ROI Dynamo

لو عملت فيديو لتسويق كورساتك ومجابش مبيعات .. اقرأ الكلام ده
مش أي فيديو تسويقي = مبيعات
علشان كده في البوست ده هعرفك إيه العناصر اللي لازم تكون موجودة في الفيديو عشان يقنع العميل بالكورس ويحقق مبيعات
1- ابدأ بجملة قوية تشد الانتباه (هوك)
لو الفيديو مش بيشد العميل من أول ثانية، ليه هيكمله؟
مهم إنك تبدأ بجملة أو سؤال يحفز الفضول، يخلي العميل يكمل الفيديو بدون مايفكر
كمان، البداية دي هتخليك تشيل أي عميل مش مهتم وتجذب العميل المهتم بس
👇مثال:
"مبيعات كورساتك ضعيفة؟
ده ممكن يكون بسبب حاجات بسيطة لو بطلت تعملها، مبيعاتك هتزيد
2- اعرض المشكلة

دورك هنا إنك توضح المشكلة، وتأثيرها على العميل
تتكلم بشكل يخليه يحس إنك أكيد مريت بالمشكلة دي …… من دقة وصفك ليها

👇 مثال:
أنت مش لوحدك، في ناس كتير عندهم كورسات قوية، لكن لسه مش قادرين يبيعوها.
أنا متأكد إنك جربت تعمل إعلانات، وتكتب بوستات، وتجرب حلول تانية…
بس لسه مش شايف النتيجة اللي متوقعها

3- اعرض حلول للمشكلة ومن ضمنهم الكورس بتاعك

في النقطة دي، مهم تعرض أكثر من حل ويكون كورسك واحد منهم
الأهم بقا إنك تقارن بين كورسك وبين الحلول التانية عشان تقنعه ليه اختياره لكورساتك هو أفضل حل ممكن ياخده
👇 مثال:
طب إزاي تحل المشكلة؟

الحل الأول: ممكن تبدأ تسثمر أكتر في الإعلانات المدفوعة وتستهدف جمهور أوسع. ودي بتحتاج منك خبرة عشان ماتصرفش فلوس على الفاضي

الحل الثاني: تعتمد على نشر المحتوى المجاني. لكن ده بيحتاج وقت طويل جدًا ونتايجه مش مضمونة

لكن لو حابب تجيب تحصل على نتائج سريعة ومضمونة
يبقا كورس أسرار التسويق لمقدمي الكورسات هيكون مناسب ليك
الكورس اللي مش بس بيعلمك الأساسيات، لكن بيوصلك لمرحلة الاحتراف
بتخرج منه، متمكن من التسويق لكورساتك
وبمساعدة القوالب اللي هشاركها معاك … التسويق هيبقا لعبتك

4- بناء المصداقية
في الجزء ده، مهم جدًا تقوي ثقة العميل فيك، توضحله إنك عندك الخبرة وحققت النتايج اللي بتوعده بيها

👇 مثال:
بفضل الاستراتيجات اللي هشاركها معاك في الكورس، عملائي قدرو يحققوا مبيعات تتخطى ال ٢٠ مليون جنيه لكورساتهم
الاستراتيجيات دي نتاج خبرة 10 سنين في السوق المصري والسعودي، والأهم إنها مبنية على تجربة حقيقة مش مجرد كلام كتب

5- شرح الفوائد

في النقطة دي، لازم تركز على التغيير الحقيقي اللي هيمر بيه العميل بعد ما يكمل الكورس.
هتتخطى مرحلة بيع الكورس، وهتبيعله النتيجة اللي هيحصل عليها.

👇 مثال:
- بعد الكورس، هتكون قادر تبني استراتيجية تسويقية كاملة لكورساتك،
- وتعرف إزاي تجذب العملاء المناسبين
- وتزود مبيعات كورساتك في فترة قصيرة
- وهتوفر الوقت والمجهود والفلوس اللي كان ممكن تضيع في تجربة استراتيجيات غير فعالة

6- الإثبات الاجتماعي (التوصيات، قصص النجاح، والنتائج)

دورك هنا إنك تبين إن الكورس بيحقق نتائج فعلية عن طريق إنك تشارك قصص نجاح، وأراء عملاء

👇 مثال:
"مئات من عملائنا قدروا يحققوا نتائج ملموسة. زي أ/ محمد اللي قدر يرفع مبيعاته بنسبة 30% في 3 شهور. و أ/ علا اللي بدأت معانا بـ 50 مشترك في كورساتهاـ وبعد الكورس عدد المشتركين وصل لـ 120 مشترك في ٣٠ يوم

7- خلق إحساس بالاستعجال

في النقطة دي، هدفك إنك تخلي العميل يحس إن الفرصة مش هتتكرر.
لازم تحفزه إنه ياخد قرار دلوقتي حالًا، سواء من خلال عروض محدودة في الوقت أو مكافآت إضافية أو فرص محدودة.

👇 مثال:
"دلوقتي عندك الفرصة تستفيد بعرض خاص لو اشتركت في الكورس خلال الـ 48 ساعة الجاية

8- دعوة مباشرة للعمل (CTA)

أهم حاجة في الفيديو هو إنك تقول للعميل بالضبط إيه الخطوة الجاية. الدعوة للعمل (CTA) لازم تكون واضحة جدًا عشان العميل ما يحسش بأي تردد.

👇 مثال:
"اضغط على الرابط اللي تحت الفيديو واملى بياناتك وحد من فريقنا هيتواصل معاك في خلال 24 ساعة"

دلوقتي بقى معاك فيديو جاهز يرد على كل أسئلة العميل، ويعرض له كل المزايا اللي هتخليه متأكد إن الكورس ده هو الحل الأفضل ليه

👈 ولو محتاج مساعدة في تحسين مبيعات كورساتك، ابعتلي رسالة دلوقتي

٧ أسباب ليه لازم توفر لعميلك امكانية استرجاع فلوسه في حالة عدم رضاه عن محتوى الكورس؟

1- لإنها بتخلي العميل يحس بالأمان علشان هيقدر يسترد فلوسه لو مش راضي عن مستوى وجودة الكورس

2- لما تقدم الضمان ده، بتبني ثقة قوية بينك وبين العميل. كمان هو هيحس إنك واثق في الكورس بتاعك طالما قدمت الضمان ده، وده هيخليه ياخد قرار الشراء بشكل أسرع

3- كمان بتزود معدلات التحويل بشكل كبير، لأنها بتقلل إحساس المخاطرة اللي بيحس بيه العميل قبل مايستثمر فلوسه في كورس

4- بتخلي العميل ياخد قرار الشراء بشكل أسرع، لإن مفيش حاجة يخسرها .. لو الكورس معجبهوش هيطلب يسترد فلوسه = صفر مخاطرة

5- ردود الفعل اللي هتحصل عليها من العملاء اللي طلبوا استرجاع فلوسهم بتكون مهمة جدًا. هتعرف بالضبط إيه اللي كان متوقعينه مقارنة باللي قدمته لهم وده هيساعدك تحسن كورساتك

6- بتخليك تتميز في سوق مليان منافسين. خصوصًا لو معظم منافسينك مش بيقدموا الميزة دي

7- الضمان بيحمي سمعتك وبيمنع التعليقات السلبية. لإن لو في عميل مش راضي وحاسس إنه مش مستفاد من الكورس، بكل بساطة هيطلب يسترد فلوسه من غير مايكتب تعليق سلبي ياثر على سمعة الكورس

طبعًا، لازم تحدد مدة لاسترجاع الأموال ومتسبهاش مفتوحة. سواء كانت أسبوع أو شهر،
ده بيعتمد على نوع الكورس وطبيعة العميل. المهم إنك تكون واضح في المدة عشان العميل يعرف حدود الضمان.

👈 ولو محتاج مساعدة في تحسين مبيعات كورساتك، ابعتلي رسالة دلوقتي

ليه كورس سعره غالي بيحقق مبيعات، وفيه كورسات أرخص منه مش بتبيع؟

فيه أكتر من سبب، بس واحد من الأسباب اللي قليل أوي يعرفها

هو إن صاحب الكورس الغالي ده فاهم عميله كويس جدًا…

وعارف إن مش كل عميل بيشتري الكورس لنفس السبب.

من واقع مبيعات بأكثر من ٢٠ مليون جنيه حققتها لكورسات عملائي ، أنا شايف إن فيه 3 أنواع رئيسيين من العملاء اللي بيستثمروا في الكورسات:

1️⃣ العميل اللي بيشتري علشان يوفر وقت:

العميل ده الوقت بالنسباله هو أهم عملة ، فـ بدل ما يقعد شهور يضيع وقت وفلوس عشان يوصل للمعلومة، بيشترك في كورس ويحصل على المعلومة في كام ساعة و بيحقق بيها النتيجة اللي بيدور عليها

2️⃣ العميل اللي عايز يوفر مجهوده:

العميل ده جرب المجاني وعارف عيوبه كويس، فـ بيدور على كورس يديله خريطة ومنهج واضح ويخلصه من إحساس الحيرة والتوهان اللي بيحس بيه مع المحتوى المجاني…

بمعنى تاني العميل ده عايزك تقوله العنوان فين، بدل مايقعد يسأل ويعدي بمطبات لحد ما يوصل

3️⃣ العميل اللي عايز يوفر فلوسه:

ممكن تستغرب وتقول إزاي عايز يوفر فلوسه وهيدفع فلوس في الكورس

خليني أوضحلك…

النوع ده من العملاء هو المفضل بالنسبة لي، لإنه مدرك قيمة الاستثمار في الكورسات
وعارف إن كل جنيه بيدفعه في كورس، هيرجعله 2 و 3 لو طبق الخبرة المتراكمة اللي المحاضر شاركها معاه في الكورس

فهمك لكل نوع من الأنواع دي،
هيخليك تكلم كل واحد بلغته…
وتقنعه بالطريقة اللي تناسبه و بالسعر اللي يناسب القيمة اللي بتقدمها له

👈 و لو محتاج مساعدة في تحسين مبيعات كورساتك، ابعتلي رسالة دلوقتي!

بتعمل كام غلطة من دول في تسويق كورساتك؟
من أهم أسباب ضعف مبيعات الكورسات… هي الطريقة اللي بتسوق بيها لكورساتك
كتير من مقدمي الكورسات، خصوصًا اللي معندهمش خلفية تسويقية، بيقعوا في نفس الغلطات المتكررة.... وبيضيعوا المجهود اللي اتبذل في تحضير محتوى الكورس وتصويره،
في البوست ده، هشارك معاك أشهر 6 أخطاء تسويقية عشان متقعش فيها
1. توجيه رسالة تسويقية لكل الناس

حدد بالضبط بتكلم مين، وركز رسالتك بالكامل على احتياجاته هو.
خليه لما يشوف إعلانك، يحس إنك فاهمه وفاهم مشاكله أكتر من أي حد تاني.

✅ مثال:
لو عندك كورس عن "تنظيم الوقت".
فيه فرق كبير بين إنك تقول:
"كورس لتنظيم الوقت وتحسين إنتاجيتك"
وبين:
"لو إنت أم بتشتغلي من البيت وبتحاولي توازني بين الشغل والبيت، الكورس ده معمول علشان يساعدك تنجزي من غير ما تقصري في دورك كأم"
الجملة التانية بتوجه الكلام لفئة واحدة، وبتتكلم بلغتها و واضح فهمها لمشكلة العميل
٢. التركيز على المحتوى بدل النتيجة
العميل بيستثمر فلوس علشان يوصل لنتيجة… فـ تركيزك على محتوى الكورس بس
هيخلي رسالتك أقل تأثير وبالتالي العميل مش هياخد قرار الشراء

٤. التسويق من غير تمهيد أو تسلسل
معظم الناس مش بتشتري من أول إعلان تشوفه ليك… المبيعات بتحصل بعد ما تبني ثقة، وتعرفهم بمشكلتهم، وتقدم قيمة حقيقية قبل ما تطلب منهم يشتروا.
٥. تجاهل طلب تعليقات العملاء أو الـ Testimonials
لو عندك مشتركين استفادوا، اطلب رأيهم وشارك ده في المحتوى التسويقي. الناس بتصدق اللي زيها أكتر ما بتصدق كلامك عن نفسك
كل Testimonial = نقطة ثقة بتتبني في عقل عميل جديد.

٦. تشغيل إعلانات بدون تحليل أو تعديل
تشغيل إعلانات بدون تحليل = حرق فلوس على الفاضي
كل إعلان لازم يتراجع، يتقارن، وتطلع منه بـ نقاط محتاج تشتغل عليها
لازم تسأل نفسك بعد كل إعلان أسئلة تعرف منها أداء الإعلان زي
✔️ كام واحد تواصل معايا لما شاف الإعلان؟
✔️ كام واحد شاف الفيديو للاخر؟
✔️ وغيرها من الاسئلة اللي هتساعدك تعرف إذا كان الإعلان مظبوط ولا محتاج تعديلات
٧. مافيش مجتمع حوالين الكورس
الكورس مش بس فيديوهات. هو تجربة كاملة.
لو مافيش مساحة الناس تتكلم، تسأل، تحس إنها مش لوحدها، نسبة الالتزام بتقل،
سُمعة الكورس بتتأثر. ومعاها بتتأثر نسبة إن الناس ترشح الكورس لأصحابها ومعارفها.

فاكر السؤال اللي سألتهولك في أول البوست؟ جاوبنا علىه في الكومنتات
بتعمل كام غلطة من دول في تسويق كورساتك؟
👈 و لو محتاج مساعدة في تحسين مبيعات كورساتك، ابعتلي رسالة دلوقتي!

حسن الـ 6 عناصر دي عشان تزود مبيعات كورساتك في أسرع وقت

١. حدد جمهورك بوضوح… وفلترهم من البداية
لو بتحاول تبيع لنوع جمهور مش مناسب للكورس، مهما عملت، مش هتحصل على النتيجة اللي متوقعها.
تحديد الجمهور هو حجر الأساس اللي بيتبني عليه أي قرار تسويقي هتاخده: من منصات الإعلان، لطريقة الكتابة، لطريقة تقديم العرض نفسه.

٢. وضح النتيجة مش التفاصيل
العميل مش بيهتم بعدد الفيديوهات … هو كل اللي يهمه الكورس ده هيوصله لفين
إزاي هيغير حياته؟
إزاي هيوصله لهدفه؟
عشان كده مهم توضحله النتيجة اللي هيحققها
فـ بدل ماتقوله هتدرس الخطة التسويقية
قوله 👇
هتكون قادر تبني خطة تسويقية من الألف للياء
تزود بيها مبيعاتك وتحسن من أداء إعلاناتك
من غير ماتضيع وقت ومجهود وفلوس في محاولات مش هتوصلك لحاجة
٣. استخدم لغة جمهورك مش لغتك
طيب إزاي تعرف لغة جمهورك؟
تابعهم.. شوف بيتكلمو عن مشاكلهم إزاي، اسمع تعليقاتهم، واكتب التعبيرات اللي بيكرروها، واستخدمها زي ما هي في حملاتك أو صفحات البيع.
العميل لو حس إنك فاهمه، هيدي لك انتباهه ⚠️
٤. قدم اختيارات مختلفة
مافيش عرض واحد يناسب كل الناس…..
اللي بيدور على الأساسيات غير اللي عايز توفير وقت ودعم مباشر.
قسم تسعير الكورس لأكتر من من باقة عشان يكون مناسب لأكثر من فئة
مثلا:
باقة أساسية = الكورسات فقط
باقة متقدمة = كورسات + ملفات عمل + لقاء أسبوعي جماعي طوال فترة الكورس
باقة مميزة = كل ما سبق + 4 جلسات دعم فردية

٥. استخدم التسعير الذكي (Anchoring)
العرض لما يكون لوحده… بيتقيم لوحده. لكن لما يتحط جنبه عرض أغلى، بيتحول لعرض مغري.
✅ مثال:
لو بتقدم ٣ باقات للكورس:
باقة أساسية: 899 جنيه
باقة متقدمة: 1499 جنيه
باقة مميزة: 3499 جنيه
الباقة اللي بـ1499 ممكن تبان غالية لو كانت لوحدها. لكن أول ما العميل يشوف إن فيه باقة بـ3499،
هيبدأ يشوف سعرها متوسط مقارنة بالباقة الأغلي
وده تأثير الـ Anchoring بتعرض اختيار أغلى علشان تبرز الاختيار اللي فعليًا عايز تبيعه.
٦. اربط العرض بتوقيت… والتزم بيه
العروض المفتوحة دايمًا بتفقد تأثيرها.
لكن العرض المرتبط بموعد، أو عدد محدود أو خصم محدود، بيخلي القرار أسرع.
استقرار مبيعات كورساتك مش هيتحقق بالصُدفة. هو بيحصل نتيجة لـ تسويق مدروس، مبني على فهم السوق، وطبيعة جمهورك، وتركيزك على التفاصيل الصغيرة اللي بتأثر في الرسالة اللي بتوصل.

👈 و لو محتاج مساعدة في تحسين مبيعات كورساتك، ابعتلي رسالة دلوقتي!

7 دروس من بات فلين هتساعدك في زيادة مبيعاتك كورساتك

بات هو واحد من أشهر صناع الكورسات ورواد الأعمال في مجال الـ Online Business
بيشارك دايمًأ نصايح على المدونة بتاعته Smart Passive income
تخص الكورسات الاونلاين والمنتجات الرقمية في العموم

بيحكي بات ويقول ..
إطلاق أول كورس كانت تجربة مليانة تفاصيل، وعلمتني حاجات
فرقت معايا في مبيعات الكورسات اللي قدمتها بعد كده ...

١. تحضير الكورس مش سهل… وده طبيعي

التحضير بياخد أكتر بكتير من مجرد إنك بتدوس على زرار التسجيل وتبدأ تسجل الفيديو...
فيه تخطيط، تنظيم، مراجعة، إعادة كتابة، تجارب، وإعادة هيكلة تاني من الأول.

أنا استفدت كتير من نصايح الخبراء … بس أكتر حاجة فرقت فعلًا هي وجود "مجموعة تأسيسية"

وهما ناس اشتركت معايا من البداية، شافوا المحتوى…
وادوني تعليقات قبل مانزل الكورس بشكل رسمي لكل الناس
ده وفر عليا وقت ومجهود، وخلاني أعدل حاجات أساسية في الكورس.

لو الخيار ده مش متاح، ممكن تاخد رأي صديق ليك أو حد من العيلة...
لإن فيه حاجات كتير مبناخدش بالنا مننا، فـ بنحتاج عين تانية تشاورلنا على الحاجات دي

٢. لو مش هتفتح باب الـ Feedback، فالكورس مصيره هيكون الفشل
الـ Feedback اللي أخدته في أول دفعة علمني أكتر من كل الخطط اللي كنت عاملها.
سواء تعليقات بسيطة أو ملاحظات صريحة،
كل حاجة ساعدتني أضبط المحتوى، وأغير تسلسل الوحدات ….
والأهم إني فهمت أكتر العميل بيدور على إيه، ومتوقع إيه من الكورس 👌

٣. الناس بتشتري "معلومات منظمة"، مش مجرد معلومات
فيه محتوى متاح مجانًا على الانترنت في كل المجالات تقريبًا
فـ الناس بتدفع عشان تشوف محتوى منظم، وفيه مميزات مش موجودة في المحتوى المجاني
زي محتوى تطبيقي، تفاعلي، خطوات واضحة، دعم مباشر، ملفات عمل، جروب خاص، إجابات على الأسئلة، متابعة مستمرة وهكذا

٤. المجتمع هو ركن أساسي من تجربة الكورس
كنت متوقع إن الناس هتاخد الكورس وتكمل لوحدها
بس اللي اكتشفته إن المجتمع نفسه بيشجع المشتركين
الرسائل اللي وصلتلي، والتفاعل اللي حصل، كان كافي يشجع ناس تكمل،
وناس تبدأ من جديد، وناس تطبق أفكار كانو خايفين يجربوها.
المجتمع الفعال بيكون إضافة قوية للكورس، لدرجة إنك ممكن تبيع الكورس بالمجتمع بس.
٥. لازم تديهم مساحة يتواصلوا فيها
أنك تعمل جروب صغير على فيسبوك، ده كفيل يخلي الناس تسأل، تشارك، وتتفاعل،
ويحسوا إنهم مش لوحدهم……
مش لازم تعمل منصة خاصة أو نظام معقد، مجرد مساحة آمنة، ومفتوحة للنقاش هتكون كفاية

٦. Office Hours = قيمة مضاعفة
أنا كنت بعمل جلسات دعم مباشر (Office Hours) مرة أو مرتين في الشهر،
وسمعت من المشتركين إنها كانت واحدة من أكتر الحاجات اللي فرقت معاهم.
حتى الناس اللي ما شاركتش، كانت بتحضر وتسمع الأسئلة والإجابات…

٧. الناس مشغولة أكتر من ما تتخيل
مش كل الناس هتكمل الكورس على طول، وده طبيعي. فيه ضغط، شغل، والتزامات.
اللي أنا بدأته بعد كده، وبنصح بيه، إني أتابع المشتركين من خلال إيميلات
يكون فيها رسائل تشجيعية، أسئلة شائعة، قصص نجاح.
ده علشان أرجعهم للطريق لما يبعدوا، وأفكرهم بالهدف اللي كانوا عايزين يحققوه

ده لينك مدونة بات واللي هتلاقي عليها مقالات كتير هتساعدك في عملية التسويق لكورساتك
https://www.smartpassiveincome.com/blog/category/online-courses/

👈 و لو محتاج مساعدة في تحسين مبيعات كورساتك، ابعتلي رسالة دلوقتي!

تحضير الكورس حمادة… ومحاولة بيعه حمادة تاني خالص
ممكن تبقى عامل مجهود كبير في المحتوى نفسه، بس لما تبدأ تسويق تتفاجئ بضعف النتايج

و تبدأ تســأل هل المشكلة في الكورس نفسه؟ 🤔
= مش شرط
معظم الوقت المشكلة بتكون في عناصر تبان بسيطة بالنسبة لك … لكنها بتفرق مع العميل في اتخاذه لقرار الشراء
تعالى نعدي على العناصر دي واحد واحد ونشوف إزاي تقدر تطبقهم على كورساتك

١. خلى العميل يشوف إن في غيره وصل للهدف اللي بيحلم يحققه
فيه فرق كبير بين إن صاحب الكورس يشكر في الكورس
وبين إن عميل اشترى الكورس يشكر فيه ويقول إنه استفاد منه وساعده يحل مشكلته

عشان كده، مهم إنك تسأل عميلك عن رأيه في الكورس
وتحاول تطلب منه رسالة مكتوبة، تسجيل صوتي، فيديو .. وطبعا استأذنه إنك هتستخدم ده في حملاتك التسويقية

٢. خلى اللي قرر ميشتركش في الكورس، يحس إنه بيضيع على نفسه فرصة مهمة
جمل زي "العدد محدود / فاضل أماكن محدودة" ليها تأثير قوي....
بس عشان تزود التأثير أكثر ممكن تشارك تطبيقات المشتركين عملوها في الكورس ،
أو قصة نجاح لعميل اتقبل في وظيفة بعد ماخلص الكورس

الهدف هنا إنك تخليه يشوف التأثير الإيجابي اللي بيظهر على مشتركين الكورس
ويقرر يشترك عشان يحصل على نفس التأثير 🥳

٣. بدل المزايا… قوله العواقب اللي هتعود عليه لو مسجلش في الكورس

فيه شريحة من الناس مش هتتحرك عشان اللي ممكن تكسبه،
بس هتتحرك بسرعة جداً لو فهمت إيه اللي ممكن تخسره.
👇
مثال:

لو فضلت مأجل خطوة تطوير الإنجلش بتاعك، هتخسر فرص كتير:
- سفر
- شغل بمرتب أعلى
- ترقية في شغلك الحالي
وغيرها من المميزات اللي هتحرم نفسك منها لو فضلت مأجل الخطوة

٤. اظهر لهم الفرق اللي الكورس هيعمله في حياتهم
فيه ناس بتقعد تشرح محتوى الكورس بالتفصيل…
مثلًا "في الوحدة الأولى هنتعلم كذا، والتانية كذا…"
بدون أي ذكر لإيه اللي هيستفاده العميل بشكل واضح ومباشر

طب إزاي تشرح محتوى الكورس بشكل يشجع العميل للإشتراك؟
شوف نتيجة الموضوع اللي هتشرحه على العميل وقوله النتيجة .. بكل بساطة
👇
مثال:
بعد ما تخلص الكورس:
- هتقدر تخوض أي محادثة بالإنجليزي بكل ثقة
- هتقدر تتكلم مع ناس من ثقافات مختلفة بدون أي خوف
- هتكون متمكن أكثر من لغتك، وتقدر تتكلم في مواقف مختلفة.

بكده تكون عرفت الـ 4 عناصر، قولنا في الكومنتات هتبدأ تشتغل على أي عنصر فيهم؟

👈 و لو محتاج مساعدة في تحسين مبيعات كورساتك، ابعتلي رسالة دلوقتي!

هيحصل إيه لو روحت مكان مش عارفه من غير مايكون معاك GPS؟
هتتوه؟
هتضيع وقتك في محاولة الوصول للطريق الصحيح؟
ده نفس اللي بيحصلك في رحلة تسويق كورساتك بدون خطة تسويق

ناس كتير بيكون عندها كورس قوي، محتوى تقيل، تصوير احترافي …
بس أول ما توصل لمرحلة البيع، بتلاقي صعوبة في جذب عملاء لكورساتها

تفتكر ليه؟ 🤔

لأن مفيش خطة تسويق، ومفيش خريطة بتقولهم يمشوا إزاي.
في البوست ده هنعمل الخريطة سوا….. ونرد على سؤال

إزاي تبني خطة تسويقية بسيطة بس فعالة للكورس بتاعك؟

١. افهم السوق والجمهور بتاعك

مفيش خطة تنفع من غير ما تبقى عارف بتكلم مين.
لازم تكون فاهم العميل اللي بتستهدفه كويس جدًا

اسأل نفسك:
هو بيقضي يومه إزاي؟
بيشتكي من إيه؟
هل جرب ياخد كورسات قبل كده؟

وتقدر تستخدم الأداة دي عشان تبني شخصية عميلك:
http://hubspot.com/make-my-persona

٢. حدد النتيجة النهائية للكورس
العميل محتاج يعرف: إيه التغير اللي هيحصله بعد مايشترك في الكورس؟
النتيجة لازم تبقى:
واضحة – محددة – واقعية قابلة للتخيل


ولو مش عارف تصيغ النتيجة في رسالة تسويقية، شوف الفيديو ده

https://www.youtube.com/watch?v=qi_jFO0_7uU&ab_channel=MichalBohanes


٣. راقب المنافسين… بذكاء

✅ مش هتنسخ ومش هتقلد، بس هتستلهم منهم
✅ وتعرف هل عرضك مقارنة بعرضهم .. قوي، متوسط، ضعيف؟
✅ شوف تعليقات العميل عندهم، اعرف منها إيه رأي العميل في كورساتهم؟

٤. صيغ نسخة مختصرة من رسالتك التسويقية

اكتبها كأنك بترد على سؤال واحد بيقولك:
"إنت بتساعدني في إيه؟"

مش لازم تطلع بجملة مثالية من أول مرة، بس لازم توصل في الآخر لجملة شبه دي:
> "أنا بساعد [نوع الناس] إنهم يوصلوا لـ [نتيجة واضحة] من خلال [الكورس]."

٥. اختار القنوات التسويقية الصح
اختار قنوات تسويقية أكبر نسبة من عملائك موجودين عليها

مثال:
لو جمهورك من أصحاب البيزنس، LinkedIn هيكون أقوى بكتير من TikTok.


٦. ابني خريطة للرحلة التسويقية (Funnel بسيطة)

مينفعش تتكلم مع العميل الجاهز للشراء بنفس الطريقة لعميل لسه أول مرة يسمع عنك.

فمهم تقسم المحتوى عندك لمراحل:

Awareness1️⃣ (الوعي): أول حاجة الناس لازم يعرفوا عنك. يعني ممكن تبدا بمحتوى بسيط يعرفهم إنت مين وإيه اللي بتقدمه.

Interest2️⃣ (الاهتمام): بعد ما عرفوك، يبقى لازم تخليهم مهتمين أكتر باللي بتقدمه. ممكن تستخدم قصص، لايفات، أو معلومات تحل لهم جزء من المشكلة اللي عندهم.

Decision3️⃣ (القرار): بعد ما يبقوا مهتمين، لازم تظهر لهم ليه الكورس بتاعك هو الحل. هنا تقدر تستخدم شهادات من ناس تانية أو توضح لهم فوائد الكورس بشكل أقوى.

Action4️⃣ (الإجراء): في النهاية، خليهم يتخذوا خطوة. زي إنهم يسجلوا في الكورس أو يشتروا مباشرة.

👈 ولو عايز تتعمق في الـ Funnel، اقرأ كتاب DotCom Secrets

٧. حدد أدوات التنفيذ اللي هتشتغل بيها
✔️ عندك فريق؟ ولا هتعمل كل حاجة بإيدك؟
✔️ هتستخدم Ads؟ ولا هتعتمد على المحتوى المجاني؟
✔️ هتستخدم الإيميل ماركتنج في خطتك التسويقية ولا لأ؟
حدد إيه المصادر اللي عندك واللي هتساعدك في رحلة تسويق كورساتك
وشوف إيه المصادر اللي هتقدر تستثمر فيها عشان تسهل على نفسك عملية التسويق

٨. حط مقاييس تعرف منها أدائك
“ما لا يمكن قياسه… لا يمكن تحسينه.”

مش شرط المقياس يبقى مبيعات من أول يوم.
ممكن أول مقياس يكون: كام شخص دخل على صفحة الكورس؟
بعد كده: كام رسالة جتلك من عميل مثالي؟

وبكده يكون معاك خريطة طريق تساعدك تحسن مبيعاتك وتسهل عليك عملية تسويق كورساتك

👈 و لو محتاج مساعدة في تحسين مبيعات كورساتك، ابعتلي رسالة دلوقتي!

ليه تقريبًا 87% من اللي بيسجلوا في كورسات أونلاين مش بيكملوها؟
ممكن تقول لنفسك:
" ايه المشكلة، سواء العميل كمل أو مكملش الكورس لأخره المهم بالنسبة لي إنه اشترك"
خليني أقولك إيه اللي بتخسره لما العميل ميكملش الكورس لاخره


✔️ مش هيشتري منك كورسات تانية
✔️ ولا هيرشحك لحد من زمايله
✔️ لا وكمان ممكن يكتب ريفيو سلبي


طب إزاي تتجنب إن المشكلة دي تحصل؟
ده اللي هنجاوب عليه من خلال 7 استراتيجيات
هتخلي طلابك يكملوا الكورس، ويتفاعلوا معاه، ويشتروا منك مرة واتنين وتلاتة


١. خلي بداية الكورس قوية تشد انتباه العميل
فيه بعض العملاء بتحدد من بداية الكورس، إذا كانت هتكمل الكورس
ولا هتشوفه بعدين، وكلنا عارفين بعدين ده مش بيجي والكورس بيفضل موجود في قايمة الـ Watch later
والأسوء، إنه ممكن يقرر ميشوفش الكورس خالص
ويكتب تعليق سلبي بناءًا على الـ كام دقيقة اللي شافهم من الكورس
عشان كده لازم تهتم ببداية الكورس ..

👈 دي أمثلة على بعض الحاجات اللي ممكن تعملها

✔️ اتكلم عن حكاية طالب سابق والهدف اللي حققه بعد انضمامه للكورس
✔️ وضح له ليه الكورس ده مختلف عن أي تجربة مر بيها قبل كده
✔️ اعرض له النتايج اللي ممكن يحققها بطريقة فيها حماس وتحفيز


٢. استخدم لغة بسيطة يفهمها العميل
استخدامك للغة معقدة، مش هيخليك تبان محترف أكتر
بالعكس، دي هيخلي العميل يشوف إن الكورس مش واضح ومعقد
فـ استخدم لغة عميلك يفهمها، وده بيجي من فهمك العميق ليه

٣. قسم المحتوى لأجزاء أصغر

> مثال:
بدل ما تعمل درس بعنوان "استراتيجية المحتوى"،
اعمل ٣ فيديوهات: (فهم الجمهور – استخراج الأفكار – جدول النشر).
وبعد الـ 3 فيديوهات يكون فيه فيديو مراجعة لكل ماتم شرحه في استراتيجية المحتوى

٤. حط نقاط تقدم وتحفيز بشكل مستمر
احنا - كبشر - بنحب إحساس الإنجاز، تطبيقات زي Duolingo لتعلم اللغات فاهمة ده كويس
فـ مجرد مابتعمل تقدم بسيط جدًا، بيكافئك عليه

تقدر تعمل ده في كورساتك عن طريق إضافة Progress bar
أو تبعت للعميل رسالة تشجيعية بعد نهاية كل وحدة

٥. اربط كل درس بتطبيق عملي فوري
الطالب اللي مابيطبقش… بينسى.
عشان كده مهم تخلي في آخر كل درس سؤال، مهمة. أي وسيلة تساعد العميل يطبق على اللي بيتعلمه

٦. اسأل عميلك القديم عن رأيه في الكورس
اعمل فورم بسيط واسأله:

✔️ إيه أكتر حاجة عجبتك في الكورس؟
✔️ إيه النقاط اللي كنت تتمنى إنها تكون موجودة؟
✔️ وغيرها من الأسئلة اللي هتساعدك تعرف إيه بالظبط في الكورس محتاج تحسين

٧. ضيف عنصر مفاجأة جوه الكورس
فاجئ عميلك بحاجة ماكانتش مكتوبة في وصف الكورس ..
دي من أقوى الاستراتيجيات واللي ناس كتير مش بتستخدمها
ممكن تقدملهم هدية، فيديو إضافي، دعوة لحاجة خاصة.

> مثال:
طالب بيكمل الوحدة الثالثة… يلاقي فيديو مفاجأة: "خطة جاهزة للـ30 يوم الجايين".
ممكن تحضيرك للخطة دي متاخدش منك دقايق… بس بتسيب أثر كبير عند العميل

وخليك فاكر إن الطلاب اللي بيكملوا… هم اللي بيشتروا تاني.
هم اللي بيجيبوا لك طلاب غيرهم.
وهم اللي بيبنوا سمعتك … فـ اهتم بتجربتهم بقدر الإمكان


👈 و لو محتاج مساعدة في تحسين مبيعات كورساتك، ابعتلي رسالة دلوقتي!

وده مصدر الإحصائية اللي ذكرناها في أول البوست:

https://www.researchgate.net/publication/273777281_Dropout_Rates_of_Massive_Open_Online_Courses_Behavioural_Patterns

6 مواقع هتغير طريقة تسويقك لكورساتك 180 درجة

لو بتسوق لكورس أونلاين، فالمنافسة بقت أقل ما يقال عليها إنها شرسة
وهنا بتيجي أهمية إنك تتابع المواقع اللي هشاركها معاك دي عشان تميز كورساتك بطريقة تسويق فريدة

المواقع دي هتلاقي عليها:
✅ مقالات،
✅ أدوات
✅ استراتيجيات
✅ أمثلة حقيقية تساعدك تبني خطة تسويق تحسن مبيعاتك

1. HubSpot Blog

لو عايز تتعلم تسويق زي ما الكتاب بيقول .. يبقى مينفعش تستغنى عن الموقع ده

هتلاقي عليه مقالات عن المحتوى، الإيميلات، صفحات الهبوط، السوشيال ميديا، وغيرها من المواضيع اللي تهمك كـ مقدم كورسات
الرابط: blog.hubspot.com

2. Thinkific Blog

مدونة فيها محتوى قوي جدًا عن إنشاء وتسويق الكورسات.
الرابط: thinkific.com/blog

3. Podia Blog

بيركزوا على استراتيجيات بيع الكورسات والمحتوى الرقمي بأسلوب مبسط من غير تعقيد.

الرابط: podia.com/blog


4. ConvertKit Blog

لو التسويق بالإيميل جزء من خطتك، يبقى لازم تتابع ConvertKit.
مقالاتهم مفيدة جدًا في بناء القوائم البريدية، كتابة الرسائل، وتحويل المتابعين لعملاء.

الرابط: convertkit.com/blog

5. Copyhackers

لو عايز تكتب إعلانات تبيع من أول مرة العميل يقرأها ..
يبقى Copyhackers هو الموقع اللي لازم تتابعه
هتلاقي عليه دروس ونصايح من خبراء في المجال

الرابط: copyhackers.com


6. Indie Hackers

مدونة + مجتمع لصناع المنتجات الرقمية، من ضمنها الكورسات….
وبينشروا أرقامهم وتجاربهم بكل شفافية.

الرابط: indiehackers.com


كل موقع من دول ممكن يبقى هو السبب إن …
فكرتك التسويقية الجاية تبقى أقوى، رسالتك أوضح، ويفرق في معدل مبيعاتك.

وافتكر إن الشطارة مش بس في الكورسات اللي بتقدمها…
الشطارة إنك تعرف تسوقلها صح.

👈 و لو محتاج مساعدة في تحسين مبيعات كورساتك، ابعتلي رسالة دلوقتي!