Tactics101

الحقيقة مع طرح اسم كابتن شوقي غريب لتولي مهمة المنتخب اللي هيشارك في الاولمبياد مقدرتش اخد الموضوع بسخرية و هزار و حاولت اقترح حلول يمكن البوست يوصل للمسؤولين و حد يشوفه ..

في البداية الفئة السنية دي بتحتاج مدرسة من اتنين لأما شاب بيبدء حياته التدريبية و يكون دارس و مواكب العصر و على قدر كبير علميًا زي تجربة المغرب و هنا انا برشح كابتن محمد الشيخ مدرب وادي دجلة راجل دارس و قادر يشتغل مع الفئة دي و يكون نواة لمنتخب اول منظم و صاحب اسلوب لعب و هوية واضحة ..

او المدرسة التانية لو عايز تجيب مدرب كبير يحتوي الشباب و يكون قريب منهم و يعاملهم زي اولاده كده على غرار كابتن ربيع ياسين بس برضو يكون دارس و فاهم و علميًا على قدر كبير من المعرفة و معاه رخص تدريب برضو و مواكب العصر عادي مش لازم يكون مدرسش من السبعينات و هنا انا برشح كابتن ايمن الرمادي للمهمة دي اللي برضو قادر يكون نواة للمنتخب الأول و يأسس جيل متعلم و واعي تاكتيكيًا ..

ف أه مبروك للمغرب و الشعب المغربي و كل حاجة بس الواحد برضو بيغير و نفسه يعيش تجربة ناجحة زي دي و بالمناسبة مش شرط نعيشها بأجانب انت لو بصيت هتلاقي كل مدربين منتخب المغرب محليين بس الفرق انهم اصحاب كفاءات ..

الحقيقة انا مش قادر اعمل زيكوا و اقلل من المنتخب او اتريق عليه او اقاطع ماتشاته او اقول مش هشجعه و الكلام ده ..

لسه بشجع المنتخب و بفرح بفوزه و بستنى القايمة تتعلن قبل كل توقف و اشوف مين راح و مينكان يستحق يروح و مين اتظلم و مين اتجامل و هكذا ..

و في نفس الوقت مش عارف اقلل من إنجاز الصعود لكأس العالم زي ما الناس بتعمل و اقول اصل المجموعة ضعيفة و انا شايف منتخبات زي الكاميرون و نيچيريا و جنوب افريقيا و بوركينا و السنغال و كوت ديڤوار بيعانوا او لسه محسموش صعودهم ..

و في نفس الوقت مش عايز اقلل من نتايج حسام حسن و مشواره في التصفيات لأننا عاملين تصفيات كويسة فعلًا من حيث الأرقام و مخسرناش ولا ماتش و كنا من اكتر المنتخبات اللي سجلت و خلقت فرص و من الاقوى دفاعيًا كمان ..

ف خلينا نفرح ببلدنا النهاردة اللي بتصعد لرابع مرة بس في التاريخ لكأس العالم و ان اخيرًا هنشوف جيل جديد مع المنتخب في بطولة زي كاس العالم الدنيا كلها بتستناها و نشوف صلاح لتاني مرة في المونديال و هو بيحقق حلم اجيال كتير ..

و من بكرة ان شاء الله نرجع نهاجم المنظومة عادي و نتمنى رحيل حسام حسن و تعيين مدرب كفئ و نشوف مين ظالم و مين مظلوم من اللاعيبة و كل الكلام ده و انا اولكم والله .

لو متعرفش ف محمد عبد المنعم حاليًا في اخر مرحلة من مراحل التأهيل و خلاص ايام و يبقى في الملعب و ده وقت قياسي لأن الراجل كده خد 6 شهور او أقل للعودة ..

لكن مش ده اللي جاي اكلمك فيها انا جاي اقولك عبد المنعم استغل فترة الإصابة في ايه علشان اوريلك الراجل ده دماغه و عقليته عاملة ازاي ..

صحفي فرنسي شهير مختص في اخبار نيس طلع من كام يوم و قال ان منعم قضى الست شهور في تعلم اللغة الفرنسية و الانجليزية بشكل مكثف و حاليًا في طريقه للإتقان ..

بل كمان قال ان اكبر مشكلة لمنعم مع مديره الفني مكنتش الفنيات لكن كانت عدم التواصل بشكل جيد و التأقلم بسبب اللغة و ان مدربه حاليًا فرحان ان النقطة دي اتحلت و خلاص منعم تغلب على مشكلة اللغة ..

احنا هنا بنتكلم عن لاعب بيجيله صليبي في الوقت اللي الناس كانت حكمت عليه بالفشل في الاحتراف و انه خلاص راجع مصر يعني حاجات تهد أي حد لكنه قرر يشتغل و يقوم من جديد و يبقى جاهز لأي تحدي حتى لو هيمشي من نيس فهو بقى جاهز انه يخوض تحدي جديد بسبب عقليته ..

الحقيقة انا مبسوط بمنعم و عقليته بداية من إصراره على الإحتراف لحد وصوله للنقطة دي و هو بيتطور يوم عن يوم .. منتظرينك بفارغ الصبر في الملعب يا منعم ❤

عندي مشكلة كبيرة مع كابتن عماد النحاس و من قبله ريبيرو في توظيف عناصر الهجوم بس خلينا في النحاس دلوقتي ..

الاهلي حاليا بيلعب 4-2-3-1 مش 4-3-3 يعني اللاعب الاضافي في خط الهجوم بيكون في العمق كصانع لعب او مهاجم تاني و الدليل على كده لما خرج الشحات النهاردة اللي نزل أفشة مش جناح ..

اللي عايز اوصله من الشرح ده ان انسب لاعب يكون موجود في عمق الملعب و يضم كمهاجم تاني هو بن شرقي و الغريب ان هو الوحيد اللي مشاركش ولا مرة في المركز ده بل عمره ما دخل في حتة المداورة في التوظيف هو لجناح شمال لأما على الدكة و ده مش مفهوم بالنسبالي و هقولك ليه ..

لما بن شرقي بيكون موجود شمال ف انت بتخسر زيزو او تريزيجيه و احيانًا الاتنين في حالة ان تريزي بقى جناح يمين و زيزو هو اللي في العمق و لو تريزي اللي في العمق فانت برضو بتخسره لأن بيحصل تضارب كبير في الادوار بينه و بين بن شرقي ..

الاغرب ان حتى في وجود الشحات النهاردة اللي هو افضل لاعب يكون موجود في عمق الملعب و يصنع فرص لزمايله خلاه جناح و لعب بزيزو في العمق برضو قبل اصابة الشحات و الحقيقة دي حاجة ملهاش تفسير بالنسبالي ..

فانا اتمنى الفترة الجاية سواء النحاس كمل او لأ يتم استخدام بن شرقي او الشحات هما اللي في العمق و زيزو و تريزيجيه و طاهر و عبد القادر كأطراف عادي ..

هتصحى الصبح هتلاقي الإعلام قايلك منتخب مصر للشباب صعد لدور ال 16 في كاس العالم كتاني لمجموعته و ده طبعًا مركز كويس و انجاز كبير لأن كمان في 4 توالت بيصعدوا ف انت صاعد تاني و مستريح ..

لكن الحقيقة انه صعود عبثي و مأسوي و خليني اكلمك في كلام بسيط و بالبلدي مش هقولك الشغل الاكاديمي و التأسيس و ارجع للبراعم و بص المغرب و الكلام ده ..

في البداية المشهد اللي قدامك ده و خناقة كذا لاعب على فاول و في النهاية الخناقة تتحصر بين 2 لاعيبة و كل واحد فبهم عايز يشوط و الجهاز الفني واقف بيتفرج دي فضيحة و العالم كله هيتكلم عنها و مش علشان اتسجل منها هدف الصعود المفروض نسكت و مش بس كده ده الخناقة كملت للاحتفال لدرجة ان عمر خضر رفض يحتفل مع محمد عبد الله نهائي و كإننا في حصة العاب ..

و ده هياخدنا للكلام البسيط اللي عايز اقوله اسامه نييه و جهازه لا يصلحوا لإدارة اي نادي او منتخب مع احترامي بجانب ضعفهم في الناحية الفنية و التقنية فهما عديمي الشخصية و ملهمش اي دور مع اللاعيبة ..

ف الحل بعد كده اننا نعين اجهزة اجنبية للمنتخبات دي منعًا للفضايح مع احترامي لرجالة التأسيس و معندناش لاعيبة و الكلام ده كل ده كان يتحل بوجود مدرب اجنبي يعمل شكل للفريق و يستغل المواهب الموجودة بشكل كويس ..

الجيل ده بالذات في مواهب كتير اتظلمت و هتتظلم في الاستحقاقات الجاية سواء افريقيا او اولمبياد بسبب الاجهزة المصرية و عديمي الخبرة و الكفاءة اللي زي اسامة نبيه .. هاتوا مدرب اجنبي يعمل شخصية و يحضر الولاد ذهنيا و نفسيا و يبقى صارم معاهم و انتوا هتشوفوا شكل عادي ما نفس العيال دي كانت بتلعب كورة كويسة مع ميكالي عادي ..

الحقيقة فيه حاجة حابب اتكلم عليها من بعد الديربي لأنها مستفزاني جدًا بسبب سطحيتها و هي جملة ان كوكا مقدمش ماتش كويس ده كان بيضرب بيزيرا بس !!!

من وجهة نظري كوكا قدم ماتش نموذج في ازاي الباك لو محدود الامكانيات او مش واثق في سرعته و قدراته يتعامل مع الجناح المهاري الحريف الخفيف اللي قادر يعديك و يتفوق عليك في اقل مساحة ..

الاجنحة اللي من نوع خوان لو اديتها ثانية تستلم و تقابلك بوشها او تجيلك بوشها ع طول بعد كورة طولية قادرين يعدوا و يهينوا اجدعها باك سواء بسرعته او بتغيير اتجاهاته او بدريبيل و هكذا ف الحل الوحيد انك تخليه ميستلمش او متديهوش الوقت انه يستلم و في مساحة حتى لو سنتيمتر ..

و ده اللي عمله كوكا الحقيقة الراجل ع طول بيضغط و بيحاول يفتك الكورة و بيزيرا بضهره قبل ما يستلم و يلفله كان بيتعامل مع كل كورة ان الراجل ده لو جالي بوشه هيسببلي مشكلة فانا لازم انهي اي خطورة من بدايتها ..

اما بالنسبة لقصة التلت اربع فاولات اللي عملهم ف ده يعتبر نجاح كبير مش نقطة ضد كوكا اني طول ال100 دقيقة اللي اتلعبوا اكسب كل الثنائيات و اعمل 3-4 فاولات بس و اخرج بدون انذار ده قمة النجاح .. كوكا يستاهل الاشادة على الماتش ده ..

لأن مفيش حلقة بسبب الجبس ف البوست ده هحاول اتكلم عن القمة و افكار المدربين .. في البداية بس البوست ده هيكون طويل ف مش هيوصل لحد غير لو سيبت ريأكت في الاول ..

الحقيقة النحاس و يانيك فيريرا محدش فيهم تفوق على التاني و يمكن ده السبب اللي خلانا اصلًا نشوف ماتش حلو و مفتوح لأن الفرقتين كانوا بيلعبوا بعشوائية كبيرة اغلب فترات الماتش لكن ده ميمنعش ان كل مدرب كان عنده فكرة ..

فيريرا كان نازل مقرر انه هيلعب ببلوك منخفض او بالبلدي هيدافع من عند منطقة جزائه بعد ما يسجل اول جول و فعلًا كان سعى للتسجيل من اول عشر دقايق ربع ساعة لكن ده محصلش فهو قرر يبيع الماتش بدري و حتى ضربة الجزاء جت للزمالك في وقت و هو اصلًا مش متفوق فيه .. و بالمناسبة فكرة البلوك المنخفض الزمالك كان ظاهر منظم فيها و الاهلي مش قادر يخترق لكن ده مش بسبب قوة دفاع الزمالك قد ما هي مشكلة في فكرة النحاس و ده هياخدنا للأهلي ..

النحاس كان نازل بفكرة واضحة و صريحة و هي التحميل ناحية الشمال بتريزيجيه و بن شرقي و كوكا و احيانا كمان معاهم بن رمضان علشان يفضي الطرف التاني من الملعب و هنا كان في مشكلتين الاولى ان مفيش فريق في العالم عايز يخترق فريق بيدافع فبيدور اللعب في طرف واحد من الملعب التانية ان اصلٌا الطرف التاني ده كان فيه طاهر و هاني و هما الاتنين بدون حلول يعني حتى لو عكست الملعب و اتخلق موقف 1V1 او 2V2 مش هتشكل خطورة ..

طب الحل كان ايه ؟ الحل كان في نزول جناح في الناحية العكسية قادر على صناعة الفرق لو اتحط في موقف زي طاهر و هاني و فعلًا ده اللي حصل بنزول الشحات بقر عندك جناحين قادرين يحلوا التكتلات الدفاعية و في نفس الوقت تريزيجيه اتزق للعمق حبة و بقى ينزل كتير يطلع بالكورة عكس الشوط الاول و ده كمان حرر بن شرقي و ريحه حبة ف بتغييرة واحدة انت قدرت تفك الملعب كله ..

كمان عجبني جدًا ان بعد تسجيل الاهلي الهدفين و العودة للماتش النحاس او عادل مصطفى او الجهاز ايًا كان مين صاحب القرار قرروا ميرجعوش بل ضغطوا زيادة بنزول عبد القادر مع عدم خروج بن شرقي مدرب تاني كان هيقول خلاص انزل ديانج و رضا و اضلمها لكن ده كان هيحطك تحت الكورة لمدة طويلة و يوصل رسالة انك خلاص بتدافع زي ما عمل يانيك فيريرا و كنت هتغلط نفس غلطه ..

نزول عبقادر مع وجود تريزي و الشحات و بن شرقي في الملعب خلاك تكسب وقت كبير على الكورة بل و تهدد كمان مرمى الزمالك .. اخيرًا حتة الضغط بديانج كانت فكرة صايعة برضو ديانج نزل كان بيضغط من قدام مع الفرود مكنش موجود في نص الملعب او عند منطقة جزاء الأهلي ..

اخيرًا بقى نقطة على الهامش بعيد عن المدربين مروان عطية لاعب مميز جدًا في حدود افريقيا و الدوري المصري و طول مانت معندكش اجنبي قوي و مش مقعدله بوسكيتس بره فلازم مروان يتقدر اكتر من كده من الجمهور ..

البوست ده كان هينزل ايًا كانت النتيجة و ده ليه مش انتصار لوجهة نظري قد ما هي خناقة كان نفسي اكسبها من وقت المقارنة بين زيزو و هو في الزمالك و هو الفرق بين اللاعب الاكاديمي و اللاعب الموهوب ..

وقت وجود زيزو في الزمالك قولنا ان الشحات هيظل افضل من كل اجنحة الدوري لأنه لاعب موهوب و تربية شوارع بالبلدي ..

عنده الحل المختلف المباغت اللي قادر يفك كل التكتلات رغم انه عنده مشكلة في الاستمرارية بس و هو فايق او هو عايز قادر يعمل الشئ المختلف بذكائه و فطرته ..

الاهلي هيعاني كتير لو خسر عبد القادر و الشحات و فضل يستخدم طاهر و لاعيبة بدنية حتى في وجود بن شرقي و تريزيجيه و زيزو لازم يبقي على اصحاب الحلول الفردية المختلفة ..

لو متعرفش و انت غالبًا متعرفش ف منتخب مصر هيبدء مشواره في كأس العالم للشباب النهاردة الساعة 11 قدام اليابان لكن للأسف مفيش أي اهتمام بسبب ان الناس معندهاش اي ثقة في الجهاز الفني اللي بجانب محدوديته فهو اصلًا مكنش هيصعد للمونديال رغم ان بطولة افريقيا كانت في مصر ..

بكتب عن المنتخب ده دلوقتي و هتابع مشواره لأنه في عناصر كتير جدًا مميزة و عندها بوتيشنال تبقى لاعيبة كويسة في المستقبل لو كان تم الإهتمام بيهم و جابوا مدرب اجنبي او حتى على اقل تقدير كان ميكالي كمل مشواره معاهم اللي كان مدرب مميز جدًا في الفئات دي ..

بعض العناصر اللي بكلمك عنها هما كباكا و محمد سيد ثنائي الوسط المميز جدًا اللي بسهولة قادرين يلعبوا اساسيين في اندية القمة بجانب جناحين زي محمد عبد الله و عمر خضر اللي برضو بالتأكيد يستاهلوا فرصة حقيقية لتطوير امكانياتهم و في من مزدوجي الجنسية الثنائي سليم طلب و تيبو جابريال اللي يعتبروا الابرز مع الاسماء اللي فوق ..

في عناصر تانية برضو زي بوستنجي و عابدين في الدفاع ولاعيبة الاتحاد السكندري ابطال الجمهورية السنة اللي فاتت و عمرو خالد بيبو و غيرهم كتير ..

الملخص اني صعبان عليا كم المواهب اللي ذكرتهم فوق دول يضيعوا او مياخدوش فرصة حقيقية او يظهروا بشكل سئ بسبب وجود جهاز فني بقيادة اسامة نبيه اللي بدون اي مؤهلات .. عامة خلينا نشوف

تشكيلة الاهلي السعودي النهاردة كان فيها 10 محترفين من جميع جنسيات العالم و لاعيبة بمليارات غير تشكيل بيراميدز بمحترفينه برضو اللي زلاكا نفسه مكنش بيخشه كلاعب اساسي اصلًا و النتيجة زلاكا هو نجم الماتش مع مايلي و الشناوي ..

و ده يرجعنا لأكتر نقطة كنت بتكلم فيها على طول و دخلت بسببها خناقة زيزو و الشحات و هي ان الجناح الموهوب اهم مليون مرة من الاكاديمي الموهبة البيور بتاعة الشارع قادرة تفرض نفسها و تطغى على اي حد ..

جناح مهاري و سريع و ايجابي على الجول و الأهم من كل ده انه عنده الحمية و قادر يضغط و يخبط و يرزع بالبلدي و يسترد الكورة لفرقته ..

موهبة كبيرة محتاجة شوية تركيز بس و هتروح لحتة بعيدة .. بالمناسبة بيراميدز معاها مدرب من الافضل في الدوري المصري على مدار التاريخ و هيندموا كتير لو فكروا يغيروه ..

الحقيقة بقدر زعل الواحد على صلاح بقدر الفرح لديمبلي الصورة اللي قدامك دي كانت معمولة فوتوشوب كترول في وقت من الاوقات على الراجل ده بسبب سوء مستواه ..

و الحقيقة هو كان يستاهل النقد فعلًا وقتها لكن مكنش يستاهل التشكيك في امكانياته لأنه كان ظاهر بشكل مميز جدا في بروسيا و حتى في فترات له مع برشلونة مكنتش كارثية بالتحديد اخر فتراته بعد ما كبر و نضج اكتر ..

ديمبلي رجع نفسيًا و ذهنيًا قبل فنيًا و قدر يغير الصورة اللي متاخدة عنه و قدر يكون الهيرو اللي بيجيب لباريس الابطال بعد بداية متعثرة و بعد ما الفريق حاول كذا مرة و اتاخد عنه الصورة انه فريق بيصرف و بيفسد بس ..

ديمبلي اللي قبل يغير مركزه و ياخد ادوار جديدة مركبة مع مدرب مش سهل و مبيقبلش بحاجة زي انريكي القدر بينصفه النهاردة و يبقى الأفضل في العالم و حتى لو مستمرش بنفس الاداء فيكفيه انه عاش الحلم ده و لو لمرة واحدة ❤

محبتش اتكلم امبارح علشان الناس تكون أهدى بس حقيقي تصرف تريزيجيه بعد الجول ده يبينلك عقلية الجيل الحالي بالكامل في الكورة المصرية مش الأهلي بس ..

اكيد كلنا عارفين ان تريزيجيه من وقت رجوعه للأهلي و هو مستواه سئ جدًا و مبيقدمش حاجة و رغم كده الجمهور كان واقف جنبه و بيحاول يعليه على زمايله بالأخص في المنتخب لكن ده كان رد فعله امبارح اول ما سجل جول و بدء يشم نفسه ..

النقطة دي تاخدني لنقطة المينتاليتي اللي كان اتكلم عنها صلاح قبل كده و الناس خدت الموضوع في سكة سف و ترول رغم ان كلامه كان صح 100% و لنفس السبب هفضل شايف تريزيجيه لاعب مصري اخره الدوري المصري و لعبه في استون ڤيلا كانت خطوة تفوق مستواه بشكل كبير و دخوله البريميرليج من الاساس كان خطوة كبيرة و ده بسبب عقليته ..

عقلية تريزيجيه بتتلخص دايمًا في إنه شايف نفسه مظلوم و مضطهد و سنيد للنجم الأول و مش واخد حقه و ده من ايام خروجه لاندرلخت مش جديد عليه بالرغم انه في الحقيقة تريزيجيه اخد حقه و زيادة من الكورة لدرجة انه و هو بيبطل بيلعب للأهلي اكبر نادي في افريقيا و الوطن العربي و هو فعلًا لا يجيد غير دور السنيد و ميقدرش يتحمل ضغوطات و اضواء النجم الأول ..