Perfect Imperfections

+ මං ළඟ ඉන්නකෝ....

- මං නං ඉන්නවා. හැමදාම හිටියා...

+ ඇයි... මම ඉඳලා නැද්ද?

- ඒක මං කියනවට වඩා ඔයා හිතලා බලන්න...

+ ඉතිං මං ඉන්නවනේ.....?

- ඔව්, ඉන්නවා. ඒත් කෙනෙක් තව කෙනෙක් ළඟ ඉන්න ඕන හදවතින්ම, ඉන්නං වාලේ නෙවෙයි. හිතකට වැට කඩුළු දාලා සීමා මායිම් වෙන් කරන්න මට බෑ. ගතින් මෙතන ඉඳලා හිතින් ගොඩක් දුර ගියොත් මං ළඟ ඉන්නවා කියලා හිතන්න පුලුවන්ද? ඔයා හිතිං මං ළඟ ඉන්න. එතකොට ඒක මට දැනෙයි.

- ඉන්නවද?

Perfect Imperfections
©️ ගව්වක දුර මනින සෙන්ටිමීටර් ජීවිත

+ ජීවිතේ මේ වගේ පාට කරන්න මට ඕන...

- ඉතිං පාට කරමු....

+ ඔයත් එනව නම් මම කැමතියි. ඒත් අපි හැම වෙලේම රණ්ඩු කරන එක තමා ප්‍රශ්නේ...

- හොඳයි නේ...?

+ මොකද්ද හොඳ?

- රණ්ඩු කරන එක...

+ මොන හොඳක්ද.... ඒකෙන් හිත රිදෙනවා. මං කැමති නෑ....

- අපි දෙන්න රණ්ඩු වෙන්නේ අපි දෙන්නව බෙදා ගන්න බැරුව කියලා හිතිලා නැද්ද? ඇයි එහෙම කරේ.... ඇයි මෙහෙම කරේ... කිය කිය රණඩු වෙන්නේ මගේ කොටසක් ඔයා තුළ ජීවත් වෙන නිසා. ඒ කොටස ඔයාට අයිති නෑ. ඒක මගේ.... මගේ විතරයි.... අන්න ඒ ටික ඔයා තේරුම් ගත්ත දාට ජීවිතේ මෙහෙම පාට වෙයි.... ඔයාගෙ විතරක් නෙවෙයි..... මගෙත්....

- එනවද ජීවිතේ පාට කරන්න.....?

©️ ගව්වක දුර මනින සෙන්ටිමීටර් ජීවිත
Perfect Imperfections

+ මම ඔයාට ආදරෙයි....

- හ්ම්ම්...

+ හ්ම්ම්?

- හ්ම්ම්...

+ මොකද වෙලා තියෙන්නේ...?

- මොකුත් නෑ...

+ එහෙනම් මං ආදරෙයි කිව්වම ආදරෙයි කියන්න...

- බෑ....

+ ඇයි...?

- මං ඔයාට 'ආදරය කරනව'. ඔයා ආදරෙයි කියනව විතරයි. කෙනෙක්ට ආදරෙයි කිව්වට විතරක් මදි. ආදරය කරන්න ඕන.

- ඔයා මට ආදරය කරනවද?

Perfect Imperfections
©️ ගව්වක දුර මනින සෙන්ටිමීටර් ජීවිත

+ මේ විදියට රේල් පාරක් දිගේ අත් අල්ලන් යන්න හොඳ නෑලු....

- ඇයි?

+ රේල් පීලි දෙක කවදාවත් එකතු වෙන්නේ නෑනේ. ඒ නිසා....

- ඔයා මට ආදරෙයිද?

+ ඔව්... දන්නෙ නෑ වගේ අහන්නෙ ඇයි?

- බලාපොරොත්තුවක් නිසා. අනාගතේ ගැන සුබවාදි පණිවිඩයක් ඒ වචන ඇතුළෙ තියෙන නිසා. මට ඔයා ඉස්සරහ මං වෙන්න පුලුවන් නිසා. හිතේ තියෙන ඔක්කොම වචනයක් නෑර කියන්න පුලුවන් නිසා. ඔයා මගේ නිසා. මං ඔයාගෙ නිසා.

- මතක තියාගන්න..... අපි දෙන්න මෙහෙම අත් අල්ලන් ඉස්සරහට යන්නෙ 'යහපත් බලාපොරොත්තුවක්' නිසා. ඒ බලාපොරොත්තුව අද වගේම හෙටත් ලස්සන කරාවි.

- මට මගේ ජීවිතේ තියෙනකන් 'යහපත් බලාපොරොත්තුවක්' වෙන්න ඔයාට පුලුවන් නේද?

Perfect Imperfections
©️ ගව්වක දුර මනින සෙන්ටිමීටර් ජීවිත

+ ඔයා කියපු දේට හිත රිදුණා....

- මොකටද?

+ මාව මුණගැහෙන්න කම්මැලි හිතුණා කිව්වම....

- ඔව්.... හිතුන දේ තමයි කිව්වේ....

+ ඉතිං ඔයාට එහෙම හිතුන නිසා මගේ හිත රිදුණා...

- එහෙම හිතෙන්න බලපෑවේ ඔයාගේ ප්‍රතිචාර. ඒක වෙනස් කරනවද නැද්ද කියන එක ඔයාගෙ අතේ තියෙන දෙයක්. පාලනය තියෙන්නේ ඔයාගෙ අතේ නිසා....

- හැබැයි ඔයාගෙ බලපෑමක් නැතුව, මගේ හිතේ මොකක් හරි විදියකින් ඍණාත්මක ගැඟීමක් උපදිනවා නම්, ඔයා රිද්දගත්තට කමක් නෑ. මොකද ඒක ඔයාට පාලනය කරලා වෙනස් කරන්න බෑ....

- මගේ හිත ඔයාගේ පාලනය යටතේ තියෙනකන් රිද්ද ගන්න එපා, තේරුණාද?

Perfect Imperfections
©️ ගව්වක දුර මනින සෙන්ටිමීටර් ජීවිත

+ ඉර මුහුදෙ ගිලෙනකොට මට දුකයි

- ඇයි...?

+ අද දවස ගෙවිලා ඉවර නිසා.... අනික හෙට ඉර පෑව්වෙ නැත්තං එහෙම....

- ඉතිං....?

+ අපි මැරෙයිනේ....

- ජීවිතේ ගෙවිලා ඉවර ඒවා ගැන ලත වෙන්න එපා. ඒක වෙලා ඉවරයි. කොච්චර හිතුවත් වෙනස් කරන්න බෑ. ඒ වගේම හෙට ගැන හිත හිතා ඔලුවට බරක් දාගන්න එපා. ඒක හෙට බලමු. අතීතෙ සහ අනාගතෙ ගැන හිතලා ඇයි වර්තමානයේ විඳින්න තියෙන ජීවිතේ අහිමි කරගන්නේ.....? මේ මොහොතේ ජීවත් වෙන්න බලන්න.

- නැත්තං ඔයාට හැමදාම නැතිවෙච්ච 'මේ මොහොත' ගැන පසුතැවිලි වෙන්න වෙයි. එහෙම නෙවෙයිද?

Perfect Imperfections
©️ ගව්වක දුර මනින සෙන්ටිමීටර් ජීවිත

+ මට ඔයාව හැමවෙලේම ඕනේ... නැති වෙයි කියලා බයෙන් ඉන්නේ මං.
ඔයාට තේරෙන්නෑ....

- ඔයාට මාව නැති වෙන්නෑ.
ඔයාට තේරෙන්නෑ....

ගව්වක දුර මනින සෙන්ටිමීටර් ජීවිත ©️
Perfect Imperfections

+ ඕක නවත්තන්නකෝ.... මං ළඟ ඉන්න

- මං කොහොමත් ඉන්නේ ඔයා ළඟ තමයි. ඔයා තමයි මං ළඟ නැත්තේ....

+ මම...? නෑ

- ඔව්...

+ නෑ....

- ඔව්...

+ දැන් මං මේ ඉන්නේ එහෙනම් ඔයා ලඟටම වෙලා..... ඔයාට පිස්සු...

- ඔව්.. මට පිස්සු තමා. ඔයා නිසා මට පිස්සු වැටිලා. ඒ පිස්සුව හොඳ වෙච්ච දාට මං ඔයා පස්සෙන් එන එක නතරවෙයි. බය වෙන්න එපා.

+ ඔයාට පිස්සු හොඳ වෙනවට මං කැමති නෑ. ඒ පිස්සුවට තමා මං කැමති

- ආදරේ කියන්නේ හොඳ කරන්න බැරි පිස්සුවකට තමයි. ඒ පිස්සුව හැදුනේ ඔයා වෙනුවෙන් විතරයි. මතක තියා ගන්න.

ගව්වක දුර මනින සෙන්ටිමීටර් ජීවිත ©️
Perfect Imperfections

- හැමදාම ඔයානේ කතාව පටන් ගන්නේ...
අද මම....

+ පුදුමයි.

- ඇයි?

+ මොකුත් නෑ... මම අහන් ඉන්නේ, ඉතිං කියන්න...

- ඇයි ඔයා මගේ ළඟ නතර වුණේ...?
ඇස් උඩ තියාගෙන ඔහොම බලන්න එපා. මං ඇහුවේ ප්‍රශ්නයක්?

+ මං දන්නවා... ඔයා හිතන්නේ ඇයි මං නතර වුණේ?

- හ්ම්... ඒකටත් මං ද දැන් උත්තර දෙන්න ඕනේ? අහගන්නකෝ එහෙනං...

- ඔයා කැමතියි තමන්ට දැනෙන්න ආදරය කරනවට, කියන දේවල් අහන් ඉන්නවට, ආරක්ශාව ලැබෙනවට, ඔයාගේ හීනවලට යන්න උදව් කරනවට, හැම දේම බෙදාගන්නවට, ඔයාට විතරක් ආදරය කරනවට.... ඇතිද?

+ උත්තරේ ඒ එකක්වත් නෙවෙයි හැබැයි...

- එහෙනම්?

+ අසම්පූර්ණ මට ඔයා ළඟ 'මං' වෙන්න ඉඩ දෙනවට.... දෙනවද?

ගව්වක දුර මනින සෙන්ටිමීටර් ජීවිත ©️
Perfect Imperfections

+ නපුරා...

- මට නපුරා කියන්න එපා....

+ ඇයි?

- මං නපුරු නැති නිසා

+ ඔයා නපුරුයි... ඔයා වෙලාවකට කියන්නේ නපුරු කතා... හිත රිද්දන නපුරු කතා....

- වෙන්න ඇති, හැබැයි මං කියපු හැම දෙයක්ම කිව්වේ, ඔයාව ළඟ තියා ගන්න අදහසින්. එහෙම නැතුව ඔයාව ඈත් කරන්න හිතාගෙන නෙවෙයි. ඒත් ඒවගෙන් ඔයාගේ හිත රිදෙනවා නම්, ඔයාගෙන් ඈත්වෙලා ඉන්න වුනත් මට හිත හදාගන්න පුලුවන්. ඒක තමයි වෙන්න තියෙන අන්තිම දේ. ඔයාගේ සතුට වෙනුවෙන් මට කරන්න තියෙන අන්තිම දේ...

- ඔයා මට යන්න දීලා බලන් ඉන්නවද?

ගව්වක දුර මනින සෙන්ටිමීටර් ජීවිත ©️
Perfect Imperfections

+ මාව ඔයාට ගැලපෙනවද?

- ඔව්

+ ඔහොම බලන්න එපා ඉතිං. මං ඇහුවෙ මට හිතුන දේ....

- හා...

+ උත්තරේ එච්චර ද?

- නෑ....

+ එහෙනම් කියන්න

- මොනවද?

+ ඇයි මාව ඔයාට ගැලපෙන්නේ?

- සීයට සීයක් ගැලපෙන අය මේ ලෝකේ නෑ. ඒත් ගලපගන්න ඕන. ඔයා මගේ හිත එක්ක ගලපගන්න බැරිනම්, මං ඔයා ළඟ ඉන්නේ නෑ. මමයි ඔයාව හොයන් ආවේ. මමයි ඔයා ළඟ නතර වුනේ. මමයි ඔයාව අල්ලගෙන ඉන්නෙ. හැම තත්පරේකටම වටිනාකමක් දිදී.....

- මේ ගෙවෙන්නේ අපේ ජීවිතේ, අමතක කරන්න එපා....

ගව්වක දුර මනින සෙන්ටිමීටර් ජීවිත ©️
Perfect Imperfections

- මං කිව්වනේ අඬන්න එපා කියලා

+ අඬන්නේ නෑ.... ඇඬෙනවා....

- ඇයි?

+ ඔයාගේ නපුරු කතාවලට...

- රිද්දන්න හිතාගෙන කිව්වෙ නෑ මම

+ දන්නවා....

- දන්නවා නම් ඉතිං ඇයි අඬන්නේ?

+ හිත රිදුනම අඬන්න බැරිද?

- පුලුවන්.... හැබැයි එකක්.... මම ඔයා ළඟ ඉන්නේ ඔයාගෙ හිතට දුකක් දෙන්න නෙවෙයි. හිත රිද්දන්න නෙවෙයි. අඬවන්න නෙවෙයි. ඔයා අඬනවා නම්, ඒකෙන් කියවෙන්නේ ඔයා මං ළඟ ඉන්නේ සතුටෙන් නෙවෙයි කියන එකයි. මං ඉන්නේ ඔයාගේ හිත සතුටින් පුරවන්න, හිනස්සවන්න, ජීවිතේ විඳින්න දෙන්න.

- ඒ දිහා බලං ඉඳලා මටත් ජීවත් වෙන්න දෙනවද?

ගව්වක දුර මනින සෙන්ටිමීටර් ජීවිත ©️
Perfect Imperfections