Hadaaf

*په غزني کې ۱۳ نوي روغتیایې مراکز جوړ او ګټي اخیستني ته وسپارل شول.*

غزني / د سلواغې ۲۴ مه / باختر آژانس

د باختراطلاعاتي آژانس د راپور له مخې، په غزني کې د هدف مؤسسې مسئولین وایي چې دوی د AHF مؤسسې په مالي ملاټر د غزني ښار په ګډون په ۹ ولسوالیو کې ۱۳ نوي روغتیایي مراکز جوړ او ګټي اخیستني ته وسپارل.

د یادې مؤسسې مشر ډاکتر اجمل مخلید وایي چې په یادو روغتیایي مراکزو څه باندي ۴۰۰ زره امریکایي ډالر لکښت راغلي چې څه باندي ۷۸ زره وکړي به روغتیایي خدماتو ته لاسرسی پيدا کړي.

د نوموړي په خبره، یاد نوي روغتیایي مراکز په هغو سیمو کې نوي جوړ شوي چې خلکو یې روغتیایي خدماتو ته لاسترسی نه درلود او په لومړي ځل کې به د شپږو میاشتو لپاره د مور او ماشوم، د تغذیې او داسي نور لومړني روغتیایي خدمات وړاندي کړي.

په همدې حال کې د غزني د عامې روغتیا رئيس ډاکټر رسول خان نظر وايي چې اوس مهال په هېواد کې د روغتیایی خدماتو د ر سوني په موخه ښه فرصت رامنځته شوی او له همکارو موسساتو څخه غواړي چې ولس ته با کیفیته روغتیایي خدمات وړاندي کړي.

له دې وړاندي هم د غزني د عامې روغتیا مسئولینو ویلي وو، چې په هېواد کې د اسلامي امارت په واکمن کېدو سره په دغه ولایت کې ۵۴ نوي روغتیایي مراکز جوړ او ګټي اخیستني ته سپارلي دي.

*هلمند کي شپاړلس روغتیایي مراکز پرانیستل شوه*:

هلمند کي د عامي روغتیا ریاست لخوا د AHF په مالي ملاتړ او د HADAAF مؤسسې په تطبیق سره د یوې غونډي پر مهال د شپارلس روغتیایي مراکزو پرانیستغونډه ترسره سوه.

په یاده غونډه کي د عامي روغتیا رئیس ډاکټر سید احمد سعید صاحب، د HADAAF مؤسسې ولایتي مسئول ډاکټر محمود دُرانی، د OHPM ولایتي مسؤل ډاکټر یارمحمد او یو شمېر نورو مسئولینو ګډون کړی و.

په پیل کي د HADAAF مؤسسې ولایتي مسئول د غونډي ګډونوالو ته ښه راغلاست ووایه او د یادي مؤسسې د روانو چارو او ترسره سویو فعالیتونو په اړه یې معلومات وړاندي کړل.

نوموړي وویل چي د هلمند په باغران، بغني، نوزاد، واشېر، کجکي او یو شمېر نورو ولسوالیو کي یې ۱۶ روغتیایي مراکز فعاله کړي چي څلور Mobile ټېمونه او ۱۲ روغتیایي مرکزونه دي چي د ولسوالیو خلګو ته به خدمات وړاندي کوي.

د عامي روغتیا رئیس ډاکټر سید احمد سعید صاحب وویل چي هلمند یو پراخه ولایت دی چي مخکي یې د روغتیا په برخه کي خاص کار نه و سوی خو اوس یې په لیري پرتو سیمو کي هم په ښه توګه روغتیایي خدمات روان دي.

نوموړي زیاته کړه چي د ۱۶ روغتیایي مراکزو پرانیستل به په لري سیمو کي د خلګو روغتیایي ستونزي تر ډیره حل کړي او شمالي ولسوالۍ چي د مرکز لښکرګاه څخه لري پرتې دي ډیری روغتیایي مراکز په لري شمالي ولسوالیو کي پرانیستل سوي چي د واش پروګرام، واکسین او سوی تغذیه په برخه کي به همکاري کوي.

همداراز نوموړي وویل چي ډیر ژر به په ولسوالیو کي ۱۰ روغتیایي مراکز پرانیستل سي او څه موده وروسته به د مؤسساتو سره په همکارۍ شاوخوا ۲۰ نور روغتیایي مراکز په ولسوالیو کي پرانیزي.

ورته وخت کي یو شمېر نورو مسئولینو هم خبري وکړې او خپل فعالېتونه او غوښتني یې د غونډي له ګډونوالو سره شریک کړل.

راپور: باختر خبري آژانس/هلمند

نېټه: ۱۴۴۴/۷/۱۴ هـ ق

هلمند اطلاعاتو او فرهنګ ریاست!

پکتيا کې د ۳،۲ ميليونه افغانيو په لګښت ۶ روغتيايي کلينيکونه ګټې اخيستنې ته وسپارل شول

شنبه۱۴۴۴/۶/۱۴هـ.ق

د پکتيا عامې روغتيا رئيس صدرالدين عزام وايي د دې ولايت په ۶ نويو سپينو ساحو کې ۶ روغتيايي کلينيکونه د WHO په مالي ملاتړ د هدف مؤسسې له لورې تطبيق او عملاً ګټې اخيستنې ته وسپارل شول.

عزام وويل«ياد شپږ کلينيکونه د دې ولايت په پنځو ولسواليو ډنډې پټان، جاني خېلو، ګردې څېړۍ، سيدکرم او میرزکه کې روغتيايي خدمات پیل کړل، د هغه په وينا په دغو روغتيايي کلينيکونو کې پنځه د SHC او يو BHC کلينيک دی.

د پکتيا ولايت لپاره د هدف مؤسسې مسؤل ډاکتر مولاداد عابد وايي چې يادو روغتيايی مرکزونو ته د ۳،۲ ميليونو افغانيو په لګښت درمل او طبي وسايل اخيستل شوي دي.
پۀ دې موخه جوړو شويو مراسمو کې د پکتيا مرستيال والي مولوي انعام اللّٰه صلاح الدين وويل« د دې روغتيايي مرکزونو فعاليت سره به خلکو ته په منظم ډول روغتيايي خدماتو وړاندې کېږي، مرستيال والي مولوي انعام الله صلاح الدين د دغو روغتيايي مرکزونو د جوړولو ستاينه وکړه او پۀ ياده برخه کې د مرسته کوونکو موسسو څخه مننه وکړه، نوموړي وويل ټول هغه مؤسسات چې د ا.ا.ا تر چتر لاندې پۀ هر برخه کې خدمت کوې موږ يې قدرداني کوو او د چارو پۀ سرته رسولو کې يې همکار يو‌‌.
د پکتيا د عامې روغتيا رياست د معلوماتو له مخې په دغه ولايت کې د ا.ا.ا په راتګ سره ۱۷ ځايي روغتيايي کلينيکونه، ۱۰ پورې نوي موبائيل ټيمونه او تر ۴۰۰ پورې بشري قوه د روغتيا په برخه کې په کار ګمارل شوې.