Roundu Students Federation

بسم اللہ الرحمٰن الرحیم

بتاریخ 15 مئی، کو غالب کی بیٹھک میں روندو کی معروف سیاسی و سماجی شخصیت جناب وزیر اعجاز صاحب کے ساتھ روندو اسٹوڈنٹس فیڈریشن کی ایک طویل اور اہم ملاقات منعقد ہوئی۔ اس ملاقات میں روندو اسٹوڈنٹس فیڈریشن کے صدر سرفراز علی صابری، کابینہ، اور کور کمیٹی کے ہیڈ عمران ندیم پاجی اور دیگر اراکین نے شرکت کی۔
ملاقات کے دوران طلبہ کو درپیش مسائل، تعلیمی مواقع، نوجوانوں کے کردار، اور روندو کے طلبہ کے مستقبل سے متعلق مختلف اہم امور پر تفصیلی گفتگو کی گئی۔ اس کے علاوہ علاقے میں تعلیمی بہتری، طلبہ کی رہنمائی، اور نوجوانوں کو مثبت سرگرمیوں کی جانب راغب کرنے کے حوالے سے بھی تبادلۂ خیال ہوا۔
جناب وزیر اعجاز صاحب نے روندو اسٹوڈنٹس فیڈریشن کی کاوشوں کو سراہتے ہوئے نوجوانوں کے اتحاد، شعور، اور تعلیمی ترقی کی اہمیت پر زور دیا۔ انہوں نے طلبہ کے مسائل کے حل اور ان کی فلاح و بہبود کے لیے ہر ممکن تعاون کی یقین دہانی بھی کروائی۔
روندو اسٹوڈنٹس فیڈریشن کی جانب سے اس ملاقات کو نہایت مثبت، بامقصد، اور مستقبل کے لیے مفید قرار دیا گیا۔ امید ظاہر کی گئی کہ اس طرح کی نشستیں طلبہ اور قیادت کے درمیان مضبوط رابطے اور علاقے کی ترقی میں اہم کردار ادا کریں گی۔

بسم اللہ الرحمٰن الرحیم

آج مورخہ 16 مئی 2026 کو روندو اسٹوڈنٹس فڈریشن کا ایک اہم اجلاس منعقد ہوا، جس میں کابینہ کے تمام ممبران نے بھرپور شرکت کی۔ اجلاس میں آنے والے انتخابات کے حوالے سے تفصیلی گفتگو کی گئی اور نوجوانوں کے مسائل پر خصوصی توجہ دی گئی۔
تمام روندو یوتھ نے متفقہ طور پر یہ فیصلہ کیا کہ ووٹ اُسی امیدوار کو دیا جائے گا جو نوجوانوں کے لیے روزگار کے مواقع پیدا کرے گا، بے روزگاری کے خاتمے کے لیے عملی اقدامات کرے گا اور نوجوانوں کو جدید Skills سیکھنے کے مواقع فراہم کرے گا تاکہ وہ اپنے مستقبل کو بہتر بنا سکیں۔
اجلاس میں یہ عزم بھی دہرایا گیا کہ روندو حلقہ 4 سے مورثی سیاست کا خاتمہ کیا جائے گا اور ایسی قیادت کو آگے لایا جائے گا جو عوام کے درمیان رہ کر نوجوانوں کی حقیقی نمائندگی کرے۔
روندو کے نوجوان اب باشعور ہو چکے ہیں اور وہ صرف نعروں پر نہیں بلکہ عملی کام، تعلیم، روزگار اور نوجوانوں کی ترقی کی بنیاد پر اپنا فیصلہ کریں

بسم اللّٰہ الرحمٰن الرحیم
آر ایس ایف
ہم اپنے سابق وزیر راجہ ناصر علی خان کے بے حد مشکور ہیں کہ انہوں نے اپنے وعدے کو محض الفاظ کے حد تک محدود نہیں رکھا بلکہ عملی طور پر پورا کر کے دکھایا۔ روندو کے طلباء جو کے آئی یو میں پوزیشن ہولڈرز ہیں ان کو وعدے کے مطابق ایک سمسٹر کی فیس ادا کی۔
یہ اقدام قابلِ تحسین ہونے کے ساتھ ساتھ طلبہ کے لیے حوصلہ افزائی کا ایک مضبوط پیغام ہے کہ محنت اور قابلیت کبھی ضائع نہیں جاتی۔ ہمیں امید ہے کہ ایسے عملی اقدامات کا یہ سلسلہ آئندہ بھی جاری رہے گا۔
آر ایس ایف مرکز گلگت

بسم اللّٰہ الرحمٰن الرحیم
آج مورخه 2 مئی، بروز ہفتہ، RSF (رنڈو اسٹوڈنٹس فیڈریشن) کی جانب سے ایکسیلنس پبلک سکول دنیور میں چہلمِ شہیدِ رہبر نہایت عقیدت و احترام کے ساتھ منعقد کیا گیا۔ تقریب کے مہمانِ خصوصی حجۃ الاسلام والمسلمین علامہ نادِ علی واجدی صاحب تھے۔
اس موقع پر شہید رہبر کی قربانیوں اور ان کے مشن کو خراجِ عقیدت پیش کیا گیا، جبکہ شرکاء نے ان کے راستے پر ثابت قدم رہنے کے عزم کا اعادہ کیا۔

بسم اللہ الرحمن الرحیم
آج کے پُرآشوب دور میں ہمیں صرف نعروں کی نہیں، بلکہ ایسے کرداروں کی ضرورت ہے جو عمل سے راستہ دکھائیں۔
سیئر و سیرتِ رہبرِ معظمؒ اسی سوچ کی ایک جھلک ہے—جہاں ایک عظیم رہبر کی زندگی، جدوجہد اور اعلیٰ کردار سے رہنمائی حاصل کی جائے گی۔
یہ محفل محض ایک پروگرام نہیں، بلکہ ایک فکری نشست ہے جو سوچ کو بیدار کرے گی اور عمل کا راستہ واضح کرے گی۔ تمام احباب سے گزارش ہے کہ اپنی شرکت کو یقینی بنائیں اور اس بامقصد نشست کا حصہ بنیں۔

بسم اللہ الرحمن الرحیم
اپریل 27، 2026
آج یونیورسٹی میں ایک خوبصورت بیٹھک کا انعقاد ہوا، جس میں نوجوانان روندو نے بھرپور شرکت کی۔ اس موقع پر صدر سرفراز علی صابری، نائب صدر سید شمشاد کاظمی اور کور کمیٹی ہیڈ عمران ندیم نے جوانوں کو ہمیشہ مستحکم رہنے کی رائے دی۔ آخر میں یادگار لمحات کو محفوظ کرنے کے لیے ایک مشترکہ تصویر بھی بنائی گئی جو اس خوشگوار ملاقات کی علامت ہے۔

مورخہ 23 اپریل بروز جمعرات رات 10:30 بجے آر-ایس ـ ایف روندو اسٹوڈنٹس فیڈریکشن کے زیرِ اہتمام ایک اہم میٹنگ منعقد ہوئی، جو صدر سرفراز علی صابری کی زیرِ نگرانی انجام پائی۔ اس میٹنگ کا بنیادی مقصد روندو کے طلبہ کی تعلیمی، سماجی اور تنظیمی بہتری کے لیے مؤثر حکمتِ عملی تیار کرنا تھا۔
اجلاس میں اس بات پر تفصیل سے غور کیا گیا کہ طلبہ کو درپیش مسائل کو کس طرح عملی اور دیرپا بنیادوں پر حل کیا جا سکتا ہے، اور انہیں ایک مضبوط، باشعور اور منظم پلیٹ فارم کیسے فراہم کیا جائے۔ شرکاء نے مختلف تجاویز پیش کیں اور اس عزم کا اظہار کیا کہ طلبہ کی فلاح و بہبود کے لیے ہر ممکن اقدامات کیے جائیں گے۔
اس کے ساتھ ساتھ شہیدِ رہبرِ معظم کے چہلم کے پروگرام کے انعقاد کے حوالے سے بھی گفتگو ہوئی، جسے نہایت عقیدت اور منظم انداز میں منعقد کرنے پر اتفاق کیا گیا۔
میٹنگ خوشگوار اور سنجیدہ ماحول میں اختتام پذیر ہوئی، جس میں تمام اراکین نے اتحاد، نظم و ضبط اور مشترکہ کوششوں کے ذریعے روندو اسٹوڈنٹس کو ایک مثالی کمیونٹی بنانے کے عزم کا اعادہ کیا۔

رونڈس اسٹوڈنٹس فیڈریشن (RSF) کا مؤقف
Karakoram International University کی جانب سے آن لائن اور بلینڈڈ کلاسز کا حالیہ فیصلہ طلبہ کے لیے شدید تشویش کا باعث بنا ہوا ہے۔ گلگت بلتستان جیسے خطے میں جہاں آج بھی ہزاروں طلبہ کو مستحکم انٹرنیٹ اور ضروری تعلیمی سہولیات میسر نہیں، وہاں آن لائن یا بلینڈڈ تعلیم مسلط کرنا دراصل طلبہ کے مستقبل کو خطرے میں ڈالنے کے مترادف ہے۔
تعلیم صرف اسکرین کے ذریعے لیکچر سننے کا نام نہیں بلکہ استاد اور طالب علم کے درمیان براہِ راست علمی رابطہ، سوال و جواب اور کلاس روم کا ماحول اس کا بنیادی حصہ ہوتا ہے۔ آن لائن اور بلینڈڈ نظام نہ صرف تعلیم کے معیار کو متاثر کرتا ہے بلکہ بہت سے طلبہ کو مکمل طور پر تعلیمی عمل سے باہر کر دیتا ہے۔
رونڈس اسٹوڈنٹس فیڈریشن واضح طور پر یہ مؤقف پیش کرتی ہے کہ ایسا نظام قابل قبول نہیں جو طلبہ کے کیریئر اور مستقبل کو نقصان پہنچائے۔
ہم یونیورسٹی انتظامیہ سے پُرزور مطالبہ کرتے ہیں کہ اس فیصلے پر فوری نظرثانی کی جائے اور باقاعدہ فزیکل کلاسز کو بحال کیا جائے تاکہ طلبہ کو معیاری تعلیم حاصل کرنے کا حق مل سکے۔
طلبہ کا مستقبل کسی بھی عارضی انتظامی فیصلے سے زیادہ اہم ہے۔

قراقرم انٹرنیشنل یونیورسٹی:
یونیورسٹی اوپن ہونے کے فورن بعد
یہ احتجاج کسی سیاسی مفاد کے لیے نہیں بلکہ ظلم، جارحیت اور استکبار کے خلاف ایک واضح مؤقف کے اظہار کے لیے ہوگا۔ ہم یہ واضح کرنا چاہتے ہیں کہ امت مسلمہ اپنے رہنماؤں کی توہین، شہادت اور مظلوم اقوام پر ڈھائے جانے والے مظالم پر خاموش نہیں رہ سکتی۔
طلبہ اپنے ضمیر کی آواز پر لبیک کہتے ہوئے پرامن مگر پُرجوش انداز میں شرکت کریں گے۔ ہمارا پیغام واضح ہے: ظلم کے خلاف آواز اٹھانا ہمارا حق بھی ہے اور ذمہ داری بھی۔
تمام طلبہ سے اپیل ہے کہ نظم و ضبط کا خیال رکھتے ہوئے اس احتجاج میں شریک ہوں اور اپنے اتحاد کا عملی مظاہرہ کریں۔
صدر آر ایس ایف
سرفراز علی صابری

السلام علیکم!

ان شاء اللہ، بہت جلد صدر روندو سٹوڈنٹس فیڈریشن (آر ایس ایف) سمیت فیڈریشن کی مرکزی کابینہ روندو کے باکردار اور غیور سیاستدان، افسران اور معروف کاروباری شخصیات سے ملاقات کے لیے روندو تشریف لائیں گے۔ اس ملاقات میں روندو سے تعلق رکھنے و تمام طلبہ و طالبات اپنے تعلیمی سفر میں درپیش مسائل اور مشکلات پر جامع گفتگو کریں گے، تاکہ ان کے حل کے لیے موثر اقدامات کیے جا سکیں۔