Myenigone Baptist Church - Homalin

Tuni Houkhom (Online)

Sermon- Rev Letkhothang

8 August 2021 (Sunday)
Kuki Baptist Church, Myenigone

BIBLE SUNDAY : SERMON OUTLINE
--------------------------------------------

Bible thuchang hi hoiyakon ham?
------------------------------------------

Greek paovin "biblion? ahin, 'lekha bu/ lekha lom' tina ahi. Nidang laiyin printing press leh lekha-del(paper) aumlou jehin Papyrus kung pheh bangin asemuvin, achunga lekha asutjiuva, ajellom jiu ahi. Bible jong chutia chu kisun a kijeljui ahi.

Scripture kiti ipi seina ham?
-----------------------------------

Greek paovin"graphe" ahin, English in "writing" tina ahi. Pathen hinphondoh thuho sutdohna tina ahi (2Chron.23:18). NT sung ahjong chuche lekha bu ho seina'n akimangin ahi (Matt.21:42; Lk.24:27).

Bible Thuneina (authority) Hoiyakon ham?
-----------------------------------------------------

Bible ah "Pathen in aseiye" ti kamchang hi 3800 valbang akimun ahi. Asunga thuho mihemte bolthu hilouva, Pathen'a hungkon thubou ahina avetsahin ahi( Exo.14:1; Deut.4:2, Isa.1:10; Jer.1:11; etc.). Hijeh achu mihem koiman Bible abelap theilouding; asemphat theilou ding; alahdoh theilouding ahi (Rev.22:18-19).

Mihemten Pathen' lungthim iti ihetdiu ham?
-----------------------------------------------------

Pathen, Ama ahung kiphondoh louleh mihem koiman ahetjou louding ahi. Amatah ahung kiphondohna chu "revelation" akitin ahi. Pathen hungkiphonna hi "revelation" akitibangin Pathen hinphondoh thuho sutdohna hi "humopna" (inspiration) akitin ahi (2Tim.3:16-17). Bible bu 66 sundin mitheng 40 Pathen in amangin, k*m 1600 sung Asotin ahi. OT 39 hi AD 90 k*m a kinamdet a, NT 27 hi AD 369 k*m a kinamdet ahi.

Pathen hungkiphonna itobangho ham?
----------------------------------------------------------

Nidang laichun vantil hoa kon, meilom, meikong, awgin, chuleh janmang akon Pathen akiphong juijin ahi. Jesu toh ahung kiphondohna leh Bible a ahung kiphonna hi athupipen ahi. Bible bu 66 achamkim a kipatin hiche Bible bouseh toh Pathen in mite ahoulimpi ahitai. Mi tamtahin lampi chomchom a Pathen houpina tahsan umjongleh Bible bousehtoh Pathen in mihemte ahoulimpia, alamkai ahitai ti thutah chunga dindetding avattai.

Bible sunga adihlou umtheiding ham?
----------------------------------------------

Mi tamtahin mihemte sut ahijehin adihlouna umteitei ding tin ageluvin ahi. Mihem bouseh sut hilevang adihloujong umthei nante. Ahin, mihemte mangcha a Pathen lhagao Theng sut ahijehin adihlouna umthei louding ahi. Ajehchu Pathen kheltheilou ahi (2Pet.1:21). Adihlouna umteiding tiho chun Pathen hina (character) taitom sohdiu ahi. Sutdan, mudan kibanglouho adihlou akitheipoi. E.g. Gospel 4 hon Jesu amudan-u le asutdanho kibanghih jongleh akhel'e tithei ahipoi.

Mi 40 bangin asutchu akikalna umlou ding ham?
-------------------------------------------------------------

Khat le khat asutphat, adinmun, natohmun kibanglou cheh ahivangun, Lhagao Theng khat bouvin ahil-u ahijehin athu jouseu kikallou helin along khom in ahi. Moses- Political leader; Joshua- military leader; David- kelngoiching; Solomon- leng; Matthew- taxcollector; Luke-medical doctor;Paul-Rabbi; leh Peter-fisherman ahiuvin, asutnau mun: Europe, Asia leh Africa ahiuve. Paul sut-ho Europe pan ahin, Jeremiah sut-ho Africa leh adangse Asia gamsunga kisun ahiuve. Hichan geiya Bible pumpi thukhat ahina hi Pathen khatseh akon leh lhagao Theng khatseh mapuina vang ahi.

Pathen' Humopna chungthua Pomdan chomchom Ho:
-------------------------------------------------------------------

1. Bible sunho hi thepna le chihna neijeng ahiuvin, Pathen akon humopna ngailouva asutjengu tia tahsan loikhat aum e.
2. Christian konkhat hi lhagaolam thugil hethem aumin amaho chun asut u ahi tia tahsan loikhat aum e.
3. Konkhat invang, humop hicheh jongleh khat le khat akibangpoi.Isaiah Pathen humopdan le Acts Pathen humopdan degree kibang louding ahi tia ngaito aumin ahi.
4. Pathen in lunggel-thulu(idea/concept) apeh a, asutvang amaho cham a asut jengu ahi tia tahsan jong aumin ahi.
5. Konkhat vangin imajouse Pathen in aseiya, mihemten asutdoh atiuvin ahi(dictation).

Achunga pomdanho ivet leh thudih themchacha ajaonai. Ahinlah, thutah neucha umchun, athujouse adih asosahpon ahi. Tuibel theng khat sunga tui thenglou themcha kisunglut chu koiman tui-theng atilouding ahi.

Bible Bu 66 hi iti hung kichomkhom hiding ham?
-----------------------------------------------------------

Pathen in Ama hephalou Cyrus lengpa amanchah a Israelte asochat nadiu leh Hou-In sahdohna dia apanpi bangin, hiche Bible Bu 66 suhtupna din Pathen in thunei vaipo ho (Church Councils) amangcha'n ahi. Jesu thua tahsan dihlou ho jong hiche councils hon ademuvin; Bible bu 66 hojong amahon aphudet jehuva mi tamtahin akhutsan thei paijeng ahi(Recognition, not determination). Roman Catholics hon Bible hi Houbung semdoh atinau ajehchu Councils akon hung kilhengchil ahinajeh ahi. Pathen in councils ho mangcha a anatohna ahetkhel jeh-u ahi.

Pathen' Humop ahi/ahilou iti ahetkhen theiyu ham?
----------------------------------------------------------------

Pathen' sathaunu (anointed) themgao ho, thutan vaihom ho, Jesu' thi le thodoh amit tahuva mu Seijui ho sut ahi/hilou kive masa jui ahi. Chuleh asunga um thuho (content) kivekit jui ahi. Chukit leh akisut phat jong kive ahi. E.g. Apocrypha kiti ho hi Pathen le mihemte kizoplou (Silent Years) phatsunga kisun ahijehin Pathen humop ahipoi kiti ahi. Hitia chu Canonicity kiti Bible suhchilna hung um ahi. Seisa bangin AD 369 k*m a hi Bu 66 aboncha Pathen' humop a hung kilheng chilpan ahi.

Vannoi mijouse dinga idia Bible hi thupi ham?
------------------------------------------------------

Chenna mun, jat le nam, ngeina khat le khat kibahlou jehin hou thu; thutah/tahlou; chonchan dih/dihlou; tahsan dih/dihlou se-khen ding ahitheipon ahi. Amavang, Bible Judahte ngeina bulphua kisun ahivangin imajousea thuneina sangpen neichu ahi. Judahte ngaina bulphua kisun tia neoseithei ahipoi; ajehchu Judahte jal a bou Bible le Jesu Christa mitin kichangthei ahi. Pathen in Abraham anachom koudohlou hileh tunia ichan-u hamphatna tamtah kichang theilou ding ahi.

Eima ngaina cheh bulphuding hileh vannoi mi pumpi kithutona umthei louding ahi. Amavang Pathen a hungkon Bible bulphu tenglebou mi jouse kithutohtheiya, ijakai adih/dihlou leh chonset ipi ahi hetnadia Pathen lunglam hettheina lampi chu Bible bouseh ahi. Ko'n ipi seijongleh Bible toh tekahjuiding, adih/dihlou kihetthem panding ahi. Lekha bu hoi tamtah umjongleh Bible hi Pathen a hungkon leh asunga thu umho: van le leiset; mihem le vantilte; van-gam leh tonsot gotmun; muthei le mutheilou; etc. hojehin achung nungpen ahi.

Bible hi lekha bu jouse lah a achung nungpen iti hithei ham?
---------------------------------------------------------------------------

1. Lekha bu dangho miten kisimjui ahivangin, Bible vanghi akivet tengleh Pathen in asimho ahoulimpi ahijoi(Objective Study).

2. Lhagao Theng kithopina umlouvin Bible sungthu hetkhen theihoi ahipoi( 1C or 2:14); lekhabu dangtoh akibahlouna jong hichu ahi.

3. Lekhabu dangho sanga achung nunna ajeh khat chu asun Pathen ahijeh ahi( God,its Author).

4. Pao chomchom akiledoh lekha bu jouse sangin Bible hi pao tampen a kiledoh; bu tampen kisemdoh; a manlhompen le atampen a kijoh ahi.

5. Lekha bu jouse lah a Bible hi phat tam hompen, leh continent 3 a kisun ahi. Asut phat homsung k*m 1600 val ahin; Africa, Asia leh Europe continents sunga kisun; panmun, Tohmun, chuleh phat umdol chomcheh a kisun chu Bible ahi.

6. Satan in lengho mangcha a Bible suhmang ding agotvangin, asumangjou chompon ahi. Jehoiakim lal laiyin ijat ham meiya ahal vangin Pathen in atamjo asemdoh paijengin ahi. Hijeh achu Bible hi akhangkhang a kisumang joulou lekha bu ahi.

7. Thil ijakai jouse hung kondohna, muthei/mutheilou, leiset le van thu, chonset/chonphatna, mihemte lehvantil ho, Pathen hina le Ama lunggel ho, phat nukhahlam thilsoh dingho phondoh masatna, etc. toho jouse hi Bible ahbou akimun chuleh akisun jouse jong khelna imacha umlou chu BIBLE BOUSEH ahi.

Bible Tekahna Ho:
----------------------

1. Limlang (mirror) – Thil ijakai jouse Pathen mubanga dihtah a ihetthei nadiuva Pathen peh guideline ahi.(E.g. Chonset kiti itobang ham?)

2. Sehpi (hammer)- Pathen' thuchang thahatna lim vetsahna ahin,chonset subei na ding, asesa hinkho semphatna ding, etc. hodia lhagaoa Thengin Bible thua eisemthah u ahi.

3. Tui (Water)- Then theinadia vanjah ahibangin Pathen thu'n ihinkho u ei-suhthengpeh theiyu ahi.

4. Muchi (seed)- Chonset a kon, chonphatna gadoh theinadia jong Bible hi muchipha toh kite kah ahi.

5. Mei (Fire)- Gucha'n adeicheng akipoh mangjui vangin, meiyin imacha khan aneipoi. Hibangchun Bible hi tha-hat tah leh hinkho pumpi khelthei ahina vetsahna ahi.

Kichihtheiyin:
----------------

Mihem paova kisun hijongleh Pathen lunglam chu mihem lunglam a heidohding gohih-in. Nangma lunggel umsa jouse paidoh inlang, Bible thutah sanglechun, chuteng aphatchomna nachanbep ding ahi. Bible dihtah a hetnadin Bible school kai avatin, Paobul Hebrew leh Greek jong hetding avatin, chuleh dihtah a kalsonpi oyaho leh Houbung toh nakizopding athupi lhehjengin ahi. Hiche Bible thu in tu hinkho le khonung khankho ding jeng jong ahom ahi.

---------------------------------------------
Chunga hungkisei Bible thuhi Kuki Baptist Church(KBC) Yangon Bible Sunday ( 16/8/2015 ) nia Houbung Pastor Rev. Dr Thawng Hlun' Sermon outline kahin tah ahin, spelling lhinlal na ahilouleh seikhel seival aum khahleh Pakai min'in kingaidam hiute.

Worship service

April 14, 2019

Tuni Houkhom

April 7, 2019

Gospel Revival Crusade

26-29 March 2019
Kuki Baptist Church, Myenigone

Tuni KBCM CE Sunday Pathen Houkhomna

3rd March 2019

24 February 2019

Worship Service

27-1-2019

20-1-2019 Ni Houkhom