Monte Design

تصاميم سوشيال ميديا غير رسميه لعيادة أسنان .

جزء من اعمالي في تصاميم السوشيال ميديا

رمضان مبارك ينعاد على الأمه الاسلاميه بالخير واليمن والبركات

Logo & visual identity design for “ Mega travel “ Specialist at traveling and educational visa.

ورجعنا تاني ي شباب ، عموما البوست دا ح اتكلم فيهو عن شركات الطباعه والدعايه والاعلان في السودان هنا ، الشئ المحزن في الامر انو من قمنا و وعينا على الدنيا دي نفس تصاميم اللافتات (بمختلف انواعها) زي م هي تصميم رديئ واختيار غلط للألوان وحتى عمليه الدمج للصور (مثلا صور منتجات ،مواد غذائيه وغيرو) حاجه بطاله خالص ، انا م بجمع انو كل الشركات دي (او محلات الطباعه ) بتشتغل بالكيفيه دي ، بالعكس في ناس مشاء الله عليها بتشتغل بكل ضمير للعملاء حقينهم وبتطلع بي تصاميم جميله و جذابه ، اتمنى من الساده المصممين العندهم شركات طباعه (محلات طباعه) او شغالين فيها تراعو للنقطه دي وتشتغلو بي اخلاص و ضمير ، العالم كلو اتطور حتى في ابسط الاشياء الا نحنا قاعدين في نفس الدائره .

السلام عليكم شباب ، بعتذر عن الغياب الطويل لاسباب كتيره ومنها كنت بجهز مواضيع مهمه في مجال التصميم ومنها على سبيل المثال: سلسله عادات غلط بنمارسها في حياتنا اليوميه كمصممين وعملاء ( اصحاب بنزنس ،محلات تجاريه وغيرو) و الناس المختصه في مجال الدعايه والطباعه والاعلان بالتحديد ( انا زعلان منهم الصراحه بس الله غالب) المهم ح ابدأ انزل بوستات تفصيليه للمواضيع دي باذن الله تعالى.

اعتماد تصميم شعار وهويه بصريه لصالح "Eslam Abdalaziz” المتخصص في مجال ال Sales & Marketing

تصميم شعار وهويه بصريه لصالح غرفه " طوارئ
كسلا"

ليه نحنا في السودان م مهتمين بي مجال التصميم بانواعه ؟
السبب انو في عدة عوامل، بس من وجهة نظري انو اغلب المصممين م قاعدين يقدمو محتوى بيشرح للناس المجال دا، بكونو مركزين على انهم يعرضو شغلهم وبس، وبالاضافه لي قِلة المصممين المبدعين عندنا،وبرضو لي عدم اهتمام اصحاب المشاريع والشركات بي المجال ،( الواحد بيجتهد في كل النواحي بس لمن يجي لي نقطه الهويه البصريه بيهملها مع انها لا تقل اهميه عن المشروع ذاته ).

باذن الله حبدأ اقدم محتوى اوعي فيهو الناس واقدر اساعد اي شخص حابي يدخل المجال دا.



الصوره لي لفت الانتباه😁

بعض من تصاميم السوشيال ميديا

كيف تخلي علامتك التجاريه مميزه ومحببه لدى عملائك
-في البوست دا حلخص ليك الخطوات البتخلي البراند بتاعك ( علامتك التجاريه ) مميزه وتقدر تجذب بيها العملاء . تابع الخطوات:

١- استهدف جمهورك :
من الصعب انك ترضي الجميع، فلازم تركز على العملاء المحتاجين لي منتجك اوخدمتك والبقدرو قيمه المنتج دا، ولازم برضو تبحث عن سلوكيات جمهورك المستهدف مثلا زي (العمر - الجنس - الموقع - الاهتمامات - المشاكل - الحلول البتقدمها خدمتك او منتجك ) بعد داك استخدم المعلومات دي عشان تقدر تنشئ شخصيه مشتريه بتمثل عميلك المثالي ، ف بالطريقه دي انت بتقدر تخصص رسالتك وصوتك واسلوبك عشان تجذب انتباه العميل وتكسب ثقته.

٢-خليك متطلع و مراقب لي منافسيك:
لازم تطلع على منافسيك هم قاعدين يعملو شنو في السوق وتشوف طريقه استجابه العملاء ليهم، اعرف نقاط القوة والضعف عندهم، اتعلم من اخطاءهم ومن انجازاتهم، والاهم فتش عن الميزه التنافسيه البتخلي علامتك التجاريه مميزه وفريده من نوعها.

٣-تطوير هويه العلامه التجاريه:
لمن تجي تبني هويتك لازم تفكر انو كيف تبقى متميزه عن الاخرين، يعني لمن العميل يشوف الهويه حقتك يقدر يميزها عن باقي الهويات من غير م يبذل اي مجهود ، والهوية بتشمل: ( اسم العلامه التجاريه ، الشعار [ اللوجو ] ، الالوان المستخدمه في التصميم ، الخطوط، الصور، والرموز ) وايضا بتشمل رؤيه العلامه التجاريه ورسالتها واهدافها والوعود البتقدمو للعميل .

٤-كيف تستفيد من التسويق الرقمي:
لازم تستخدم الوسائل الرقمية عشان تنشر علامتك التجاريه وتصل لي عملائك المحتملين، ف مثلا عندك (فيسبوك) المصريين اكتر ناس بيستخدموه، ( سناب شات) السعوديين ومنطقه الخليج عامه ، (واتساب) نحنا السودانيين مثلا ، ف انت لازم تخت فكره في راسك انت عايز تستهدف اي دوله واي فئه عشان بعدين تركز اكتر على المنصه الموجود فيها الفئه دي، وممكن تنشئ محتوى مفيد ومثير يعكس علامتك التجاريه ويظهر قيمتها للعملاء.
-في الختام:
انصحك انك تركز على الموضوع الهويه التجاريه دي كويس ، فما ممكن مشاء الله فاتح ليك بزنس ظريف كدا ودخلو كويس وم عامل ليك هويه عشان تقدر تتميز بيها عن باقي منافسيك ، او تكون عامل ليكي لافته ب ٢٠٠ جنيه وتصميمها سئ جدا كدا بتكون خربت الواجهة بتاعتك ، اهتمو بي بالجانب دا كويس .