CYNTHIA STORIES

*KUNGENXA YENHLUPHEKO*
*CYNTHIA S NDLOVU*
*ISAHLUKO 11*

Lisanda kuzilahla kunina ilanga , kasahlalisekanga uThabani phela ibhasi iyaphangisa ukus**a eBambadzi ilale ihamba ubusuku bonke ,ngakibo idlula ebusku ,ngokunjalo engaphuza ukuchapha engathola isihambile kubenzima ukuyafika ekhaya .
Asiqunge isibindi abophe izicathulo aqede ayengena esambuzini , aqale ngokufihla imali emzimbeni aqede avale amehlo athi _Baba wethu osezulwini , sengiphinde ngabuya njalo , ngicela ungikhokhelele endleleni yami ,ungihlenge kukho konke okubi , ngihambe kuhle ngize ngiyefika ekhaya Amen_

Eseqedile ukuthandaza agaxe isikhwamanyana sakhe esilempahla aphume esambuzini awuqalise ummango .
Endleleni lapha uyatsh*tsha ,kwelinye ibanga agijime ayephumula phambili inhloso nje yikubamba isikhathi sokuphuma kwebhasi .
Esefikile ecingweni ame ezihlahleni kuqala alalelise umdumo wemota , aphinde alalelise amazwi abantu , eseqinisekile avele kancane alunguze ngapha laphanga ,eseqinisekile agijime ayesena ucingo ngokuphangisa ethi eseseqa olokucina iqhamuke imota yabomthetho , ayeqe ngokuphangisa.
Badubule phezulu bemethusela ukuthi ame kodwa avele angene iganga selokhe ubesengale kocingo acele empunzini . Ngendlela agijima ngayo usekhohliwe lokuthi usekwelakhe izwe , agijime aze ayethutshela emgwaqweni.

"Wagijima kangaka ubalekani ?" Kubuza omunye ubaba ozitshovela ibhasikili , kube yikuma kwakhe uThabani abambelele amadolo .

"Uyangaphi ?" Abuze njalo owesilisa.

"Ngigijimela ibhasi lapha eBambadzi , ingangitshiya ngizafika nzima ekhaya ." Aphendule ngokukhefuzela uThabani .
"Yeqeda ebhasikilini sihambe ."

Engathandabuzi uThabani ayeqele emuva , amthwala bahambe baze bayefika ebhasini ngenhlanhla bayithole isasekhona .
"Ngiyabonga kakhulu baba , kukhulu lokhu ongenzele khona . Angilayo imali sibili kodwa kungabakubi nxa ngingayehluleka ukukuthengela inamunede ." Kusitsho uThabani ekhipha i 20 P**a .

"Aah lawe , bengikunceda njengomfowethu asikho nje isidingo. Kodwa ngiyabonga sengizathengela abantwana isinkwa ."

"Kubonga mina kakhulu , uhambe kuhle ." Bavalelisane lo Thabani agijimele ebhasini angene ayehlala phansi.
Isisukile ibhasi eBambadzi , ibhoda indawana zonke zasesiKhalangeni ihamba ibagwinya bonke abaya edolobheni .
Kuthi kusiyatshaya ihola lesibili phakathi kobusuku ifika eMalalume ezitolo , bethi begada abanye uThabani yena esehla , ayedabula phakathi kwezitolo azizwe zibophana inwele zakhe kodwa engabi lendaba lakho ahambe aze ayefika ngakibo .

"Gogo !" Abize ngapha eqoqoda .

"Thabani , nguwe oqoqdayo ?" Asabele uMaNkatha ngapha evuka , akhanyise isibane aqede ayevula umnyango angene uThabani.

"Yimi gogo , sengiphendukile kuyehlulile ."

"Kuhle ubuyile ekhaya mntanami ,nxa kwehlulile akulandaba elinye icebo lizavela into esiyibongayo yimpilo."

"Ngiyabonga gogo ukuthi ungizwisise . Ulele uYamie ."

"Ulele, kutsho uzambona kuhle ekuseni ."

"Kulungile gogo , ngcono ngiyephumula sesizakhuluma ekuseni ."
Kube yikuvalelisane kwabo uThabani esesiya kwelakhe ixhiba .
Usevele wahlela ukuthi asebenzise imali leyi ayitholileyo ukuyakwenza incwadi yokuchapha khona ezahlala elalo .
Liphumile ilanga njengansuku zonke . Kuse Madlambudzi lapho okwendele khona uSithabile ekhaya lika Simon .
USimon ngumuntu olamasimu amakhulu kakhulu , ngesikhathi sokulima kulinywa ngethelekitha , ebusika lakho akuphunyulwa kufakwa umquba , kuvundiswa umhlabathi .
USithabile kasakwazi ukuphumula , ungena ekuseni emasimini aze atshayise ntambama iqolo selitshisa bhe ! Enjalo uthi etshayisa eqonda emabhodweni , aphinde avuke ngehola lesine ekuseni aqalise ngokuhlanza umuzi lezindlu ngaphamb'kokuthi angene emasimini .
Engake ethi uyahlala phansi kumbe azigulise uqaqamba kuze kusabele imduli uSimon ethi kazwani lomuntu olivila , ofuna ukuba ngubhuq'ukudla . Ulenyanga ezintathu kuphela eyendile kodwa uselakho ukuzisola , uze akhumbule koMaNkatha lapho owayetshona ezigiqikela emthunzini , phela akukho lula ukuvuka kusasempondo zankomo uhlanze umuzi, uqede uyetshona umasimini uphenduke selitshonile ilanga ufike ubeke amabhodo eziko abantu bengaqed ukudla ugezise izitsha uyegeza uqede uyepheka isidlo sasekamelweni ngaphamb'kokuthi ulale uzaphinda njalo uvuke ngehola lesine .

Lamhla kungoLwesithathu abangeni emasimini . Useqedile ukuhlanza umuzi waphekela labomdeni itiye uSithabile, uselindele nje ukutshelwa okokwenza phela uyakwazi ukuthi lapha ekhaya akuphunyulwa .
Esathi uyaziphumuza emkulwini atsho esememeza uSimon aphume ngokuphangisa emkulwini .

"Ngenani emoteni, siyahamba kathesi siya esitolo, igumbagumba elilezinto zesitolo selifikile ngokunjalo kufanele siyeyethula zonke izinto." Kusitsho uSimon , lapho kuthi azitshayelele phansi uSithabile. Azihudule ayengena emoteni ngokuthula , uyesaba lokusola kwazise wake wazama ezipha igunya lokuthi ungunkosikazi ,wamthethisa phambili kwabantu uSimon waze wazisola .

IYAQHUBEKA

*KUNGENXA YENHLUPHEKO*
*CYNTHIA S NDLOVU*
*ISAHLUKO 10*

Ukusebenzela umuntu umnyama akukaze kwabalula emhlabeni . UThabani usezwele ngezinhlamba zansuku zonke , kwesinye isikhathi baze bamcitshe ukudla bamthethise ngokuhlupheka kwakhe kanye langelizwe lakhe . Waqalisa esaqinisela ngoba efuna yona imali leyo , kodwa sezimbili inyanga engaholiswa , uthi engabuza ngemali yakhe bamtshele ukuthi ahambe ayebuya labomthetho besazi mhlophe ukuthi angeke aze ahambe selokhe engelayo incwadi emgunyazayo ukuthi ahlale kwelase Botswana .
Kasabazi ubuthongo uThabani ecabanga indlela zokuziphilisa kanye lendlela yokubuyela ekhaya engelayo yona imali . Okumkhathaza kakhulu yindodana yakhe ekhaya edinga uchago, ngapha yena selokhe wafikayo kwelase Botswana kakaze athumele yona imali .
Baqinisile lapho besithi udubo luyabonelela ,ngesikhathi uzama ukuxotsha udubo ekhaya lona luvele lungene kakhulu kuyenzinza emsamo .

Lamhla uthe evuka uThabani waqoqa impahla zakhe waziqgiba esikhwameni , usebone kungcono ukuyahlala esigangeni kumbe azinikele kwabomthetho kube kanye , kulokuthi aqhubeke esebenzela abantu bengambhadali ,nanko phela sekuphela eyesithathu inyanga .
Eseqedile aphume aqonde lapho okusebenza khona uAndile afike angene ayemqoqodela .

"Thabani , wathwala isikhwama ngabe konke kuhamba kuhle ?"

"Uyakwazi lawe ukuthi akula okuhamba kuhle Andile , abantu labana bakubeke kwacaca ukuthi vele abasoze bangibhadala , bathe ngihambe kwabomthetho ngiyebatshela ,batsho ngoba besazi angilayo incwadi engigunyaza ukuba lapha ."

"Yazi bengisathi ngizabuya kuwe , ngilecebo mina futhi kungcono ngoba mina ngilayo incwadi ngizakuphelekezela kwabomthetho , angeke uhambe ekhaya ungelayo imali yakho , indodana yakho uzafika uyikhangelelwa ngubani?"

"Ngizabe ngihambe ngani ekhaya lelo Andile? Kungcono ukuhlala egangeni nxa kunjalo ."

"Angeke uhlale egangeni ngikhona, bengizakupha eyokuhamba kodwa imali yakho kufanele uyithole angeke ngivume amandla akho ephelela phansi . Abantu labana ubasebenzele umsebenzi omkhulu , wagebha izigodo emasimini abo , beqeda bekwenza kanje ? Hayikhona ." Atsho ebuyela endlini aphume esegqokile uAndile , aqede adonse uThabani baphume bayekume buqamama lomuzi ukwenzela inkulumo yabo ingafiki endlebeni zabalungu bakhe .

"Lalela , sizahamba emapholiseni nxa sifika laphana sizatshela abomthetho ukuthi bakuthathela incwadi yakho ngoba besenzela ukuthi bengakubhadali , kathesi bayala njalo bathi incwadi yakho bayilahla ." Kusitsho uAndile.

"Andile ndoda angifuni ukubotshwa mina , nxa bengacela inombolo yayo ukuze babone iyavela ke ?"

"Angeke bakwenze lokho, lapha kusemakhaya abalayo vele imtshina eminengi , nxa becela inombolo ubatshele awuzange wayifaka ekhanda ."

"Andile, angivumelani lawe , ngcono ngihambe ekhaya , amandla endoda awapheli imali ngizayithola ." UThabani ngokwesaba .
"Uyahlanya wena ,buya sihambe. " Atsho emdonsa ngesandla .

"Lalela Thabani , ukuba leqiniso lokulunga emhlabeni akukaze kwabhadala ngikutshele , kwesinye isikhathi amanga ayadingeka kancane . Bangaki belungile bephila nzima , kuzakusiza lokhu uzabona ." Lapho utsho umdonsa ngesandla , uThabani yena uvalo luyazenzela phela abomthetho ubesaba kabi ikakhulu abaseBotswana abangaphuziyo ukukufaka ijambo .

Sebefikile enkambeni encane ,uAndile alandise lonke udaba selokhe yena eselwazi ulimi loba nje besizwisisa lesiKalanga ,aze abatshele lokuthi uThabani ngumuntu ozithuleleyo njalo olokwesaba , ethi esizwa lelo uThabani laye avele azikhalise ezeNgwenya .
Ngenhlanhla yamaswazi bengabuzi lutho ngenombolo zencwadi , ngokunjalo bengawaceli lama Fingerprints , babathathe bahamba labo lapho okusebenza khona uThabani .
Endleleni uhamba etshaya umthandazo omncane uThabani , ethandazela ukuthi kube yimpumelelo engangeni kwenkulu inkinga .

Sebefikile abomthetho baxoxisana lesakhamuzi , aphikise ukuthi uThabani ubelayo incwadi , kodwa ahlangane lo Andile ovele amisane laye aze akhiphe eyakhe abatshele ukuthi babehambe bonke ukuyathatha njalo incwadi iyadula kwelakithi .
Ngemva kokuphikisana abomthetho bacele isakhamuzi ukuthi sibuyisele uThabani incwadi yakhe kanye lemali ayisebenzeleyo .

"Bantu bomthetho , kutsho babeqinisile ngesikhathi bemtshela ukuthi bayilahlela esambuzini segodi . Imali yencwadi lizamnika ngoba iyadula , khona uzachapha njani umngcele ebuyela emuva?" NguAndile , uThabani yena uphethe ngokunqekuza ikhanda abuye azikhalise into engekho .

Amapholisa acine ngokuthi bambhadale imali yakhe ayisebenzeleyo kanye lemali yokuthi abuyele ekhaya ayethatha incwadi yakhe entsha .
Baqalise besayenqaba baze bayikhiphe yonke bamnike . Sebemnikile amapholisa amtshele ukuthi ahambe enkambeni enkulu yamapholisa khona ezathola incwadi elesidindo ezamvumela ukuthi achaphe umngcele .

Basendleleni ebuyela lapho okusebenza khona uThabani , bafike bathathe isikhwama sakhe baqonde emgwaqweni ukuyadinga izimota ezigijimela eTutume.

"Akulancwadi ozayilanda mfana wakithi ngoba uzabe uziwokhela amalahle ekhanda , ngena indlela uhambe uyelala uchaphile ." UAndile sebelinde imota.
"Pho wena awusoze usale ungena enkingeni ?"

"Angeke , kuphela nje wena uhambile . Ungalibali ukungitshayela ucingo ungafika ekhaya , ungafiki usima eTutume nxa ufike nje udinge ezigijimela emngceleni ."
"Ngiyabonga kakhulu Andile , bengizahamba ngilengise izandla ." Atsho emanga .
"Angisoze ngafa ngakukhohlwa , ngidedele ngiyezama elinye icebo ekhaya i-Botswana ngiyisuthi ."
Kusenjalo iqhamuke imota bavalelisane angene uThabani . Kungemzuzwana mingaki afike eTutume aqalise ukudinga ezigijimela eMaitengwe .

Selitshibilikile ilanga , lemthunzi layo isimide .
Usefikil egalajini lokucina ngaphamb'kokuthi ufike emgceleni uThabani ,ulinde nje ilanga lingene kunina kuqale ukubamnyama kwazise ukucatsha kulula nxa kumnyama.

Iyaqhubeka

*KUNGENXA YENHLUPHEKO*
*CYNTHIA S NDLOVU*
*ISAHLUKO 9*

UThabani sewaqalisa umsebenzi wakhe wokwelusa kanye lokukhangela amasimu .
Kwamanye amalanga uvuka uqhube imbuzi ahambe lazo emasimini, kunjalo kungummango omkhulu ukuze uyefika khona . Selokhe inyanga ingakapheli kakabi lawo umakhalekhukhwini, selokhe wacina ukutshayela ekhaya lelana langa efikileyo kaphindanga watshaya njalo ngoba engakabonani lo Andile ukuze aboleke umakhalekhukhwini.
Lamhla uthe evuka waqala wagijimela lapho okusebenzela khona uAndile , phela usekhumbule umdeni wakhe ekhaya .
Esefikile lapho okusebenza khona uAndile aboleke umakhalekhukhwini afake umoya aqede atshayele inombolo kaSithabile kodwa iyebanjwa nguMaNkatha .

"Salibonani gogo ,unjani labanye ?" Abingelele uThabani .
"Ngiyaphila mzukulu kanye lendodana yakho iyaphila ."

"Uzwakala ungajabulanga gogo , uphathekile yini? Njalo ungaphi uMaMlilo ?" Ayiphose ilandelana imbuzo uThabani.

"Kunzima mntanami, lokhu engizakubikela khona kungakuphathi kubi ." Kusitsho uMaNkatha ngale kocingo , injabulo itshabalale ebusweni buka Thabani ahlale phansi ngokuphangisa.

"Uyangethusa gogo , kwenzenjani? Ungaphi uSithabile?" Abuze njalo.

"USithabile wahamba watshiya uYamihle , ngelanga wena owas**a ngalo ngelilandelayo wabizwa nguyise wayabuya esengohambayo mina nginje kazange wangivalelisa , ngize ngezwa ngabantu besithi abazali bakhe bamtholele indoda useyendile ."

Azwe lumtshaya luvalo uThabani aze azincwebe mhlawumbe uyaphupha kodwa abuzwe ubuhlungu okutshengisa khona ukuthi akaphuphi . Athi uyavula umlomo livevezele izwi.
"Gogo , uyadlala angithi ?"

"Thabani , angidlali mntanami , kunje ngize ngancedwa nguMaNcube ngochago lomntwana uze wathi ngikutshele ube ufaka imali uzabe esithengela nyanga zonke edolobheni."

"Gogo , angikwazi ukuthi ngithini ngendaba oqeda ukungibikela yona , ngicela ukucabanga ngizakutshayela ntambama ." Lapho sezihlengezela inyembezi emehlweni kaThabani , avalelisane lo gogo wakhe aluqume ucingo.
Asukume phansi ahamba ahambe ,akakholwa ukuthi uSithabile wakhe nguye abathi uhambe watshiya umntwana ngemva kwezethembiso ezingaka abazenzayo .

"Wangethembisa uSithabile , wathi ebuhleni lasebubini uzakuba lami ,wathi loba sekwenzenjani wayengasoze angitshiye kodwa wayezahlala engibekezelela , kodwa lamhla uhambile ."

"Kwenzenjani Thabani?" Kubuza uAndile esondela .

"USithabile , kuthwa bamthethe , kungmalanga mangaki ngihambileyo sebemthethe wahamba watshiya indodana yethu . Besithandana nje mina laye , kudala sisiwa sivuka mina laye ."

"Phephisa Thabani , zaze zabuhlungu indaba mina ngiyakuzwisisa mfowethu ngiyabazi ubuhlungu bokutshiywa ngumuntu omthandayo . Iqiniso elibuhlungu lithi ungabona umuntu ekutshiya ungamenzanga lutho , wayevele engelaso isiqiniseko ngawe , ungangitsheli ukuthi kazange wacabanga nje kabili . Awukaqedi lenyanga ngitsho amaviki ulapha , kodwa usehambile ."

"Pho wayevumelani ukuba lami kwasekuqaleni ?" Atsho ngelivevezelayo izwi uThabani , kulandele ukwehla kwezinyembezi.

"Ungakhali mfowethu , yimpilo yakhona , kumehlulile ukubekezela . Njengoba ehambe wafulathela usane lwakho , wena sekumele udonse amasokisi ukhulise umntwana ."

"Ngibuhlungu mfowethu , uhambe watshiya ngitsho umakhalekhukhwini bengifisa nje ukukhuluma laye ngimbuze ukuthi ngimenzeni ,kumehlule ngani ukungibekezelela kancane ."

"Yehlisa umoya , uzame ukungacabangi kakhulu ."

Ayesule inyembezi uThabani aqede aqhubele uAndile umakhalekhukhwini.
"Ngizakubona mbayimbayi Andile ." Kube yikuvalelisa kwakhe uThabani aphume abuyele emuva .
Uhamba nje uyabalisa uThabani akakholwa ukuthi uSithabile uhambile ngempela watshiya uYamihle , usefisa ngabe ulemali abuyele ekhaya ngokuphangisa ayenanza indodana yakhe selokhe ugogowakhe eseluphala . Aqabuke esedlula isango lalapho ahlala khona uThabani ngenxa yokubalisa .

KoMadlambudzi lapho okwendele khona uSithabile. Inkonzo balokhe bengakayingenisi , selokhe unina emnike imithi yokusebenzisa kuqala , omunye ngowokutshisa uchago emabeleni omunye ngowokuhlala ekhipha umoya wobudlezane . Ngesintu , owesifazane ozeleyo kumele alinde kuze kuhlangane inyanga eziyisithupha ngaphamb'kokuthi aphinde ahlangane lowesilisa , yingakho unakaSithabile wadingela uSithabile imithi yokuthi anathe ,kanye lomunye owokuthi awusebenzise khona uSimon ezamthanda kakhulu engananzeleli ukuthi usasebudlezaneni . Okubonwa ngabamakhanda ampunga behleli phansi , wena mntwana loba ungagada intaba angeke uze ukubone , nanko phela bavele bambona ngelanga lakuqala efika uSithabile ukuthi ungumdlezane . Bathi beyinyenyeza baphikisa abanye besithi ababoni lutho bona ,kodwa amaxhegukazi kwathatha nje ukuthi adlule kanye emehlweni abo basebebonile .

Uyakujabulela uSithabile ukuba semagumeni kaSimon , okumjabulisa kakhulu yibuhle bomuzi lemali leyi ayiphiwa nsuku zonke .
Uyakhile uSimon , izifuyo zona zidlana uboya esibayeni ngokunjalo ulezitolo indawana yonke , lokho kumenza azibone esephezulu uSithabile ejabuliswa yikho ukuba ngumfazi wendoda elemali .
Akumalanga mangaki eyendileyo , kodwa usevele wakhohlwa ngoThabani ababehlala bethembisana ukubambana kuze kube laphakade , ngeqiniso umuntu kathenjwa ngoba ungumalala ephenduka .

Iyaqhubeka

*KUNGENXA YENHLUPHEKO*
*CYNTHIA S NDLOVU*
*ISAHLUKO 8*

Asemabili amaviki uSithabile engaphendukanga koMaNkatha , ulokhe ekhangele indlela uMaNkatha ezitshela ukuthi uzambona engena . Useyenza okokupheka ilambazi libe lula kakhulu anathise umntwana aphinde amsengele uchago lwembuzi phela icebo yilo angelalo selokhe uSithabile esekhethe ukumtshiya umntwana .
Ulokhe ethikaza ukuhamba koMlilo ayemhlola hlezi athathe umntwana kodwa uyesabela lona icala abalalo .

Lisanda kuphuma ilanga , usevukile uMaNkatha wabasa umlilo wabeka ibhodo yelambazi eziko selokhe umntwana elale ekhala ubusuku bonke efuna ukumunya .
Acabange ukusiqunga kuphela isibindi nango phela umntwana kathuli , amthathe amfake emhlane , aphume adonse isivalo somkulu avale aqonde exhibeni lika Thabani obekulala khona uSithabile ukuyadinga ingwane yomntwana . Ethi esengenile amangale lapho ethola isikhwama sika Sithabile singekho , kusele impahla zomntwana kuphela , athalaze indlu yonke abone incwadi etafuleni ayithathe ngokuphangisa ayivule .

"Ngiyaxolisa gogo ukungavalelisi , ngidinge ngaswela ukuthi ngizakuqonda njani kodwa mina sengihambile kithi , ngikhulumisene labazali bami ngabona kungcono ukubuyela ekhaya . Umntwana bathe ngimtshiye ,uzasala umkhulisa "

Ayivale incwajana leyi , ahleke kancane uMaNkatha aqede aphume avale umnyango.
"Angeke atshiye usane olulenyanga ezimbili , akulunganga ukuthi umntwana lowu adle ilambazi esasemncane kangaka , nxa engavuma ukuhlala laye aze ahlanganise inyanga eziyisithupha abe esembuyisa ke ." Ukhuluma yedwa uMaNkala esendleleni eqonda koMlilo . Uyakwazi ukuthi ngokuya khonale bazafika bemthela ngenhlamba ezingaka njengenhlala yenza , uMlilo uthi engahlangana laye ezindleleni amthethise aze amtshele langokuhlupheka kwakhe .
Akhuleke koMlilo ngapha emile esangweni phela uyesaba ukuzingenela . Aphume uMlilo emkulwini amlande esamgweni .

"Ufunani lapha wena mthakatshana ?" Abuze ngolaka uMlilo .

"Salibonani ekhaya , angizanga ngokubi bengifisa nje sikhulumisane ngendaba yomntwana njengoba lithe uSithabile amtshiye . Umntwana lowu ulenyanga ezimbili njalo akufanelanga abe esesidla okunye ukudla ngaphandle kochago lukanina ." UMaNkatha ngomoya ophansi , ahlake uMlilo.

"Uyahlanya wena salukazindini , indodakazi yami yathi mhla iphuma lapha ekhaya yayingelaye umntwana , pho yiwuphi umntwana okhuluma ngaye ? Lapha koMlilo asilalo usane oluncane kodwa usane okhuluma ngalo luzalwa ngumzukulu wakho . Thatha into yakho leyo ubuyele layo emzini wakho njalo ungaphinde ubuye lapha siyezwana ? Mthakatshana , ucabanga ukuthi asikwazi ukuthi awuyembathi ingubo ."

"Mlilo , ngiyakuhlonipha kakhulu kodwa njalo nje uhlala unginida ngobuthakathi engingabaziyo , kufanele ngize ngiyemangala enduneni yini ?" Atsho ngelibuhlungu uMaNkatha kwazise lapha esigabeni kulabantu abacabanga ukuthu uyaloya , kodwa ukuthi kuvukwa njani ebusuku kakwazi okaNkatha .
Ahleke uMlilo ."Hamba uyemangala , layo induna iyakwazi ukuthi wena ulesambane ohamba ngaso ebusuku ." Kusitsho uMlilo engagqize qhakala . Atshibilike ngokuthula uMaNkatha angene indledlana eqonda ekhaya , ethi esiyadlula emzini kaMaNcube umalukazana kamakhelwane wakhe ambize.

"Gogo ,ngicela lidlule ngapha ." UMaNcube ememeza esemzini wakhe, avele angene uMaNkatha .

"Indaba azilali phansi gogo , lami ngizwile kuthwa uSithabile ukhethe indoda elemali watshiya umntwana ." Kutsho uMaNcube ehlangabeza uMaNkatha athathe umntwana , baqede babingelelane beqonda emkulwini.

"Mina angikwazi lutho MaNcube , ngizwa ngabantu belokhe beyikhuluma beyitshiya , kazange avalelise uSithabile." Lapho inyembezi sezigeleza kuMaNkatha , amazwi kaMlilo amngene kubi .

"Uyakhala mama ? Ungakhali umntwana uzakhula lathi sizasondela sincedise , yingakho ngicele ukuthi udlule ngapha ."

"Kuthwa ngingumthakathi , uMlilo ngamenzani mina aze angenyanye kangaka ?"

"UMlilo uyaziwa umdala lowana ukuthi ingqondo azikho , yingakho eyendise umdlezane , kuthwa indoda emthetheyo ayikwazi ukuthi ulomntwana . Umama uthi unakaSithabile ufikile kuye ezecela umuthi wokutshisa uchago emabeleni ,umama wambuza ukuthi wayezwe bani esithi useyinyanga yena ." Kukhuluma uMaNcube, atshaye izandla uMaNkatha.

"Angisela nkani ngikhonapha MaNcube . Kulungile akahambe angimsoli , njalo abazali bakhe labo angibasoli , umzukulwana wami ngizamkhulisa loThabani laye uzasebenza abuye ekhaya ezezikhulisela isinini sakhe ."

"Umntwana uyakhula gogo . Bathe bekhuluma abantu izolo emgodini bebuzana ukuthi umntwana uzadlani , ngakhumbula ukuthi ngilochago lwabantwana oluthengwayo , ngangiluthengela abami abantwana manje baluyala . Ngilamagabha amathathu , ngizalipha wona lizazama lani ukuncengisa ."

"MaNcube , ngiyabonga malokazana waze waba lenhliziyo yakho enhle yazi wangethula umthwalo. Ngiyabe ngizamtshela laye uThabani ukuthi azame ukuthenga loba nje kuzakuba nzima ukuthu aphathise ."

"Uyamukeliwe mama . UThabani engazama ukuthumeza imali kuphela ,mina nyanga zonke ngiyahamba edolobheni ngizabe ngithenga ."

"Ngiyabonga MaNcue , yebo ngizamtshela azame indlela zokuthi alethe imali . Ngiyabonga mntanami bakithi, kuyajabulisa ukubona abanye abantu bekubona lawe njengomuntu hatshi umthakathi ."

"Mama, ungamlaleli uMlilo , unjalo umdala lowana angithi wake wathethisa lomamazala wami waze wambiza ngomthakathi ."

"Kaphelelanga ubaba lowana ."

Asukume phansi uMaNcube apheke itiye lesinkwa badle lo MaNkatha , eseqedile ahambe ayemphathela uchago lwabantwana , aze amcuphele lokudliwayo . Itshukela , izitshebonyana , amthelele lamafutha esitshebo .

"Uzancenga ncenga lawe mama usalinde uThabani athole umsebenzi, njalo nxa kukhona okungekhoyo ungayesabi ukubuya kimi ." UMaNcube emqhubela , azizwe zitshisa inyembezi emehlweni .

"Ngihlala ngisizwa unyokozala ekhuluma ngawe lenhliziyo yakho ngingazi ukuthi unje , ulenhliziyo yakho wedwa mntanami . Ngiswele azinkulungwane engingakubonga ngawo mntanami , lamhla siyalala ngesibomvu lomzukulu wami .
Lawe ufike ngekhaya uzozoquntela umbhida lamatamatisi ."

"Ngizafika mama, kodwa kathesi ngizahamba lani khona ngizalithwalisa ."

"Yebo phela , uzavele ungene esivandeni udobhe lawe amatamatisi uziquntele lombhida ."
Bathwalisane loMaNcube baqhubane baze bayefika ekhaya .
UMaNkatha nguye yedwa esigabeni olesivande ,uyalima kakhulu imbhida , amatamatisi ,imbambayila lokunye .
Ekufikeni kwakho ekhaya afike amquntele umbhida ,amatamatisi aze amgebhele lembambayila , abonge engaqedi uMaNcube kwazise uyazithandela laye kwezezilimo .

Iyaqhubeka

*KUNGENXA YENHLUPHEKO*
*CYNTHIA S NDLOVU*
*ISAHLUKO 7*

Asemabili amalanga uThabani ebhoda iganga angalaziyo . Ikhaza liphelela phezulu kwakhe , lenyawo kasazizwa lokuthi ngezakhe . Uselandela iganga kuphela elethemba lokuthi athutshele emakhaya kumbe ahlangane lomuntu ozamsiza ngoba iganga ahamba khona akubonakali khona okusamuzi ,ngapha yikwesaba ukuthi uzahlangana lenyamazana zasendle alale eseyisibomvu .
Selibekezelela ukutshona njalo elesithathu ilanga , esahamba azwe umdumo wemota odlulayo kumcacele ukuthi useseduzane lomgwaqo lapho ke atsh*tshe ngamandla aze ayethutshela emgwaqweni. Athalaze emuva laphambili kodwa kubonakala umgwaqo kuphela , abone kungcono ukuthi ame acatshe ngezihlahla uzabe elunguza kuphela nxa kuduma imota hlezi athole imota ezayamtshiya eTutume .
Esehlale imzuzu engaba yingxenye yehola azwe umdumo wemota ,alunguze aqede asondele emgwaqweni ayimise selokhe esebonile ukuthi ngeka malayitsha sekungenzeka bagijimela khonale kwelase Ningizimu ..
Eseyimisile acele ukuthi bayemtshiya eMakuta bamvumele angene kube yikuhlala kwamaphaphu phansi .

"Ngiyabonga kakhulu bafowethu , besengihlale amalanga ngisegangeni . Ngicela lingincedise ngomakhalekhukhwini khona ngizatshayela umuntu engiyafikela kuye ." UThabani besasendleleni , bamboleke umakhalekhukhwini akhiphe iphetshana abhale khona inombolo aqale ngokutshayela uAndile .

Ecingweni avele alubambe ngokuphangisa uAndile phela kudala elindile, uthi nje lungakhala ucingo alubambe egijima .
"Hello ,ngikhuluma lobani ?"

"Yimi mfowethu uSandile , kunengi okwenzakeleyo endleleni , kodwa lamhla ngiyafika ngisendleleni nje ngicela ungilinde ."

"Ngaze ngakhululeka emoyeni Thabani , okunengi sesizakuxoxa , uzathola ngikulindile ." UAndile ecingweni ngemva kokuthi uThabani aluqume ucingo aqede acele njalo ukutshayela ekhaya , bamvumele ngokuphangisa atshayele inombolo kaSithabile kodwa ikhale ingabanjwa , aphinde njalo ize ibanjwe NguMaNkatha.

"Hello , yebo ngubani ? Ngabe nguThabani bakithi umuntu ayehlise umoya ." Avele abuze uMaNkatha .

"Yebo yimi gogo , indlela yami imbi kakhulu kodwa sengisiyafika amalanga wonke lawa ngisegangeni ."

"Awu bakithi , phephisa mzukulu wami ngijabulela ukuzwa nje izwi lakho amalanga lawa bengingasabazi ubuthongo, ungafika endaweni yakhona uphinde ungazise ." Kusitsho uMaNkata ngokukhululeka selokhe amalanga lawa ubekhathazekile kakhulu ngoThabani .

"Ungaphi uSithabile ?" Abuze uThabani , athule kancane uMaNkatha phela kakwazi ukuthi uyengaphi ,uphume engumuntu oyathatha amanzi kodwa abahambe emuva kwakhe sebephendukile njalo bathi abazange bamthola emgodini.

"Uyelanda amanzi mntanami ."

"Kulungile gogo ,umakhalekhukhwini ngiwubolekile ,ngizaphinda ngitshaye ngocingo luka Andile ."

"Kulungile mzukulu wami , umdali akuvikele ."
Bavalelisane aluqume ucingo. Abonge engaqedi uThabani ngoncedo lwabo . Sebefikile eMakuta akhiphe imali ethi uyabhadala kodwa bayenqabe bamtshele ukuthi ayigcine izamsiza phambili , abonge njalo aqede ayehle .
Useyehlile eMakuta , amehlo akhe asegcwele indawo yonke ethalaza uAndile ambone ngale komgwaqo avele agijimele kuye .

"Mfana waze wafika ." UAndile ngenjabulo .

"Angikaze ngiluhambe uhambo olubi kangaka bengiqala , kodwa ngibonga ukuthi sengifikile ." Lapho sebeqhubana beqonda lapho okusebenza khona uAndile . Yindawo esemakhaya , kuphela nje indawo yakhona iphucukile ngoba ikhaya lekhaya lilawo umbane njalo bayakhile abantu bakhona.
Sebefikile baqonde egumbini elingemva lapho okulala khona uAndile.

"Yikho lapha engincengisa khona , ngisebenza ukuhlanza umuzi ,ukwelusa imbuzi kanye lokuncedisa emasimini kodwa amasimu akhona akatshana kakhulu . Lapho engikutholele khona umsebenzi amasimu abo aseduzane lawalapha ekhaya kuzasinceda ngokuthi sibe sibambisana indlela ."

"Ngiyabonga kakhulu mfowethu , pho ngizabe ngisiyaqala nini ?"

"Sizahamba kusasa ,kathesi zama ukuphumula ,ngizakudingela amanzi ugeze ."

"Ngiyabonga Andile ."

Ekhaya , sekuze kuqala ukubamnyama uSithabile elokhe engakabuyi . Usepheke waze waqeda uMaNkatha waphinda wagezisa umzukulwana wakhe wamfaka emhlane selokhe unina engabonakali ,into asezibuza yona yikuthi uqonde ngaphi .
Usesilugwini senkukhu uqeda nje ukuzivalela , azwe ngonakaMpilo esekhuleka esangweni , asabele laye eqonda emkulwini khona bezangena phakathi .

"Uthi ngiyahlala yini MaNkatha , ngizancengisa khonapha esitubhini ." Atsho ehlala esitubhini somkulu .

"Ungiphathele ziphi indaba lamuhla nakaMpilo ,phela wena awungeni kodwa lapha ekhaya lami ?" Abuze uMaNkatha , phela unakaMpilo uyaziwa ngokuthwala izindaba .

"Hahaha lawe MaNkatha , inhliziyo ibuhlungu yini ukuthi uSithabile usethole indoda elemota ezamthatha . Yeyi ,ubengambuluzi nje unina lamuhla ,esithi ekucineni laye usezadla amandla akhe ."

"Ukhuluma ngani nakaMpilo ?" Abuze uMaNkatha.

"Awukwazi kanti ? Ungaphi uSithabile kunje ,angithi ulomkakhe bahlela umsebenzi wamalobolo ."

"NakaMpilo ngicela uphume emzini wami ." Atsho lawo engena emkulwini uMaNkatha , ahleke aze atshaye izandla unakaMpilo aqede aphume ahambe .

"Asethembe ayisilo iqiniso elikhulunywayo bakithi , engadabuka kakhulu uThabani kodwa nxa esesithathile isinqumo abona simfanele siyabe singake simvimbe ." Akhulume yedwa uMaNkatha ngapha ekhwezela umlilo aqede aziphakulele phela uselambile ,njalo uyabona ukuthi ukulinda uSithabile yikudlala ngesikhathi, kubi ngoba utshiye usane olusamunya kuphela .

Iyaqhubeka

*KUNGENXA YENHLUPHEKO*
*CYNTHIA S NDLOVU*
*ISAHLUKO 6*

Uthi cwayi cwayi umlilo emkulwini kaMaNkatha , uphethe uYamihle eceleni kweziko , kudala eqedile ukupheka ulinde nje kufike uSithabile selokhe ephume esiya ngakibo .
Uyazihlabelela uMaNkatha ,abuye akhwezele umlilo khona kuzakhanya emkulwini. Esahleli abone ngemota isikhanyisile esangweni , akhangelisise kuhle phela usekhangelele ukuthi kuyehle uThabani selokhe engakatshayi ucingo kodwa kuyehla uSithabile aqede avalelise imota ngesandla ngaphamb'kokuthi angene ekhaya .

"Hawu nguwe , besengizitshela ukuthi nguThabani selokhe engakatshayi ."

"Kazange atshaye vele ?" Abuze uSithabile phela ubetshiye umakhalekhukhwini ezitshela ukuthi uzathi esiyaphenduka ethole esetshayile .

"Katshayanga mntanami . Ngubani owemota ?" Abuze uMaNkatha .

"Ngumalume lowu , umfowabo kamama ozihlalela edolobheni ungithole khonale yingakho ngiphuzile ukubuya ." Atsho ewaqamba aluhlaza uSithabile.
"Hawu ,kulungile kuhle nxa uke wabona abomdeni . Batheni khonale ekhaya njengoba bekubizile , bayaxola ?" Abuze njalo uMaNkatha .

"Yebo gogo , bathi ngiphenduke ekhaya kodwa abafuni ngibuye lomntwana ."

"Siyabonga nxa bekuxolele kodwa bazathi utshiye umntwana njani ? UThabani uzakwenzela iqiniso kungalunga ,lami nginje ngiyamgqugquzela ukuthi into yakuqala engathola umsebenzi yikuthi ayevela ."

"Lami angikwazi yindaba befuna ngitshiye umntwana ,kodwa ngizakhuluma labo gogo."

"Kulungile mntanami ."

Sekuganxeme ihola letshumi ebusuku. UThabani labanye bakhe sebechaphelile bangena , kuzwakala izisinde zabo kuphela bephendlana layo indlela . Bathi bengahamba bame balalelise baqede baqhubeke ngendlela .
Sebehamba ibanga elide , baqalise ukudinga umgwaqo ukwenzela ukuthi bayedinga igalaji abazalala khona ukwenzela ukuthi ekuseni bavukele ukubamba izimota ezigijimela edolobheni lase Francistown.

Inyawo sezitshone esiswini ngokuhamba , sebezidonsa kuphela kodwa imzimba ayisavumi .
Kwelikade baqhamukele khona emgwaqweni, ngenhlanhla balithole igalaji bengakahambi ummango omude , omunye lomunye avele azilahlele phansi .
Balele beququbele kwaze kwasa. Ukusa kubonwe yibo . Sebevukile bazilungiselela , sebelinde nje ukuthola imota ezigijimela edolobheni khona bezanombela .
Uphakathi kwemicabango uThabani, ucabanga ngosomoya wakhe , indodana yakhe kanye logogo obatshiye emuva , uyakwazi ukuthi lapho abakhona bakhathazekile selokhe engakatshayi ucingo usefisa nje ukuyafika kuAndile khona ezabatshayela ucingo inhliziyo zabo zikhululeke .
Aphume kwelemcabango esebona abanye bakhe sebecela empunzini , mehlo s**a abone imota yabomthetho ,nyawo ngibeletha agijime ayechapha umgwaqo, athalaze abone bemhleli izithende kodwa engapheli amandla abaleke esiyangena iganga , abanye labo bavele baphaphatheka begijima beqonda endaweni ezehlukeneyo .

Isifuba sesinuka igazi kuThabani , isifuba sona sesibhakuza okwamabhiza emjahweni . Ame abambelele amadolo , azame ukubamba umoya khona ezalalela ukuthi basamlandela kodwa kuthulekile .
Azilahlele phansi aphefumulele phezulu , esathi uyalala phansi azwe umsindo wamahlamvu ayeqe ngokuphangisa acele ezinyaweni , ugijima nje kakwazi lokuthi uqonda ngaphi njalo usengaphi kwendawo ,kuphela nje engabanjwanga ngabomthetho , usefisa lokuqhamukela ecingweni ayeqe ebuyele ekhaya . Wayehlala esizwa beyikhuluma i-Botswana , abantu bomthetho abalivezi izinyo lapho besemsebenzini , bakubamba uqamula umthetho bazakujwamulelana bakukhahlele uze uzithambisele . Uyise kaThabani wayesebenza eBotswana esasemfitshane , wayehlala ebaxoxela ngobunzima bakhona nxa ungelazo incwadi ezikugunyazayo , lamhla uzibonele ngawakhe amehlo .

Ekhaya , ulokhe ekhathazekile uMaNkatha . Kazange abuquthe ubuthongo ecabanga ngomzukulu wakhe , kodwa abuye aziphe ithemba lokuthi umdali labakibo bazamkhokhelela .
Uyamthanda uThabani ngoba nguye kuphela asele laye emhlabeni ngokunjalo kafisi ukulahlekelwa nguye.
UMaNkatha wayebusiswe ngendodana eyodwa ,ngemva kwakhe kaphindanga wayenelisa ukukhulelwa futhi . Wakhula yedwa uPhilani waze wathatha ikhosikazi lakhe ,inina elizala uThabani babusiswa ngaye uThabani .
UnakaThabani , watshona ngemva kokuthi wayehambe emfeni khonapha esigabeni , waphenduka edle itshefu bazama ukumgijimisela esibhedlela kodwa waphelela endleleni . Ukudlula kwakhe kwamdabula kakhulu uPhilani , waphenduka waba ngumuntu owayesephila lomkhuhlane wenhliziyo kwaze kwamnqoba ukufa etshiyela uMaNkatha uThabani owayesasemfitshane . Lamhla ukhulile uThabani ngamandla kaMaNkatha owaziqinisayo wamphilela umzukulu wakhe .

Iyaqhubeka