Filly

A page from my diary..

ෂීබා ඊයේ දවල් ඉදන් ගෙදර හිටියෙ නෑ. දවල් කෑම දෙන්න හොයද්දි කතා කරාට ආවෙ නෑ. අන්තිමට දැක්කෙ තේ බොන වෙලාවෙ එයාට කන්න බඩ ඉරිගු කරල් බාගයක් දුන්න.

රෑට එයි කියල හිතන් හිටියට ආවෙත් නෑ.

ෂීබා කියන්නෙ ගෙදර හිටිය බල්ලො දෙන්නාගෙන් එක්කෙනෙක්. දෙන්නම කෙල්ලො. අනිත් එක්කෙනා මෙයාට වඩා ලොකුයි, ඇටෙන්ෂන් ඕන ගොඩක්. කෑම දුන්නත් ආදරේ දුන්නත් වැඩිපුර ඕන උනේ අනිත් කෙනාට.

ගෙදර එනකොට මාව ඉස්සල්ලෙම අදුර ගන්නෙ ෂීබා, නැට්ට වනාගෙන දුඹුරු ඇස් වලින් හිනා වේගේන ළගට එනව, ඇගේ නගින් නෑ ළගට ඇවිත් බලන් ඉන්නව. ඔලුව අතගානකන්. බෙලා අනිත් කෙනා, එයාට ඈත තියා මාව අදුරන්න බෑ බුරාගෙන එන්නෙ. ළගට ඇවිත් අදුරගත්තම ඇගේ නගිනව, ලෙවකනව. ෂීබා හෙමීට පස්සට වෙනව, ඇගේ නැග්ග බෙලාව හුරතල් කරනව, ඔලුව අතගානව බලන් ඉන්නව දුඹුරු ඇස් බෝල කරගෙන.

තේ බොන වෙලාවට කන බොන දෙයක් දෙන්නටම හම්බෙනව. ඒකෙනුත් වැඩිපුර ඕන බෙලාට. ෂීබාට දෙන එකත් පැනල කනව. බත් කන වෙලාවටත් එහෙමයි බෙලාට දුන්න කෑම එක තියෙද්දි ෂීබාගෙ කෑම එකට පනිනවා. ෂීබා ඒ වෙලාවට හෙමීට කුස්සිය දිහා බලනව, ඒ එයා වෙනුවෙන් කෙනෙක් ඉන්නවද කියල. ඒ වෙලාවට බෙලා කියල කෑගැහුව ගමන් බෙලා ආපහු එයාගෙ කෑම එක ළගට යනව. කෑම දුන්න කෙනෙක් ළග නැත්නම් බෙල ඉස්සර වෙලා කන්නෙ ෂීබාගෙ කෑම එක, ඊටපස්සෙ එයාගෙ කෑම එක කන්න යනව. ඒ නිසා ඉස්සර වෙලා ෂීබට කෑම දීලා බෙලාට දෙන්නෙ..

සෙල්ලම් කරන්න හුරතල් කරන්න ගියාම ෂීබව අල්ල අල්ල ඉද්දි බෙලා එනව කරේ නගිනව ෂීබාගෙ ඇගෙ නගිනව,ෂීබා එයාට ඉඩ දීලා පැත්තකට වෙනව. ෂීබා බෙලාට බයද නැද්ද කියල තේරුමක් නෑ හැබැයි හැමවෙලාවෙම හැමදේකටම බෙලාට ඉඩ දෙනව.

ඊයෙ ගෙදර නැති වුනු වෙලාවෙ මැවි මැවී පෙනුනෙ ෂීබාගෙ දුඹුරු ඇස්. හොර බැල්මක් තියෙන්නෙ මේ බැල්ලිට කියල දකින හැමෝම කිව්වට මන් හැමදාම ඒ ඇස් වල දැක්කෙ යටහත්පහත් බැල්මක්, තව ටිකක් ආදරේ දෙයිද ඇටෙන්ෂන් ලැබෙයිද කියන බැල්මක්.

හවස ඉදන් නම කතා කර කර කෑගැහුවට රෑට කන්නවත් ආවේ නෑ, ලෙඩ පාටිනුත් හිටියෙ කෙට්ටු වෙලා හිටියට වඩා. ඉන්න තැනකින් ෂීබට ගෙදර එන්න ලැබෙන්න කියල ප්‍රාර්ථනා කරන ගමන් හිතුවෙ ඒ බැල්ම තේරුන් අරගෙනත් නොතේරුනා වගේ හිටිය එක කොච්චර වැරැද්දක්ද කියල..

පොඩ්ඩක් වැඩියෙන් ආදරේ ටිකක් අවධානෙ ටිකක් දෙන්න පුලුවන් වෙද්දි නොදී ඉන්න හොද නෑ කාට වුනත්....

ජිවීතයෙ අදුරුම පරිච්ඡේද වලදි මා හට මුණගැසී වෙන්වුණු ලස්සනම හිත් ඇති මිනිසුන්ට මට ස්තූති කිරිමට ඇවැසිය.
මිනිසුන් නිසාම හෙම්බත් වූ කලෙක හමුවූ, තවමත් මිනිසුන් තුල හොඳ ඉතිරිව ඇති බව මට පසක් කල මිනිසුන්ට මට ස්තුති වීමට අවැසිය.
සියල්ලෝම සර්ව සම්පූර්ණ නොවන බවත්, හැමකෙනෙකු තුලම ඉතිරිව ඇති හොද පමනක් අප දැකිය යුතු බව පසක් කල මිනිසුන්ට මට ස්තුති වීමට අවැසිය.
සදාකාලික සුන්දර මතක එක්කර නැවත හමුවේදැයි අවිනිශ්චිතව වෙන්ව යන්නට යෙදුණු දයාබර මිනිසුන් හට මට ස්තුති වීමට අවැසිය.
මට මාව දරාගත නොහැකි අවස්ථාවන්හි මා දරා සිටි මාගේ දුක් අදෝනා අසා සිටි නැවත ලැබීමට මා ප්‍රාර්ථනා කරන මිනිසුන් කිහිපදෙනාහට මට ස්තුති වන්නට අවැසිය.
අත්විදින්නට වූ දෑ බොහෝ නරක් වූවත් මා තුල ඇති හොද නොවෙනස්ව පවත්වා ගත යුතුබව පසක් කල දුන් ආදරණීය මිනිසුන්ට මට ස්තුති වීමට අවැසිය.
සුන්දර නොවූ ජිවීතයේ මොහොතකට හෝ සිනාවක් රැගෙන හමුවී වෙන්වී යන සෑම මිනිසෙකුටම මට ස්තූති කිරීමට අවැසිය..
ඔබට ස්තුතියි!