Xhamia Rinia Basel

Esselamu alejkum të dashur anëtarë të xhamisë, të dashur vëllezër
(Postimi i fundit, in sha Allah)

Dje, më datën 31.03.2026, ishte një ditë e veçantë dhe njëkohësisht shumë emocionale për ne.

Pas gati gjashtë viteve në këtë vend, dhe në total më shumë se nëntë vite, gjatë të cilave xhaminë tonë të sunetit e konsideronim si shtëpinë tonë të dytë, dje dorëzuam çelësat.

Me këtë mbyllet një kapitull i rëndësishëm i jetës sonë – një kapitull i mbushur me kujtime, sakrifica, netë të gjata, gëzime, sprova dhe momente që do të mbeten përgjithmonë në mendjet dhe zemrat tona.

Në këtë xhami nuk u falëm vetëm. Këtu u formua një komunitet. Këtu u krijuan miqësi të reja, u forcua vëllazëria dhe shumë zemra u afruan më shumë me Allahun.

Gjatë këtyre viteve janë realizuar shumë projekte dhe aktivitete; vëllezër kanë pranuar Islamin, të tjerë janë bërë hafizë dhe shumë prej nesh janë rritur shpirtërisht e moralisht. Kjo nuk është diçka e vogël – kjo është një begati që vetëm Allahu e jep.

Duam ta shfrytëzojmë këtë moment për t’ju falënderuar nga zemra të gjithëve ju që e keni mbështetur këtë xhami ndër vite:
ata që kanë paguar anëtarësinë, ata që kanë dhënë sadaka dhe donacione, ata që kanë ndihmuar me punë fizike, ata që kanë organizuar, ata që kanë pastruar, ata që kanë qëndruar deri vonë, ata që kanë sjellë ushqim dhe ata që kanë qenë gjithmonë të gatshëm kur kishte nevojë.

Secili prej jush ka lënë gjurmë në këtë vend.
Kjo xhami nuk ishte vetëm vend ibadeti – ishte vend ku rritej vëllazëria.
Në këto vite kemi organizuar aktivitete të ndryshme: futboll, fitness, ping-pong, ecje (wandern), skijim, larje në liqen dhe në Rhein, si dhe shumë aktivitete të tjera. Kemi qeshur bashkë, kemi kaluar momente të bukura, jemi forcuar si shoqëri dhe kemi ndërtuar lidhje që nuk harrohen lehtë.
Por mbi të gjitha, ana fetare e kësaj xhamie ishte një begati e madhe. Për vite me radhë kemi pasur derse dhe ligjërata, si në gjuhën shqipe ashtu edhe në gjuhën gjermane. Kemi pasur vizita nga hoxhallarë të njohur, të cilët kanë ardhur për hir të Allahut për të shpërndarë dije dhe për të ndriçuar zemrat tona. Për këtë, i falënderojmë të gjithë hoxhallarët dhe imamët që kanë kontribuar në këtë rrugë të davetit. Allahu ju shpërbleftë për çdo fjalë dhe për çdo këshillë që keni dhënë.

Një falënderim i veçantë dhe shumë i sinqertë shkon për hoxhën tonë, Ardian Elezi.
Ai ka bërë diçka vërtet mbresëlënëse dhe të paharrueshme.
Përmes tij, kjo xhami u bë realitet. Ai ishte shkaku që kjo ide u nis, u organizua dhe u realizua. Ai nuk kontribuoi vetëm me financa dhe organizim – ai kontribuoi me zemër, durim, sinqeritet dhe përkushtim të jashtëzakonshëm, edhe në kohë kur u shtuan zilia, urrejtja dhe inati.
Ai na udhëhoqi në rrugën e drejtë edhe në kohë të vështira, kur disa njerëz përhapnin mendime të rrezikshme dhe ekstremiste. Në ato momente, ai ishte një shtyllë, një mburojë dhe një udhërrëfyes për komunitetin tonë.
Ndër aktivitetet fetare që janë zhvilluar prej tij me përkushtim të plotë, kanë qenë:
falja e namazeve (shumicën) për më shumë se 2.5 vite, namazi i xhumasë nga fillimi i vitit 2017 deri në fillim të vitit 2025, hutbe dhe derse në gjermanisht (në objektin e kaluar) dhe në shqip në këtë objekt, në lëmi të ndryshme të fesë (akide, fikh, sire, tezkije etj.), mësimi i shkronjave arabe, texhvidi, mësimi i gjuhës arabe, ligjërata gjatë Ramazanit dhe teravive, falja e Bajrameve, si dhe përmbajtje online që kanë arritur miliona njerëz nëpër rrjetet si youtube & facebook. Janë realizuar gjithashtu kurse, si kursi i gjuhës arabe dhe i texhvidit, si dhe seminare dhe tribuna me hoxhallarë të tjerë.
Dhe *e gjithë* kjo është bërë pa pagesë (ehrenamtlich), vetëm për hir të Allahut.
Allahu e shpërbleftë hoxhën tonë Ardian Elezi me Xhenetul-Firdevs dhe ia bëftë këtë punë dritë në varr dhe shpëtim në Ditën e Gjykimit!

Edhe pse dje dorëzuam çelësat, kjo nuk do të thotë se ky objekt e humb misionin e tij.
Përkundrazi, elhamdulilah, kemi shpresë të madhe që aty do të vazhdojë dobia dhe hajri.
In sha Allah, këtë objekt do ta marrin në dorë vëllezër të rinj dhe do ta përdorin për gjënë më të rëndësishme: për fëmijët dhe të ardhmen e tyre. Aktualisht, rreth 20 deri në 30 fëmijë mësojnë Kur’anin diku tjetër dhe tani – me lejen e Allahut – ata do ta vazhdojnë mësimin e Kur’anit në këtë objekt. Kjo është një gëzim i madh për ne, sepse tregon se Allahu ende dëshiron që ky vend të jetë burim drite dhe dijeje.
Në javën e fundit kemi bërë përpjekje të mëdha dhe kemi punuar intensivisht me instancën përgjegjëse (Verwaltung). Shpresojmë me gjithë zemër që shpërblimi të vazhdojë të rrjedhë, sepse ai që kontribuon që në një vend të përmendet Allahu dhe fëmijët të mësojnë Kur’anin, shpërblimi i tij nuk ndërpritet, me lejen e Allahut. In sha Allah, kjo do të mbetet një sadaka xharije për të gjithë ata që kanë dhënë kontribut deri në fund.

Njëkohësisht, duam të theksojmë se dorëzimi i çelësave nuk është fundi i komunitetit tonë. Përkundrazi, falë Allahut, ne jemi bashkuar tani me xhaminë “Paqja”. Madje është bërë një hap i madh duke u blerë një xhami e re me sipërfaqe prej 860 m², elhamdulilah.
Ne lutemi dhe shpresojmë që kjo të jetë fillimi i një kapitulli edhe më të mirë, më të fuqishëm dhe më të begatë. Allahu e bekoftë këtë mundësi dhe na ruajtë si një komunitet të bashkuar.

Sa i përket pasurisë së mbetur të shoqatës, do t’i pyesim anëtarët ekzistues përmes një ankete private se si dhe ku duhet të shpërndahet ajo. Megjithatë, pjesa më e madhe e mjeteve – CHF 13'183.45 – do të shkojë për xhaminë e re “Paqja”, in shaa Allah.

Në fund, duam të theksojmë edhe një herë:
këto nëntë vite ishin vite të mbushura me vëllazëri, iman, sakrificë dhe përkushtim. Xhamia e sunetit ishte vend ku ndiheshim rehat dhe të lirë, si në shtëpinë tonë. Çdo person që ka kontribuar – qoftë me pasuri, qoftë me kohë, qoftë me mund – është pjesë e kësaj historie. Secili do ta marrë shpërblimin e tij tek Allahu, sepse Allahu nuk e humb asnjë vepër.

Allahu ju shpërbleftë të gjithëve, ua pranoftë kontributet dhe sadakatë, ju bekoftë ju dhe familjet tuaja me shëndet, bereqet dhe sukses.

Ju kërkojm hallallin dhe Faleminderit për gjithçka.
Allahu na e lehtësoftë gjithmonë rrugën drejt së mirës dhe na bashkoftë në hajr.
Allahu na i pranoftë këto angazhime dhe këtë sakrificë!

Dhe lutja jonë e fundit është:
“Elhamdulilahi rabbil-‘alemin – Falënderimi dhe lavdërimi i takon Allahut, Zotit të botëve.”

Me respekt,
Kryesia

Njoftim:

👉🏻 Namazi i Fitër Bajramit do të falet të premten, më 20.03.2026.

Në këtë ditë të bekuar, namazin e parë të përbashkët pas bashkimit të dy xhamive do ta falim së bashku në objektin e ri të Xhamisë Paqja, në Reinacherstrasse 129, 4053 Basel.

Le të jetë kjo një ditë gëzimi, bashkimi dhe falënderimi ndaj Allahut për mirësitë e Tij të panumërta. Lusim Allahun që t’jua ketë pranuar juve dhe neve agjërimin, namazet dhe çdo vepër të mirë të këtij muaji të bekuar.

Allahu na bashkoftë gjithmonë në mirësi!

🌙 Nata e 27-të është një nga netët më të vlefshme të Ramazanit.
Besohet se është Nata e Kadrit, e cila është më e vlefshme se 1000 muaj adhurim.
🕌 Kontributi për xhami është sadaka e vazhdueshme (Sadaka Xharije).
Çdo namaz që falet aty 🤲
Çdo ajet i Kuranit që lexohet 📖
Çdo fëmijë që mëson fenë dhe Kuranin 👦👧
➡️ Shpërblimi vazhdon të shkruhet për ty për vite dhe vite.
💰 Edhe një kontribut i vogël ka vlerë të madhe.
Allahu nuk shikon shumën, por sinqeritetin e zemrës ❤️
Ndoshta ajo sadaka bëhet shkak për faljen e mëkateve.
✨ Pse të kontribuosh pikërisht në këtë natë?
Sepse veprat shumëfishohen jashtëzakonisht 📈
Mund të jetë nata që ndryshon jetën dhe ahiretin tënd.
🤝 Mos e humb këtë mundësi të artë.
Jep sipas mundësisë tënde
Ndihmo që një shtëpi e Allahut të bëhet realitet.
🏡 Kush ndërton një xhami për hir të Allahut, Allahu i ndërton atij një shtëpi në Xhenet.
🌙 Le ta bëjmë këtë natë shkak për një vepër që do të na ndjekë edhe pas kësaj jete.

Kryesia e xhamisë Rinia

Kultur Verein Paqja