The Colombopost

අමානුෂික සැළකිළි ඉවසනු බැරි තැන සුරේෂ් සලේ මරණය තෙක් උපවාසයක් අරඹයි .

අපරාධ පරීක්ෂණ දෙපාර්තමේන්තුවේ අත්අඩංගුවේ පසුවෙන හිටපු රාජ්‍ය බුද්ධි සේවයේ අධ්‍යක්ෂ, මේජර් ජෙනරල් සුරේෂ් සලේ මාරාන්තික උපවාසයක් ආරම්භ කර ඇති බව පිවිතුරු හෙළ උරුමයේ නායක උදය ගම්මන්පිල පැවසීය . සුරේෂ් සලේගේ පවුලේ සාමාජිකයන්ගේ ඉල්ලීම මත අද පෙරවරුවේ විශේෂ මාධ්‍ය හමුවක් කැඳවමින් ඔහු මේ බව පැවසීය .

වහාම ක්‍රියාත්මක වන පරිදි එම මාරාන්තික උපවාසය නතර කර ජීවිතය බේරාගන්නා ලෙස හිටමු අමාත්‍ය උදය ගම්මන්පිල ඔහුගෙන් දැඩි ආයාචනයක් ද මෙහිදී සිදුකරනා ලදි .

සුරේෂ් සාලේගේ මෙම රඳවා තබා ගැනීම අධිකරණ නියෝගයක් මත සිදු වූවක් නොව, ජනාධිපතිවරයා විසින් ත්‍රස්තවාදය වැළැක්වීමේ පනත යටතේ තමන්ට ඇති බලතල අවභාවිත කරමින් ලබාදුන් නියෝගයක් මත සිදුවූවක් බවත්, එය මේ වනවිටත් අධිකරණය ඉදිරියේ අභියෝගයට ලක් කර ඇති බවත් හිටපු අමාත්‍ය උදය ගම්මන්පිල පැවසීය .

ඊයේ රාත්‍රියේ සුරේෂ් සලේට ආහාර ලෙස පත්තර කොළයක් බිම එළා ඒ මත බත් හැන්දක් සහ රාබු හොදි පමණක් බෙදා ඇති බවත්, එය අතට ගැනීමට යාමේදී පත්තර කොළය ඉරී කෑම බිමට වැටීම නිසා ඔහුට බිම වැටුණු ආහාර අනුභව කිරීමට සිදුවූ බවත් ඔහු සඳහන් කළේය .

මේ හේතුවෙන් දැඩි සේ කම්පනයට පත් සුරේෂ් සලේ තමන්ට බල්ලෙකුටත් වඩා අන්ත ලෙස සලකන බව පවසමින් හඬා වැටී ඇති අතර, ආහාර, ජලය සහ ඖෂධ පවා ප්‍රතික්ෂේප කරමින් මාරාන්තික උපවාසයකට අවතීර්ණ වී ඇති බව උදය ගම්මන්පිළ සඳහන් කළේය.

කෙසේ වෙතත් සුරේෂ් සලේ මියගියහොත් එහි වාසිය ලැබෙන්නේ ආණ්ඩුවට බැවින්, වහාම උපවාසය නතර කර ජීවත් වෙමින් තමන්ගේ නිර්දෝෂීභාවය ඔප්පු කරන ලෙසට තම මිත්‍රයාගෙන් නැවතත් ඉල්ලා සිටින බව උදය ගම්මන්පිළ වැඩිදුරටත් කියා සිටියා.

වත්මන් ආණ්ඩුව පාස්කු ප්‍රහාරය පිළිබඳ ව්‍යාජ චෝදනා එල්ල කරමින් බලයට පැමිණි නමුත්, වසර දෙකක් තිස්සේ විමර්ශන සිදු කළද, කිසිදු සාක්ෂියක් සොයාගත නොහැකිව අර්බුදයකට ලක්ව සිටින බව පෙන්වා දුන් ඔහු පෙන්වාදෙන්නේ, සුරේෂ් සලේ උපවාසයෙන් මියගියහොත් සියලු රහස් ඔහු සමඟ වැලලුණු බව පවසා ආණ්ඩුවේ රෙද්ද බේරාගැනීමේ කුමන්ත්‍රණයක් ක්‍රියාත්මක වන බවට සැකයක්ද පවතින බවය .

හොරණ බැංකු කොල්ලයට අත් අඩංගුවට ගත් සහකාර කළමණාකරුට අධිකරණය දුන් තීන්දුව .

හොරණ ප්‍රදේශයේ රාජ්‍ය බැංකුවකින් රුපියල් කෝටි තුනහමාරක මුදලක් අතුරුදන් වීමේ සිද්ධිය සම්බන්ධයෙන් අත්අඩංගුවට ගෙන සිටින එම බැංකුවේ සහකාර කළමනාකරු දින හයක් රඳවාගෙන ප්‍රශ්න කිරීමට හොරණ මහේස්ත්‍රාත් අධිකරණය අද නියෝග කර ඇත .

ඊට අමතරව සිද්ධියට අදාළව අත්අඩංගුවට ගත් ආරක්ෂක නිළධාරියා ලබන 11 වැනිදා දක්වා රක්ෂිත බන්ධනාගාර ගත කරන ලෙසද මහෙස්ත්‍රාත් වරයා නියෝග කර ඇත .

බල්ලන්ට පොලුවලින් ගැසූ පතිරගොඩ පාරේ බැංකු නිළධාරිනිය අත්අඩංගුවට.

මහරගම, පතිරගොඩ පාරේදී මහාමාර්ගයේ සිටින වීදි සුනඛයන්ට පොලු මුගුරුවලින් පහර දෙමින් සහ යතුරුපැදියකින් යටකිරීමට උත්සාහ කරමින් හිංසා කළ කාන්තාව මහරගම පොලිසිය විසින් අත්අඩංගුවට ගෙන ඇත .

අත්අඩංගුවට ගත් සැකකාරිය රජයේ බැංකුවක විධායක ශ්‍රේණියේ සේවය කරන විශ්වවිද්‍යාල උපාධිධාරිනියක බවත් ඇය මෙම සත්ත්ව හිංසනය සිදුකර ඇත්තේ වෙසක් පොහොය දින බවත් පොලිසිය පවසයි.

එදින රාත්‍රියේ සහ අලුයම් කාලයේදී ඇය විසින් අමානුෂික ලෙස බල්ලන්ට පහර දෙනු අවට ප්‍රදේශයේ සවිකර තිබූ ආරක්ෂිත (CCTV) කැමරාවල සටහන් වී තිබී ඇත . අත්අඩංගුවට ගත් සැකකාරිය ප්‍රකාශ සටහන් කර ගැනීමෙන් අනතුරුව පොලිස් ඇප මත මුදාහැරීමට කටයුතු කර ඇත.

සිද්ධියට අදාල පැමිණිල්ල ප්‍රදේශවාසීන් විසින් සිදුකර ඇත .

ගෑස් මිල ගැන ලිට්‍රෝ සමාගමෙන් නිවේදනයක් .

එළඹෙන ජුනි මාසය සඳහා ලිට්‍රෝ ගෑස් මිල සංශෝධනය නොකිරීමට තීරණය කළ බව ලිට්‍රෝ සමාගම පවසයි .

ලිට්‍රෝ ගෑස් සමාගම පවසන්නේ, පාරිභෝගික ජනතාව මුහුණ දෙන ආර්ථික දුෂ්කරතා සලකා බලා ඔවුන් වෙත සහනයක් සැලසීමේ අරමුණින් මෙම තීරණයට එළඹුණු බවයි.

ලිට්‍රෝ ගෘහස්ථ ගෑස් සිලින්ඩර අලෙවි වන වත්මන් මිල ගණන් පහත දක්වේ.

කිලෝග්‍රෑම් 12.5 සිලින්ඩරය: රුපියල් 4,765.00

කිලෝග්‍රෑම් 5 සිලින්ඩරය: රුපියල් 1,910.00

කිලෝග්‍රෑම් 2.3 සිලින්ඩරය: රුපියල් 890.00

රුපියල තවදුරටත් පහලට

ශ්‍රී ලංකා රුපියල අමෙරිකානු ඩොලරයට සාපේක්ෂව තවදුරටත් අවප්‍රමාණය වී ඇති බව වාර්තාවෙයි.

ඒ අනුව, මහ බැංකුව විසින් අද (05) නිකුත් කරන ලද දෛනික විනිමය අනුපාතික නිවේදනයේ එක්සත් ජනපද ඩොලරයක ගැනුම් මිල රුපියල් 332.27ක් ලෙසත් විකිණුම් මිල රුපියල් 342ක් ලෙස සටහන් වෙයි .

ඊයේ (04) වනදා ශ්‍රී ලංකා මහ බැංකුව විසින් නිකුත් කරන ලද විනිමය අනුපාතිකයන්ට අනුව අමෙරිකානු ඩොලරයක මිලදී ගැණුම් මිල රුපියල් 339.50ක් ලෙස සටහන් වී තිබුණා. එමෙන්ම ඩොලරයක විකිණීමේ අනුපාතිකය රුපියල් 340.50ක් ලෙස ඊයේ ප්‍රකාශයට පත් කර තිබූ බවයි වාර්තා වන්නේ.

හොරණ මහජන බැංකුවේ කොල්ලයට බැංකුවේම නිළධාරීන් දෙදෙනෙක් අත් අඩංගුවට .

හොරණ මහජන බැංකුවෙන් රුපියල් කෝටි තුනහමාරකට අධික මුදලක් පැහැරගැනීමේ සිදුවීමක් සම්බන්ධයෙන් එම බැංකුවේම සහකාර කළමනාකාරවරයෙකු සහ ආරක්ෂක නිලධාරියෙකු සැකපිට අත්අඩංගුවට ගෙන ඇතිබව වාර්තා වේ.

පසුගිය 3 වෙනිදා බැංකුවේ ATM යන්ත්‍ර තුළ තැන්පත් කිරීම සඳහා රුපියල් කෝටි 3.5ක මුදලක් අඩංගු මලු දෙකක් දෑතින්ම රැගෙන බැංකු සේවකයෙකු එහි පසුපස දොරටුවෙන් පිටතට පැමිනෙත්ම එම ස්ථානයට කඩාවැදුණු පුද්ගලයෙකු, බලහත්කාරයෙන් උදුරාගෙන වහාම පළාගොස් තිබුණා.

මෙමෙ සිදුවීම සඳහා බැංකුව අභ්‍යන්තරයෙන් ද කිසියම් සහයෝගයක් ලැබී ඇත් ද යන්න පිළිබඳවත් පොලිසිය අවධානය යොමු කර තිබු අතර ඒ පිළිබඳව සිදුකළ දීර්ඝ විමර්ශනවලින් අනතුරුව, ඊට සම්බන්ධ බවට සැකකෙරෙන බැංකුවේ සහකාර කළමනාකරු සහ ආරක්ෂක නිලධාරියා මෙලෙස පොලිසිය විසින් අත්අඩංගුවට ගෙන ඇත .

කපිල චන්ද්‍රසේනගේ මරණ පරීක්ෂණයේ විශේෂ සාක්ෂි දෙකක් .

ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේනගේ මරණය සම්බන්ධයෙන් පැවැත්වෙන මහේස්ත්‍රාත් පරීක්ෂණය අද කොළඹ කොටුව මහේස්ත්‍රාත් පසන් අමරසේන ඉදිරියේ අද (05) කැඳවනු ලැබීය .

එහිදී, අල්ලස් හෝ දූෂණ චෝදනා විමර්ශන කොමිෂන් සභාව විසින් මියගිය කපිල චන්ද්‍රසේනට එරෙහිව පවරා තිබූ නඩුවක් වෙනුවෙන් පෙනී සිටි ජනාධිපති නීතිඥ රියෙන්සි අර්සකුලරත්න සහ ඔහුගේ කනිෂ්ඨ නීතිඥවරයා ලෙස කටයුතු කළ උදාර මුහන්දිරම්ගේ ලබාදුන් සාක්ෂි සටහන් කර ගැනීම එහිදී සිදුවිය .

ඉන් අනතුරුව, සිද්ධිය සම්බන්ධයෙන් කොල්ලුපිටිය පොලිස් ස්ථානයේ ස්ථානාධිපතිවරයා විසින් ලබා දුන් සාක්ෂි ද අධිකරණය විසින් සටහන් කර ගනු ලැබීමෙන් අනතුරුව මෙම අභිරහස් මරණය පිළිබඳ වැඩිදුර සාක්ෂි විභාග කිරීම එළඹෙන 09 වැනිදා දක්වා කල් තැබීමට මහේස්ත්‍රාත්වරයා නියෝග කළේය .

රනිල්ගේ නැවත පැමිණී ගැන රාජිතගෙන් ඉඟියක් .

මේ අවස්ථාවේ හිටපු ජනාධිපති රනිල් වික්‍රමසිංහ නැවත පාර්ලිමේන්තුවට පැමිණීමේ සූදානමක් නොමැති බව හිටපු පාර්ලිමේන්තු මන්ත්‍රී රාජිත සේනාරත්න පැවසීය .

වර්තමාන ආණ්ඩුව යටතේ ඉදිරියේදී රට දැඩි ආර්ථික අවදානමකට සහ අරාජිකත්වයකට ගමන් කරන බවට ජාත්‍යන්තර මූල්‍ය ශ්‍රේණිගත කිරීමේ ආයතන පවා අනතුරු අඟවා ඇති බව පෙන්වා දුන් ඔහු පසුගිය දිනවල ඩොලරය හමුවේ රුපියල අවප්‍රමාණය වූ අවස්ථාවේ රනිල් නැවත් පැමිණෙන බව පලවූ මත මාධ්‍ය ප්‍රයෝග බව පැවසීය .

එසේ වුවද, ආණ්ඩුවේ දේශපාලන විභේදනයක් පවතින බවත්, මන්ත්‍රීවරුන් 12 දෙනෙකු සහ ඇමතිවරුන් පිරිසක් ඇතුළු 15 දෙනෙකුගෙන් යුත් කණ්ඩායමක් දැනටමත් ලිපි භාරදී ඇති බවත් ඔහු සඳහන් කළේය .

එමෙන්ම හිටපු ජනාධිපති රනිල් වික්‍රමසිංහ තමන් සමඟ පැවැත්වූ පෞද්ගලික සාකච්ඡාවකදී වර්තමාන රජයේ පිරිස් සමඟ එක්ව වැඩ කිරීමට හෝ ආණ්ඩු කිරීමට කිසිදු සූදානමක් නොමැති බව ප්‍රකාශ කළ බවද ඔහු පවසීය .

බංකොලොත් වූ රටක් වසරක් ඇතුළත ඉන් මුදාගෙන තමන්ට වැඩ කළ හැකි බව රනිල් වික්‍රමසිංහ මහතා ප්‍රායෝගිකව ඔප්පු කර පෙන්වා ඇති බැවින්, වර්තමාන පාලනය අසාර්ථක වන විට ජනතාවට නැවත ඔහුව මතක් වන බවද ඔහු පැවසීය .

පෞද්ගලික රූපවාහිනී නාලිකාවක ඊයේ (04) පැවැති දේශපාලන වැඩසටහනකට එක්වෙමින් ඔහු මේ බව කියා සිටියේ,

සුරේෂ් සලේගේ සෞඛ්‍ය තත්ත්වය ගැන නියෝගය 10 වෙනිදා.

පාස්කු ඉරිදා ත්‍රස්ත ප්‍රහාරය සම්බන්ධයෙන් අත්අඩංගුවට ගෙන, රැඳවුම් නියෝග මත රඳවා ප්‍රශ්න කරමින් සිටින හිටපු රාජ්‍ය බුද්ධි ප්‍රධානී විශ්‍රාමික මේජර් ජනරාල් සුරේෂ් සලේගේ සෞඛ්‍ය තත්වය සම්බන්ධයෙන් නියෝගය ලබන 10 වන දින ප්‍රකාශයට පත් කරන බව කොළඹ කොටුව මහේස්ත්‍රාත් පසන් අමරසේන පවසීය . ඒ එම නඩුව ඊයේ පස්වරුවේ කැඳවූ අවස්ථාවේය .

මෙහිදී අධිකරණය හමුවේ අපරාධ පරීක්ෂණ දෙපාර්තමේන්තුව වෙනුවෙන් කරුණු දක්වූ අතිරේක සොලිසිටර් ජනරාල් දිලීප පිරිස් ඉල්ලා සිටියේ රැඳවුම් නියෝග මත රඳවා ප්‍රශ්න කරමින් සිටින රාජ්‍ය බුද්ධි සේවයේ හිටපු ප්‍රධානී සුරේස් සලේගේ සෞඛ්‍ය තත්වය ගැන පරීක්ෂා කිරීමට සෞඛ්‍ය අධ්‍යක්ෂක ජනරාල්වරයා හරහා විශේෂඥ අධිකරණ වෛද්‍ය මණ්ඩලයක් පත් කරන ලෙසය

එසේම සැකකරු වෙනුවෙන් අධිකරණයේ පෙනී සිටි ජනාධිපති නීතිඥ ශවීන්ද්‍ර ප්‍රනාන්දු අධිකරණයෙන් ඉල්ලා සිටියේ රැඳවුම් භාරයට පත්වීමෙන් පසු සංකාව, විශාදය යන රෝගී තත්ත්වයෙන් පෙලෙන බැවින් සියදිවි නසා ගැනීමේ ප්‍රවණතාවයක් ඇති බැවින් ඒ සඳහා ප්‍රතිකාර ලබා ගැනීමට අවශ්‍ය සුදුසු පරිසරයක් ලබා දෙන ලෙසයි.

සැකකාර සුරේෂ් සලේ වෙනුවෙන් පෙනී සිටි ජනාධිපති නීතිඥවරයා විසින් ඔහුගේ මානසික තත්ත්වය පිළිබඳව විශේෂඥ මනෝ වෛද්‍යවරුන් පස් දෙනෙකුගෙන් යුත් කණ්ඩායමක් විසින් ඉදිරිපත් කරනු ලැබු වෛද්‍ය වාර්තාවක් අද අධිකරණයට ඉදිරිපත් කරනු ලැබුවේය .

එම අවස්ථාවේදී අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි අතිරේක සොලිසිටර් ජනරාල්වරයා එම වෛද්‍ය වාර්තාව ප්‍රතික්ෂේප කරන ලෙස අධිකරණයෙන් ඉල්ලා සිටියේය.