CODM Supporters 2.0

موضوع كنا بغينا نتجنبو الهضرة عليه و لكن ماحد هادشي غادي كايكتر و كايضر بالفرقة خاص نوقفو و نفصلو فيه .. مؤلم بزاف هادشي لي ولينا كانشوفو فالمدرجات ، تقسيمات و كل فئة كتتصارع على الزعامة ، و كل واحد باغي يبان بلي هو لي مونطاليطي و فاهم و الباقي مافاهمش ، كل فئة هي باغا تبين هي النخبة و الباقي كايخربق ، كل واحد باغي يبين بلي صوتو مسموع و كايدوي فالحق و الباقي ضعاف و مسروحين، كل واحد كايجبد عيوب لاخر و ينسا عيبو .. واش ماكاينش عاقل واحد فهادو كاملين سواء كانوا الترات أو حتى كليكات مستقلة يطيح من الإيگو ديالو و يقول " حبس أخويا هادشي راحنا غي كنخربقو و نضرو فرقتنا " ، واش مدرج لي هو لي خاص يكون رمز للوحدة كايرجع بلاصة ديال أصوات متنافسة كتر من من المنافسة مع الخصم !؟
أنا و نتا و لاخر و هاداك كلنا كاتجيبنا الكوديم ماشي المجموعة لي كتنتامي ليها ، بلا كوديم ماغايكون لا هادوك لا نتوما لا لوخرين ، الكوديم هي اللّمة و الوحدة لي كاتجمعنا كاملين من ويسلان حتى لتولال ، المجموعات كايبقاو وسيلة لتأطير الجمهور فقط باش يكون صوت و تشجيع واحد .. أما هاد الصراعات الخاوية و شي كايتيري فشي و شي كايضرب فشي و شي كايقول لاخر نتا غي كتخربق حنا لي فطريق الصحيحة و قوة الحسابات كتسالي بحاجة وحدة هي أن الجمهور كيبدا يخسر راسو براسو فالوقت لي كايسحابلو أنه كايدافع على فرقتو .
هبطو شوية من كبرياءكم و تعنتكم و گلسو فطبلة وحدة ، راه الشرفي فقد القوة ديالو ملي ولات كل جهة كاتجر ناسها ، شي فالمدرج الجنوبي ، شي فالشمالي شي فالوسط شي فتريبون ، شي مابقاش اصلا كايجي لتيران بسباب هاد الصراعات الخاوية .. مدينة مدمرة دمار شامل لا خدمة لا تا لعبة هالكاها غي البلية و دوا و كانزيدو ندمروها بهاد التقسيمات .
راه حنا ماشي طاليان و مساميتناش أنطونيو ولا ريكاردو باش غايصلاح لينا تعدد المجموعات فتيران واحد !! قسماً بالله ماصالح لينا هادشي ، حنا مغاربة و تفكيرنا بوحدو تاريخيا كايميل للوحدة و التكتل ماشي التفرقة و الانعزال .. نعم لتعدد الأفكار و الرُّؤى لأن الهدف ماشي نكونوا متشابهين بل نختالفو باحترام ونخدمو المصلحة المشتركة و حنا كانقولوها من هنا و عن طريق منبرنا الخاص لي كانطرحو فيه أفكارنا و سميناه من لول "مشجعين الكوديم" ، راه إلا كان الحل ديال هادشي هو حل المجموعات و تبدا الخدمة فإنشاء حاجة جديدة كتجمع و توحد المدينة بجميع أحياءها مهيكلة بشكل صحيح فخاص يدار هاد الحل ، خطوتان للوراء من أجل خطوة للأمام ، الكوديم أولاً و أخيراً

نساو علينا نتائجنا الكارثية فالبطولة و نضربو طليلة على كأس العرش هاد سيمانة لي طيحاتنا القرعة ضد شباب خنيفرة و هي مناسبة باش نهضرو على هاد الموضوع من زاوية ميزانية الكوديم و أفق تطلعاتها .. شخصيا من ديما كانشوف أن النوادي اللِّي كتشتغل بإمكانيات محدودة وكتعاني من قلة الرعاة و مداخيل على قد الحال ، فالمنافسة على لقب البطولة أو حتى على المراكز الأربع الأولى كتكون تحدي كبير وصعيب التحقيق إن لم نقل أنها مهمة مستحيلة.. السبب الرئيسي هو أن البطولة كتتطلب مصاريف مرتفعة ديال التنقل ، الفنادق، التغذية، ومنح اللاعبين، إضافة للمصاريف التنظيمية والإدارية.. هاد التكاليف كلها كتضغط بشكل كبير على ميزانية النادي، وكتخليه يواجه صعوبات مالية مع نهاية الموسم.. داكشي علاش فرق بحال الكوديم ذو مزانية محدودة كايدخلو لغمار البطولة بهدف أنهم يجمعو أكبر عدد النقاط فمرحلة الذهاب باش يضمنو البقاء و يساليو الموسم فمنتصف الترتيب .. و هادشي كايبقى منطقي رغم أنه كايتنافى و يتعارض مع طموح الجمهور و تطلعاتو .
لهذا، شخصيا من ديما كيبان ليا أن الخيار الأمثل و الأكثر واقعية وذكاء هو التركيز على منافسة كأس العرش.. هاد المسابقة كتكون أقصر، بعدد مباريات قليل نسبياً (حوالي 5 مباريات فقط)، وكتعطي فرصة أكبر للنوادي محدودة الإمكانيات باش تنافس على لقب في ظروف أقل تكلفة.. و الأمثلة عديدة ديال فرق قدرات تحقق كأس العرش و كتزاول بالقسم الثاني ، الشيء لي كيبين أنه ماشي بديك الصعوبة وإنما الرغبة فالوصول إلى أبعد نقطة رغم محدودية الإمكانيات والأهم من ذلك، أن الفوز بكأس العرش كيمكن النادي من المشاركة في كأس الاتحاد الإفريقي، الشي اللي كيرفع من قيمة النادي على المستوى القاري، وكيزيد من الإشعاع ديالو، وكيخلق فرص جديدة لجلب مستشهرين وتحقيق مداخيل مالية إضافية.. وبالتالي، التركيز على الكأس كيكون خيار استراتيجي ناجح أكثر من المغامرة في سباق طويل ومكلف بحال البطولة .. لهذا الطريق كاتبدا من ماتش خنيفرة ولا سبيل فيه للخطأ .
كايبقى هذا رأي شخصي .. شنو رأيكم نتوما ؟

شطر الإياب كارثي بكل ما تحمله الكلمة من معنى .. فريق بدون روح ، لاعبين فاقدين الشغف ، مدرب متلف البوصلة و مكتب غارق فسبات عميق لا يحرك ساكناً !!
المراتب الخمس الأولى فالبطولة هرب علينا طران فيها و علق ، بل حتى وسط الترتيب فخطر و بدينا كانطلو على دوزيام سيري شوية بشوية .. باش تجيب نقطة وحدة يتيمة من أصل 15 نقطة ممكنة و فخمسة د الماتشات بيت واحد ماقدرتيش تماركيه راك كاتستاهل طيح و ماتجيناش غريبة لا طحنا ، و إلا كان غرضكم هو ضمان البقاء كيما العام لي فات و عليها جمعتو نقيطات فالألي فلا سامح لكم الله على هاد حرق الدم لي كاديرو لينا .
الفرقة ماشي بوحدها كاتلام .. حتى جمهور المناسبات عندو نسبة فهادشي لي واقع لينا ، ماعمركوم كنتو كوادمية و عمركوم غاتكونوا ، نتوما مجرد سكان قاطنين بمكناس ، مرة مرة كاتسمع الكوديم لاعبة شي ماتش جاك على گانتك كاتجي تزوكك معانا و من تما سير عاوتاني حتى ينغمك شي ماتش و تعاود تجي تحضر .. نتوما غي لاجئين عمركوم كنتو مشجعين حقيقيين ، الواقع هو هدا ، فمكناس عندنا 3 شرائح من الجمهور ، كاين لي كايجيبوه النتائج كاين لي كاتجيبو ريدمان و كاين لي كاتجيبو الكوديم و مع كامل الأسف هاد الشريحة الاخيرة كاتمتل أقل نسبة من الجمهور .

الكوديم أولا .. الكوديم ثانيا و الكوديم أخيرا

خيانة الشعار هي تكون الكوديم لاعبة فحمرية و نتا مكسل مجبد فشي قهوة فويسلان ولا البرج ولا المنصور ولا سيدي بابا ولا تولال ولا البساتين ولا كومباطا ولا الملاح ولا أي حومة فمكناس و فرقتك لاعبة بوحدها و نتا مصمكها عليها كتسنا الكلاسيكو ، مُضحك هادشي واحقرب .. إلا ماكانتش ضرورة قصوى لي تخليك ماتجيش تشجع فرقتك و هادي من المستعبد لأن الماتش جا بنهار الحد ما كاينة خدمة ما كاينة قراية ، فراه عار عليك أنك تسمي راسك مشجع د الكوديم .
الكوديم هي الأولوية و حتى فرقة فهاد العالم مايمكن تقدم و تجي بلاصتها ، واخا تلعب ضد المنتخب غانشجعو الكوديم ضد المنتخب ، ماكانديروش حملة باش الجمهور يحضر ولا نرغبو بنادم باش يقطع ورقتو و يطلع يشجع فرقتو .. المشجع الحقيقي ما محتاج تا لعبة تحركو تُجاه الكوديم و ديما ملبي النداء.. و لكن كلامنا مُوجه لأشباه المشجعين لي بمجرد الفرقة فقدات البوصلة آخر 4 د الماتشات صافي لاشاو و قلبو ستة تسعود ..
الشرفي راكوم عارفينو فين جا و طريقو راكوم كاتعرفوها و التيكيات راكوم عارفين فين كايتباعو و لي عيا يبعد منا و يسيبورطي PSG راه ماكايخسروش .

لاعب ضد فرقة داخلة فمرحلة فراغ و جايا من 9 الماتش ماعرفاتش طعم الانتصار ضارباك بجوج فميطة ..
فرقة لي عندها 'الديبة' تسعود د ليل و عندها زيناف جناح د بيبي و عندها تقبة فالحارس مين ما شيرو عليه كاتماركا و عندها جمهور كايغوت بعباراة " اللعابة الرجولة " و نتا مكلاصي سابع و فرقتك ما رابحة تا ماتش فالإياب نستاهلو هادشي لي كيوقع لينا قسما بالله إلا حنا المرايا د فرقتنا .
زيدو دمروها حتا نلقاو راسنا كانلعبو الباراج هاد العام

حتى كتقول صافي سالا الماتش أرا لينا القادم و لكن مع سكان قرية با محمد ماكاين راحة ديما الجديد .. و بالمنطق الخرواني ديالهم كون هو نفس المنطق ديال رجاوين كنتي غاتسمع هاد الجملة "إنجازات مدافع النادي المكناسي أنه حط تصويرة مع ماتياس" 😆 .
حفظ الله عقول رجاوين من غباء هؤلاء و لكن مزيان يعرفو بلي كاينة الجزائر غي حدانا .
سكان 60كلم شرقاً على مكناس كل يوم حلقة من السلسلة الكوميدية ديالهوم لي كاتخلينا نخراو بضحك على غباءهم و سذاجتهم التي ليس لها مثيل فالمغرب .. جذير بالذكر أن مباراة الرجاء المهاجم ماتياس عدب بزاف دفاع الكوديم بتحركاتو و لكن بوناگات قدر يحد من الخطورة ديالو بل أنه كان سبب مباشر ففوز الكوديم من بعد ما ارتطمات الرأسية ديالو بالعارضة و كملات بهدف .
و لكن شكتعرف أجمي راه كاين واحد المهاجم لي راه لدابا باقي فجيب د بوناگات ما ماركا علينا لا فالألي لا فروتور و لكن كايعانيو من صعوبة الاعتراف كيما ماعتارفوش بتفوق الكوديم عليهوم ذهابا و ايابا و لولا رعونة المهاجمين و تحول حارسهم لأوليفركان لي قدم مباراة العمر ديالو كانو غايهزو قفة د البيوت .

تعادل بطعم الهزيمة ضد خصم كان فالمتناول لولا الحارس اللِّي تحول بقدرة القادر للعملاق الألماني أوليڤيركان فياماتو، لكان الفريق الزائر يخرج بفضيحة ، فريق ختار أنه يدير طوبيس و مايخرجش يلعب كورة و تحول فعدة فترات لفريق مِصري بخبث كروي ديال سبعينات من القرن الماضي، يبحث عن تضييع الوقت و توقفات متكررة فمشهد مقزز و كايطرح عدة تساؤلات على كيفاش فريق بحال هادا هو متصدر الدوري!؟ على أي كاتبقى نقطة حسن من والو ضد بحال هاد الفراقي لي كيجي يلعب معاك رياضة أخرى ماشي كرة القدم ، شفنا منو تدخلات خشنة كانت كتسوتجب بطاقة حمراء لكن تعاطف الحكم معاهوم وصل أنه يسالي الماتش قبل بدقيقة من التوقيت الظاهر على الشاشة !! للمرة الثالثة على التوالي كانخرجو بدون انتصار و الكبوة باقا مستمرة نتمناو ماطولش معانا .
من جهة أخرى ، نقطة استفهام كبيرة على اللاعب زهير الديب !! على مدار موسمين تعطاتو فرص بالجملة ماقدر يستاغل حتى وحدة منهوم ، لاعب محدود ، فقير هجوميا ، الكرات الهوائية كلهوم كايخسرهوم ، تحركات ديالو ديال شي راجل كبير فالسن .. أش باقي كايدير فالكوديم لاعب بحال هادا ؟ أشنو الإضافة لي قدم من نهار جا لكوديم ؟ و حتى لفوقاش غاتبقا تعطا ليه هاد التقة كل ماتش و نتسناو منو واحد النهار يتفرگع ؟؟

أ سربي أخويا را باقي تابعنا الحمام