Chetan pyakurel

हे नेपाल आमा, तिम्रा काखका सन्तान फेरि जागेका छन्,
वर्षौँको मौनता चिर्दै, नयाँ सपना बोकी अघि लागेका छन्।
भोलिको त्यो बिहानीले एउटा नयाँ युगको सङ्केत गर्नेछ,
तिम्रो अस्मिता र हाम्रा अधिकारको रक्षा अब मतले गर्नेछ।

​कति सह्यो आमा तिमीले, केवल आश्वासन र रित्तो झोला,
अब सोच्नुपर्छ हामीले, भोलिको सुन्दर बिहानी कस्तो होला?
पुरानो बाटोमा हिँडेर नयाँ गन्तव्य भेटिने छैन,
परिवर्तनका लागि नजुटी, यो देश अब बन्ने छैन।

​एउटा छाप, एउटा मत, तर शक्ति छ यसमा अपार,
गलतलाई बिदाइ गरी, असललाई रोज्ने यो हो हामी सबैको अवसर।
नलोभिनु मासु र रक्सीमा, नझुक्नु डर र त्रासमा,
भोट हालौँ विवेकले, नेपाल आमाको अटल विश्वासमा।