Magic Night

ﺑﺎﻟﻨﺴﺒﺔ ﻟﻼﻧﺴﺎﻥ ﺍﻟﺒﺘﻘﺮﺏ ﻣﻨﻚ ﻭﻳﺤﺴﺴﻚ ﺍﻧﻚ ﺍﻧﺴﺎﻥ ﻣﻬﻢ ﻑ ﺣﻴﺎﺗﻮ ﻭﺣﺘﻲ ﺍﺫﺍ ﻛﻨﺖ ﺑﺘﺘﻌﺎﻣﻞ ﻣﻌﺎﻫﻮ ﻑ ﺣﺪﻭﺩ
ﺑﺲ ﻫﻮ ﺍﺗﻘﺮﺏ ﻣﻨﻚ ﻭﻛﺴﺮ ﺣﺎﺟﺰ ﺍﻟﺤﺪﻭﺩ ﺩﻱ ﻭﺧﻼﻙ ﻣﻦ ﻏﻴﺮ ﺗﺤﺲ ﺍﻭ ﺗﺸﻌﺮ ﺗﺤﺒﻮ ﺍﻭ ﻣﻤﻜﻦ ﻧﻘﻮﻝ ﺍﺣﺴﺎﺳﻚ
ﺍﺗﺠﺎﻫﻮ ﻣﺎ ﻣﻔﻬﻮﻡ ﺍﻟﻤﻬﻢ ﺍﻧﻚ ﺍﺗﻌﻠﻘﺖ ﺑﻴﺔ ﻭﻓﺠﺎﺀﺓ ﻛﺪﺓ ﻳﻼ ﺳﺎﺑﻚ ﻟﻴﺔ ﺍﻟﺴﺒﺐ ﺷﻨﻮ ﺑﺲ ﺳﺎﺑﻚ ﻻﻧﻮ ﺯﻫﺞ ﻃﻴﺐ
ﺍﻟﻤﺸﺎﻋﺮ ﺍﻻﻧﺖ ﺯﺭﻋﺘﻬﺎ ﻓﻴﻨﺎ ﺩﻱ ﻭﻳﻦ ﻧﻮﺩﻳﻬﺎ ﻃﻴﺐ ﺍﺣﺴﺎﺳﻨﺎ ﺍﻟﺠﻮﺍﻧﺎ ﻛﻞ ﻣﺎ ﻣﻬﻢ ﺑﺎﻟﻨﺴﺒﺔ ﻟﻴﻚ ﻃﻴﺐ ﻋﺎﺭﻓﻴﻦ
ﺍﺻﻌﺐ ﻓﺘﺮﺓ ﺷﻨﻮ ﻑ ﺍﻟﻤﺮﺣﻠﺔ ﺩﻱ ﻛﻠﻬﺎ ﻓﺘﺮﺓ ﺍﻧﻚ ﻟﻤﻲ ﺗﺒﺪﻱ ﺗﺤﺲ ﺍﻧﻚ ﺑﻘﻴﺖ ﺍﻧﺴﺎﻥ ﺗﻘﻴﻞ ﻋﻠﻴﺔ ﻭﺣﺘﻲ ﻟﻤﻲ
ﺗﺘﻜﻠﻢ ﻣﻌﺎﻫﻮ ﺗﺤﺲ ﺍﻟﺮﺩ ﻣﺨﺘﺼﺮ ﻭﺑﺎﻳﺦ ﻭﺯﻱ ﻛﺎﻥ ﻣﺴﺘﻨﻲ ﻣﺘﻴﻦ ﻳﺨﻠﺺ ﻣﻦ ﺍﻟﻤﻜﺎﻟﻤﺔ ﺩﻱ ﺯﻫﺞ ﺍﺿﺎﻳﻖ ﺩﻱ
ﺍﺻﻌﺐ ﻓﺘﺮﺓ ﻭﻃﺒﻌﺎ ﺍﻧﺖ ﺣﺘﻜﻮﻥ ﻣﺴﻜﻴﻦ ﻣﺎﻓﺎﻫﻢ ﻑ ﺷﻨﻮ ﻭﻣﺎﻗﺎﺩﺭ ﺗﺴﺘﻮﻋﺐ ﺍﻥ ﺍﻻﻧﺴﺎﻥ ﺩﺓ ﻛﺎﻥ ﻋﺎﻳﺰ ﻳﻘﻀﻲ
ﺑﻴﻚ ﺯﻣﻦ ﻭﺧﻼﺹ ﻭﺗﺠﻲ ﻣﺮﺣﻠﺔ ﺍﻟﺰﻋﻞ ﻭﺍﻻﻟﻢ ﺟﻮﻭﺍﻙ ﻭﺍﻟﺨﺎﻃﺮ ﺍﻟﻤﻜﺴﻮﻭﺭ ﻭﺗﺤﺘﺎﺝ ﻓﺘﺮﺓ ﻋﻠﺸﺎﻥ ﺧﺎﻃﺮﻙ ﻳﺘﺠﺒﺮ
ﻭﻋﻠﺸﺎﻥ ﺗﺴﺘﻮﻋﺐ ﺍﻟﺤﺼﻞ ﺩﺓ ﺑﺠﻴﻚ ﺍﺣﺴﺎﺱ ﻛﺮﺓ ﻭﺣﺐ ﺍﺗﺠﺎﺓ ﺍﻻﻧﺴﺎﻥ ﺩﺓ ﻭﺑﺘﻜﻮﻥ ﺟﻮﺍﻙ ﺑﺠﺪ ﻣﺘﺎﻟﻢ ﻭﻧﻔﺴﻚ
ﺗﺴﺎﻟﻮﻭ ﻟﻴﺔ ﺍﻧﺖ ﻋﻤﻠﺖ ﻛﺪﺓ ﻓﻴﻨﻲ ﻋﺸﺎﻥ ﻛﺪﺓ ﺍﻧﺖ ﻣﺎﺑﺘﻘﺪﺭ ﺗﺤﺘﻮﻱ ﺍﻧﺴﺎﻥ ﻣﺎﺗﺰﺭﻉ ﺟﻮﺍﺓ ﻣﺸﺎﻋﺮ ﻭﺍﺣﺎﺳﻴﺲ
ﻣﺎﺑﺘﻘﺪﺭ ﻋﻠﻴﻬﺎ ﻭﻻ ﺑﺘﻘﺪﺭﺍ ﻻﻧﻮ ﻣﺸﺎﻋﺮ ﺍﻻﻧﺴﺎﻥ ﻣﻬﻤﻬﺎ ﻭﻣﻤﻜﻦ ﺍﻱ ﺷﺊ ﻑ ﺍﻟﺪﻧﻴﺎ ﺍﺫﺍ ﺍﺗﻜﺴﺮ ﻳﺘﺼﻠﺢ ﺍﻻ
ﻣﺸﺎﻋﺮﺍﻻﻧﺴﺎﻥ ﻭﺍﺣﺴﺎﺳﻮ ﻣﺴﺘﺤﻴﻞ ﺗﺘﺼﻠﺢ ﻣﻤﻜﻦ ﻧﻘﻮﻭﻝ ﺑﻨﻨﺴﻲ ﺑﺲ ﻣﻊ ﺍﻭﻝ ﻣﻮﻗﻒ ﺑﻨﺘﺬﻛﺮ ﻛﻞ ﺍﻟﺤﺼﻞ
ﻣﺎﺗﺒﻘﻲ ﺍﻧﺴﺎﻥ ﺳﺊ ﻭﺗﻠﻌﺐ ﺑﺎﻟﻨﺎﺱ ﻟﻠﻨﻮ ﺍﻛﻴﺪ ﻑ ﻳﻮﻡ ﻣﻦ ﺍﻻﻳﺎﻡ ﺣﻴﺠﻲ ﺍﻟﻠﻲ ﻳﻠﻌﺐ ﺑﻤﺸﺎﻋﺮﻙ ﻭﻳاخﺩ ﺣﻘﻬﻢ

صور عيديه

CAMMING SOON ..

الخطيئة..
الحلقه 6
بعد عرض الجيش الليبي للسودانين المقدمين لوظيفة الطباخين .. رفض صلاح و المعاهو العرض لان القروش كانت بسيطه جدا..
قام صلاح و قال ( الشغل من 7صباح لي 1ضهر بي 150 دينار و من 7 صباح لي 9 المسا بي 350 دينار )
المسؤول رفض كلام صلاح.. و قال ليهم اكتبوا ارقام تلفوناتكم و عناوين سكنكم .. و المسؤول قال ليهم بعرض الكلام ده علي الجيش الليبي و يشوف رايهم
و رجع صلاح و المعاه و بدعوا انو الجيش يلبي طلبهم ..
و بعد اسبوع جا اتصال بي صلاح من مسؤول الجيش الليبي و طلب من صلاح الحضور .. ولمن مشي صلاح كان الجيش الليبي وافق علي عرض صلاح ..
( و كان صلاح هو اول سوداني يغير مرتبات طباخين الجيش الليبي ).
بعد المجازفات دي كلها صلاح ما كان يعرف يطبخ ( تم تعين صلاح كبير الطباخين و معاه اتنين تانين)
و بدا يتعلم صلاح الطبخ من الطباخين التحتو و بعد مرور 6 شهور من تعينه .. اخد صلاح اول اجازة و جا راجع السودان و رجع لي اهلو و زوجاته ( رقيه و زينب ) و اولاده
و قعد معاهم 4شهور ..
و قبل سفرو لي ليبيا رحل صلاح زوجاتو و اولادو للخرطوم .. و اشتري 5بيوت
و اصلا كان عندو 3بيوت ( يعني صلاح عندو 8 بيوت في الخرطوم) ..
لكن قبل سفرو باع بيتين عشان كان محتاج قروش يدخل اولادو مدارس .. و زوج بتو سميه ..
و رجع صلاح ليبيا و قعد قريب التلات شهور جاهو اتصال من الخرطوم انو امو تعبانه .. رجع صلاح عشان يشوف امو ..
و كانت تعبانه خالص و بعد يومين من رجعتو للخرطوم اتوفت امو و دي كان خبر اثر صلاح جدا و ما انتهت المشاكل بي وفاه امو بس لقي واحد من بيوتو اتسرق منو ( ماكان عامل شهادة بحث) و باع بيت عشان مصاريف مستشفي والدتو و العزاء ..
يعني صلاح بقي عندو 4 بيوت من اصل 8
يتبع ...

الخطيئة ..
الحلقه 4 & 5
تم تعين صلاح في شرطة ولايه الخرطوم و بالتحديد في امن سوق الدهب و صلاح كان مجتهد في شغلو كتير و بعد ما قبض علي اربعه عصابات سرقه دهب تمت ترقيتو و تم نقله لي شرطه مكافحة الشيعه ( الولايه الزمن داك كانت اسلاميه رافضة للشيعه) و كانو الشيعه متمركزين في امدرمان ..
و تابع كم نفر حتي وصل مقرهم و كانو يتقابلو كل يوم العصر في المقر ..بس بقت الطريقه كيف يمسكوهم متلبسين .. بعد متابعتهم رسل واحد من الملازمين جاسوس عشان يتاكد و يعرف طبيعتهم شنو؟!
بعد كم يوم جاهو الملازم و كلمو انهم برتبو لي لنشر الشيعه بي كتاباتهم و ندواتهم .. و بي كده جهز صلاح حمله و قدر يقبض علي الشيعه ..
و بعد عمليه ضبط الشيعة تم نقل صلاح لحدود السودان الجنوبيه...(الحدود انذاك كانت شبه منطقه مقطوعه لازم كل فتره تجيهم مواد تموينيه و مستلزمات )
و بعد مرور 9 شهور .. حصل مشكله في خط السير و انقطع عنهم التمويل و عاشوا فتره صعبه و صلاح رجع الصداع ليهو من تاني و عاش فتره عصيبه ..
بقوا يصطادو و يشربوا من النيل ( مشكله المعيشه خلصت ) بقت مشكله صلاح و الصداع و لازم ياخد تمباك ..
و لمن عجز صلاح و المعاهو من عدم التمباك بقوا يشيلو بعر الغزلان و يختو بدل السفه ( وصفا ليهم واحد من القبائل الهناك) و فعلا بعر الغزلان ادت نفس وظيفة التمباك .. و بعد الايام الصعبة دي استقال صلاح من الشرطه ..
و رجع للخرطوم و منها للشماليه و قعد مع اهلو شويه ... و اتزوج زينب و انجب منها احمد ..
قابل ود عمو عبدالرحمن ( شغال في السفاره الليبيه )
و اقترح علي انو يسافر ليبيا .. يمكن يلقي فرص العمل افضل .و فعلا بدا صلاح اجراءات سفرو ...
و سافر ليبيا و نزل عند واحد قريبو اسمو عوض و بدا يفتش شغل ..
صلاح لقي مجموعه من السودانين بقدم لوظيفة طباخين الجيش الليبي قام مشي التقديم معاهم ..
و كانت المعاينه جماعيه ( السودانين براهم و السوريين براهم و ....الخ)
و في المعاينه اختاروا صلاح هو اليكون المتحدث باسمهم ..
خش المسؤول و بدا يتكلم و اداهم العرض ( شغل من 7 صباح لي 1ضهر بي 75 دينار ، و من 7 صباح لي 9 المسا بي 150 دينار )..
و حيتم اختيار 4 طباخين كبار و الباقين عاملين بالمطبخ..
السودانين رفضوا المبالغ المقدمه
هل حيخسر صلاح و المعاه الوظيفه ؟؟
يتبع ....

الخطيئه...
الحلقة الثالثه
يقيف صلاح في نص الناس عشان يقول شهادتو و هو في حاله توتر شديده..
المهم استجمع قواه و خلاص اخد قرارو في خوف .. و قال انو عبدالله ابوه غلطان علي ساتي جارهم ( شهد ضد ابوه )..
و كان بعد شهادتو مستني ابوه يجيهو و يفكر حيتعاقب باي نوع من العقوبات ؟؟
و لسه صلاح في وقفتو ابوه جا ماشي عليهو و صلاح خلاص انتهي من الخوف...
و عبدالله جا وقف قدام صلاح و مسكو من يدو وقام سلمو في راسو و قال لي ( لو ما كنت قلت كلامك ده ما كنت حتكون ولدي)..
طبعا صلاح خوفو و توترو اتقلب لي احساس ما يتوصف .. و رجعوا من المحكمه و سافر عبدالله .. بس قبل ما يسافر قرر انو يزوج صلاح .. و تم اختيار رقيه وهي من بنات الحي الجميلات المجاملات في المناسبات..و صلاح كان ما مقتنع ..المهم تم الزواج و سافر عبدالله .. و اشتغل صلاح في شرطة الخرطوم (سافر صلاح للخرطوم )
و رقية ولدت سميه و عصام و ساره و فاطمه و بعد ولادة فاطمه قرر صلاح انو يسافر لي غرب السودان مع خالو عبدالرازق و يشتغلو في التجاره و فعلا تجارتهم كانت ناجحه .. و بعد شغل قريب تلات سنوات رجع صلاح للخرطوم و منها للشماليه يقضي كم يوم مع اهلو .. و لسه صلاح ما وصل الشماليه جاهو خبر انو مخازنو و دكانو في الغرب اتحرقو .. كانت صدمه لصلاح و راسو اتشطب و رجع كانو بدا من الصفر .. رجع لشغل العسكريه تاني في الخرطوم و اشتغل في حراسه سوق الدهب ...
و من هنا حتبدا مغامره جديده في حياة صلاح
تابعونا ....
يتبع....

الخطيئة ..
الحلقة الثانيه
و مع فتحة العلبه واحد من اصحابو هووب فتح البطانيه لقي صلاح ماسك السفه في يدو .. و طردو صلاح من المدرسه و طلبو اولياء امرو ... عبدالله شرح لناظر المدرسه حاله صلاح و انو حبوبتو هي العلمتو التمباك للصداع.. ومن اليوم داك صلاح بقي اسمو( اب سفه)
وامتحن صلاح و نجح و اخد الشهادة الاعدادية .. و ابوهو قال لي بديك شهر لازم في خلال الشهر تلقي شغل داخل البلد ..لانو عبدالله حيسافر الجنوب بعد تلات شهور و حيشتغل هناك
وفي يوم حصلت مشكله بين عبدالله و ساتي جارو و امتدت المشكله حتي وصلت
ساميه و زوجة ساتي و الغلطان كان عبدالله علي ساتي و استمرت المشكله ..
و صلاح حاول يفهم ابوهو انو هو الغلطان بس عبدالله رد و قال ( عشان علمتك و شلت الشهاده عايز توريني اعمل شنو ) و كان عبدالله يقول الكلام ده بي استمرار لي صلاح ..
قام صلاح شال شهادتو و بي زعل ختها تحت الدوكه في النار و ساميه تحاول تطلع الشهاده و هو ماسك ساميه امو لحدي ما اتحرقت الشهاده و بقت رماد
وقال لابوه ( خلاص كده بقي ما عندي شهاده)
و اتواصلت مشاكل عبدالله و ساتي لحدي ما وصلت محكمه الحي عشان يحددو الغلطان منوو
و بعد سماع شكاوي عبدالله و شكاوي ساتي طلبو صلاح يشهد ..
احتار صلاح بين شهادتو للحق و دا ضد ابوه وبين الزور ...
ياتري حيعمل شنو صلاح ..
يتبع ..

الخطيئه - الحلقة الاولي
********** الولايه الشماليه 1935م
تزوج عبدالله من بنت عمه ساميه و انجبا صلاح و مرتضي و ثريا ، مرتضي و ثريا عاشو مع حبوبتهم نفيسه في حلفا .. و صلاح اتربي مع ابوهو و امو
كان عبدالله شغال في العسكريه و كان متمسك بيها شديد حتي بدا يربي ولدو صلاح تربيه عسكريه من صغرو
و كان ينفذ عليهو عقوبات قاسيه جدا ..
في يوم من الايام و صلاح بدرس في المرحله الابتدائية و يلعب مع بت عمو ( زينب) فجاه صلاح سب زينب و هو ما عارف معني الكلام القالو ( وعلي التعترو قالا مع دخلت ابوهو عليهم )
قام عبدالله ساق صلاح و صلاح مرعوب من تعابير وش ابوهو .. ودخل صلاح المخزن و فتح شوال شطه حمرا و دخل راس صلاح فيهو ويقول ليهو ( تاني اسمعك تسب باكلك الشوال ده)
و ده نوع من انواع العقوبات الكان بياخدا صلاح .. و مره يتربط في نخله و مره يتحبس في غرفه ...
و مرت السنوات و صلاح و صل لمرحله الشهاده الاعداديه ( ودي كانت اقصي الشهادات و هي توازي الشهاده الثانويه)
و في اخر سنه ليهو عشان ياخد الشهاده كان يعاني صلاح من صداع شديد و الم ضرس ما بفارقو
مشو بيهو لي الدكتور و الشيخ و الفكي ما نفع و مازال الصداع معاهو
و يوم جات حبوبته نفيسه زياره ليهم و شافت صلاح و ضعو مع الصداع ينوم بي و يقوم بيهو ...
قامت طلعت كيس تمباك ( صعوض) و ختت ليهو في خشمو و اتحسن صلاح .. و بقي كل ما يحس بي صداع يسف تمباك ..
و بقي صلاح كيس التمباك معاه في كل مكان .و خلصت الاجازة و نزل صلاح المدرسه و بدا يسف بالدس من اصحابو
و في يوم جاهو الصداع و ما لقي طريقه يسف بيها .و لمن غلب ماقدر يستحمل قام شال بطانيتو و اتغطي بيها و طلع العلبه و بدا يفتحا و لكن صوت فتح العلبه لفت انتباه اصحابو ...
يتبع