Kohat Today

گورنرخیبرپختونخوا سے کوہاٹ چیمبر اور تاجر برادری کے وفد کی ملاقات، جنوبی اضلاع کی معاشی ترقی، صنعت و سرمایہ کاری کے فروغ کے لیے تجاویز پیش

پشاور: گورنر خیبرپختونخوا فیصل کریم کنڈی سے کوہاٹ چیمبر آف کامرس اینڈ انڈسٹری کے صدر رشید احمد پراچہ کی قیادت میں تاجر برادری کے ایک وفد نے گورنر ہاؤس پشاور میں ملاقات کی۔ ملاقات میں صوبے کی معاشی صورتحال، صنعت، توانائی، ٹیکس، سرمایہ کاری، جنوبی اضلاع کو درپیش مسائل اور کاروباری برادری کو درپیش چیلنجز پر تفصیلی تبادلہ خیال کیا گیا۔ کوہاٹ چیمبر کے وفد نے جنوبی اضلاع میں صنعت، تجارت اور سرمایہ کاری کے فروغ کے لیے ڈسٹرکٹ اکانومی اتھارٹی کے قیام، اختیارات کی نچلی سطح تک منتقلی، معاشی امور میں پالیسی تسلسل کے لیے میثاقِ معیشت، ای او بی آئی قوانین میں سمال انڈسٹریز کے لیے اصلاحات، چیف سیکریٹری کی ریجنل میٹنگز کے انعقاد، کوہاٹ ٹنل ٹول ٹیکس میں کمی، نئے صنعتکاروں کی سرکاری سطح پر حوصلہ افزائی، سمال انڈسٹریل اسٹیٹ کوہاٹ میں پیسکو کی غیر اعلانیہ لوڈشیڈنگ کے خاتمے، مؤثر سیکیورٹی انتظامات، صرافہ ایسوسی ایشن کو درپیش ٹرانزٹ مسائل کے حل اور جنوبی اضلاع کو وعدے کے مطابق گیس کی فراہمی یقینی بنانے سمیت متعدد تجاویز پیش کیں۔ وفد نے اس بات پر بھی زور دیا کہ ادارے ٹیکس تو وصول کرتے ہیں مگر کاروباری برادری کو مطلوبہ سہولیات فراہم نہیں کی جاتیں، جبکہ گیس کا پیداواری ضلع ہونے کے باوجود کوہاٹ میں مہنگی گیس اور لوڈشیڈنگ سے عوام اور صنعت دونوں شدید متاثر ہو رہے ہیں۔ وفد نے جنوبی اضلاع میں مقامی مصنوعات کے فروغ، معاشی خوشحالی کے لیے ایک خودمختار ادارہ قائم کرنے اور تاجروں و صنعتکاروں کو درپیش مسائل کے فوری حل کی ضرورت پر بھی زور دیا۔ اس موقع پر وفد نے تاجر برادری اور سی این جی ایسوسی ایشن کے مسائل کے حل میں تعاون پر گورنر خیبرپختونخوا کا شکریہ بھی ادا کیا، گورنر خیبرپختونخوا فیصل کریم کنڈی نے وفد سے گفتگو کرتے ہوئے کہا کہ اگر صوبے کو اس کا جائز حصہ مل جائے تو وہ گندم سمیت دیگر زرعی اجناس میں خودکفیل بن سکتا ہے۔ صوبہ کے مختلف مسائل کے حل کے لیے وفاقی حکومت سے بھی رابطے میں ہیں تاکہ عوام اور کاروباری برادری کے مفادات کا تحفظ یقینی بنایا جا سکے۔ انہوں نے کہا کہ کوہاٹ میں آئل ریفائنری اور صوبے میں فرٹیلائزر کمپنی کا قیام وقت کی اہم ضرورت ہے، کیونکہ نئی صنعتوں سے روزگار کے مواقع پیدا ہوں گے اور صوبے کی معیشت مضبوط ہوگی۔ گورنر نے کہا کہ واپڈا کے مطابق اگر متعلقہ کمیونٹیز ریکوری کی ذمہ داری لیں تو انہیں چوبیس گھنٹے بجلی کی فراہمی ممکن بنائی جا سکتی ہے۔ انہوں نے مزید کہا کہ دیگر صوبے ترقی کی دوڑ میں آگے بڑھ رہے ہیں جبکہ خیبرپختونخوا بدامنی جیسے چیلنجز سے نبرد آزما ہے، تاہم امن کے قیام کے لیے افواجِ پاکستان، پولیس اور عوام کی قربانیاں ناقابل فراموش ہیں۔فیصل کریم کنڈی نے اس عزم کا اظہار کیا کہ ملکی و غیر ملکی سرمایہ کاروں کو خیبرپختونخوا میں سرمایہ کاری کی طرف راغب کرنے، روزگار کے نئے مواقع پیدا کرنے اور صوبے کی معاشی ترقی کو فروغ دینے کے لیے ہر ممکن اقدامات کیے جائیں گے۔ انہوں نے کوہاٹ چیمبر کی جانب سے پیش کردہ تجاویز کو سراہتے ہوئے یقین دہانی کرائی کہ ان پر متعلقہ وفاقی و صوبائی اداروں کے ساتھ سنجیدگی سے غور کیا جائے گا اور تاجروں و صنعتکاروں کو درپیش مسائل کے حل کے لیے ہر ممکن اقدامات کیے جائیں گے۔ انہوں نے کہا کہ صوبے کی معاشی ترقی میں تاجر برادری کا کردار نہایت اہم ہے اور وہ ہر سطح پر ان کے مسائل کو مؤثر انداز میں اجاگر کرتے رہیں گے۔ وفد میں شاہد زمان شینواری، اسرار شینواری، منصور پراچہ، قاسم عتیق پراچہ، وہاب عالم، عدنان پپو، چیئرمین میانخیل بازار فاروق، شیخ ریاض، شارون، مزمل افیف، نعمان بنگش، آصف زمان، احمد ہارون، عماد، محسن نعیم، خالد محمود، اقبال، میر محمد راشد، آصف حیات، حنیف رضا اور دیگر کاروباری شخصیات شریک تھیں۔

Kohat Kashmir day observed....

کوہاٹ ۔۔۔ ڈپٹی کمشنر محمد نواز وزیر کی ہدایات پہ یومِ استحصالِ کشمیر کی مرکزی تقریب ڈسٹرکٹ کونسل ہال کوہاٹ میں منعقد
یومِ استحصالِ کشمیر کے موقع پر ضلع کوہاٹ کی مرکزی تقریب ڈسٹرکٹ کونسل ہال میں منعقد ہوئی، جس میں ایڈیشنل ڈپٹی کمشنر (فنانس) عامر علی شاہ، اسسٹنٹ کمشنر نوید احمد، ایڈیشنل اسسٹنٹ کمشنر (ریونیو) ابراہیم، میونسپل سروسز انچارج محمد وقاص سمیت مختلف سرکاری افسران، اساتذہ، طلبہ اور شہریوں نے بھرپور شرکت کی۔
تقریب کا آغاز قومی پرچم کشائی سے ہوا، جس کے بعد مقبوضہ کشمیر کے عوام سے اظہارِ یکجہتی کے لیے سکول کے طلبہ نے ولولہ انگیز تقاریر، ملی نغمے اور خوبصورت ٹیبلوز پیش کیے۔ شرکاء نے کشمیری عوام کی جدوجہدِ آزادی کو خراجِ تحسین پیش کرتے ہوئے ان کے حقِ خودارادیت کی بھرپور حمایت کا اعادہ کیا۔
پروگرام کے اختتام پر ایک پُرجوش یکجہتی ریلی نکالی گئی، جس میں شرکاء نے "کشمیر بنے گا پاکستان" کے فلک شگاف نعرے بلند کیے۔ ریلی نے پورے ماحول کو ملی جذبے، اتحاد اور کشمیری عوام سے بھرپور یکجہتی کے احساس سے گرما دیا۔۔

کوہاٹ چہلم شہدائے کربلا کے موقع پر مرکزی عزاداری جلوس مین بازار میں خیبرپختونخوا ہلال فوڈ اتھارٹی کوہاٹ کی ٹیم ڈپٹی ڈائریکٹر کامران یوسفزئی اور اسسٹنٹ ڈائریکٹر خالد خان کی سرپرستی میں ڈیوٹی سر انجام دے رہی ہے۔