Expose Newspaper

Muling iginiit ng Securities and Exchange Commission ang zero-tolerance policy nito laban sa korapsyon matapos ang pagsasampa ng kaso kaugnay ng direktor ng SEC Butuan Extension Office.

Ayon sa SEC, mananatili ang kanilang paninindigan sa accountability, integrity, at rule of law, habang tiniyak din ang pagpapatuloy ng serbisyo publiko sa pamamagitan ng online platforms at iba pang SEC extension offices.

Basahin ang buong balita sa The Compass Chronicles.

SEC Vows Accountability After Butuan Case SEC reasserts zero tolerance for corruption after charges against Butuan office director

NACC, AGCI nagsagawa ng TBRI leadership workshop para sa child care professionals sa NCR

MANILA — Isinagawa ng National Authority for Child Care (NACC), katuwang ang All God’s Children International (AGCI) - Philippines, ang Trust-Based Relational Intervention (TBRI) Regional Leadership Workshop para sa mga social worker mula sa 16 local government units sa National Capital Region at mula sa NACC Regional Alternative Child Care Office - NCR (RACCO-NCR).

Ginanap ang tatlong araw na workshop noong Mayo 19 hanggang 21, 2026 sa Alino Hotel, Quezon City, kung saan 22 child welfare professionals ang lumahok upang mas mapalawak ang kanilang kaalaman sa trauma-informed care at mas epektibong pagtulong sa mga bata at pamilyang nangangailangan ng suporta.

Nakatuon ang pagsasanay sa TBRI, isang trauma-informed approach na tumutulong upang mas maunawaan ang epekto ng relational trauma at makabuo ng mas ligtas, mapagkalinga, at may tiwalang ugnayan sa pagitan ng mga child care professionals at kanilang mga kliyente.

Sa pamamagitan ng lectures, interactive activities, breakout sessions, at practical exercises, natutunan ng mga kalahok ang mahahalagang estratehiya sa TBRI Connecting, Empowering, and Correcting Principles na makatutulong sa healing, emotional regulation, at positive behavior ng mga batang kanilang pinaglilingkuran.

Sa kabuuang 22 kalahok, 16 ang kinatawan ng Local Social Welfare and Development Offices habang anim naman ang social workers mula sa RACCO-NCR.

Binigyang-diin ni NACC Undersecretary Janella Ejercito Estrada ang kahalagahan ng malasakit, pag-unawa, at responsive care para sa mga batang nakaranas ng trauma.

“The work we do for children is never easy, but it is always meaningful. Every effort we make today can and will change the course of a child’s future tomorrow for the better,” pahayag ni Estrada.

Kabilang sa mga resource speakers sina AGCI-Philippines Executive Director Teresa R. Coman at Outreach Manager Sarah B. Cabredo. Nagsilbi namang facilitators sa mga breakout sessions at workshop activities sina NACC Assistant Secretary Rowena Macalintal, Director Imelda Ronda, Gina Escalante, at Irene Fagayan.

Ayon kay Nicole Reyes, social worker mula sa Makati City Social Welfare Development Office, ang pagsasanay ay maayos ang pagkakabuo, puno ng mahahalagang impormasyon, at lubos na makatutulong sa kanilang tungkulin sa pagharap sa mga kliyente, lalo na sa pagrekomenda ng angkop na interbensyon.

Ibinahagi rin ni Maria Julie Ann Gosim ang kanyang kasabikan na maipasa sa kanyang mga kasamahan sa LGU ang mga kaalamang natutunan sa workshop at maisabuhay ang mga estratehiya sa pakikitungo sa kanilang mga kasamahan at kliyente.

Bilang susunod na bahagi ng NACC-AGCI partnership, ilulunsad sa Hulyo 2026 ang Phase 3 na kinabibilangan ng 10-week introductory TBRI course para sa limang domestic adoptive parents at limang foster families mula sa RACCO-NCR.

Ang mga session ay pangungunahan ng AGCI at NACC TBRI practitioners, kasama ang RACCO-NCR social worker-champions na nakatapos ng Phase 2 TBRI Regional Leadership Workshop. Layunin din ng inisyatiba na mapahusay ang preparation modules para sa adoptive at foster placements gamit ang TBRI approach.

Kauna-unahang Bantayog-Wika sa Aklan, planong itayo sa Kalibo

KALIBO, AKLAN — Planong maitayo sa bayan ng Kalibo ang kauna-unahang Bantayog-Wika sa lalawigan ng Aklan bago matapos ang taong 2026.

Pormal na iniharap ng Komisyon sa Wikang Filipino (KWF) ang Presentasyon ng Proyektong Bantayog-Wika 2026 sa Lokal na Pamahalaan ng Kalibo noong Mayo 21, 2026 sa Kalibo, Aklan.

Pinangunahan ni Komisyoner Carmelita C. Abdurahaman ang pagtalakay sa layunin, adhikain, modelo, at teknikal na aspekto ng proyekto kay Bise Alkalde at Kasalukuyang Nanunungkulang Alkalde ng Kalibo, Kgg. Phillip Yerro Kimpo Jr.

Nagpahayag naman ng buong suporta si Atty. Marites A. Barrios-Taran, Tagapangulo ng KWF, sa nasabing makasaysayang inisyatiba na layong higit pang kilalanin at ipagmalaki ang wikang kinagisnan at kulturang bumubuo sa pagkakakilanlan ng mga Aklanon.

Bilang bahagi ng paghahanda sa proyekto, nagsagawa rin ng ocular inspection sina Tagapangulong Barrios-Taran at Komisyoner Abdurahaman sa Pastrana Park, na matatagpuan sa sentro ng poblacion ng Kalibo. Tinitingnan ang lugar bilang potensiyal at praktikal na lokasyon para sa pagpapatayo ng bantayog.

Ang Bantayog-Wika ay isa sa mahahalagang proyekto ng Komisyon sa Wikang Filipino na naglalayong kilalanin, pangalagaan, at itampok ang yamang-wika at kultura ng iba’t ibang rehiyon sa bansa.

Sa oras na maisakatuparan, magsisilbi itong mahalagang sagisag ng pagpapahalaga sa wika, kasaysayan, at pagkakakilanlang pangkultura ng lalawigan ng Aklan.

Bayanihan para sa mga mag-aaral!

Matagumpay na nakiisa ang Camp Vicente Lim Press Corps sa isinagawang Brigada Eskwela upang makatulong sa paghahanda ng paaralan para sa pagbubukas ng klase.

Isa rin ang The Philippine Expose News Online and Newspaper sa mga naging sponsor ng nasabing Brigada Eskwela, sa pamamagitan ng pagbibigay ng cleaning materials para sa paaralan. Bukod dito, namahagi rin ang grupo ng school supplies sa 70 mag-aaral bilang suporta at inspirasyon sa kanilang pagbabalik-eskwela.

Patunay ito na sa pagkakaisa, malasakit, at bayanihan, mas marami tayong matutulungang kabataan at komunidad.







#𝘗𝘈𝘙𝘈𝘚𝘈𝘒𝘈𝘉𝘈𝘛𝘈𝘈𝘕

Camp Vicente Lim Press Corps Joins Brigada Eskwela 2026 Camp Vicente Lim Press Corps Joins Brigada Eskwela 2026 in Magdalena

Camp Vicente Lim Press Corps Nakiisa sa Brigada Eskwela 2026 sa Maravilla Elementary School

MAGDALENA, LAGUNA — Sama-samang nakiisa ang mga miyembro ng Camp Vicente Lim Press Corps, Inc. sa isinagawang Brigada Eskwela 2026 sa Maravilla Elementary School, Magdalena, Laguna ngayong Hunyo 5, 2026.

Layunin ng aktibidad na makatulong sa paghahanda ng paaralan para sa pagbubukas ng klase, sa pamamagitan ng bayanihan at pakikiisa ng media, mga g**o, magulang, volunteers, at mga katuwang na pribadong sektor.

Kabilang sa mga dumalo at nakiisa sa programa sina Daniel Castro ng DZJV, Turing Crisostomo ng Morning Chronicles, Joel Cabactulan, Josephine Escovidal ng The Philippine Expose News Online and Newspaper, Wilson Palima ng NSTV, Sheila Florentino ng Laguna Patrol, Mhadz Marasigan ng Rapid Journal, Susan Crisostomo, Kevin Pamatmat, Pau Mojar, Roy Tomandao ng Manila Standard, at Jackie Palima ng Radio Biñan.

Sa pamamagitan ng pagkakaisa ng Camp Vicente Lim Press Corps, naipakita ng grupo na ang tungkulin ng media ay hindi lamang sa pamamahayag, kundi maging sa aktibong pakikibahagi sa mga programang may direktang benepisyo sa komunidad, lalo na sa sektor ng edukasyon.

Nagpaabot din ng suporta ang mga partner at sponsor ng aktibidad, kabilang ang Mekeni, WalterMart, MPT South Management Corporation, CALAX-CAVITEX, Sun Life Financial, Urban Uptown Trading Corporation, at One Kaizenasia Corporation.

Ayon sa mga kasapi ng press corps, mahalagang suportahan ang Brigada Eskwela dahil ito ay isang konkretong halimbawa ng bayanihan kung saan ang bawat tulong, maliit man o malaki, ay may malaking ambag sa mas maayos, ligtas, at handang kapaligiran para sa mga mag-aaral.

Ang Camp Vicente Lim Press Corps, Inc. ay patuloy na nagpapakita ng malasakit hindi lamang sa paghahatid ng balita, kundi pati na rin sa pagsuporta sa mga makabuluhang programa para sa edukasyon at kapakanan ng mamamayan.

ABOITIZ CONSTRUCTION, REPUBLIC CEMENT IPINAGDIWANG ANG UNANG TAON NG MAINTENANCE OPERATIONS SA TERESA AT DANAO

Ipinagdiwang ng Aboitiz Construction, sa pamamagitan ng maintenance business segment nitong ACI Plus, at ng Republic Cement & Building Materials, Inc. ang unang taon ng tuloy-tuloy na maintenance operations sa mga planta ng Republic Cement sa Teresa, Rizal at Danao City, Cebu.

Ayon sa Aboitiz Construction, mahalagang bahagi ang milestone na ito ng patuloy na pagpapalakas ng kanilang maintenance services para sa malalaking industrial assets sa bansa.

Sa Republic Cement Teresa Plant 1, nakatuon ang ACI Plus team sa industrial housekeeping at buildings and grounds maintenance. Samantala, sa Republic Cement Danao plant, saklaw naman ng kanilang operasyon ang technical manpower at routine maintenance sa mechanical, electrical, instrumentation, at facilities works.

Binibigyang-diin ng unang taong operasyon sa dalawang planta ang mga naging tagumpay sa operational reliability, system improvements, at teamwork sa loob ng pasilidad.

Kasabay nito, nakapagbigay din ang Aboitiz Construction ng trabaho sa halos isang daang personnel, na naghatid ng dagdag na oportunidad para sa mga residente ng host communities.

Ayon kay Sebastian Aboitiz, Deputy Chief Operating Officer ng ACI Plus, ipinapakita ng matagumpay na operasyon sa Teresa at Danao ang commitment ng kanilang brand sa reliability at operational discipline.

“The success of our operations at Republic Cement Teresa and Danao reflects our brand's commitment to reliability and operational discipline. The team’s ability to manage diverse scopes of work across different sites demonstrates our growing expertise in providing maintenance services for large-scale industrial assets,” pahayag ni Aboitiz.

Nagpahayag din ng pagkilala ang Republic Cement sa naging performance ng ACI sa kanilang mga planta.

“At Republic Cement, we are pleased with the strong performance of ACI in our Teresa and Danao plants. As one of the country’s leading cement manufacturers, we place the highest value on safety, reliability, and operational excellence — and ACI has consistently demonstrated these qualities,” ani Reinier Dizon, President ng Republic Cement & Building Materials, Inc.

Ayon sa Aboitiz Construction, ang matagumpay na unang taon ng ACI Plus sa Teresa at Danao ay patunay ng lumalawak nitong portfolio sa maintenance services at ng patuloy na pagtutok sa technical mastery, safety, at operational excellence.

Habang papasok sa ikalawang taon ng operasyon, nananatiling nakatuon ang kumpanya sa pagiging “Engineered for Excellence” at sa pagsuporta sa industrial efficiency ng kanilang mga partners.
photo credit to Balita Ngayon

Mas pinaiigting ng MPTC ang paghahanda kontra baha sa Southern Metro Manila at mga karatig lalawigan sa pamamagitan ng kauna-unahang Flood Mitigation Forum sa South.

Layunin ng pagtitipon na palakasin ang koordinasyon ng mga ahensya ng pamahalaan, LGUs, at iba pang sektor upang mas mapabuti ang flood control, drainage systems, solid waste management, at disaster resilience ng mga komunidad.

Basahin ang buong ulat dito:

MPTC Pushes Flood Resilience in South Metro MPTC Holds Flood Mitigation Forum to Strengthen Resilience in Southern Metro Manila and Nearby Provinces

MPTC nagsagawa ng Flood Mitigation Forum para palakasin ang paghahanda kontra baha

Pinagsama-sama ng Metro Pacific Tollways South o MPTS, ang south arm ng Metro Pacific Tollways Corporation, ang iba’t ibang ahensya ng pamahalaan, local government units, at mga komunidad na sakop ng CALAX at CAVITEX upang mas mapalakas ang pagtutulungan sa pagtugon sa paulit-ulit na problema sa pagbaha sa Southern Metro Manila at karatig lalawigan.

Ito ang kauna-unahang Flood Mitigation Forum na isinagawa sa South, na nagsilbing plataporma para sa multi-sectoral dialogue, pagbabahagi ng datos, at koordinadong pagpaplano sa mga hakbang kontra pagbaha.

Ayon kay MPTC Chief Tollways Development and Engineering Officer Gil F. Amilbangsa, layunin ng forum ngayong taon na patatagin ang kooperasyon ng mga ahensya ng gobyerno at LGUs sa pagtugon sa mga paulit-ulit na hamon ng pagbaha sa Metro Manila at mga kalapit na lalawigan.

Dumalo sa MPTC Flood Mitigation Forum 2026 ang mga kinatawan mula sa Office of Civil Defense, Department of Environment and Natural Resources, Department of the Interior and Local Government, Department of Public Works and Highways, Metropolitan Manila Development Authority, at Provincial Environment and Natural Resources Office.

Nakiisa rin sa talakayan ang Toll Regulatory Board, Philippine Reclamation Authority, at PEA Tollway Corporation, kasama ang mga kinatawan mula sa Las Piñas, Parañaque, Pasay, Taguig, Cavite, at Laguna.

Kabilang din sa mga dumalo sina Cavite Governor Francisco Gabriel “Abeng” Diaz Remulla, Office of Civil Defense Director Jose Harry M. Barber, Biñan City Councilor Titus Bautista, at dating Senador Cynthia Villar ng Villar SIPAG Foundation.

Nagbigay naman ang AMH Philippines, na kinuha ng MPT South, ng flood risk area data at assessments upang matukoy ang mga kritikal na lugar na madalas bahain at masuportahan ang evidence-based planning para sa flood mitigation.

Binigyang-diin sa talakayan ang malaking epekto ng maling pagtatapon ng basura sa pagbaha, lalo na sa mga low-lying communities. Muling iginiit ng mga LGU ang pagpapatibay ng pagpapatupad ng anti-littering at solid waste management ordinances, kasabay ng regular na paglilinis ng drainage systems at pagbabantay sa mga pangunahing daluyan ng tubig.

Ayon kay OCD Director Jose Harry M. Barber, mahalaga ang good governance sa epektibong flood mitigation, lalo na sa pagpapatupad ng Disaster Risk Reduction and Management. Aniya, mahalaga rin ang partisipasyon ng komunidad upang mas maging angkop at epektibo ang mga hakbang laban sa pagbaha.

Patuloy namang nakikipagtulungan ang mga LGU sa mga barangay at volunteer groups para sa community-based environmental education campaigns, wastong waste segregation, infrastructure planning, at disaster risk reduction initiatives.

Sinabi ni MPT South President and General Manager Andrew B. Pangilinan na ang multi-sectoral collaboration ay nagbibigay ng pag-asa sa mga komunidad sa South, lalo na tuwing panahon ng bagyo.

“We, at MPT South, will continue to work closely with LGUs and national government agencies to translate discussions into action,” pahayag ni Pangilinan.

Nagtapos ang forum sa mga pangako ng mga stakeholder na pagbutihin ang drainage systems, palakasin ang flood control management, paigtingin ang disaster resilience, at patatagin ang koordinasyon ng iba’t ibang ahensya.

Ipinapakita ng Flood Mitigation Forum 2026 ang patuloy na commitment ng Metro Pacific Tollways Corporation Group na magbigay ng plataporma para sa mas malawak na pagtutulungan at konkretong aksyon laban sa pagbaha sa mga komunidad.

PDIC: Pag-iimpok at pagprotekta sa pera, maituturo sa kulturang Pilipino

Hinimok ng Philippine Deposit Insurance Corporation o PDIC ang publiko na gawing bahagi ng pang-araw-araw na disiplina ang pag-iimpok at pangangalaga sa pinaghirapang pera, kasabay ng paggunita sa National Heritage Month.

Sa inilabas na pahayag ng PDIC, inihalintulad nito ang wastong pamamahala ng pera sa tradisyunal na sayaw na Pandanggo sa Ilaw, kung saan kailangan ang balanse, disiplina, pokus, at maingat na pagkilos upang hindi malaglag ang mga basong may ilaw.

Ayon sa PDIC, tulad ng isang mananayaw na kailangang panatilihin ang balanse habang hawak ang mga baso, kailangan din ng bawat Pilipino na matutong balansehin ang gastusin, ipon, bayarin, at pang-araw-araw na pangangailangan upang maiwasan ang pagkukulang sa panahon ng “petsa de peligro.”

Binigyang-diin din ng ahensya na ang financial security ay hindi nabubuo sa isang bagsakan lamang. Kailangan umano ito ng tuloy-tuloy na disiplina, kahit sa pamamagitan ng maliit ngunit regular na paglalaan ng bahagi ng kita para sa ipon.

Pinaalalahanan din ng PDIC ang publiko na hindi sapat na mag-ipon lamang, dahil mahalaga rin na maprotektahan ang naipong pera. Sa halip na itago lamang sa bahay, mas ligtas anila na ilagay ang ipon sa bangko upang magkaroon ito ng mas maayos na proteksyon.

Tiniyak ng PDIC na ang mga bank deposit ay protektado hanggang ₱1 milyon kada depositor, kada bangko, upang mabigyan ng kapanatagan ang mga Pilipino na ligtas ang kanilang pinaghirapang ipon sa panahon ng pangangailangan o hindi inaasahang pagkakataon.

Dagdag pa ng PDIC, gaya ng mga katutubong sayaw na naipapasa mula sa isang henerasyon patungo sa susunod, maaari ring maipamana sa pamilya at komunidad ang mabuting gawi sa pag-iimpok, pagiging disiplinado sa pera, at pagprotekta sa pinaghirapan.