N&M Store

بسبب مشكلة الطفل ياسين 🥺
شفت تعليقات لأمهات مرعوبة وهنودي ولادنا المدرسة ازاي ؟

بصي ياست الكل ركزي معايا جدا في الكام سطر الي جايين دول

انتي مطلوب منك اربع حاجات توصليهم لابنك او بنتك ويبقي ده اسلوب حياة بينكم 🫂

💢اول حاجه / الحب الغير المشروط ♥️
شبعي ابنك حب واحضان انا بحبك
سواء عملت الواجب او معملتهوش متشرطيش حبك بالمهام الي عليه ، حتي لو غلطت انا زعلانه من سلوكك الغلط وزعلانه اني
بعاقبك بس بحبك .

💢 تاني حاجه/ تخصصي لابنك وقت ⏰️
حضرتك محتاجه تتكلمي مع ابنك او بنتك يوميا عن يومهم ، مهما كنتي مضغوطة لو نص ساعة بس في اليوم ..

أساليه عملت اي النهارده في الكلاس او الدرس او عموما عن اي مكان كان فيه ، احكي لي اي فرحك ؟
طب في حاجه زعلتك ؟ طب أكلت حاجه حلوة ؟

وسبيه يحكي واسمعيه كويس منها تبني بينكم علاقة ويتعود يحكي لك ومنها تصححيله اي معلومة او لفظ أكتسبه غلط ، وفي الوقت نفسه تطمني ابنك بيتعامل مع مين ؟

💢تالت حاجه / الثقه والشجاعه 💪
محتاجه تزرعي في ابنك انه شجاع ويدافع عن حقه وميسكتش
لو اتظلم ..
تعززي عنده ثقته بنفسه وانه فيه حاجات جميلة وتقوي نقاط ضعفه وده مع الوقت هيحميه من النقض والتنمر ..
طبعا كل المفاهيم دي هتوصليه له واحدة واحدة تبعا للمواقف .

💢رابع حاجه وأهمهم / مساحة أمان 😌
ان الطفل يكون عارف ومتأكد انه لو حكي اي حاجه حتي لو غلطان هو في أمان ..
متزرعيش جواه الخوف لان للأسف دي اكتر حاجه بتخلي ولادنا خايفين يحكوا ..
هي خوفهم من العواقب ، سواء خوف مننا او علينا 🥺

ابني مساحة أمان بينكم علي طرفي
⚡️ الطرف الاول / متخفش واحكي حتي لو غلطان
انا بسمعك ولما توعديه ويحكي ايااااك تعقبيه عشان ميفقدش الثقه في وعدك ..

⚡️ الطرف الثاني / متخفش واحكي ولو لك حق هيجيلك
احنا اقوياء وبابا وماما جنبك محدش يقدر يأذيك واحنا معاك ..

المفاهيم الكتير الي فوق دي 👆
الطفل مش هيتعلمها في يوم وليله
ويمكن تحتاج سنيين ومحتاجه استمرارية ..

بس صدقيني مع الوقت النتيجه هتبهرك
هتلاقي ولد واثق في نفسه وعارف حقوقه وبيجي يسألك اعمل اي في الموقف ده ؟
هتلاقي بنت بتيجي تحكي ومصحباكي وبتسألك هي صح ولا غلط

ربنا يحفظ أولادنا جميعا ويعينا علي تربيتهم ويرزقنا برهم يارب .