KPPA

സംസ്ഥാന ഫാർമസി കൗൺസിൽ മരണാനന്തര ധനസഹായം വർധിപ്പിക്കണം;
പ്രായപരിധി 70 ആയി ഉയർത്തണം ഫാർമസി കൗൺസിലിൻ്റെ - ജനറൽ കൗൺസിൽ യോഗത്തിൽ ശക്തമായ ആവശ്യമുന്നയിച്ച് KPPA

ഫാർമസിസ്റ്റുകൾക്കുള്ള മരണാനന്തര ധനസഹായ പദ്ധതി കാലോചിതമായി പരിഷ്കരിക്കണമെന്നും, നിലവിലെ ആനുകൂല്യങ്ങൾ ഗണ്യമായി വർധിപ്പിക്കണമെന്നും കേരള പ്രൈവറ്റ് ഫാർമസിസ്റ്റ്സ് അസോസിയേഷൻ (KPPA-Reg No:03-21/88) ഭാരവാഹികളായ ഫാർമസി കൗൺസിൽ അംഗങ്ങൾ സംസ്ഥാന ഫാർമസി കൗൺസിൽ ജനറൽ കൗൺസിൽ യോഗത്തിൽ ശക്തമായി ആവശ്യപ്പെട്ടു.

സംസ്ഥാന കമ്മിറ്റിയുടെ തീരുമാനപ്രകാരം ജനറൽ കൗൺസിൽ അംഗങ്ങളായ കെ.പി. സണ്ണി, ദിലീപ് കുമാർ ടി.ആർ ജാസ്മിമോൾ എ. എന്നിവർ അവതരിപ്പിച്ച പ്രമേയത്തിൽ പ്രധാനമായും ആവശ്യപ്പെട്ടത്:

🔺 മരണാനന്തര ധനസഹായത്തിന് നിലവിലുള്ള 56 വയസ്സ് എന്ന പ്രായപരിധി 70 വയസായി ഉയർത്തുക.
🔺 നിലവിൽ നൽകുന്ന ₹25,000 രൂപയുടെ മരണാനന്തര ധനസഹായം ₹1,00,000 ആയി വർധിപ്പിക്കുക.
🔺 ക്യാൻസർ, അവയവമാറ്റ ശസ്ത്രക്രിയ നടത്തിയവർ ഉൾപ്പെടെയുള്ള ഗുരുതര രോഗങ്ങൾ ബാധിച്ച ഫാർമസിസ്റ്റുകൾക്ക് ₹50,000 രൂപയുടെ പ്രത്യേക ധനസഹായം അനുവദിക്കുക.

ഈ ആവശ്യങ്ങൾ വിശദമായി ചർച്ച ചെയ്ത ജനറൽ കൗൺസിൽ, സർക്കാരിന്റെ അംഗീകാരത്തിനായി ശുപാർശ സമർപ്പിക്കാൻ തീരുമാനമെടുത്തു.

KPPA ഏറെക്കാലമായി ഉന്നയിക്കുന്ന മറ്റൊരു പ്രധാന വിഷയമാണ് കേരളത്തിലെ ഫാർമസിസ്റ്റ് ക്ഷേമപദ്ധതികളുടെ അപര്യാപ്തത. കർണാടക പോലുള്ള സംസ്ഥാനങ്ങളിൽ ഇൻഷുറൻസ് പരിരക്ഷയുടെ പിന്തുണയോടെ മരണപ്പെടുന്ന ഫാർമസിസ്റ്റുകളുടെ കുടുംബങ്ങൾക്ക് കൂടുതൽ സാമ്പത്തിക സഹായം ലഭ്യമാകുമ്പോൾ, കേരളത്തിൽ അതിന് തുല്യമായ ക്ഷേമപദ്ധതികൾ ഇപ്പോഴും നിലവിലില്ലെന്ന വിമർശനം സംഘടന പ്രതിനിധികൾ വീണ്ടും യോഗത്തിൽ ഉയർത്തിക്കാട്ടി.

അതോടൊപ്പം, നിലവിലുള്ള മരണാനന്തര ധനസഹായം പോലും ഗുണഭോക്താക്കൾക്ക് കാലതാമസത്തോടെ ലഭിക്കുന്ന സാഹചര്യം പല ജില്ലകളിലും പ്രതിഷേധങ്ങൾക്ക് ഇടയാക്കിയിട്ടുണ്ടെന്നും കൗൺസിൽ അംഗങ്ങൾ ചൂണ്ടിക്കാട്ടി. സഹായത്തിന്റെ തുക വർധിപ്പിക്കുന്നതോടൊപ്പം, അപേക്ഷകൾ സമയബന്ധിതമായി തീർപ്പാക്കി അർഹരായ കുടുംബങ്ങൾക്ക് അടിയന്തരമായി ധനസഹായം ലഭ്യമാക്കുന്ന കാര്യത്തിലും ഫാർമസി കൗൺസിൽ പ്രത്യേക ശ്രദ്ധ ചെലുത്തണമെന്ന് ആവശ്യപ്പെട്ടു.

ഒരു ഫാർമസിസ്റ്റ് ജീവിതകാലം മുഴുവൻ ആരോഗ്യരംഗത്തിന് നൽകിയ സേവനത്തിന് ശേഷവും, അദ്ദേഹത്തിന്റെ കുടുംബം സാമ്പത്തിക സുരക്ഷിതത്വമില്ലാതെ ദുരിതമനുഭവിക്കേണ്ട സാഹചര്യം അവസാനിപ്പിക്കേണ്ടത് സർക്കാരിന്റെയും ഫാർമസി കൗൺസിലിന്റെയും സാമൂഹിക ഉത്തരവാദിത്വമാണെന്ന് കെപിപിഎ പ്രതിനിധികൾ യോഗത്തിൽ അഭിപ്രായപ്പെട്ടു.

കെ.വി. പങ്കജാക്ഷൻ
സംസ്ഥാനപ്രസിഡൻ്റ്

ടി. സുഹൈബ്
സംസ്ഥാന ജനറൽ സെക്രട്ടറി.

കേരള പ്രൈവറ്റ്
ഫാർമസിസ്റ്റ്സ്
അസോസിയേഷൻ
(KPPA-RegNo:03-21/88)

#കെപിപിഎ
03-21/88

16.07.2026

സ്വകാര്യ ആശുപത്രി ഫാർമസിസ്റ്റുകളുടെ മിനിമം വേതനം ₹37,000 ആക്കണം; കരട് വിജ്ഞാപനത്തിലും ആക്ഷേപം രേഖപ്പെടുത്തി കെപിപിഎ

തിരുവനന്തപുരം: സംസ്ഥാനത്തെ സ്വകാര്യ ആശുപത്രികളിൽ ജോലി ചെയ്യുന്ന ഫാർമസിസ്റ്റുകളുടെ അടിസ്ഥാന മിനിമം വേതനം ₹37,000 ആയും, വിദ്യാഭ്യാസ യോഗ്യതയും സേവനപരിചയവും അടിസ്ഥാനമാക്കി ₹40,000 മുതൽ ₹42,000 വരെയും നിശ്ചയിക്കണമെന്ന് കേരള പ്രൈവറ്റ് ഫാർമസിസ്റ്റ്സ് അസോസിയേഷൻ (KPPA) വീണ്ടും ആവശ്യപ്പെട്ടു. 2024-ൽ സംസ്ഥാനത്തുടനീളം നടന്ന മിനിമം വേതന തെളിവെടുപ്പ് യോഗങ്ങളിൽ ഈ ആവശ്യം ശക്തമായി ഉന്നയിച്ചിരുന്ന സംഘടന, ഇപ്പോൾ തൊഴിലും നൈപുണ്യവും (ഇ) വകുപ്പ് പ്രസിദ്ധീകരിച്ച കരട് വിജ്ഞാപനത്തിനെതിരെയും വിശദമായ ആക്ഷേപങ്ങളും നിർദ്ദേശങ്ങളും സർക്കാരിന് സമർപ്പിച്ചിട്ടുണ്ട്.

LBRD-E1/13/2025-LBRD, തീയതി 06 മാർച്ച് 2026 എന്ന സൂചന പ്രകാരം സ്വകാര്യ ആശുപത്രി ജീവനക്കാരുടെ മിനിമം വേതനം സംബന്ധിച്ച് സർക്കാർ പുറത്തിറക്കിയ കരട് വിജ്ഞാപനത്തിലെ ഫാർമസിസ്റ്റുകളുടെ അടിസ്ഥാന ശമ്പളവുമായി ബന്ധപ്പെട്ട വ്യവസ്ഥകളിൽ കേരള പ്രൈവറ്റ് ഫാർമസിസ്റ്റ്സ് അസോസിയേഷൻ സംസ്ഥാന കമ്മിറ്റി ശക്തമായ എതിർപ്പ് രേഖപ്പെടുത്തി.

ഇതുസംബന്ധിച്ച് സ്പെഷ്യൽ സെക്രട്ടറി, തൊഴിലും നൈപുണ്യവും (ഇ) വകുപ്പ്, ഗവൺമെന്റ് സെക്രട്ടറിയേറ്റ്, തിരുവനന്തപുരം എന്നിവർക്ക് നൽകിയ വിശദമായ നിവേദനത്തിൽ കരട് വിജ്ഞാപനത്തിലെ അപാകതകൾ ചൂണ്ടിക്കാട്ടുകയും ഫാർമസിസ്റ്റുകളുടെ വിദ്യാഭ്യാസ യോഗ്യത, തൊഴിൽ ഉത്തരവാദിത്വം, രോഗിസുരക്ഷയിൽ അവർ വഹിക്കുന്ന നിർണായക പങ്ക് എന്നിവ പരിഗണിച്ച് അടിസ്ഥാന ശമ്പളം പുനർനിശ്ചയിക്കണമെന്ന് ആവശ്യപ്പെടുകയും ചെയ്തു. 2024-ൽ സംസ്ഥാനത്തെ വിവിധ ജില്ലകളിൽ നടന്ന മിനിമം വേതന ഉപദേശക സമിതി സിറ്റിംഗുകളിൽ കെപിപിഎ സമർപ്പിച്ച നിർദ്ദേശങ്ങളും തെളിവുകളും അഭിപ്രായങ്ങളും ഈ നിവേദനത്തോടൊപ്പം വീണ്ടും സർക്കാരിന് സമർപ്പിച്ചിട്ടുണ്ട്.

2024 ജനുവരി 16-ന് കണ്ണൂർ റസ്റ്റ് ഹൗസിൽ നടന്ന തെളിവെടുപ്പ് യോഗത്തിൽ സംസ്ഥാന സെക്രട്ടറിയേറ്റ് അംഗം പി.പി. അനിൽകുമാർ, സംസ്ഥാന കമ്മിറ്റിയെ പ്രതിനിധീകരിച്ചു. കണ്ണൂർ ജില്ലാ കമ്മിറ്റിയിൽ നിന്ന് പ്രസിഡന്റ് തോമസ് ജോസഫ്, കാസർകോട് ജില്ലാ കമ്മിറ്റിയിൽ നിന്ന് പ്രസിഡന്റ് കൃഷ്ണവർമ്മ രാജ, എന്നിവരും പങ്കെടുത്തു.

തുടർന്ന് 2024 ജനുവരി 17 ന് കോഴിക്കോട് ഗസ്റ്റ് ഹൗസിൽ നടന്ന യോഗത്തിൽ സംസ്ഥാന ജനറൽ സെക്രട്ടറി പി. പ്രവീൺ, സംസ്ഥാന സെക്രട്ടറിയേറ്റ് അംഗം ജയൻ കോറോത്ത്, കോഴിക്കോട് ജില്ലാ സെക്രട്ടറി എൻ. സിനീഷ്, വൈസ് പ്രസിഡന്റ് കെ.എം. സുനിൽകുമാർ എന്നിവർ പങ്കെടുത്ത് ഫാർമസിസ്റ്റുകളുടെ കുറഞ്ഞ അടിസ്ഥാന വേതനം ₹37,000 ആയും ഉയർന്ന വേതനം ₹42,000 ആയും നിശ്ചയിക്കണമെന്ന് ആവശ്യപ്പെട്ടു.

2024 ജനുവരി 30-ന് മലപ്പുറം ആസൂത്രണ ബോർഡ് കോൺഫറൻസ് ഹാളിൽ നടന്ന സിറ്റിംഗിൽ സംസ്ഥാന സെക്രട്ടറിയേറ്റ് അംഗം കെ. ലീന, ജില്ലാ സെക്രട്ടറി നുഫൈൽ, ജില്ലാ പ്രസിഡന്റ് മുനീർ മമ്പാട്, മഹേഷ് പള്ളിയാൽതൊടി എന്നിവർ പങ്കെടുത്ത് യോഗ്യതയുടെ അടിസ്ഥാനത്തിൽ അടിസ്ഥാന വേതനം ₹37,000 മുതൽ ₹42,000 വരെ നിശ്ചയിക്കണമെന്ന് തെളിവുകൾ സഹിതം ആവശ്യപ്പെട്ടു.

2024 മാർച്ച് 5-ന് തിരുവനന്തപുരം പട്ടം ജില്ലാ പഞ്ചായത്ത് ഹാളിൽ നടന്ന അവസാനഘട്ട തെളിവെടുപ്പ് യോഗത്തിൽ സംസ്ഥാന കമ്മിറ്റി അംഗം എ. ജാസ്മിമോൾ, തിരുവനന്തപുരം ജില്ലാ ട്രഷറർ റോയ് മാത്യു എന്നിവർ ഫാർമസിസ്റ്റുകളുടെ വേതന വർധന സംബന്ധിച്ച നിർദ്ദേശങ്ങൾ ഉപദേശക സമിതിക്ക് മുമ്പാകെ അവതരിപ്പിച്ചു.

ഈ യോഗങ്ങളിൽ ഡെപ്യൂട്ടി ലേബർ കമ്മീഷണർ ശ്രീലാൽ നടത്തിയ പരാമർശവും ശ്രദ്ധേയമായിരുന്നു. ഫാർമസിസ്റ്റുകളുടെ അടിസ്ഥാന ശമ്പളം ₹37,000 മുതൽ യോഗ്യതയുടെ അടിസ്ഥാനത്തിൽ ₹42,000 വരെ ഉയർത്തണമെന്ന് വ്യക്തമായ നിർദേശങ്ങളും തെളിവുകളും സമർപ്പിച്ച ഏക സംഘടന കേരള പ്രൈവറ്റ് ഫാർമസിസ്റ്റ്സ് അസോസിയേഷൻ (KPPA) ആണെന്ന് അദ്ദേഹം യോഗത്തിൽ വ്യക്തമാക്കി.

ഫാർമസിസ്റ്റുകൾ ആരോഗ്യരംഗത്തിലെ അവിഭാജ്യ ഘടകമാണെന്നും, അവരുടെ വിദ്യാഭ്യാസ യോഗ്യത, പ്രൊഫഷണൽ ഉത്തരവാദിത്വം, രോഗിസുരക്ഷയിൽ വഹിക്കുന്ന നിർണായക പങ്ക് എന്നിവ പരിഗണിച്ച് നിലവിലെ കരട് വിജ്ഞാപനത്തിൽ ആവശ്യമായ ഭേദഗതികൾ വരുത്തി നീതിയുക്തമായ വേതന ഘടന സർക്കാർ പ്രഖ്യാപിക്കണമെന്നും കെപിപിഎ ആവശ്യപ്പെട്ടു.

2024-ലെ സംസ്ഥാനവ്യാപക തെളിവെടുപ്പ് യോഗങ്ങളിൽ അവതരിപ്പിച്ച നിർദ്ദേശങ്ങൾക്കും, 2026-ലെ കരട് വിജ്ഞാപനത്തിനെതിരെ സമർപ്പിച്ച വിശദമായ ആക്ഷേപങ്ങൾക്കും പരിഗണന നൽകി സ്വകാര്യ ആശുപത്രി ഫാർമസിസ്റ്റുകൾക്ക് യഥാർത്ഥ തൊഴിൽമൂല്യത്തിനൊത്ത മിനിമം വേതനം സർക്കാർ ഉറപ്പാക്കുമെന്ന് സംഘടന പ്രതീക്ഷിക്കുന്നുണ്ട്.

കെപിപിഎ
23.06.2026

16 ഫിക്സഡ്-ഡോസ് കോമ്പിനേഷൻ (FDC) മരുന്നുകൾ കൂടി കേന്ദ്ര സർക്കാർ നിരോധിച്ചു
രോഗികളുടെ സുരക്ഷ മുൻനിർത്തി കേന്ദ്ര ആരോഗ്യ മന്ത്രാലയത്തിന്റെ നടപടി.

ന്യൂഡൽഹി: രോഗികൾക്ക് ചികിത്സാപരമായ ഗുണത്തേക്കാൾ അപകടസാധ്യത കൂടുതലാണെന്നും ശാസ്ത്രീയ അടിസ്ഥാനമില്ലാത്തതാണെന്നും കണ്ടെത്തിയ 16 ഫിക്സഡ്-ഡോസ് കോമ്പിനേഷൻ (Fixed Dose Combination - FDC) മരുന്നുകൾക്ക് കൂടി കേന്ദ്ര സർക്കാർ നിരോധനം ഏർപ്പെടുത്തി. 1940-ലെ ഡ്രഗ്സ് ആൻഡ് കോസ്മെറ്റിക്സ് ആക്ടിലെ സെക്ഷൻ 26A പ്രകാരമാണ് കേന്ദ്ര ആരോഗ്യ-കുടുംബക്ഷേമ മന്ത്രാലയം (MoHFW) ഉത്തരവിറക്കിയത്.

ഉത്തരവ് 2026 ജൂൺ 11-ന് പുറപ്പെടുവിച്ചെങ്കിലും ജൂൺ 15-നാണ് ഗസറ്റ് വിജ്ഞാപനമായി പ്രസിദ്ധീകരിച്ചത്. ഇതോടെ നിരോധിക്കപ്പെട്ട കോമ്പിനേഷനുകൾ അടങ്ങിയ മരുന്നുകളുടെ നിർമ്മാണം, വിൽപ്പന, വിതരണം, വിപണനം എന്നിവ നിയമവിരുദ്ധമായി.

ഈ തീരുമാനത്തിന് മുമ്പ് ഡ്രഗ്സ് ടെക്നിക്കൽ അഡ്വൈസറി ബോർഡിന്റെ (DTAB) ശുപാർശകളും ഔഷധ മേഖലയിലെ വിദഗ്ധ ഉപസമിതികളുടെ വിശദമായ പരിശോധനയും നടത്തിയിരുന്നു. ചികിത്സാപരമായി യുക്തിരഹിതവും (Irrational), രോഗികൾക്ക് അധിക ചികിത്സാ ഗുണം നൽകാത്തതും, അനാവശ്യ പാർശ്വഫലങ്ങൾക്കും മരുന്നുകളുടെ ദുരുപയോഗത്തിനും സാധ്യത വർധിപ്പിക്കുന്നതുമാണെന്ന് വിലയിരുത്തിയതിനെ തുടർന്നാണ് കേന്ദ്ര സർക്കാർ നിരോധന നടപടി സ്വീകരിച്ചത്.

നിരോധിക്കപ്പെട്ട കോമ്പിനേഷനുകളിൽ വേദനസംഹാരികൾ, ആന്റിബയോട്ടിക്കുകൾ, പ്രമേഹ ചികിത്സാ മരുന്നുകൾ, ചർമ്മസംരക്ഷണ ഉൽപ്പന്നങ്ങൾ, ആന്റിസ്പാസ്മോഡിക് മരുന്നുകൾ തുടങ്ങിയ വിഭാഗങ്ങൾ ഉൾപ്പെടുന്നു. പ്രത്യേകിച്ച് ഒരുമിച്ച് ഉപയോഗിക്കുമ്പോൾ അധിക ചികിത്സാ ഗുണം തെളിയിക്കപ്പെട്ടിട്ടില്ലാത്തതും, രോഗിക്ക് അനാവശ്യ അപകടസാധ്യത സൃഷ്ടിക്കാവുന്നതുമായ ഘടകങ്ങൾ അടങ്ങിയ കോമ്പിനേഷനുകളാണ് പട്ടികയിലുള്ളത്.

നിരോധിക്കപ്പെട്ട പ്രധാന 16 FDC കോമ്പിനേഷനുകൾ:

1. Acetyl Salicylic Acid + Ethoheptazine
2. Aloe Extract + Allantoin + Alpha Tocopherol Acetate + D-Panthenol + Vitamin A
3. Aloe Extract + Vitamin E + Dimethicone + Glycerine
4. Aloe Vera + Jojoba Oil + Vitamin E
5. Aloe Vera + Orange Oil
6. Aloe Vera + Jojoba Oil + Wheat Germ Oil + Tea Tree Oil
7. Aloe Vera + Vitamin E + Herbal Combination
8. Dicyclomine + Paracetamol + Clidinium Bromide
9. Dicyclomine + Paracetamol + Clidinium Bromide + Chlordiazepoxide
10. Gliclazide + Chromium Picolinate
11. Paracetamol + Linocaine
12. Amoxicillin + Serratiopeptidase + Lactobacillus Spores
13. Amoxicillin + Cloxacillin + Lactic Acid Bacillus + Serrapeptase
14. Amoxicillin + Serratiopeptidase
15. Cefadroxil + Probenecid
16. Cefuroxime + Serratiopeptidase

ആന്റിബയോട്ടിക്കുകൾക്കൊപ്പം Serratiopeptidase, Probiotics, അല്ലെങ്കിൽ Probenecid എന്നിവ ചേർത്തുള്ള ചില കോമ്പിനേഷനുകൾക്കും മതിയായ ശാസ്ത്രീയ തെളിവുകളുടെ അഭാവവും യുക്തിരഹിതമായ സംയോജനവുമാണ് നിരോധനത്തിന് പ്രധാന കാരണങ്ങളിലൊന്ന്.

മരുന്ന് നിർമ്മാതാക്കൾ, വിതരണക്കാർ, സ്റ്റോക്കിസ്റ്റുകൾ, മെഡിക്കൽ സ്റ്റോറുകൾ എന്നിവ നിരോധന ഉത്തരവ് കർശനമായി പാലിക്കണമെന്ന് കേന്ദ്ര ആരോഗ്യ മന്ത്രാലയം നിർദേശിച്ചിട്ടുണ്ട്. നിരോധിച്ച കോമ്പിനേഷനുകൾ അടങ്ങിയ മരുന്നുകളുടെ നിർമ്മാണം, വിൽപ്പന, വിതരണം എന്നിവ തുടരുന്നത് നിയമനടപടികൾക്ക് ഇടയാക്കുമെന്നും മുന്നറിയിപ്പ് നൽകിയിട്ടുണ്ട്. സംസ്ഥാന ഡ്രഗ് കൺട്രോൾ വകുപ്പുകൾക്ക് പരിശോധന ശക്തമാക്കാനും നിർദ്ദേശം നൽകിയിട്ടുണ്ട്.

ആരോഗ്യ വിദഗ്ധരുടെ അഭിപ്രായത്തിൽ, യുക്തിസഹമായ മരുന്നുപയോഗം (Rational Use of Medicines) പ്രോത്സാഹിപ്പിക്കാനും, ആന്റിബയോട്ടിക്കുകളുടെ ദുരുപയോഗം കുറയ്ക്കാനും, രോഗികളുടെ സുരക്ഷ ഉറപ്പാക്കാനുമുള്ള സുപ്രധാന നടപടികളിലൊന്നാണ് ഈ നിരോധനം. രോഗികൾ ഡോക്ടറുടെയോ ഫാർമസിസ്റ്റിന്റെയോ നിർദേശമില്ലാതെ കോമ്പിനേഷൻ മരുന്നുകൾ ഉപയോഗിക്കരുതെന്നും, നിലവിൽ ഉപയോഗിക്കുന്ന മരുന്നുകളിൽ സംശയമുണ്ടെങ്കിൽ ചികിത്സിക്കുന്ന ഡോക്ടറെയോ രജിസ്റ്റേഡ് ഫാർമസിസ്റ്റിനെയോ സമീപിക്കണമെന്നും വിദഗ്ധർ നിർദേശിക്കുന്നു.

സ്വകാര്യ മേഖലയിലെ ഫാർമസിസ്റ്റുകളുടെ മിനിമം വേതനം ഉറപ്പാക്കും: തൊഴിൽ മന്ത്രി ശ്രീമതി ബിന്ദു കൃഷ്ണ.

സംസ്ഥാനത്തെ സ്വകാര്യ മേഖലയിലെ ഫാർമസിസ്റ്റുകൾക്കായി സർക്കാർ വിജ്ഞാപനം ചെയ്ത പുതുക്കിയ മിനിമം വേതനം ഇതുവരെ പല സ്ഥാപനങ്ങളിലും നടപ്പിലാക്കാത്ത സാഹചര്യം ഗൗരവത്തോടെ പരിഗണിക്കുമെന്ന് തൊഴിൽ മന്ത്രി ശ്രീമതി ബിന്ദു കൃഷ്ണ ഉറപ്പ് നൽകി.

ഫാർമസിസ്റ്റുകളുടെ മിനിമം വേതനം കർശനമായി നടപ്പാക്കുന്നതിനും, ക്ഷേമനിധി ഉൾപ്പെടെയുള്ള വിഷയങ്ങൾ ചർച്ച ചെയ്യുന്നതിനുമായി ഉടൻ തന്നെ ലേബർ കമ്മീഷണറുടെ നേതൃത്വത്തിൽ പ്രത്യേക യോഗം വിളിച്ചുചേർക്കുമെന്നും മന്ത്രി അറിയിച്ചു.

സ്വകാര്യ മേഖലയിലെ ഫാർമസിസ്റ്റുകൾക്ക് നിയമാനുസൃതമായ വേതനവും മറ്റ് അവകാശങ്ങളും ആനുകൂല്യങ്ങളും ഉറപ്പാക്കാൻ ആവശ്യമായ എല്ലാ ഇടപെടലുകളും തൊഴിൽ വകുപ്പ് നടത്തുമെന്ന് മന്ത്രി വ്യക്തമാക്കി.

കേരള പ്രൈവറ്റ് ഫാർമസിസ്റ്റ്സ് അസോസിയേഷന്റെ നേതൃത്വത്തിൽ ജനറൽ സെക്രട്ടറി ടി. സുഹൈബ്, സംസ്ഥാന വൈസ് പ്രസിഡന്റ് ടി. നവജി, മുൻ സംസ്ഥാന പ്രസിഡന്റ് പ്രാകുളം സുരേഷ്, സംസ്ഥാന കമ്മിറ്റി അംഗവും സംസ്ഥാന ഫാർമസി കൗൺസിൽ അംഗവുമായ ജാസ്മിമോൾ, സംസ്ഥാന കമ്മിറ്റി അംഗം സഞ്ജു പ്രഭാകർ, തിരുവനന്തപുരം ജില്ലാ ട്രഷറർ സാബു എസ്. ഗോപിനാഥ് എന്നിവർ തൊഴിൽ മന്ത്രിയെ സന്ദർശിച്ച് ഫാർമസിസ്റ്റുകൾ നേരിടുന്ന വിവിധ പ്രശ്നങ്ങൾ വിശദമായി അവതരിപ്പിച്ചു.

കെപിപിഎ
18.06.2026

Kppa State

“ഒന്നിക്കാം… ശക്തരാകാം…”

സ്വകാര്യ ഫാർമസി മേഖലയിലെ ഫാർമസിസ്റ്റുകളുടെ അവകാശ സംരക്ഷണത്തിനും തൊഴിൽപരമായ പുരോഗതിക്കും ക്ഷേമ പ്രവർത്തനങ്ങൾക്കും ശക്തമായ കൂട്ടായ്മ അനിവാര്യമാണ്. ഈ ലക്ഷ്യത്തോടെ കേരളാ പ്രൈവറ്റ് ഫാർമസിസ്റ്റ്സ് അസോസിയേഷൻ(കെപിപിഎ) 2026 വർഷത്തെ മെമ്പർഷിപ്പ് ക്യാംപെയ്ൻ ജൂൺ 10 മുതൽ ജൂലൈ 10 വരെ നടക്കുകയാണ്.

“ഒന്നിക്കാം… ശക്തരാകാം…”

സ്വകാര്യ മേഖലയിലെ എല്ലാ ഫാർമസിസ്റ്റുകളും അസോസിയേഷനിൽ അംഗങ്ങളായി ചേർന്ന് സംഘടനയെ കൂടുതൽ ശക്തിപ്പെടുത്തുക.

ഫാർമസിസ്റ്റുകളുടെ തൊഴിൽ അവകാശ സംരക്ഷണം, ന്യായമായ വേതനത്തിനും സേവന വ്യവസ്ഥകൾക്കുമായി കൂട്ടായ പ്രവർത്തനം, ഫാർമസി മേഖലയിലെ പ്രശ്നങ്ങൾക്ക് സംഘടിത പരിഹാരം എന്നിവ ലക്ഷ്യം വെച്ച് കൊണ്ട് കഴിഞ്ഞ 4 പതിറ്റാണ്ടായി സ്വകാര്യ മേഖലയിലെ ഫാർമസിസ്റ്റുകൾക്കിടയിൽ പ്രവർത്തിക്കുന്ന സംഘടനയുടെ ഭാഗമാകണമെന്ന് നിങ്ങൾ ഓരോരുത്തരോടും അഭ്യർത്ഥിക്കുന്നു.

#കെപിപിഎ
Kppa State