Model World

■ မူးယစ်ပြဿနာအတွက် စိုးရိမ်စရာဖြစ်နေတဲ့ Hi ခန်းတွေကို စီမံချက်နဲ့ လုပ်ဆောင်သင့်ပြီလား

■ အနည်းဆုံး ကျပ်သိန်း ၅၀ မှ ကျပ်သိန်း ၁၅၀ အထိ ကုန်ကျသည့် Hi ခန်းများကြောင့် မြန်မာ့လူမှုအသိုင်းအဝိုင်းတွင် ထိခိုက်နစ်နာဆုံးရှုံးမှုများ ဖြစ်ပွားနေ

“လစ်ကြမယ်လေ” ဆိုသည့် စကားလုံးမှာ ပြီးခဲ့သည့်နှစ်ပိုင်းကတည်းက လူငယ်ထုများသာမက လူလတ်ပိုင်းအရွယ်များတွင်ပါ ခေတ်စားလာသည့် စကားလုံးဖြစ်သည်။

အဆိုပါ ‘လစ်ကြမယ်လေ’ ဆိုသည့် စကားလုံးမှာ Hi ခန်းသို့ သွားရောက်ကာ အနားယူမည့်သူများအကြား သုံးစွဲခြင်းဖြစ်သည်။

■ Hi ခန်းဆိုတာ ဘယ်လိုမျိုးလဲ

မန္တလေးမြို့တွင် Hi ခန်းပါသည်ဆိုသည့် KTV ၅၀ ကျော်အား တစ်လပိတ်အရေးယူထားပြီး ကျန်ရှိသည့် ဆိုင်များကို ရှောင်တခင်စစ်ဆေးအရေးယူမည်ဟု မန္တလေးမြို့အုပ်ချုပ်ရေးပိုင်းမှ တာဝန်ရှိသူတစ်ဦးက ပြောကြားခဲ့သည်။

“အခုပိတ်သိမ်းခိုင်းလိုက်တဲ့ဆိုင်တွေက ကျော်စောမှုနဲ့ပါ။ KTV ဆိုတာ သီချင်းဆိုရတဲ့ ဝန်ဆောင်မှုပဲ ရရမှာ။ အခုက Happy Water လို မူးယစ်ဆေးတွေသုံး၊ DJ တွေခေါ်ပြီး တစ်ညလုံး မတ်တပ်ရပ် ခေါင်းညိမ့်နေကြတာ လေ။ ဆိုင်တွေကို ပထမအဆင့် သတိပေးထားပြီးသားပါ။ လက်ရောက်ဖမ်းဆီးရမိရင်တော့ ဥပဒေနဲ့အညီ အရေးယူဆိုင်ပိတ်သိမ်းတာတွေထိ ရှိလာမယ်။ ကျန်တဲ့ဆိုင်တွေကိုလည်း ရှောင်တစ်ခင်စစ်ဆေးမှုတွေ ပြုလုပ်နေတယ်” ဟု အရေးယူမှုနှင့်ပတ်သက်ပြီး အုပ်ချုပ်ရေးပိုင်းမှ တာဝန်ရှိသူတစ်ဦးက ပြောကြားသည်။

ကနဦး ကျော်စောမှုဖြင့် တစ်လပိတ်ခံရသည့် ဆိုင်အရေအတွက်မှာ ၂၅ ဆိုင်ဖြစ်ပြီး နောက်ပိုင်းတွင် ဆိုင်အရေအတွက်တိုးလာကာ ၅၃ ဆိုင်အထိရှိခဲ့သည်ဟု သိရသည်။

လူငယ်ပိုင်းသာမက လူလတ်ပိုင်းအရွယ်များအကြားတွင် ခေတ်စားနေသည့် Hi ခန်းဆိုသည်မှာ အခန်းတစ်ခန်းအတွင်း လာရောက် အနားယူသူများအတွက် သီးသန့် DJ ဖွင့်သူ၊ အနားယူသူများအတွက် အမျိုးသမီး ငယ်များလည်း ပါဝင်သည်။

ထို့ပြင် မပါမဖြစ် ပါဝင်သည့်အရာမှာ မူးယစ်ဆေးများပင်ဖြစ်သည်။ Hi ခန်းသို့ လာရောက်သူများအတွက် ရွေးချယ်ရမည့်အရာနှစ်ခုရှိသည်။

ယင်းနှစ်ခုမှာ မူးယစ်ဆေးဝါးရွေးချယ်ရန်နှင့် အမျိုးသမီးငယ်များ ရွေးချယ်ရခြင်းဟု ဆိုသည်။

သွားရောက်သူအချို့၏ ပြောကြားချက်အရ Items ဆိုသည်မှာ အခန်းအတွင်း သုံးစွဲမည့် Happy Water ဟုခေါ်သည့် မူးယစ်ဆေးကို ရွေးချယ်ခြင်းဖြစ်သည်။

“အဲ့ဒီကောင် (Happy Water) က ကာလာမျိုးစုံလာတယ်။ လိမ္မော်ရောင်ရော အပြာရောင်ရော အမျိုးစုံပဲ။ တစ်ထုပ်ကို ၁၀ ယောက်သောက်လို့ရတယ်။ အထုတ်ကို ဖောက်လိုက်ရင် ရေကရားတခုထဲကို ရေနဲ့ ထည့်ဖျော်ရတယ်။ ပြီးတာနဲ့ ဖန်ခွက် ၁၀ ခွက်စီကို အညီအမျှ ထည့်ပေးတယ်” ဟု မန္တလေးမြို့ရှိ Hi ခန်းတစ်ခုသို့ ရောက်ရှိခဲ့သူတစ်ဦးက ပြောကြားသည်။

အခန်းအတွင်း ဖွင့်လှစ်ထားသည့် DJ သံမှာ ညလုံးပေါက် ဖွင့်လှစ်ထားခြင်းကြောင့် ကခုန်မည့်သူများမှာ အဆိုပါ Happy Water ကို သောက်သုံးပြီးမှသာ ဆူညံသံများကို ခံနိုင်ရည်ရှိသည်ဟု သိရသည်။

“အခန်းမှာက တညလုံးကို ကဲကြတာ။ သောက်ပြီးတာနဲ့ ခဏနေ တက်လာရော။ ဘယ်လောက်ဆူဆူ အာရုံထဲမှာ လွင့်နေရောပဲ” ဟု သုံးစွဲဖူးသူတစ်ဦးက ပြောကြားသည်။

ထို့ပြင် လူမှုကွန်ရက်မီဒီယာတစ်ခုဖြစ်သည့် Tiktok ပေါ်တွင်လည်း Hi ခန်းအတွင်း Happy Water သုံးစွဲသူများ ကခုန်နေသည့် မြင်ကွင်းများမှာလည်း ဒုနှင့်ဒေးရှိနေသည်ကို တွေ့ရသည်။

“Tiktok ပေါ်မှာ Hi ခန်းလို့ ရိုက်ရှာကြည့်လိုက်ရင် တင်ထားတာတွေ အများကြီးပဲ။ မမြင်ချင်မှ အဆုံးပဲ” ဟု မန္တလေးမြို့ခံ စီးပွားရေးသမားတစ်ဦးက ပြောကြားသည်။

■ Hi ခန်းတွင် မပါမဖြစ်သည့်အရာ

Hi ခန်းတွင် မပါမဖြစ်သည့်အရာမှာ Happy Water ပင်ဖြစ်သည်။

မူးယစ်ဆေးတစ်မျိုးဖြစ်သည့် Happy Water ဆိုသည်မှာ ရေနှင့် ဖျော်ကာသောက် သုံးရသည့်အရာဖြစ်ပြီး လာရောက်သူများအများစုမှာ သောက်သုံးကြသည်ဟု ဆိုသည်။

ထို့ပြင် ယင်းမှ တစ်ဆင့်တက်ကာ E (အက်တက်စီ)၊ K (ကတ်တမင်း) အစရှိသည့် မူးယစ်ဆေးဝါးများကို သုံးစွဲကြသည်ဟု သိရသည်။

အဆိုပါမူးယစ်ဆေးဝါးများမှာ ဓာတုဗေဒနည်းဖြင့် ထုတ်လုပ်ထားသည့် မူးယစ်ဆေးဝါးများလည်းဖြစ်သည်။

Happy Water တွင် MDMA-E၊ Caffeine၊ Tramadol၊ Ketamine စသည်တို့ ပါဝင်ကြပြီး Party Pill၊ Club Drugs များတွင် အရက်၊ ဆေးရွက်ကြီး၊ ဆေးခြောက်၊ မက်ဖက်တမင်း (မြင်းဆေး) နှင့် ဘိန်းဆီတို့မှ ပေါင်းစပ် ထုတ်လုပ်ထားခြင်းဖြစ်သည်။

K ဟု ခေါ်ဆိုသည့် ကတ်တမင်းမှာ လူနာများကိုခွဲစိတ်ရာတွင် မေ့ဆေးအဖြစ်အသုံးပြုသည့် ဆေးဝါးတစ်မျိုးဖြစ်သော်လည်း ပြင်ပတွင်သုံးစွဲသူများမှာ အမှုန့်အဖြစ် ရှုရှိုက်ကာ အသုံးပြုနေခြင်းဖြစ်သည်။ E ဟု အလွယ်တကူခေါ်ဆိုသည့် အက်တက်စီဆေးပြားများကို အရက်ဖြင့် တွဲဖက်သုံးစွဲပါက အာနိသင်ပိုမို ကောင်းမွန်သည်ဟုဆိုသည့် အယူအဆဖြင့် သုံးစွဲနေကြခြင်းဖြစ်သည်။

■ Hi ခန်းကို သွားရင် ဘယ်လောက်ကုန်သလဲ

နာမည်ကြီးနေသည့် Hi ခန်းတစ်ခန်း အသုံးပြုလျှင် အနည်းဆုံး ကျပ်သိန်း ၅၀ မှ ကျပ်သိန်း ၁၅၀ အကြားကုန်ကျသည်ဟု မန္တလေးမြို့ခံစီးပွားရေးသမားတစ်ဦးက ပြောကြားသည်။

“အနည်းဆုံး ၅၀ ကနေ ၁၅၀ အကြား ကုန်တယ်။ တချို့ဆိုရင် နေ့စဉ်ရက်ဆက်ယူကြတော့ အနည်းဆုံး သိန်းကို ရာဂဏန်းနဲ့ချီ ကုန်ကျတယ်” ဟု အဆိုပါစီးပွားရေးလုပ်ငန်းရှင်က ပြောကြားသည်။

မန္တလေးမြို့ရှိ Hi ခန်းများမှာ နေရာကျယ်ဝန်းမှုနှင့် ဝန်ဆောင်မှုများအပေါ်မူတည်ကာ ကျပ်သိန်း ၅၀ အနည်းဆုံးကုန်ကျပြီး ရန်ကုန်မြို့ရှိ Hi ခန်းများမှာ အနည်းဆုံး ကျပ် ၁၀ သိန်းမှ စတင်ကာ ကုန်ကျသည်ဟု Eleven Media ၏ စုံစမ်းမှုများအရ သိရသည်။

အဆိုပါ Hi ခန်းများတွင် ကုန်ကျသည့် ငွေမှာ တစ်ညလျှင် ကျပ်သိန်းရာနှင့်ချီရှိသည့်အတွက် တိုင်းပြည်အတွက်လည်းနစ်နာဆုံး ရှုံးမှုများရှိနေသည်။

“Hi ခန်းတွေဆိုရင် ညလုံးပေါက်နီးပါး အခန်းပြည့်ကြတယ်။ အဲ့ဒီမှာ သုံးစွဲတဲ့ငွေက ဘီလျံနဲ့ချီရှိလောက်တယ်။ ဒါကမန္တလေးတခုတည်းမှာရှိနေတာ။ ကျန်တဲ့ဒေသတွေမှာပါ ထည့်တွက်ရင် မနည်းဘူး။ အဲ့ဒီမှာလည်ပတ် နေတဲ့ငွေက” ဟု မန္တလေးမြို့ခံ စီးပွားရေးသမားတစ်ဦးက ပြောကြားသည်။

■ ဘဝတွေကို ဖျက်ဆီးနေတဲ့ Hi ခန်း

Hi ခန်းများတွင် ညလုံးပေါက်နေထိုင်ပြီး မူးယစ်ဆေးဝါးများ သုံးစွဲပြီးနောက်ပိုင်းတွင် လူမှုစီးပွားများလည်း ပျက်စီးခဲ့သူများရှိသည်ဟု သိရသည်။

“အဲ့ဒီကောင် စွဲသွားရင် လူမှုရေးတွေရော၊ စီးပွားရေးတွေရော အကုန်ပျက်ကုန်တာပဲ။ အဓိက လူကုံထံအသိုင်းအဝိုင်းမှာက အဲ့ဒါကြီးက တော်တော်လေးကို ဆိုးဆိုးရွားရွား ဖြစ်နေတယ်” ဟု စီးပွားရေးလုပ်ငန်းရှင်တစ်ဦးက ပြောကြားသည်။

“Hi ခန်းထဲမှာ ကျနော်တို့အားလုံး မူးယစ်ဆေးဝါးမျိုးစုံသုံးပြီး အတုအယောင်တွေနဲ့ မေ့မျောပျော်ရွှင်နေချိန်မှာ အိမ်မှကျန်ရစ်ခဲ့ကြတဲ့ ဇနီးမယားသမီးသားတွေကတော့ ‘ငါ့ခင်ပွန်းလင်ယောက်ျားကြီး အန္တရာယ်မှကင်းရဲ့လား၊ Hi ခန်းသွားရင်း ရဲဖမ်းခံရမလား စစ်ပဲဖမ်းခံရမလား၊ လူများမှားဖမ်းမလား၊ မသင်္ကာလို့များ ဖမ်းသွားမလား၊ ဟိုဘက်ကလား ဒီဘက်ကလား၊ ကောင်မလေးချောချောလေးနဲ့များဖက်ကနေမလား စတဲ့တဖက်သတ်တည် ဆောက်မှုတွေနဲ့စိုးရိမ်သောက ဗျာဘာဒများ နေရတဲ့သူတို့ရဲ့ အိပ်စက်ခြင်းတွေ၊ တရေးနိုးရင်း သူ့အဖေကိုစမ်းရှာနေတဲ့သားရဲ့စကားသံက ‘မေမေ ဖေဖေဘာလို့ပြန်မလာသေးတာလဲ ဖေဖေဗိုက်ပေါ်သားခြေထောက်တင်ပြီးအိပ်ချင်တယ်’ ဆိုတဲ့ ဖခင်တယောက်ရဲ့ မေတ္တာဓာတ်ကို အသားချင်းထိစပ်ပြီး လိုချင်နေရှာတဲ့ ရင်သွေးလေးတွေရဲ့ တမ်းတမှုတွေ နဲ့ သူတို့လေးတွေခမျာ နှစ်နှစ်ခြိုက်ခြိုက် အိပ်မပျော်နိုင်ကြပါ။ Hi ခန်းထဲက ကျနော့်သူငယ်ချင်းများ နောက်ချန်မိသားစုရဲ့ ဝေဒနာ တချို့ကို ခံစားကြရဲ့လားလို့တော့ မမေးတော့ပါဘူး။ တခါတလေမှာ စီးပွားရေး၊ လူမှုရေးအရ လက်လွှတ်လို့မရတဲ့ Hi ခန်းယဉ်ကျေးမှု သဘောသဘာဝဟာ ဓလေ့သဖွယ် ခေတ်ထလာတယ်ဆိုပေမဲ့ တချို့မျိုးဆက်သစ်တွေ အသက်တွေ စတေးနေရ၊ တချို့အိမ်ထောင်ရေးတွေ ဖျက်ဆီးခံနေရ၊ တချို့လုပ်ပိုင်ခွင့်ရှိသူတွေ ရာထူးတွေ ရင်းနေရတယ်။ အားလုံးကို ခြုံကြည့်ရင်တော့ Hi ခန်းဆိုတာ အ ကောင်းပြန်ရတဲ့ရာခိုင်နှုန်းကြတော့ နည်းလွန်းလှပါတယ်” ဟု Hi ခန်းများသို့ သွားရောက်လည်ပတ်ဖူးခဲ့သူတစ်ဦးက လူမှုကွန်ရက်တွင် ရေးသားထားသည်။

■ စီမံချက်နဲ့ တိုက်ဖျက်ပစ်ဖို့လိုအပ်နေတဲ့ Hi ခန်း

ကျပ်သိန်း ၅၀ အနည်းဆုံးကုန်ကျနေသည့် Hi ခန်းများမှာ ရန်ကုန်၊ မန္တလေး အစရှိသည့်မြို့များတွင်သာမက မူဆယ်၊ မြဝတီ၊ တာချီလိတ် အစရှိသည့် မြို့များတွင်ပါ ကျယ်ကျယ်ပြန့်ပြန့်ရှိနေသည်။

ယင်းနှင့်အတူ စိတ်ကြွမူးယစ်ဆေးဝါးများနှင့် အသွင်ပြောင်းဆေးဝါးများမှာလည်း ဖမ်းဆီးရမိမှုများရှိနေသော်လည်း လူငယ်ထုနှင့် လူလတ်ပိုင်းများအကြား သုံးစွဲမှုများရှိနေသည်။

ပြည်ထဲရေးဝန်ကြီးဌာန၏ ထုတ်ပြန်ချက်များအရ တောင်ကြီး၊ ရန်ကုန်၊ မန္တလေး၊ စစ်ကိုင်းတိုင်းဒေသကြီးအတွင်းရှိ တမူး၊ ကသာနှင့် ရွှေဘိုမြို့တို့တွင် ၂၀၂၅ ခုနှစ်တွင် ဖမ်းဆီးရမိသည့် မူးယစ်ဆေးဝါးများနှင့် ဓာတုပစ္စည်းများကို မီးရှို့ဖျက်ဆီးခဲ့ရာ ဘိန်း ၁၃၃၄ ကီလိုကျော်၊ ဘိန်းဖြူ ၁၇၄၄ ကီလိုကျော်၊ စိတ်ကြွရူးသွပ်ဆေးပြား ၂၈၁ သန်းကျော်၊ အိုက်စ် ၁၆၂၁၀ ကီလိုကျော်၊ စိတ်ပြောင်းဆေးဝါး Happy Water ၂၁၅ ကီလိုကျော်၊ ဘိန်း စာမှုန့် ၁၁၄ ကီလိုကျော်၊ ဆေးခြောက် ၅၉၇ ကီလိုကျော်နှင့် ကက်တမင်း ၈၅၇၃ ကီလိုကျော်အပါအဝင် မူးယစ်ဆေးဝါးနှင့် ဓာတုပစ္စည်း ၆၆ မျိုး၊ စုစုပေါင်းတန်ဖိုး မြန်မာငွေ ကျပ် ၁၀၇၂ ဘီလျံကျော် (အမေရိကန်ဒေါ်လာ ၂၉၇ သန်းကျော်) တို့ကို ဖျက်ဆီးခဲ့သည်။

ယင်းတို့အနက် Happy Water စိတ်ပြောင်းဆေးဝါးများကို ဖမ်းဆီးရမိမှုမှာ တစ်နှစ်ထက်တစ်နှစ်ပိုများလာသည်ဟု ဆိုရမည်ဖြစ်ပြီး ပြည်ထဲရေးဝန်ကြီးဌာန၏ မူးယစ်ဆေးဖမ်းဆီးရမိမှု သတင်းထုတ်ပြန်ချက်များတွင် ယင်းစိတ်ပြောင်းဆေးဝါးဖမ်းဆီးရမိမှုများကို ခပ်စိတ်စိတ်တွေ့နေရသည်။

ထို့ကြောင့် လူငယ်ပိုင်းနှင့် လူလတ်ပိုင်းများအကြားတွင် တဖြည်းဖြည်းစိမ့်ဝင်လာသည့် Hi ခန်းယဉ်ကျေးမှုကို စီမံချက်ဖြင့် နှိမ်နင်းရန်လိုအပ်လာပြီဖြစ်သည်။

Hi ခန်းများကြောင့် မိသားစုဘဝပျက်ခြင်း၊ စည်းစိမ်ဥစ္စာပျက်သုဉ်းခြင်းများမှာလည်း တစ်စထက်တစ်စ ပိုမိုများပြားလာရာ မြန်မာ့လူမှုအသိုင်းအဝိုင်းတွင် ပျက်စီးမှုများကို သယ်ဆောင်လာသည့် Hi ခန်းများကို အရေးယူနှိမ်နင်းရန်လိုအပ်လာပြီဖြစ်သည်ဟု ဆိုရမည်ဖြစ်သည်။