Adam's corner

البارح قريت واحد module وسمو تسيير الأزمة .. حاجة خلوية .. راني نتبع ونسمع .. حتى استاذة قالتنا كاين : رأس مال بشري وكاين رأس مال فكري .. وهنا فالقاعة رانا كامل بمثابة رأس مال بشري ..

بصح شكون لي فيكم رأس مال فكري ؟! صحا ..

ايا après كملت تشرح .. ويمدو أمثلة وراني نسمع على كيفاش المؤسسات وكدا يسيرو الأزمة .. يهدرو على air algérie و حتى algerie telecom راك تعرف كل واحد يمد مثال على حسابو ..

انا تفكرت .. اصبر عندي تجربة صغيرة ؟! ههه ..

ايه العام ليفات كانت عندي الفرصة وكنت مالخلية تاع نادي اتحاد الحراش .. دخلت لصفحة الرسمية وهي 30 الف .. في أشهر رجعت 120 الف .. ايا حتى مور ماخلاصت المهمة قعدت نخمم وحدي ..

قلت واش كان rôle تاعي لتم؟ ماكنت ديزاينر ماكنت فوطوغراف ماكنت نخدم ليريلز وماكنت نكوفري ليماتش .. كنت باش نكون ؟! وبديت نتفكر واش ساهمت .. لقيت بلي نسال في 10 منشورات ...

كلها كانت ناجحة بسبب انها خارجة عالقالب .. psk بكل بساطة .. ماكنتش نحب نتبع واش يديرو باقي الخلايا الإعلامية فقط ! وكنت نخمم بلي لازم عليا نزيد + افكار جديدة من عندي بلا ما نخاف ...
. وكيما كان الحال درت 10 منشورات نجحو ..

بصح واحد فيهم .. قعدلي فراسي ليومنا هذا .. وتفكرتو بسبب كلام استاذة لي قتلكم عليه فاللول بلي كاين رأس مال بشري .. وكاين رأس مال فكري ... مع تسيير الأزمة ولي يلزم تكون التصدي لها سريع !!

نهار لعبنا في واحد لبلاصة وسمها تلاغمة صراو مشاكل ... وخرجو فيديوهات لبعض من الجماهير تاعنا يسرقو في واحد الحانوت بداو الصفحات والقنوات يتداولو الفيديو بسرعة ... كونها فضيحة ..

دونك هنا طاح النادي تاعنا وجماهيره في ازمة .. وكانت السمعة في اللعب ياخو .. والحل كان يلزم يكون سريع باش نسيرو الازمة هادي! ودوك نقدر نحكيلكم الفكرة لي درتها بعد ما جاز عليها عام عادي ..

تامنوني؟ التصدي لها كان بمنشور بسيط جداً ومفيد وبدل ڨاع الرأي العام .. ببساطة كان عندنا ماتش وحدوخر في رويسو يوم الجمعة .. وعلى الساعة 14:30 .. وقت حساس بزاف يعني ماتصليش ..

ايا خممت وحدي وكنت حشمان نطرح الفكرة ع team فالمجموعة باسكو ماكان كاين حتى خلية اعلامية دارت واش حبيت ندير انا ..

والفكرة ببساطة هي نديرو منشور نوعيو فيهم الجماهير بلي صلاة الجمعة اهم من المباراة (( بدون خوف من اي جهة )) ودرنا هاشتاج + خدمنا واحد الصورة تاتيري :

فيها زوج مساجد قريبة للملعب .. لقيت زوج .. درت اسم تاعهم .. حسبت المسافة .. مع الوقت شحال تدير .. ومن تحت الآية ...

هدا مكان .. صدقوني غير بهاد المنشور تحلت الأزمة لي طاح فيها النادي .. والسمعة تاع جماهيره عاودت تسڨمت والفيديوهات ديال السرقة اختفت سريعاً وفيديوهات الخروج من مسجد انتشرت ..

+ حتى القنوات .. كالنهار والحياة والبلاد والشروق كتبو على هاد المنشور .. وتكملوا عليه في اخبارهم وفي مواقعهم + كاين نوادي وحدوخرة كإتحاد البليدة تبناو الفكرة تاع صلاة الجمعة ونجحتلهم ..

مور ما جاز عام عالحادثة .. وقريت لبارح عند استاذة باش بديت زعما نحس ونخمم فواش درت جاتني لحظة ادراك .. العام ليفات كي درتها ماكاش عمبالي بلي حليت أزمة بصح كي قريت باش عرفت خو 😆

ياخو مقبيل شوية كنت نتوضا .. ايا لحقت للرجلين اعزكم الله غلطت توضيت زوج مرات .. حبست جاتني لحظة ادراك مداك كملت .. باينة ماعاودتش مالزيرو .. ايا قلت عيب عليا نعرف ومانفيدكمش خاوتي

انا كانت عندي معلومة بلي فالصح نتوضاو خطرة وحدة لكل عضو .. ومالسنة لي نتوضاو زوج مرات ولا ثلاثة مرات كيما رانا نديرو ..

فدت شحال من واحد بهاد معلومة فالسطاد كي مايكونش كاين ماء بزاف! بصح عندي يامات تعلمت حاجة من عالم بزاف هايل ونحبوه ڨاع .. يعرف يلحق المعلومة وهو الشيخ فرحان العنزي ويقول 👇

(( .. يجوز التنويع بين الاعضاء من ناحية العدد .. زعما غسلت وجهك ثلاثة مرات يديك زوج مرات .. والبخاري في كتابه الصحيح قال باب الوضوء مرة مرة ، وقال باب الوضوء مرتين مرتين ، وقال باب الوضوء ثلاثا ثلاثا .. مالا هنا نقدرو نعرفو بلي المرة الأولى هي الفريضة وزائد هي السنة .. تسما علابيها نقدرو نوعو .. تقدر مرة مرة ولا زوج وتقدر حتى رجليك زوج مرات .. يديك مرة .. وجهك ثلاثة مرات عادي ))

انتهى كلامه حفظه الله .. ياخو مارانيش حاب نحلف ! بصح 90% مالائمة تاع دوكا يا مايعرفوهاش يا يستهزاو بهاد الفائدة العظيمة

شحال من مصغر لحق لرجليه غلط عاود لوضوء .. شحال من مصغر تلفتلو عاود لوضوء .. تبذير وفقط .. وهي الحمد لله نقدرو نوعو ..

اللهم إني بلغت .. الدور تاعك الان .. بارطاجيها لصاحبك دير copie coller .. ماتنساش قال الرسول : من دل على خير فله أجر فاعله !

روماركيتو كي نكونو فلجامع نصلو ورانا حا نكملو؟ يعني بالتشهد اللخر وعلابالنا ڨاع بلي 99% من الجوامع نلقاو فيهم الإمام يطول حنا نكملو قبلو .. ماجاكش كاش خطرة استفسار علاه نكملو نشهدو وهو مازالو؟

واش نديرو في ميزك كي يكمل قبلنا ... نعاودو التشهد؟ نهبطو صبعنا؟ لالالا تبعني نفهمك .. حاجة خفيفة ماتعاود تشهد ماتهبط صبعك ماثقل روحك .. والصراحة رانا غافلين على هاد الأمر العظيم .. رانا نراطو ..
. علابالك كاين دعاء مستحب وسنة مور مانكملو تشهد؟ علابيها الإمام يطول .. فالحديث الرسول صلى الله عليه وسلم قال (( إذا فرغَ أحدُكُم مِنَ التَّشَهُّدِ الأخيرِ فليتَعوَّذ باللَّهِ من أربعٍ ؛ من عَذابِ جَهَنَّمَ ومِن عَذابِ القبرِ ومِن فِتنةِ المَحيا والمَماتِ ومن فِتنةِ المسيحِ الدَّجَّالِ )) ✅

ساهلين بزاف ... كمل تشهد ديالك اللخر .. ادعي واش وصاك الرسول ماتحوسش تفهم .. تبعو واش خلالك .. قول هاد الربعة حاجات برك :

👈 اللهم إني أعوذ بك من عذاب جهنم.
👈 اللهم إني أعوذ بك من عذاب القبر.
👈 اللهم إني أعوذ بك من فتنة المحيا والممات.
👈 اللهم إني اعوذ بك من فتنة المسيح الدجال.

وموراها تانيك تقدر تدعي لروحك بواش تحب فالدنيا وآخرة .. عندك فرصة اخرى أخيرة تدعي فيها لروحك ولا لكاش بنادم ولا حاجة زعما نسيتها قبل ما تسلم فصلاتك (( بعد الصلاة الأذكار ماشي الدعاء ))

المهم ادا لحقت لهنا يعني قريت الكلام هدا وتعلمت هاد السُنة والدعاء تسما راك وليت تعرفها .. فالصلاة جاية سيي تعمل بيها + كي تريح مع صحابك تجيبكم ڨصرة علمهالهم ماتحشمش خو وبارطاجي الخير ✅

احبس دقيقة خو راك تطلع وتهبط كاين واحد سُنة يلزم دوك نعملهالك .. صغيرة بزاف ماتعييكمش ڨاع .. اتعلمها وروح بارطاجيها ولا انقلها كيما تحب المهم توصلها لناس و تعلمها لولادك والديك خاوتك صحابك psk غير يديروها راح تدي اجر نتا راقد ونتا برا و ... صحا وهاد السنة تقدر تقول مهجورة .. اذًا الأجر مضاعف .. أجر احياء سنة واجر فعل سنة .. وهي 👈 ثبت عن الرسول صلى الله عليه وسلم قبل ما يدخل للخلاء (( فزماننا دوكا المرحاض أعزكم الله )) يقول دعاء : (( أعوذ بالله من الخُبُث والخبائث )) و فالخروج يقول : (( غفرانك )) كلمة وحدة برك خو .. تدي الأجر ×2 بلا ماتعيا .. حاجة خفيفة سنة هايلة .. وعلابالك الحكمة علاش نقولو غفرانك؟ شوف ربي نعم عليك بالماكلة والشراب وموراها أنعم عليك بخروج الأذى من الجسم ديالك .. ونتا كبنادم راك محل التقصير؟ قد ماراح تشكر ربي ماتكفيش؟ ... تسما جات هاد كلمة عند زوال الأذى بعد حضور النعمة بالطعام والشراب أن تستغفر الله .. وربي يحب العباد ديالو يشكروه .. تسما شت شحال هايلة؟ تقول غير غفرانك عندك : اجر سنة + اجر احياء + اجر الشكر + يحبك ربي ☺️

كاين واحد الشيخ ماعنديش بزاف ملي عرفتو جاي مايكومبليكيش ڨاع ومايقولكش حرام زعما أو بدعة مباشرة! يعرف كيفاش يوصل معلومة ويخليك تتقبلها ونتا مبتسم وهادي صرات معايا شحال من خطرة ...

مثلاً مؤخراً شفت فيديو ديالو ... وحدة وسمها ماريا سقساتو واش هو الحكم تاع استخدام خاتم الاستغفار والمسبحة .. ( هه هادوك لي راهم دايرين حالة يديروها فصبعهم كيما راهي موضحة فالصورة ) ...

ايا جاوبها بطريقة جد أثارت انتباهي راح نبسطهالكم للدارجة 👇

”يا ختي بارك الله فيك ورضي الله عنك ، الرسول صلى الله عليه وسلم كان كاين في وقتو العقد يعني شغل مسبحة وكان كاين النوى يحسب بيهم .. ماستعملهمش النبي ... وانما كان يستعمل اصابعه ، بل أنامله .. وكان يقول أنهما مستنطقات .. يعني تشهدلك يوم القيامة وتنطق يوم القيامة وتقول سبح لي كدا وكدا .. يا ختي يلزم علينا نعتنو بالسنة .. ونعتني بهدي النبي ... والله هذا أكمل ومانقولش هذا بدعة! لا لأن فيه كلام لاهل العلم لكن أفضل وأكمل وأشرف الهدي هو هدي محمد“

”ويجي دوكا بعض الناس يقولك انا ننسا .. وانا نسيي نريڨلي الحالة بهادي .. والله أنا نقولك ياخويا نسيانك مايخليكش تروح تدير حاجة مادارهاش الرسول .. ياخويا ادا نسيت زيد واش يمعنك؟ زعما دوكا سبحت 33 وشكيت ادا 23 ولا 33 مايضركش ادا زدت عشرة الأجر ليك .. ادا كانت ناقصة كملت وادا كانت تامة راك أرغمت شيطان“

”وتانيك قضية الخاتم هدا فيه حاجة من الرياء حتى وماشي قصدو .. فيييه حاجة من الرياء .. بمعنى أن انسان شغل يوري لناس بلي يسبح ويهلل .. لالا .. يلزم عالانسان يخبي عمله .. وكاين دوكا تسبيح مطلق واستغفار مطلق يعني تستغفر وتسبح وتهلل بدون عدد بلا ماتحسب والأجر يولي ليك ... غير فالصلوات تضبطها“ انتهى كلام الشيخ 👆

والله يا خاوتي لعزاز غير كلام جد منطقي وهايل ويدخل للقلب .. و surtout تسمعوه يهدر .. ننصحكم وبشدة بهاد الشيخ حفظه الله .. ليكم .. وبصفة خاصة لوالديكم ادا كانو كبار يقدر يلحقلهم المعلومة

وسمو (( الشيخ فرحان العنزي )) المهم .. هاد المعلومة سيو لحقوها وانشروها.. جزاكم الله خيرا باش يعرفو الناس واش راهم يراطو في الأجر كي يسبحو بالمسبحة عوض صباعتيهم ڨاع لي تشهد عليهم !!

مافهمت والو انا .. العالم لي نبارطاجي عليه نلقا جماعة مالناس تسبو؟ تشوف حياتو فواش جازت وحياة لي جا ينتقص منو فتعليقات؟ تحير وراني بلوكيت بزاف علاجال فركوس وراني واجد نبلوكي الباقي ...

لأنو ببساطة دوكا راح نحكيلكم على واحد ماشي عالم أفريقيا .. هذا يعتبروه من أعلم أهل الأرض .. داير سطر كبير .. وصانا بيه شيخ ابن عثيمين رحمه الله قبل ما يموت .. باش ندو منو العلم من بعده ..

زاد يوم 28 سبتمبر 1935 يعني راح يدير 90 سنة ان شاء الله في السعودية القصيم من مدينة بريدة .. هو من عشيرة آل شماس قبيلة الدواسر .. قالك تربى يتيم مات باباه كي كان صغير ومامنعوش الأمر يتعلم القرآن الكريم ومبادىء القراءة والكتابة على يد إمام بلده ...

دخل لمدرسة الحكومة كي تفتحت عام 1950 هكاك وكمل قرايتو في المدرسة الفيصلية .. ثم دخل لمعهد العلمي ببريدة عند افتتاحه وغير تخرج منو زاد دخل لكلية الشريعة بالرياض وتخرج منها عام 1962 وتانيك دا ماجيستار الفقه .. ماحبسش وزاد الدكتوراه في الفقه !!

مور ما كمل قرايتو .. قبل ما تزيد نتا يا لي راك تخون فيه رجع يقري فالمعهد العلمي بالرياض > ثم نُقل للتدريس فكلية الشريعة > ثم رجع للداراسات العليا بكلية أصول الدين فالمعهد العالي للقضاء حتى عينوه مديرًا للمعهد بصح ما طولش وزاد تانيك رجع يقري فيه ... نزيلدكم؟

👈🏼 عضو في هيئة كبار العلماء ..
👈🏼 مشاركات منتظمة في المجلات العلمية ..
👈🏼 عضو في لجنة الإشراف على الدعاة في الحج ..
👈🏼 إمام وخطيب ومدرس في جامع الأمير متعب ..
👈🏼 يشرف على الرسائل العلمية ماجستير ودكتوراه ..
👈🏼 عضوا في اللجنة الدائمة للبحوث العلمية والإفتاء ..
👈🏼 عضو في المجمع الفقهي بمكة المكرمة التابع للرابطة ..
👈🏼 يشارك في الإجابة في برنامج (نور على الدرب) في الإذاعة ..

حتى شيوخه بزاف منهم ابن باز و السعيدي والشنقيطي .. بلا منحكو تلاميذه مايخلاصوش خو .. ومع كتبه ماتحسبهمش تفوت 55 والعلم لله .. و الحاجة لي تميزو هي إنو بالرغم عندو دكتوراه في الفقه بصح دايمن كي يسقسوه وما يعرفش حاجة يقولهم ببساطة مانعرفش ...

المهم هدا مكان .. حاجة خفيفة ... استفدت انا من علمه بزاف ... عندو موقع مايحبسش .. وعندو فيديوهات مايخلاصوش تغرق معاه يالعزيز غير استفاد منو حوس عليه واحكم عليه وحدك واحد مايحشيهالك ..

وتشوف هاد المسيرة الطويلة ڨاع وحدك تتكاكا .. مسيرته بدات واقيل قبل مايزيد باباك وتجي تسبو وتعايرو؟ حتى ماتحبوش عيب يحاسبك ربي علاجال تعليق ... إعلم إن لحوم العلماء مسمومة وانت الخاسر ..

صحا وهدا فركوس لي دايمن يسبو فيه ودايمن trend يناير و زكاة الفطر ووو .. تعرفوه شكون هو؟ ياك العدو ديالك يلزم تقرا عليه ههه ارواح نحلبك شكون هو و واش حكايتو هدا العالم تاع أفريقيا ...

ايه حبيت ولا كرهت خو هو عالم تاع إفريقيا و هو العالم لي يُرجع إليه في الجزائر وحتى باقي علماء العالم تأخد منه بفضل عِلمِه الغزير .. و مقبيل برك شفت فيديو بمسجد جاي بين البانيا ويونان يهدرو عليه !

المهم شيخنا فركوس حفظه الله زايد في عام ثورة 25 نوفمبر 1954 يعني راو قريب 71 سنة .. قبايلي الأصل بصح هو زايد فالقبة العاصمة وكاين لي قالولي تربا في مدينة الحراش و بالضبط جنان مبروك ..

بدا يتعلم في مدرسة تاع قرآن و دخل يقرا عادي كيما حنايا .. يعني بريمار سيام و ليسي .. بصح فوقتو ماكانتش كاينة كلِّيَّاتٍ ومعاهدَ في العلوم الشرعية تسما كمل قرايتو في كلِّية الحقوق والعلوم الإدارية ..

كي كان يقرا فالجامعة قعد غير يخمم وعندو هاديك الرغبة باش يقرا العلوم الشرعية والنبوغ فيها .. فأكرمه الله تعالى بقَبوله في الجامعة الإسلامية بالمدينة النبوية .. حيث وجد ضالَّتَه في هذا البلد الأمين

وشيوخه بزاف par exemple الشنقيطي و أبو بكر الجزائري ولحق فستعينات بإبن باز والانصاري رحمهم الله حضر محاضرات ديالهم ..

بصح في 1990 راح لعند خاوتنا 🇲🇦 وبالضبط لجامعة محمد الخامس بالرباط باش يسجل أطروحة العالمية العالية "الدكتوراه" .. وقالك ثمَّ حوَّلها إلى الجزائر .. فكانت أوَّلَ رسالة دكتوراه دولة نوقشت بالجزائر العاصمة في كلِّية العلوم الإسلامية .. عام 1997 .. انعم اييييه ..

(( ونزيدلك هادي بلا مانذكر العلماء اللي شكروه ڨاع .. نذكر منهم عبد المحسن العباد ( بابات عبد الرزاق البدر ) لي قالهم : اوصي أن يستفيد طلَّاب العلم في كلِّ بلدٍ مِن المشتغلين بالعلم مِن أهل السنَّة.. وكان ممَّن ذكره في الجزائر 🇩🇿 الشيخُ محمَّد علي فركوس !! )) لعزيييز ...

وكخاتمة اجمل حاجة قريتها عليه هي كي كان مصغر قالهم كنت نستفاد فايدة نفرح بزاف .. ونتمنى لوكان نقدر نطير بيها للجزائر باش نلحقها لناس ونعاود نرجع للمدينة .. شيخنا فركوس يحب دزاير وناسها !!

نتمنى استفدتو .. وعرفتو مسيرة تاع واحد من كبار العلماء .. اشفاو ولا احفظو هاد المنشور .. وراكم مسموحين بنقله بلا ماتشاورني .. المهم .. باش نزاحمو اهل الباطل .. ولي يصغرو شيوخنا كلي ماقراوش ..

🔴 ملاحظة .. انا آدم لي كتبت هادي ماراني طالب علم عندو ما راني نحضر عندو وجامي رحتلو .. انا نستفاد من فتاويه برك انا عامي 🔴

واحد كومونتالي قالي المروك معمرة صوفية كيما حنا ... هاد الجملة شحال تهاوشني تاع معمرة صوفية ... يالعزاز نحكيلكم هادي؟ تعرفو العالم ابن باز؟ رحمه اللّه .. علابالكم الشيخ ديالو فالتوحيد مروكي؟

أرواح نحكيلك مالا .. راني نحس بالفخر حتى ومانيش مروكي ..

إسمه ”تقي الدين الهلالي“ وُلِد عام 1893 عاش قريب قرن حتى عام 1987 توفى ... وباش يكون عمبالكم كان في شرك و ضلال لمدة 29 سنة .. كان يروح لقبر التيجاني بمدينة فاس ويريح 3 أيام اللتم وهو قالها .. كان يتوسل إليه وينشد قصائد المديح فيه ، فهداه الله للحق

المهم كي لحق 29 سنة هاجر لمصر يطلب علم الحديث فجامع الأزهر بصح ماريحش بزاف مالقاش وش كان حاب حتى راح للهند تلاقا علماء كبار .. ومن أهممهم المحدث العلامة الشيخ عبد الرحمن بن عبد الرحيم المباركفوري .. وراح للعراق وتلاقا العالم الموريتاني الشنقيطي ...

صحا مور هاد رحلات البعاد ... باينة زاد راح لسعودية وعلابالكم وش قالهم عليه الملك عبد العزيز آل سعود؟ قالهم : ”إن محمدا تقي الدين الهلالي المغربي أفضل من جاءكم من علماء الآفاق! فأرجو أن تستفيدوا من علمه“ ايا ريح غير عامين فلمدينة + عام في مكة وزاد هاجر ..

(( هادي معلومة غريبة بصح علابالك ياخو قرا فربعة جامعات؟ جامعة ويلز بريطانيا 🇬🇧 جامعة هومبلوت ألمانيا 🇩🇪 و جامعة القرويين فاس المغرب 🇲🇦 جامعة الأزهر مصر 🇪🇬 دا شهادة دكتوراه فـ برلين المانيا 1940 وكان فتواصل مع هت*لر ودارو كيفكيف اذاعة عربية !! ))

وأما المؤلفات تاع الشيخ كاين بزاف بزاف مايخلاصوش ...
بصح الحاجة الشايعة ترجمته لصحيح البُخاري للانجليزية ..

وكخاتمة نقولكم هذا الرجل لي عرفتكم بيه دوكا ، حير العُلماء فواش يصنفوه .. جاي عالم وفقيه ومحدث ولغوي ومفسر زيد رحالة و أديب نزيدلك؟ شاعر مؤرخ دكتور وفوق هاد شي يهدر 7 لغات ... تسما هاد الإنسان يليق تحترمو + تهدر عليه + تقرا عليه + نعلم الناس شكونو

يقول الشيخ إبن باز -رحمه الله- : ”إنَّه شيخي في التَّوحيد“ !

مانحبش نهدر على حاجا كي تكون trend والناس كامل تدير فيها ... ممكن نتعرض للانتقاد .. بصح الحاجة لي راهي ترند دوكا يلزم نحكي عليها نخاف صحابي يطيحو فيها ويعذبهم ربي سبحانو علاجالها ..

مهما تكون ردة فعل سواء قبلتو أو لا ... وراني نقصد هاديك ghibli style لي راهم يديروها بذكاء اصطناعي .. تمدلو شغل تصويرة وهو يرجعهالك على شكل كرتون ولا انيم ... شغل يديرلها محاكاة وكدا ..

عجبتني مع لول .. مانكدبش عليكم .. ماخممتش esq حرام ولا حلال مقبيل شفت كومونتار تاع واحد مصغر 17 عام فعمرو هكاك ربي رزقو بالعقل والحكمة هدر على الحكم تاعها .. قلت اوو؟ رحت نبحث ..

لقيت شيخ لا أعرفه ولكن قنعني فهاد مسألة .. قبل 7 سنوات أفتى بالموضوع هذا .. وراح نبسطلكم كلامه للدارجة باش تفهموا : 👇🏻

”هذا لا يجوز .. التصاور لي تخرج من هذا البرنامج صورة محرمة ... وتنطبق عليها علة النهي عن التصوير .. وشنو علة نهي على التصوير؟ المضاهاة ومحاكاة لخلق الله .. وهذا البرنامج : يدير مظاهاة ومحاكاة لخلق الله عزوجل بصورة محترفة .. تنطبق عليها المحاكاة .. وعلابيها حرم التصوير ... قال النبي قال الله تعالى ومن اظلم ممن ذهب يخلق كخلقي .. بخلق كخلقي يعني يحاكي خلقي .. وفي حديث اخر إن اشد العذاب يوم القيامة المصورون .. وذكر بلي راهم يضاهون بخلق الله .. وهادي هي السبة لي علاجالها حرم التصوير .. وهذا البرنامج راه يحقق هذه السبة ... فيه محاكاة ومضاهاة لخلق الله“ انتهى الكلام 👌🏻

المفيد ماعندي مانزيد نهدر ... يلزم عليك انت مادام عرفت المعلومة .. تحذر الناس لي تعرفهم .. بارطاجي ولا كوبي كولي .. قالك التصوير لي فيه مضاهاة خلق الله ظاهر الادلة انه من كبائر الذنوب .. الله يهدينا !

كنت قاعد فالصف ثاني الاز ...

نسمع فالإمام ونخزر فيه psk سُنة ..

ايا بدا يهدر ع زكاة الفطر .. قال ندفعوها نقداً ..

ماجاتنيش غريبة .. كل عام هكدا والفتو ههههه
زاد قال بلي تخرج قبل صلاة العيد أو يوم وو ..

حتى هنا كل شيء عادي .. كلام يتعاود ملي كنت صغير
تبسمت مع روحي .. باينة ماراحش نقدر نعارضو خو ههه

بصح لأول مرة جاتني لحظة إدراك ..

وعلاه كي قال نخرجوها نقدا .. بدا يغنجق فالكلام ..
يهدر n'importe quoi بالفصحى باش يبان صحيح

و en même temps كي قال نخرجوها قبل العيد ..
جبد و ذكر احاديث تاع الرسول صلى الله عليه وسلم !!

هنا قلت في قلبي .. وعلاه ماقالناش ببساطة :

🔴 عن إبن عمر رضي الله عنهما قال ”فرض رسول الله صلى الله عليه وسلم زكاة الفطر من رمضان صاعا من تمر أو صاعا من شعير على العبد والحر ، والذكر والأنثى والصغير والكبير من المسلمين“ رواه الجماعة!

علاه رمانا على راسنا ومامدلناش الدليل !!

منين جاب هادي نقدا هههه قالنا كانزميل خو ههه
ماشي هادو هوما لي على العام يدعاو المالكية ؟؟

”حنا مالكية ومانتبعوش سعودية وو ههه malgré
الإمام مالك من اللتم ههه عمبالهم من alger هههه“

فزكاة الفطر يولو مايعرفوهش؟ psk فالموطأ ديالو
معمرة ”بحدثننا مالك“ ... بلي زكاة الفطر طعام ..

المفيد الله يهدينا ويهديكم والله ..

ابن باز يقولك يلزم عليك تخرجها ماكلة ...
ابن عثيمين إخراج زكاة الفطر نقوداً غلط ...

لعزيز كاين بزاف ناس محتاجة وتقبل الماكلة
ماتلقاناش السبايب ڨاع .. ماتبعوش هاد الائمة

هايليك مقادير زكاة الفطر :

• الدقيق 2000غ - الفرينة 1400غ ✅
• العدس 2100غ - القمح 2040غ ✅
• جلبانة مكسرة 2240غ - اللوبيا 2060غ ✅
• الزبيب 1640غ - الطعام 1800غ ✅
• المحمصة 2000غ - التمر 1800غ ✅
• الحمص 2000غ - الأرز 2300غ ✅

جبتهالكم من كتاب زكاة الفطر مسائل وأحكام
لعالمنا محمد علي فركوس حفظه الله ورعاه ..

وعلابالي الكبار كي تمدلهم كلام هكا مايتقبلوهش
باينة راح يتقبل الإمام لأنو يستصغرني فواش كتبت

تسما انتم المصاغر انتم السبب في تغيير عائلاتكم ..

مثلا انا عايلتي 18 سنة هوما يديروها نقدا واقيل ..
حتى كبرت .... وتعلمت وعرفت ومديتلهم أدلة ..

قبلوها عليا .. لعام لول خرجوها مالا وطعاما ..
شغل ما امنونيش و توسوسو شوية صح ههه

بصح فالعامين لخرين ولينا نخرجوها طعاما ..
انعم ايه donc انتم السبب في التغيير ..