Wael Rateb

كل واحد فينا عنده رصيد عند التاني وده مش مجرد كلام رصيد ممكن يكون حب مواقف جدعنة أو حتى دعم فى وقت الشدة
بس للأسف فيه ناس بتستنزف الرصيد ده بالكامل
وكأن مفيش بكرة ولما بيحتاجوا منه حاجة بيلاقوا الرصيد خلص وبيستغربوا ليه ؟
لازم نفتكر دايماً إن العلاقات محتاجة تجديد وشحن مستمر مش استهلاك وبس عشان يفضل فيه رصيد حلو يدوم !!

فن التعامل مع الستات ملوش كتالوج لكن ليه شوية قواعد ؟
الست مش لغز زى الرجالة ما بتقول
ولا كائن صعب الفهم زى بعضهم ما بيحب يبرر فشله فى التواصل
الست ببساطة إحساس
وإنت لو مافهمتش الإحساس ده عمرك ما هتعرف تتعامل معاها صح
أول حاجه افهم إنها مش دايما عايزة حلول
ساعات هى بتحكى مش علشان تقولك اعمل إيه
بتحكى علشان تحس إنك معاها إنك سامعها بجد
مش مستعجلها ولا بتحلل كل كلمة بمنطقك الرجولى
الست لما تلاقى ودانك قبل عقلك ترتاح وتثق وتحب أكتر
تانى حاجه الاهتمام مش رفاهية
مفيش ست بتحب تبقى رقم فى حياتك
ولا بتحب تحس إنك واخدها اعتياد
الاهتمام عندها زى الهوا
مش محتاجة فلوس ولا هدايا كتير
بس كلمة حلوة سؤال بسيط
عاملة إيه النهارده
اللى بيعمل كده بيزرع حب صادق جواه قبل ما يزرعه فيها
تالت حاجه احترم عقلها قبل جمالها
الست اللى بتحس إنك شايفها مجرد شكل
بتبعد حتى لو فضلت حواليك
لكن لما تحترم رأيها وتناقشها وتخليها تحس إنها شريك حقيقى
ساعتها بتديك من ولاءها أكتر مما تتخيل
رابع حاجه ماتحاولش تغيرها عشان تناسبك
كل مرة بتحاول تمشيها على مزاجك
انت بتكسر فيها جزء من روحها
والنهاية دايما بتكون رد عاطفى صامت
الست اللى بتحس إنها مضطرة تبقى نسخة منك هتبعد حتى وهى قريبة
خامس حاجه لما تزعل ماتوجعهاش بكلامك
الكلمة عندها بتفضل محفورة حتى لو عدت شهور
ممكن تسامحك بس صعب تنسى طريقتك وقت الزعل
فكر قبل ما تنفعل لأنك بتتعامل مع قلب حساس جدا
وأي خدش فيه بياخد وقت طويل يتعالج
كدا خلاص وفى النهايه
فن التعامل مع الست مش تبقى مثالى
لكن تبقى صادق وتحس بيها وتحترمها
الست مش محتاجة بطل خارق
هى محتاجة رجل فاهم
يعنى إيه يحتويها من غير ما يمتلكها
ويحبها من غير ما يخنقها
ويفضل سندها مش سجنها !!

في ناس كانت غالية علينا بزيادة
كنا شايفينهم في مكانة محدش يوصلها
كنا ببنعتبر وجودهم جزء من نفسنا
بس الغريب إن مع مرور الوقت ومع المواقف الصغيرة والكبيرة
لقيناهم هما بنفسهم اللي بينزلوا من المكان ده
من غير ما نطلب ولا حتى نحاول
الحقيقة إننا ساعات بنفتكر إن فقدان الناس مؤلم
وإن خروجهم من حياتنا جرح كبير
لكن الحقيقة في ناس وجودهم كان وجع وغيابهم كان علاج
الموضوع بيبدأ بعلامات صغيرة
تصرف بارد كلمة جارحة موقف يخليك تفتح عينيك على حقيقتهم
مواقف تخليك تعيد حساباتك وتشوف إنك كنت بتدى ناس أكتر من حقهم
وتكتشف إن الغلاوة اللي مديهالهم ماكنوش يستاهلوها أصلًا
الحلو إنهم وفروا علينا تأنيب الضمير
مبقاش في اى عتاب ولا حتى سؤال ليه عملوا كده ؟
لإن الفعل نفسه كان هو الجواب !
ساعتها بتحس براحة غريبة راحة جاية من إنك اتخلصت من حمل تقيل
كنت شايله على قلبك سنين وأنت فاكر إنه أمان
اللي ما عرفش قيمتك من البداية مش هيتعلم يعرفها بعدين
واللي يقرر ينزل من مكانة كبيرة جوانا هو حر
سبحان الله فى ناس بتساعدك من غير ما تقصد
بتحررك من الوهم اللي كنت عايش فيه
وبتفتحلك باب راحة وتديك درس كبير
إن مش كل اللي بنحبهم يستحقوا مكانة جوا القلب
الخروج مش دايمًا خسارة
أحيانًا هو المكسب الحقيقي
مكسب إنك عرفت قيمتك
وعرفت تحط حدود
وعرفت تختار مين يفضل
ومين يختفي
في الآخر متزعلش من اللي مشى
إنت كسبت راحة بال وكسبت وضوح رؤية
والأهم كسبت نفسك !!

الناس مبتتغيرش بتبان حقيقتها مع الأيام
الناس كانت كده من الأول بس الوقت هو اللى كشف وشوشهم الحقيقية زمان قالوا الحزن بيبين الناس وناس تانية قالوا
الفرح بيكشف
بس بقولك لا ده ولا ده
اللي بيكشف الوشوش على حقيقتها
هو المصالح
المصلحة بتبين الاصيل من الخسيس
جرب كده تقول لأ لحد مرة واحدة
جرب توقف عن إنك تنفذ طلب
جرب تبقى مش فى إيده مصلحة
وشوف بنفسك هيبقى مين
هيفضل زي ما هو ؟
ومين هيقلب وشه ويطلعلك اللى عمره ما بان قبل كده
المواقف مش بتغير حد
المواقف بتكشف اللي مستخبى
والمصالح هى أحسن اختبار للأصول لأن اللي ليه أصل عمره ما هيبيع عشرتك حتى لو مفيش مقابل
خليك فاكر الجملة دي كويس
مافيش حد بيتغير
فيه حد كان لابس وش ووقع !!

الحياة أقصر من أن تتوتر بسبب أشخاص لا يستحقون حتى أن يكونوا مشكلة في حياتك
في لحظة صدق مع نفسك اسألها
هو أنا ليه بسمح لناس مالهاش قيمة عندي إنها تخليني أتوتر أو أنام مهموم أو أقعد أفكر بالساعات في كلمة قالوها أو تصرف عملوه
الحقيقة الحياة أقصر بكتير من إنك تهدر طاقتك على ناس مش بس ما بيقدروش وجودك دول كمان مش شايفين قيمتك أصلا
ناس وجودهم في حياتك مش نعمة وجودهم صداع توتر قلق وشد أعصاب
فيه فرق كبير بين اللي بيغلط غلطة بسيطة وبين اللي وجوده في حياتك نفسه غلط
النوع التاني ده لازم تبعد عنه فورا مش كرها فيه لكن حبا في نفسك في سلامك في هدوءك اللي هو أثمن حاجة تملكها
كل مرة تسمح فيها لشخص غير جدير بيك إنه يأذيك نفسيا أو يستهلكك ذهنيا اعرف إنك بتخصم من رصيد راحتك وصحتك بدون مقابل
بالبلدي كده ما تستاهلش
خدها قاعدة أي حد بيستنزفك بيقلل منك بيشووش طاقتك ماينفعش يكون ليه مكان في قلبك ولا وقتك
خلى بالك من نفسك واختار دايما إنك تعيش مرتاح مش متوتر عشان تستاهل حياة أهدى وأصفى وأنضف

ليه حد يبيع فجأة رغم كل العشرة ورغم كل المحبة والاخلاص ؟
الحكاية دي مش بسيطة !
بس خليني أقولك حاجة من القلب
مفيش حد بيصحى من النوم كده
واخد قرار يبيع
الموضوع تملى بيبدأ بخطوات صغيرة وإشارات إحنا مش بنفهمها غير بعد فوات الأوان قولى ليه
عشان اللي باع كان بيبعد من بدرى
بس انت كنت فى كل حاجه بتبرر
بتقول يمكن مضغوط يمكن متغير شوية يمكن أنا السبب !
بس الحقيقة هو اختار
أوقات الناس بتتغير مش عشان انت عملت حاجة غلط لكن لأن اللى جواهم اتبدل اتغير دورك خلص
فيه ناس لما تحس إنك حبيتها بصدق بتخاف زى ما بقولك كدا فعلا
بتخاف من المسؤلية من الحب من إنك تكون مراية بتكشف لهم ضعفهم وعيبوهم فيختاروا الهروب
وفيه اللي لما يطمن إنك مش هتمشي يبدأ يستهتر بيك وبمشاعرك يستهلكك لحد ما يزهق ويمشي لوحده من غير اى سبب واضح
لا كمان والأوجع من كل ده
إنك تفضل تسأل نفسك هو إزاي قدر يعمل كدا وما تلاقيش إجابه !
لأن اللي عنده استعداد يبيع عمره ما كان مخلص من البداية
اللي بيحبك بجد مش هيفكر يمشى ويسيبك حتى لو الدنيا وجعته كسرته
إنما اللي مش شايف قيمتك
هيختفي أول ما تتقل عليه العلاقة
وده مش عيب فيك خالص
ده درس قاسي من دروس الحياة
مش كل اللي شاركك الضحك يوم
لما تتعب يقدر يشيل وجعك
ومش كل اللي قالك
أنا عمري ما أسيبك كان قاصدها
خدها منى كدا حكمه وخليك فاكر
اللى يختار يبعد ما تحاولش ترجعه
لأن اللي باع مرة ممكن يبيع تانى
وساعتها ماتبقاش تعيط
اللي سابك مشى بإرادته
بس انت كسبت راحة عمرك
يمكن وجعك شوية دلوقتي
بس صدقنى بعدين هتشكر اللحظة اللي اختار يبيع فيها
لأنها حررتك من شخص كان وجوده مجرد شكل بس مش روح بتحس
اللي يمشي خليه يمشى يمكن دي كانت رحمة وانت فاكرها وجع !!
✍

#إنتى
✍

زى إللى قبلك غداره
مثلتى دورك بشطاره
وإن كان عليا صدقتك
تستاهلى أوسكار بجداره
✍