Cali Qaran

FB 2326..
Xorriyatul-qawlku ma aha danbi waa xaq dastuurku dammaanad qaaday. Qodobada 25-aad iyo 32-aad.

FB 2325..
🔥 Kulaylka daran, laydh-la’aanta iyo biyo-yaraanta ka jirta Berbera waxay si gaar ah u saameeyeen qoysaska danyarta ah. Xaaladdani ma aha mid la iska indho tiri karo, waayo laydhka iyo biyuhu waa baahiyo nololeed oo aasaasi ah.

Waxaan ugu baaqayaa cidda ay khusayso in ay si degdeg ah uga jawaabaan dhibaatadan, isla markaana loo helo xal muuqda oo waara si loo badbaadiyo bulshada nugul ee maanta wajahaysa xaalad adag. ⚠️💧⚡

FB 2324..
Waxaan si adag u canbaaraynayaa warqadda ka soo baxday Wasaaradda Gaadiidka iyo Horumarinta Jidadka Somaliland ee shirkad gaar ah loogu asteeyey inay noqoto wakiil ay la shaqeeyaan shirkadaha MTOs iyo logistics-ka ee ka imanaya Itoobiya.

Go’aankani ma aha khalad maamul oo fudud Waa ku tumasho cad oo Dastuurka Somaliland ah iyo xeerarka dalka Jamhuuriyada Somaliland u yaal sida Qodobka 11aad, 8aad iyo 22 aad ee Dastuurku JSL oo dammaanad qaaday ganacsi xor ah (free enterprise), xuquuqda iyo sinaanta muwadiniinta JSL. Wasiir ma laha awood uu shirkad gaar ah ku siiyo mudnaan Qaran iyo in fursada hal shirkad lagu koobo waa xad-gudub dastuur.

Waxaa kale oo warqaddani si cad u muujinaysaa in wasiirku ka arradan yahay fahamka shuruucda dalka iyo waajibaadka sharci ee wasaaradda uu masuulka ka yahay. Go’aan noocan ahi ma aha oo kaliya khalad maamul — waa tilmaam aqoon-darro sharci.
Sidaas darteed go’aankani:
• Waa xad-dhaaf awoodeed
• Waa ku tumasho dastuur iyo iska indhotir mabda’a suuqa xorta ah
• Waa ku tumasho sinnaanta ganacsatada
• Wuxuuna muujinayaa aqoon-darro sharci oo haysata wasiirka.

• Golle ahaan waxa aanu kala xisaabtami doonaa dambiga sharci ee uu ka galay dastuurka JSl wasiirkaa gaadiidku iyo H.jidadku.

Somaliland laguma maamulo go’aamo shaqsiyeed iyo doonis wasiir laakin Somaliland waxaa lagu maamulaa DASTUUR iyo xeerar u yaal.

FB 2322..
Mar kasta oo aad akhrido Suuratul Yuusuf, qalbiga waxa ku soo dhacaya cashar weyn oo nolosha lagu hago. Qisada Nabi Yuusuf (CS) waxay ina tusaysaa in jidka guushu mararka qaar dheer yahay, mararka qaarna uu la socdo imtixaan, dulmi iyo sugid.

Nabi Yuusuf (CS) ceel ayaa lagu tuuray, addoon ayuu noqday, xabsi ayuu galay; laakiin dhammaan dhibahaas wuxuu kaga gudbay samir, iimaan iyo kalsooni uu Alle ku qabo. Ugu dambayntiina wuxuu gaadhay sharaf, maamuus iyo hoggaamin.

Casharka weyn ee halkaas ka muuqda waa in qofku aanu ka quusan raxmadda Alle, xitaa marka xaaladdu u muuqato mid aad u adag. Mararka qaar dhibta aad maanta ku jirtaa waa jidka Alle kuu mararinayo khayr ka weyn inta aad qiyaasi karto.

Suuratul Yuusuf waxay na baraysaa in samirku yahay furaha farajka, akhlaaqduna ay qofka kor u qaaddo, cafiskuna uu yahay astaanta dadka qalbiya weyn leh.

Qofka Alle la jiraa mar walba wuu gaadhaa halka uu u qaddaray, xataa haddii jidku dheeraado.

FB 2321..
RAMMADAN MUBAARIG, Alle khayrkeeda hayna siiyo.

FB 2320..
Aniga oo ka mid ahaa Mudanayaashii maanta ka qaybgalay fadhigii 20aad ee Kalfadhiga 13aad, waxaa fadhiga maantu khuseeyey dhagaysiga Wax-ka-beddelka iyo Kaabista Xeerka Warshadaha ee ka yimi dhanka Xukuumadda.

Intii uu fadhigu socday, Golaha waxa uu dhageystay warbixin faahfaahsan oo ay soo diyaarisay Guddi Gaar ah oo la magacaabay 19-kii Janaayo 2026, taas oo ku saabsanayd wax-ka-beddelka iyo kaabista xeerka. Warbixintaas waxa Golaha u akhriday Guddoomiyaha Guddida, Marwo Aaamina Cilmi Fariid.

Kadib dood iyo falanqayn qoto dheer oo ay Mudanayaasha Golaha yeesheen, waxa si cod gacan-taag ah loo ansixiyay Wax-ka-beddelka iyo Kaabista Xeerka Warshadaha, xeerkana oo muhiimad weyn u leh qaranka.

FB 2319..

Saaka waxaan ka qayb galay munaasabadda xuska sanad-guurada 32aad ee aasaaska Ciidamada Qaranka Jamhuuriyadda Somaliland. Munaasabaddan qiimaha leh waxay astaan u tahay taariikh fac-weyn oo ku suntan halgan, naf-hur iyo ilaalinta jiritaanka qarannimada Jamhuuriyadda Somaliland.

Waxaan hambalyo, bogaadin iyo mahadnaq u dirayaa dhammaan Ciidamada Qaranka Jamhuuriyadda Somaliland, kuwaas oo si daacadnimo, geesinimo iyo hufnaan leh u gudanaya waajibaadkooda qaran, kana shaqaynaya sugidda nabadda, amniga iyo midnimada dalka.

Sidoo kale, waxaan xushmad gaar ah u muujinayaa xaasaska Ciidamada Qaranka, kuwaas oo door lama huraan ah ka qaata taageerada iyo adkaysiga ay ku taagan yihiin geesiyaasha Qaranka.

Ilaahay ha idin waafajiyo gudashada waajibaadkiinna qaran, hana idin siiyo guul, nabad iyo horumar waara. Guulaysta waligiin.

FB 2318..
Ku soo dhawoow Kulmiye Party Nuuradiin Ibraahim Aw Cabdi (Diini).