Demian Rohitha

පසුගිය දා පැවති ගංවතුර තත්ත්වය නිසා හානියට පත් කටුගම්පල ආසනයේ වෙල්පල්ල,මාකඳුර,නාලවලාන පන්නල, ගිරිඋල්ල ,පලාගල ලබ්බල ආදී ප්‍රදේශ නිරීක්ෂණය සඳහා කුරුණෑගල දිස්ත්‍රික් සංවර්ධන කමිටු සභාපති, කෘෂිකර්ම නියෝජ්‍ය අමාත්‍ය නාමල් කරුණාරත්න සහෝදරයා ඊයේ එක්විය.

මේ සඳහා පාර්ලිමේන්තු මන්ත්‍රී වෛද්‍ය ජගත් ගුණවර්ධන සහෝදරයා, පන්නල ප්‍රාදේශිය සබා මන්ත්‍රී සහෝදරවරු ඇතුළු පිරිසක් එක්විය.

මෙහිදී පන්නල සහ ගිරිඋල්ල නගරවල ව්‍යාපාරික ප්‍රජාව සමඟ ඔවුන් මුහුණ දෙන ගැටළු පිලිබඳ සාකච්ඡා කිහිපයක්ද සිදු කරන ලදී.

සඳලංකාව,ලංසි ගොඩැල්ල ජල ලිද පාර කොන්ක්‍රීට් කර ජනතා අයිතියට පත් කිරීම ඊයේ දින පාර්ලිමේන්තු මන්ත්‍රී වෛද්‍ය ජගත් ගුණවර්ධන සහෝදරයාගේ මූලිකත්වයෙන් සිදුවිය.

🔺ව්‍යසනය ඉතා වේදනාකාරියි, ව්‍යසනය හමුවේ අලුත් මාවතක එක්ව ගමන් කර රට ගොඩනගමු
🔺අපි වැල් පාලමේ ගමන් කරමින් ඉන්නේ, සද්ද නැතිව ඉන්න කියා ජනතාවට කියන්න බැහැ, අපි එහෙම ආණ්ඩුවක් නොවෙයි - ජනපති පාර්ලිමේන්තුවේදී

ජනාධිපති අනුර කුමාර දිසානායක සහෝදරයා පාර්ලිමේන්තුවේදී සිදු කළ සම්පූර්ණ කතාව

විශේෂයෙන් අපි අද මුදල් අමාත්‍යාංශය පිළිබඳවත්, පරිපූරක ඇස්තමේන්තුව පිළිබඳවත්, මහජන ආරක්ෂක පනත යටතේ හදිසි නීතිය පැනවීම පිළිබඳ රෙගුලාසි මෙම පාර්ලිමේන්තුවේ සම්මත කර ගැනීම සඳහා ඉදිරිපත් කර තිබෙනවා.

මේ සියලු කරුණු අතර අපට මුහුණ දීමට සිදු වූ ව්‍යසනය පිළිබඳ ප්‍රධාන අවධානයක් යොමු කළ යුතුව තිබෙනවා. අපේ රට බොහෝ අවස්ථාවල මෙවැනි ව්‍යසනයන්ට මුහුණ දී තිබෙනවා. ඇතැම් විට වෙරළ තීරයන්ට ආසන්නව මේ ව්‍යසනය ඇති වූ විට කදුකරයේ ජීවත් වන ජනතාව සහ අනෙක් පළාත්වල ජනතාව ඒ පිළිබඳ කම්පනයට පත් වුණා. මධ්‍යම කදුකරයේ මේ ව්‍යසනය සිදු වූ විට අනෙක් පළාත්වල ජනතාව කම්පනයට පත් වුණා. හැබැයි මේ අවස්ථාවේ දිස්ත්‍රික්ක කිහිපයක් හැරුණු කොට අනෙක් සියලු දිස්ත්‍රික්කවලින් විශාල ප්‍රමාණයක් මේ ව්‍යසනයට ගොදුරු වී තිබෙනවා. ඒ නිසා පුරවැසියන්, ජනතාව තමන්ගේ කම්පනය සඟවාගෙන මේ කාර්යයට මැදිහත් වෙමින් තිබෙනවා.

අපි දන්නවා මේ වෙලාවේ අප අතර ජීවත් විය යුතු පිරිසක් ඒ ව්‍යසනය නිසා අහිමි වී තිබෙනවා. මේ වෙලාවේ තමන්ගේ දරුවන් සහ ඥාතීන් සමග සමීපව ළෙන්ගතුව ජිවත් විය යුතු පිරිසක් අද අපිට අහිමි වී තිබෙනවා. ඒ වගේම, ඇතැම් ගම්මාන පිටින් මේ ව්‍යසනයට ගොදුරු වී තිබෙනවා. ඇතැම් පවුල් පිටින් මේ ව්‍යසනයට ගොදුරු වී තිබෙනවා. ඒ නිසා මේ ව්‍යසනය අපේ රටේ මෑත කාලයේ අපි දකින විශාලතම ව්‍යසනයයි. රටේ ජනතාවගේ හදවත් කම්පනයෙන් පිරී තිබෙනවා. ඔවුන්ගේ හැගීම් කදුළුවලින් ප්‍රකාශයට පත් කළ නොහැකි තරමේ වේදනාබර වෙලා තිබෙනවා. බොහෝ දෙනෙක් මිය ගොස් තිබෙන අතර, සිරුරු හමු වී තිබෙනවා. ඇතැම් පිරිසක් මිය ගොස් තිබෙනවා, හැබැයි සිරුරු සොයාගත නොහැකි තරමේ අතුරුදන් වීමකට ලක් වී තිබෙනවා.

මිනිසුන් අහිමි වීම මිනිසුන් අතුරුදන් වීම පිළිබඳ අපේ සමාජයට කම්පනයක් සහිත ඉතිහාසයක් තිබෙනවා. යුද්ධවලින්, ස්වාභාවික ව්‍යසනවලින් මිනිසුන් අහිමි වූ අතුරුදන් වූ කම්පන සහිත ඉතිහාසයක් අපේ රට තුළ ලියැවී තිබෙනවා. කෙනෙකුගේ අහිමි වීම තමන්ගේ මිතුරන්ට තමන්ගේ ඥාතීන්ට කොපමණ කම්පනයක්ද කියලා අපි දන්නවා. අපි එය අත්දැකපු පිරිසක්. කෙනෙක් අතුරුදන් වූ පසු ඔවුන්ගේදෙමාපියන්, ඥාතීන් එය පිළිගැනීමට සූදානම් නැහැ. නැවත පැමිණෙයි කියන බලාපොරොත්තුවෙන් ජීවත් වෙනවා. වසර ගණනාවක් පුරා මේ අතුරුදන් වූවන් පිළිබඳ කම්පනයෙන් පුරවැසියන් ජීවත් වෙනවා. පෞද්ගලිකව ගත්තොත් මටත් එවැනි අත්දැකීමක් තිබෙනවා.

අතුරුදන් වීම පවුලකට, ඥාතීන්ට, මිතුරන්ට මොන තරම් කම්පනයක් ගෙනත් දෙනවාද? ඒ නිසා මේ මොහොතේ තමන්ගේ මිතුරන්, ඥාතීන් අහිමි වීමේ වේදනාව සහිතව කම්පනයෙන් ජීවත් වන පිරිසක් සිටිනවා. රටක් ලෙස අපි පළමුවෙන්ම ඒ සියලු දෙනාට අපේ සංවේගය ප්‍රකාශ කළ යුතුයි.
මේ අහිමි වූ කිසිවකුගේ ජීවිත අපිට යළි ලබා දෙන්න බැහැ. එය තමයි ඛේදනීය යථාර්ථය. හැබැයි ආණ්ඩුවක් ලෙස පුරවැසියන් ලෙස අපිට වගකීමක් තිබෙනවා. අපේ අපේක්ෂාව විය යුත්තේ ජීවත්වන සියලු දෙනාට, තිබූ තත්ත්වයට වඩා හොඳ ගුණාංගවලින් පිරි රාජ්‍යයක් නිර්මාණය කිරීමයි.

ඒ නිසා අපේ රටේ ජනතාව යළි මෙවැනි ඉරණමකට ලක් නොවන අන්දමේ ක්‍රියාමාර්ග ගැනීමටත්, මීට වඩා හොද රාජ්‍යයක් නිර්මාණය කිරීම සඳහාත් උපරිම වෙහෙස මහන්සි වී කටයුතු කීරීමට අපි සූදානම්. එය අප වෙත පවරාගත් වගකීමක් සහ අත්හළ නොහැකි හෘදයාංගම බැඳීමක් බව මම සිතනවා.

ඕනෑම ව්‍යසනයකදී දේපළ සහ මිනිස් ජීවිත උදුරාගත හැකියි. හැබැයි, මෙරට ජනතාව තුළ ඇති මනුෂ්‍යත්වය කිසිදු ව්‍යසනයකදී උදුරා ගන්න බැරි තරමේ ප්‍රබල ගුණාංගයක් බව මෙම ව්‍යසනයේදීත් අපිට ඔප්පු කර තිබෙනවා. ජනතාව ඔවුන්ට කළ හැකි පමණින් පරිත්‍යාග සිදු කරනවා. ඒ වගේම විදෙස්ගත ශ්‍රී ලාංකිකයන් මෙම ජනතාව වෙනුවෙන් දිවා රැ නොබලා වෙහෙසෙමින් අරමුදල් රැස් කරනවා. ලේ ඒකක 1500ක් අඩු බව ලේ බැංකුව දැනුම් දුන් විට ඒකක 20,000ක් ලබා දී තිබෙනවා. ඒ තමයි කුමන ව්‍යසනයකදී වුවද මකා දැමිය නොහැකි අපේ රටේ මනුෂ්‍යත්වය.

ලෝක ඉතිහාසයේ බිද වැටුණු සෑම රාජ්‍යයක්ම ගොඩනැඟීමේදී ප්‍රධානතම කාර්යය බවට පත් වූයේ එම ජනතාවගේ අභිලාෂය සහ ධෛර්යයි. දෙවන ලෝක යුද්ධයේදී ජීවිත විශාල ප්‍රමාණයක් අහිමි වන විට මිනිසුන්ගේ අප්‍රතිහත ධෛර්යය, කැපවීම සහ පරිත්‍යාගය ලෝකයට සාමය කැටුව ආවා.
දියුණුවේ හිණිපෙතට ගමන් කළ රටවල ආර්ථික මාවත, උපායමාර්ග වැදගත් වගේම ඒ ජනතාව තුළ තිබූ ධෛර්යවන්ත මැදිහත් වීම එහි ප්‍රධානතම සාධකය බවට පත් වුණා. ජපානය, චීනය නැගී සිටියේ එලෙසයි. ජනතාවගේ විශ්වාසය සහ ධෛර්යය තමයි අපට මේ රට ගොඩනැඟීමට මඟපෙන්වීම ලබා දෙන්නේ කියා මම ප්‍රකාශ කරන්න කැමතියි. ඒ වගේම මේ ව්‍යසනය ඇති වූ අවස්ථාවේ මේ ව්‍යසනයෙන් අපේ ජනතාව මුදා ගැනීම සඳහා ත්‍රිවිධ හමුදාව සහ පොලිසිය විශාල වෙහෙසක් දරමින් කටයුතු කළා.

කලාවැවේ බස් රථයේ 70කට ආසන්න ප්‍රමාණයක් තමන්ගේ ජිවිතය කොයි මොහොතේ අහිමි වෙයිද කියන කම්පනය සහිතව සිටියේ. ඇතැම් මන්ත්‍රීවරු නිවසේ සිට පැය දෙකයි, තුනයි කියලා ෆේස් බුක් සටහන් ලිව්වා. හැබැයි, ඒ වන විටත් අපේ නාවික හමුදාව එම ජනතාව බේරා ගැනීමේ විරෝධාර ක්‍රියාවේ නිරතව සිටියා. ඉතාම අසීරු වෙහෙසකර තත්ත්වයන් යටතේ මෙම සැඬ පහර පරාජය කර ඔවුන් වෙත පියමන් කළා. එහි ප්‍රතිඵලයක් ලෙස එම බස් රථයේ සිටි පිරිස වහළයක් මතට ගෙන ඒමට සමත් වුණා. ඉන්පසුව ඉතා කෙටි වේලාවකදී බස් රථය ගසාගෙන ගියා. එම අවස්ථාවේ නාවික හමුදාව ගමන් කළ බෝට්ටුවද ක්‍රියාවිරහිතභාවයට පත් වුණා. අවසානයේ ඒ බෝට්ටුවේ ගිය නාවික හමුදා නිලධාරීන්ටත් තම ජීවිත ආරක්ෂා කර ගැනීම වෙනුවෙන් එම වහළය මත ජීවත් වීමට සිදු වුණා.

පැය 18කට අධික කාලයක් 70කට ආසන්න පිරිසකට ඇස්බැස්ටෝස් වහළයක් මත මහා සැඬ පහරක් තුළ ජීවත් වීමට ධෛර්යය ලබා දුන්නේ එම නාවික හමුදා නිලධාරින් තිදෙනායි. ඉතාමත් දුෂ්කර ව්‍යායාමයකින් පසු පළමු වටයේදී සැඬ පහරට හසු වූ මුදාගැනීමේ කණ්ඩායම නැවත පැමිණියා. මම ස්තූතිවන්ත වෙනවා ඒ ගමේ තරුණයන් දෙදෙනෙක් ඒ පාර වෙනුවට වෙන පාරක් පෙන්නලා දුන්නා. ඒ පාරේ ගිහින් මේ 70 දෙනාම නිරුපද්‍රිතව බේරා ගැනීමට ඔවුන් සමත් වුණා. එක් අයෙක් රෝහල්ගත වුණාට පසු මිය ගියා. එවැනි කාර්යක්ෂම ත්‍රිවිධ හමුදාවක් සහ පොලීසියක් අපිට ඉන්නවා.

විතිකුලියේ ෆාම් එකේ කොටු වී සිටි කණ්ඩායම මුදා ගැනීමට ගිය බෝට්ටු දෙකම ක්‍රියාවිරහිත වුණා. අවසානයේ ඔවුන් මුදා ගැනීමට හැකි වුණේ පසු දා පාන්දරයි. නොච්චියාගම ප්‍රදේශයේ ස්ථාන දෙකක ජනතාව සිර වී සිටියා. අනුරාධපුර නගරයේ ගස් උඩ හිටියා. තවත් තැන්වල පොල් ගස්වල නැගලා ජීවිතේ බේරා ගන්න උත්සාහ කර තිබුණා. අපේ ගුවන් හමුදාවත් ඉතාමත් වික්‍රමාන්විත විරෝධාර ක්‍රියාවන් හරහා ඔවුන් මුදා ගැනීමට සමත් වුණා.

ඊට පසු අපිට වාර්තා වෙනවා මාවිල්ආරු බැම්ම කඩා ගෙන යෑමේ අනතුරට මුහුණ දෙනවා කියලා. සේරුවාවිල අපේ හාමුදුරුවන් වහන්සේ මට කතා කළේ රාත්‍රී 12ට. ඒ වන විටත් අපේ දේශපාලන අධිකාරිය ඒ වෙනුවෙන් මැදිහත් වෙමින් තිබුණා. ඒ වෙලාවේ නැවත හමුදාව, පොලීසිය, ප්‍රගතිශීලී පුරවැසියන් මැදිහත් වෙලා දහස් ගණනක් සේරුවාවිල පන්සලට ගෙන ගියා.

මේ මුදාගැනීමේ මෙහෙයුමේදී ඉතාමත් නිර්භීත ගුවන් හමුදා නිලධාරියකු මිය ගියා. මොවුන් මිය යන මොහොතේදීත් අනෙකා පිළිබඳ කල්පනා කරමින් මිය ගිය මිනිසුන්. මේ වහසි බස් දොඩවන මිනිසුන්ගේ කතාවලට වඩා ඉතිහාසය ඔවුන්ගේ කතාවලින් ලියැවෙන බව මතක තබා ගත යුතුයි.
ඒ වගේම චුන්ඩිකුලම් ප්‍රදේශයේ මෝයකට කැපීමේ ඉතාමත් වෙහෙස කර සහ බිහිසුණු කටයුත්තට ගිය නාවික හමුදාවේ නිලධාරීන් පස් දෙනෙක් සැඬපහරට හසු වී අතුරුදන් වුණා. විශාල වෙහෙසක් දැරුවත් තවමත් අපිට ඔවුන් සොයා ගැනීමට නොහැකි වී තිබෙනවා.

ඒ වගේම, ධර්මදාස කියන පොලිස් නිලධාරියා රාජකාරිය නිමවා යද්දී මේ ව්‍යසනයෙන් මිය ගියා. ඔවුන් දිවා රෑ නොබලා සිය රාජකාරිය කරන්න වෙහෙස වුණා. සීගිරියේ පදිංචි විදුලිබල මණ්ඩලයේ සේවය කරන අනුරුද්ධ කුමාර මහතාට ජන ජීවිතය යථා තත්ත්වයට පත් කිරීම සඳහා විදුලිය යළි ස්ථාපිත කිරීමේ කටයුත්තේදී ජීවිතය දෙන්න සිදු වුණා.

ඒ නිසා මේ ව්‍යසනයේදී ත්‍රිවිධ හමුදාව, පොලීසිය, දිසාපතිවරු, ප්‍රාදේශීය ලේකම්වරු සහ රාජ්‍ය සේවය නිදිවර්ජිත, ඉතාමත් වෙහෙසකර වූත් දුෂ්කර වූත් විශාල කාර්යභාරයක් ඉටු කළා. ප්‍රාදේශීය ලේකම්වරයා කල්පනා කරනවා තමන්ගේ ප්‍රදේශයේ කිසිවකුට කරදරයක් නොවිය යුතුයි කියලා. ග්‍රාම සේවා නිලධාරී කල්පනා කරනවා තමන්ගේ වසමේ කාටවත් කරදරයක් සිදු නොවිය යුතුයි කියලා. දිස්ත්‍රික් ලේකම්තුමා කල්පනා කරනවා තම දිස්ත්‍රික්කයේ කිසිවකුට කරදරයක් නොවිය යුතුයි කියලා.

එතරම් ව්‍යසනයකදීත් සීත කාමරවල හිටපු මහත්තුරු ලස්සනට ඇඳගෙන සුවඳ විලවුන් දා ගෙන ගිහින් දිසාපතිවරයාගෙන් ප්‍රශ්න කරනවා. රාජ්‍ය සේවය මේ ව්‍යසනයේදී සිදු කළ කාර්යභාරය පිළිබඳව බෙහෙවින්ම ස්තූතිවන්ත විය යුතුයි. ඒ අතරට සෞඛ්‍ය සේවය ජීවිත ආරක්ෂා කිරීම සඳහා ඉටු කරන ලද විශාල කාර්යභාරයටද බෙහෙවින්ම ස්තූතිවන්ත විය යුතුයි.

ඒ වගේම විදෙස්ගත ශ්‍රී ලාංකිකයින් අපේ රටේ කුමන හෝ ගැටලුකාරී තත්ත්වයකදී සෑම විටම විශාල කම්පනයකින් යුතුව මේ කාර්යයට මැදිහත් වුණා. ඒ පිළිබඳව අපි ස්තූතිවන්ත විය යුතුයි.
අපට මුදාගැනීමේ මෙවලම්, යටිතල පහසුකම් තිබෙන්නේ ඉතා අඩුවෙන්. හැබැයි, අපගේ අසල්වැසි මිතුරු රාජ්‍යයන් ඒ අවශ්‍යතා සම්පූර්ණ කිරීම සඳහා අවශ්‍ය හෙලිකොප්ටර්, බෝට්ටු, විවිධ යන්ත්‍රෝපකරණ, පුහුණු භට පිරිස් සහ පුහුණු සෞඛ්‍ය සේවක කණ්ඩායම් අප වෙත එවා තිබෙනවා. ශ්‍රී ලංකාව මේ ව්‍යසනයෙන් බේරා ගැනීමට දක්වන සහාය වෙනුවෙන් ඒ සියලු විදෙස් මිතුරු රාජ්‍යයන්ට අපි බෙහෙවින්ම ස්තුතිවන්ත වෙනවා.

අපි හදිසි නීතිය පැන වූවා. ව්‍යසන කළමනාකරණ පනත අනුව ජනාධිපතිවරයාට අවශ්‍ය නම් ‘මුළු රටේම ව්‍යසන තත්ත්වයක් පවතින බව ප්‍රකාශයට පත් කරනු ලැබිය හැකිය“ එසේ නොමැති නම් මහජන ආරක්ෂක පනත යටතේ ක්‍රියාමාර්ග ගත හැකියි. ව්‍යසන කළමනාකරණ සභාව වසර 7කට පසුව කැඳෙව්වේ පසුගිය අගෝස්තු මාසයේ 06 වෙනි දා. එදා සහභාගි නොවුණත් මේ ව්‍යසනයෙන් පසුව ඒ සභාව කැඳ වූ අවස්ථාවේ විපක්ෂ නායකවරයා සහභාගි වූ බව මම කියන්න කැමතියි. මේ ව්‍යසන කළමනාකරණ පනත දුබල බව සහ එබැවින් එය සංශෝධනය කළ යුතු බව තමයි එදා අපේ තීරණය බවට පත් වුණේ. ව්‍යසන කළමනාකරණ පනත මෙවැනි අභියෝගයකට මුහුණ දීම සඳහා ශක්තිමත් පනතක් නොවෙයි.

‘ව්‍යසන කළමනාකරණ සැලැස්මක් පිළියෙල කිරීම සෑම අමාත්‍යාංශයකම, ආණ්ඩුවේ දෙපාර්තමේන්තුවකම සහ රාජ්‍ය සංස්ථාවක කාර්ය වන්නේය. ‘ නමුත් එහෙම සැලැස්මක් හදලා නැහැ. ඒ අනුව ව්‍යසන කළමනාකරණ පනත අනුව කටයුතු කරන එක මේ වෙලාවේ දුබලයි. මේ අවස්ථාවට මුහුණ දෙන්න ප්‍රමාණවත් නොවන බව අපි කල්පනා කළා. වඩාත් ශක්තිමත් වන්නේ මහජන ආරක්ෂාව පනතේ දෙවන අධිකාරිය යටතේ බලය ක්‍රියාත්මක කිරීමයි. ඒ නිසා තමයි විපක්ෂය ඉල්ලා සිටියේ හදිසි නීතිය පනවන්න කියලා. ඒ නිසා අපි මහජන ආරක්ෂක පනත යටතේ තමයි මේ නියෝග පැනෙවුවේ. අද සම්මත කර දෙන ලෙස මා ඉල්ලන්නේ එයයි.

මොකද මෙවැනි ව්‍යසනයකට මුහුණ දීම සඳහා සාමාන්‍ය නීතිය අපට ප්‍රමාණවත් නැහැ. මෙවැනි ව්‍යසනයකදී සාමාන්‍ය නීතියට වඩා උඩින් තිබෙන නීතියක් අපට අවශ්‍යයි. ඒ අනුව තමයි අත්‍යවශ්‍ය සේවා කොමසාරිස් ජනරාල්වරයකු පත් කිරීමට අපට හැකියාව තිබෙන්නේ. ඒ අනුව තමයි රටේ විවිධ ස්ථානවලින් තවත් ස්ථානවලට අවශ්‍ය උපකරණ හෝ නිලධාරීන් යොමු කරන්න හැකි වන්නේ. ඒ අනුව වඩාත් යෝග්‍ය පනත මහජන ආරක්ෂක පනත බව අප තීරණය කළා. ඊට විපක්ෂයෙන් ලැබුණු සහායට මා බෙහෙවින්ම ස්තූතිවන්ත වෙනවා.

එහෙත් මේ මහජන ආරක්ෂක පනත අප කිසිසේත්ම ජනතාවගේ ප්‍රජාතන්ත්‍රවාදී අයිතීන් උල්ලංඝනය කිරීම සඳහා උපයෝගී කර ගන්නේ නෑ, මාව හෝ අපේ අමාත්‍යවරු විවේචනය කිරීම අපි ගනන් ගන්නේවත් නැහැ. අවලාද අදාළම නෑ. ඒවාට සාමාන්‍ය නීතිය තියෙනවා. හැබැයි ජනතාව බිය වැද්දීමට, නොමඟ යැවීමට සාමකාමී තත්ත්වය අවුල් කිරීම සඳහා ව්‍යසනකාරී ප්‍රජාව තුළ ගැටුම්කාරී තත්ත්වයක් ඇති කිරීමට කිසිවෙකු උත්සාහ කරන්නේ නම් එය මේ ව්‍යසනයෙන් ගොඩ ඒම සඳහා වන සැලැස්මට බාධාවක් නම් ඒ සඳහා පමණයි අපි මේ නීති උපයෝගී කර ගන්නේ.

එක මන්ත්‍රීවරයෙක් කිව්වා ගම්පොල 1000ක් මැරුණා කියලා. පාර්ලිමේන්තු වරප්‍රසාදවලට මුවා වෙලා මෙතන කිව්වට එළියට ගිහින් කිවුවොත් නඩු දානවා. එහෙම කියන්න බෑ. ගම්පොල වැඩි පිරිසක් මුස්ලිම් ප්‍රජාව ඉන්නේ. ඔවුන් හිතනවා ඔවුන්ට අඩු සැලකිල්ලක් තියෙන්නේ කියලා. ඒවාට නම් මේ නීතිය උපයෝගී කර ගන්නවා. මේ ව්‍යසනයෙන් ගොඩඒමට අපට අවශ්‍ය වන්නේ ඉතා සාමකාමී ප්‍රවේශම්කාරී මැදිහත් වීමක්.

පාර්ලිමේන්තුවේදී විශාල ලෙස මතභේදයට තුඩු දුන්නා ප්‍රාදේශීය ලේකම්වරුන්ට මුදල් නිදහස් කරන්න පුළුවන්ද කියලා. රාජ්‍ය සේවය අකර්මණ්‍ය වී ඇති බව සමහරු කියන්න පටන් ගත්තා. රාජ්‍ය නිලධාරීන් බයයි කියන්න ගත්තා. මේවා බොරු. මේ ව්‍යායාමයේදී සද්භාවයෙන් මැදිහත් වූ සෑම නිලධාරියෙකුම ආරක්ෂා කරන්නේ අපි බව මම මේ අවස්ථාවේ ප්‍රකාශ කරනවා.

අපි ලිහිල් කළ බලයක් දුන්නා. ලංකාවේ පළමු වතාවට ප්‍රාදේශීය ලේකම්වරයෙකුට ලක්ෂ 500ක් දක්වා වියදම් කිරීමේ බලයක් දුන්නා. දිස්ත්‍රික් ලේකම්වරයෙකුට ලක්ෂ 1000ක් දක්වා වියදම් කිරීමේ බලය දුන්නා. අමාත්‍යාංශ ලේකම්වරයෙකුට ලක්ෂ 1000ක් දක්වා වියදම් කිරීමේ බලය දුන්නා. මොකද අපි මේ නිලධාරීන්ව විශ්වාස කරනවා. ඔවුන් අයථා ලෙස මේ ව්‍යසනයෙන් උපයා ගනියි කියා අපි සිතන්නේ නැහැ. අපි ඔවුන්ව ප්‍රබල ලෙස විශ්වාස කරනවා. හැබැයි පරණ දේශපාලන වළල්ලත් සමඟ එක් ව කළ විනාශයන් තිබෙනවා. ඒවාට අදාළ නීතිමය ක්‍රියාමාර්ග සිදු වෙයි.

අප දන්නවා ගුවන් තොටුපොල, වරාය වේගයෙන් සක්‍රිය කර ගැනීමට අවශ්‍යතාව තිබුණා. එහෙත් ඒවායේ සේවකයින් එන්න බැරි නම් ? අපි ලේකම්වරයාට බලයක් දෙනවා ඔබට ඔබේ නිලධාරීන් ආසන්න හෝටලයක රඳවා ගැනීමට වියදම් දැරීමට. ඒ වගේම ග්‍රාම නිලධාරි මහතාටත් රුපියල් 50,000 දක්වා වියදම් කිරීමේ බලය දුන්නා. සාම්ප්‍රදායික චක්‍රලේඛ, නීති තිබිය යුතුයි. එහෙත් මෙවැනි ව්‍යසනයකදී ඒවායේ කොටු නොවිය යුතුයි කියා අපි එය නිදහස් කර දුන්නා.

අපි දන්වා තවමත් පිරිසක් අවතැන් කඳවුරුවල ජීවත් වෙනවා. වාර්තාවන්ට අනුව පවුල් 55,747ක් පමණ අවතැන් වී තිබුණා. එයින් පවුල් 4000ක් පමණ නැවත ගොස් තිබෙනවා. නිවාස, විදුලිය සහ අනෙකුත් සන්නිවේදන මාර්ග සකස් කර ඔවුන්ට එතනට යන්න පුළුවන් වෙන වටපිටාව ඉතාම වේගයෙන් සකස් කිරීම තමයි අපේ උත්සාහය වී තිබෙන්නේ. අපි ඒ සඳහා කටයුතු කරමින් සිටිනවා.
නිවාස 5165ක් පූර්ණ හානි වී ඇති බවට වාර්තා වෙනවා. 57312ක් අර්ධ හානි බවට වාර්තා වෙනවා. ලක්ෂ 17කට ආසන්න ප්‍රමාණයක් මේ ව්‍යසනයට ගොදුරු වී තිබෙනවා. මෙය අපේ ආර්ථිකයට බොහෝ විට ඔරොත්තු නොදෙන තත්ත්වයක්.

අපේ රටේ ආර්ථිකය තිබෙන්නේ හොඳම තැනක නොවන බව දන්නවා. එය බාහිරින් එන කුඩා කම්පනයකටවත් ඔරොත්තු දෙන්න බෑ. අභ්‍යන්තර කම්පනයකටත් ඔරොත්තු දෙන්න බෑ. අපි මේ ආර්ථිකය ඉතාමත් මැනවින් සීරුවෙන් කළමනාකරණය කර ගනිමින් ඉදිරියට යනවා. හැබැයි, වියරු මනසක් තිබෙන අය අපේ ආර්ථිකය ගැන කුරිරු බලාපොරොත්තුවකින් පසු වෙනවා.

යුද්ධයක් ඇති විය හැකියි කියලා ආන්දෝලනයකට තුඩු දුන්නා ඔබට මතක ඇති. ඒ වෙලාවෙදීත් කුරිරු බලාපොරොත්තුවක් තිබුණා කොළඹට බෝම්බ දායි කියලා. මැදපෙරදිග කලාපයේ යුදමය තත්ත්වයක් වාර්තා වුණා. තෙල්මිල, ගෑස් මිල ඉහළ ගිහින් ආර්ථිකය කඩා වැටෙයි කියලා කුරිරු බලාපොරොත්තුවක් තිබුණා. එක්සත් ජනපදය විසින් ඔවුන්ගේම ප්‍රතිපත්තිවලට අනුරූප වන ලෙස බදු ප්‍රතිශත තීරණය කළා. කර්මාන්ත කඩා වැටෙයි, අපනයන කඩා වැටෙයි, රැකියා නැති වෙයි, කියා කුරිරු බලාපොරොත්තුවක් තිබුණා. මේ ගංවතුරේදීත් පෙන්නුවේ ඒ කුරිරු බලාපොරොත්තුවම තමයි.

එහෙත් සද්භාවයෙන් මේ අවස්ථාවේදී අපට කතා කළ මන්ත්‍රීවරු ඉන්නවා. නමුත් ඒ අතරත් කුරිරු බලාපොරොත්තු සහිත වියරු මන්ත්‍රීවරු ඉන්න එක ගැන ලැජ්ජා විය යුතුයි. තමන් පාර්ලිමේන්තුවට එවන්න කතිරය ගහපු පුරවැසියන් ඉන්නවා නමුත් මන්ත්‍රීවරයාගේ අභිලාෂය මොකක්ද?එවැනි කුරිරු මනසකට අප ඉඩ දෙන්නේ නැහැ.

මෙවැනි අභ්‍යන්තර ව්‍යසනයක් අපේ ආර්ථිකයට සැලකිය යුතු බලපෑමක් එල්ල කරන බව අප දන්නවා. 1977 න් පසු, අවුරුදු 48කට පසු ලංකාවේ අඩුම අයවැය හිඟය වාර්තා කරන්නේ මේ 2025 වසරේදීයි. 2007න් පසුව ලංකාවේ වැඩිම රාජ්‍ය ආදායම වාර්තා කරනවා. 1977 අයවැය හිඟය 4.5යි. මේ අවුරුද්දේ අයවැය හිගය 4.5 දක්වා අඩු වෙනවා. අපි 6.8 ක් ඇස්තමේන්තු කර තිබුණා. අපි නැගිටිනවා. ආදායම් වැඩි වීම් පොලී අනුපාත දීර්ඝ කාලයක් තනි ඉලක්කමේ තියා ගන්න අපි සමත් වී තිබෙනවා. අපේ අපනයන ආදායම වර්ධනය වෙමින් තිබෙනවා. අපි නැගිටිමින් ඉන්නවා.

අයවැය ලේඛනය සම්මත කලේ මාර්තු මාසයේ 21 වන දා. ඒ සමඟම පළාත් පාලන මැතිවරණය මාර්තු 26 ආවා. අපි වියදම් කරන්න පටන් ගන්නේ මැයි මාසයේ 06 වෙනි දා. අනෙක් සෑම අයවැය ලේඛනයකටම ජනවාරි 01 වෙනි දා සිට වියදම් කිරීමේ හැකියාව ලැබුණා.

2021 නොවැම්බර් මාසය වන විට ප්‍රාග්ධන වියදම් 41.9% යි. 2022 දී 43.1%යි. 2023 දී 37.4%යි. 2024 දී 41.2%යි. 2025 දී 45.6%යි. ඒ අනුව 2021න් පසුව මැයි මාසෙන් ආරම්භ කර වැඩිම ප්‍රාග්ධන වියදම් කළ වර්ෂය බවට පත් වී තිබෙනවා. දෙසැම්බර් මාසයේ ගොඩක් බිල් පියවීමට නියමිතව තිබුණා. ඒ නිසා මෙය තව විශාල අගයකින් වැඩි වන බව මට විශ්වාසයි.

අපි රාජ්‍ය සේවකයන්ගේ වැටුප් වැඩි කර තිබෙනවා. අගමැතිතුමියගේ ප්‍රධානත්වයෙන් තිබෙන කමිටුවෙන් 76000ක් රාජ්‍ය සේවයට බඳවා ගැනීමට තීරණය කර තිබෙනවා. එයින් දොළොස් දහස් ගණනක්ම උපාධිධාරීන්. මේ අයුරින් නැගිටිමින් ඉන්න වෙලාවක තමයි අපට මේ ව්‍යසනයට මුහුණදීමට සිදු වුණේ. එයින් අපට බලපෑමක් එල්ල කරමින් ඉන්නවා.

අපි ඇති වෙනකම් බදු ගහලා තමයි මේ ආදායම් උපයා ගත්තේ කියලා සමහරු කිව්වා. නමුත් 2024 තිබූ බදු අඩු කරලායි තියෙන්නේ. 2025 සඳහා වාහන ආනයනය හැරුණු කොට වෙනත් අමතර බදු පනවා නැහැ. පැරණි ආණ්ඩුවට ජාත්‍යන්තර මූල්‍ය අරමුදල විසින් 2025දී 15.2%ක ආදායම් ඉලක්කයක් දී තිබුණා. එය සපුරා ගැනීම සඳහා තිබූ බදු වලට අමතරව තවත් බදු යෝජනා වී තිබුණා. ඩිජිටල් සේවා බද්ද, දේපල බද්ද පසුගිය අප්‍රේල් මාසයේ සිට ක්‍රියාත්මක වීමට තිබුණා. නමුත් 30%කින් පැනවීමට තීරණය කර තිබූ ඩිජිටල් සේවා බද්ද අප 15% දක්වා අඩු කළා. බදු පැනවීම ලබන අවුරුද්දේ අප්‍රේල් දක්වා කල් තැබූ නිසා 2025 වසරේ ක්‍රියාත්මක වුණේ නැහැ. දේපළ බද්ද ගැන කල්පනා කරන්නේ 2027දී කියලා අපි ජාත්‍යන්තර මුල්‍ය අරමුදලට දැනුම් දීලා තියෙන්නේ. අලුත් බදු පැන වුයේ නෑ. තියෙන බදු ඉවත් කළා. අපේ ශක්තිය බවට පත්ව තිබුණේ ඉතාමත් හොඳ බදු කළමනාකරණයක් සිදු කර තිබීමයි. ඒ නිසා තමයි අප අපේක්ෂා කළ ආදායම් අභිබවා යන ආදායමක් ලබා ගත හැකිව තිබෙන්නේ.

මේ ආකාරයෙන් ගොඩනැගෙමින් තිබෙද්දී තමයි අපට මේ ව්‍යසනයට මුහුණ දීමට සිදුව තිබෙන්නේ. මේ ව්‍යසනයට පත් වූ ජනතාවට ඉවසන්න කියලා කියන්න අපට පුළුවන්ද? අපි එහෙම ආණ්ඩුවක් නෙවෙයි. අපිට බැහැ. ආර්ථිකයේ අර්බුදයක් තිබෙන වෙලාවකදී ආර්ථිකයට ගනු ලබන කුඩා හෝ වැරදි තීරණයක් ආර්ථිකයට බරපතළ හානියක් කිරීමේ අනතුර තිබියදී පොඩි වැරැද්දක් පවා මේ ආර්ථිකයට බරපතළ හානියක් ගෙන දෙනවා. ඒ භයානක ප්‍රතිඵල තමයි 2022 රාජ්‍ය ආදායම 8.8%යි. ලංකා ඉතිහාසයේ අඩුම ආදායම බවට පත් වුණා.

එබැවින් මේ කිසිම දෙයක් ආර්ථිකය අනතුරට හෙළා කම්පනය මත හැඟුම්බරව ගන්නා තීරණ නෙවෙයි. මුදල් අමාත්‍යාංශය ඇතුළු අදාළ නිලධාරීන් සමඟ දින ගණනාවක් සාකච්ඡා කරලා ගත් තීරණයක්. මේ අයවැය ලේඛනය නතර කර අලුත් එකක් ගෙන ඒමට ඇතැම් අය උත්සාහ කළත් අපි එයට සූදානම් නැහැ. මේක නිකම් දත්ත එකතුවක් නෙවෙයි. මේ අයවැය සකස් කර තිබෙන්නේ යම් ආර්ථික උපාය මාර්ගයක් සම්පූර්ණ කර ගැනීමේ අරමුණින්. අපි අකුළන්නේ නෑ. අන්තර්කාල අයවැයක් ගේන්න කියනවා. ගේන්නේ නෑ.

අපි මේ 2026 සඳහා ඉදිරිපත් කර තිබෙන අයවැය ලේඛනය අපේ රට තිරසාර ලෙස ආර්ථික සංවර්ධනය අත්පත් කර ගැනීම සඳහා සකස් කර තිබෙන න්‍යාය පත්‍රයේ කොටසක්. අපි ඒක නතර කරන්නේ නැහැ. හැබැයි ඒ අයවැය ලේඛනයේ සමහර කොටස් මේ ව්‍යසනය සඳහා යොදා ගැනීමට අපි අවධානය යොමු කරනවා. මාර්ග සංවර්ධනය ගතහොත් වෙන් කර ඇති මුදලින් බිලියන 40ක් මේ ආපදාවට ලක් වූ මාර්ග සංවර්ධනය සඳහා යොදා ගැනීමේ හැකියාව තිබෙනවා. පළාත් සභාවලටත් අපි උපදෙස් දී තිබෙනවා වෙන් කර ඇති මුදල්වලින් යම් ප්‍රමාණයක් මේ ආපදාවට ලක් වූ ප්‍රදේශවල මාර්ග සංවර්ධනය සඳහා යොදා ගන්න කියලා. ආර්ථික උපායමාර්ග සපුරා ගැනීම එලෙසින්ම තබා ගනිමින් යම් මුදල් ප්‍රමාණයක් මේ සඳහා යෙදවීමට අපි සැලසුම් කර තිබෙනවා.

ඒ සියල්ල සමඟ මේ ජනතාව බලා ගත යුතුයි. එහි පළමු පියවර ලෙස අපි වියළි සලාකය සඳහා ලබා දෙන මුදල වැඩි කළා. ඒ වගේම, අද අපි රුපියල් බිලියන 50ක පරිපූර්ණ ඇස්තමේන්තුවක් ඉදිරිපත් කර තිබෙනවා. ඒ බිලියන 50 සඳහා කිසිසේත්ම ණය සීමා වැඩි කර ගැනීමේ අවශ්‍යතාවක් නැහැ. දැනටමත් අපි වෙන් කර තිබෙන ප්‍රතිපාදන තිබෙනවා. ඒ අනුව බිලියන 50ක පරිපූරක ඇස්තමේන්තුවක් ඉදිරිපත් කර තිබෙනවා.

අපි මේ වන විටත් දිසාපතිවරුන්ට දැනුම් දී තිබෙනවා තමන්ගේ ප්‍රදේශවල කුමන හෝ ගැටලුවක් තිබෙනවා නම් දැනුම් දෙන්න අපි මූදල් එවන්න සූදානම් කියලා. ඒ අනුව, මිලියන 10,500කට ආසන්න ප්‍රමාණයක් දිස්ත්‍රික් ලේකම්වරුන්ට මේ වන විටත් නිදහස් කර තිබෙනවා. ලංකාවේ කිසි දිනක මෙලෙස සිදු වී නැහැ.

අද අපි ඉල්ලනවා අපිට තව බිලියන 50ක පරිපූරක ඇස්තමේන්තුවක් සම්මත කර දෙන්න කියලා. ඒ වගේ අපි ගාව බිලියන 22.2ක් තිබෙනවා. ඒ කියන්නේ බිලියන 72.2ක් ඉදිරි දින 25 තුළ වියදම් කිරීමට තිබෙනවා. අපි ඒ මුදල් වැය කරන්නේ මෙලෙසයි.

හදිසි ආපදා තත්ත්වය පහව යාමත් සමග ආපදාවෙන් බලපෑමට ලක් වූ පවුල්වලට තම නිවාස නැවත පදිංචියට සුදුසු පරිදි ශුද්ධ පවිත්‍ර කර ගැනීම සඳහා රුපියල් 25,000ක මුදලක් ලබා දී තිබෙනවා. අපි සියලු දෙනාටම එම මුදල ලබා දෙනවා. මීට පෙර ලබා දුන්නේ 10,000යි. එයත් ප්‍රතිපූර්ණය කිරීමේ පදනම මත.

ඒ වගේම ආපදාවෙන් බලපෑමට ලක් වූ නිවාසවල නැවත පදිංචියට අත්‍යවශ්‍ය මුළුතැන් ගෙයි උපකරණ මිලදී ගැනීම සඳහා නිවසේ අයිතිය නොසලකා එක් නිවසකට එකවරක් පමණ ගෙවන රුපියල් 50,000ක දීමනාවක් ලබා දීමට අපි කටයුතු කරනවා.

ඒ වගේම, අපි අපේක්ෂා කරනවා නාය යාම් නිසා අවතැන්ව, කඳවුරුවල සිටින නිවාස අහිමි පවුල් වෙත මාස 03ක කාලයක් නිවසකට යාම සඳහා රුපියල් 25,000ක් ලබා දීමට. මෙය මාස 06 දක්වා දීර්ඝ කිරීමට අපි බලාපොරොත්තු වෙනවා.

ඉන් පසුව ජීවනෝපාය මාර්ග සහ නිවාස අහිමි වූ දෙදෙනෙකුට වැඩිය සිටින පවුල්වලට දෙසැම්බර්, ජනවාරි, පෙබරවාරි, මාර්තු මාස සඳහා කුලී නිවසක ජීවත්වීම සඳහා භේදයකින් තොරව රුපියල් 50,000ක මාසික දීමනාවක් ලබා දෙනවා. අඛණ්ඩව මාස 03ක් මෙය ලබා දෙනවා, ජීවනෝපාය මාර්ග සකස් කර ගැනීම සඳහා.

ඊළඟට ආපදාවෙන් බලපෑමට ලක් වූ වී, ධාන්‍ය වර්ග සහ බඩ ඉරිගු ආදිය සඳහා හෙක්ටයාරයකට රුපියල් 150,000ක දීමනාවක් දෙනවා. අපේ අපේක්ෂාව වන්නේ මේ කුඹුරු යළි වගා කිරීමයි. ආසන්න වශයෙන් කුඹුරු හෙක්ටයාර 160,000ක් පමණ හානියට පත්ව තිබෙන බව වාර්තා වී තිබෙනවා. සාමාන්‍යයෙන් මීට පෙර මාසයකට වඩා අඩු ගොයමකට හෙක්ටයාරයකට රුපියල් 40,000යි ලබා දුන්නේ. අපී තීරණය කර තිබෙනවා මේ හෙක්ටයාර 160,000ම නැවත වගා කිරීමට. ඒ සදහා අවශ්‍ය බිත්තර වී, පොහොර ආදිය ගොවි ජනතාවට ලබා දෙනවා.

ඒ වගේම මෙවැනි ව්‍යසනයකදී එළවළු වගාව ගැන කල්පනා කරන්නේ නැහැ. එළවළු වගාව සඳහා හෙක්ටයාරයකට රුපියල් ලක්ෂ 02ක දීමනාවක් ලබා දෙනවා. මේ මුදල් වෙන් කිරීම අද සිට සිදු වෙනවා. හැබැයි අපේ අමාත්‍යාංශ නිලධරීන් සමත් විය යුතුයි මෙම වගා නැවත සිදු කිරීමට. අපේ අපේක්ෂාව වන්නේ මේ බිඳ වැටුණු ආර්ථිකය නැවත සූදානම් කිරීමයි. දෑත් කම්මුල් මත තබාගෙන අනේ අපොයි කියා නොසිට මේ රට බිඳවැටුණු තැනින් නැවත නඟා සිටුවීමට අපි කටයුතු කළ යුතුයි. ඒ සඳහා කෘෂිකර්මාන්තය ප්‍රමුඛයි. ඒ නිසා යළි වගා කරන ලෙස අපි ගොවි ජනතාවගෙන් ඉල්ලනවා. ඒ සඳහා ඔවුන් සූදානම් කරන්න කියා නිලධාරීන්ගෙන් ඉල්ලනවා.

ආපදාවට ලක් වූ පශුවෛද්‍ය කාර්යාලයේ ලියාපදිංචි කර ඇති සෑම සත්ත්ව පාලන ගොවිපොළක්ම නැවත ආරම්භ කිරීමට රුපියල් ලක්ෂ 02 බැගින්, ලබා දීමට අපි තීරණය කර තිබෙනවා. ඒ වගේම කුඩා, මධ්‍යම, විශාල භේදයකින් තොරව ලියාපදිංචි කර තිබෙන සෑම සුළු සහ මධ්‍යම පරිමාණ ව්‍යාපාරයකටම නැවත තමන්ගේ ව්‍යාපාර කටයුතු ආරම්භ කිරීමට රුපියල් ලක්ෂ 02ක දීමනාවක් ලබා දෙනවා.

අපි හූල්ල හූල්ල බලන් සිට වැඩක් නැහැ. අපි මේවාට යළි පණ දිය යුතුයි. ඒ වගේම, අද මහ බැංකුව චක්‍රලේඛයක් නිකුත් කරනවා බැංකු මට්ටමින් යම් සහනයක් එම ව්‍යාපාරිකයන්ට ලබා දීමට. එමෙන්ම, අපි රක්ෂණ සමාගම් සමඟ සාකච්ඡා කරමින් රක්ෂණ වාරික ගෙවීම පිළිබඳ අවධානය යොමු කර තිබෙනවා.

ඒ වගේම, මේ 2026 අයවැය ලේඛනයෙන් සුළු සහ මධ්‍ය පරිමාණ ව්‍යාපාරිකයන්ට ණය ලබා දීම සඳහා අපි මිලියන 80,000ක් වෙන් කර තිබෙනවා. එම ප්‍රතිපාදනවලින් වැඩි ප්‍රමාණයකින් මෙම බිඳවැටුණු කර්මාන්ත නඟා සිටුවීම සදහා ණය ආධාර ලබා දෙන ලෙස අපි උපදෙස් දී තිබෙනවා.එවිට අපිට යළි මේ සුළු සහ මධ්‍ය පරිමාණ කර්මාන්ත නඟා සිටුවීමට හැකියාව තිබෙනවා.
ඒ වගේම ලියාපදිංචි වී තිබෙන ධීවර බෝට්ටු පූර්ණ ලෙස හානි වී තිබෙනවා නම් ඒ සෑම බෝට්ටුවකටම රුපියල් ලක්ෂ 04ක දීමනාවක් ලබා දීමට සැලසුම් කර තිබෙනවා.

මේ අතර ආපදාවට ලක් වූ පාසල් සිසුන්ට අධ්‍යාපන උපකරණ ලබා ගැනීම සඳහා රුපියල් 15,000ක දීමනාවක් භාණ්ඩාගාරයෙන් ලබා දීමටත්, ඊට අමතරව රුපියල් 10,000ක මුදලක් ජනාධිපති අරමුදලින් ලබා දීමටත් පියවර ගෙන තිබෙනවා. ඒ වගේම දැනටමත් අපි අස්වැසුම ලබන පවුල්වල පාසල් ළමුන්ට රුපියල් 6,000ක දීමනාවක් ලබා දෙන අතර එම දීමනාවට මෙමගින් කිසිදු බලපෑමක් නැහැ.

මේ අන්දමින් අපි ශක්තිමත්ව ව්‍යසනයකට මුහුණ දිය හැකි අන්දමෙන් සංචිත ශක්තිමත් කරගෙන තිබෙනවා. තිබෙන ආර්ථිකය අනුව අපි ජනතාවට මේ සහන ලබා දීමට සැලසුම් කර තිබෙනවා.
ආපදා බලපෑම හේතුවෙන් හානි වී ඇති ව්‍යාපාරික ගොඩනැගිලි සඳහා ඒකකයකට උපරිම ලක්ෂ 50 දක්වා හානි පූර්ණ දීමනාවක් ලබා දීමට අපි කටයුතු කරනවා. ආපදා බලපෑම හේතුවෙන් පූර්ණ වශයෙන් හානි වී ඇති පදිංචි වීමට නොහැකි නිවාස සඳහා නව නිවසක් ඉදි කර ගැනීමට රුපියල් ලක්ෂ 50ක් ලබා දෙනවා. ඉඩමක් නැත්නම් රජයෙන් ඉඩමක් ලබා දෙනවා. එසේ ඉඩම් ලබා දීමට ඉඩම් නොමැති නම් නිවස ඉදිකර ගැනීමට ලබා දෙන දීමනාවට අමතරව ඉඩමක් ලබා ගැනීමට ලක්ෂ 50 දක්වා දීමනාවක් ලබා දෙනවා.

ආපදා බලපෑම හේතුවෙන් අර්ධ වශයෙන් හානි වූ නිවාස පිළිසකර කර ගැනීම සඳහා උපරිමව රුපියල් ලක්ෂ 25ක් දක්වා ලබා දීමට බලාපොරොත්තු වෙනවා. ලක්ෂ 10,15,20,25 යන ඛාණ්ඩ 04ක් යටතේ එම මුදල් ලබා දීමට කටයුතු කරනවා.

ඒ වගේම ආපදාවෙන් සිදු වූ ජීවිත හානිවලට රුපියල් ලක්ෂ 10ක දීමනාවක් ඔවුන්ගේ ඥාතීන් වෙත ලබා දීමට අපි තීරණය කර තිබෙනවා.

මේ දින 25ට ක්‍රියාත්මක කිරීමට බිලියන 72.2ක් තිබෙනවා. අද අපි 2026 අයවැය ලේඛනය සම්මත කළා. ජනවාරි මාසයේ සිට එය ක්‍රියාත්මක වෙනවා. එම අයවැය ලේඛනයට රුපියල් බිලියන 500කට පරිපූරක ඇස්තමේන්තුවක් ගෙන ඒමට බලාපොරොත්තු වෙනවා.

අපි කවුරුත් දන්නවා අපි මේ වන විටත් ජාත්‍යන්තර මූල්‍ය අරමුදලේ විස්තීර්ණ ණය යෝජනා ක්‍රමය තුළ කටයුතු කරනවා. මෙම ගිවිසුම් ජාත්‍යන්තර නිර්ණායක මත ඇති කරගත් එකඟතාවන්. එම එකඟතාවන් වෙනස් කිරීමට සමාලෝචනයක් අවශ්‍යයි. දැන් අපි 5 වන සමාලෝචනය අවසන් කර නිලධාරී මට්ටමේ එකඟතාවට එළැඹ තිබෙනවා. එය එළැඹෙන 15 වන දා ඔවුන්ගේ අධ්‍යක්ෂ මණ්ඩලයට ලබා දීමට සැලසුම් කර තිබුණා. හැබැයි දැන් තත්ත්වය වෙනස්. අපි පෙර එළැඹි නිලධාරී මට්ටමේ එකඟතාවට වඩා වෙනසක් ඇති වෙනවා. ජාත්‍යන්තර මූල්‍ය අරමුදල අපිට යෝජනා කර තිබෙනවා මේ දෙසැම්බර් මාසයේ අධ්‍යක්ෂ මණ්ඩලයට ඉදිරිපත් නොකර ජනවාරි හෝ පෙබරවාරි දක්වා කල් තැබීමට. ඒ සඳහා අපි එකඟතාව පළ කර තිබෙනවා. දෙසැම්බර් මාසයේ අපිට ලැබීමට නියමිතව තිබුණේ ඩොලර් බිලියන 342ක වාරිකයක්. එම වාරිකය වැඩි කර ගැනීමට අපි සාකච්ඡා කරමින් තිබෙනවා. එම වාරිකය වැඩි කර ගැනීමට නම් අපිට සාකච්ඡාවක් සහ කාලයක් අවශ්‍යයි.

හැබැයි ක්ෂණික ඩොලර් අවශ්‍යතාව මත අරමුදල් සපයා ගැනීම සඳහා ජාත්‍යන්තර මූල්‍ය අරමුදලින් ඩොලර් මිලියන 200ක සහනයක් ඉල්ලා තිබෙනවා. ඔවුන් ඒ සඳහා ඵලදායී ප්‍රතිචාර දක්වනු ඇතැයි අපි විශ්වාස කරනවා. ඒ වගේම සුළු සහ මධ්‍ය පරිමාණ ව්‍යවසායකයින් නැවත නගාසිටුවීම සඳහා අවශ්‍ය අරමුදල් සපයා ගැනීම වෙනුවෙන් අපි ආසියානු සංවර්ධන බැංකුව සමග සාකච්ඡා කර තිබෙනවා.

අපි මේ පරිපූරක ඇස්තමේන්තුව සකස් කර මිල තීරණය කර තිබෙනවා. හැබැයි එම ව්‍යාපෘති නම් කරගත යුතුයි. ඒ සඳහා කාලයක් අවශ්‍යයි. 19 වෙනි දා පාර්ලිමේන්තුවේදී එය සම්මත කර ගැනීමට අපි අපේක්ෂා කරනවා. විපක්ෂයේ සෑම මන්ත්‍රීවරයෙක්ම ඊට සහයා ලබා දෙනු ඇතැයි මම සිතනවා. වෙන දා අයවැයෙන් පසුව ජනවාරි මාසයේ පාර්ලිමේන්තුව රැස් වුවත් මේ වසරේ දෙසැම්බර් මාසයේදී රැස් වෙන්න වෙයි. ජනවාරි 06 දක්වා පාර්ලිමේන්තුව කල් තැබීමට දැනට එකඟතාව පළ කර තිබෙනනවා. හදිසි තත්ත්වයක් යටතේ පාර්ලිමේන්තුව කැදවීමට අග්‍රාමාත්‍යවරියට හැකියාව තිබෙනවා. ඒ අනුව 19 වන දා මා මේ කියන ලද පරිපූරක ඇස්තමේන්තුව සම්මත කර දෙන ලෙස පාර්ලිමේන්තුවෙන් ඉල්ලා සිටිනවා.

අපේ යටිතල පහසුකම්වල විශාල බිද වැටීමක් ඇති වී තිබෙනවා. මෙම යටිතල පහසුකම් සංවර්ධනය සඳහා අපි මුදල් ප්‍රතිපාදන වෙන් කරගත යුතුයි. මෙම දෙසැම්බර් 31 වන දින පාලම් 30ක් ඉදිකර අවසන් කිරීමට අපි සැලසුම් කර තිබෙනවා. අපි මේ මාර්ග පද්ධතිය අතර සම්බන්ධතාව යළි ඇති කළ යුතුයි. ඒ වෙනුවෙන් දැනටමත් මාර්ග සංවර්ධන අධිකාරිය ඉතා විධිමත් සැලැස්මක් සකස් කර තිබෙනවා. ඒ අනුව මේ බිඳ වැටී ඇති මාර්ග පද්ධතිය සංවර්ධනය කිරීමට අපිට හැකියාව තිබෙනවා.
ඒ වගේම විදුලිබලය 87%කට ආසන්න ප්‍රමාණයකින් නැවත ලබා දීමට අපි සමත් වී තිබෙනවා. මහියංගනය 132 වී සම්ප්‍රේෂණ පද්ධතිය බිද වැටීම හේතුවෙන් අම්පාර, මඩකළපුව, මහියංගණය ආදී ප්‍රදේශවලට විදුලි සැපයුම ඇණ සිට තිබෙනවා. එම විදුලි සැපයුම් යථාවත් කිරීම සඳහා එම කාර්යය මණ්ඩල වෙහෙසෙමින් කටයුතු කරනවා. ඒ වගේම සන්නිවේදන පද්ධතිය, ජලාපවාහන පද්ධතිය යථාවත් කිරීමේ කටයුතු සිදු වෙනවා.

මේ අන්දමින් අපේ ප්‍රමුඛ අවශ්‍යතාව බවට පත්ව තිබෙන්නේ බිඳවැටුණු ජන ජීවිතය නගාසිටුවීමයි. ඒ වගේම ආර්ථිකය යළි ආරම්භ කළ යුතුයි. අපි රටක් පිළිබඳ වගකීමෙන් කටයුතු කරනවා. දිවා රෑ නොබලා සැලසුම් සකසමින් අපි මේ සඳහා වැඩ කරනවා.

ඒ වගේම නැවත ගොඩනැගීම සඳහා වන ජනාධිපති කාර්යසාධක බලකායක් ස්ථාපිත කිරීමට අපි බලාපොරොත්තු වෙනවා. ඒ ජනාධිපති කාර්යසාධක බලකාය යටතේ අරමුදල් එක්රැස් කිරීම සඳහා කමිටුවක් හදනවා.

මම දැක්කා මේ පාර්ලිමේන්තුවේ කෑ ගහනවා අරමුදල් වියදම් කිරීම ජාවාරම්කරුවන්ට දීලා කියලා. නැහැ. තවමත් මේ අරමුදලේ ගිණුම තිබෙන්නේ මහා භාණ්ඩාගර ලේකම්ගේ නමට. මුදල් බැර වෙන්නේ ඒකාබද්ධ අරමුදලට. මුදල් වියදම් කළ යුත්තේ පාර්ලි

ආපදා තත්වයෙන් හානියට පත් ගිරිඋල්ල නගරය පිරිසිදු කිරීම අද(03) දින, සහන සේවා කණ්ඩායමේ සහභාගීත්වයෙන් සිදු කෙරිණි.

නිවාස පිළිසකර කිරීම සඳහා ලබාදෙන මුදල රුපියල් 25,000 ක් දක්වා වැඩි කෙරේ.

ගං වතුරෙන් බලපෑමට ලක්ව ඇති නිවාස පිළිසකර කිරීම සඳහා ලබාදීමට තීරණය කර තිබුණු රුපියල් 10,000 ක මුදල, රුපියල් 25,000 ක් දක්වා වැඩි කිරීමට තීරණය කර ඇති බව මුදල් අමාත්‍යාංශ ලේකම් ආචාර්ය හර්ෂණ සූරියප්පෙරුම පවසනවා.

ඒ සඳහා රුපියල් බිලියන 7.5 ක මුදලක් වෙන්කරන බවයි අද (02) මාධ්‍ය වෙත ප්‍රකාශයක් නිකුත් කරමින් මුදල් අමාත්‍යාංශ ලේකම්වරයා සඳහන් කර සිටියේ.

‘Rebuilding Sri Lanka’ අරමුදලේ කළමනාකරණ කමිටුව පත් කෙරේ

ශ්‍රී ලංකාවේ මෑත කාලීන ඉතිහාසයේ දරුණුතම ස්වභාවික විපත් අතරින් එකක් වූ ‘දිට්වා’ සුළි කුණාටුවෙන් සිදුවූ අතිවිශාල හානියෙන් පසුව රට යළි ගොඩනැංවීම අරමුණු කරගත් ‘Rebuilding Sri Lanka’අරමුදල ස්ථාපනය කිරීමට කැබිනට් මණ්ඩල අනුමැතිය ලැබී තිබේ.

මෙම අරමුදල ජනාධිපති ලේකම් කාර්යාලය යටතේ ව්‍යවස්ථාපිත අරමුදලක් ලෙස පිහිටුවීමට නියමිත අතර එහි කළමනාකරණ කමිටුව රජයේ සහ පෞද්ගලික අංශයේ නියෝජිතයන්ගෙන් සමන්විතය.

කම්කරු අමාත්‍ය සහ මුදල් හා ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා එහි සභාපතිවරයා ලෙස කටයුතු කරන අතර ජනාධිපති ජ්‍යෙෂ්ඨ අතිරේක ලේකම් ජී.එම්.ආර්.ඩී. අපොන්සු මහතා කමිටුවේ කැඳවුම්කරු ලෙස කටයුතු කරයි.

සෙසු සාමාජිකයන් ලෙස,

විදේශ ආයෝජන සඳහා ජනාධිපති විශේෂ නියෝජිත, බස්නාහිර පළාත් ආණ්ඩුකාර හනීෆ් යූසුෆ්,
මුදල් අමාත්‍යාංශයේ ලේකම් ආචාර්ය හර්ෂණ සූරියප්පෙරුම,
ජනාධිපති ජ්‍යෙෂ්ඨ ආර්ථික උපදේශක දුමින්ද හුලංගමුව,
විදේශ කටයුතු අමාත්‍යාංශයේ අධ්‍යක්ෂ ජනරාල් සුගීෂ්වර ගුණවර්ධන,
හේලිස් සමූහයේ සභාපති මොහාන් පණ්ඩිතගේ,
ජෝන් කීල්ස් සභාපති ක්‍රිෂාන් බාලේන්ද්‍රන්,
එයිට්කන් ස්පෙන්ස් උප සභාපති සහ කළමණාකාර අධ්‍යක්ෂ ආචාර්ය පරාක්‍රම දිසානායක,
බ්‍රැන්ඩෙක්ස් සමූහ ප්‍රධාන විධායක නිලධාරී අෂ්රොෆ් ඔමාර්,
LOLC විධායක සභාපති ඉෂාර නානායක්කාර යන මහත්වරු කටයුතු කරති
අරමුදල ඵලදායී ලෙස කළමනාකරණය කිරීමේ බලය කළමනාකරණ කමිටුවට හිමි වන අතර, අවශ්‍යතා තක්සේරු කිරීම, ප්‍රමුඛතා සැකසීම, අරමුදල් වෙන් කිරීම සහ අනුමත ප්‍රතිසාධන කටයුතු සඳහා මුදල් නිකුත් කිරීම එහි වගකීම් අතර වේ.

මෙම කමිටුව විසින් අරමුදලට අදාළ මූල්‍ය කළමනාකරණය, විගණනය සහ සියලුම අරමුදල් ක්‍රියාකාරකම්වල පූර්ණ විනිවිදභාවය සහතික කරනු ඇත.

මේ අනුව පරිත්‍යාගශීලීන්ට තම මුදල් ආධාර දේශීය හෝ විදේශීය ඕනෑම පුද්ගලයෙකුට, ශ්‍රී ලංකා රුපියල්වලින් හෝ ඕනෑම මුදල් ඒකකයකින් පහත සඳහන් ලංකා බැංකු ගිණුම වෙත බැර කළ හැකිය.

01. Account Name: Deputy Secretary to the Treasury
Account Number: 2026450
Bank: Bank of Ceylon
Taprobane branch
Swift code : BCEYLKLX

ඊට අමතරව, ශ්‍රී ලංකා මහ බැංකුවේ විදේශ මුදල් ගිණුම්වලට සෘජුවම මුදල් බැර කරන පරිත්‍යාගශීලීන්ට පහත සඳහන් ගිණුම් ඔස්සේ මුදල් බැර කිරීමේ අවස්ථාව හිමි වේ.

බිංදුවෙන් පටන් ගමු.
සිටියාට වඩා හොද රටක් ගොඩනගමු.

ගෞරවනීය ස්වාමීන්වහන්ස, පූජකතුමනි, දෙමාපියනි,
සහෝදර සහෝදරියනි, දූ දරුවනි,

අපි රටක් ලෙස මුහුණ දී සිටින්නේ ඉතිහාසයේ විශාලතම සහ අභියෝගාත්මක ස්වභාවික ව්‍යසනයට බව අපි දන්නවා. ඒ වගේම අපි දියත් කොට ඇත්තේ මෙරට ඉතිහාසයේ අභියෝගාත්මකම ගලවා ගැනීමේ මෙහෙයුම බවත් අපි දන්නවා. මෙය ඉතිහාසයේ එකවර රටම ව්‍යසනයට ලක් කිරීමේ පළමු අත්දැකීම වෙනවා. රටම සතර දිග් භාගයෙන් යට වූ සහ ආපදාවට ලක් වූ තත්ත්වයක් තුළ මේ අතිශය දුෂ්කර ව්‍යයාමය ජයගත යුතුව තිබෙනවා. මේ අකාරුණික ස්වභාවික ව්‍යසනයට අපේ කුඩා දූපතම සසල කළ හැකි වුවත්, මේ දූපතේ මිනිසුන්ගේ මනුෂ්‍යත්වය සහ අධිෂ්ඨානශීලිත්වය කිසි ලෙසකින් සසල කළ නොහැකි බව නැවත නැවතත් පසක් කොට තිබෙනවා.

මගේ රටේ ආදරණීය පුරවැසියන්ගේ නොසැළෙන ධෛර්යය සමග එක්ව නැවත මේ රට ප්‍රතිනිර්මාණය කළ හැකි බව අපි ඒකාන්තයෙන්ම විශ්වාස කරනවා. දයාබර දෙමාපියනි, සහෝදර සහෝදරියනි, මේ ව්‍යසනයෙන් මිය ගිය සියලු දෙනාට නැවත ජීවිතය ලබා දිය හැකි නම් ඕනෑම කොන්දේසියකට යටත්ව එය ඉටු කිරීමට අපි දෙවරක් කල්පනා කරන්නේ නැහැ. නමුත් අපි යථාර්ථයේ වේදනාකාරී සත්‍යයට මුහුණ දිය යුතුයි. අහිමි වූවන් පිළිබඳ වේදනාව සදාකාලිකව අප අතර පවතිනවා. මිය ගිය සියලුදෙනා අපිට අංකයක් නොවෙයි. සෑම ජීවිතයක් සමඟම නමක්, මුහුණක් සහ කතාවක් තිබෙනවා. මියගිය සියලු දෙනාගේ පවුල් වෙනුවෙන් හදවතින්ම අපගේ සාතිශය සංවේගය පිරිනමනවා. එය සංවේගයකට සීමා වන්නේ නැහැ.
එම පවුල්වලට නැවත එම ජීවිත ලබා දිය නොහැකි වුවත්, සෙසු සියල්ල ලබා දීම වෙනුවෙන් අපි කැපවීමෙන් කටයුතු කරනවා.

ඒ වගේම දැනටමත් අතුරුදන් වූවන් සියලුදෙනා නිරුපද්‍රිතව සිටිනවා කියන ප්‍රාර්ථනය අප තුළ තිබෙනවා. ජීවිත ව්‍යසනයට ලක්ව ඇති බොහෝ දෙනෙක්ගේ දුක්, වේදනා සමනය කිරීමට සහ බලපෑමට ලක් වූ වින්දිතයන්ට ශක්තියක් වීමට ඉදිරියට පැමිණි සියලු දෙනාගේ දෑත් උණුසුම්ව වැළද ගන්නවා.

ස්වභාවික විපත් සහ ආපදා ඇති වීම පාලනය කිරීමට නොහැකි වූ විට ඇතිවන විපත් සහ හදිසි ආපදා නිසි අයුරින් කළමනාකරණය කිරිම, නැවත යථා තත්ත්වයට හෝ පෙර තත්ත්වයට වඩා දියුණු තත්ත්වයකට ගොඩනැඟීම යන ත්‍රිවිධ ක්‍රියාවලියේම වැදගත්කම ආණ්ඩුව සතු වෙනවා. ඒ වෙනුවෙන් ගත යුතු සහ ගතහැකි ඉදිරි ක්‍රියාමාර්ග මොන තරම් දුෂ්කර තත්ත්වයකදී වුවත් ගැනීමට අපි බලාපොරොත්තු වෙනවා. මේ ව්‍යසනයට මුහුණ දීමේදී පහසුකම් සහ මෙවලම් සීමිත රටක, අප සතුව ඇති අයෝමය මානව සම්පත සියල්ලටම වඩා වටිනා බව නැවත නැවතත් පසක් කොට තිබෙනවා. විපතකදී හැර නොයන, සෑම විටම පිහිටවන ආත්ම විශ්වාසයෙන් පිරුණු අපේ රටේ පුරවැසියන් පිළිබඳව අප ආඩම්බර වෙනවා.

අපිට ඉදිරියට මුහුණ දීමට සිදු වන්නේ එදා මෙදා තුර විශාලතම ප්‍රතිසංස්කරණ ප්‍රයත්නයන් සහ නැවත ගොඩනැඟීමේ කාර්යභාරයට බව අපි සිහිපත් කළ යුතුව තිබෙනවා. විනාශයේ තරම ගැන අනුමාන තක්සේරු එතරම් බරපතලයි. එහෙත් අපේ රටේ ජනතාව ගංවතුරෙන්, කුණාටුවෙන් හෝ ඕනෑම ව්‍යසනයකින් පසුව අධිෂ්ඨානශීලිව නැවත ගොඩනැගී තිබෙනවා.

අපේ පළමු කාර්යභාරය වූයේ ව්‍යසනයට මැදී වූ අයගේ ජීවිත බේරා ගැනීම සහ ඔවුන්ට අවශ්‍ය ක්ෂණික සහන සැපයීමයි. ඒ සඳහා අපේ සමස්ත රාජ්‍ය යාන්ත්‍රණයම ඉතා කාර්යක්ෂමව මෙහෙයවීමට අපි උත්සාහ කළා. විශේෂයෙන්ම අපේ ත්‍රිවිධ හමුදාව, පොලීසිය ජීවිත අවදානම නොතකා, ජීවිත පරිත්‍යාගයෙන් යුතුව මෙම කාර්යයයේදී වීරෝධාර ක්‍රියාදමයක නිරත වුණා. ඔවුන් පිළිබද අපි ආඩම්බර විය යුතුයි. ඔවුන්ට ජාතියේ ප්‍රණාමය පුද කළ යුතුයි.

ඒ වගේම අපේ අමාත්‍යාංශ ලේකම්වරුන්ගේ සිට පහළ ග්‍රාම නිලධාරී කොට්ඨාසයේ ග්‍රාම නිලධාරී දක්වා සියලු රාජ්‍ය යාන්ත්‍රණය යුහුසුළුව මැදිහත් වෙමින් ආපදාවට ලක් වූ ජනතාව මුදා ගැනීම සඳහා විශාල කාර්යභාරයක් ඉටු කරනු ලැබුවා. එය රාජකාරියෙන් ඔබ්බට යන ලද මානුෂීය කාර්යයක් ලෙස තේරුම් ගනිමින් ඒ කාර්යයට හෘදයාංගම බැඳීමකින් යුතුව ඔවුන් කටයුතු කළා. ඔවුන්ට අපි ස්තූතිවන්ත විය යුතුයි. ඒ වගේම ව්‍යසනයට පත් වූ ජනතාව මුදා ගැනීම වෙනුවෙන් ස්වේච්ඡාවෙන් විශාල ජනතාවක් මැදිහත් වී තිබෙනවා. තමන් ව්‍යසනයට පත් නොවුවත්, තමන්ගේ අසල්වැසියා ව්‍යසනයට පත් වීම, තමන්ගේ ගම්වැසියා ව්‍යසනයට පත්වීම තමන්ගේ ව්‍යසනයක් ලෙස සලකා පුරවැසියන් එම ව්‍යසනයට පත් වූ ජනතාව මුදා ගැනීම සඳහා විශාල මානුෂීය කාර්යභාරයක් ඉටු කළා. ඉටු කරමින් තිබෙනවා. ඒ පිළිබඳ අපි මේ අවස්ථාවේ සිහිපත් කළ යුතුයි.

ඒ වගේම මේ මුදා ගැනීමේ ක්‍රියාදාමයේදී අපේ අසල්වැසි රටවල්, මිතුරු රටවල් අපිට විශාල ලෙස උපකාර සපයා තිබෙනවා. දැනටමත් හෙලිකොප්ටර් යානා ලබා දෙමින්, සහන ගලවා ගැනීමේ හමුදාවන් ලබා දෙමින් විදේශ රාජ්‍යයන් අප වෙත මිත්‍රත්වයේ හස්තය දිගු කොට තිබෙනවා. අපේ රටේ ජනතාව වෙනුවෙන් අපි ඔවුන්ට බෙහෙවින් ස්තූතිවන්ත වෙනවා. ඒ වගේම මේ මුදා ගැනීමේ කාර්යභාරයේ සැලකිය යුතු කොටසක් දැන් ඉටු කොට අවසන් කර තිබෙනවා. විශේෂයෙන්ම මුදාගත් ජනතාව කණ්ඩායම් 03ක් ලෙස ජීවත් වෙනවා. එක් කණ්ඩායමක් වන්නේ තමන්ගේ නිවස තුළම අවතැන්භාවයට පත්ව තිබෙන අයයි. දෙවැනි කණ්ඩායම වන්නේ තමන්ගේ, මිතුරන්, ඥාතීන්ගේ නිවෙස් තුළ අවතැන්භාවයට පත්ව සිටින අයයි. තුන්වන කණ්ඩායම වන්නේ අවතැන් මධ්‍යස්ථානවල සිටින පිරිසයි.

අපේ රටේ තිබු ඇතැම් චක්‍රලේඛ මේ ප්‍රජාවන් තුනටම සහන සැලසීම සඳහා බාධා ඇති කර තිබෙනවා. අපි ඒ සියලු චක්‍රලේඛ වෙනස්කොට අවතැන් වී සිටින්නේ කොතැනද, ඉන්නේ කොතැනද කියන බේදයකින් තොරව සියලු දෙනාටම රජයේ සහන ලබා දීමට අවශ්‍ය වන වැඩපිළිවෙළ සකස් කොට තිබෙනවා. ඒ වගේම අපේ ඇතැම් චක්‍රලේඛ අපේ නිලධාරීන්ට අවශ්‍ය ලෙස මුදල් පරිහරණය කිරීම සඳහා බාධාවක් ඇති කොට තිබුණා. එම චක්‍රලේඛ අපි වෙනස් කොට තිබෙනවා. ප්‍රාදේශීය ලේකම්වරයෙකුට ලක්ෂ 500 දක්වා මුදලක් වියදම් කිරීම සඳහා අපි අවසර ලබා දී තිබෙනවා. ඒ අනුව මුදල් ප්‍රතිපාදන ලබා දීම සහ එම කටයුතු කාර්යක්ෂමව ක්‍රියාත්මක කිරීම සඳහා අවශ්‍ය වන නීතිමය රැකවරණය අපේ රාජ්‍ය යාන්ත්‍රණයට ලබා දී තිබෙනවා.

ඒ වගේම පසුගිය අයවැයෙන් සම්මත කරන ලද ප්‍රතිපාදනවලින් රුපියල් කෝටි 3,000කට ආසන්න ප්‍රමාණයක් අපි සතුව තිබෙනවා. එම මුදල් පාර්ලිමේන්තුවේ අනුමැතියකින් තොරව වියදම් කිරීමේ හැකියාව තිබෙනවා. ඒ සියලු ප්‍රතිපාදන අප මේ සඳහා වෙන් කොට තිබෙනවා. අපි දිසාපතිවරුන්ට දැනුම් දී තිබෙනවා ඔබට කොපමණ මුදල් ප්‍රමාණයක් අවශ්‍යයද, කොපමණ කාර්යයන් කිරීම සඳහා ඔබට වැය බරක් දැරීමට සිදුවී තිබෙනවද කියා දැනුම් දෙන ලෙස. ඒ සියල්ල ලබා දීමට අපි අවශ්‍ය කටයුතු සම්පාදනය කර තිබෙනවා.

2025 අයවැය ලේඛනයෙන් වෙන් කොට තිබෙන ප්‍රතිපාදන ප්‍රමාණවත් නොවන්නේ නම් පරිපූරක ඇස්තමේන්තු හරහා, පාර්ලිමේන්තුව හරහා නව ප්‍රතිපාදන ලබා දීමට අපි කටයුතු කරනවා. ඒ මගින් අවතැන් වූ ජනතාවගේ ආහාර පාන, සෞඛ්‍ය, සනීපාරක්ෂක කටයුතු ඉටුකරගත හැකි වනු ඇතැයි අපිට විශ්වාසයක් තිබෙනවා. ඒ වගේම මේ ආපදා තත්ත්වය හේතු කොටගෙන අත්‍යාවශ්‍ය සේවා සහ යටිතල පහසුකම් විශාල ප්‍රමාණයක් බිඳ වැටී තිබෙනවා. බොහෝ ප්‍රදේශවල විදුලිය බිඳ වැටී තිබෙනවා. ඒ වගේම ජල පහසුකම්, සන්නිවේදන පහසුකම් බිඳ වැටී තිබුණා. ප්‍රවිශ්ට මාර්ග කඩා වැටී තිබුණා. මේ ආදී යටිතල පහසුකම් සහ සේවා විශාල ප්‍රමාණයක් බිඳ වැටී තිබෙනවා. අප ඒ සෑම ක්ෂේත්‍රයක්ම වේගවත් සහ කාර්යක්ෂම යටිතල පහසුකම් සහ සේවා යළි ස්ථාපනය කිරිම සඳහා වන මෙහෙයුම් කාර්යයන් ගොඩනඟා තිබෙනවා. ආපදාවට ලක් නොවූ ප්‍රදේශ තිබෙනවා නම් ඒ ප්‍රදේශවල කාර්ය මණ්ඩල මුළුමනින්ම ආපදාවට ලක් වූ මෙම ප්‍රදේශවල යටිතල පහසුකම් සංවර්ධනය සඳහා යොදවා තිබෙනවා. ඒ වගේම අමාත්‍යාංශ සහ ආයතනවල වෙනස් කාර්යභාරයක් තිබුණා නම්, ඒ සියලු දේ අත්හිටුවා මෙය ප්‍රමුඛ කාර්යභාරයක් ලෙස සලකා මෙම යටිතල පහසුකම් ස්ථාපිත කිරීම සඳහා අපි දැනටමත් වැඩපිළිවෙළක් සකස් කොට තිබෙනවා.

විදුලිබල මණ්ඩලය, ජලාපවහන මණ්ඩලය, ඒ වගේම සන්නිවේදන ආයතන සහ මාර්ග සංවර්ධන අධිකාරිය ආදී අත්‍යවශ්‍ය ආයතන සමග සමීපව කටයුතු කරමින් ඒ සඳහා අවශ්‍ය දායකත්වය සහ මෙහෙයවීම
අපි ලබා දෙමින් සිටිනවා. ඒ නිසා මම විශ්වාස කරනවා ඉතාමත් කෙටි කාලයක් ඇතුළත මේ යටිතල පහසුකම් සහ සේවාවන් අපිට මුළුමනින්ම සපුරා ගැනීමට හැකියාව තිබෙනවා කියලා.

අපගේ ඊළග ප්‍රධාන ප්‍රමුඛතාව වන්නේ මේ ව්‍යසනයට ලක් වූ රට කෙටි කාලීන, මධ්‍ය කාලීන සහ දීර්ඝකාලීන ලෙස ගොඩනැගීමයි. මිල කළ නොහැකි ජීවිත අපිට අහිමි වුණා. තවමත් ගණනය කළ නොහැකි භෞතික සම්පත් අපිට අහිමි වුණා. මාර්ග සහ පාලම්වල සිට පාසල් සහ ජල පද්ධති දක්වා ආපදා කලාපයේ පොදු යටිතල පහසුකම් අලුත්වැඩියා කිරීමේ දැවැන්ත මෙහෙයුමක් කළ යුතුව තිබෙනවා.

සීරුවෙන් සහ ක්‍රමානුකූලව හිස එසවීමට පොර බදිමින් සිටි රටකට මේ තත්ත්වය සුළුපටු අභියෝගයක් නොවෙයි. කුඩා ස්වයං රැකියාවේ සිට මහා පරිමාණ කර්මාන්ත දක්වාද, සුළු පරිමාණ ව්‍යාපාරිකයාගේ සිට මහා පරිමාණ ව්‍යාපාරිකයා දක්වාද මේ සියලු ක්ෂේත්‍ර තමන්ගේ ආදායම් අහිමි වීම්, තමන්ගේ කර්මාන්ත කඩා වැටීමේ අනතුරකට මුහුණ දී සිටිනවා. ඒ වගේම කෘෂිකර්මාන්තය, පශු සම්පත් ක්ෂේත්‍රය මේ ආදී ක්ෂේත්‍ර විශාල බිඳ වැටීමකට ලක් වී තිබෙනවා. ඒ නිසා මෙම ක්ෂේත්‍ර ඉතා වේගයෙන් නඟාසිටුවීමට අපිට වේගවත් සැලැස්මක් අවශ්‍යයි.

අපි මේ වන විට මේ ආපදා තත්ත්වය කළමනාකරණය කර ගනිමින් වේගවත්, කාර්යක්ෂම යළි ගොඩනැගීමක් සඳහා අවශ්‍ය නීතිමය රැකවරණය සහ ප්‍රතිපාදන අවශ්‍යතාව වෙනුවෙන් හදිසි නීතිය පනවා තිබෙනවා. මා මේ රටේ පුරවැසිටන් එක සහතිකයක් ලබා දෙන්න කැමතියි. මෙම ආපදාව කළමනාකරණය කර ගැනීම සහ කාර්යක්ෂමව අපේ රට ගොඩනැගීමට ඉවහල් කර ගන්නවා හැරණු කොට වෙනත් කිසිදු මර්දනීය ක්‍රියාදාමයක් වෙනුවෙන් මෙම හදිසි නීතිය අපි උපයෝගී කර ගන්නේ නැහැ. මෙම හදිසි නීතියට අනුකූල වන පරිදි මේ වන විටත් අපි අත්‍යාවශ්‍ය සේවා කොමසාරිස් ජනරාල්වරයෙක් පත් කර තිබෙනවා. සියලු සේවාවන් අපි එක් තැනකට කේන්ද්‍ර ගත කොට තිබෙනවා. පැය 24 පුරාම අත්‍යාවශ්‍ය සේවා කාර්යාලය විවෘත කොට තිබෙනවා. සියලු වැදගත් ආයතනවල නිලධාරීන් පැය 24 ම සේවයේ නිරත වෙනවා. ඒ නිසා ඉතා කාර්යක්ෂම මධ්‍යගත මෙහෙයුමක් මේ අත්‍යවශ්‍ය සේවා කාර්යලය මගින් ඉටු කර ගැනීමට අපි සැලැස්මක් සකස් කර තිබෙනවා.

ඒ වගේම අපගේ මීළග කාර්යභාරය බවට පත්වී තිබෙන්නේ නැවත අපේ රට තිබු තත්ත්වයට වඩා දියුණු රාජ්‍යයක් බවට පරිවර්තනය කර ගැනීමේ අවශ්‍යතාවයයි. ඒ අපේක්ෂාව වෙනුවෙන් මේ වන විටත් අපි නැවත ගොඩනැංවීම සඳහා අවශ්‍ය වන අරමුදල් සම්පාදනය කර ගැනීමට අරමුදලක් පිහිටුවීමට අපේක්ෂා කරමින් තිබෙනවා. ඒ වගේම එම අරමුදල කළමනාකරණය කර ගැනීම සඳහා පෞද්ගලික අංශය, විදේශ කටයුතු අමාත්‍යාංශය, මුදල් අමාත්‍යාංශය, ජනාධිපති කාර්යාලය ඒකාබද්ධ කළමනාකරණ කමිටුවක් පත් කර තිබෙනවා. අපි ඔවුන්ට විශාල කාර්යභාරයක් පවරා තිබෙනවා.

අපේ රට ගොඩනැගීම සඳහා අවශ්‍ය වන අරමුදල් ආකාර ගණනාවක් සම්පාදනය කරගත හැකියි. අපි හා මිතුරු රාජ්‍යයන් සමග ඉතා සමීපව කටයුතු කරමින් ඔවුන්ගේ ආධාර ලබා ගැනීම. ඒ වගේම විවිධ ජාත්‍යන්තර සංවිධාන ආමන්ත්‍රණය කරමින් ඔවුන්ගේ ආධාර ලබා ගැනීම. ඒ වගේම දේශීය ව්‍යාපරිකයන්, කර්මාන්තකරුවන් ආමන්ත්‍රණය කරමින් ඔවුන්ගේ ආධාර ලබා ගැනීම.

විශේෂයෙන් මේ අවස්ථාවේ ශ්‍රී ලංකාවෙන් පිටත ජීවත් වෙන ශ්‍රී ලාංකික පුරවැසියන් මේ ආධාර ලබා දීම සඳහා විශාල වෙහෙසක් සහ විශාල කැමැත්තකින් යුතුව කටයුතු කරමින් තිබෙනවා. අපි ඔවුන්ට අවශ්‍ය සහාය ලබා දීමට කටයුතු කර තිබෙනවා. ඒ නිසා මේ ව්‍යසනයෙන් ගොඩ ඒම සඳහා අපි ශක්තිමත් අරමුදලක් ගොඩනැගිය යුතුයි. ඒ අරමුදල සම්පාදනය කර ගැනීම සඳහා අවශ්‍ය වන කටයුතු අපි සකස් කර තිබෙනවා.

ඒ වගේම අපි සියලු ආයතන වෙත දැනුම් දී තිබෙනවා, ඔබගේ ක්ෂේත්‍රය මුහුණ දී සිටින අභියෝගයේ ප්‍රමාණය, නැවත ගොඩනැගීම සඳහා අවශ්‍ය වන ප්‍රතිපාදන පිළිබඳ ශක්තිමත් ලැයිස්තුවක් සකස් කරන ලෙස. මොකද, බොහෝ විට අපේ රට මුහුණ දී තිබෙන තත්ත්වය වන්නේ නිවැරදි දත්ත සහ නිවැරදි තොරතුරු නොමැති වීමයි. එහි ප්‍රතිවිපාකවලට අපි මුහුණ දී තිබෙනවා. මෙම අර්බුදයෙන් ගොඩ ඒමට නම් අපිට නිවැරදි දත්ත සහ තොරතුරු අවශ්‍යයි.

වාරිමාර්ග දෙපාර්තමේන්තුව, තමන්ගේ දෙපාර්තමේන්තුවට අයත් වාරිමාර්ග පද්ධතිවල ඇති වී තිබෙන හානිය සහ එය නැවත ප්‍රතිස්ථාපනය සඳහා අවශ්‍ය අරමුදල් ඉදිරිපත් කළ යුතුයි. කෘෂිකර්ම දෙපාර්තමේන්තුව ගොවි ජනතාවගේ කෘෂිකර්මාන්තයට අත් වී තිබෙන විනාශය, එය නැවත ගොඩනැගීම සඳහා අවශ්‍ය වන අරමුදල් ප්‍රමාණය ඉදිරිපත් කළ යුතුයි. මේ ආදී සෑම ක්ෂේත්‍රයකටම අපි දැනුම් දී තිබෙනවා ඔබේ ක්ෂේත්‍රය නැවත ගොඩනැගීමේ වැඩපිළිවෙළ සහ ඒ සඳහා අවශ්‍ය ප්‍රතිපාදන අපිට ඉතා ඉක්මණින් දැනුම් දෙන්න කියලා.

ඒ අනුව අපිට ඉතා වේගවත් සංවර්ධන සැලැස්මක් ඔස්සේ අපේ රට යළි ගොඩනැගිය හැකිව තිබෙනවා. අපට රටක් ලෙස දීර්ඝකාලින ඉලක්ක ජය ගැනීමට, එකට ජීවත්වීමට බලකල අවස්ථා ඉතිහාසය විසින් මගහැර ඇති අතර මෙවර එය මග නොහැරෙන තැනට පත් කිරීමේ අධිෂ්ඨානය අපි තුළ තිබෙනවා. මෙම අසීරු අවස්ථාවේ අපි වෙනුවෙන් දැනටමත් ඉදිරිපත් වූ, අපිට සහයෝගය දුන් සියලු හිත මිතුරු රටවලට, ඒවායේ නායකයන්ට, පුරවැසියන්ට සහ ජාත්‍යන්තර සංවිධානවලට අපේ ස්තූතිය පුද කරනවා. අපේ රට නැවත ගොඩනැගීම වෙනුවෙන් ලබා දෙන ඔවුන්ගේ අඛණ්ඩ සහාය වෙනුවෙන් විධිමත් යාන්ත්‍රණයක් අපි දැනටමත් ස්ථාපිත කොට තිබෙනවා.

මේ තීරණාමක ව්‍යසනකාරී මොහොතේ සියලු දේශපාලන මති මතාන්තර රට වෙනුවෙන් අමතක කරමු. ජාති, ආගම්, පක්ෂ, පාට බේදවලින් තොරව එකට එක් වෙමු. දේශපාලනය කිරීමට ඕනෑතරම් කාලය ඇති අතර, ව්‍යසනයට මුහුණ දීමට විශාල කාලයක් නැහැ. අපි එක්ව රට ගොඩනගමු. රට ගොඩනැගිමෙන් පසු වෙන් වෙන්ව දේශපාලනය කිරීමට අපිට පුළුවන්කම තිබෙනවා. විශේෂයෙන් මට විශාල විශ්වාසයක් තිබෙනවා. මා මේ රට ගොඩනැගීම පිළිබඳ අචල විශ්වාසයකින් කටයුතු කරනවා. මා අපේ රටේ පුරවැසියන් කෙරෙහි විශ්වාස තබනවා. මම අපේ රටේ ත්‍රිවිධ හමුදාව, පොලිසිය ඇතුළු රාජ්‍ය සේවය කෙරෙහි විශ්වාස තබනවා.

මම මේ රටේ කර්මාන්තකරුවන්, ව්‍යාපාරිකයින්, බුද්ධිමතුන්, නව නිපැයුම්කරුවන් කෙරෙහි විශ්වාස තබනවා. ඒ වගේම අපේ රටින් පිටත ජීවත් වෙන විදෙස්ගත ශ්‍රී ලාංකිකයින් කෙරෙහි විශ්වාස තබනවා. ඒ වගේම මම අපිට හිත මිතුරු රාජ්‍යයන් කෙරෙහි අපේ විශ්වාසය තබනවා. ඒ විශ්වාසය ඇතිව මේ රට ගොඩනැගිය හැකිය යන දැඩි විශ්වාසයෙන් යුතුව අපි මේ කාර්යභාරයට මැදිහත් වී තිබෙනවා. නියත වශයෙන්ම අපි පෙර තිබූ තැනට වඩා හොද රටක් ගොඩනඟනවා. මෙතැන් සිට එය පටන් ගත යුත්තේ බිංදුවේ සිට වුවත් අපි ඒ අභියෝගය භාර ගන්නවා.

ඒ වෙනුවෙන් වූ මෙම සාමුහික ප්‍රයත්නය සඳහා පටු වාද බේදවලින් තොරව එක්වන ලෙස මම සියලුදෙනාට ආරාධනා කරනවා. ජාතික සහ ජාත්‍යන්තර වැඩපිළිවෙළක් ඔස්සේ, මනා සම්බන්ධීකරණයකින් යුතුව කටයුතු කරමින් හෘද සාක්ෂියට අනුවම අපේක්ෂිත අරමුණු ඉටු කර ගැනීමට කැපවෙමු කියා මම සියලුදෙනාගෙන් ඉල්ලා සිටිනවා.

ඕනෑම අන්ධකාරයක ආලෝකය ඇති බව අප විශ්වාස කරනවා. මේ අඳුරු දිනයන් පහව යන බවත් අප විශ්වාස කරනවා. ඒ නිසා අපි ඒකාවන්ව නැගී සිටිමු. මේ කදුළු සළන පාරාදීසය සුවපත් කරමු. දීප්තිමත් දිවයිනක් ගොඩනගමු.

සියලු දෙනාට තෙරුවන් සරණයි, දෙවි පිහිටයි.

අනුර කුමාර දිසානායක
ජනාධිපති
ශ්‍රීලංකා ප්‍රජාතාන්ත්‍රික සමාජවාදී ජනරජය
2025.11.30