Swat Human Rights Protection Society

محمد سلیم آف کوزہ بانڈئی کے علاج کے لیے فوری اقدامات کا مطالبہ

ہم حکومتِ خیبر پختونخوا سے پُرزور مطالبہ کرتے ہیں کہ کوزہ بانڈئی سے تعلق رکھنے والے غریب اور مستحق شہری محمد سلیم کے علاج کا جلد از جلد مناسب بندوبست کیا جائے۔

کوزہ بانڈئی PK-8 سوات-VI کے حلقے میں شامل ہے، اس لیے اس حلقے کے منتخب نمائندے ایم پی اے حامد الرحمٰن کی ذمہ داری بنتی ہے کہ وہ اپنے حلقے کے تمام عوام، بالخصوص غریب اور ضرورت مند افراد کے مسائل اور مشکلات میں ان کا ساتھ دیں۔

افسوس کے ساتھ کہنا پڑتا ہے کہ مقامی ایم پی اے MNAs اپنے پارٹی کارکنوں کے علاوہ غریب اور ضرورت مند عوام کے دکھ درد میں شریک ہوتے نظر نہیں آتے۔ ہم یہ واضح کرنا چاہتے ہیں کہ عوامی نمائندگی سیاسی وابستگی سے بالاتر ہونی چاہیے۔

لہٰذا ہم ایم پی اے حامد الرحمٰن سے, MNAs اپیل کرتے ہیں کہ وہ سیاسی وابستگی سے بالاتر ہو کر انسانی ہمدردی کے تحت محمد سلیم آف کوزہ بانڈئی کی عیادت کریں اور ان کے علاج اور صحت یابی کے لیے فوری اور عملی اقدامات اٹھائیں۔

غریب اور مستحق شہریوں کی مدد کرنا منتخب نمائندے کی اخلاقی اور عوامی ذمہ داری ہے۔ ہمیں امید ہے کہ ایم پی اے اس انسانی مسئلے کا فوری نوٹس لیتے ہوئے محمد سلیم کے علاج کا مناسب بندوبست کریں گے۔. محمد رحیم ایڈووکیٹ
چیئرمین، سوات ہیومن رائٹس پروٹیکشن سوسائٹی (SHRPS)

محمد سلیم کی عیادت اور مالی تعاون کی اپیل

سوات ہیومن رائٹس پروٹیکشن سوسائٹی (SHRPS) کے چیئرمین محمد رحیم ایڈووکیٹ، لیگل ایڈوائزر نائلہ ناز ایڈووکیٹ اور ممبران ملک رفیع اور شکیل محمد نے گردوں کے مرض میں مبتلا محمد سلیم کی عیادت کے لیے ان کے گھر کا دورہ کیا۔

اس موقع پر محمد سلیم نے وفد کو بتایا کہ ان کی والدہ بھی کینسر کے مرض میں مبتلا ہیں اور ان کے علاج معالجے پر ہونے والے بھاری اخراجات کی وجہ سے وہ تقریباً 30 لاکھ روپے کے مقروض ہو چکے ہیں۔ خود گردوں کے مرض میں مبتلا ہونے کی وجہ سے ان کے لیے علاج اور دیگر ضروری اخراجات برداشت کرنا مزید مشکل ہو گیا ہے۔

سوات ہیومن رائٹس پروٹیکشن سوسائٹی کی جانب سے محمد سلیم اور ان کے خاندان کی مالی مدد کی گئی اور ان کے ساتھ ہمدردی کا اظہار کیا گیا۔

سوات ہیومن رائٹس پروٹیکشن سوسائٹی مخیر حضرات، صاحبِ استطاعت افراد اور عوام الناس سے اپیل کرتی ہے کہ وہ اس مشکل وقت میں محمد سلیم اور ان کے خاندان کے علاج معالجے کے لیے حسبِ استطاعت مالی تعاون کریں، تاکہ ان کے علاج کا سلسلہ جاری رہ سکے اور ان کے مالی بوجھ کو کم کیا جا سکے۔

آئیں، انسانیت کے ناطے ایک ضرورت مند خاندان کا سہارا بنیں۔

Swat Human Rights Protection Society (SHRPS)

ایک خوددار محنت کش پختون خاندان کے لیے روزگار کی اپیل

حبیب اللہ ایک غریب مگر باوقار پختون اور پاکستانی شہری ہیں، جن کا تعلق تحصیل مدین، ضلع سوات سے ہے۔ وہ روزگار کی تلاش میں مینگورہ آئے، جہاں روزانہ ہاتھ ریڑھی چلا کر اپنے اہلِ خانہ کا پیٹ پال رہے ہیں۔

ان کے پاس پہننے کے لیے صرف دو جوڑے کپڑے ہیں۔ ایک جوڑا پہن کر وہ دن بھر سخت محنت کرتے ہیں اور شام کو اسے دریائے سوات میں دھو کر دوسرا جوڑا پہن لیتے ہیں۔ اگلے دن پھر یہی معمول دہراتے ہیں۔ شدید غربت کے باوجود انہوں نے کبھی کسی کے سامنے ہاتھ نہیں پھیلایا، بلکہ ہمیشہ محنت کو اپنا سہارا بنایا۔

حبیب اللہ بارہ بچوں کے والد ہیں، جن میں چھ بیٹے اور چھ بیٹیاں شامل ہیں۔ بڑھتی ہوئی عمر، گھریلو ذمہ داریوں اور محدود آمدنی نے ان کی مشکلات میں بے پناہ اضافہ کر دیا ہے۔ ان کی سب سے بڑی خواہش یہ ہے کہ ان کے بڑے بیٹے کو کوئی باعزت روزگار مل جائے تاکہ وہ اپنے والد کا سہارا بن سکے، گھر کے اخراجات میں ہاتھ بٹا سکے اور اپنی بہنوں کی شادی جیسے اہم فرائض کی ادائیگی میں مددگار ثابت ہو۔

ہم مخیر حضرات، صنعت کاروں، تاجروں اور سرکاری و نجی اداروں سے مؤدبانہ اپیل کرتے ہیں کہ اگر کسی کے پاس حبیب اللہ کے بڑے بیٹے کے لیے مناسب روزگار کا موقع موجود ہو تو براہِ کرم اس خاندان کی مدد فرمائیں۔ آپ کی ایک چھوٹی سی کاوش ایک خوددار خاندان کی زندگی میں امید کی نئی کرن روشن کر سکتی ہے۔. محمد رحیم ایڈووکیٹ
چیئرمین، سوات ہیومن رائٹس پروٹیکشن سوسائٹی (SHRPS) برائے تعاون:
📞 حبیب اللہ: 03445982575

"دریائے سوات کے ٹھنڈے پانی میں نہاتے ہوئے بچوں کی خوشیاں دیدنی ہیں۔"

پریس ریلیز

چیئرمین سوات ہیومن رائٹس پروٹیکشن سوسائٹی (SHRPS) محمد رحیم ایڈووکیٹ نے تنظیم کے اراکین بخت منیر اور ملک کلیم کے ہمراہ گزشتہ روز تحصیل کبل میں ہونے والے افسوسناک بم دھماکے میں زخمی ہونے والے شہریوں اور پولیس جوانوں کی عیادت اور خیریت دریافت کرنے کے لیے ہسپتال کا دورہ کیا۔

اس موقع پر چیئرمین SHRPS نے زخمیوں کی جلد صحت یابی کے لیے نیک تمناؤں کا اظہار کرتے ہوئے حکومت سے مطالبہ کیا کہ بم دھماکے میں شہید ہونے والوں کے لواحقین کو مناسب معاوضہ اور مستقل کفالت فراہم کی جائے، جبکہ تمام زخمیوں کو بہترین اور مفت طبی سہولیات کے ساتھ مناسب مالی امداد بھی دی جائے تاکہ ان کی بحالی یقینی بنائی جا سکے۔

انہوں نے کہا کہ دہشت گردی سے متاثرہ خاندانوں کی ہر ممکن معاونت ریاست کی ذمہ داری ہے اور حکومت کو چاہیے کہ متاثرین کی بحالی اور کفالت کے لیے فوری اور مؤثر اقدامات کرے۔