Border News Agency

မလွတ်မြောက်သေးသောရခိုင်ဒေသ၏ မြေသိမ်းကျိန်စာ - ၄

Border News Agency
မြောက်ဦး၊ဇွန် ၁။

၁၈၉၄ ခုနှစ်၊မြေသိမ်းဥပဒေအရ သတ်မှတ်ချက်မူဘောင်များ

၁၈၉၄ ခုနှစ်မြေသိမ်းဥပဒေ(The Land Acquisition Act, 1894)မှာ ဗြိတိသျှ- အိန္ဒိယကိုလိုနီနယ်များတွင် လူပါးဝရန်ရေးဆွဲခဲ့သော်လည်း ဗြိတိသျှများအနေဖြင့် လူသားဆန်ခဲ့သောအချက်များလည်းရှိခဲ့သည်။

အကယ်၍အာဏာပိုင်တရပ်သည် ၁၈၉ ၄ ခုနှစ်မြေသိမ်းဥပဒေကို ကျင့်သုံးသည်ဟုဆိုလာသည်နှင့် ထိုဥပဒေမူဘောင်ထဲကသာ ဆောင်ရွက်ရမည်ဖြစ်သည်။

ထိုဥပဒေမူဘောင်ကိုကျော်လွန်၍လုပ်ချင်သလိုလုပ်နေ၍မရတော့ပေ။

၁၈၉၄ ခုနှစ်မြေသိမ်းဥပဒေအရအာဏာပိုင်များကို ဤသို့ဘောင်ခတ်ထားပေသည်။

၁၈၉၄ခုနှစ်မြေသိမ်းဥပဒေကို ကျင့်သုံးသည်ဟုအများသိအောင်ကြေငြာသောအာဏာပိုင်တရပ်သည် မြေကို ရုတ်တရက် ထင်သလိုသိမ်းခွင့်မရှိပေ။

မြေသိမ်းလိုပါက ထိုအာဏာပိုင်အနေဖြင့် ပြုလုပ်ရမည့်အချက်များရှိနေသည်။

မြေတိုင်း၊ကန့်ကွက်လွှာခေါ်၊စိစစ်၊မြေသိမ်းအမိန့်ထုတ်၊လျှော်ကြေး

၁၈၉၄ ခုနှစ်မြေသိမ်းဥပဒေပုဒ်မ ၄ (Section 4)အရမြေတိုင်းတာစစ်ဆေးခြင်းဆိုင်ရာအမိန့်ကြော်ငြာပေးရသည်။

ပုဒ်မ၅(က)(Section 5-A)အရ အသိမ်းခံရသူဘက်မှကန့်ကွက်နိုင်ရန်အချိန်သတ်မှတ်ချက်ပေးရသည်။

ထိုကန့်ကွက်ချက်များကို စိစစ်ပြီးနောက် ပုဒ်မ ၆ အရ မြေသိမ်းရန်အမိန့်ထု တ်ပြန်ရသည်။

ပုဒ်မ(၁၁)(Section 11)အရ လျှော်ကြေးငွေပမာဏကို သတ်မှတ်ရသည်။

အတိုကောက်အားဖြင့် မြေတိုင်း၊ကန့်ကွက်လွှာခေါ်၊စိစစ်၊မြေသိမ်းအမိန့်ထုတ်၊လျှော်ကြေးဆိုသည့် အဆင့်များကို ဖြတ်သန်းရသည်။

ဤသို့လုပ်ငန်းစဉ်များကို အဆင့်လိုက် မဖြတ်သန်းဘဲ မြေတိုင်းတာမှုကြော်ငြာချိန်ကပင် လျှော်ကြေးကိစ္စအား အဆင့်ကျော်ကာ တဧကသိန်းရှစ်ဆယ်ဖြင့် လက်ဦးမှုယူသတ်မှတ်မှုသည် အညာအတာမဲ့ရာရောက်လွန်းနေသည်။

၁၈၉၄ ခုနှစ်မြေသိမ်းဥပဒေအရ သတ်မှတ်ထားသော လုပ်ငန်းစဉ်အဆင့်များကို အကွက်ကျော်ရိုက်လျှက်လူထု၏ ရပိုင်ခွင့်ကို ထိန်းချုပ်အနိုင်ကျင့်သည့် သဘောဖက်ကို ရောက်နေသည်။

ထိုသို့လုပ်ထုံးလုပ်နည်းအရလျှော်ကြေးကိစ္စအား မြေတိုင်းတာရန်ကြော်ငြာသည့်အချိန်ကပင် လက်ဦးရန်ကြိုးစားခြင်းသည် လူထု၏ရပိုင်ခွင့် ဖြစ်သော် ပုဒ် မ ၂၃ နှင့်ပုဒ်မ ၁၈ တို့အား ကြိုတင်ပိတ်ပင်မှုလည်းဖြစ်သည်။

အဘယ်ကြောင့် အာဏာပိုင်များက ထိုသို့ ပြုလုပ်ကြသနည်းဆိုသော် ၁၈၉၄ ခုနှစ်မြေသိမ်းဥပဒေအရမြေသိမ်းလိုသော်လည်း ၁၈၉၄ ခုနှစ်မြေသိမ်းဥပဒေအရပေးရမည့် လျှော်ကြေးကိုတော့ မပေးချင်၍ဖြစ်သည်။

ဥပဒေဟူသည် အပြစ်ကို ကျူးလွန်မှ ချိုးဖောက်သည်မဟုတ်၊ဤသို့အစီအစဉ်တကျလုပ်ရမည်ဟု ပြဋ္ဌာန်းထားမှု ကိုမလိုက်နာဘဲ ကွက်ကျော်လုပ်ခြင်းသည်လည်း ချိုးဖောက်ရာမြောက်နေပြီ ဖြစ်သည်။

၁၈၉၄ ခုနှစ်မြေသိမ်းဥပဒေ၏လျှော်ကြေးဆိုင်ရာမူဘောင်

၁၈၉၄ ခုနှစ်မြေသိမ်းဥပဒေ(The Land Acquisition Act, 1894)အရ မြေသိမ်းဆည်းခံရသူများအား လျော်ကြေးပေးရန်အတွက်သတ်မှတ်မှုတွင် မြေတန်ဖိုးတခုတည်းကိုသာ ကြည့်၍သတ်မှတ်ရသည်မဟုတ်ဘဲ နစ်နာမှုအမျိုးမျိုးအတွက်ပါ တွက်ချက်ပေးရသည်။

ပုဒ်မ ၂၃(Section 23)တွင် လျှော်ကြေးငွေသတ်မှတ်ရာ၌ ထည့်သွင်းစဉ်း စားရမယ့်အချက်ခြောက်ချက်ကို အတိအလင်းပြဋ္ဌာန်းထားသည်။

ပုဒ်မ ၂၃ သည်အာဏာပိုင်အဖွဲ့၏လျှော် ကြေးသတ်မှတ်ခွင်(ပုဒ်မ ၁၁)အား စိတ်ထင်သည့်အတိုင်းမဖိနှိပ်စေရန် အာဏာ ပိုင်အဖွဲ့ကို ပြန်လည်ထိန်းချုပ်ထားသော ပုဒ်မဖြစ်သည်။

ထိုပုဒ်မ ၂၃ အရ...

၁ - မြေ၏လက်ရှိကာလပေါက်ဈေး (Market Value)အတိုင်း လျှော်ကြေးပေးခြင်း၊ကာလလက်ရှိပေါက်စျေးအား သတ်မှတ်ရာတွင် ပုဒ်မ(၄)(Section -4) မြေသိမ်းဆည်းကြောင်း ပထမဆုံးအစိုးရထုတ်ပြန်သော အမိန့်ကြော်ငြာစာထွက်ပေါ်လာတဲ့နေ့တွင်ရှိနေသောအဆိုပါမြေ၏ပေါက်ဈေးကို အခြေခံတွက်ချက်ရသည်။

၂ - သီးနှံနှင့်သစ်ပင်များ ပျက်စီးဆုံးရှုံးမှုအတွက် လျှော်ကြေးပေးခြင်း၊မြေသိမ်းယူသောအချိန်တွင်အဆိုပါမြေပေါ်ရှိ စိုက်ပျိုးထားသောသီးနှံ၊သစ်ပင် သို့မဟုတ်အဆောက်အအုံရှိနေပါက အဆိုပါ အရာဝတ္ထုပစ္စည်းများအတွက် နစ်နာကြေးကိုပါ ထည့်သွင်းတွက်ချက်ရသည်။

၃ - မြေခွဲခြားခံရမှုကြောင့်နစ်နာမှု (Severance)အတွက် လျှော်ကြေးပေးခြင်း၊မိမိပိုင်ဆိုင်သော မြေကွက်ကြီးထဲကမှတစိတ်တပိုင်းကို ဖြတ်ကာ အသိမ်းခံရသောကြောင့် ကျန်ရစ်သော မြေကွက်မှာတန်ဖိုးကျဆင်းသွားမှုသို့မဟုတ်အသုံးမဝင်တော့မှုကြောင့် ပေးရသည့်နစ်နာကြေးဖြစ်သည်။

၄ - အခြားပိုင်ဆိုင်မှုများ ထိခိုက်မှုအတွက်လျှော်ကြေးပေးခြင်း၊မြေသိမ်းယူမှုကြောင့် မိမိ၏အခြားရွှေ့ပြောင်းနိုင်သောပစ္စည်း၊မရွှေ့ပြောင်းနိုင်သောပစ္စည်း သို့မဟုတ် ရပိုင်ခွင့် ဝင်ငွေတခုခု ထိခိုက်ပျက်စီးသွားပါက ပေးရမည့်နစ်နာကြေးဖြစ်သည်။

၅ - နေရာပြောင်းရွှေ့စရိတ်အတွက် လျှော်ကြေးပေးခြင်း၊မြေသိမ်းခံရမှုကြောင့် မိမိ၏နေအိမ်သို့မဟုတ် လုပ်ငန်းခွင်ကို အခြားတနေရာသို့ မဖြစ်မနေ ပြောင်းရွှေ့ရသောအခါ ကုန်ကျမည့်စရိတ်စကများအတွက် လျှော်ကြေးဖြစ်သည်။

၆ - လုပ်ငန်းအမြတ်အစွန်း လျော့နည်းမှု အတွက် လျှော်ကြေးပေးခြင်း၊နေရာပြောင်းရွှေ့ရသော အချိန်အတောအ တွ င်းတွင် မိမိလုပ်ကိုင်နေသောလုပ်ငန်းခွ င်ရပ်တန့်သွားရ၍ဝင်ငွေ/အမြတ်အစွ န်းလျော့နည်းနစ်နာမှုအတွက် ပေးရသည့်လျှော်ကြေးဖြစ်သည်။

၇ - ဆုံးရှုံးခံရန်သဘောတူညီမှုအတွက် အထူးဆုကြေး(Solatium)၁၅ ရာခိုင်နှုန်းပေးခြင်း၊ အထက်ပါအချက်များ တခုချင်းစီ တွက်ချက်ရလာသော(စုစု ပေါင်းမြေတန်ဖိုး)အပေါ်တွင် မြေအား မမြတ်နိုးဘဲလက်လွတ်ပေးရမှု (Compulsory Nature of Acquisition) အတွက် နှစ်သိမ့်မှုအနေဖြင့် နောက်ထ ပ် ၁၅ ရာခိုင်နှုန်းအား အစိုးရက အပိုဆောင်းပေါင်းထည့်ပေးရသေးသည်။

ဥပမာ - နစ်နာမှုအားလုံးအတွက် နံပါတ် ၁ မှ ၆ ထိ တွက်ချက်ရသော မြေတန်ဖိုးမှာ သိန်းတရာရှိသည်ဆိုလျှင်အတင်း အဓမ္မသိမ်းယူခံရမှုအတွက်"လက်လွတ်ပေးရန်သဘောတူမှု"အတွက် ၁၅ ရာခိုင်နှုန်းဖြစ်သော (တဆယ့်ငါးသိန်း)ထပ်ပေါင်းပြီး စုစုပေါင်းလျော်ကြေးငွေ ၁၁၅ သိန်းပေးရမည်ဖြစ်သည်။

လျော်ကြေးတွက်ချက်ရာတွင် ထည့်မတွက်ရမည့်အချက်များ

ဥပဒေပုဒ်မ ၂၄ (Section 24)အရ

- မြေသိမ်းခံရသူ၏မလိုလားအပ်သော စိတ်အနှောင့်အယှက်ဖြစ်မှု(သို့)အနာဂ တ်တွင်ရနိုင်ခြေရှိသောမှန်းဆဝင်ငွေ။

- မြေသိမ်းပြီးနောက်ပိုင်းမှ ထိုမြေပေါ်တွင်ပြုလုပ်သောအစိုးရစီမံကိန်းကြော င့် မြေတန်ဖိုးတက်လာမည့်အချက်။

- မြေသိမ်းမည်ဟု အမိန့်ထုတ်ပြန်ပြီးခါမှလျှော်ကြေးပိုရလိုသဖြင့် မြေပေါ်တွင် တမင်သက်သက်အဆောက်အအုံဆောက်ခြင်း၊ ပြင်ဆင်ခြင်းများပြုလုပ်မှု။

စသည့်အချက်များအားလျှော်ကြေးတိုးတောင်းရန် အကြောင်းပြချက်အဖြစ်အ သုံးမပြုခွင့်မရှိပေ။

၁၈၉၄ ခုနှစ်မြေသိမ်းဥပဒေအရလျှော်ကြေးဟူသည်အထက်တွင်ဖော်ပြခဲ့သောအချက်ခြောက်ချက်ဖြစ်သည့် "ကာလပေါက်ဈေး+ဖြစ်ပေါ်လာမည့် နစ်နာမှုအားလုံး+၁၅ ရာခိုင်နှုန်းနှစ်သိမ့်ကြေး"ကို ပေါင်းစပ်ပြီး ကော်လိတ္တော်အရာရှိ(Collector)ခရိုင်အုပ်ချုပ်ရေးမှူး က ကွင်းဆင်းစစ်ဆေးဆုံးဖြတ်ပေးခြ င်းဖြစ်သည်။

ပုဒ်မ ၂၃ အရ လျှော်ကြေးငွေအသေး စိတ်တွက်ချက်ပုံဥပမာ...

စီမံကိန်းတခုအတွက် ဦးအေး ပိုင်ဆိုင်သော လယ်မြေငါးဧကထဲကနှစ်ဧကအားအစိုးရမှ သိမ်းယူလိုက်သည်။

ထိုနှစ်ဧကပေါ်တွင် စပါးခင်း၊သရက်ပင်အချို့နှင့်နေအိမ်တလုံးလည်းပါနေ သည်။

အာဏာပိုင်များသည်ဦးအေးအတွက် လျှော်ကြေးကို အောက်ပါအတိုင်းသတ်မှတ်တွက်ချက်ရသည်။

(က)မြေတန်ဖိုး(Market Value)- အနီးနားက မြေအရောင်းအဝယ်စာချုပ်များ၊ကာလပေါက်ဈေးအရ တဧကကိုသိန်းငါးရာဆိုလျှင်နှစ်ဧကအတွက်=သိန်းတထောင်။

(ခ)သီးနှံနှင့်အဆောက်အအုံတန်ဖိုး- ပါသွားသောနေအိမ်တန်ဖိုး-သိန်းတထောင်၊သရက်ပင်တနှစ်အသီးထွက်နှုန်း တန်ဖိုးနှင့်အပင်၏သစ်သားတန်ဖိုး=သိန်းနှစ်ဆယ်၊စပါးခင်းထွက်နှုန်းကာလတန်ဖိုး=သိန်းလေးဆယ်)ဖြစ်၍ စုစုပေါင်း - သိန်းတရာခြောက်ဆယ်(၁၆၀)

(ဂ)မြေဖြတ်တောက်ခံရမှုနစ်နာကြေး (Severance)-ငါးဧကထဲမှနှစ်ဧက အလယ်မှဖြတ်သိမ်းလိုက်၍ကျန်ခဲ့သောသုံးဧကမှာပုံသဏ္ဍာန်ပျက်၍စိုက်ပျိုးရခက် သွား၍ကျန်မြေ၏တန်ဖိုးကျဆင်းမှု (ဥပမာ = ယခင်က တဧကသိန်းငါးရာအား ယခုအခါ သိန်းသုံးရာဖြင့် လျော့ရောင်းရမည့်အခြေအနေမျိုးရှိပါကကျ သွားသောတန်ဖိုး=သိန်းနှစ်ရာ(သုံးဧက ဆိုပါလျှင်သိန်းခြောက်ရာ(၆၀၀)

(ဃ)နေရာပြောင်းရွှေ့စရိတ်နှင့်လုပ်င န်းပျက်ပြားမှုအတွက်လျှော်ကြေး-အိမ် ပြောင်းရမည့်သယ်ယူပို့ဆောင်ခ၊လယ် ယာလုပ်ငန်းခေတ္တရပ်ဆိုင်းသွားသော နစ်နာကြေး(ဥပမာ=သိန်းသုံးဆယ်(၃၀) ။

တွက်ချက်မှု-

ရပိုင်ခွင့်အားလုံးစုစုပေါင်း = ၁၀၀၀+ ၁၆၀+ ၆၀၀+ ၃၀ = ၁၇၉၀သိန်းကျပ် နှင့်

ဥပဒေအရပေးရမည့် ၁၅ ရာခိုင်နှုန်း လက်လွတ်ခအထူးဆုကြေး(Solatium) = ၁၇၉၀ကျပ်၏ ၁၅ ရာခိုင်နှုန်း = ၂၆၈.၅ သိန်းဖြစ်၍

ဦးအေးရရှိမည့်စုစုပေါင်းလျော်ကြေး= ၁၇၉၀ သိန်း+ ၂၆၈.၅ သိန်း = ၂၀၅၈.၅ သိန်းကျပ်ဖြစ်ပါသည်။

အကယ်၍လျှော်ကြေးငွေနည်းလွန်းပါကပုဒ်မ(၁၈)(Section 18)အရ တရား ရုံးသို့လွှဲပြောင်းလျှောက်ထားရမည်ဖြစ်သည်။

မြေသိမ်းခံရသူက ကော်လိတ္တော်သတ် မှတ်ပေးသောလျှော်ကြေးငွေပမာဏအပေါ် မကျေနပ်၊(နည်းလွန်းသည်ဟု)ဆိုလျှင် မြေပိုင်ရှင်သည် ကန့်ကွက်လွှာ တင်သွင်းပေးရသည်။

ထိုလျှော်ကြေးအမိန့်ထုတ်ပြန်သောနေ့ (သို့မဟုတ်)နို့တစ်စာရသောနေ့မှစ၍ဥပဒေကသတ်မှတ်ထားသောရက်သတ္တပတ်​ခြောက်ပတ်(သို့)ခြောက်လအတွင်း ကော်လိတ္တော်ထံ"လျှော်ကြေးကိစ္စတရားရုံး(District Court)သို့ လွှဲပြောင်းစစ်ဆေးပေးရန်"ကန့်ကွက်လွှာတင်ရသည်။

တရားရုံးမှနှစ်ဖက်သက်သေများကို ပြန်ခေါ်စစ်ဆေးကာလျှော်ကြေးငွေနည်းနေပါကလျှော်ကြေးတိုးပေးရန်အမိန့်ချမှတ်နိုင်သည်။

တရားရုံးက ကော်လိတ္တော်သတ်မှတ်မှုထက် လျှော်ကြေးငွေပိုပေးဖို့ဆုံးဖြတ်ခဲ့ပါက အစိုးရက မြေကိုစတင်သိမ်းယူသောနေ့မှလျှော်ကြေးငွေအပြည့်အဝပေးချေေသောနေ့ထိ ကြားကာလအတွက် တနှစ်လျှင်ခြောက်ရာခိုင်နှုန်းတိုးငွေကိုပါ ထည့်သွင်းတွက်ချက်ပြီး မြေပိုင်ရှင်ကို ပေးရသည်။

ကော်လိတ္တော်အခတ်ခံထားရသောမူဘောင်

၁၈၉၄ ခုနှစ်မြေသိမ်းဥပဒေအရလျှော်ကြေးပေးရန်အဆင့်ဆင့်ဆောင်ရွက်ရာ တွင်အဓိကအပိုင်းသုံးပိုင်းကို ကော်လိတ္တော်လိုက်နာရသည်။

ပုဒ်မ၉ (Section 9)အရ နို့တစ်စာပေးပို့ရသည်။ မြေသိမ်းရန်အတည်ပြုသောအခါ ကော်လိတ္တော်က မြေပိုင်ရှင်များ၊ အကျိုးခံစားခွင့်ရှိသူများကို "ဘယ်နေ့၊ ဘယ်အချိန်မှာလျှော်ကြေးငွေ ဘယ်လောက်တောင်းဆိုချင်လဲ၊လာရောက်တင်ပြရန် ရက်ချိန်းနှင့်နို့တစ်စာ"ပို့ ရသည်။ထိုနောက် ကွင်းဆင်းစစ်ဆေးရသ ည်။

ထိုကော်လိတ္တော်က မြေတည်နေရာ၊အကျယ်အဝန်း၊မြေပေါ်မှာရှိအဆောက်အအုံ၊သစ်ပင်၊သီးနှံများကို ကိုယ်တိုင် သို့မဟုတ် တာဝန်ခံအဖွဲ့ဖြင့် ကွင်းဆင်း စာရင်းကောက်ရသည်။

ထိုနောက် ပုဒ်မ(၁၁)(Section 11)အရလျှော်ကြေးအမိန့်ချမှတ်ခြင်း (Collector's Award )ကို လုပ်ရသည်။

ထိုသို့လုပ်သည့်အခါ နှစ်ဖက်တင်ပြချက်များ၊ကာလပေါက်ဈေးများကို စိစစ်ကာ ကော်လိတ္တော်က"ဒီမြေကွက်အတွ က် စုစုပေါင်းလျှော်ကြေးငွေဘယ်လောက်ပေးမည်"ဆိုသော အတည်ပြုအမိန့် (Collector's Award)ကို ထုတ်ပြန်ရသည်။

ထိုသို့အမိန့်ထုတ်ရန် အထက်တွင်ဖော်ပြခဲ့သောလျှော်ကြေးတွက်ချက်မှုပုဒ်မ (၂၃)ကို ကော်လိတ္တော်လိုက်နာရသည်။

၎င်း၏အမိန့်ကို မြေသိမ်းခံရသူက မကြေနပ်ပါက ကော်လိတ္တော်ကိုယ်တိုင် တရားရုံးကို မြေသိမ်းခံရသူကိုယ်စားအမှုတင်ပေးရသည်။

အရေးပေါ်အခြေအနေတွင်မြေသိမ်းခြင်း(Section 17 - Urgency Clause)

၁၈၉၄ ခုနှစ်မြေသိမ်းဥပဒေအရပုံမှန်ဆိုလျှင် အထက်တွင်ဖော်ပြခဲ့သောအ ဆင့်များအကုန်ပြီးမှ မြေကိုအစိုးရက လက်ရောက်ရယူခွင့်ရှိသည်။

သို့ရာတွင် ရေကြီး၊ကမ်းပြို၊အခြေခံအ ဆောက်အအုံများ အရေးပေါ်ပြင်ရန် လိုအပ်နေသော"အလွန်အရေးကြီးသောအခြေအနေ"မျိုးတွင်...

အစိုးရက ကြေညာချက်ထုတ်ပြီး ၁၅ ရက်အကြာတွင် လျှော်ကြေးအပြီးအပြ တ်မသတ်မှတ်ရသေးခင် မြေကို အရင်ဝင်သိမ်းခွင့်ပြုထားသည်။

ထိုသို့သိမ်းပါကယာယီအားဖြင့် တွက်ချက်ထားသောလျှော်ကြေးငွေ၏ရှစ်ဆယ်ရာခိုင်နှုန်းအားမြေပိုင်ရှင်ထံချက်ချင်း ကြိုတင်ထုတ်ပေးရရန် ပြဋ္ဌာန်းထားသည်။

ပြီးမှသာလျှင် လျှော်ကြေးကိစ္စ ဆက်ရှင်းရသည်။

တခုသောအချိန်တုန်းက စျေးဝယ်လျှင်တောင် သေနတ်ကိုင်ပြီး စျေးမဆစ်ရန် အောက်ခြေကိုညွှန်ကြားခဲ့ဖူးသောအဖွဲ့အစည်းသည် ယခုမူကား တဧကကိုသိန်းငါးရာပေါက်နေသောမြေအား သိန်းရှစ်ဆယ်သာပေးနေကြလေပြီ.....။

ဆက်ရန်...

Website - https://burmese.bnanews.net/articles/33189/

#မြေသိမ်းဥပဒေ #ဗြိတိသျှ #အိန္ဒိယ #ကိုလိုနီ

မင်းအောင်လှိုင်နဲ့ အိန္ဒိယဝန်ကြီးချုပ် မိုဒီ နယူးဒေလီမှာ တွေ့ဆုံဆွေးနွေး (ဓာတ်ပုံသတင်း)

Border News Agency
အိန္ဒိယ၊​ဇွန် ၁။

​အိန္ဒိယနိုင်ငံကိုရောက်ရှိနေတဲ့ အာဏာသိမ်းစစ်ခေါင်းဆောင်မင်းအောင်လှိုင်ဟာ အိန္ဒိယဝန်ကြီးချုပ်နာရန်ဒရာမိုဒီနဲ့ ဇွန်လ ၁ ရက်၊ဒီနေ့ မနက်ပိုင်းကနယူးဒေလီမြို့ရှိ ဝန်ကြီးချုပ်ရုံးမှာ သီးသန့်တွေ့ဆုံဆွေးနွေးခဲ့တယ်လို့ အာဏာသိမ်းစစ်က ထုတ်ပြန်ထားပါတယ်။

​အဲဒီဆွေးနွေးပွဲကို မင်းအောင်လှိုင်နဲ့အတူ ပြည်ထောင်စုဝန်ကြီးတွေဖြစ်ကြတဲ့ ဦးခင်မောင်ရီ၊ဦးတင်မောင်ဆွေ၊ ဒေါက်တာကံဇော်နဲ့ တာဝန်ရှိသူတွေ တက်ရောက်ခဲ့ကြသလို အိန္ဒိယဝန်ကြီးချုပ်မိုဒီနဲ့အတူ အစိုးရအဖွဲ့ တာဝန်ရှိသူတွေလည်း တက်ရောက်ခဲ့ကြပါတယ်။

​နှစ်ဦးတည်း သီးသန့်တွေ့ဆုံဆွေးနွေးမှုအပြီးမှာတော့ မင်းအောင်လှိုင်နဲ့ အိန္ဒိယဝန်ကြီးချုပ် မိုဒီတို့ဟာ နှစ်နိုင်ငံတွေ့ဆုံဆွေးနွေးပွဲနဲ့ ပူးတွဲသတင်းစာရှင်းလင်းပွဲတွေကို ဆက်လက်ကျင်းပဖို့ ရှိနေတယ်လို့လည်းဆိုပါတယ်။

​မင်းအောင်လှိုင်ရဲ့ ခုအိန္ဒိယခရီးစဉ်ဟာ အိန္ဒိယဝန်ကြီးချုပ် မိုဒီရဲ့ ဖိတ်ကြားချက်အရ မေလ ၃၀ ရက်နေ့ကတည်းက စတင်ရောက်ရှိနေတာဖြစ်ပြီး အိန္ဒိယအစိုးရဘက်က သူ့ကို မြန်မာနိုင်ငံတော်သမ္မတလို့ သုံးနှုန်းဖော်ပြခဲ့မှုအပေါ် မြန်မာ့ဒီမိုကရေစီအင်အားစုတွေ (SIF) ဘက်ကကန့်ကွက်ရှုတ်ချနေကြပါတယ်။

ဓာတ်ပုံ - အာဏာသိမ်းစစ်တပ်

Website - https://burmese.bnanews.net/news/33178/

#​အိန္ဒိယနိုင်ငံ #မင်းအောင်လှိုင် #နယူးဒေလီ

စိမ်းလန်းသော အာရက္ခပြည်စီမံကိန်း လက်ကမ်းစာစောင်တွေအာရက္ခအစိုးရ ဖြန့်ဝေ

Border News Agency
မြောက်ဦး၊ဇွန် ၁။

​အာရက္ခပြည်တခုလုံးမှာ ဖြစ်ပေါ်နေတဲ့ သဘာဝပတ်ဝန်းကျင်ပျက်စီးမှုနဲ့ သစ်တောပြုန်းတီးမှုတွေကို ကိုင်တွယ်ဖြေရှင်းဖို့အတွက် ပြည်သူလူထုတရပ်လုံး အပင်စိုက်ပျိုးရေးလှုပ်ရှားမှုတွေမှာ တက်ကြွစွာ ပူးပေါင်းပါဝင်ကြဖို့ အာရက္ခပြည်သူ့တော်လှန်ရေးအစိုးရက တောင်းဆိုလိုက်ပါတယ်။

​အဲဒီတောင်းဆိုချက်ကို “Green Arakkha စိမ်းလန်းသော အာရက္ခပြည်စီမံကိန်း”လက်ကမ်းစာစောင်တွေအဖြစ် ဇွန်လ ၁ ရက်နေ့ကစပြီး အာရက္ခပြည်အနှံ့ ဖြန့်ဝေနေပါတယ်။

အဲ​ဒီစီမံကိန်းဟာ ပြည်သူတဦးချင်းစီအနေနဲ့ မိုးရာသီအပင်စိုက်ပျိုးရေးမှာ ပါဝင်အားဖြည့်ပြီး ဒေသတွင်းသဘာဝပတ်ဝန်းကျင်ပြဿနာတွေနဲ့ စွမ်းအင်လိုအပ်ချက်တွေကို ကိုင်တွယ်ဖြေရှင်းနိုင်ဖို့ရည်ရွယ်တာဖြစ်ပါတယ်။

​လက်ကမ်းစာစောင်မှာတော့ ဂေဟစနစ်ပြန်လည်ထူထောင်ဖို့၊ ဒေသအကျိုးပြုသစ်ပင်စိုက်ပျိုးဖို့နဲ့ လူမှုအသိုက်အဝန်းအကြား သဘာဝပတ်ဝန်းကျင်ဆိုင်ရာ တာဝန်ယူမှုရှိလာစေဖို့အတွက် ပြည်သူတွေရဲ့ စည်းလုံးညီညွတ်မှုက အလွန်လိုအပ်နေတယ်လို့ ဆိုပါတယ်။

​မိုးရာသီဟာ ရာသီဥတုပြောင်းလဲမှုရဲ့ ဆိုးကျိုးတွေကို လျော့ကျစေဖို့နဲ့ အနာဂတ်မျိုးဆက်သစ်တွေအတွက် သဘာဝအရင်းအမြစ်တွေ ထိန်းသိမ်းနိုင်ဖို့ သစ်ပင်စိုက်ပျိုးရမယ့် အကောင်းဆုံးအချိန်အခါဖြစ်တယ်လို့ ဆိုပါတယ်။

အဲ​ဒါကြောင့် အာရက္ခပြည်သူတွေအနေနဲ့ မိမိတို့အိမ်အဝန်းကျင်၊ လမ်းဘေး၊ ကျောင်း၊ ရုံးနဲ့ လူထုအခြေပြုနေရာတွေမှာ စုပေါင်းအပင်စိုက်ပျိုးကြဖို့နဲ့ စိုက်ပြီးအပင်တွေကို စနစ်တကျ ပြုစုပျိုးထောင်သွားကြဖို့ အာရက္ခအစိုးရက တိုက်တွန်းနှိုးဆော်ထားပါတယ်။

ဓာတ်ပုံ - APM

Website - https://burmese.bnanews.net/news/33174/

#​အာရက္ခပြည် #သဘာဝပတ်ဝန်းကျင် #သစ်တောပြုန်းတီးမှု

သင်္ဘောလှရွာကြောင့် စိတ်ဝမ်းမကွဲကြဖို့ သက္ကမလူမျိုးရေးရာကော်မတီ တောင်းဆို

Border News Agency
မောင်တော၊​ဇွန် ၁။

အာရက္ခတပ်တော်(AA)ထိန်းချုပ်ထားတဲ့ ​မောင်တောမြို့နယ်၊သင်္ဘောလှရွာမှဖြစ်စဉ်ကြောင့် စိတ်ဝမ်းကွဲတာမျိုးမရှိကြဘဲ အချင်းချင်းစည်းလုံးညီညွတ်စွာ နေထိုင်ကြဖို့ မောင်တောခရိုင်သက္ကမလူမျိုးရေးရာကော်မတီကမေလ ၃၁ ရက်နေ့တောင်းဆိုလိုက်ပါတယ်။

​ပြီးခဲ့တဲ့မေလ ၂၃ ရက်နေ့က အာရက္ခပြည်သူ့တော်လှန်ရေးအစိုးရရဲ့တာဝန်ရှိသူတွေဟာ အမျိုးသားကာကွယ်ရေးဆိုင်ရာအရေးပေါ်ပြဋ္ဌာန်းချက် (NDEP)နဲ့ပတ်သက်လို့ ရှင်းလင်းပြောကြားဖို့ သင်္ဘောလှရွာကို သွားရောက်ခဲ့တာဖြစ်တယ်လို့ ဆိုပါတယ်။

ဒါပေမယ့် အာရက္ခပြည်သူ့တော်လှန်ရေးအစိုးရတာဝန်ရှိသူတွေ မရောက်ခင်က အစီအစဉ်ကို ဆန့်ကျင်ဖို့အတွက် ရွာသားတချို့ဖြစ်ကြတဲ့ ဦးအောင်ကျော်စိန်၊ဦးမောင်ထွန်းစိန်၊ဦးမြင့်မောင်၊ဦးစိန်ထွန်းကျော်နဲ့ လက်ရှိထွက်ပြေးတိမ်းရှောင်နေတဲ့သီလာဇောက ဦးဆောင်ပြီးဆုတောင်းပွဲပြုလုပ်တာ၊လက်နက်ကိုင်ဆောင်ကာ ခြိမ်းခြောက်တာစတဲ့ ကြိုတင်လှုံ့ဆော်မှုတွေ လုပ်ဆောင်ခဲ့ကြတာကြောင့် တည်ငြိမ်အေးချမ်းမှုမပျက်ပြားစေဖို့ သူတို့ကို ဖမ်းဆီးထိန်းသိမ်းခဲ့ရတာလို့ ဆိုပါတယ်။

​အာရက္ခပြည်သူ့တော်လှန်ရေးအစိုးရရဲ့ ဌာနဆိုင်ရာတွေနဲ့ ကော်မတီဝင်တွေက ရွာသူရွာသားတွေနဲ့တွေ့ဆုံပြီးအခြေအနေတွေ ပြန်လည်တည်ငြိမ်အောင်ဖြေရှင်းပေးနေသလို ရွာရဲ့အခြေအနေဟာလည်း ပုံမှန်အတိုင်းပြန်ဖြစ်နေပြီလို့ ဆိုပါတယ်။

​အဲဒီအပြင် မြေပြင်အခြေအနေမှန်ကို သေချာမသိဘဲ အဝေးရောက်သက္ကမအဖွဲ့အစည်းအချို့နဲ့ ဆရာတော်အချို့က အာရက္ခအစိုးရအပေါ် တဖက်သတ်စွပ်စွဲချက်တွေ ထုတ်ပြန်နေတာဟာ ပြဿနာကို ဖြေရှင်းရာမှာအထောက်အကူမပြုတဲ့အပြင် ရခိုင်နဲ့သက္ကမလူမျိုးစုအကြား ငြိမ်းချမ်းစွာ အတူယှဉ်တွဲနေ ထိုင်ရေးကို ထိခိုက်စေနိုင်တာကြောင့် အသုံးချခံရမှုမျိုးမဖြစ်အောင် အထူးသတိထားကြဖို့လည်း ထောက်ပြထားပါတယ်။

​သက္ကမလူမျိုးရေးရာကော်မတီအနေနဲ့ သက္ကမပြည်သူတွေအားလုံး စိတ်ဝမ်းမကွဲကြဖို့ တိုက်တွန်းထားပြီး တော်လှန်ရေးအပြီးသတ်အောင်ပွဲရရှိရေးနဲ့ တိုင်းပြည်ပြန်လည်တည်ဆောက်ရေးကဏ္ဍအသီးသီးမှာလည်း စိတ်ဓာတ်အပြည့်နဲ့တက်ညီလက်ညီ ပူးပေါင်းပါဝင်ဆောင်ရွက်ကြဖို့ နှိုးဆော်ထားပါတယ်။

အဲဒီမောင်တောမြို့နယ်၊သင်္ဘောလှကျေးရွာသားတွေကို အာရက္ခတပ်တော်က အတင်းအဓမ္မစစ်မှုထမ်းခေါ်ဆောင်နေသလို ကျေးရွာသားတရာနီးပါးကိုလည်းဖမ်းဆီးခေါ်ဆောင်သွားတယ်လို့ချက္ကမအဖွဲ့အစည်းတဆယ့်နှစ်ဖွဲ့ထုတ်ပြန်ထားပါတယ်။

Website - https://burmese.bnanews.net/news/33170/

#အာရက္ခတပ်တော် #မောင်တောမြို့နယ် #သင်္ဘောလှရွာ #သက္ကမ

အိန္ဒိယအမျိုးသားလုံခြုံရေးအကြံပေးနဲ့ မင်းအောင်လှိုင်တွေ့ (ဓာတ်ပုံသတင်း)

Border News Agency
အိန္ဒိယ၊​ဇွန် ၁။

​အိန္ဒိယနိုင်ငံကိုရောက်ရှိနေတဲ့ အာဏာသိမ်းစစ်ခေါင်းဆောင်မင်းအောင်လှိုင်နဲ့ အိန္ဒိယနိုင်ငံ အမျိုးသားလုံခြုံရေးဆိုင်ရာအကြံပေးပုဂ္ဂိုလ် Mr. Ajit Doval တို့ဟာ မေလ ၃၁ ရက်နေ့က တွေ့ပြီး နှစ်နိုင်ငံနယ်စပ်လုံခြုံရေးနဲ့တည်ငြိမ်အေးချမ်းရေးဆွေးနွေးခဲ့ကြပါတယ်။

​အဲဒီနှစ်နိုင်ငံအကြား ချစ်ကြည်ရင်းနှီးမှုနဲ့ ပူးပေါင်းဆောင်ရွက်မှုတွေမြှင့်တင်ရေး၊နယ်စပ်ဒေသလုံခြုံရေးအပြင်က ဏ္ဍပေါင်းစုံမှာ ဆက်ပူးပေါင်းဆောင်ရွက်မယ့်အခြေအနေတွေကို ဆွေးနွေးခဲ့ကြတာပါ။

အဲဒီတွေ့ဆုံပွဲကို မင်းအောင်လှိုင်နဲ့အတူ ပြည်ထောင်စုဝန်ကြီးတွေဖြစ်ကြတဲ့ ဦးခင်မောင်ရီ၊ ဦးတင်မောင်ဆွေနဲ့ အိန္ဒိယနိုင်ငံဆိုင်ရာ မြန်မာသံအမတ်တို့ တက်ရောက်ခဲ့ကြပါတယ်။

အဲဒီအပြင်အိန္ဒိယကလည်း မြန်မာနိုင်ငံဆိုင်ရာ အိန္ဒိယသံအမတ်ကြီး Mr. Abhay Thakur နဲ့ တာဝန်ရှိသူတွေ တက်ရောက်ခဲ့ကြပါတယ်။

​စစ်အာဏာသိမ်းပြီးနောက် မင်းအောင်လှိုင်ရဲ့ အိန္ဒိယခရီးစဉ်ကို အိန္ဒိယအစိုးရက မြန်မာနိုင်ငံတော်သမ္မတလို့ သုံးနှုန်းဖော်ပြခဲ့မှုအပေါ် မြန်မာ့ဒီမိုကရေစီအင်အားစုတွေနဲ့ တိုင်းရင်းသားအဖွဲ့အစည်းတွေ (SIF) ကန့်ကွက်ရှုတ်ချထားကြပါတယ်။

Photo - Popular News

Website - https://burmese.bnanews.net/news/33162/

#​အိန္ဒိယနိုင်ငံ #အိန္ဒိယ #နယ်စပ်လုံခြုံရေး

မြေယာ၊ပဋိပက္ခနှင့်ကုလသမဂ္ဂ - ၈

Border News Agency
မြောက်ဦး၊ဇွန် ၁။

ကုလသမဂ္ဂအထွေထွေအတွင်းရေးမှူးချုပ်၏မြေနှင့်ပဋိပက္ခဆိုင်ရာလမ်းညွှန်ချက်မှတ်စု။

ခ.၂။မြေယာကဏ္ဍနှင့်ပဋိပက္ခအပေါ် ကုလသမဂ္ဂအကြီးတန်းအရာရှိများ၏ ဦးဆောင်စေ့စပ်ဖြေရှင်းမှု။

တာဝန်ခံမှုကျယ်ပြန့်သောကုလသမဂ္ဂယန္တရားများနှင့်ချိတ်ဆက်ကာမြေယာကဏ္ဍနှင့်ပဋိပက္ခပေါ်တွင် ကုလသမဂ္ဂ၏အကြီးတန်းအရာရှိများက စေ့စပ်ညှိ နှိုင်းဆောင်ရွက်ရမည်ဖြစ်သည်။

ထိုသို့ စေ့စပ်ဆောင်ရွက်နိုင်သောအကြီးတန်းအရာရှိများထဲတွင်အတွင်း ရေးမှူးချုပ်၏အထူးကိုယ်စားလှယ်များ၊အထူးကိုယ်စားလှယ်၏လက် ထောက်ကိုယ်စားလှယ်များ၊ဌာနေညှိနှိုင်းရေးမှူးများ၊လူသားချင်းစာနာမှုဆိုင်ရာညှိနှိုင်းရေးမှူးများပါဝင်သည်။

ထိုသို့ဆောင်ရွက်ရာတွင်မြေယာကဏ္ဍနှင့်ပဋိပက္ခအပေါ် ကုလသမဂ္ဂ၏မဏ္ဍိုင်သုံးရပ်ဖြင့်ချဉ်းကပ်ကာဆောင်ရွက်ရမည်ဖြစ်သည်။

မြေယာကဏ္ဍနှင့်ပဋိပက္ခကိစ္စရပ်များသည် ပဋိပက္ခချုပ်ငြိမ်းရေးအစီအမံများနှင့်အထူးတလည်နိုင်ငံရေးလုပ်ငန်းစဉ်များတွင်လည်းပါဝင်ရမည်ဖြစ် သည်။

ထိုအပြင် ငြိမ်းချမ်းရေးကတိကဝတ်များနှင့်အကောင်အထည်ဖော်မှုတွင်လည်းပါဝင်ရမည်ဖြစ်သည်။

ကုလသမဂ္ဂလုံခြုံရေးကောင်စီဆုံးဖြတ်မှုတွင် အရေးပါသောကဏ္ဍတခုအဖြစ်ပါဝင်ရမည်ဖြစ်သည်။

မြေယာကဏ္ဍနှင့်ပဋိပက္ခများမှာ ဆက် စပ်နေခြင်းကို ရှင်းလင်းစွာအသိအမှတ်ပြုခြင်း၊ရှင်းလင်းစွာတာဝန်ယူခြင်းများသည် အရေးကြီးလှသည်။

ထိုအချက်သည် ငြိမ်းချမ်းရေးနှင့်လုံခြုံရေးကိုစဉ်းစားရာတွင်လည်းကောင်း၊လူ့အခွင့်အရေးနှင့်ဖွံ့ဖြိုးတိုးတက်မှုကို ဦးစားပေးရာတွင်လည်းကောင်း အရေးပါနေသောအချက်ဖြစ်သည်။

ထို့ပြင် မြေယာပြုပြင်ပြောင်းလဲမှုများတွင် တရားဥပဒေစိုးမိုးရေးအတွက် ဝင်ရောက်စွက်ဖက်ရာတွင်လည်းကောင်း၊ လူမှုအသိုင်းအဝန်းကြားထဲမှ မြေယာနှ င့်သက်ဆိုင်သောပဋိပက္ခများကို ကြားဝင်ညှိနှိုင်းပေးရာတွင်လည်းကောင်းထို အချက်သည်အရေးကြီးလှသည်။

၎င်းအပြင် ထိုအချက်သည် သဘာဝသယံဇာတများတရားလက်လွတ်ထုတ်ယူမှုနှင့်လက်နက်ကိုင်အဖွဲ့များကြားတွင်ဆက်စပ်နေမှုကိုချဉ်းကပ်ရာတွင်လည်းကောင်း၊ထိုဆက်စပ်မှုကြောင့်ဖြစ်လာသော ရာဇဝတ်မှုများကို တရားဥပဒေကြောင်းအရ ပြန်လည်ချဉ်းကပ်ရာတွင်လည်းကောင်း အရေးကြီးပေသည်။

မြေယာကဏ္ဍနှင့်ပဋိပက္ခနယ်ပယ်အပေါ်ကျွမ်းကျင်သူပညာရှင်များအနေဖြင့်ကုလသမဂ္ဂအကြီးတန်းအရာရှိများကို အကူအညီပေးနိုင်ရန် ကုလသမဂ္ဂ၏ယန္တရားများတွင် စီစဉ်ဆောင်ရွက်ထားရမည်ဖြစ်သည်။

အဆိုပါပညာရှင်များ၏ ပါဝင်ပတ်သက်မှုသည် ကုလသမဂ္ဂအကြီးတန်းအရာရှိများ၏ငြိမ်းချမ်းရေးဆောင်ရွက်မှုအပေါ်တွင် အထောက်အကူဖြစ်သကဲ့ သို့ ကုလသမဂ္ဂ၏နိုင်ငံအတွင်းလုပ်ငန်းအုပ်စုများ(UN Country Teams- UNCTs)များအတွက်လည်းအထောက်အကူဖြစ်စေမည်ဖြစ်သည်။

ခ.၃။လူမှုစီးပွားအရအမှီအခိုပြုနေရ သောမြေယာများနှင့်ပတ်သက်၍အချက်အလက်ကောက်ယူခြင်းနှင့်စီမံဆောင်ရွက်ခြင်း။

လူမှုစီးပွားအရအမှီအခိုပြုနေရသော မြေယာများနှင့်ပတ်သက်၍ကုလသမဂ္ဂမှစေ့စပ်မှုဖြင့် ရေးဆွဲထားသောပူးတွဲ တာဝန်ယူနိုင်မှုအစီအမံ(Joint Programming)နှင့်အခြေအနေ၏လိုအ ပ်ချက်အလိုက် စီမံကိန်းများရေးဆွဲမှု (Transition planning)များမည်သည့်အချိန်တွင်မဆိုရှိနေသင့်ပေသည်။

လူမှုစီးပွားအရအမှီအခိုပြုနေရသော မြေယာများ(Incorporate Land)အား အချက်အလက်ကောက်ယူခြင်းနှင့်ထိုမြေများအားစီမံဆောင်ရွက်ခြင်းများမှာ အချိန်တိုင်းအရေးပါနေသည်။

အချက်အလက်ကောက်ယူခြင်းနှင့်အစီအမံများရေးဆွဲမှုတွင်ပါဝင်ရမည့်အချက်များတွင် မြေနှင့်ပတ်သက်၍အမျိုးသမီးများအပေါ်ရှူမြင်ထားမှုများအသေးစိတ်ပါဝင်သင့်သည်။

မြေယာပိုင်ဆိုင်မှု၊လက်ရှိထားပိုင်ခွင့်၊ထိန်းသိမ်းစီမံခွင့်၊အမွေဆက်ခံခွင့်၊ကွာရှင်းမှု၊သေဆုံးမှုဖြစ်လာသောအခါ မိသားစုအလိုကျကျင့်သုံးနေသည့်စည်းမျဥ်းများစသည့်အချက်များတွင် အမျိုးသမီးများအား မည်သို့ရှုမြင်သည်ကို သိရှိရန်လိုသည်။

ထို့အတူအရွယ်မရောက်သေးသူလူငယ်များအပေါ် ကလေးဘဝမြေယာအမွှေဆပ်ခံခွင့်ပုံစံများအပေါ် ရှူမြင်မှုများကိုလည်း သိရှိရန်လိုအပ်သည်။

လူငယ်များအတွက် မြေကိုအခြေပြုရသည့်အမျိုးမျိုးသောအသက်မွေးဝမ်းကျောင်းရှင်သန်မှုပုံစံများကိုလည်း မ ည်သို့ရှု့မြင်သည်ကို သိရှိထားရန်လိုအပ်သည်။

ခ.၄။ကုလသမဂ္ဂယန္တရားများ၊ပူးတွဲအ စီအစဉ်များနှင့်ဘဏ္ဍာရေးဆိုင်ရာလုပ်ငန်းစဉ်များတွင်"မြေယာ"ကိစ္စရပ်အား ထည့်သွင်းခြင်း။

မြေယာနှင့်ပတ်သက်သောသဘော ထားများမှာကုလသမဂ္ဂယန္တရားများ၏ လုပ်ငန်းအစီအစဉ်များအပေါ်လွမ်းခြုံသုံးသပ်မှု(Horizon Scanning)တွင်လ ည်းကောင်း၊နှိုးဆော်အသိပေးမှုများတွင်လည်းကောင်း ရှိနေရမည်ဖြစ်သည်။

ဌာနေလူမျိုးစုများ၊လူနည်းစုများ၊နိုင်ငံတွင်းသို့ ဝင်ရောက်လာသူများ၊ဒုက္ခသည်များ၊ပြည်တွင်းနေရပ်စွန့်ခွာရသူများ၊နိုင်ငံမဲ့များ၏အခြေအနေနှင့်ပိုင်နက်နယ်မြေမှနှင်ထုတ်ခံရမှုများ၊အိုး အိမ်လုံလောက်မှုအခွင့်အရေးကို ချိုးဖောက်မှုများစသည့်အချက်များအပေါ်ခြိုငုံသုံးသပ်မှုနှင့်နှိုးဆော်အသိပေးမှုများမှာ ကုလသမဂ္ဂ၏ယန္တရားများတွင် ရှိနေရမည်ဖြစ်သည်။

ထိုသို့ဆောင်ရွက်ရာတွင် ကုလသမဂ္ဂ၏ မဟာဗျူဟာများကို ပေါင်းစပ်မှုမူဘော င်(ISF- Integrated Strategic Framework)နှင့်ဖွံ့ဖြိုးတိုးတက်မှုအထောက်အကူပေးရေးမူဘောင် (UNDAF- UN Development Assistance Framework )များကိုလည်း အသုံးချနိုင်ပေသည်။

ထိုမူဘောင်များသည် နိုင်ငံအဆင့်မြေနှင့်ပဋိပက္ခအား ကိုင်တွယ်ရာတွင် ဟန်ချက်ညီစေရန် အထောက်အကူပေးပေသည်။

ထိုပြင်မြေယာနှင့်ပတ်သက်၍ဝင်ရောက်စွက်ဖက်ရန်အစီအမံများရေးဆွဲရခြ င်း၊ဝင်ရောက်စွက်ဖက်ရန် ဆော်ဩပေးရခြင်းများရှိလာသော အခါတွင်ထိုမူဘောင်များက ကုလသမဂ္ဂ၏မဏ္ဍိုင်သုံးရပ်အပေါ် အသီးသီးခွဲဝေတာဝန်ယူမှုကိုလည်း သေချာစေနိုင်သည်။

ကုလသမဂ္ဂ၏နိုင်ငံအတွင်း လုပ်ငန်းအ ဖွဲ့များ(UNCTs)များနှင့်ကုလသမဂ္ဂငြိမ်းချမ်းရေးဆောင်ရွက်မှု(UN Peace Operations)များကို ထိရောက်သောအ ပံ့အပိုးများဖြစ်စေရန် အစီအမံများကို တည်ဆောက်ရမည်ဖြစ်သည်။

ကုလသမဂ္ဂ၏တရားဥပဒေစိုးမိုးရေးဆိုင်ရာကမ္ဘာလုံးဆိုင်ရာဘုံအချက်များ(GFP-Global Focal Pount For the Rule of Law)နှင့်ငြိမ်းချမ်းရေးနှင့်ဖွံဖြိုးရေးဆိုင်ရာအကြံပေးများ(PDAs)က မြေယာကိစ္စများအပေါ် အာရုံစိုက်မှုရှိပေသည်။

ထိုသို့အလေးထားမှုက နိုင်ငံအဆင့်ပဋိ ပက္ခမဖြစ်စေရန်ကြိုတင်ကာကွယ်မှုကို အထောက်အကူပြုနေမည်ဖြစ်သည်။

ထို့ပြင်ကုလသမဂ္ဂ၏(GFP)နှင့်(PDAs) များက ပဋိပက္ခအပေါ် ခွဲခြမ်းစိတ်ဖြာနိုင်ပြီး နိုင်ငံအဆင့်ငြိမ်းချမ်းရေး၊ညှိနှိုင်းမှုများနှင့်ဆွေးနွေးမှုစသည့်ကိစ္စရပ်များအား ပုံဖော်နေသူများကိုလည်း အထောက်အကူပြုနေမည်ဖြစ်သည်။

မြေနှင့်ပဋိပက္ခအပေါ် ချဉ်းကပ်မှုတွင် လူသားချင်းစာနာမှုအုပ်စုများ (Humanitarian Clusters)မှ ဦးတည်ချဉ်းကပ်မှုများကို အထောက်အပံ့ပြုရမည်ဖြစ်သည်။

အကာအကွယ်ပေးမှုများ၊လုံခြုံစေမှုများ၊စောစီးစွာပြန်လည်လူသားချင်းစာနာမှုအုပ်စုများ၏ကုစားမှု(ER-Early Recovery)နှင့်စားနပ်ရိက္ခာအထောက်အပံ့ပေးသောအစုအဖွဲ့များ၏မြေနှင့် ပဋိပက္ခအပေါ်ဦးတည်ချဥ်းကပ်မှုများသည် အရေးပါနေသည်။

ထိုအုပ်စုများ၏ချဉ်းကပ်မှုများသည် မြေနှင့်ပတ်သက်၍အခွင့်အရေးချိုးဖောက်မှုများ၊နေရာပြောင်းရွေ့ရမှုများရှေ့ဆက်မဖြစ်ပွားလာစေရန်အကာအ ကွယ်ဖြစ်စေသည်။

နိုင်ငံအဆင့်ညှိနှိုင်းရေးကိစ္စရပ်များတွင်မြေယာနှင့်သက်ဆိုင်သောပညာရှင်များလည်းပါဝင်ရမည်ဖြစ်သည်။

ထိုပညာရှင်များပါဝင်မှုရှိပြီး အသင့်အနေအထားတွင်ရှိသော ညှိနှိုင်းရေးအဖွဲ့ (Standby Mediation Team)များ၊အတွင်းစည်းမှညှိနှိုင်းရေးလုပ်ငန်း (Insider Mediation Work)များစသည့် ယန္တရားများ၏လုပ်ပိုင်ခွင့်များကိုလည်း ခိုင်မာစေရမည်ဖြစ်သည်။

မြေယာကိစ္စရပ်နှင့်ပတ်သက်၍ သီးသန့်ဦးတည်ချက်အရပင်ဖြစ်စေ၊သီးသန့်ဦးတည်ချက်အရမဟုတ်သည်ဖြစ်စေကု လသမဂ္ဂ၏ဘဏ္ဍာရေးထောက်ပံမှုမှာ အချိန်နှင့်အမျှလိုအပ်ချက်ရှိနေသည်။

ငြိမ်းချမ်းရေးတည်ဆောက်မှုနှင့်တည် ငြိမ်ရေးအကောင်အထည်ဖော်မှုများတွင် မြေနှင့်ဆိုင်သောကိစ္စရပ်များအတွက် ဘဏ္ဍာငွေ မည်မျှသုံးစွဲမည်ကို အကဲဖြတ်မှုအား အထောက်အပံ့ပေးရန်လိုအပ်သည်။

ငြိမ်းချမ်းရေးတည်ဆောက်မှုရံပုံငွေ၊ယုံကြည်မှုတည်ဆောက်ရေးအတွက် သုံးစွဲရသောရံပုံငွေကဲ့သို့ဘဏ္ဍာရေးယန္တရားများတွင် ငွေကြေးထည့်ဝင်မှုကို သေချာစေရန်လိုအပ်သည်။ကျွမ်းကျင်သူပညာရှင်များအတွက် အထောက်အပံ့များ အချိန်မီရရှိရန်လည်း အရေးကြီးလှပေသည်။

ဆက်လက်ဖော်ပြပါမည်။

Website - https://burmese.bnanews.net/articles/33159/

#ကုလသမဂ္ဂ #မြေ #ပဋိပက္ခ #ဘဏ္ဍာရေး

နမ့်ခမ်းပေါက်ကွဲမှုမှာ သေဆုံးသူ ၅၅ ဦးအထိ ရှိလာပြီးဒဏ်ရာရသူ ၈၀ ကျော်ရှိနေ (ဓာတ်ပုံသတင်း)

Border News Agency
နမ့်ခမ်း၊​ဇွန် ၁။

​ရှမ်းပြည်မြောက်ပိုင်း၊နမ့်ခမ်းမြို့နယ်၊ကောင်းတပ်ကျေးရွာမှာဖြစ်ပွားခဲ့တဲ့ ပြင်းထန်တဲ့ ယမ်းပေါက်ကွဲမှုကြောင့် သေဆုံးသူ ၅၅ ဦးအထိ ရှိလာပြီးဒဏ်ရာရသူ ၈၀ ကျော်အထိ ရှိနေတယ်လို့ ကယ်ဆယ်ရေးအဖွဲ့တွေနဲ့ကျန်းမာရေးဝန်ထမ်းတွေဆီက သိရပါတယ်။

အဲဒီဒဏ်ရာရရှိသူတွေထဲမှာ ဒဏ်ရာပြင်းထန်သူတွေပါဝင်နေတာကြောင့် သေဆုံးသူ အရေအတွက် ဒီထက်မက ထပ်တိုးလာနိုင်တယ်လို့လည်း ဆိုပါတယ်။

အဲဒီ သေဆုံးသူ ၅၅ ဦးထဲမှာ ကလေးငယ်တွေအပါအဝင် အမျိုးသား ၃၀ ဦးနဲ့ အမျိုးသမီး ၂၅ ဦး ပါဝင်နေတာဖြစ်ပြီး ဒဏ်ရာရသူ ၈၀ ကျော်ကိုတော့ နမ့်ခမ်းမြို့ဆေးရုံကြီးသို့ ပို့ဆောင်ကာ ဆေးကုသမှုပေးနေတယ်လို့ သိရပါတယ်။

ပိတ်မိနေသူတွေကို ကယ်ဆယ်ဖို့အတွက် မနေ့ညနေပိုင်းအထိ ကူညီကယ်ဆယ်ရေးလုပ်ငန်းတွေ အပြင်းအထန် လုပ်ဆောင်ခဲ့ကြပြီး ဒီနေ့မှာလည်း ကယ်ဆယ်ရေးလုပ်ငန်းတွေကို ဆက်လက်လုပ်ဆောင်သွားဖို့ ရှိနေပါတယ်။

​အဲဒီပေါက်ကွဲမှုဖြစ်ပွားခဲ့တဲ့ ယမ်းသိုလှောင်ရုံဂိုဒေါင်ဟာ PSLF/TNLA စီးပွားရေးဌာနရဲ့ ကျောက်မိုင်းထုတ်လုပ်ရေးလုပ်ငန်းတွေမှာ အသုံးပြုဖို့ သိုလှောင်ထားတဲ့ ယမ်းအပျော့စားတွေဖြစ်တယ်လို့ TNLA ဘက်က ထုတ်ပြန်ထားပါတယ်။

ပေါက်ကွဲမှုကြောင့် ထိခိုက်ဆုံးရှုံးခဲ့ရတဲ့ ပြည်သူတွေအတွက် ကူညီကယ်ဆယ်ရေး၊ ကျန်းမာရေးစောင့်ရှောက်မှုနဲ့ ပြန်လည်ထူထောင်ရေးလုပ်ငန်းတွေကို သက်ဆိုင်ရာဌာနတွေနဲ့ ပူးပေါင်းပြီး အမြန်ဆုံးဆောင်ရွက်ပေးနေတယ်လို့ တအာင်းအမျိုးသမီးအဖွဲ့အစည်း (TWO)ကထုတ်ပြန်ထားပါတယ်။

ဓာတ်ပုံ - တအာင်းအမျိုးသမီးအဖွဲ့အစည်း

Website - https://burmese.bnanews.net/news/33145/

#​ရှမ်းပြည်မြောက်ပိုင်း #နမ့်ခမ်းမြို့နယ် #ကောင်းတပ်ကျေးရွာ

ဘန်ကောက်ရှိ တရားမဝင်ကျောင်းကို စီးနင်းရာ မြန်မာဆရာအချို့အပါအဝင် ခြောက်ဦးဖမ်းဆီးခံရ (ဓာတ်ပုံသတင်း)

Border News Agency
ထိုင်း၊​ဇွန် ၁။

​ထိုင်းနိုင်ငံ၊ဘန်ကောက်မြို့ Soi Pridi Banomyong ရှိ လိုင်စင်မဲ့ တရားမဝင် နိုင်ငံတကာကျောင်းတကျောင်းကို မေလ ၃၀ ရက်နေ့က ထိုင်းအာဏာပိုင်တွေ ဝင်ရောက်စီးနင်းခဲ့ရာမှာ အလုပ်လုပ်ကိုင်ခွင့်မရှိဘဲ စာသင်ပြနေတဲ့ မြန်မာနဲ့ ဖိလစ်ပိုင်နိုင်ငံသား ဆရာခြောက်ဦးကို ဖမ်းဆီးရမိခဲ့တယ်လို့ သိရပါတယ်။

​အဲဒီကျောင်းဟာ မူကြိုအဆင့်ကနေ အထက်တန်းအဆင့်အထိ နိုင်ငံခြားသားကျောင်းသား တရာကျော်ကို သက်တမ်းငါးနှစ်ကျော်ကြာ လျှို့ဝှက်ဖွင့်လှစ် သင်ကြားပေးနေတာဖြစ်ပြီး ဖမ်းဆီးရမိတဲ့ဆရာတွေကို ဥပဒေအရ အရေးယူဖို့ ခလွန်တန် (Khlong Tan) ရဲစခန်းကို ပို့ဆောင်ထားပါတယ်။

ထိုင်းလူဝင်မှုကြီးကြပ်ရေး ရဲတပ်ဖွဲ့ကတော့ အခုလိုလမ်းကြားတွေထဲ လျှို့ဝှက်ဖွင့်လှစ်ထားတဲ့ လိုင်စင်မဲ့ကျောင်းတွေနဲ့ တရားမဝင်လုပ်ကိုင်သူတွေကို ဆက်လက်နှိမ်နင်းသွားမယ်လို့ ဆိုပါတယ်။

​ဒါ့အပြင် စမုတ်စခွန်မှာလည်း လိုင်စင်ပယ်ဖျက်ခံထားရပေမယ့် ဆက်လက်လည်ပတ်နေတဲ့ တရားမဝင်ကျောင်းနှစ်ကျောင်းကို အာဏာပိုင်တွေက ထပ်မံစီးနင်းခဲ့ရာမှာ ရွှေ့ပြောင်းအခြေစိုက် ကျောင်းသားကိုးရာကျော်နဲ့ တရားဝင်အထောက်အထားမရှိတဲ့ ဝန်ထမ်း နှစ်ဆယ့်ခုနှစ်ဦးကို စစ်ဆေးတွေ့ရှိခဲ့တယ်လို့သိရပါတယ်။

ကိုးကား - Thethaiger

Website - https://burmese.bnanews.net/news/33139/

#​ထိုင်းနိုင်ငံ #ဘန်ကောက်မြို့ #နိုင်ငံတကာကျောင်း