Colombo Devans

🇹🇩

LPL තරගාවලියේ ශ්‍රී ලාංකිකයෙකුට හිමි එකම එක කණ්ඩායමක් තියෙනවා. අනෙකුත් කණ්ඩායම් අයිති විදේශීය ව්‍යාපාරිකයන්ටයි.
"දඹුල්ල සික්සර්ස්" තමයි කණ්ඩායම. එහි හිමිකරු, ප්‍රියංග ද සිල්වා. ප්‍රධාන විධායක නිළධාරී, ඈෂ්ලි හේරත්. ප්‍රධාන පුහුණුකරුවා, රංගන හේරත්. ඒ තුන්දෙනාගේ සමානකමක් තියෙනවා. තිදෙනාම ආදී මලියදේවයන්.
කුරුණෑගල මලියදේව විදුහලට ක්‍රීඩා කරලා ශ්‍රී ලංකාව නියෝජනය කරපු රංගන හේරත් තමයි ලොව විශිෂ්ටම වමත් දඟපන්දු යවන්නා. ටෙස්ට් කඩුලුම 433ක්! වමතින් ඊට උඩින් ලොව කිසිවෙක් නෑ. ඔහු 2014 විස්සයි-විස්ස ලෝක ශූරයෙක්. නවසීලන්තයට එරෙහිව ලකුණු 3කට කඩුලු 5ක් (බ්‍රෙන්ඩන් මැකලම්, රොස් ටේලර්, ලූක් රොන්කි, ජිමී නීෂම්, ට්‍රෙන්ට් බෝල්ට්) අරගෙන රංගන දක්වපු දක්ෂතාවය, එතැන් සිට පැවැත්වුණු ලෝක කුසලාන 6කට පස්සෙත් විස්සයි-විස්ස ලෝක කුසලාන ඉතිහාසයේ දෙවැනි හොඳම පන්දු යැවීම. එදා ඔහු දුවද්දී දවාගැනීම් දෙකකටත් දායක වුණා. විශිෂ්ටයෙක්.
කවුද එතකොට ප්‍රියංග ද සිල්වා? ඔහුයි 1981 මලියදේව 19න් පහළ ක්‍රිකට් නායකයා. ඔහු 1983 "වසරේ පිටපළාත් පාසල් ක්‍රිකට් ක්‍රීඩකයා" වුණේ ලකුණු 1100කුත්, කඩුලු 50කුත් එක්ක. ක්‍රිකට් විතරක් නෙමෙයි. රග්බි, පාපන්දු, මළල ක්‍රීඩා ඔහුගේ ඇඟේ තිබුණා. ඒත් හදවතේ තිබුණේ ක්‍රිකට්. පළමු පෙළ ක්‍රිකට් ක්‍රීඩා කරලා ඔහු ගියා ඇමරිකා එක්සත් ජනපදයට. නිව්ජර්සි ජනපදයේ රැගර්ස් විශ්ව විද්‍යාලයෙන් සිවිල් ඉංජිනේරුවෙකු හැටියට ශාස්ත්‍රපති උපාධියත් සම්පූර්ණ කළා.
ඇමරිකා එක්සත් ජනපදයේ වරලත් සිවිල් ඉංජිනේරුවෙකු හැටියට කටයුතු කළ ඔහු විසින් 2006දී ආරම්භ කළ "Sequoia Consultants" ආයතනය, කැලිෆෝනියාවේ ප්‍රමුඛ සේවා සපයන්නෙකු වුණා. එහි ප්‍රධාන විධායක නිළධාරීවරයා හැටියට, ප්‍රියංග ද සිල්වා 2024දී "දඹුල්ල සික්සර්ස්" කණ්ඩායමේ හිමිකාරිත්වය ලබාගත්තා. LPL කණ්ඩායමක් හිමි එකම ශ්‍රී ලාංකිකයා! ව්‍යාපාරික දැවැන්තයෙක්.
ක්‍රිකට් වලට තියෙන ආදරය නිසා තවමත් ක්‍රීඩාවේ යෙදෙන ඔහු ඇමරිකානු කණ්ඩායම නියෝජනය කරමින් 2024 මාස්ටර්ස් ලෝක කුසලාන තරගාවලියත් නියෝජනය කළා. ඒත් ඔහුට අවශ්‍ය වුණේ උපන්බිමට සේවය කරන්නයි.
"දඹුල්ල සික්සර්ස් එක්ක මට ශ්‍රී ලංකාවට නැවත යමක් ලබාදෙන්න අවශ්‍යයි. ශ්‍රී ලංකා ක්‍රිකට්, ලෝක මට්ටමේ සශ්‍රීක වෙනවා දකින්නට", ඔහු කියනවා.
අර්ජුන රණතුංග, 1996 ලෝක කුසලාන තරගාවලියේ ජයග්‍රාහී නායකයා වෙන්න කලින් ශ්‍රී ලංකා 19න් පහළ නායකයා හැටියට තමිල්නාඩු කණ්ඩායමට එරෙහිව දස්කම් පාද්දී ඔහුගේ උප නායකයා වුණේ ඔල්ගා ඈෂ්ලි හේරත්. අද ඔහු තමයි "දඹුල්ල සික්සර්ස්" කණ්ඩායමේ ප්‍රධාන විධායක නිළධාරියා. මලිදෙව් පුතෙක්. වේල්ස් විශ්ව විද්‍යාලයේ ව්‍යාපාර කළමණාකාරීත්ව උපාධිදරයෙක්.
"සාමූහිකව, ලෝක මට්ටමේ ක්‍රීඩා සන්නාමයක් නිර්මාණය කිරීමටයි අපට අවශ්‍ය", ඔහු කියනවා.
ඉතින් ඔක්කොම මලියදේවෙන්ද? අපොයි නෑ. අම්බලන්ගොඩ ධර්මාශෝක විදුහලෙන් කොළඹ අනන්ද විද්‍යාලයට ඇවිල්ලා, එතැනින් ජාත්‍යන්තරයට පිවිසුණු දිනේෂ් චන්දිමාල් තමයි "දඹුල්ල සික්සර්ස්" කණ්ඩායමේ නායකයා. "චන්දි"ට තියෙන නම ගැන අමුතුවෙන් ලියන්න අවශ්‍ය නෑ. ශ්‍රී ලංකාව 2014 විස්සයි-විස්ස ලෝක ශූරයන් වෙනකොට කණ්ඩායමේ නිත්‍ය නායකයා වුණේ ඔහුයි.
අත්දැකීම් බහුල දුෂ්මන්ත චමීර, මහීෂ් තීක්ෂණ, අකිල ධනංජය, නිරෝෂන් දික්වැල්ල, රමේෂ් මෙන්ඩිස්, ලහිරු කුමාර මේ කණ්ඩායමේ සාමාජිකයන්. නැගීඑන නවකයන් හැටියට පවන් රත්නායක, ධනංජය ලක්ෂාන්, ගයන වීරසිංහ සහ සචිත ජයතිලක ඉන්නවා. කවුද එතකොට විදෙස් ක්‍රීඩකයන්?
2026 විස්සයි විස්ස ලෝක කුසලාන තරගාවලියේ වැඩිම ලකුණුලාභියා ඉන්නේ "දඹුල්ල සික්සර්ස්" එක්කයි. ඒ පාකිස්තානයේ ෂහීබ්සාදා ෆර්හාන්. 2026 T20 ලෝක කුසලාන තරගාවලියේ අවසන් මහා තරගයට එනතෙක්ම වැඩිම කඩුලුලාභියා වුණු ඇ.එ.ජනපදයේ ෂැඩ්ලි වැන්ෂ්කල්ක්වයික් ඉන්නේත් මේ කණ්ඩායමේ. T20 ශතක 5ක් ගහලා තියෙන, දකුණු අප්‍රිකාවේ රීසා හෙන්ඩ්‍රික්ස් සහ ඩියන් ෆොරෙස්ටර්, ඇෆ්ගනිස්තානයෙන් ෆසල්හක් ෆරූකි, ගුල්බදින් නයිබ්, පාකිස්තානයේ මොහමඩ් වසීම් කණ්ඩායමට ඇතුළත්.
මේ හැමෝටම අනුශාසකත්වය දෙන්නේ ශ්‍රී ලංකා ක්‍රිකට් ක්‍රීඩාවේ "මහත්මයෙක්". ඒ තමයි රොෂාන් මහානාම. තමන්ගේ කීර්තිනාමය එදා සිට අද දක්වාම නොකිලිටිව පවත්වාගත්තු කෙනෙකු හැටියට මහානාමගේ මහානාමය ප්‍රචලිතයි.
මෙවර තරගාවලියේ දුර්වල කණ්ඩායම් කියලා එකක් නෑ. හිමිකරුවන් දෙස්විදෙස් කොහේවුණත් තරගාවලිය පැවැත්වෙන එකයි ලොකුම කාරණය. ඒත් "දඹුල්ල සික්සර්ස්" කණ්ඩායම "අපේ" කියන හැඟීම බහුතර ප්‍රේක්ෂකයන්ට නිරායාසයෙන් දැනෙන්න ඉඩකඩ තියෙනවා. හිමිකරු, ප්‍රධාන විධායක නිළධාරී සහ පුහුණුකරු ශ්‍රී ලංකාවේ කුරුණෑගලින්. අනුශාසක කොළඹින්. ක්‍රීඩකයන් කිහිපදෙනෙකු උඩරටින්. කිහිපදෙනෙකු පහතරටින්. මුළු රටම එකට!
ශක්තිමත් කණ්ඩායම් අතරින් ඉදිරියටම යන කණ්ඩායම වෙන්න දඹුල්ලට තියෙනවා විශාල බලාපොරොත්තුවක්. තමන්ගේ රට ගැන ඔවුන්ට තියෙන්නේ අභිමානයක්. ඒකයි ඔවුන් කියන්නේ, "අවුලමු අභිමානය!" කියලා.
- අසංක හදිරම්පෑල.
*Picture generated by AI.