိသကဲ့သို့ တခြားမျိုးနွယ်စုများတွင်လည်း အချင်းချင်း ပြောဆိုဆက်သွယ်နိုင်သော သူတို့ကိုယ်ပိုင် ဘာသာစကား ရှိသည်။ တိရိစ္ဆာန်များ အချင်းချင်း ပြောဆိုဆက်သွယ်နိုင်သော ဘာသာစကားကို သားရဲဘာသာစကားဟု ခေါ်သည်။
ယေဘုယျအားဖြင့်ဆိုရသော် လူသားများသည် ငှက်များနှင့် တိရိစ္ဆာန်များ၏ စကားကို နားမလည်ကြချေ။ သို့ဖြစ်လေရာ သားရဲဘာသာစကားပြောရန် သူတို့အတွက် ပိုပြီးခက်ခဲပေသည်။
သို့သော် ချွင်းချက်အနေနှင့် လူတစ်မျိုးရှိသည်။
တချို့လူများသည် ပုံမှန်မဟုတ်ဘဲ သန့်စင်သော နှလုံးသားဖြင့် မွေးဖွားလာကြသည်။ သူတို့၏ စိတ်နေသဘောထားက သဘာဝတရားနှင့် လိုက်လျောညီထွေသည်။ ဒဏ္ဍာရီအရ ထိုသို့လူများ၏ ခန္ဓာကိုယ်ထဲမှာ တမူထူးခြားသောနှလုံး ရှိသည်။ သူတို့သည် သက်ရှိအားလုံး၏ နှလုံးသားကို နားထောင်နိုင်သော စွမ်းရည်ဖြင့် မွေးဖွားလာကြသည်။ သူတို့က သက်ရှိအားလုံးနှင့် ပြောဆိုဆက်သွယ်နိုင်ကြသည်။ ထို့ကြောင့် သူတို့ကို မွေးရာပါပါရမီရှင်ဟု ခေါ်ကြသည်။
“ အမဖေးဖေး… အတိတ်မှာတုန်းက ကျားဖြူမေမေရယ်၊ ဒုတိယအကိုနဲ့ ငါ အဖမ်းခံလိုက်ရတုန်းက သဲလွန်စနည်းနည်းပဲ ကျန်ရစ်ခဲ့တယ်… အခုချိန်လောက်ဆို အဲ့ဒါတွေက ပျောက်ကွယ်သွားလောက်ပြီ… ဒါပေမဲ့ ဒီလမ်းအတိုင်း လျှောက်သွားမယ်ဆိုရင် ငါ့အိမ်ကို သေချာပေါက် ရောက်သွားလိမ့်မယ် ”
ကျားဖြူ‌လေးက တိုးညင်းစွာ ပြောသည်။ သူက စကားပြောနေရင်း သူ၏ ဦးခေါင်းကို မိန်းကလေး၏ လက်မောင်းဖြင့် ပွတ်သပ်လိုက်သည်။ ရံဖန်ရံခါ သူ၏ မျက်လုံးထဲ၌ ကြောက်ရွံ့သော အရိပ်အယောင်တစ်စွန်းတစ်စ ထွက်ပေါ်လာသည်။
“ ဟွန့်… တောင်ပေါ်က အဲ့ဒီလူတွေက အရမ်းဆိုးတာပဲ ”
ဖေးဖေးဟူသော မိန်းကလေးက မျက်တောင်တဖျပ်ဖျပ်ခတ်လိုက်ပြီး ပြောသည်။ သူက အေးစက်စွာ ပြောသော်လည်း သူ၏ လေသံထဲမှာ ဒေါသအများကြီး မပါရှိပေ။ သူက ကျားဖြူလေးကို ကြည့်လိုက်ပြီး နှစ်သိမ့်လိုက်သည်။
“ ရှောင်ပိုင်… ဘာမှမကြောက်နဲ့… နင့်ရဲ့ အကိုကို ရှာဖွေဖို့ နင့်ရဲ့ အိမ်ဆီ သေချာပေါက် ငါခေါ်သွားပေးမယ်… ပြီးကျရင် နင့်ရဲ့ အမေနဲ့ ဒုတိယအကိုကို ကယ်တင်ဖို့ ငါတို့တွေ နည်းလမ်းတစ်ခု စဉ်းစားကြမယ် ”
သူ၏ လေသံထဲမှာ မယိမ်းယိုင်သော သေချာမှု ရှိသည်။ သူက အလွန်ဇွဲကောင်းသူ ဖြစ်သည်။
“ ကျေးဇူးတင်ပါတယ် အမဖေးဖေး… ငါတို့ပျောက်နေတာကို သိရင် အကိုက သေလောက်အောင် စိတ်ပူနေတော့မှာ သေချာတယ် ”
ကျားဖြူလေး၏ မျက်လုံးထဲမှာ ဝမ်းနည်းကြေကွဲသော အရိပ်အယောင် ထွက်ပေါ်လာသည်။
“ အမဖေးဖေး… နင်သိမှာမဟုတ်ဘူး… ငါ့ရဲ့ အကိုက အရမ်းအံ့ဩစရာကောင်းတယ်… ”
ထိုသို့ဖြင့် မိန်းကလေးနှင့် ကျားဖြူလေးသည် ကျားရဲတောင်တန်းဒေသဆီသို့ တစ်လှမ်းချင်း လျှောက်သွားနေရင်း စကားပြောနေကြသည်။
အကယ်၍ သီရှီထျန်သာ ဤနေရာမှာ ရှိမည်ဆိုလျှင် မိန်းကလေး၏ လက်မောင်းထဲမှ ကျားဖြူလေးက လွန်ခဲ့သော လအနည်းငယ်ခန့်တွင် မသေမျိုးကျင့်ကြံသူများ၏ ဖမ်းဆီးခံခဲ့ရသော သူ့ညီမလေးဖြစ်ကြောင်း အကြည့်တစ်ချက်ဖြင့် ချက်ချင်း သူမှတ်မိသွားလိမ့်မည်။
မသေမျိုးကျင့်ကြံသူများ၏ ဖမ်းဆီးခံခဲ့ရသော ကျားဖြူလေးက ဤအခိုက်အတန့်မှာ ကျားရဲတောင်တန်းဒေသ၏ အနီးနား၌ ပြန်ပေါ်လာမည်ဟု မည်သူက တွေးမိမည်နည်း။ ယခုကြည့်ရသည်မှာ သူတို့က ကျားရဲတောင်တန်းဒေသဆီသို့ လျှောက်သွားနေကြကြောင်း ထင်ရှားပေသည်။
ထိုသို့အပြောင်းအလဲက သီရှီထျန် လုံးဝ မျှော်လင့်မထားသောအရာဖြစ်သည်။

မိစ္ဆာတို့ရဲ့ ဘိုးဘေး
အခန်း(၁၃၁)

သီရှီထျန်သည် နောက်တစ်လ သို့မဟုတ် နှစ်လအတွင်း ပဟေဠိကို ပြီးမြောက်စွာ ဖြေရှင်းနိုင်လိမ့်မည်ဟု သူ့ကိုယ်သူ ယုံကြည်ချက်ရှိသည်။
သူ၏ ယုံကြည်ချက်သည် ပဟေဠိကို ဖြေရှင်းရန် သူ့ခေါင်းထဲမှာ သိမ်းဆည်းထားသော ဖြစ်နိုင်ခြေအမျိုးမျိုးထံမှ မြစ်ဖျားခံသည်။ ယခု ပဟေဠိအပိုင်းအစများကို ထပ်မံ သူတွဲဆက်လိုက်သည့်အခါ ခက်ခဲမှုအတိုင်းအတာက သိသာစွာ လျော့ကျသွားသည်။ ပဟေဠိကို အောင်မြင်စွာ ဖြေရှင်းရန်သည် သူ့အတွက် မဖြစ်နိုင်သောအရာ မဟုတ်တော့ပေ။ မည်သို့ဖြစ်ပါစေ ယင်းကို အမှန်တကယ် သူပြီးမြောက်ချင်သည်ဆိုလျှင် လအနည်းငယ် ကြာမြင့်လိမ့်မည်။
သို့သော်လည်း ထျန်းအင်ပါယာရတနာသေတ္တာထဲမှ လျှို့ဝှက်ဆန်းကြယ်သော ရတနာအတွက် လအနည်းငယ်ကြာ သူအပင်ပန်းခံရခြင်းက ကြီးမားသော ကိစ္စမဟုတ်ပေ။ ထို့ပြင် ယခု သူ၏ မိစ္ဆာသန့်စင်ခြင်းမီးဖိုထဲမှာ အရေအတွက်များပြားသော ကျင့်ကြံသူအလောင်းများ ရှိနေသည်။ သူကိုယ်တိုင် ကြိုးစားပမ်းစား မကျင့်ကြံလျှင်ပင် မိစ္ဆာသန့်စင်ခြင်းမီးဖိုက သူ့ဘာသာ အလိုအလျောက် လှည့်ပတ်နေပြီး အလောင်းများ၏ အသွေးအသားထဲမှ စွမ်းအင်အနှစ်သာရကို သန့်စင်သော မိစ္ဆာချီအဖြစ် အစဉ်မပြတ် သန့်စင်ပေးလိမ့်မည်။ ထိုလုပ်ငန်းစဉ်သည် သူကိုယ်တိုင် ကျင့်ကြံခြင်းထက် အများကြီး မနှေးပေ။
အတိုချုပ်ဆိုရသော် ထျန်းအင်ပါယာရတနာသေတ္တာ၏ ပဟေဠိကို ဖြေရှင်းခြင်းက သူ၏ ကျင့်ကြံခြင်းအပေါ် အဟန့်အတား မဖြစ်စေပေ။ ထိုလုပ်ငန်းစဉ်နှစ်ခုက အပြန်အလှန် သက်ရောက်မှုမရှိကြပေ။
အရိုးသာဆုံးဝန်ခံရလျှင် သီရှိထျန်သည် ထျန်းအင်ပါယာရတနာသေတ္တာကို သူ့ကိုယ်ပေါ်မှာ သိမ်းဆည်းထားရာတွင် မလုံခြုံမှုကို ခံစားနေမိသည်။
ယင်းက မိစ္ဆာမျိုးနွယ်စု၏ မိစ္ဆာဘုရင်တစ်ပါးနှင့် မသေမျိုးကျင့်ကြံခြင်းလောက၏ ဝိညာဉ်သန္ဓေတည်နယ်ပယ် တန်ခိုးရှင်တစ်ပါးကို အသေအကြေ တိုက်ခိုက်စေသည်အထိ ဆွဲဆောင်နိုင်မှု အလွန်ကြီးမားပေသည်။ အကယ်၍ သူက ထျန်းအင်ပါယာရတနာသေတ္တာကို သူ့ဘေးမှာ ဆက်ထားမည်ဆိုလျှင် အနာဂတ်မှာ ထိုရတနာသေတ္တာက သူ့အပေါ် အန္တရာယ်တစ်စုံတစ်ရာ ခေါ်ဆောင်လာလိမ့်မည်ဟု သူအာရုံရနေသည်။
သူက ထျန်းအင်ပါယာရတနာသေတ္တာကို သယ်ဆောင်ရန် ထိုမျှကြီးမားသော စွန့်စားမှုကို ပြုလုပ်ထားလေရာ ရတနာသေတ္တာထဲမှာ မည်သို့သော လျှို့ဝှက်ချက်ရှိနေကြောင်း သူမသိရလျှင် စိတ်ကျေနပ်နိုင်မည် မဟုတ်။
“ ထျန်းအင်ပါယာရတနာသေတ္တာကို မဖွင့်နိုင်မချင်း ငါအနားမယူဘူး ”
စက်ကရာသည် စိတ်ထဲမှာ တိတ်တဆိတ် ဆုံးဖြတ်ချက်ချလိုက်သည်။ သူက စိတ်ကို တည်ငြိမ်စေရန် ကြိုးစားလိုက်ပြီး ပဟေဠိပေါ်မှာ အာရုံစူးစိုက်လိုက်သည်။ သူက ကျားလက်သည်းကို ဆန့်ထုတ်လိုက်ပြီး ပဟေဠိအပိုင်းအစများကို ဖြည်းဖြည်းချင်း ရွှေ့လိုက်သည်။ သူက အပိုင်းအစတစ်ခုကို ရွှေ့ပြီးသွားတိုင်း ခဏရပ်လိုက်ပြီး နောက်ထပ် မည်သို့ရွှေ့သင့်ကြောင်း စိတ်ထဲမှာ တိတ်တဆိတ် တွေးတောလိုက်သည်။
ပဟေဠိထဲတွင် ဗလာလေးထောင့်အကွက်က တစ်ခုတည်း ရှိသည်။ တချို့အပိုင်းအစများက လိုက်လျောညီစွာ အတူတကွ တွဲဆက်သွားကြစဉ် တချို့အပိုင်းအစများက ပြောက်သောက်ရော‌ထွေးနေကြသည်။ ယင်းတို့ကို ဖြေရှင်းရန် စိတ်စွမ်းအားအများကြီး လိုအပ်သည်။
သို့သော်လည်း စိန်ခေါ်မှုက ပိုပြီးကြီးမားလေ သီရှီထျန်က ပိုပြီးစိတ်ဝင်စားလေ ဖြစ်သည်။ သူက မည်သည့်အနှောင့်အယှက်မှ မတွေ့ကြုံဘဲ သူ၏ စိတ်အာရုံတစ်ခုလုံးကို ပဟေဠိအပိုင်းအစများပေါ်မှာ နစ်မြှုပ်ထားလိုက်သည်။ သူ၏ ခန္ဓာကိုယ်ထဲမှ မိစ္ဆာသန့်စင်ခြင်းမီးဖိုသည်သာ သူ့ဘာသာ ဆက်ပြီး လှည့်ပတ်နေသည်။
တစ်ပတ်ပြီးတစ်ပတ် ကျောက်စိမ်းဆေးမီးဖိုက သူ့ဘာသာ လှည့်ပတ်နေစဉ် ဆေးမီးဖို၏ ဘေးပတ်ဝန်းကျင်၌ ထွန်းလင်းတောက်ပသော ကျောက်စိမ်းအလင်းဝဲကတော့တစ်ခု ထွက်ပေါ်လာသည်။ ယင်းက ဆန်းကြယ်သော မြင်ကွင်းတစ်ခုပင်တည်း။ စွမ်းအင်အနှစ်သာရအမျှင်တန်းများသည် ကျောက်စိမ်းဆေးမီးဖိုထံမှ အဆက်မပြတ် ဆွဲထုတ်ခံနေရပြီး ဆေးမီးဖိုအတွင်း၌ ထူထဲသော မဟူရာသွေးမြူခိုးထုကို ဖွဲ့စည်းလိုက်သည်။ ကျောက်စိမ်းဆေးမီးဖိုက လှည့်ပတ်နေစဉ် အနက်ရောင်အရည်စက်များက မဟူရာသွေးမြူခိုးထုထဲမှ တတောက်တောက် ကျဆင်းနေသည်။ အနက်ရောင်အရည်စက်များသည် ကျောက်စိမ်းဆေးမီးဖို၏ အောက်ခြေတွင် အချင်းချင်း ပေါင်းစည်းသွားကြသည်။
ထိုအနက်ရောင်အရည်သည် မိစ္ဆာချီ သို့မဟုတ် မိစ္ဆာစွမ်းအင်အနှစ်သာရ ဖြစ်သည်။ အနက်ရောင်အရည်စက်များ တိုးပွားလာခြင်းက သီရှီထျန်၏ ကျင့်ကြံခြင်းစွမ်းအား နည်းနည်းချင်းစီ တိုးပွားလာခြင်းပင် ဖြစ်၏။
အချိန်က တိတ်တဆိတ် ကုန်လွန်သွားသည်။.. ... ...
“ တတိယညီတော်… အဲ့ဒါကို မင်းရဲ့ မျက်စိနဲ့ ကိုယ်တိုင်မြင်ခဲ့တာလား… တောင်ပိုင်းမြေရိုင်းဒေသရဲ့ အရှေ့၊ အနောက်၊ တောင်နဲ့ မြောက်မှာ ကိုယ်ပိုင်နယ်မြေနဲ့ မင်းမူအုပ်ချုပ်နေကြတဲ့ မိစ္ဆာသားရဲဘုရင်တွေက အတူတူ အင်အားပူးပေါင်းလိုက်ကြပြီး တောင်တန်းဒေသထဲ ဝင်ရောက်လာကြတဲ့ လေလွင့်ကျင့်ကြံသူရာထောင်ချီကို သုတ်သင်ပစ်လိုက်တယ်တဲ့လား… ကျင့်ကြံသူတွေအများကြီး တိုက်ပွဲမှာ သေဆုံးသွားကြပြီး အနည်းစုပဲ ထွက်ပြေးလွတ်မြောက်ခဲ့ကြတယ်… အဲ့ဒါ ဘယ်လိုလုပ်ဖြစ်နိုင်မှာလဲ ”
ချူစံအိမ်တော်ထဲတွင် ချူထျန်ရှင်းသည် သူ့အရှေ့မှ ဝတ်စုံစိမ်းဝတ် အမျိုးသားကို မယုံကြည်နိုင်စွာ ကြည့်လိုက်သည်။ ဝတ်စုံစိမ်းဝတ် အမျိုးသား၏ ဘေးတွင် ကောင်လေးတစ်ယောက်နှင့် မိန်းမပျိုလေးတစ်ယောက် ရှိသည်။ သူတို့သည် မိုးထိတောင်မှ ထွက်ပြေးလွတ်မြောက်သွားကြသော ကျိုးယွမ်ဖေးနှင့် ချူယွမ်မှလွဲ၍ တခြားမဟုတ်ပေ။
ဝတ်စုံစိမ်းဝတ် အမျိုးသားသည် ချူထျန်ရှင်း၏ ညီတော်ဖြစ်သည်။ သူက သူ့မျိုးဆက်တွင် တတိယမြောက်ကလေးဖြစ်သောကြောင့် သူ့ကို ချူထျန်နန်ဟု ခေါ်သည်။ သူက ချူယွမ်၏ တတိယဦးရီးတော်လည်း ဟုတ်၏။
အတိတ်မှာ ချူထျန်နန်သည် ကျိုးယွမ်ဖေး၊ ချူယွမ်နှင့်အတူ တောင်ပိုင်းမြေရိုင်းဒေသဆီသို့ လိုက်သွားခဲ့သည်။ တောင်ပိုင်းမြေရိုင်းဒေသထဲမှာ မိစ္ဆာသားရဲဘုရင်များက ကျင်လည်ကျက်စားနေကြလေရာ ချူမိသားစုက မည်သို့ကြောင့် ကလေးနှစ်ယောက်တည်း လွှတ်လိုက်နိုင်မည်နည်း။ ချူထျန်နန်က သူတို့ကို ကာကွယ်စောင့်ရှောက်ပေးရန် အနောက်မှ လိုက်သွားခဲ့သည်။ သူတို့နှစ်ယောက် မဖြေရှင်းနိုင်သော အန္တရာယ်ဖြင့် ရင်ဆိုင်ရသည့်အခါ သူက အရှေ့ထွက်လာပြီး ကူညီပေးလိမ့်မည်။
ချူထျန်နန်သည်လည်း ကလေးနှစ်ယောက်၏ အနောက်ကို လိုက်သွားရင်း ထိုမျှထိတ်လန့်ဖွယ်ကောင်းသော တိုက်ပွဲဖြင့် တွေ့ကြုံရလိမ့်မည်ဟု လုံးဝ သူမမျှော်လင့်ထားခဲ့ပေ။
“ အကိုတော်… အဲ့ဒါကို ငါ့မျက်စိနဲ့ ကိုယ်တိုင်မြင်ခဲ့တာပါ… ယွမ်အာလည်းပဲ အဲ့ဒါကို ကိုယ်တိုင် တွေ့ကြုံခဲ့ပါတယ်… ငါ နည်းနည်းလေးမှ ချဲ့ကားမပြောပါဘူး… အကိုတော်… မင်း ငါ့ရဲ့ ဒီလက်ကို ကြည့်လိုက်ရင် နားလည်သွားလိမ့်မယ် ”
ချူထျန်နန်က ပြာနှမ်းနေသော မျက်နှာဖြင့် သူ၏ ဘယ်လက်ကို မြှောက်ပြလိုက်သည်။ လမ်းတစ်လျှောက်တွင် သူက ဝတ်စုံရှည်ကို ဝတ်ဆင်ထားခဲ့သည်။ ထို့ကြောင့် သူလမ်းလျှောက်နေစဉ် သူ၏ လက်နှစ်ဖက်စလုံးကို ဝတ်စုံက ဖုံးအုပ်ထားသည်။ အကယ်၍ တစ်စုံတစ်ယောက်က သေချာသတိထား၍ မကြည့်မိလျှင် သူ၏ ဘယ်လက်က တစ်စုံတစ်ခု မူမမှန်နေကြောင်း လုံးဝ သတိထားမိလိမ့်မည် မဟုတ်ချေ။
ယခု သူက အင်္ကျီလက်ထဲမှ သူ၏ ဘယ်လက်ကို ဆန့်ထုတ်လိုက်သည်။ ယင်းက ချူထျန်ရှင်း၏ အမူအရာကို လုံးဝ ပြောင်းလဲသွားစေသည်။ သူက ထိုလက်ကို စူးစိုက်ကြည့်လိုက်လေရာ သူ၏ မျက်နှာက ဖော်မပြနိုင်အောင် တည်ကြည်လေးနက်သွားသည်။
ကျိုးယွမ်ဖေးနှင့် ချူယွမ်သည် တစ်ပြိုင်နက် ခေါင်းငုံ့လိုက်ကြသည်။ သူတို့၏ မျက်နှာပေါ်မှာ ဝမ်းနည်းစိတ်မကောင်းဖြစ်သော အမူအရာ ရှိသည်။
“ တတိယညီတော်… မင်းရဲ့ လက်က… ”
“ ဟုတ်တယ်… ငါ့ရဲ့ လက်က ကျောက်တုံးဖြစ်သွားပြီ ”
ချူထျန်နန်က ခါးသီးစွာ ပြုံးလိုက်သည်။
“ တောင်ပိုင်းမြေရိုင်းဒေသထဲက မိစ္ဆာသားရဲဘုရင်တွေက တကယ် ကြောက်ဖို့ကောင်းတယ်… အဓိကကတော့ သူတို့ရဲ့ မွေးရာပါသဘာဝစွမ်းရည်ပဲ… သူတို့တစ်ကောင်စီက ကြောက်စရာကောင်းတဲ့ စွမ်းရည်တွေကို ပိုင်ဆိုင်ထားကြတယ်… ငါ့ရဲ့ ဒီလက်က မဒူဆာမျက်လုံးရဲ့ အစွမ်းကြောင့် ကျောက်တုံးပြောင်းသွားခဲ့တယ် ”
ထိုအကြောင်းကို ပြန်ပြောသည့်အခါ ချူထျန်နန်၏ မျက်နှာပေါ်တွင် စိုးရိမ်ကြောင့်ကြသော အမူအရာ ထွက်ပေါ်လာသည်။ ကြောက်ရွံ့မှု အရိပ်အယောင်တစ်စွန်းတစ်စပင် သူ၏ မျက်လုံးထဲမှာ ရှိသည်။
“ ကောင်းကင်မိစ္ဆာလျှို့ဝှက်နယ်မြေဆီကနေ ငါရလာခဲ့တဲ့ မိစ္ဆာတားဆီးလက်ကြောင့်မဟုတ်ရင် ငါ့လက်တစ်ဖက်တည်းမဟုတ်ဘဲ ငါ့တစ်ကိုယ်လုံး ကျောက်ရုပ်ဖြစ်သွားမှာ စိုးရိမ်ရတယ်… အဲ့ဒီမွေးရာပါသဘာစွမ်းရည်က အရမ်းကြောက်စရာကောင်းတယ် ”
လက်စသတ်တော့ သူသည် အတိတ်၌ မဒူဆာ၏ မျက်လုံးကို သူမျှော်လင့်ထားသကဲ့သို့ အလွယ်တကူ မတားဆီးနိုင်ခဲ့ပေ။ သူ၏ ဘယ်လက်က လုံးဝ ကျောက်တုံးဖြစ်သွားသည်။
အမြူတေဖွဲ့စည်းခြင်းနယ်ပယ် ကျင့်ကြံသူတစ်ယောက်၏ လက်က ကျောက်တုံးဖြစ်သွားလေရာ မဒူဆာမျက်လုံးက မည်မျှကြောက်စရာကောင်းကြောင်း စိတ်ကူးကြည့်နိုင်၏။
“ ဟွန့် ”
ချူထျန်ရှင်းက အေးစက်စွာ နှာခေါင်းရှုံ့လိုက်သည်။ အေးစက်စက်အလင်းက သူ၏ မျက်လုံးထဲမှာ ဖြတ်ပြေးသွားလျှင် သူက တင်းမာခက်ထန်စွာ ပြောသည်။
“ ဘာမဟုတ်တဲ့ တောင်ပိုင်းမြေရိုင်းဒေသကများ မသေမျိုးကျင့်ကြံခြင်းလောကရဲ့ အရှေ့မှာ အင်အားပြရဲတယ်လား… သူတို့က တမင်သေလမ်းရှာနေတာလား… မိစ္ဆာသားရဲတွေရဲ့ မွေးရာပါသဘာဝစွမ်းရည်က ဘယ်လောက်ပဲ အားကောင်းပါစေ သူတို့က မသေမျိုးကျင့်ကြံခြင်းလောကရဲ့ တန်ခိုးရှင်တွေကို ရင်ဆိုင်နိုင်လို့လား… သူတို့က ကျားအသည်းနဲ့ နဂါးနှလုံးကို စားထားလို့ အဲ့လောက် သတ္တိကောင်းနေတာလား… အရမ်းလွန်သွားပြီ ”
ချူထျန်ရှင်းက သတ်ဖြတ်ခြင်းစိတ်ဆန္ဒပါသော လေသံဖြင့် ပြောသည်။ ဧကရာဇ်တစ်ပါး၏ အရှိန်အဝါက သူ့ထံမှ သဘာဝအလျောက် ပေါ်လျှိုးလာသည်။ သို့တိုင် သူ၏ မျက်လုံးထဲမှာ သံသယ အရိပ်အယောင်တစ်စွန်းတစ်စ ရှိနေဆဲပင်။ သူက ပြောသည်။
“ အခုခေတ်မှာ မိစ္ဆာမျိုးနွယ်စု နိမ့်ကျသွားပြီဆိုပေမဲ့ တောင်ပိုင်းမြေရိုင်းဒေသ အခုချိန်ထိ ရပ်တည်နိုင်နေတာ မိစ္ဆာမျိုးနွယ်စုထဲမှာ ကျွမ်းကျင်ပညာရှင်တချို့ ရှိနေသေးလို့ပဲ… နောက်ထပ် အကြောင်းအရင်းက တောင်ပိုင်းမြေရိုင်းဒေသကို အဆင့်နိမ့်ကျင့်ကြံသူတွေ ကိုယ့်ကိုယ်ကိုယ် လေ့ကျင့်ပျိုးထောင်ပြီး အတွေ့အကြုံရှာဖွေနိုင်တဲ့ နေရာတစ်နေရာအဖြစ် သတ်မှတ်ထားလို့ပဲ… ပုံမှန်ဆိုရင် ကျင့်ကြံသူတွေက တောင်တန်းဒေသထဲ ဝင်ပြီး အတွေ့အကြုံမရှာဖွေခင် လိုက်နာရမယ့် စည်းမျဉ်းတချို့ကို သိထားသင့်တယ်… ဘယ်လိုလုပ် သူတို့က တောင်ပိုင်းမြေရိုင်းဒေသရဲ့ မိစ္ဆာသားရဲဘုရင်အားလုံး အပြင်ထွက်လာအောင် ရန်ပြုမိခဲ့တာလဲ ”
မသေမျိုးကျင့်ကြံခြင်းလောကတွင် အဆင့်နိမ့်ကျင့်ကြံသူများနှင့် တစ်ကိုယ်တော်လေလွင့်ကျင့်ကြံသူများသည် အတွေ့အကြုံရှာဖွေရန်နှင့် ဝိညာဉ်ရတနာများ ရှာဖွေရန် တောင်ပိုင်းမြေရိုင်းဒေသထဲသို့ ဝင်ရောက်ကြလေ့ ရှိသည်။ ထို့ကြောင့် နှစ်ပေါင်းများစွာကြာပြီးနောက် တောင်တန်းဒေသထဲ မဝင်ရောက်မီ လိုက်နာရမည့် စည်းမျဉ်းစည်းကမ်းတချို့ အလိုအလျောက် ထွက်ပေါ်လာသည်။ ယင်းကို တရားဝင်မထုတ်ပြန်ထားသော်လည်း ကျင့်ကြံသူများသည် တောင်တန်းဒေသထဲတွင် မိစ္ဆာသားရဲဘုရင်များကို မည်သည့်အကြောင်းနှင့်မှ ရန်မပြုရပေ။
ယေဘုယျအားဖြင့်ဆိုရသော် ကျင့်ကြံသူများက မိစ္ဆာသားရဲများကို သွားရောက်ရန်မပြုလျှင် မိစ္ဆာသားရဲများက ကျင့်ကြံသူများကို စတင်တိုက်ခိုက်လိမ့်မည် မဟုတ်ချေ။
ထိုအကြောင်းကြောင့် တောင်ပိုင်းမြေရိုင်းဒေသက အချိန်အများစုတွင် တိတ်ဆိတ်အေးချမ်းခဲ့သည်။
“ ခမည်းတော်… ယွင်အာ အဲ့ဒီအကြောင်း သိပါတယ် ”
ယင်းကို ချူယွမ်ကြားသောအခါ သူက မျက်တောင်တဖျပ်ဖျပ်ခတ်လိုက်ပြီး တုံ့ဆိုင်းစွာ ပြောသည်။
ချူထျန်ရှင်း၏ မေးမြန်းမှုအောက်မှာ ချူယွမ်သည် တောင်ပိုင်းမြေရိုင်းဒေသထဲမှာ ဖြစ်ပျက်ခဲ့သမျှအားလုံးကို ချက်ချင်း ပြောပြလိုက်သည်။ သူပြောပြနေစဉ် ချူထျန်ရှင်း၏ အမူအရာက အစဉ်အမြဲ ပြောင်းလဲသွားသည်။
“ လီမိသားစုက အဲ့ဒီလိုနည်းလမ်းကို တကယ်ကြီး အသုံးပြုခဲ့တာလား… သူတို့က ဝိညာဉ်သံလိုက်အိမ်မြှောင်ကို ပြန်ရယူဖို့ ဘာမဆိုလုပ်ဆောင်ရဲကြတယ်… ကြည့်ရတာ သူတို့က နောက်သုံးနှစ်နေရင် ဖွင့်လှစ်မယ့် ကောင်းကင်မိစ္ဆာလျှို့ဝှက်နယ်မြေအတွက် ပြင်ဆင်နေတဲ့ပုံပဲ ”
ချူထျန်ရှင်း၏ လေသံထဲမှာ ဩဇာအာဏာအရှိန်အဝါ ကိန်းအောင်းနေသည်။ သူက ချူယွမ်၏ စကားများမှတဆင့် လီမိသားစု၏ ရည်ရွယ်ချက်က ကောင်းကင်မိစ္ဆာလျှို့ဝှက်နယ်မြေဖြစ်ကြောင်း ချက်ချင်း သိလိုက်သည်။
“ အင်း… ကောင်းကင်မိစ္ဆာလျှို့ဝှက်နယ်မြေရဲ့ ဆွဲဆောင်မှုကို ဘယ်ကျင့်ကြံသူမှ မလွန်ဆန်နိုင်ဘူး… လွန်ခဲ့တဲ့ နှစ်ထောင်ပေါင်းများစွာအတွင်း ကောင်းကင်မိစ္ဆာလျှို့ဝှက်နယ်မြေကို ကြိမ်ဖန်များစွာ ဖွင့်လှစ်ခဲ့တယ်ဆိုပေမဲ့ ငါတို့ကျင့်ကြံသူတွေက ကောင်းကင်မိစ္ဆာလျှို့ဝှက်နယ်မြေတစ်ခုလုံးရဲ့ ဆယ်ပုံတစ်ပုံကိုပဲ ရှာဖွေဖော်ထုတ်နိုင်သေးတယ်… ဒါတောင်မှ ငါတို့ရှာတွေ့ခဲ့တဲ့ ရတနာတွေက တန်ခိုးရှင်အများကြီးကို မွေးထုတ်ပေးနိုင်ခဲ့တယ်… ဘယ်သူမဆို ကောင်းကင်မိစ္ဆာလျှို့ဝှက်နယ်မြေကို စူးစမ်းရှာဖွေဖို့ စိတ်ဝင်စားကြတယ် ”
ချူထျန်နန်သည်လည်း ခေါင်းညိတ်လိုက်ပြီး ပြောသည်။
“ တကယ်လို့ လီမိသားစုရဲ့ လက်ထဲမှာ ဝိညာဉ်သံလိုက်အိမ်မြှောင်ရှိမယ်ဆိုရင် သူတို့က တခြားလူတွေထက်ပိုပြီး ရတနာတွေကို လွယ်လွယ်ကူကူ ရှာဖွေနိုင်လိမ့်မယ်… လီမိသားစုက ဝိညာဉ်သံလိုက်အိမ်မြှောင်ကို အသည်းအသန် ပြန်လိုချင်နေတာ မထူးဆန်းတော့ပါဘူး ”
ချူထျန်ရှင်းက အနည်းငယ် မျက်မှောင်ကြုတ်လိုက်ပြီး အသက်ပြင်းပြင်းရှူသွင်းလိုက်သည်။
“ ကျင့်ကြံသူရာထောင်ချီက တောင်ပိုင်းမြေရိုင်းဒေသထဲမှာ သေဆုံးသွားတယ်ဆိုတဲ့ သတင်းက မကြာခင် မသေမျိုးကျင့်ကြံခြင်းလောကတစ်ခုလုံးမှာ ပျံ့နှံ့သွားလိမ့်မယ်… အဲ့ဒီအခါကျရင် ကြီးမားတဲ့ ဆူပူအုံကြွမှုတစ်ခု သေချာပေါက် ဖြစ်ပေါ်လာလိမ့်မယ်… မိစ္ဆာမျိုးနွယ်စုက နိမ့်ကျသွားပြီ… ပြီးတော့ မသေမျိုးကျင့်ကြံခြင်းလောကက အခုလို ရန်စမှုကို သေချာပေါက် ခွင့်လွှတ်မှာ မဟုတ်ဘူး… တောင်ပိုင်းမြေရိုင်းဒေသ ဖျက်ဆီးခံရဖို့ သိပ်မလိုတော့ဘူး ”
“ အကိုတော်… ငါ့အမြင်မှာ တောင်ပိုင်းမြေရိုင်းဒေသထဲက မိစ္ဆာသားရဲဘုရင်တွေက ရင်ဆိုင်ရမလွယ်ကူဘူး… တကယ်လို့ ငါတို့လှုပ်ရှားမယ်ဆိုရင် အင်အားနည်းနည်းနဲ့ သူတို့ကို အမြစ်ဖြုတ်နိုင်မှာ မဟုတ်ဘူး… ဒါ့အပြင် ကောင်းကင်မိစ္ဆာလျှို့ဝှက်နယ်မြေက မကြာခင် ဖွင့်လှစ်တော့မယ်… တောင်ပိုင်းမြေရိုင်းဒေသရဲ့ ကိစ္စကို လောလောဆယ် လျစ်လျူရှုထားကြမှာ ငါစိုးရိမ်တယ် ”
ချူထျန်နန်က လက်ရှိအခြေအနေကို အနည်းငယ် နားလည်ထားကြောင်း ထင်ရှား၏။ သူက လေးနက်စွာ တွေးတောစဉ်းစားပြီးနောက် သူ့အမြင်ကို ထုတ်ဖော်ပြောသည်။
“ အင်း… မင်းပြောတာ မှန်တယ် ”
ချူထျန်ရှင်းက သူ့ကို သဘောတူညီစွာ ခေါင်းညိတ်ပြလိုက်ပြီး ပြောသည်။
“ မိစ္ဆာမျိုးနွယ်စုက နိမ့်ကျသွားပြီ… သူတို့ကို နောက်တစ်ကြိမ် ခေါင်းပြန်ထောင်ဖို့ ခွင့်မပြုနိုင်ဘူး… အားလုံးက နောက်သုံးနှစ် စောင့်ဆိုင်းကြလိမ့်မယ်… လီမိသားစုက ကောင်းကင်မိစ္ဆာလျှို့ဝှက်နယ်မြေဆီ ဝင်ရောက်မယ့် ခရီးစဉ်အတွက် အင်အားအကုန် ထုတ်သုံးလိမ့်မယ်… ငါတို့လည်းပဲ နောက်ကျကျန်နေလို့ မဖြစ်ဘူး… ပါရမီရှိပြီး အလားအလာကောင်းတဲ့ တပည့်တချို့ကို ရွေးထုတ်ရမယ်… နောက်သုံးနှစ်ကြာပြီးရင် သူတို့ကို ကောင်းကင်ဘုံရေကန်မှာ နှစ်ခြင်းမင်္ဂလာခံယူစေဖို့ ကောင်းကင်မိစ္ဆာလျှို့ဝှက်နယ်မြေဆီ ငါတို့စေလွှတ်မယ်… အဲ့ဒီအခါကျရင် တတိယညီတော်… မင်းသူတို့ကို ဦးဆောင်ရမယ်… ဘယ်သူသိနိုင်မှာလဲ… ကောင်းကင်ဘုံရေကန်က မင်းရဲ့ လက်ကို အကောင်းတိုင်း ပြန်ဖြစ်စေဖို့ ကူညီပေးနိုင်လောက်တယ် ”
“ ကောင်းကင်ဘုံရေကန်လား… အကိုတော် အဲ့ဒါကို ငါလည်း စဉ်းစားမိတယ်… ကောင်းကင်ဘုံရေကန်ရဲ့ စွမ်းအားက ဒီမိစ္ဆာအတတ်ကို ပျက်ပြယ်စေနိုင်ဖို့ ရာခိုင်နှုန်းများတယ် ”
ချူထျန်နန်က ညင်သာစွာ ခေါင်းညိတ်လိုက်ပြီး တုံ့ပြန်လိုက်သည်။
သူ၏ အသံထဲမှာ မျှော်လင့်မှုဖြင့် ပြည့်နှက်နေသည်။

မိစ္ဆာတို့ရဲ့ ဘိုးဘေး
အခန်း(၁၃၀)

သို့သော် မိစ္ဆာကျင့်ကြံသူများက ကွဲပြားခြားနားကြသည်။ သူတို့သည် အမြူတေဖွဲ့စည်းသွားသည့်အခါ အသွင်သဏ္ဍာန်ပြောင်းလဲခြင်း ကပ်ဘေးဒုက္ခကို ရင်ဆိုင်ကြရလိမ့်မည်။ သူတို့သည် အမြူတေဓာတ်လုံး ဖွဲ့စည်းပြီးနောက် ကောင်းကင်ဘုံကပ်ဘေးဒုက္ခ (၉)ဆင့်ကို ဖြတ်ကျော်ကြရလိမ့်မည်။ ကောင်းကင်ဘုံကပ်ဘေးဒုက္ခတစ်ဆင့်စီသည် ငရဲဘုံဂိတ်တံခါးကို ဖြတ်ကျော်ရသကဲ့သို့ အလွန်ခက်ခဲသည်။ အကယ်၍ သူတို့က အလုံအလောက်မသန်မာလျှင် ကောင်းကင်ဘုံကပ်ဘေးဒုက္ခ၏ မိုးကြိုးပစ်ချက်အောက်မှာ ပြာဖြစ်သွားလိမ့်မည်။ ထို့ပြင် ကောင်းကင်ဘုံကပ်ဘေးဒုက္ခ၏ စွမ်းအားသည် တစ်ကြိမ်ပြီးသွားတိုင်း ပိုပြီးသန်မာလာလိမ့်မည်။ အကြိမ်တိုင်းမှာ ယင်းက ယခင်ကောင်းကင်ဘုံကပ်ဘေးဒုက္ခထက် အများကြီး ပိုကြောင်းစရာကောင်းလိမ့်မည်။
ငှက်များနှင့် တိရိစ္ဆာန်များသည် မိစ္ဆာဖြစ်လာရန် လွယ်ကူကြသည်။ သို့သော် ဝိညာဉ်သစ်ပင်များနှင့် ပန်းပင်များအတွက်မူ မိစ္ဆာဖြစ်လာရန် အလွန်ခက်ခဲပေသည်။ အဘယ့်ကြောင့်ဆိုသော် ပထမကောင်းကင်ဘုံကပ်ဘေးဒုက္ခတွင် သူတို့သည် နေရာမှ ဆန္ဒရှိသည့်အတိုင်း မရွေ့လျားနိုင်ပေ။
ဝိညာဉ်သစ်ပင်များသည် ငှက်များနှင့် တိရိစ္ဆာန်များကဲ့သို့ သူတို့ဆန္ဒရှိသကဲ့သို့ အပြည့်အစုံ အသွင်မပြောင်းလဲနိုင်ကြပေ။ ယင်းအစား သူတို့၏ ခန္ဓာကိုယ်တစ်ပိုင်းသာလျှင် ရုပ်အသွင်ပြောင်းလဲနိုင်ပေသည်။ မူလခန္ဓာကိုယ်သည်တော့ မြေကြီးထဲမှာ ဆက်ပြီး အမြစ်တွယ်နေရဦးလိမ့်မည်။ ထို့ကြောင့် သူတို့သည် ဆန္ဒရှိသကဲ့သို့ နေရာမှ မရွေ့လျားနိုင်ကြချေ။
ပထမဆုံး မိစ္ဆာကပ်ဘေးဒုက္ခ(၁၉)ခုကို ဖြတ်ကျော်ပြီး သူ၏ မူလခန္ဓာကိုယ်က အပြည့်အစုံ ရုပ်အသွင်ပြောင်းလဲသွားမှသာလျှင် သူတို့က ထိုကန့်သတ်ချုပ်နှောင်မှုကို ချိုးဖြတ်နိုင်ကြလိမ့်မည်။
ထို့ကြောင့် ပထမကောင်းကင်ကပ်ဘေးဒုက္ခသည် အပင်ကျင့်ကြံသူများအတွက် အလွန်အရေးကြီးသည်။
“ ကောင်းကင်ကပ်ဘေးဒုက္ခကို အမ သေချာပေါက် ကျော်ဖြတ်နိုင်လိမ့်မယ်လို့ ကျူးအာ ယုံကြည်တယ်… အဲ့ဒီအချိန်ကျရင် အမက ဒီချိုင့်ဝှမ်းထဲကနေ ဆန္ဒရှိသလို ထွက်သွားနိုင်လိမ့်မယ်… အဲ့ဒီမသေမျိုးကျင့်ကြံသူတွေက အမရဲ့ ပြိုင်ဘက်မဖြစ်နိုင်ပါဘူး ”
ဇာမဏီငှက်သည် သူ့အမပေါ်မှာ မယိမ်းယိုင်သော အကြွင်းမဲ့ ယုံကြည်မှုရှိကြောင်း ထင်ရှား၏။
ယင်းကို ကြားသောအခါ မိန်းမပျိုလေးက ခပ်ရေးရေး ပြုံးလိုက်သည်။ အကြောင်းအရင်းကို သူမသိသော်လည်း ထိုအခိုက်အတန့်မှာ ပုံရိပ်တစ်ခုက သူ၏ စိတ်ထဲမှာ ထွက်ပေါ်လာသည်။ ဖော်မပြနိုင်သော ထူးထူးဆန်းဆန်း အမူအရာက သူ၏ မျက်နှာပေါ်မှာ ထွက်ပေါ်လာသည်။
“ အရမ်း… အရမ်းသန်မာတယ် ”
မိစ္ဆာအသင်္ချေချိုင့်ဝှမ်းထဲတွင် သီရှီထျန်သည် သူ့နဖူးပေါ်မှ ခရမ်းရောင်ဘုရင်စာလုံး၏ အပြောင်းအလဲများကို စစ်ဆေးကြည့်နေရင်း ရုတ်တရက် အသိပြန်ဝင်သွားသည်။ ခရမ်းရောင်အလင်း၏ ဖုံးလွှမ်းမှုအောက်မှာ သူ့အရှေ့မှ ရာထောင်ချီသော ဝိညာဉ်များက ဘုရင်စာလုံးထဲသို့ အဆက်မပြတ် ဝင်ရောက်သွားကြသည်။
ဝိညာဉ်တစ်ကောင် ဝင်ရောက်သွားတိုင်း သူ၏ ဘုရင်စာလုံးထံမှ စွမ်းအားက အနည်းငယ် တိုးပွားသွားကြောင်း ရှင်းလင်းစွာ သူခံစားမိသည်။
ထိုဝိညာဉ်များသည် ခရမ်းရောင်ရေကန်ထဲသို့ ဝင်ရောက်သွားပြီးနောက် မြွေများသဖွယ် အရေခွံလဲသွားကြဟန် ရ၏။ ထို့နောက် သူတို့က ခရမ်းရောင်ရေကန်နှင့် အပြည့်အဝ ပေါင်းစည်းသွားကြသည်။ ဝိညာဉ်အားလုံးက ဘုရင်စာလုံးထဲသို့ ဝင်ရောက်သွားသည့်အခါ သူ၏ နဖူးပေါ်မှ ခရမ်းရောင်ဘုရင်စာလုံးထဲတွင် အစွမ်းထက်အင်အားတစ်ခု တည်ရှိနေကြောင်း စက်ကရာ ရှင်းလင်းစွာ အာရုံခံမိသွားသည်။ သို့သော်လည်း မည်သို့သူကြိုးစားပါစေ ထိုအင်အားကို အပြင်ဘက်သို့ မထုတ်လွှတ်နိုင်ပေ။ ယင်းက သူ့အတွက် နောင်တရစရာပင်။
“ ဂရား ”
စက်ကရာ၏ မိစ္ဆာအာရုံက ဘုရင်စာလုံးထဲသို့ ဝင်ရောက်သွားသော်လည်း သူ၏ ခန္ဓာကိုယ်ပေါ်မှ လွှမ်းမိုးဗိုလ်ကျသော သားရဲအရှိန်အဝါကို သူမချုပ်တည်းထားပေ။ ယင်းအစား သူက တိုးညင်းစွာ ဟိန်းဟောက်လိုက်သည်။ ထိုစဉ် သူ၏ ခန္ဓာကိုယ်က ရုတ်တရက် အရွယ်အစားကြီးမားသွားသည်။
“ ဝှစ်… ဝှစ်… ဘန်း… ဘန်း ”
အသက်ရှူချိန်အနည်းငယ်အတွင်းမှာ ဘေးပတ်ဝန်းကျင်မှ ဝိညာဉ်စွမ်းအားက ပြင်းထန်စွာ တုန်ယင်သွားပြီး မြန်ဆန်စွာ ကြီးထွားလာနေသော သူ့ခန္ဓာကိုယ်၏ တွန်းထုတ်ခံလိုက်ရသည်။ ထို့ကြောင့် ခပ်အုပ်ခုပ် ပေါက်ကွဲသံများက သူ၏ ဘေးပတ်ဝန်းကျင်မှာ ဆက်တိုက် ထွက်ပေါ်လာသည်။
လျှပ်တစ်ပြက်အတွင်းမှာ သူက မူလပေငါးဆယ်အမြင့်သို့ ပြန်ကြီးထွားသွားသည်။
သူက ကျယ်လောင်စွာ ပါးစပ်ဟလိုက်ပြီး သူ့အရှေ့မှ လေကို အကြမ်းပတမ်း စုပ်သွင်းလိုက်သည်။ တစ်ချိန်တည်းမှာ သူ၏ အတွေးတစ်ချက်ကြောင့် သူ၏ မိစ္ဆာစံအိမ်ထဲမှ မိစ္ဆာသန့်စင်ခြင်းမီးဖိုက ချက်ချင်း မြန်ဆန်စွာ လှည့်ပတ်သွားသည်။ လှည့်ပတ်မှုက အလွန်မြန်ဆန်လေရာ မိစ္ဆာသန့်စင်ခြင်းမီးဖို၏ ဘေးမှာ ဝဲကတော့တစ်ခု ထွက်ပေါ်လာသည်။ ဝဲကတော့က မြန်ဆန်စွာ လှည့်ပတ်နေစဉ် အံ့ဖွယ်ကောင်းသော စုပ်အားတစ်ခုက သူ၏ ခန္ဓာကိုယ်ထဲမှ ရုတ်တရက် ပေါ်လျှိုးလာသည်။
သွေးဆာလောင်သော ကျားပါးစပ်က ဝေလငါးပါးစပ်သဖွယ် ဖွင့်ဟသွားသည်။
မြေပြင်ပေါ်မှာ လဲလျောင်းနေကြသော ကျင့်ကြံသူအလောင်းများသည် သူ၏ ပါးစပ်ထဲသို့ မြားများသဖွယ် စုပ်ယူခံလိုက်ကြရသည်။ ထို့နောက် သူတို့က ဝဲကတော့၏ စုပ်ယူမှုကြောင့် မိစ္ဆာသန့်စင်ခြင်းမီးဖိုထဲသို့ တိုက်ရိုက် ဝင်ရောက်သွားကြသည်။ ထုံးစံအတိုင်းပင် သူတို့သည် မိစ္ဆာသန့်စင်ခြင်းမီးဖို၏ စုပ်ယူခံရပြီးနောက် အရွယ်အစား ကျုံ့သွားကြသည်။
မိစ္ဆာသန့်စင်ခြင်းမီးဖိုသည် ကောင်းကင်ဘုံအဆင့် မိစ္ဆာစံအိမ်များသာလျှင် ပိုင်ဆိုင်နိုင်သော တမူထူးခြားမှု ဖြစ်သည်။ ခန္ဓာကိုယ်တစ်ခုပြီးတစ်ခု ဆက်တိုက် စုပ်ယူခံနေရသော်လည်း မိစ္ဆာသန့်စင်ခြင်းမီးဖိုက မပြည့်သွားပေ။ ဤသည်မှာ မိစ္ဆာသန့်စင်ခြင်းမီးဖိုက အောက်ခြေမရှိသော တွင်းနက်တစ်ခုဖြစ်သည့်အလားပင်။ ယင်းက အရွယ်အစားသေးငယ်ပုံပေါ်သော်လည်း အတွင်းဘက်၌ အလွန်ကျယ်ပြောသော နယ်မြေလွတ်တစ်ခု ရှိနေသည်။
ဤလုပ်ဆောင်မှုတွင် အလောင်းများက နယ်မြေလွတ်၏ ဝါးမျိုခံလိုက်ရသည့်အလားပင်။
ဆယ်ငါးမိနစ်ကြာပြီးနောက် အလောင်းအများစုက မိစ္ဆာသန့်စင်ခြင်းမီးဖို၏ စုပ်ယူခံလိုက်ရသည်။ သူ၏ အရှေ့တွင် အလောင်းတစ်ရာခန့်သာ ကျန်ရှိတော့မှ သီရှီထျန်က နောက်ဆုံးမှာ ရပ်တန့်လိုက်သည်။ သူက သာမန်ကျားတစ်ကောင်၏ အရွယ်အစားသို့ ပြန့်ကျုံ့သွားပြီးလျှင် ချီဟောင်နှင့် တခြားသားရဲဘုရင်များကို ကြည့်လိုက်သည်။
“ အဲ့ဒီခန္ဓာကိုယ်တွေကို မင်းတို့ငါးကောင် ခွဲဝေယူလိုက်ကြပါ… မှတ်ထားပါ… အဲ့ဒါတွေကို မသိမ်းထားဘဲ အမြန်ဆုံး ဝါးမျိုရမယ်… သူတို့ကို များများဝါးမျိုနိုင်လေ မင်းတို့အတွက် ပိုပြီးအကျိုးရှိလေပဲ… ပြီးတော့ ဒီအတောအတွင်းမှာ လူတိုင်း ချိုင့်ဝှမ်းထဲမှာပဲနေပြီး တစိုက်မတ်မတ် ကျင့်ကြံရမယ်… တစ်နှစ်အတွင်း မိစ္ဆာသားရဲဖြစ်လာနိုင်အောင် အကောင်းဆုံး ကြိုးစားကြပါ… အနာဂတ်မှာ တောင်ပိုင်းမြေရိုင်းဒေသက အကြီးကြီး ပြောင်းလဲသွားလိမ့်မယ်… မင်းတို့တွေ မိစ္ဆာသားရဲမဖြစ်လာဘူးဆိုရင် ကိုယ့်အသက်ကို ကိုယ်ကာကွယ်နိုင်မှာ မဟုတ်ဘူး ”
သီရှီထျန်က တည်ကြည်လေးနက်သော အသံဖြင့် ပြောသည်။ မသေမျိုးကျင့်ကြံသူများကို တိုက်ခိုက်ရန် သူဆုံးဖြတ်လိုက်ကတည်းက အနှေးနှင့်အမြန် တောင်ပိုင်းမြေရိုင်းဒေသက ကပ်ဘေးကြုံလာနိုင်ကြောင်း ကြိုတင်တွက်ဆထားခဲ့သည်။ ယခု သူက လောလောဆယ် အေးချမ်းနေသည့် အချိန်ကာလကို အသုံးချ၍ သူ၏ ခွန်အားကို အမြန်ဆုံး တိုးမြှင့်ရမည်။
စက်ကရာသည် ခွန်အားကို တိုးမြှင့်ရန်မှလွဲ၍ တခြားမည်သည့်အရာကိုမှ မစဉ်းစားနိုင်သေးပေ။
“ အရှင်မင်းကြီး… တစ်စုံတစ်ခု ဖြစ်လာတော့မှာလား… အဲ့ဒါ ကျင့်ကြံသူတွေနဲ့ သက်ဆိုင်နေတာလား ”
ယင်းကို ကြားသောအခါ ချီဟောင်က အလျင်စလို မေးသည်။ ကပ်ဘေးနှင့်ပတ်သက်၍ သူက မသေမျိုးကျင့်ကြံသူများအကြောင်း ချက်ချင်း တွေးမိသွားသည်။ ယင်းကို သူစဉ်းစားမိသည်နှင့် သူ၏ မျက်လုံးက ရုတ်တရက် နီရဲသွားပြီး သူ၏ အသက်ရှူသံက ပြင်းထန်လာသည်။ မီးပွားမီးစတချို့သည်ပင် သူ၏ နှာခေါင်းပေါက်ထဲမှ ထွက်ပေါ်လာသည်။
" အရှင်မင်းကြီး "
ပိုင်စုစုနှင့် တခြားသားရဲဘုရင်များသည်လည်း တစ်ယောက်နှင့်တစ်ယောက် အပြန်အလှန် ကြည့်လိုက်ကြသည်။
“ လောလောဆယ် အဲ့ဒီကိစ္စကို မင်းတို့စိတ်ပူစရာမလိုသေးဘူး… အချိန်ကို အကျိုးရှိရှိ အသုံးချပြီး တစိုက်မတ်မတ် ကျင့်ကြံဖို့ပဲ အာရုံစိုက်ထားပါ… ယွမ်ထျန်း… မင်းကတော့ မျောက်မင်းဝိုင်ကို ချက်လုပ်ဖို့လည်း အာရုံစိုက်ရမယ်… မျောက်မင်းဝိုင်ရဲ့ အကူအညီနဲ့ဆိုရင် မင်းတို့တွေ ဒီတစ်နှစ်အတွင်း သေချာပေါက် မိစ္ဆာသားရဲတွေ ဖြစ်လာနိုင်ကြလိမ့်မယ်… မင်းတို့တွေ နည်းနည်းလေးတောင် အချောင်ခိုနေလို့ မဖြစ်ဘူး ”
စက်ကရာသည် အနာဂတ်အကြောင်း အများကြီး စဉ်းစားမနေပေ။ လောလောဆယ်တွင် သူ၏ နှလုံးသားထဲမှာ အစီအစဉ်တစ်ခု အကြမ်းဖျဉ်းရှိနေပြီ ဖြစ်၏။
ယွမ်ထျန်းသည် ခေါင်းကုတ်လိုက်ပြီး အော်ပြောလိုက်သည်။
“ စိတ်ချပါ အရှင်မင်းကြီး… မျောက်မင်းဝိုင်အတွက် လိုအပ်တဲ့ ပါဝင်ပစ္စည်းအားလုံးကို ရောသမမွှေပြီးပါပြီ… နောက်နှစ်ရက်ကြာပြီးရင် ဒီငယ်သားက မျောက်မင်းဝိုင်ကို စတင်ချက်လုပ်နိုင်ပါပြီ… လအနည်းငယ်အတွင်းမှာ ဒီငယ်သားက အရှင်မင်းကြီးရှေ့တော်ဆီ မျောက်မင်းဝိုင်ကို ဆက်သပါမယ် ”
ယခု သူ့ဆီမှာ မျောက်မင်းဝိုင်ချက်လုပ်ရာတွင် လိုအပ်သော အပင်အမျိုးမျိုး၊ သစ်သီးသစ်ဖုအမျိုးမျိုးနှင့် ဆေးဖက်ဝင်အပင်အမျိုးမျိုး ရှိသည်။ ထို့ပြင် အရေးကြီးဆုံး ပါဝင်ပစ္စည်းဖြစ်သော ဝိုင်သစ်သီးသည်လည်း ဤနေရာမှာ အများအပြား ရှိသည်။
ဝိုင်သစ်သီးသည် အလွန်ထူးခြားသော သစ်သီးတစ်မျိုးဖြစ်သည်။ ယင်းက ဝိုင်သစ်ပင်ဟု ခေါ်သော အပင်ပေါ်မှာသာ အသီးသီးသည်။ ဝိုင်သစ်သီးကို တစ်ကိုက် ကိုက်လိုက်လျှင် လတ်ဆတ်သော သစ်သီးအရည်က စီးကျလာလိမ့်မည်။ ထိုသစ်သီးအရည်သည် ဝိုင်ဖန်တီးရာတွင် မပါမဖြစ်သော အဓိကပစ္စည်း ဖြစ်သည်။ သစ်သီးအရည်၏ အရသာသည် ဝိုင်ကဲ့သို့ ပြင်းရှပြီး လတ်ဆတ်သည်။
သာမန်လူတစ်ယောက်က ဝိုင်သစ်သီးကို စားသုံးလိုက်မည်ဆိုလျှင် သုံးရက်သုံးညကြာအောင် ယဇ်မူးနေလိမ့်မည်။ အာနိသင်ပြေသွားမှသာ သူက အသိပြန်ဝင်လာပြီး နိုးလာလိမ့်မည်။
တမူထူးခြားသော ဝိုင်သစ်သီးမရှိလျှင် အစစ်အမှန် မျောက်မင်းဝိုင်ကို ချက်လုပ်ရန် လုံးဝ မဖြစ်နိုင်ပေ။
“ အရမ်းကောင်းတယ် ”
ယင်းကို သီရှီထျန်ကြားသောအခါ သူက စိတ်ထဲမှာ ဝမ်းသာပျော်ရွှင်သွားပြီး ခေါင်းညိတ်လိုက်သည်။
မျောက်မင်းဝိုင်၏ အကူအညီဖြင့်ဆိုလျှင် မိစ္ဆာအသင်္ချေချိုင့်ဝှမ်းတစ်ခုလုံး၏ အင်အားက သေချာပေါက် မြန်မြန်ဆန်ဆန် တိုးမြှင့်သွားလိမ့်မည်။
သူ၏ ညွှန်ကြားမှုအောက်မှာ ချီဟောင်နှင့် တခြားသားရဲဘုရင်များသည် ကျင့်ကြံသူအလောင်းတချို့ကို ယူဆောင်၍ သူတို့၏ ကိုယ်ပိုင်နယ်မြေဆီသို့ မြန်ဆန်စွာ ပြန်သွားကြသည်။ အကယ်၍ သူတို့က ထိုခန္ဓာကိုယ်များကို အချိန်မီ မသန့်စင်နိုင်လျှင် ယင်းတို့၏ စွမ်းအင်အနှစ်သာရက အလေအလွင့်ဖြစ်သွားလိမ့်မည်။
သီရှီထျန်သည်လည်း သူ့ကိုယ်ပိုင်လှိုဏ်ဂူဆီသို့ ပြန်သွားပြီး နူးညံ့သော သားရဲအမွှေးပေါ်မှာ လဲလျောင်းလိုက်သည်။
သူ၏ အရှေ့၌ သိုလှောင်အိတ်က လင်းလက်သွားလေရာ လျှို့ဝှက်ဆန်းကြယ်သော ထျန်းအင်ပါယာရတနာသေတ္တာက သူ့အရှေ့မှာ ထွက်ပေါ်လာသည်။
ရတနာသေတ္တာပေါ်မှ ပဟေဠိတစ်စိတ်တစ်ပိုင်းက ယခု ပြီးမြောက်သွားပြီ ဖြစ်၏။ ထိုသေးငယ်သော အပိုင်းသည် တခြားနေရာများနှင့် ကွဲပြားခြားနားသည်။ ယင်းက ရောင်စုံအလင်းကို ထုတ်လွှတ်ပေးနေသည်။
“ ဒီကိစ္စဖြစ်ပြီးနောက် တောင်ပိုင်းမြေရိုင်းဒေသက အချိန်တစ်ခုအထိတော့ ငြိမ်းချမ်းနေလိမ့်မယ်… အခု ငါက ထျန်းအင်ပါယာရတနာသေတ္တာရဲ့ ပဟေဠိအကြောင်း အကြမ်းဖျဉ်းသိသွားပြီ… ငါ့မှာ နောက်ထပ် အချိန်တစ်လရှိမယ်ဆိုရင် ရတနာသေတ္တာပေါ်က ပဟေဠိကို သေချာပေါက် ငါဖြေရှင်းနိုင်လိမ့်မယ်… ရတနာသေတ္တာက အရမ်းလျှို့ဝှက်ဆန်းကြယ်တယ်… သေတ္တာထဲက ရတနာက လုံးဝ သာမန်မဖြစ်နိုင်ဘူး… အဲ့ဒါက ငါ့ရဲ့ ကျင့်ကြံခြင်းကို ကူညီပေးနိုင်လောက်တယ် ”
သီရှီထျန်က ထျန်းအင်ပါယာရတနာသေတ္တာကို ကြည့်လိုက်လေရာ စိတ်ဓာတ်ပြတ်သားမှုက သူ၏ မျက်လုံးထဲမှာ ထွက်ပေါ်လာသည်။
ရတနာသေတ္တာပေါ်မှ ပဟေဠိသည် အလွန်အမင်း ခက်ခဲသည်။ ဤအတောအတွင်းမှာ သူက အချိန်အားလပ်သည့်အခါတိုင်း စိတ်ထဲမှာ ပဟေဠိကို ဖြေရှင်းရန် တွေးတောစဉ်းစားခဲ့သည်။ အချိန်တစ်ခုကြာပြီးနောက် ပဟေဠိကို မည်သို့ဖြေရှင်းသင့်ကြောင်း အကြမ်းဖျဉ်း သူနားလည်သွားသည်။
ဤရက်ပိုင်းမှာ သူအလုပ်များနေသောကြောင့်မဟုတ်လျှင် သူက ရတနာသေတ္တာပေါ်မှ ပဟေဠိကို တိတ်တဆိတ် ဖြေရှင်းနေလိမ့်မည်။ ရတနာသေတ္တာက လျှို့ဝှက်ဆန်းကြယ်လေရာ သေတ္တာထဲမှ ရတနာသည်လည်း သေချာပေါက် လျှို့ဝှက်ဆန်းကြယ်ရမည်။ ထို့ကြောင့် သူက သေတ္တာထဲမှ ရတနာကို အလွန်စိတ်ဝင်စားနေသည်။
ယခု သူ့ကို စိတ်အနှောင့်အယှက်ပေးနေသည့် ပြဿနာက ပြီးဆုံးသွားပြီဖြစ်လေရာ နောက်ဆုံးမှာ စက်ကရာက စိတ်ဆုံးဖြတ်ချက်ချလိုက်သည်။ သူက နောက်ရက်များတွင် ရတနာသေတ္တာပေါ်မှ ပဟေဠိကို ဖြေရှင်းပြီး ရတနာသေတ္တာထဲမှ လျှို့ဝှက်ချက်ကို ဖော်ထုတ်မည်။