CYNTHIA STORIES

Kanje umuntu othanda amadoda kuthwa ulani esiNdebeleni 😂😂😂ulesagw......

BENGIKUTHEMBILE
Isahluko 4

KungoLwesithathu ekuseni ngehola lesithupha . Sebelungele ukuphuma baye emsebenzini uNonduduzo kanye lo Philile .
Uthwele umlomo uPhilile selokhe emphoqile udadewabo ukuthi awuthathe umsebenzi yena obesafisa ukuzihlalela endlini aze adinge umsebenzi mhla sekufisa yena .

"Loba ungathukuthela Philile angilandaba mina , konke engikwenzayo ngikwenzela wena lekusasa lakho ." Kusitsho uNonduduzo sebesendleleni ,kodwa engaphenduli uPhilile atshile amehlo kuphela .
Sebefikile amhambise ku Mrs Nkomo amsebenzelayo ngaphamb'kokuthi laye ayeqalisa owakhe umsebenzi .

"Ngiyakwamukela lapha ekhaya Philile njalo ngilethemba lokuthi kuzakuba kuhle ukusebenza lawe .
Umsebenzi wakho ngowokungihlelela okufanele ngikwenze esukwini , nxa kufanele ngibe lemhlangano uyangibhalela phansi , njalo lapho engihamba khona sihamba sonke kuze kutshaye ihola lokutshayisa ."

"Kulungile." Aphendule ekhangele ecele uPhilile .

"Kuhle ke , i-tablet ozayisebenzisa ukuhlela ." Emqhubela , alwamukele uPhilile aqalise ukwenza lokho okufanele akwenze .

Izikhathi zilokhe zigijima njalo zidala imizuzu yona edala amahola .
Sekulihola lakuqala emini , ihola lekhefu lasemini .
UMrs. Nkomo ungaphandle kwehofisi ukhuluma ecingweni , uPhilile yena umile ehofisini ulinde yena selokhe ethe bazahamba bayekudla phandle , kusenjalo kungene uNkomo ephethe amaluba ezandleni .

"Utshona njani sisinyana ,ungaphi unkosikazi wami ?" Kubingelela uNkomo , athule zwi uPhilile amhlahlele amehlo aze amamatheke .

"Helloo , sisi ngikhuluma lawe ." Kusitsho uNkomo, phela uPhilile ulibele ngokumhlahlela amehlo kuphela .

"Ngiyaxolisa sir , uphandle ukhuluma ecingweni ."

"Kulungile ngizamlinda angifuni ukumphambanisa ." Atsho edonsa isihlalo ahlale , abeke amaluba etafuleni .
Amkhangele uPhilile abuye azikhangele laye , azithole esedonsa donsa isigqoko sakhe kancane .

"Hawu mnyeni wami , awungitshelanga ukuthi uyabuya ." UMaNkomo ebona umnyeni wakhe , asondele baqabulane aqede athathe amaluba.

"Ngiyakwazi vele ngawami ."

"Ngawakho mkami , ngicela nje sihambe sobabili siyekudla isidlo sasemini ."

"Kulungile mnyeni wami . Philile , ngizakuthumela imali uhambe uyethenga lawe okuya ethunjini ." Atsho lawo uMaNkomo ngaphamb'kokuthi aphume lomnyeni wakhe , esale enxapha uPhilile .

"Nywe nywe , obethe angifuni ukuhamba lani ngubani , ngoba bekufanele atshele umnyeni wakhe ukuthi bazahamba lami mxm ." Atsho elahlela umakhalekhukhwini etafuleni aqede aphume laye esesiyadinga okudliwayo .

Endleleni atshayele umngane wakhe uSophia ucingo emcela ukuthi bahlangane kunkaba dolobho kwesinye sezitolo zokudla kukhona afuna ukumtshela khona . USophia njengomuntu othanda izindaba , kungamthathi mmango ukufika lapho okulo Philile khona .

"Zithini indaba dade ."

"Kunguwe wawungenza njani usuphakathi kwamadoda amabili alemali , ungakhetha yiphi ? Kumbe ngibathathe bonke ."

Ahleke uSophia ."Thatha bonke ntombazane , ingathi mina ngizwana labathathu wena kuzayehlulani , dlana imali .
Kodwa ubukeka ugqokele umsebenzi , phela awugqoki kanje wena ?" USophia emkhangela aze alunguze langaphansi kwetafula ehlola izicathulo azigqokileyo .

"Angithi ngu Nonduduzo lokuzenza umzali wami , cabanga ungiphoqe ukuthi ngiyesebenza ngibe ngu PA ."

"Ulenhlanhla , thina iziqu zethu zizaze zibolele endlini singawutholi umsebenzi ."

"Girl, angizange ngafundela ukuba ngu PA mina ."

"Yebo ,kodwa akufani lokuhlala njalo ngumsebenzi omuhle lowu ."

UTHANDO LUKABABA

CYNTHIA S NDLOVU
@0631201915

SAHLUKO 10

Liphumile ilanga njengansuku zonke , namhla ke kuvuke kutshayelela umoya oqandelelayo .
Sekwedlule inyenga uClement wagwetshwa ,useyehlile kakhulu emzimbeni lokudla kwesinye isikhathi kuyayala ukungena lapho ecabanga imnyaka azayiphila evalelwe aphinde acabange ngomntanakhe ukuthi uzabe ephila njani .
Uhleli wabamba isihlathi inyembezi yizo kuphela esezidale umfula ebusweni bakhe , azithole eselele phansi kungemzuzu bumthathe ubuthongo buyemtshiya elizweni lamaphupho lapho ebona umntanakhe ekhala okudabukisayo esezandleni zomuntu ongumama .
Kusenjalo umama lowo amlahlele phansi ngesisu lapho akhale ngamandla , nxa ethi uzama ukumhlenga kubekhona abamvimbahmyo avuke eseqa aqonde emdulwini awutshaye ngesibhakela ahlabe umkhosi kuze kuzonde ezinye izibotshwa .
"Yikho sikutshaya awulangqondo kuqala ngawe ukubotshwa ?" Esinye isibotshwa simdonsa ngempama ,abambe isihlathi uClement ahlale phansi .
"Uxolo bengingaqondanga ukukukhuba mfowethu, ngibe lephupho elibi ngiphupha ngomntanami ."
"Pho thina singena ngaphi ndoda ? Akusihloniphe ."
Azithulele uClement .

Namhla udlule ebona uSandile ezintandaneni uMelisa , noma nje ebonakala engajabulanga kadlali labanye utshone ehleli kumbe elele .
Uthe esuka ezintandaneni waqonda emsebenzini uMelisa wathola uMvundla ehleli phandle eceleni kwedamunyana lokubhukutshela.
"Litshonile baba uMvundla ?" UMelisa ehlala phansi ,amkhangele uMvundla aqekuze ikhanda .
"Kanti lapha ekhaya alilayo iCCTV ? Nxa lilayo pho yini umsebenzi wayo lingayisebenzisi ukubona ubugebengu obuyenzakalayo ?
Yindaba lakhetha ukuthi abomthetho balihlohle ngembuzo kule CCTV eyayingabatshela konke ? Khona vele baphenya njani abantu bomthetho bangayiboni iCCTV ?"
Abeke iphetshana alibalayo phansi uMvundla akhangele uMelisa ,aqede asukume phansi ngokuphangisa aqonde endlini .
"Asethembe uzalithola iqiniso lonke ngoba mina ngingakhuluma kuzathiwa ngilichitha muzi , mina sengikhalela ukuthi uClement aphume umntwana lowana uyamdinga uyise .
Vele kungayisikho ukuthi ngiyahola kuhle lapha ekhaya bengizatshiya ngiyemnakekela umntwana lowana udinga izandla ezikhudumalayo usasemncane .
Ngezikhathi ngizabuyela ngiyemhlola ." Eqonda egumbini lakhe .
Agulugudele ekamelweni uMvundla kuze kuyethuke uAnita ,avule umabonakude osekamelweni kwazise yikho lapho okubonakalo konke okuthathwa yi CCTV , ahlale esofeni .
Kuqalise ukutshengisa konke obekwenziwa ngu Anita ezama ukudonsela zonke izisebenzi embhedeni abanye bevuma abanye beyala kwaze kwayafika lapho edonsela uClement .
Lapho yena useyinkukhu ecuthiweyo uphethe ngokumangala kokuphela ,phela yena uhlala ezitshela ukuthi ayisebenzi ingumceciso kuphela .
"Yikho lokhu okwenzayo Anita ?" UMvundla esebambe inhliziyo ngesandla uyambona ukuthi umoya usewudonsela katshana .
"Baba ngingachaza ."
"Ufuna ukungibulala ngiyakubona , vele uyangithanda noma wangitshadela umnotho wami ?
Angisakufuni emzini wami noma bengingafa nxa kuyikuthi ubulinde khona ubungasoze uthole lutho konke ngokwabantwabami ."
"Sithandwa sami Mvundla mina angikwazi ukuthi ngangingenwe yini ngiyaxolisa angisoze ngiphinde ,ngiyakucela ungangixotshi ." UAnita esondela kuMvundla ,kodwa amsunduzele katshana.
"Ungangibambi wena sifebe , imnyaka yonke leyi ngiphila lomuntu onjengawe .
Awungihloniphi wena mntwana ungenisa amadoda ekamelweni lami ,angikwazi lokuthi ngangikufunani ."
UMvundla ephuma aqonde egalajini afike angene emoteni aphume aqonde ekhami lapho okuvalelwe khona uClement .
"Salibonani bantu bomthetho , ngilapha nje ngifune ukwesula icala lika Clement owabotshelwa into angayenzanga .
Lami angikwazi ukuthi ngakhohlwa njani ukuthi ngilama CCTV endlini yami ngicela limkhulule ."
"Ulesiqiniseko esingakanani ngalokho okukhulumayo baba ? Abakusabisanga kodwa ?"
"Nxa lingangithembi lingahamba lami endlini ngicela akhululwe , futhi abafazi abathenjwa ." UMvundla ehlala phansi .
Ngemva kwemizuzu baphume laye uClement, ngendlela adabukisa ngayo noma ngubani engakhala .
Inwele zingamahlahla konke lendevu angeke usatsho ukuthi nguye lowana , asukume phansi uMvundla abambelele umduli .
"Kwenzenjani baba uMvundla ? Awuphilanga yini ?" Kubuza omunye wabomthetho .
"Ngicela lingekele mina ,Clement uxolo kakhulu umntanakho usezintandaneni okuthwa yi Hope ." UMvundla ephuma ,amlandele emuva uClement.
"Ngizakuba yazi njani i Hope leyo ? Ngicela udlule ungitshiya khona ?"
Akhiphe imadlana esikhwameni amqhubele ."Hamba uyedinga umtshova ozakutshiya khona ."
"Ngizathi ingaphi kwendawo baba uMvundla ?"
"Wena mfana akungekele kanti lifuna ukungibulala isikhathi singakafiki yini ." UMvundla esiyangena emoteni esale emile uClement , athalaze ngapha langapha aphume ayedinga umtshova .
Abantu bahamba bemkhangela lapho ethi uyasondela ukuze abuze iHope bavele basondele katshana .
"Unjani mfowethu ngicela ukukugela awusoze ubhadale ,yikho ubona abantu bekubalekela ." Owesilisa osebenza ngokugela khonapho emgwaqweni avele ahlale phansi uClement.
"Ngingajabula mfowethu ,ngidinga ikhaya lezintandane elibizwa nge Hope kumbe uyalazi .
Nxa ngibuza yena owahambisa umntanami khonale kafuni ukungitshela ."
"Hawu yindaba ? Lami angikwazi mfowethu kodwa nxa siqeda lapha ngizakuhlolela ecingweni ukuthi ingaphi kwendawo."
"Ngingajabula mfowethu ."
Uthe eqeda ukumgela wamhambisa endlini yakhe wayageza wamnika lempahla zokutshintsha ,waqeda wamnika lokudla wadla .
Lapho ke usezizwa elawo amandla okudinga umntanakhe .
"Tendai mfowethu ngiyabonga kakhulu ngalokhu ongenzele khona ,ngilethemba lokuthi sizaphinda sibonane empilweni."
"Wamukeliwe Clement ,mana sikhangele ecingweni ukuthi ingaphi kwendawo ." UTendai ehlala phansi ,ahlale phansi laye uClement.
"Ngiyayithola kodwa ikatshana ,kumele uthole imtshova embili ulayo imali yokugada ?"
"Eye ngilayo ungazikhathazi kunengi osungenzele khona , ngilayele kuphela ukuthi ngihamba njani ?"
"Asihambe emgwaqweni sidinge umtshova ngizakukhulumela lomtshayeli njengoba uthi idolobho awulijwayelanga ."
Baphume belandelana baqonde emgwaqweni, kungemzuzwana bawuthole umtshova bavalelisane angene ayehlalela emuva uClement .
"Umuhle mnewethu ." Kususa omunye usisi eceleni kwakhe , lapho azizwe egubelana uClement aze afise lokumvala ngempama .
"Hawu bhudi ngikhuluma lawe ."
"Ungangenyanyisi ngivele nginyanyile mxxm ."

Iyaqhubeka

OMaMoe ukungazibambi 🤣🤣

Okusalayo uSiboniso ubeqala ukuzwa ngo Philile ukuthi iwors uyayifaka emlonyeni kuqala ungakayipheki 🏃‍♀️🏃‍♀️🏃‍♀️🏃‍♀️😂😂

Malisitshiya ezindlini zenu liyatsho phela ukuthi sisale sipheka 😂😂kutsho uPhilile 🏃‍♀️🏃‍♀️

Umhelo awusekho buhlungu neh😥abafazi abaselandaba .

UTHANDO LUKABABA

CYNTHIA S NDLOVU
SAHLUKO 9

Kutshayana amadolo kuClement kugedlana amazinyo okumuntu ongenwa ngamakhaza , ziyehla kokuphela inyembezi.
Umile phakathi kwebhokisi lasemthethwandaba , empilweni yakhe kakaze acabange ukuthi engazithola esendaweni leyi .
Avuse amehlo akhangele uAnita ngamehlo agcwele usizi avele akhangele eceleni uAnita anwaye ikhanda .
"Baba mina sengimzwela kungabanjani silesule icala ?" UAnita sakunyenyeza endlebeni zikaMvundla , ahwaqe ebusweni akhangele uAnita ngelihlo elibomvu.
"Umdlwenguli kaxolelwa Anita ,kumele abhadle ejele afele izono zakhe njalo umntwana uzahamba ezintandaneni .
Mhla esiyaphuma uzabe esekhulile ."
Avele athule uAnita anwaya nwaye ikhanda .
"Icala lika Clement elokutholakala ezama ukudlwengula unkosazane Anita Mvundla , Clement Ncube uyalivuma icala lakho na ?"
"Cha angizange ngikwenze lokho mina , unkosazana Anita wangithola ekhoneni wangiqhatsha , lelana langa angizange ngizame ukumdlwengula mina .
Wangiphathela izigqoko ezintsha wathi ngigeze ngizihqoke ngibuye ekamelweni lakhe ufuna sikhulume mayelana ngomsebenzi , ngathi ngingena waqalisa ukungibamba bamba esithi umkakhe kamenelisi ufuna mina ngimjabulise .
Ngayenqaba wangisunduzela embhedeni yikho ukungena kuka baba uMvundla. "
Ahwaqe njalo uMvundla akhangele uAnita.
"Ulamanga lowu baba , uyangazi mina angeke ngiyiyenze into enjalo ."
"Order ! Nkosazane Anita awukaphiwa ithuba lokukhuluma ,sicela umnike ithuba akhulume aqede ." UMtshutshisi ,avele akhangele phansi uAnita .
"Baba uMvundla sicela ungene ebhokisini usitshele ukuthi wathi ungena ekamelweni kuyini owakubonayo kuqala ."
Avele asukume ngokuphangisa uMvundla ayengena ebhokisini athibe isikhwehlela.
"Ngezwa umsinjwana ngisaqhamuka kodwa angeke ngitsho ukuthi kwakungimsindo onjani , eqinisweni angizange ngibone ukuthi babenjani ngathi ngivula isivalo unkosikazi wami wayevele esehlaba umkhosi egijimela kimi ."
"Ubeselesikhathi esingakanani uClement ehlala ekhaya lakho ?"
"Bekulilanga lakhe lakuqala nkosi yenkantolo ."
"Wena laye belivele liyazana njalo ubuye lobani emzini wakho ? Njalo lowu obuye laye bayazana njani ?"
"Aaah imbuzo leyi isiminengi kakhulu , ngicela livalele umndwenguli lowu kwaphela ."
"Uxolo mnumzana Mvundla asisebenzi njalo ,kumele sithole ubufakazi obuqinileyo kuqala .
Sizalimisa lapha icala kodwa uzaqhubeka evalelwe uClement kuze kutholakale ubufakazi , njalo wena lonkosazana Anita kumele lihlohlwe ngemibuzo ngabantu bomthetho ,ngokunjalo bazalivakatshela emzini wenu ngiyabonga. " Etshaya phansi ngesando sakhe , bamthathe abomthetho uClement bahambe laye .
Balandelane uAnita lo Mvundla beqonda emoteni yabo , bahambe bethule baze bayafika endlini bathola uMelisa edlala lo Sandile phandle .
Anxaphe uMvundla ayehle ngokuphangisa atshayelele isivalo aqonde kuMelisa ."Ngicela uqoqe zonke impahla zabo ababuye lazo ,uyabuya umama wasezintandaneni ezomthatha umntwana. "
"Baba uMvundla ngicela ungayenzi njalo ,eqinisweni angimazi uClement kodwa ngingamphikela , sekungenzeka awubonanga kuhle .
Umadam nguye obize uClement wathi abuye endl........."
"Vala umlonyana wakho lowo Melisa uyenze lokhu engikuthume khona ,umntwana womdlwenguli phansi kwami angimfuni ." Kukhwaza uMvundla avele athwale umntwana uMelisa aqonde endlini esemuva ,anxaphe uMvundla aqonde endlini athole uAnita ehleli esofeni .
"Ungamzweli lakancane kahambe ayefela ejele ,uyangimangalisa nxa uthi ufuna ukwesula icala ." Kususa uMvundla kodwa abonise ukukhathazeka uAnita .
"Ngizwela umntwana baba , yikho bengicabanga ukuthi simxolele mhlawumbe ulingekile ."
"Ulingekile ngoba uyaqala ukubona umuntu omuhle njengawe ,kodwa lokho akwenzileyo akuxoleleki kahambe njalo abomthetho bazabuya lapha ngicela ukhulume into eyodwa ungamzweli siyezwana ?"
Aqekuze ikhanda uAnita ,asukume phansi uMvundla aphume aqonde endlini esemuva athole uMelisa eseziqoqile impahla zabo ,livuleke isango kungene inqolamlilo itshayelwa ngowesifazane .
Avele ajwamule uSandile ngengalo uMvundla ahlabe umkhosi , ahambe laye afike amqhubele owesifazane alandele lesikhwama emuva uMelisa .
"Linjani baba ,akulunganga lokhu okwenzayo umntwana kayenziwa njalo ."
"Angikudingi lokho umntwana wesibengu yisigebengu ,thatha into leyi uyeyikhulisa ." UMvundla ebuyela endlinin,anikine ikhanda owesifazane ayamukele isikhwama kuMelisa .
"Mama ngicela ukukhuluma lawe , ibizo lami ngingu Melisa ngingakujabulela ukubakwazi ngiphinde ngibeyazi indawo yenu lapho elikhona ." UMelisa eviyoca, aqhube isandla owesifazane baxhawulane .
"Ibizo lami ngingu Lisa ,indawo yethu ibizwa nge Hope orphanage home ungangena ecingweni uyihlole uzayithola yithi kuphela esibizwa nge Hope ."
"Kulungile ngivumelekile ukuthi ngibe ngibuya ukuzembona umntwana njalo nje ngamalanga ami okuphumula ?"
"Yebo uvumelekile , kuhle ukubakwazi njalo umntwana sizamkhulisa kuhle kodwa ngendlela amuhle ngayo sebengamthenga abanye abantu ."
"Cha lapho uyabe usuphambanisa Lisa ngoba ubabakhe uyaphila ubotshiwe , awulayo imvumo yokumthengisa umzali wakhe esaphila ,njalo ngilethemba lokuthi uzaphuma vele ."
"Khona uqinisile bengizidlalela lami angeke ngimthengise ngizamgcina kuhle usale ." Engena emoteni ayisuse aphume ahambe ,ayehlise inyembezi uMelisa anxaphe .
Kusenzeka lokho Izikhathi zilokhe zihamba sekwedlule amalanganyana , icala lika Clement lilokhe liphenywa .
Abantu bomthetho bafika njalo koMvundla bezobahlaba ngembuzo .
KungoMvulo ekuseni namhla ke lilanga lecala lika Clement , usekhuleke waze watsha izwi uClement amehlo asevuvukile ngokukhala njalo , ukulala kasakwazi ulala ebalisa ngoSandy lize liyephuma ilanga.
Uphethe ngokuzenwaya kokuphela kwazise kulensikizi egumbini lakhe ,sivuleke isivalo avele asukume phansi kubemnyama ebusweni ayebambelela ngomduli ,phela uselamalanga engadli kuhle kwazise ukudla kwasejele ngokokubamba umoya ukuthi ungehlukani lenyama .
Amgaxe amasongo kasigonyela enyaweni lasezandleni amqhube baphume bakhangelise amabombo emthethwandaba .
Kungcwele ke namuhla kutsho khona ukuthi amacala manengi njalo alika Clement yilo elakuqala , ukhulekela enhliziyweni kokuphela uClemet isifiso sakhe yikuphuma ayebonana lomntanakhe babuyele ekhaya .
Noma bekunzima ekhaya kodwa lokhu okunje kazange wahlangabezana lakho , avuse amehlo awabhodise indawana yonke ,azithele kuAnita amkhangele ngamehlo agcwele usizi .
"Clement Ncube sesingena ecaleni lakho elithi lona ,watholakala uzama ukudlwengula unkosazana Anita waphikisa wena wathi awukwenzanga lokho ."
Aqekuze ikhanda uClement.
"Kodwa utholakala ulalo icala , ngokunjalo uzagwetshwa imnyaka eyisitshiyagalo lunye ubhadla ejele ." Kuvele kubemnyama emehlweni ka Clement ayekuthi gqi phansi ngekhanda .

Iyaqhubeka

What a wicked world we live in 🥹

UTHANDO LUKABABA
CYNTHIA S NDLOVU
SAHLUKO 8

Selibantu bahle ilanga ,useqedile ukwenza yonke imsebenzi yakhe uClement .
Bahleli egumbini lokuphumulela lo Sandile bakhangele umabonakude kwazise uMelisa .
Kuqoqode uAnita engena ngapha ethwele amaphepha agcwele impahla afike awabeke esofeni ahlale phansi .
"Ngethemba litshone kuhle lo nana ?"
"Sitshonile dadewethu singabuza wena ?"
"Ngitshone kuhle ,kodwa ngicela ungibize ngo Anita ngiyakujabulela ukubizwa ngebizo ,ikakhulu nxa ngibizwa ngumuntu onjengawe ." UAnita esiyahlala eceleni kuka Clement , ayethuke uClement azizwe engasahlalisekanga asondele eceleni kancane .
"Ngiliphathele impahla zokugqoka ,lezi ngezakho lezi ngezika nana ."
Amoyizele uClement ayamukele .
"Ngiyabonga kakhulu , inkosi ikwandisele ."
"Ngicela ugeze utshintshe impahla ,ugqoke ezintsha njalo ungaqeda uziqhole ngamakha lawa ubuye endlini enkulu .
Kukhona engifisa sikuxoxe mayelana lomsebenzi , umntwana udlule umtshiya kuMelisa ukhuphuke ubuye ekamelweni lami ." UAnita esukuma phansi .
"Kulungile ngizakwenza njalo ."
Amoyizele uAnita amficele ilihlo aqede azitshile eqonda emnyango, awise ikhiye yemota ngabomo akhothame imhlathi yezihlalo isale egcekeni akhangele eceleni uClement .
Adobhe ikhiye yakhe aqonde endlini enkulu , asukume phansi uClement athathe impahla aqalise ukuzibuka .
"Zinhle zona , kodwa indlela ayenza ngayo akuthakazelisi ." Eqonda egumbini lokugeza , uthe eqeda ukugeza wagezisa uSandile batshintsha impahla baqonda endlini enkulu .
"Kuthwe utshiye umntwana kimi , ukhuphuke uqonde phezulu ikamelo lesibili kwesokhohlo uqoqode khona ." UMelisa ethatha umntwana , ahlahle amehlo uClement abhodise amehlo indawo yonke inhle indlu ,iphansi yakhona ungazibuka .
Akhuphuke kancane kancane ngapha ethalaza indlu yonke ,kuyaqandelela kuphinde kuyanukelela ungaze ufunge uthi kusezulwini elincane , akhuphuke aze ayefika ekamelweni aqoqode kanye atsho esesivulile isivalo uAnita.
Ahlahle amehlo uClement ,kwazise ugqoke ileyisi elikhanyela umzimba wonke ,abuyele emuva kancane amdonse ngesandla .
"Ubalekani kanti ?"
"Bengizwe uthi ufuna sikhulume mayelana ngomsebenzi , pho nxa ungagqokanga akuyenzi ngizaphela ngiphenduke ." UClement ngokwesaba.
"Yebo , ngifuna ube ungijabulisa ngizakubhadala kabili Clement .
Umkami kangijabulisi ngitsho uhlala ekhala ngeqolo lawe uyazibonela ukuthi usegugile .
Ngiyakuthembisa akula ozakuba kwazi ."
Ahlahle amehlo uClement awuzwe umzimba uqhuqha ungenwa yintshongolo .
"Cha angeke ngikwenze lokho Anita , ngumkakho angithi nguwe owamtshadayo .
Mina ngizifunela umsebenzi umfazi womuntu ngiyamhlonipha ,ngicela ungekele ngihambe uzathini umkakho asithole khonapha ?"
"Uyabuya ebusuku Cle ,yehlisa umoya mani ." Emsunduzela esihlalweni ahlale phansi uClement .
"Ngizakwenzela konke okufunayo njalo lomntanakho ngizamphatha njengowami ngimhambise ezikolo eziphezulu .
"Ngiyakuzwa Anita kodwa angeke ngikwenze lokho ,umfazi womuntu ngiyamhlonipha kakhulu .
Njalo lawe ngicela uhloniphe umkakho ,ngiyawudinga umsebenzi lowu kakhulu ngicela ungidedele ngizihambele ."
UClement esukuma phansi ,amdumele uAnita azame ukumqabula kube yisiphansi phezulu .
"Angifuni ukukulimaza Anita ngicela ungekele , ufuna abantu bethini besithola sisunduzana ? Ngiyakucela muntu wabantu ."
Amoyizele uAnita ."Ngabe uyakwazi ukuthi umuhle njani lapho uzondile , bayake bakutshele kodwa ukuthi umuhle ? Uyalangazelisa yazi ngizizwa sengikwelinye izinga ."
Akhamise uClement abuye ahleke kancane aqede asuse igxathu ,amvimbe uAnita .
"Waphuma ngomnyango lowu uvele uhambe angisakufuni endlini yami ."
"Akula engingakwenza ngiyabe ngizahamba Anita , ngizawuthola omunye umsebenzi into engingeke ngafa ngayiyenza yikungena umfazi womuntu khohlwa ." UClement esuka , amsunduzele embhedeni agade phezulu kwakhe , sivuleke isivalo sivulwa uMvundla avele ayeqe uAnita agijimele kuMvundla ehlaba umkhosi afike ame ngemva kwakhe .
Ayehle ethaleni uClement ame mpo aswele lokuthi ayenzeni ,iphele yonke intshongolo abeyizwa azizwe esetshiselwa ngovalo .
"Kwenzakalani lapha ? Clement lokufika emzini wami usuvuka embhedeni wami kwenzenjani ?" UMvundla ngolaka.
"Wasiza wafika baba ,inja leyi ifuna ukungidlwengula .
Bengigeza ngezwa umuntu evula umnyango nxa ngiphuma nguClement ngisathi ngiyambuza ukuthi ufunani ekamelweni lami wavele wangibamba wangiphosela embhedeni ." UAnita ahlaba umkhosi, atshintshe ebusweni uMvundla aguquke abe bomvu gebhu amehlo .
"Ungumdlwenguli wena mfana ?"
Akhamise uClement akhangele uAnita abuye akhangele uMvundla osesidla amalahle avele aguqe phansi aphakamisele izandla phezulu.
"Angizange ngikwenze lokho , nguye ongibizileyo wathi ye............"
"Shut up ! Mdlwenguli , bengikudabukela ngikubona utshiswa lilanga kanti ngizilethela umdlwenguli .
Ngabe ubaba kafikanga bekuzakwenzakalani ngami ." UAnita inyembezi sezivule umfula ebusweni ,akhiphe ucingo lwakhe uMvundla atshayele abomthetho .
"Wena uzafela ejele kutsho kudala ukwenza lokhu manje namhla uhambe kubi ." UMvundla edonsa uAnita baphume bavale umnyango bahluthulele , ahlale phansi ayame umduli uClement ziyehle zilandelana inyembezi.
"Ngabe bengikwazi ngabe angizange ngizihluphe ngomsebenzi wakhona ,kathesi sengizakuyafela ejele ngento engingayaziyo mina .
Umntanami uzasala lobani madlozi akithi ngicela lingihlenge ." UClement esesula inyembezi ngengalo kodwa ziyehle zilandelana , lapho useyibona impilo yakhe iphela phambili kwakhe .
Okumdabula kakhulu ngumntanakhe nxa kungenzeka abotshwe ,uqhubeke ekhala ngapha ekhuleka .
Ngemva kwemzuzu engaba ngamatshumi amathathu sivuleke isivalo kungene uMvundla labantu bomthetho .
"Nguye lowu bantu bomthetho nxa kusenza limvalele liqede liyelahlela ikhiye elwandle ."
Asukume phansi uClement ayehlise inyembezi ekhangele uAnita ,avele agebhele ikhanda phansi uAnita aluzwe uvalo .
"Letha izandla ndoda ." Omunye wabomthetho emgaxa amasongo kasigonyela baqede bemqhube bephuma laye , esale emile uAnita anwaya nwaye ikhanda.
"Sengenzeni ? Ayi kodwa angeke ngivumele umuzi wami udilika cabanga nje sengiphelelwa yinotho engaka .
Lami angiyenzanga kuhle bekumele ngihambe laye eweteleni phela bengingakwazi ukuthi uzabuya masinyane ."
UAnita elandela emuva , bamqhube uClement baze bayemngenisa emoteni atshibilike akhangele umntanakhe osezandleni zika Melisa idabuke inhliziyo yakhe ziyehle ngamandla inyembezi angene emoteni ayehlala phansi .
Lapho ke usezisola kokuphela ufisa lokubuyisela isikhathi emuva ayenqabe umsebenzi ka Anita kodwa asechithekile asechithekile angeke esawabutha usekhulekela ukuthi engavalelwa .
"Umntanami asethembe bazamphatha kuhle , angisoze ngikwanise ukuphila ngaphandle kwakhe .
Baba lo mama lilele obunjani ngize ngihlupheke kangaka emhlabeni ?"

Bathe befika enkambeni bamvalela yedwa egumbini elimnyama tshu , ayehle ngomduli aze ayefika phansi ahlale afake ikhanda phakathi kwamadolo zibuye ngamandla inyembezi.

Iyaqhubeka

BENGIKUTHEMBILE
Isahluko 3

UNonduduzo usebenza eKampanini kamngane wakhe ethengisa izimota. Selokhe engazange wabalazo iziqu usebenza ukuhlanza indawo kanye lokwesula uthuli ezimoteni eziyabe zihlobisile .
Loba emsebenzi wakhe ungowokuhlanza indawo kodwa uhola kuhle kakhulu selokhe esebenzela umngane wakhe , kudala waqalisa ukumsebenzela enakekela uPhilile ngengxenye yemali .
USiboniso yena usebenzela ibhanga , ngokunjalo bayancedisana lapha endlini.
Selokhe uPhilile eqeqetshiwe , uhamba emdingela umsebenzi ebantwini ayazana labo abalamakampani . Usekhulume lomgane wakhe amsebenzelayo , wathembisa ukumqhatsha amenze uPersonal assistance wakhe aze athole umsebenzi wephupho kakhe , njalo mhla esewutholile uzamkhulula azihambele .

Ujabulile uNonduduzo kasakwazi ukulinda ukuthi ayefika endlini , phela ufuna ukubona umnawakhe ezisebenzela ezenzela konke . Okunye ufuna mhla esefuna ukuzitholela indawo yakhe akhululeke selokhe esekhulile .

Endlini , uzihlalele uPhilile ubukele umabonakude . Lihola lesihlanu ntambama, enjalo kazihluphi ngokuthi abeke amabhodo eziko into nje ufuna ukudla kuphela .
Kusenjalo kungene uNonduduzo ezihlabelela , phela ungumuntu ohlala ezijabulele .

"Utshona njani Philie , ngethemba usuqedile ukupheka , angilambanga nje ." Atsho ezilahlela esofeni .

"Ukupheka ? Bengingakwazi ukuthi kufanele ngipheke ." Aphendule uPhilile ngapha ezicofela umakhalekhukhwini wakhe .

"Hawu , Philile , ilanga litshonile kufanele kuphekwe . Kulungile ke ngizapheka."

"Ngabe ubungitshelile bengizapheka ." Kuphendula uPhilile elokhe egxile kumakhalekhukhwini.

"Kulungile dade ngizapheka . Ngikutholele umsebenzi , uzaqala ngoLwesithathu , njalo uvunyelwe ukutshiya mhla usuthole owephupho lakho ." Kusitsho uNonduduzo , kube yikho evusa ikhanda uPhilile akhangele udadewabo.

"Ngumsebenzi bani lowo ? Bengisafuna ukuphumula mina ,kanti ngijahe ngaphi ? Phela ayisikho ukuthi ngilabantwana okufanele ngibakhangele ." Aphendulele eceleni uPhilile .

"Uchaza ukuthini Philile ? Kufanele uqalise ukusebenza kathesi , uyenze konke okufisayo ,uthenge indlu uvule ibhizimisi nxa ufuna ukwenzela ukuthi kusasa kubelula ngitsho usufuna abantwana .
Umsebenzi ngowe Personal Assistance."

Atshile amehlo uPhilile."UBoss wakhona yindoda ?" Abuze .

"Cha , ngumuntu wesifazane ."

"Cha angifuni ukusebenzela umuntu wesifazane mina bazenza ngcono ."

"Umuntu esikhuluma ngaye lapha ngumngane wami njalo ulenhliziyo enhle kakhulu . Uzawuthatha umsebenzi lowu uthanda ungathandi Philile . Uyakwazi bangaki abantu phandle abafuna imsebenzi ? Wena owutholayo udlala ngawo , uzawuthatha ngenkani nxa kufanele ." Atsho lawo aqede asukume aqonde emkulwini ukuyaqalisa ukupheka , asale etshila amehlo uPhilile .

UTHANDO LUKABABA
CYNTHIA S NDLOVU

SAHLUKO 7

Litshisela emayezini namuhla, liyathembisa izulu ukuthi lingatshaya phansi ngezikhathi kufakazelwa ngamaxhegukazi avuke esiyabona okhulu.
Useginqe usethonta uClement ,kwazise namhla uvukele ukuyathengisa inkuni ekhoneni , phela zilokuthengwa ngabahlala edolobheni .
Abone ngenqolamlilo isimile eceleni kwakhe avele asukume phansi ngokuphangisa.
"Ngake ngakubona dadewethu usakhumbula ukuthi nguwe owake wathenga amacimbi kimi ." UClement ngenjabulo ,amkhangele owesifazane ngapha esehla emoteni achile amakhala .
"Ngiyakukhumbula , siyayakha lomkami ikhaya emaphandleni njalo nje ngiyadlula lapha ngisiyakhangela ukuthi kuhamba kuhle.
Ungaphi umntanakho namuhla ?"
"Umntanami ngimtshiye komakhelwane ."
Amdobhe ngamehlo abuye aphunge samuntu onukelwayo .
"Ngiyabona , yindaba ungadingi umsebenzi edolobheni uyekele ukuthengisa lokhu.
Sekuthengwe kangaki selokhe ufikileyo ?"
"Sekuthengwe kanye kodwa ngisaselalo ithemba lokuthi ukhona ozathenga njalo dadewethu ."
"Ngicela ungangibizi ngodadewenu ,ibizo lami ngingu Anita."
"Kuhle ukubakwazi Anita, ufuna ukuthenga inkuni ?"
"Yebo ngicela uzifake zonke emuva , njalo ngifuna ukukunika umsebenzi ."
Athi ngokuzwa lelo uClement athwale zonke inkuni azifake emoteni .
"Ngumsebenzi onjani lowo dadewe......uxolo Anita?"
"Sidinga u-garden boy , uzabe uyenza imsebenzi yokuhlanza ikhaya lami uthelela izihlahla .
Kwesinye isikhathi uzabe uhamba ekhaya usiyancedisa abayakhayo ngokuthutha amanzi, njalo uzabe uhlala endlini yami ."
"Kulungile ngiyawufuna umsebenzi , inhlawulo yona ithini njalo ngingabuya lomntanami ?"
Amkhangele njalo uAnita ngokweyisa atshile amehlo.
"Well, sizaqala nge $200 ngenyanga ,nxa ungaqhubeka usebenza kuhle sizayikhweza ."
"Ngiyabonga ngizawuthatha umsebenzi ,pho kumele ngiqalise nini ?"
"Ngeviki elizayo ngoMvulo ,thatha iphetshana leli kulenombolo zami ungafika elenkini ungitshayele ngikulande .
Yebo umntanakho ungabuya laye kodwa uzazikhangelela yena njalo asifuni umsindo siyezwana ?"
Aqekuze ikhanda uClement ngapha esemukela iphetshana .
"Kodwa angilalo ucingo angikwazi ukuthi ngizakwenza njani ."
"Uzabona icebo mina ngikufuna emsebenzini ngomvulo , thatha nansi imali yenkuni ." Emqhubela imali aqede abuyele emoteni ayisuse ahambe , ahlale phansi uClement abambe isifuba.
"Mina lowu ngithole umsebenzi ? Ngizasebenza ngibeke imali kuphela nje ngizabe ngingabhadali indleko zendlu ,ukwenzela ukuthi uSandy esiyangena isikolo ngibe sengile mali enengi ."
Asukume phansi akhweze ibhulugwe lakhe afake imali esikhwameni aqonde esilindweni sebhasi ukuyalinda ibhasi , ngemva kwehola iqhamuke ingadlanga nkotshane ,ithi ngokuma ayinombele ayehlalela efasiteleni amoyizele aze akhiphe ikhadi likaAnita alikhangele .
"Ngizaboleka ucingo angeke ngikhuthwe ngumsebenzi ."
Uhambe ecabanga ngomsebenzi ngapha ehlela ukuthi uzatshiya ezibeke njani izinto zakhe , loMvulo usumphuzela ukuthi ufike ahambe ayeqalisa ukusebenza .
Ithe imtshiya nje ibhasi emgwaqweni wavele waqonda koSibindi ,abathole behleli phambili komkulu besidla indumba , athi ngokumbona uSandy asukume phansi acathule emhlangabeza .
Amphakamise uyise amdlalise ngapha esiyahlala phansi babingelelane .
"Injabulo yakho saMaNcue iyatsho sibili ukuthi usebenze kuhle ." USibindi esondeza umganu wendumba eceleni kukaClement ,avele ahleke uClement.
"Namhla amadlozi akithi ahambele kimi sibili , sengithole umsebenzi edolobheni ngoMvulo nje ngiyabe ngisiyaqalisa."
"Ungitshelani saMaNcue ,ngumsebenzi onjani ?"USibindi ngenjabulo.
"Garden boy ."
"Vele yiyo imsebenzi etholakalayo leyo , kuphela nje uthola imali mntaka baba akufani ,mina engikufunayo yikubona uSandy ekhula esiya esikolo ethola konke .
Hamba mntaka baba uyesebenza , pho uSandy uzakwanisa ukuhamba laye ?"
"Eye bathe ngibuye laye ngoba ngizabe ngihlala khona ,ngizahamba laye ."
"Kuhle nxa kunjalo ,kutsho balobuntu abantu abavuma ukuthi ubuye laye , hamba mntakababa ekhaya sizasala sikhangela .
OMaSibindi bazabe behamba besiyathanyela beqoqoda lomuhla ,njalo ungafika khonale uthenge ucingo sibe sixhumana ."
"Ngiyabonga kakhulu Sibindi ngizabhala phansi inombolo zakho ,vele angisoze ngilikhohlwe empilweni yami.
Lesinkwa ngizabe ngiliphosela ebhasini ."
Bahleke .
"Futhi singajabula uyakwazi. "
Bakwejise kwaze kwabumbana ihola lesikhombisa, bahambe eselele uSandile .
Namhla ulale bayehla ubuthongo uClement phela uzizwa engathi uyethulwe umthwalo emahlombe kudala efisa ukuthola umsebenzi njengabanye .
Lithe liphuma ilanga esengenile emasimini inhloso yakhe yikukhipha konke emasimini atshiye ekubeke kuhle phela bathi elakusasa alaziwa , namhla kamhambisanga uSandile koMaZulu uphethe uyazidlalela enhlabathini .

Kusenzeka lokho izikhathi lazo azimanga zilokhe zitshovana njalo , kungeSonto ntambana uyadidizela umuzi wonke uClement uzama ukubeka izinto kuhle ukwenzela ukuthi zingasali ziwonakala esehambile .
Aqonde ecingweni ayethule impahla ahambe lazo endlini afike azigoqe azifake esikhwameni , akhangele uSandile oleleyo amoyizele aqede aqoqe konke abazahamba lakho akufake esikhwameni.
Kusenjalo kukhuleke uSibindi esangweni avele aphume endlini uClement ahlale esitubhini.
"Ndoda yamadoda ,ngethemba usulungisile konke ?"
"Sengilungisile sengikhulekela indlela kuphela nje ukuthi sihambe kuhle lendodakazi yami ."
"Lami ngiyalikhulekela , njalo lizahamba kuhle .
Ngithe ngifuza izinto laphana endlini ngahlangana londolindoli lowu engangimsebenzisa kudala , ngifakile ikhadi phakathi wena nxa usehla nje elenkini uthenge umoya ungitshayele ."
Amoyizele uClement .
"Ngiyabonga kakhulu , waze wangethula umthwalo ngiswele amagama azinkulungwane okubonga , angikwazi ukuthi ngibonge njani ? Kodwa umdali ukukhangele konke elingenzela khona ." UClement ngenjabulo .
"Nxa ngikukhangele Clement ngizibonela umfowethu wegazi , njalo lapho ujabulile lami ngiyajabula .
Sesizatholana khona ecingweni njalo ungalikhohlwa ikhaya ,lapho bekunike ilanga lokuphumula uyeqe uzehlola ."
"Ngizakwenza njalo mfowethu , ngizavuka ngitshiya ikhiye ngaphansi kwelitshe laphana ngicela liyilande ."
"Kulungile ngizadlula ngiyithatha ekuseni ,angithi lizagada ibhasi edlula kusasempondo zankomo ?"
"Yebo ."
"Kulungile umbingelele uMaNcue sizamkhumbula , kahambe sibili ayephila khonale kontuthu ziyathunqa ."
USibindi esukuma phansi bahleke , amkhiphe isango uClement.
Ulele eguqile uClement ,uthi engaphaphama akhangele isikhathi phela kasakwazi ukulinda ,kuthe kusiyabumbana ihola lesine ekuseni sebelungile kwazise ibhasi idlula ngehola lesihlanu .
Athathe isikhwama sakhe ayesibeka esangweni abuye abhabhule uSandy , avale imnyango yonke ahluthulele ayebeka ikhiye elitsheni angene indlela .
Athole unakaMpilo labanye belinde ibhasi esilindweni afike ababingelele aqede ahlale katshana labo ,baqalise ukuqhwebana babuye bahleke baze batshaye izandla .
"Uyahlanya lowu , pho uzatshona ebelethe umntwana emhlane idolobho lonke ? Ngathi azikwananga lapha khona ."
Omunye wabomama abakhangele uClement anxaphe .
Baqhubeke bemkhuluma kubi baze badubuke ngokuhleka, akhangele eceleni uClement samuntu ongezwayo.
Kungemzuzu mingaki iqhamuke ibhasi ifike ibaginye bonke ihambe .
Abanye ngabaxoxa ezemizi yabo ebhasini , abanye labo baxoxa ngokwenzakalayo emhlabeni uClement yena uthule zwi umbona ngokumoyizela ukuthi kukhona okuhle akucabangayo .
Lithe lisiyaphuma ilanga bengena emzini omkhulu wakoBulawayo ,uSandile laye usevukile uphethe ngokukhangela abantu laba abagcwele indawo yonke .
Bayehle bayehlala phansi ,kusenjalo kuqhamuke abathengisayo avele athenge umoya uClement atshayele uAnita kuqala ,uthe eqeda watshayela uSibindi baxoxa okwesikhatshana.
Kungemzuzu mingaki iqhamuke ngesivinini esikhulu imota kaAnita, athathe isikhwama sakhe athwale uSandile ayengena emoteni babingelelane .
"Uyakwazi ukubamba isikhathi Clement , kuyangijabulisa lokho. " Kususa uAnita besendleleni eya eMorningside endlini yakhe ,amoyizele uClement abuye akhangele phandle ,uhamba nje uzibukela idolobho phela wacina ukulibona mhla evela eningizimu .
Kungemzuzu bafike endlini kaAnita,ahlahle amehlo azincwebe ephinda uClement kuhle okwamagama indlu yakhona ungaze ufunge uthi kuhlala umongameli , yilezi ezilamakamelo phansi laphezulu .
Lizivulekele isango amangale uClement ,mkhulu umuzi wabo kulenkalankatha yedamu lokubhukutshela , kulendawo enhle ehlotshisiweyo ngamaluba laba abahlala khona lapho kutshiya ,utshani bakhona buhlaza tshoko inhle indawo .
Bayehle athwale uSandy aqhubeke abhodisa amehlo ,ambize ngesandla uAnita bahambe bayebhoda ngendlu bathutshele kweyinye indlu enhle ezimele yodwa .
"Nansi indlu yakho , likamelo leli ,igumbi lokuphumulela kanye lomkulu .
Uyazibonela lawe ukuthi kukhona konke umabonakude ,ingubo zigcwele phakathi lapha amakha okugeza lokugcoba .
Njalo emkulwini kukhona konke ukudla kanye lesitshebo esiqandisweni uyaziphekela njalo siyathenga thina ukudla inyanga zonke.
Ngilethemba lokuthi wena awusoze utshiye umsebenzi njengabanye ?"
"Aaah ngiyabe ngiwutshiyelani dadewethu ? Phela yikuphila njengenkosi lokhu ."
Kusenjalo kungene ixhegu eselimpunga lifike liqabule uAnita , akhamise uClement phela uAnita ubonakala emncane kulaye .
"Sa....salibonani ."
"Yebo ndodana , nguye umfana ozasisebenzela lowu sithandwa ?"
Aqekuze ikhanda uAnita.
"Ibizo lakhe ngu Clement , Clement ngumnyeni wami lowu nguMvundla isibongo. ''
"Kuhle ukubakwazi baba uMvundla ngiyajabula ukuba lapha ekhaya."
"Siyakwamukela ngilethemba lokuthi uzawenza kuhle umsebenzi wakho ." UMvundla ephuma .
"Siyaphuma kathesi , umuntu okhona lapha ekhaya ngumsizi wethu , ungaqalisa ukusebenza nxa kukhona okufunayo ungabuza yena .
Igumbi leli elilandelayo yikho lapho okuhlala khona izinto zokusebenza ." UAnita eluma indebe yomlomo abuye akhangele uClement kodwa amcitshe amehlo uClement.
"Kuthwa ngubani umntanakho ?" Esondela kuSandile aqalise ukumdlalisa .
"NguSandile ."
Amoyizele uAnita aqede adlalise indevu zika Clement aphume ahambe .

Iyaqhubeka

Yasuka yahlala