Gossip99.Com

ශ්‍රී ලංකා රක්ෂණ සංස්ථාවේ දැවැන්ත බැදුම්කර වංචාවක් හෙලිවෙයි. අනුමැත්යකින් තොරව බිලියන 10ක බැඳුම්කර අරං..
පාඩුව මිලියන 2000 ඉක්මවීමේ අවධානමක.
මුදල් අමාත්‍යංශ ලේකම්ට දැඩි චෝදනාවක්

කොළඹ, මැයි 03, 2026 – ශ්‍රී ලංකා රක්ෂණ සංස්ථාව කිසිදු නිල අනුමැතියකින් තොරව වෙළඳපොළ පොලී අනුපාතයට වඩා අඩු අනුපාතයක් යටතේ භාණ්ඩාගාර බැඳුම්කර මිලියන 10,000ක් (රුපියල් බිලියන 10ක්) මිලදී ගැනීමෙන් රක්ෂණ හිමියන්ගේ මුදල් දැවැන්ත මූල්‍ය අවදානමකට ලක් කර ඇති බවට ප්‍රබල චෝදනාවක් එල්ල වී තිබේ.

මාධ්‍ය හමුවකට එක්වෙමින් මෙම කාරණය සම්බන්ධයෙන් අදහස් දැක්වූ නිරෝෂන් පාදුක්ක මහතා පෙන්වා දුන්නේ මෙම ක්‍රියාවලිය සැලසුම් සහගත මූල්‍ය අපරාධයක් බවයි.

"වෙළඳපොළේ පොලී අනුපාතය 10.12% සිට 10.15% දක්වා ඉහළ මට්ටමක පැවතියදී, රක්ෂණ සංස්ථාව මෙම බැඳුම්කර මිලදී ගෙන ඇත්තේ 9.75% ක ඉතා අඩු පොලී අනුපාතයකටයි" යැයි පාදුක්ක මහතා අවධාරණය කළේය.

රක්ෂණ හිමියන් සතු රුපියල් මිලියන 16,000ක මුදල් යොදවා සිදු කළ මෙම ගනුදෙනුව හේතුවෙන් දැනටමත් සිදුව ඇති පාඩුව රුපියල් ලක්ෂ 500 (මිලියන 50) ඉක්මවා යන බවද ඔහු සඳහන් කළේය. ඉදිරියේදී පොලී අනුපාත 11.5% දක්වා ඉහළ ගියහොත් රක්ෂණ සංස්ථාවට සිදුවන සමස්ත පාඩුව රුපියල් මිලියන 2000 (බිලියන 2) ඉක්මවනු ඇති බවටද ඔහු අනතුරු ඇඟවීය.

"මෙම මූල්‍ය අර්බුදයට ජනාධිපති අනුර කුමාර දිසානායක මහතා සහ මුදල් අමාත්‍යාංශ ලේකම් හර්ෂණ සූරියප්පෙරුම සෘජුව වගකිව යුතුයි" යැයි පාදුක්ක මහතා චෝදනා කළේය.

මෙම ගනුදෙනුව පිටුපස රක්ෂණ සංස්ථාවේ අධ්‍යක්ෂවරයෙකු වන සෝමදාස පලියවඩන නැමැත්තෙකු කටයුතු කරන බවත්, ඔහු රජයේ බැඳුම්කර ගනුදෙනු කරන පෞද්ගලික සමාගමක් වන 'ෂර්වුඩ් කැපිටල්' හි කළමනාකාර අධ්‍යක්ෂවරයා ලෙස කටයුතු කිරීම බරපතල "උනන්දුව අතර ගැටුමක්" බවද මෙහිදී හෙළි විය.

මුදල් අමාත්‍යාංශ ලේකම් හර්ෂණ සූරියප්පෙරුම මහතා සිය ධුරයට පත්වී දින හතක් ඇතුළත සිය හිතවතෙකු වන සෝමදාස පලියවඩන මහතා එම තනතුරට පත් කර ඇති බවත්, සූරියප්පෙරුම මහතා මීට පෙර කොටස් වෙළඳපොළ හැසිරවීම් සම්බන්ධයෙන් සුරැකුම්පත් හා විනිමය කොමිසමේ (SEC) විමර්ශනයට ලක් වූ අයෙකු බවත් පාදුක්ක මහතා පෙන්වා දුන්නේය.

තවද, මෙම බැඳුම්කර මිලදී ගැනීම රක්ෂණ සංස්ථාවේ ආයෝජන කමිටුවේ හෝ අදාළ විෂය භාර නිලධාරීන්ගේ කිසිදු අනුමැතියකින් තොරව සිදු කර ඇති බවට තොරතුරු අනාවරණය වී ඇත. ඒ වෙනුවට නලින් සුබසිංහ සහ සියණි කුලසිංහ යන නිලධාරීන් දෙදෙනාගේ අනුමැතියෙන් පමණක් මෙම මහා පරිමාණ ගනුදෙනුව සිදු කර ඇති බවට චෝදනා එල්ල වේ.

මෙම අත්තනෝමතික ක්‍රියා හමුවේ රක්ෂණ සංස්ථාවේ අත්දැකීම් බහුල ජ්‍යෙෂ්ඨ නිලධාරීන් රැසක් ඉල්ලා අස්වෙමින් පවතින බව පාදුක්ක මහතා පැවසීය. ඒ අතර ප්‍රධාන විධායක නිලධාරී චන්දන අලුත්ගම, සමාගම් ලේකම් ශිරෝමි කෝදාගොඩ, තොරතුරු නිලධාරී අශෝක ජයවර්ධන, ප්‍රධාන ව්‍යාපාරික නිලධාරී නාමලී සිල්වා ඇතුළු තවත් නිලධාරීන් රැසක් වෙති.

"වසර 18ක පමණ පළපුරුද්දක් අවශ්‍ය වන සමාගම් ලේකම් වැනි තනතුරු සඳහා මාස කිහිපයක අත්දැකීම් ඇති පුද්ගලයන් පත් කරමින් ආයතනයේ මූල්‍ය විනය පිරිහෙමින් පවතිනවා" යැයි ඔහු වැඩිදුරටත් පැවසීය.

රක්ෂණ සංස්ථාවේ වත්මන් සභාපති නුසිත් කුමාරතුංග මහතා මාලිමාව නියෝජනය කරමින් මහරගම නගර සභාවට තරඟ කළ අයෙකු බවත්, මෙවැනි අද්දැකීම් අඩු පිරිස් බිලියන ගණනක ලාභ ලැබූ ආයතනයක් විනාශ කරමින් සිටින බවත් ඔහු චෝදනා කළේය.

රක්ෂණ සංස්ථාව බංකොලොත් වීමට පෙර මෙම මූල්‍ය අපරාධය වහාම නතර කරන ලෙසත්, අල්ලස් හෝ දූෂණ චෝදනා විමර්ශන කොමිසම සහ අපරාධ පරීක්ෂණ දෙපාර්තමේන්තුව (CID) හරහා මේ පිළිබඳ කඩිනම් විමර්ශනයක් ආරම්භ කරන ලෙසත් නිරෝෂන් පාදුක්ක මහතා රජයෙන් ඉල්ලා සිටියේය.

– විශේෂ වාර්තාකරු

නැවතත් ඉන්දන මිළ ඉහලට

"හර්ෂණ සූරියප්පෙරුම රටට හිමි වටිනා වස්තුවක්" – අමාත්‍ය බිමල් රත්නායක අවධාරණය කරයි

අමාත්‍ය බිමල් රත්නායක මහතා පවසන්නේ මුදල් අමාත්‍යාංශ ලේකම් හර්ෂණ සූරියප්පෙරුම මහතා මේ රටට හිමි වටිනා වස්තුවක් වන අතර, බිඳ වැටුණු මෙරට ආර්ථිකය යථා තත්ත්වයට පත් කිරීම සඳහා ඔහු සුවිශේෂී කැපකිරීමක් සිදු කළ බවයි.

ස්වර්ණවාහිනී නාලිකාවේ විකාශය වන 'රතු ඉර' වැඩසටහනට එක්වෙමින් අමාත්‍යවරයා මේ බව සඳහන් කළේය.

ජනාධිපති සහ අනිල් ජයන්ත සමඟ එක්ව විශාල කාර්යභාරයක් ඉටු කළ බවට ප්‍රශංසා

ලෝකයේ සෙසු රටවල් පවා ආර්ථික අර්බුද හමුවේ දැඩි පීඩාවට පත්ව සිටින පසුබිමක, ශ්‍රී ලංකාවේ බිඳ වැටුණු ආර්ථිකය වර්තමාන තත්ත්වයට ගෙන ඒම සඳහා ජනාධිපතිවරයා සහ අමාත්‍ය අනිල් ජයන්ත මහතා සමඟ එක්ව හර්ෂණ සූරියප්පෙරුම මහතා විශාල කාර්යභාරයක් ඉටු කළ බව අමාත්‍යවරයා පෙන්වා දුන්නේය.

ඉන්දියාව, පකිස්ථානය සහ බංග්ලාදේශය වැනි රටවල් තවමත් ඉන්ධන පෝලිම් සහ පාසල් වැසී යාම වැනි ගැටලුවලට මුහුණ දී සිටින අතර, ලංකාව එම තත්ත්වයෙන් මුදා ගැනීමට මෙම නිලධාරීන්ගේ විශේෂ කැපවීම හේතු වූ බව ඔහු වැඩිදුරටත් පැවසීය.

පසුගිය ජනවාරි මාසයේ සිදු වූ ගෙවීම් අක්‍රමිකතා සම්බන්ධයෙන් පැහැදිලි කිරීමක්

පසුගිය ජනවාරි මාසයේදී සිදු වූ බව කියන වැරදි ගෙවීම් සම්බන්ධයෙන් මුදල් කාරක සභාව හමුවේ කරුණු පැහැදිලි කිරීමට මුදල් අමාත්‍යාංශයේ ලේකම්වරයා කටයුතු කර ඇති බව අමාත්‍යවරයා සිහිපත් කළේය.

යම් යම් මූල්‍ය අක්‍රමිකතා සිදුව ඇති බව පිළිගන්නා අතර, ඒ සම්බන්ධයෙන් මුදල් අමාත්‍යාංශය මට්ටමින් මෙන්ම පොලිසිය මාර්ගයෙන් ද විමර්ශන ආරම්භ කර ඇති බව ඔහු සඳහන් කළේය.

විපක්ෂ විවේචන ප්‍රතික්ෂේප කරමින් අමාත්‍යවරයාගේ ප්‍රකාශය

විපක්ෂයේ ඇතැම් කණ්ඩායම් එල්ල කරන විවේචන ප්‍රතික්ෂේප කරමින් අමාත්‍යවරයා පවසා සිටියේ, දූෂිතයන්ට තොරතුරු ලැබීම වැළැක්වීමට මුදල් අමාත්‍යාංශය පියවර ගෙන ඇති බවයි.

පාර්ලිමේන්තු මුදල් කාරක සභාව යනු ඉතා වැදගත් වගකීමක් සහිත ආයතනයක් වන අතර එය දේශපාලන පොරපිටියක් බවට පත් කර නොගත යුතු බව බිමල් රත්නායක ප්‍රකාශ කළේය.

ව්‍යුහාත්මක සීමාවන් පිළිබඳව අමාත්‍යවරයාගේ දැක්ම

රටේ සෑම රාජ්‍ය ආයතනයකම සිදුවන මූල්‍ය කටයුතු පිළිබඳ සොයා බැලීමට මුදල් කාරක සභාවට ව්‍යුහාත්මක හැකියාවක් නොමැති බවත්, ඒ සඳහා විගණකාධිපතිවරයාට පූර්ණ බලය පවතින බවත් ඔහු වැඩිදුරටත් පෙන්වා දුන්නේය.

රාජ්‍ය මූල්‍ය විනය තහවුරු කිරීමට රජයේ කැපවීම

රාජ්‍ය මූල්‍ය විනය තහවුරු කිරීම සඳහා වත්මන් රජය කැපවී සිටින බවත්, ඕනෑම වංචාවක් හෝ දූෂණයක් සම්බන්ධයෙන් අපරාධ පරීක්ෂණ පවත්වා දඬුවම් ලබා දීමට පසුබට නොවන බවත් අමාත්‍යවරයා මෙහිදී අවධාරණය කළේය.

සල්ලිනම් ගන්න බැරිවෙයි - මම හිතුවෙ මේක එක සැරේ ගියපු එකක් කියල. ඩොලර් මිලියන 2.5 ගිහින් තියෙන්නෙ වාර 10කදි
පාර්ලිමේන්තු මුදල් කාරක සභාව මසක් ඇතුළත වාර්තාවක් කැඳවයි - හර්ෂද සිල්වා

2026 අප්‍රේල් 30, කොළඹ – මහා භාණ්ඩාගාරයට ඇමරිකානු ඩොලර් මිලියන 2.5ක් අහිමි වීමේ බරපතල සිදුවීම සම්බන්ධයෙන් වහාම පරීක්ෂණයක් පවත්වා ඒ පිළිබඳ සම්පූර්ණ වාර්තාවක් මසක් ඇතුළත ලබා දෙන ලෙස පාර්ලිමේන්තු මුදල් කාරක සභාව (COPF) අද (30) නියෝග කර තිබේ.

මුදල් අමාත්‍යාංශයේ ලේකම්වරයා ඇතුළු ජ්‍යෙෂ්ඨ නිලධාරීන්ට එරෙහිව මෙම නියෝගය නිකුත් කර ඇත්තේ කාරක සභාවේ සභාපති ආචාර්ය හර්ෂ ද සිල්වා මහතාගේ ප්‍රධානත්වයෙන් පැවති විශේෂ රැස්වීමකදීය.

පැය තුනහමාරක සාකච්ඡාවකින් හෙළිවූ කරුණු

මාධ්‍ය හමුවට එක්වෙමින් ආචාර්ය හර්ෂ ද සිල්වා මහතා පැවසුවේ, අද පැය තුනහමාරකට අධික කාලයක් පුරා මෙම සිදුවීම පිළිබඳව දීර්ඝ ලෙස සාකච්ඡා කළ බවයි.

“අද පැය තුන හමාරකට අධික කාලයක් අපේ මුදල් කාරක සභාවේදී මේ පිළිබඳව ඉතා දීර්ඝ ලෙස සාකච්ඡා කළා. මෙතනදී අනාවරණය වුණා නොවැම්බර් මාසයේ ඉඳන් ජනවාරි මාසය දක්වා අවස්ථා 10කදී මේ මුදල් ගෙවීම් සිද්ධ වෙලා තියෙනවා කියලා. මේක දැවැන්ත හොරකමක්."

​"මෙතනදී අපිට පෙනී ගිය ප්‍රධාන කරුණක් තමයි, මේ මුදල් කළමනාකරණය කරන ක්‍රියාවලිය ඇතුලේ විශාල සිදුරු (Loopholes) පවතින බව. ඒ සිදුරු අස්සෙන් හොරුන්ට රිංගලා යන්න පුළුවන් වෙලා තියෙනවා. අපේ මූලික කාර්යභාරය වෙන්නේ මේවා නැවත නොවෙන්න වගබලා ගැනීමයි."

​"මුදල් අමාත්‍යාංශය කියන විදිහට මේක සයිබර් අපරාධයක් (Cyber Crime). ඒ ගැන සී.අයි.ඩී (CID) පරීක්ෂණ සිද්ධ වෙනවා. හැබැයි අපි අහන ප්‍රශ්නය තමයි, මේ තරම් ලොකු ගනුදෙනුවක් සිද්ධ වෙනකල් ඇයි අපේ පද්ධතියට මේක අහුවුණේ නැත්තේ? ඇයි ඔස්ට්‍රේලියාවෙන් දැනුම් දෙනකල් අපි දැනගත්තේ නැත්තේ?",” යැයි ඔහු අවධාරණය කළේය.

මෙම මුදල් කළමනාකරණය කරන ක්‍රියාවලිය තුළ විශාල සිදුරු (Loopholes) පවතින බවත්, එම සිදුරු අස්සෙන් හොරුන්ට රිංගා යාමට හැකි වූ බවත් ඔහු පෙන්වා දුන්නේය.

සයිබර් අපරාධයක් යැයි හඳුනාගැනීම

මුදල් අමාත්‍යාංශය ප්‍රකාශ කර ඇති පරිදි මෙම සිදුවීම සයිබර් අපරාධයක් (Cyber Crime) වන අතර ඒ සම්බන්ධයෙන් අපරාධ පරීක්ෂණ දෙපාර්තමේන්තුව (CID) විසින් පරීක්ෂණ ආරම්භ කර ඇත.

කෙසේ වෙතත් කාරක සභාව මගින් මූලික ප්‍රශ්න දෙකක් මතු කර ඇත:

· මෙතරම් විශාල ගනුදෙනුවක් සිදුවන තෙක් අපගේ පද්ධතියට එය අහුවී නැත්තේ මන්ද?
· ඕස්ට්‍රේලියාවෙන් දැනුම් දෙන තෙක් අප එය දැනගත්තේ නැත්තේ මන්ද?

ඉදිරි පියවර සහ ප්‍රතිසාධන අභියෝගය

සියලු සාක්ෂි සහිත සම්පූර්ණ වාර්තාවක් සති හතරක් ඇතුළත ඉදිරිපත් කරන ලෙස නිලධාරීන්ට දැනුම් දී ඇති අතර, රාජ්‍ය ණය කළමනාකරණය කිරීමේදී සිදුව ඇති අතපසුවීම් පිළිබඳව ද විශේෂ අවධානය යොමු කෙරේ.

"සල්ලිනම් ගන්න බැරිවෙයි"

මෙලෙස අහිමි වූ මුදල් නැවත ලබා ගැනීම (Recovery) ඉතා අපහසු විය හැකි බව ද සභාපතිවරයා පෙන්වා දුන්නේය.

මෙම වංචාව සම්බන්ධයෙන් ආණ්ඩු පක්ෂයේ සහ විපක්ෂයේ සියලුම මන්ත්‍රීවරුන් එකඟතාවයකින් යුතුව මෙම විමර්ශන වාර්තාව කැඳවීමට තීරණය කර ඇති බව ද වාර්තා වේ.

අද අධි වෙසක් පසළොස්වක පොහොය දිනය අදයි..
ඔබ සැමට පිංබර පොහෝ දිනක් වේවා!..

පසළොස්වක පොහොය ශ්‍රී ලාංකික බෞද්ධයන්ගේ ජීවිතය හා බැඳී පවතී. එහි ආගමික හා සංස්කෘතික වටිනාකමක් ගැබ්ව ඇත. සිංහල ලිත් මාස ක්‍රමය අනුව, දුරුතු, නවම්, මැදින්, බක්, වෙසක්, පොසොන්, ඇසළ, නිකිණි, බිනර, වප්, ඉල්, උඳුවප් වශයෙන් මාස 12 නම් කෙරේ. මෙය ඉංග්‍රීසි ලිතට අනුව ජනවාරි, පෙබරවාරි, මාර්තු, අප්‍රේල්, මැයි, ජුනි, ජූලි, අගෝස්තු, සැප්තැම්බර්, ඔක්තෝබර්, නොවැම්බර් හා දෙසැම්බර් ලෙස හැඳින්වේ.

මෙවර සිංහල ලිතට අනුව 2026 වසරට අධි මාසයක් ඇතුළත්වේ. මෙය සාමාන්‍යයෙන් සිදුවන්නේ සෑම වසර තුනකට වරක්ය. ඒ අනුව, මේ වසරේ (2026) පසළොස්වක පොහෝ දින 13 ක් ලෙස ගණනය කෙරේ. චන්ද්‍ර මාස ක්‍රමය හා සූර්ය මාස ක්‍රමය අතර වෙනස නිසා අධි මාසයක් එක්වීම සිදුවේ. එබැවින් අද (2026 මැයි 1) උදාවී ඇත්තේ අධි වෙසක් පසළොස්වක පොහෝ දිනයයි.

වෙසක් පුර පසළොස්වක පොහෝ දිනයේදීම සිදුහත් කුමරුගේ උත්පත්තිය, බුද්ධත්වය ලැබීම හා ගෞතම බුදුන් වහන්සේගේ පිරිනිවන් පෑම යන තෙමඟුල සිදුවිය. එම මහා තෙමඟුල උදාවන්නේ මැයි මාසයේදීය. අද අප විඳින අධි වෙසක් පොහොය, එළැඹෙන වෙසක් මහා උත්සවයට පෙරහුරුවක් වැන්න.

මෙයට වසර 141 කට පෙර – 1885 අප්‍රේල් 28 වැනි අධි වෙසක් පොහෝ දිනක – ශ්‍රීමත් හෙන්රි ස්ටීල් ඕල්කොට් තුමන් අතින්, කොටහේන දීපදුත්තාරාම විහාරස්ථානයේදී ප්‍රථම වරට නිල වශයෙන් බෞද්ධ කොඩිය එසවිණි. නීල, පීත, ලෝහිත, ඕදාත, මාජේෂ්ට, ප්‍රභාෂ්වර යන වර්ණ සයින් යුතු ඒ ධජය අද ලොව පුරා බෞද්ධ ධජය ලෙස පිළිගැනේ. එසවීමේ පුරෝගාමීන් ලෙස මිගෙට්ටුවත්තේ ගුණානන්ද හිමි, හික්කඩුවේ ශ්‍රී සුමංගල හිමි සහ හෙන්රි ස්ටීල් ඕල්කොට් තුමා දැක්විය හැකිය.

අද අධි වෙසක් දිනයේදී අප සිත් පහන් කරන ධම්මපද ගාථාවක් මෙසේය:

සුඛො බුද්ධානං උප්පාදෝ,
සුඛා සද්ධම්මා දෙසනා,
සුඛා සංඝස්ස සාමග්ගී,
සමග්ගානං තපෝ සුඛො. (ධම්මපදය – 194)

(සත්වයන්ට ලොවුතුරු සැප ගෙන දෙන බැවින් බුදුවරුන්ගේ ඉපදීම සැපතකි. සදහම් දෙසීම සැපතකි. සංඝයාගේ සමගිය සැපතකි. සමගියෙන් කල් යවන්නන්ට තපස සැපතකි.)

අද දිනයේ බෞද්ධ විහාරස්ථාන ශ්‍රද්ධාවන්ත ජනයාගෙන් පිරී ඉතිරී යනු ඇත. උපාසක උපාසිකාවෝ අෂ්ටාංගික ශීලය සමාදන් වෙමින්, ධර්ම දේශනා හා ධර්ම සාකච්ඡාවල නිරත වෙති.

සියලු පව් නොකිරීම, කුසල් රැස්කිරීම හා සිත පිරිසිදු කර ගැනීම යන මූලික අනුශාසනාව බුදුවරුන්ගේ දෙසුමයි:

සබ්බ පාපස්ස අකරණං,
කුසලස්ස උපසම්පදා,
සචිත්ත පරියොදපනං,
එතං බුද්ධාන සාසනං. (ධම්මපදය – 183)

මේ අනුව, අද අධි වෙසක් පොහෝ දිනය බෞද්ධයින්ට අතිශයින් වැදගත් ආගමික හා ඓතිහාසික දිනයකි. තෙරුවන් සරණයි!

ඔබ සැමට අධි වෙසක් පොහෝ දිනට මෙන්ම එළැඹෙන වෙසක් මහා උත්සවයටද සුබ පැතුම්!

ධර්ම දානය වෙනුවෙනි.
ගොසිප්99

විශ්වාස කරන්න 😍
අදින් ආරම්භ
වෙන්නේ ඔයාගේ හීන හැමදේම සාර්ථක වන මාසයක් !!! ❤️‍🩹
G O O D L U C K !!!

භාණ්ඩාගාර වංචාවත් සමග අභිරහස් ලෙස මියගිය රංග නිශාන්ත ගැන මිතුරෙකු තැබූ සටහන

කුලියාපිටිය/කොළඹ – මහා භාණ්ඩාගාරයේ ඩොලර් මිලියන 2.5ක මූල්‍ය වංචාව හෙළිදරව් කළ විදේශ සම්පත් දෙපාර්තමේන්තුවේ අධ්‍යක්ෂ රංග නිශාන්ත රාජපක්ෂ මහතා අභිරහස් ලෙස මියගොස් තිබේ. ඔහුගේ මරණය සිදුව ඇත්තේ වංචාව වාර්තා කිරීමෙන් පසු බලධාරීන් විසින් වැඩ තහනම් කිරීමත් සමඟ වන අතර, අවංකභාවයට හිමි වූ මෙම ඛේදවාචකය රටම කම්පනයට පත් කර තිබේ.

රංග නිශාන්ත රාජපක්ෂ මහතා සම්බන්ධයෙන් ඔහුගේ ළඟම මිතුරෙකු වන Malcolm Sang මෙම සටහන ලියා ඇත. එය වෘත්තීය පුවත් වාර්තාවකට වඩා හදවතින්ම දැනුණු ගෞරවයක් සහ වේදනාවක් බවට පත්ව තිබේ.

ඒ මෙසේය...

“රංග නිශාන්ත ගැන සටහනක් නොතියා ඉන්න අමාරුයි. රංග යන්න ගිහිල්ලා.”

වැලියුවේෂන් දෙපාර්තමේන්තුවේ රංග යන නමින් හැඳින්වුවත්, ඔහුගේ රහසේ නම “ලපයා” බව මිතුරා පවසයි. එය ඔහුගේ කාඩ් එකක් වැන්න.

ගම කුලියාපිටිය. නිවාඩු කාලෙට පාඩම් කරනවට වඩා ගමට ගිහින් කුඹුරු කොටන්න, ගොයම් කපන්න ඔහුගේ හිත තිබුණේ. රංගට තිබුණේ රට හදන උණක්. ඒ නිසාම ශිෂ්‍ය සංගමයට බැඳී දවල් රෑ නැතිව වැඩ කළේ. ඔහු කතා කළේ අඩුවෙන්. බැරිම තැනකදී පමණක් මෙසේ කියන්නට ඇත:

“මේක වෙනස් කරන්න පුළුවන් බං.. මේක හදන්න බැරිකමක් නෑ.”

සැහැල්ලුවෙන්, හිනාවෙලා කීවත්, ඔහු හැමදාම විශ්වාස කළා මේ රට හදන්න පුළුවන් කියලා.

කැම්පස් දිවිය සහ අවංකභාවය

පිකට් එකක්, ස්ට්‍රයික් එකක් තිබුණොත් ලපයා එතැනය. පෝස්ටර් මිටියක් කිහිල්ලේ ගහගත් සංජීව, ඩයිනා එක්ක නිතරම ඔහුව කැලේ කඩේ පැත්තෙ දකින්නට ලැබුණි. කැම්පස් එකේ බරටම ශිෂ්‍ය සංගම් වැඩ කළ කෙනෙකුගෙන් කෙනෙක් ලපයා.

ඒ අතරේම චාර්ටඩ් කිරීමට ලොකු ආසාවක් ඔහුට තිබුණි.

ජපුර 96/97 බැච් එකේ හැමෝම කීවේ ලපයා හිත හොඳ එකා කියලා. කවදාවත් සත පහක් හොරකම් නොකළ, වංචාවක් නොකළ මනුස්සයෙක් රංග. පසුකාලීනව තරග විභාගයක් සමත්වී මහ බැංකුවට හෝ භාණ්ඩාගාරයේ රැකියාවකට ගිය බව ආරංචි විය.

අභාග්‍ය සම්පන්න වැඩ තහනම

පසුගිය දවසක මහා භාණ්ඩාගාරේ සිදුවූ මූල්‍ය වංචාව (ස්කෑම් එක) නිසා රංග නිශාන්තට වැඩ තහනම් විය. මා දන්නා පරිදි, ඒ ගැන මුල්ම හෙළිදරව්ව කළේත් රංග විසින්ම.

මුළු ජීවිත කාලයම එක අරමුණක් වෙනුවෙන් වැඩ කරලා, ඒ අරමුණ නිසාම තමන්ගේ රස්සාවත්, ගොඩනගාගත් නමත් අහිමි වුණාම කොහොමද කෙනෙකුට දැනෙන්නේ? කොහොමද ඒ මනුස්සයා ලෝකයට, සමාජයට මුහුණ දෙන්නේ?

සමාජයේ කුරිරු විනිශ්චය

සමාජය බොහොම ඉක්මනින් විනිශ්චයන් දෙනවා. “අන්න හොරෙක්.. ඌ තමයි අර ස්කෑම් එකට වග කියන්න ඕනේ.. අලුත් ආණ්ඩුවෙන් පත් කරපු තවත් හොරෙක්.” ඒක මහා බර පීඩනයක්. පිටතින් බලාගෙන ඉන්න අපිට ඒ පීඩනය දැනෙන්නේ නැහැ. ඒ දුක අපිට පේන්නේ නැහැ – එක්කෝ අපි දකින්නේ නැතුව ඉන්න කැමතියි.

සමාජ මාධ්‍යයේ තමන්ට අපහාස කරලා ලියපු පෝස්ට් එකක්, කමෙන්ට් එකක් ගැන හිතන්න. කොයි තරම් හිත රිදෙනවද? කෙනෙක් නිකරුණේ හොරා කීවාම, වංචාකාරයා කීවාම කොයි තරම් හිතට අමාරුද?

ඒ වගේ, මුළු රටක්ම, සමාජයක්ම එක පාර ඇඟිල්ල දිගු කරනකොට ඒක දරාගන්න අමාරුයි. විශේෂයෙන්ම ඇත්තටම බොරු මවා කියන මාධ්‍ය ඉදිරියේ ජීවත්වීම ලේසි පහසු නැහැ.

යුක්තිය සහ ප්‍රශ්න

ඇත්තටම මහා භාණ්ඩාගාරය හරහා රටට අහිමි වුණේ ජනතාවගේ මුදල්. ජනතාවට අයිතියක් තියෙනවා ඒ ගැන අහන්න, චෝදනා කරන්න. ඒත් කිසිවක් නොදැන තීන්දු තීරණ දෙන්න අපි කවුද?

බලධාරීන්ට තිබුණේ නැතිද එකපාරටම සේවය තහනම් නොකර පරීක්ෂණයක් කරන තෙක් හෝ ඉල්ලා අස්වෙන්න කියන්න? දේශපාලනය දරුණු යුධ පිටියක් වුණත්, ඒ වගේ තීන්දු තීරණ පසුව හෝ සාධාරණීකරණය කරන්න පුළුවන්. ඒත් ඒ ගැන දැන් කතා කරලා මොකටද? අපි ජීවත් වෙන්නේ මස් රාත්තලම ඉල්ලන ශයිලොක් සමාජයක.

මැරුණට පස්සේ හැමෝම හොඳ කියනවා

මැරුණට පස්සේ හැමෝම හොඳ කියනවා, හොඳ ලියනවා. ඒත් මේ එහෙම කතාවක් නෙවෙයි – අපිත් එක්ක හිටපු මිනිහෙක් ගැන ඇත්තටම දැනුණු හැඟීමක්.

සමහරවිට රංග වගේ මිනිස්සු මේ සමාජයට අවංක වැඩියි. ඒ නිසා වෙන්න ඇති, තමන්ගේ ජීවිතය තමන් විසින්ම අරන් යන්න රංග තීරණය කරන්න ඇත්තේ.

“උඹ හිත හොඳ එකා.. හොර බොරුවක් නැති එකා. එහෙම කියන්නේ අපි උඹව දන්න නිසා. දවසක ආයෙත් තෙල් බැම්ම පැත්තෙ ආවොත් හමුවෙමු. කවුරු දන්නවද!!”

සුභ ගමන් මිත්‍රයා…. 🩶

රංග නිශාන්තගේ මිතුරා
Malcolm Sang
(මුල් සටහන ඇසුරින්)

ඩොලර් මිලියන 2.5ක භාණ්ඩාගාර වංචාව අනාවරණය කළ අධ්‍යක්ෂවරයා සිය නිවසේදී අභිරහස් ලෙස මියයයි

කොළඹ, ශ්‍රී ලංකාව – මහා භාණ්ඩාගාරයේ සිදු වූ ඩොලර් මිලියන 2.5ක මහා පරිමාණ මූල්‍ය වංචාවක් මුලින්ම අනාවරණය කරමින් අපරාධ පරීක්ෂණ දෙපාර්තමේන්තුවට (CID) නිල වශයෙන් පැමිණිලි කළ විදේශ සම්පත් දෙපාර්තමේන්තුවේ අධ්‍යක්ෂ රංග රාජපක්ෂ මහතා අභිරහස් ලෙස මියගොස් තිබේ.

මෙම හදිසි මරණය රටම කම්පනයට පත් කර ඇති අතර, භාණ්ඩාගාර වංචාව නැවතත් උණුසුම් වී තිබේ.

හෙළිදරව් කරන්නාගේ අකාල වියෝව

පොලිස් ආරංචි මාර්ග සඳහන් කරන්නේ රංග රාජපක්ෂ මහතාගේ මෘත ශරීරය අද (30) පස්වරු 2ට පමණ සොයාගත් බවයි. මරණයට හේතුව සම්බන්ධයෙන් පොලිසිය ප්‍රධාන කාරනා සලකා බලන බව වාර්තාවෙයි.

පශ්චාත් මරණ පරීක්ක්ෂණය මේ වන විට සිදු කරමින් පවතින අතර, කිසිදු නිල නිගමනයකට තවම එළඹ නොමැත. CID විසින් ඔහුගේ නිවස වටලා ඇති අතර පවුලේ සාමාජිකයන් සහ සමීපතමයන්ගෙන් ප්‍රකාශ සටහන් කර ගනිමින් සිටී.

භාණ්ඩාගාර වංචාව පිළිබඳ කතාව

ඩොලර් මිලියන 2.5ක මෙම වංචාව සිදු කර ඇත්තේ රජයේ අරමුදල් වෙනත් ගිණුම් කරා හරවා යැවීමේ සංකීර්ණ ක්‍රමවේදයක් මගින් බවට සැක කෙරේ. විදේශ සම්පත් දෙපාර්තමේන්තුවේ අධ්‍යක්ෂවරයා ලෙස රාජපක්ෂ මහතා විදේශ අරමුදල් වෙන් කිරීම්වල අක්‍රමවත්කම් හඳුනාගෙන තිබේ.

එම අක්‍රමවත්කම් පිළිබඳව ඔහු මුලින්ම CID වෙත නිල පැමිණිල්ලක් කළ බවට CID ආරංචි මාර්ග තහවුරු කරයි. ඔහුගේ එම පැමිණිල්ල නිසාම භාණ්ඩාගාරයේ මෙහෙයුම් පිළිබඳ අපරාධ පරීක්ෂණයක් ආරම්භ විය.

වැඩ තහනම සහ චෝදනා

මෙම මරණය වඩාත් අභිරහස් කරවන කාරණය නම්, රංග රාජපක්ෂ මහතා බලධාරීන් විසින් වැඩ තහනම් කර තිබීමයි. නිල ප්‍රකාශවලට අනුව, ඔහුගේම දෙපාර්තමේන්තුව (විදේශ සම්පත් දෙපාර්තමේන්තුව) මෙම වංචාවට වගකිව යුතු ප්‍රධාන පාර්ශ්වය ලෙස සැලකෙන බැවින්, ඔහුද මෙම වංචාව සඳහා කෙසේ හෝ වගකිව යුතු බවට සැක කර වැඩ තහනම් කර තිබුණි.

කෙසේ වෙතත්, රාජපක්ෂ මහතාගේ සගයන් සහ පවුලේ අය ඔහුට එරෙහි චෝදනා ප්‍රතික්ෂේප කරති. ඔවුන් පෙන්වා දෙන්නේ වංචාවට වගකිව යුත්තන් සොයා ගැනීමට උත්සාහ කළ පුද්ගලයාව ආරක්ෂා කිරීම වෙනුවට දඬුවම් කිරීම අසාධාරණ බවයි.

නිර්නාමිකත්වය ඉල්ලා සිටින සගයෙක් මෙසේ පැවසීය:

“ඔහු සැකකරුවෙක් නොවේ, ඔහු හෙළිදරව් කරන්නෙක්. ඔහුව වැඩ තහනම් කිරීම පළිගැනීමේ ක්‍රියාවක්.”

පිළිතුරු නොලත් ප්‍රශ්න

රාජපක්ෂ මහතාගේ මරණය සිදු වූයේ ඔහුව වැඩ තහනම් කිරීමෙන් පසුව වන අතර, CID පරීක්ෂණය වේගවත් වන අවස්ථාවේදීය. මෙය දූෂණ විරෝධී ක්‍රියාකාරීන් සහ විපක්ෂ මන්ත්‍රීවරුන් අතර දැඩි ප්‍රශ්න මතු කර ඇත:

· ඔහුගේ මරණය ස්වභාවිකද, සියදිවි නසාගැනීමක්ද, නැතහොත් සැලසුම් සහිත ඉවත් කිරීමක්ද?
· වංචාව මුලින්ම හෙළි කළ පුද්ගලයාව ආරක්ෂා කරනු වෙනුවට තහනම් කළේ ඇයි?
· විදේශ සම්පත් දෙපාර්තමේන්තුවේ හෝ භාණ්ඩාගාරයේ කවුරුන්ද මෙම ඩොලර් මිලියන 2.5ක වංචාවට මුල් වූයේ?

රටම කම්පනයට

දේශපාලන විශ්ලේෂකයින් පෙන්වා දෙන්නේ මෙම සිද්ධිය ආයතනික අර්බුදයක ගැඹුරු ලක්ෂණ පෙන්වන බවයි. විශාල මූල්‍ය වංචාවක්, හෙළිදරව් කරන්නාට එරෙහි වැඩ තහනමක්, ඉන්පසු අභිරහස් මරණයක් – මෙය ජනතාව අතර බියක් සහ කෝපයක් ඇති කර තිබේ.

එක් සමාජ මාධ්‍ය පරිශීලකයෙක් මෙසේ ලියා තිබුණි:

“මුලින් ඔහුව වැඩ තහනම් කළා, දැන් ඔහු මියගිහින්. අපි රංග රාජපක්ෂට යුක්තිය ඉල්ලා සිටිනවා, ඩොලර් මිලියන 2.5කුත් ආපසු ගන්න ඕන.” යනුවෙනි.

ශ්‍රී ලංකා ක්‍රිකට් අතුරු කමිටු සභාපති ධුරය හේතුවෙන් එරාන් වික්‍රමරත්න සජබ සියලු තනතුරුවලින් ඉල්ලා අස්වෙයි

කොළඹ – අප්‍රේල් 30
සමගි ජන බලවේගයේ ප්‍රබල කණුවක් වන හිටපු පාර්ලිමේන්තු මන්ත්‍රී එරාන් වික්‍රමරත්න මහතා, ශ්‍රී ලංකා ක්‍රිකට් ආයතනයේ අතුරු පාලක කමිටුවේ සභාපති ධුරය පිළිගැනීමත් සමඟ තමන් දරන සියලු පක්ෂ තනතුරුවලින් ඉල්ලා අස්වී තිබේ.

පක්ෂ විධායක කමිටු සාමාජිකත්වය සහ කළමනාකරණ කමිටු සාමාජිකත්වය ඇතුළු සියලු ධුරවලින් ඉල්ලා අස්වන බවට ඔහු සජබ නායකත්වය දැනුම්වත් කර ඇති බව සමගි ජන බලවේගයේ මහලේකම් රංජිත් මද්දුම බණ්ඩාර මහතා තහවුරු කළේය.

“දේශපාලනය සහ ක්‍රිකට් කටයුතු පටලවා ගැනීමට මම සූදානම් නැහැ” යනුවෙන් තම තීරණය සාධාරණීකරණය කරමින්, සම්පූර්ණ අවධානය ක්‍රිකට් ක්‍රීඩාවේ ප්‍රතිසංස්කරණය කෙරෙහි යොමු කිරීමේ අරමුණින් මෙම පියවර ගත් බව වික්‍රමරත්න මහතා ප්‍රකාශ කර ඇත.

ක්‍රීඩා අමාත්‍යවරයාගේ පත්කිරීම

පසුගියදා ශ්‍රී ලංකා ක්‍රිකට් ආයතනයේ පැරණි විධායක කමිටුවේ සමූහ ඉල්ලා අස්වීමත් සමඟ, ක්‍රීඩා අමාත්‍ය සුනිල් කුමාර ගාමිණී මහතා විසින් 9 දෙනෙකුගෙන් යුත් අතුරු පාලක කමිටුවක් පත් කරන ලදී. එහි සභාපති ධුරයට හිටපු බැංකුකරුවෙකු හා ආර්ථික විද්‍යාඥයෙකු වන එරාන් වික්‍රමරත්න මහතා නම් කෙරිණි. එම කමිටුවේ රෝෂන් මහානාම, කුමාර් සංගක්කාර සහ සිදත් වෙට්ටිමුණි යන ප්‍රවීණ ක්‍රීඩකයන් ද සාමාජිකයන් ලෙස කටයුතු කරයි.

පක්ෂ තීරුවලට වෙනස් තීරණයක්

මෙරට දේශපාලන සම්ප්‍රදාය තුළ බල තනතුරු අත්හැරීම දුර්ලභ වන තත්ත්වයක් තුළ, වික්‍රමරත්න මහතාගේ මෙම පියවර සැබෑ ‘ජෙන්ටල්මන්’ කෙනෙකුට හිමි ගෞරවනීය තීරණයක් ලෙස සමාජ මාධ්‍ය ඔස්සේ ජනතා ප්‍රශංසාවට ලක්ව ඇත.

සමගි ජන බලවේගයට මෙය සැලකිය යුතු අලාභයක් වුවත්, දේශපාලන මැදිහත්වීම්වලින් තොර ක්‍රීඩා පරිපාලනයක් සඳහා ඔහුගේ තීරණය ක්‍රිකට් ලෝලීන් අතර බලාපොරොත්තුවක් ද ඇති කර තිබේ.

ක්‍රිකට් ක්‍රීඩාවේ වර්තමාන තත්ත්වය

දූෂණ චෝදනා, ජාත්‍යන්තර ශ්‍රේණිගත කිරීම්වල පහළ බැසීම සහ ලෝක කුසලාන තරගාවලිවල මුල් වටවලදීම පිටතට වීමත් සමඟ ශ්‍රී ලංකා ක්‍රිකට් ක්‍රීඩාව අතිශය දුෂ්කර ස්ථාවරයකට තල්ලු වී තිබේ. මෙම පසුබිම තුළ වෘත්තීය පාලනයක් සහ විනිවිදභාවයක් සහිත කමිටුවක් ක්‍රීඩාව ගොඩගැනීමේ හැරවුම් ලක්ෂ්‍යයක් වනු ඇතැයි ක්‍රිකට් විචාරකයෝ පෙන්වා දෙති.

එරාන් වික්‍රමරත්නගේ පසුබිම

රාජකීය විද්‍යාලයේ ආදි ශිෂ්‍යයෙකු වන වික්‍රමරත්න මහතා, තරුණ වියේදී පාසල් ක්‍රිකට් ක්‍රීඩා කළ අතර, පසුව නේෂන්ස් ට්‍රස්ට් බැංකුවේ ප්‍රධාන විධායක නිලධාරී ලෙස කටයුතු කළේය. ආර්ථික විද්‍යාව පිළිබඳ උපාධිධාරී වන ඔහු ‘ක්‍රීඩාව ජීවිතයට හුරු කළ පාඩම්’ පිළිබඳව නිතර අවධාරණය කරන තැනැත්තෙකි.

මෙම තීරණයත් සමඟ ක්‍රිකට් ක්‍රීඩාවට අවශ්‍ය ප්‍රතිසංස්කරණ ක්‍රියාත්මක කිරීමට ඔහුට හැකි වේද යන්න සහ නව අතුරු කමිටුවට මුහුණ දීමට සිදුවන දේශපාලන හා නීතිමය අභියෝග මොනවාද යන්න ඉදිරියේදී පැහැදිලි වනු ඇත.

ශ්‍රී ලංකාවේ ‘ඒහිපස්සිකෝ’ සාම පාගමන අවසන් කළ භික්ෂූන් පිරිස ඇමරිකාව බලා පිටත්ව යයි

කටුනායක – දින 07ක් පුරා ශ්‍රී ලංකාවේ පැවැත්වූ “ඒහිපස්සිකෝ” සාම පාගමන සාර්ථකව නිම කරමින් මෙරටට පැමිණි භික්ෂූන් වහන්සේලා ප්‍රමුඛ පිරිස අද (29) උදෑසන 07.12ට කටුනායක ගුවන්තොටුපළේ සිට තුර්කියේ ඉස්තාන්බුල් නුවර බලා පිටත්ව ගියහ.

අමෙරිකාවේ වාසය කරන වියට්නාම ජාතික පඤ්ඤාකර ස්වාමීන් වහන්සේ ඇතුළු භික්ෂුන් වහන්සේලා, ‘ආලෝක’ සුනඛයා සහ තවත් ගිහි පිරිසක් මෙලෙස පිටත්ව ගියේ ය. ඉන් අනතුරුව ඔවුන් ඉස්තාන්බුල් සිට වෙනත් ගුවන් යානයකින් ඇමරිකාව බලා පිටත්ව යාමට නියමිතය.

ලෝකවාසී ජනතාවට සාමයේ පණිවිඩය බෙදා හැරීම සහ බුදු දහමේ උරුමය ජාත්‍යන්තරය වෙත රැගෙන යාම ඔවුන්ගේ අභිප්‍රාය බව පාගමන සංවිධායකයෝ පැවසූහ.

භික්ෂූන් වහන්සේලා පිරිස අද අලුයම කටුනායක ගුවන්තොටුපළ විශේෂ අමුත්තන්ගේ මැදිරිය වෙත පැමිණි අතර, එහිදී ඔවුන් වෙත දන් පිළිගැන්වීමෙන් පසුව ගුවන්තොටුපළේ විවිධ අංශවල සේවය කරන සේවක සේවිකාවන් ද පැමිණ උන්වහන්සේලාගෙන් ආශිර්වාද ලබාගත්හ.

මෙහිදී ‘ආලෝක’ සුනඛයාගේ සෞඛ්‍ය තත්ත්වය පිළිබඳව පශු වෛද්‍යවරුන්, ගුවන්තොටුපළ පොලිස් නිලධාරීන් සහ ගුවන් හමුදා නිලධාරීන් විශේෂ අවධානයක් යොමු කර කටයුතු කර තිබිණි.

“ඒහිපස්සිකෝ” සාම පාගමනේ සමාප්ති රාජ්‍ය උත්සවය ඊයේ (28) පස්වරුවේ කොළඹ නිදහස් චතුරශ්‍රයේදී ජනාධිපති අනුර කුමාර දිසානායක මහතාගේ ප්‍රධානත්වයෙන් පැවැත්විණි.

Walk for Peace

ඩිජිටල් හැඳුනුම්පත බ්ලැක් ලිස්ට් සමාගමකට දෙන්න යයි. ටෙන්ඩර් කැදවීමත්, ලංසු ගැනීමත් ඉන්දියාවෙන්

කොළඹ, අප්‍රේල් 29 – ඩිජිටල් හැඳුනුම්පතක් හඳුන්වාදීම සම්බන්ධයෙන් කිසිදු විරෝධතාවක් නොමැති බවත්, නමුත් ඩිජිටල්කරණයට මුවාවී මෙරට ජනතාවගේ අතිශය සංවේදී ජෛවමිතික දත්ත ඉන්දියානු සමාගමකට ලබාදීමට තමන් දැඩි විරෝධය පළ කරන බවත් ජන අරගල සන්ධානයේ විධායක කමිටු සාමාජික වසන්ත මුදලිගේ පවසයි

වැඩිදුරටත් අදහස් දක්වමින් ඒ මන්ත්‍රීවරයා පැවසුවේ,

"ඩිජිටල් හැඳුනුම්පතක් සම්බන්ධයෙන් අපිට විරෝධයක් නෑ. නමුත් ඩිජිටල්කරණයට මුවා වෙලා ඔබේ කළු ඉංගිරියාව, අතේ ඇඟිලි සලකුණු වගේ අතිශයින්ම සංවේදී ජෛවමිතික දත්ත එකතු කරලා ඒක ඉන්දියානු සමාගමකට ලබාදීම සම්බන්ධව තමයි අපි මේ බරපතළ විවේචනය පහුගිය කාලෙම ගෙනාවේ."

එතුමා වැඩිදුරටත් පෙන්වා දෙමින් කියා සිටියේ, ජනාධිපතිතුමාගේ ඉන්දීය සංචාරයෙන් පසුව ශ්‍රී ලංකාවේ ඩිජිටල් හැඳුනුම්පත සැකසීම සඳහා ඉන්දියානු සමාගමක් තෝරාගැනීමට ටෙන්ඩර් කැඳවා ඇති බවයි.

ටෙන්ඩර් ක්‍රියාවලිය පිළිබඳව චෝදනා

මෙම ක්‍රියාවලිය සම්බන්ධයෙන් අදහස් දක්වමින් එතුමා පැවසුවේ,

"මේක කරලා තියෙන්නේ 2025 ඔක්තෝබර් මාසයේදී. ඔක්තෝබර් මාසයේදී ටෙන්ඩර් එක අවසන් කරනවා. නොවැම්බර් මාසයේදී ටෙන්ඩරය පිරිනමනවා. ඒ එකඟතාව මත ටෙන්ඩර් විවෘත කිරීමක් කරා ඉන්දියාවේ ආයතන පහක් ටෙන්ඩරය යොමු කරනවා. මාර්තු මාසයේ 13 ප්‍රසිද්ධියට පත්කරන ලේඛනයේ තියෙනවා සමාගම් හයක්. හයවැනි සමාගම මේ ටෙන්ඩරය අතරතුර කල් ඇදලා ඇතුළට ඔබාගත්ත සමාගමයි. මේක තමයි ගෝඨභය රාජපක්ෂ ඩිජිටල් හැඳුනුම්පතට අදාළව ටෙන්ඩර් කැඳෙව්වට පස්සේ ඒකෙන් අසාදුගත වූ සමාගම."

දැන් එම සමාගමට ටෙන්ඩරය ලබාදීමට කටයුතු කරන බවද, ටෙන්ඩර් කැඳවීම, ලංසු ඇගයීම සහ මෘදුකාංග සැපයීම යන සියල්ලම ඉන්දියාව මගින් සිදුකරන බවද ඔහු අවධාරණය කළේය.

ඉන්දීය ණය ආධාරය සම්බන්ධයෙන් ප්‍රතිචාරය

රුපියල් බිලියන දාහක ඉන්දීය ණය ආධාරය හේතුවෙන් මෙම කටයුත්ත ඉන්දියාවට පිරිනැමීමට සිදුවූ බවට රජයේ ප්‍රකාශයන් පිළිබඳව අදහස් දක්වමින් එතුමා පැවසුවේ මෙය බරපතල ජාතික ආරක්ෂක ප්‍රශ්නයක් බවයි.

හිටපු රාජ්‍ය අමාත්‍ය එරංග වීරරත්නගේ ප්‍රකාශ ගැන විවේචනය

මෙහිදී හිටපු රාජ්‍ය අමාත්‍ය එරංග වීරරත්න පිළිබඳවද අදහස් දැක්වූ එතුමා,

"එරංග වීරරත්නලා කලින් ඩිජිටල් හැඳුනුම්පත සම්බන්ධව විවේචන ගේද්දි කීවේ කිසි ප්‍රශ්නයක් නෑ ලංකාවේ සිස්ටම් මාර ආරක්ෂිත නිසා කිසිම කෙනෙකුට හොරකම් කරන්න බෑ කියලා. එහෙම කියපු එරංග වීරරත්න අපි දැක්කා ඊයේ පෙරේදා කෙඳිරි ගාල කියනවා එහෙම තමයි සිස්ටම්වල හැකර්ස්ලා එන්න පුළුවන්, තොරතුරු ගන්න පුළුවන්, තොරතුරු පිට යන්න පුළුවන් කියලා."

බව පෙන්වා දෙමින් විරුද්ධ පක්ෂයේ මෙම ප්‍රකාශයේ පරස්පරතාවයද ඉස්මතු කළේය.

කෙසේවෙතත්, ඩිජිටල් හැඳුනුම්පත් ව්‍යාපෘතිය සම්බන්ධයෙන් රජය වෙතින් නිල ප්‍රතිචාරයක් තවමත් එළිදක්වා නොමැති අතර, මෙම චෝදනා සම්බන්ධයෙන් අදාළ ඉන්දියානු සමාගම වෙතින්ද කිසිදු ප්‍රකාශයක් සිදුකර නොමැත.

දැඩි මතබේදයට තුඩුදුන් මීමුරේ පුවතේ දේශපාලන ප්‍රතිවාදී කතාවක් පිටුපස සැඟවුණු සත්‍යය කුමක්ද?

‘ගොසිප්99’ අප වෙබ් අඩවිය පළ කළ මීමුරේ දිට්ටා සුලුකුණාට සමග ඇති වූ ව්‍යසනය හා සබැඳි පුවතක් දැඩි මතභේදයක් ඇති කර තිබුනි.

විශේෂයෙන් එම පුවතෙන් මීමුරේ ආරණ්‍ය සේනාසනාධිපති පූජ්‍ය හේනේගෙදර පඤ්ඤාරතන ස්වාමීන් වහන්සේට එරෙහිව චෝදනා එල්ල කර තිබිණි. ගංවතුර සහනාධාර මුදල් අවභාවිතා කිරීමක් සහ අධි සංවේදී පරිසර කලාපයක පිහිටි තංගප්පුව හරහා මීමුරේට යන මාර්ගය විවෘත කිරීමට කටයුතු කිරීම එම චෝදනා අතර විය.

කෙසේ වෙතත්, ස්වාමීන් වහන්සේ එම චෝදනා සම්පූර්ණයෙන්ම ප්‍රතික්ෂේප කරමින් ගොසිප්99 පුවත ව්‍යාජ තොරතුරු සහිත එකක් බව ප්‍රකාශ කර තිබුනි. මීමුරේ ආරණ්‍ය සේනාසනය නමින් ක්‍රියාත්මක ෆේස්බුක් පිටුවට වීඩියෝවක් එක් කරමින් ඒ බව ප්‍රකාශකර තිබුනි.

‘ගොසිප්99’ පුවතේ අන්තර්ගතය

‘ගොසිප්99’ වෙත ගම්වාසීන් සහ සමාජ මාධ්‍ය ක්‍රියාකාරීන්ගෙන් ලැබුණු තොරතුරු අනුව එම පුවතේ චෝදනා කර තිබුණේ,

දිට්ටා සුලි කුණාටුවෙන් පසු ඒ හිමියන්ට ලැබුණු ආධාර මුදල් අවභාවිතා කර ඇති බවත්,
ගුවනින් ලැබුණු ආධාර බෙදා දීමේදී ගම්වාසීන්ගෙන් කොටසකට පමණක් එම ආධාර හිමිව ඇති බවත්,
තංගප්පුව – කෝබර්ට්ස් ගැප් අධි සංවේදී මාර්ගය විවෘත කර ගැනීමට කුමන්ත්‍රණයක් සිදුවන බවත්,
ඒ සඳහා ප්‍රාදේශීය දේශපාලනඥයෙකු ස්වාමීන් වහන්සේගේ සහාය ලබා ගන්නා බවත්ය.

විමර්ශනය : ආන්දෝලනාත්මක සැගවුනු දේශපාලනික පසුබිමක් හෙළි වෙයි

ස්වාමීන් වහන්සේ විසින් එම පුවත ව්‍යජ පුවත් බව පැවසීමත් සමග ‘ගොසිප්99’ කාර්ය මණ්ඩලය විසින් අප වෙත වාර්තා වූ ඒ පුවතෙහි ඇතුලත් කරුණු පිළබදව නැවත වෙන් වෙන් මාර්ග ඔස්සේ සිදු කළ වැඩිදුර විමර්ශනයේදී වැදගත් කරුණු කිහිපයක් අනාවරණය විය.

මීමුරේ ගම්වාසීන්ගෙන් සමහරෙකු පෙන්වා දුන්නේ මෙම චෝදනා පිටුපස සිටින්නේ තම ස්වකීය මතවාද දරන දේශපාලනික වශයෙන් පෙළගැසුණු පුද්ගලයන් පිරිසක් බවයි.

විමර්ශනයේදී තවදුරටත් හෙළිදරව් වූයේ:
ප්‍රබල දේශපාලනඥයෙකු හරහා හෝටල් ව්‍යාපාරිකයන් පිරිසක් මෙම අධි සංවේදී ප්‍රදේශයේ ඉඩම් පෞද්ගලිකව හෝ බදු පදනම මත ලබා ගැනීමට උත්සුකව සිටින බව,
එම ඉඩම් අත්පත් කර ගැනීම සඳහා මාර්ගය විවෘත කිරීම අත්‍යවශ්‍ය වන බව,
එම මාර්ගය විවෘත කිරීමට දැඩි විරෝධයක් පවතින බැවින්, ස්වාමීන් වහන්සේගේ ප්‍රකාශය ඈඳාගෙන ඊට එරෙහිව මහජන හැඟීම දේශපාලනිකව යොදා ගැනීමක් ලෙස මෙම චෝදනා ගොඩනගා ඇති බවයි.

වෙනත් වචනවලින් කිවහොත්, ස්වාමීන් වහන්සේ විසින් "මාර්ගය විවෘත කළ යුතුයි" යනුවෙන් කළ ප්‍රකාශය, ඔවුන්ගේ ඉලක්ක සාධාරණීකරණය කර ගැනීමට විකෘති කර ඇති බව විමර්ශනයේදී පෙනී ගොස් තිබේ.

ගම්වාසීන්ගේ පැහැදිලි කිරීම

අප අහඹුලෙස තෝරාගත් ගම්වාසීන් කිහිප දෙනෙකුගෙන් මේ පිලිබදව තොරතුරු විමසූ අතර ඔවුන් මෙසේ ප්‍රකාශ කලහ,

“හාමුදුරුවෝ එම ප්‍රකාශය කළේ ගමේ ජනතාව ගැන සිතා මිස කිසිදු දේශපාලනඥයෙකුගේ අවශ්‍යතාවක් සඳහා නොවේ. ගංවතුරෙන් සහ නායයාම්වලින් හුදෙකලා වූ ජනතාවට සහන සැපයීමට තිබූ එකම මාර්ගය ඒ වන විට අවහිර වී තිබුණි. එම දුෂ්කරතාවය නිසා ගමට එන්නට පුලුවම් තිබූ විකල්ප මාර්ගය තමයි තංගපුපව හරහා එන පාර. හාමුදුරුවෝ එම මාර්ගය විවෘත කරල හරි ගමට එමු කියල ප්‍රකාශ කලා. එම ප්‍රකාශය දේශපාලන කාරණයක් බවට පත් කර ඇත්තේ විවිධ දේශපාලන කෝනයෙන් බලන පිරිස් මෙන්ම ඉඩම් ආශාවෙන් පෙළෙන බලවතුන් විසින් සහ ඔවුනට සහාය දක්වන ගම්වාසීන් කිහිප දෙනෙකු විසින්. හාමුදුරුවන්ගෙ ප්‍රකාශය විවිධ අයුරින් ඔවු⁣ගේ ඕනෑ එපාකම් සදහා ඒක ආශිර්වාධයක් කරගත්තා.

හාමුදුරුවො ලැබෙන ආධාර නිසි අකාරව බෙදුවා. අනෙක ඒව කලේ පොලීසියෙන් හමුදුරුවො පහසුකම් සැපයුවා විතරයි යනුවෙනි.

සියලු කාරනා හමුවේ ගොසිප්99 අපගේ නිගමනය.

මේ වන විට ඉදිරිපත් වී ඇති කරුණු අනුව ‘ගොසිප්99’ වාර්තාව මතභේදාත්මක එකක් බව පැහැදිලි වේ. අප විසින් සිදු කළ විමර්ශනයෙන්ද හෙළි වී ඇත්තේ, මාර්ගය විවෘත වුවහොත් එයින් ප්‍රතිලාභ ලබන හෝටල් කර්මාන්තකරුවන් සහ නව හෝටල් ඉදිකිරීමට සූදානමින් සිටින ව්‍යාපාරිකයන්, තම ඉලක්ක සාධාරණීකරණය කර ගැනීමට ස්වාමීන් වහන්සේගේ ප්‍රකාශය ආශිර්වාදයක් කර ගැනීමට උත්සාහ දරා ඇති බවයි.

ප්‍රාදේශීය මන්ත්‍රීවරයෙකු මෙම සහන කටයුතු සඳහා විහාරස්ථානය සමග එක්ව කටයුතු කර ඇති බවත්, ඔහුට විරුද්ධ පාර්ශ්වයන් විසින් මෙම ව්‍යජ කතා ගොතමින් ස්වාමීන්වහන්සේද අපහසුතාවයට ලක්වන අයුරින් ස්වාමීන් වහන්සේ සමග ඔුහු සිදු කරන ක්‍රියාදාමයන් වලක්වාලීම සදහා විවිධ මාධ්‍යවලට අසත්‍ය කරුණු අඩංගු පුවත් සපයා ඇති බවත් විමර්ශනයෙන් අනාවරණය විය.

කෙසේ වෙතත්, පූජ්‍ය පඤ්ඤාරතන ස්වාමීන් වහන්සේ එම ප්‍රකාශය සහ එම කටයුතු සිදු කර ඇත්තේ ජනතා සුබසිද්ධිය උදෙසා බව අපට නිගමනය කළ හැකිය.

මේ සම්බන්ධයෙන් ස්වාමීන් වහන්සේට කිසියම් අපහසුතාවයක් ඇති වූයේ නම් ‘ගොසිප්99’ අපගේ අවංක කණගාටුව ප්‍රකාශ කරන්නෙමු. විශේෂයෙන්ම ආරාණ්‍ය වාසී සිල්වත් භික්ෂුවකට අපගේ වෙබ් අඩවිය හරහා එසේ ප්‍රකාශ කිරීමට සිදුවීම පිලිබදව බෞද්ධයන් වශයෙන් අප සමාව අයදිමි.

වගකීම් ප්‍රකාශය

වසර 16ක් අඛණ්ඩව මාධ්‍ය කටයුතුවල නියැලෙන අප, සත්‍යය ජනතාව වෙත ගෙන යාමට පසුබට නොවන බවත්, ඒ සඳහා නිරන්තරයෙන්ම නිර්භීතව කටයුතු කරන බවත් අවධාරණය කරමු.

මෙම ලිපිය හරහා කිසියම් පාර්ශ්වයකට අගතියක් ඇති වූයේනම්, පිළිතුරු දීමේ අවකාශය විවෘතව පවතින බවද, එම පාර්ශ්වයට ‘ගොසිප්99’ තුළ සිය පිළිතුරු ඉදිරිපත් කිරීමට අවස්ථාව වෙන් කරන බවද සඳහන් කරමු.

මෙම විමර්ශනය සාර්ථක කර ගැනීමට සහාය වූ සියලු දෙනාටත්, තොරතුරු සොයා ගැනීමට මග පෑදූ උඩුදුම්බර පොලිස් ස්ථානාධිපති ඇතුළු සියලු නිලධාරීන්ට අපගේ ස්තූතිය පුද කර සිටින්නෙමු.

‘ගොසිප්99’