Next Politics

2029 බොරුව දිනවමු ද?/ සත්‍යය දිනවමු ද?

2029 ගැන දැන්ම කතා කරන්න කල් වැඩිය, ඒත් ඒ ගැන කතා නොකර සිටීමටත් බැරිය.
2029 ජනාධිපති කවුද? දැන් එය බොහෝ දෙනෙකු කතා කරන, අවදානය යොමු කරන මාතෘකාවක් වී තිබේ.
ජනාධිපති කවුද කියනවාට වඩා, අනිවාර්යෙන්ම රටට මුහුණදීමට සිදුවන අවදානම් සහගත තත්ත්වයන්ට අභියෝග කරන්න පුලුවන් කෙනෙකු ජනාධිපති විය යුතුය.
එහෙම නොවුනොත් මේ රට වලපල්ලටම ඇද වැටෙන බව අනාගතය සත්‍යවාදීව කියවන ඕනෑම කෙනෙකු‌ට තේරුම් ගන්න පුලුවන්ය.

ලෝකයේ ආර්ථිකය අතින් ශක්තිමත් වූ රටවල් ගමන්ගත් මාර්ගයේ ශ්‍රී ලංකාවත් ගමන් කරවීමට නම් ඇත්ත ඇති සැටියෙන් දකින, සත්‍යවාදී මිනිසෙකු ජනාධිපති විය යුතුමය.
දැන් ඉන්න අනුර කුමාරට මේ ඉදිරි අභියෝගයට මුහුණදෙන්න හැකියාවක් තිබෙනවා ද?
අනුරගේ පාලනයට වසර දෙක ගෙවෙද්දී දැන් උත්තරය හරිම පැහැදිලිය. අනුරට අභියෝග ජයගන්නට බැරිය.

අනුර කරමින් ඇත්තේ මාධ්‍ය සන්දර්ශනයක්ය.
අනුරගේ පාලනයට වසර 2 ක් ගෙවෙද්දී රටේ උද්ධමනය දැන් 8% ඉක්මවා ගොස්ය, වී වලට සහතික මිලක් ඉල්ලා ගොවි ජනතාව මහපාරේය, මාළු සිටිනා ඉසව්ව ඇප් එකෙන් පෙන්නන්නට ආ අනුර දැන් තමන්ගේ ආරක්ෂාව තහවුරු කර ගනුවස් මුහුදු ගිය ධීවරයින්ට ගොඩබිම තහනම් කරන යුගයක්ය, 18% වැට් බද්ද 0% කරන්නට ආ අනුර නතර වුණේ එය 22% ක් කරමින්ය, රැකියා විරහිත උපාධිධාරීන් 35,000 තවම ගෙදරය, 33% ලයිට් බිල අඩු කරන්නට ආ අනුර එය 33% වැඩි කළේය. කළු ආර්ථිකය සුදු කරන්නට ආ අනුර කන්ටේනර් 323ක් පැන්නූ රේගු අධ්‍යක්ෂ ජනරාල්ට ජනාධිපති ලේකම් කාර්යාලයේ ලොකු පුටුවක් පිරිනැමුවේය, ඒ ගැන සෙවූ කමිටු වාර්තාව අනුරගේ කුණු කුඩයේය, ගල්අඟුරෙන් හොරා කෑ ඇමති තවමත් ආණ්ඩුවේය, මහබැංකුව කඩපු උන් අල්ලන්නට ආ අනුරලා ඇමරිකානු ඩොලර් මිලියන 2.5ට කෙළිද්දී, ඉතිහාසයේ පළමුවරට තැපෑලේ ඩොලර් ලක්ෂ 6ක් හොර පාරෙන් පිට කළ අයුරු තවමත් අභිරහසක්ය.

මේ හොරකම් වහන්නට ආ අනුරගේ ආණ්ඩුවේ ජඩකම්ය. මාලිමාවේ 159 ට ඇති පරණ නඩු ෆයිල් පිටින් වසා දමා ඇත. ෆයිල් වැසෙද්දී විනිසුරුවරුන්ට ස්ථානමාරුය, මහජන ආරක්ෂාව භාර ලේකම්ට එරෙහි බී වාර්තා වෙනස් කරන පොලීසියක්ය, අධිකරණය මගහරින නළු ඇමතිවරු පාර්ලිමේන්තුවට එද්දී පොලීසියෙන් සැලියුට්ය.

මේ අනුර කියූ සැමට නීතිය එකක් කළ රටේ අද දවසය.

“පොහොසත් රටක් - ලස්සන ජිවිතයක්”
ප්‍රතිපත්ති ප්‍රකාශය පුරා අනුර රටට දුන් පොරොන්දු කන්ද දෙස බලන විටත් අනුරගේ ජනපතිකම ගැන හොඳටම පැහැදිලිය.
එහෙනම් සුදුසු නායකයා කවුද ?
මෙයට උත්තර දෙන්න පෙර රටක් ලෙස අපට මුහුණ දෙන්නට සිදුවන අභියෝග හඳුනාගැනීම වැදගත්ය.
වේගයෙන් පරිවර්තනය වන ගෝලීය ආර්ථික තත්ත්වයන්ට මුහුණදීමත්, ඊට සමගාමීව රට ආර්ථික වශයෙන් සුරක්ෂිත කිරීමත් ප්‍රධාන අභියෝගය වන්නේය.

එහිදී දක්ෂිණාංශික හෝ වාමාංශික වහල්භාවයෙන් මිදී, මැදි පිළිවෙතක් ඔස්සේ පෙළගැසුණු දේශපාලන න්‍යාය පත්‍රයකට අනුව රට ගොඩනගන පාලන ක්‍රමයක් අවශ්‍යයය.
ජාත්‍යන්තර ණය ශ්‍රේණිගත කිරීම්වලින් ඉහළට පැමිණීමත්, ජාත්‍යන්තර මූල්‍ය අරමුදල සමඟ ප්‍රායෝගික වැඩසටහනකට මුල පිරීමත්, ජනතාවගේ ආර්ථිකමය පීඩනය ලිහිල් කිරීම සඳහා වැදගත් සාධකය. රජයේ ආදායම වැඩි කිරීමත් ඒ ඔස්සේ ජීවන වියදම අඩු කිරීමත් සඳහා ප්‍රායෝගික වැඩපිළිවෙලක් අත්‍යාවශ්‍යය.
නීතියේ ආධිපත්‍ය සුරක්ෂිත කරන සමාජයක් රටක දිරිගමනට වැදගත්ය, බලය උදෙසා අධිකරණය තමන් යටතට ගන්නා පාලනයක් වෙනුවට අධිකරණයට ස්වාධීනව කටයුතු කළ හැකි පරිසරයක් හදන ආණ්ඩුවක් රටට වැදගත්ය.

ගෝලීය වශයෙන් මුහුණදීමට සිදුවන කාලගුණ හා දේශගුණ විපර්යාස හමුවේ රටේ සුරක්ෂිතතාව ගැන සිතන නායකයකු අපට වැදගත්ය.
ලෝක ආර්ථිකය වේගයෙන් ඉදිරියට යද්දී අපි තවමත් ඉන්නේ ඉතා පසුගාමී තැනකය. අපි කඩිනමින් ලෝකයේ දියුණු රටවල් ගමන් කරන මාර්ගයට පිවිසෙන්නට අසමත් වුවහොත් අපිට නතර වෙන්න වන්නේ, ඉතා භයානක තැනකය. ඒ නිසා අපි ලෝකයේ ගමන් මග වටහා ගන්නට පුලුවන් නායකයෙකුට 2029 දී රට භාරදිය යුතුමය.
අන්ත සමාජවාදී ක්‍රමවේද ඔස්සේ රටක ආර්ථිකය ශක්තිමත් කිරීමට බැරිය. ධනය උත්පාදනය කිරීමට සුදුසුම ක්‍රමවේදය ධනවාදය වන්නේය.

එහෙත් එහිද ප්‍රශ්ණයක් ඇත..,
ධනවාදය බෙදීම් ඇති කරන අතර දුප්පතා උග්‍ර දුප්පතෙකු කිරීමත්, ධනවතා උග්‍ර ධනවතකු කිරීමත් එහි ප්‍රායෝගික යථාර්තය වන්නේය. සැබවින්ම එය ධනවාදයේ සැබෑ දුර්වලතාවය වන අතර ධනවාදයට මානුෂීයභාවය කැඳවිය යුතුතේ ඒ නිසාය.
ඒ අනුව ශ්‍රී ලංකාව වැනි රටකට මනාව ගැලපෙන ආර්ථික මොඩලය වන්නේ මානුෂීය ධනවාදය වන්නේය.
එහිදී රටේ උත්පාදනය කරන ධනය සියලු දෙනා අතර බෙදී යන ක්‍රමවේදයක් ඔස්සේ සංවර්ධනයත්, බෙදීම් තුරන් කිරීමත් සිදු කළ හැක්කේය. එහි අවසන් ප්‍රතිඵලය වන්නේ, සැමට එක හා සමානව භුක්ති විදිය හැකි සෞභාග්‍ය ලගාවීමය.
ලෝකයේ බොහෝ රටවල් අද අන්ත වාමාංශික ගමනත්, අන්ත දක්ෂිණාංශික ගමනත් ප්‍රතික්ෂේප කර ඇත්තේ එලෙසය. චීනය, වියට්නාමය වැනි රටවල් ඊට හොඳම උදාහරණ වන්නේය.
රට තුළ ධනය උත්පාදනය කරන චීනය ඒ ධනයෙන් දුප්පත්කම තුරන් කරන්නේ මානුෂීය ධනවාදයේ ක්‍රමවේදය අනුවය. එහිදී චීනයේ සෑම ප්‍රාන්තයකම දුප්පතුන් පවා රටේ නිෂ්පාදන ආර්ථිකයට දායක කරගන්නා අතර ඔවුන්ට එතෙක් ආර්ථික රැකවරණය සලසන්නේ මානුෂීය ධනවාදයේ මූලධර්ම මතය පිහිටමින්ය.
කැමති වුවත්, අකමැතිවුවත් අපට ජාත්‍යන්තර මුල්‍ය අරමුදලේ ගිවිසුම් ප්‍රකාරව 2028 දී ණය ගෙවීම අරඹන්නට සිදුව තිබේ.

එවිට එහි බරපතලම වගකිම ඉටුකරන්න සිදුවන්නේ, 2029 දී පත්වන පාලකයාටය.
ඒ අනුව 2029 යනු කයියට වඩා, ප්‍රායෝගිකත්වය මුල්තැන දෙන සත්‍යවාදීව රට කරවිය යුතු සමයක්ය.
එසේනම් පැහැදිලිවම අප‌ට අවශ්‍යවන්නේ නායකයෙකු මිස කායි කාරයෙකු නොවේ.

සුදුසුම කෙනා සජිත්
එහෙම කිව් විටම සමහරුන්ට ටිකක් කිචි කැවෙද්දී, තවත් කෙනෙකුට උත්ප්‍රාසයක් ජනිතවනු ඇත.
දැන් සමහරුන්ට අනුව සජිත්ට කවදාවත් ජනාධිපති වෙන්නට බැරිය. ඔවුන්ගේ අදහස අනුව, අනුරට වයස අවුරුදු 57ක් වෙද්දී සජිත්ගේ වයස 59 ක් ය. ඒ අනුව ඔවුන්ගේ කියවීම වී ඇත්තේ, තරුණයින්ගේ ආකර්ෂණය වැඩිම පුද්ගලයා අනුර කියාය. දේශපාලනයේ උපාය, උපක්‍රම මේකය. සමාජය තුළ මෙවැනි කතා ගොඩනගමින් ඔවුන් කරන්නේ 2029 ට අදාළ ප්‍රචාරණ යන්ත්‍රණය දියත් කිරීමය.

ඒ ඔස්සේ ඔවුන් ජන මනස තුළ පැල කරන්නට සැරසෙන්නේ, සජිත් හරියන්නේ නෑ කියාය.
අනුරට ජනමතයක් තියෙන බව කියන අයට අපිට නම් කියන්න ඇත්තේ, මේ රටේ 58%ක් අනුරට විරුද්ධයි කියාය. ඇත්තටම ඒ කොටස පහුගිය ජනාධිපතිවරණයේදී අනුරට ඡන්දය දුන්නේ නැත.

එහෙනම් ඇයි සජිත් පැරදුනේ ?
සජිත් ඇත්තටම පැරදුනේ නැත. එයට හරිම නිර්වචනය වන්නේ, සජිත්ට දිනන්න දුන්නේ නැත යන්නය.
2024 ජනාධිපතිවරණයේදී සජිත්ගේ දිනන ගමනට වෙට්ටු දාන්නට බොහෝ අය කරළියට ආවේය.
එහෙම වෙට්ටු දැමූ අය ද ජනාධිපතිවරණ සටනේදී වක්‍රව කිව්වේ අනුරටම ඡන්දය දෙන්නයැයි කියාය.

ඇත්තටම එහෙම නොවුනා නම් අද ජනපති සජිත්ය.
එහෙම වූවා නම් 2029 සජිත්ට බෑ කියන අයද, සජිත්ගේ ගුණ ගයමින් සජිත් පස්සෙන් වැටී සිටින අයුරු දකින්නට තිබුනේය.

දේශපාලනයේදී ඇති තරම් බැට කෑ සජිත් ගැන ඉතිහාසයේ ලියැවෙනු ඇත්තේ, ජනතාවාදී ගමනක් වෙනුවෙන් කැප කිරීම් කළ නායකයෙකු ලෙසය.
ඇත්තටම සජිත්ට වෙච්ච දේ සහ සජිත්ට කරපු දේ ගැන රටේ මිනිස්සුන්ට නම් දැන් හොඳින්ම පැහැදිලිය.

මාළිමාවට කතිරය ගසා ආර්ථික පීඩනයෙන් මිරිකෙමින් සිටින ජනතාවටත් සජිත්ගේ වටිනාකම දැන් ටිකෙන්, ටික තේරුම් යමින් ඇත්තේය.

ආගම්වලට නිසි තැන දෙමින්, සියලු ජනකොටස් එක් කළ හැකි එකම නායකත්වය සජිත් සතු බවද බොහෝ දෙනෙකුට දැන්, දැන් තේරුම් යමින් ඇත්තේය.

දේශපාලන ඒකාධිකාරයක් වෙනුවට, අධිපතිවාදීත්වයක් වෙනුවට, ප්‍රජාතන්ත්‍රවාදය සුරකිමින්, නීතියේ ආධිපත්‍යය රකිමින්, රටේ ජනතාවට සමව සැලකිය හැකි එකම නායකයා සජිත්ය.

ජනතා විමුක්ති පෙරමුණ වූ කලී, 76 වසරක ඉතිහාසය තුළ විවිධ පාලකයන් බලයට ගෙන එන්නට දායකත්වය ලබාදුන්න පක්ෂයක්ය. 1994 දී චන්ද්‍රිකා කුමාරතුංගත්, 2005දී මහින්ද රාජපක්ෂත්, 2015දී මෛත්‍රිපාල සිරිසේනත් බලයට ගෙනෙන්නට ජනතා විමුක්ති පෙරමුණ කටයුතු කළ අයුරු කිසිවෙකුට අමතක නැත.

එසේ බලන විට වසර 21 ක් වූ එම කාලය තුළ තිරයෙන් මෙපිට සහ තිරයෙන් එපිට සිට මේ රටේ සිදුවූ බොහෝ දේශපාලන, ආර්ථික, සාමාජීය තත්ත්වයන්ට ජවිපය ද අඩු වැඩි වශයෙන් වගකිව යුතු බව ඔබටත් වැටහෙනු ඇත.

එසේ තිබූ අතීතය රටට වසන් කරමින් 2024 දී ජාතික ජන බලවේගය නමින් බව්තීස්ම ලබා වෙස් මුහුණ මාරු කරගනිමින් පැමිණි අනුර ප්‍රමුඛ කණ්ඩායම අද තමන්ගේ සැබෑ මුහුණ සෑම පැත්තකින්ම රටට පෙන්වමින් සිටින්නේ ය.

අප අසා ඇති පැරණි කියමනක් වන්නේ, “මුහුද හත්ගව්වක් තිබියදී අමුඩය ගසන්නේ අහවල් එකකට දැයි” කියාය. හොඳ, හොඳ සෙල්ලම් එළිවෙන ජාමයට නිසා මේ අදහස් ටික ප්‍රමාණවත්යැයි සිතමි.

2029 දී කරන්නේ මොකක්දැයි නොකීවත්, වෙන්නේ මොක්දැයි ලියා තබමි.

ඒ 2029 දී රටේ බහුතර තේරීම සජිත් කියාය.

මේ රටේ දේශපාලඥයින්ට දූෂණ වංචා චෝදනා එල්ලවුණේ අද ඊයෙක නෙමෙයි.

මේ රටේ මිනිස්සු පිරිසිදු දේශපාලනයක් ගැන ප්‍රාර්ථනා දල්වගෙන හිටියෙත් අද ඊයෙක ඉඳලා නෙමෙයි.
මිනිස්සු යහපාලනය කියලා ආණ්ඩුවක් පත් කර ගත්තෙම, 2015 ට ඉස්සෙල්ලා රටේ හිටපු පාලකයෝ සිදුකරලා තිබුන දූෂණ වංචාවලට විරුද්ධව නීතිය ක්‍රියාත්මක කරන්න කියලා.
ඒත් ඒකේදී සමහර දූෂණ අත්අඩංගුවට ගැනීම් වලට සීමාවුනා. ඇප ලැබුනා, නඩු වැහුනා, ඒක නිසා තමයි අන්තිමට අනුර ඇතුළු ජවිපෙට කටක් ඇරලා කියන්න පුලුවන් වුනේ, මුං ඔක්කොම හොරු රකිනවා කියලා.
රංජන් වගේ නළුවෝ හැමදාම ජනප්‍රිය වෙලා ඉන්න ඕන නිසා “ මුං ඔක්කොම යාළුවෝ මල්ලී” කියලත් කියන්න පටන් ගත්තා.
මෛත්‍රීපාල සිරිසේන ජනාධිපති ලෙසත්, රනිල් වික්‍රමසිංහ අගමැති ලෙසත් දිවුරුම් දෙන්නේ 2015 ජනවාරි 09 ය.
ඊට පස්සේ ජනවාරි 21 කැබිනට් අනුමැතිය ඇතිව අගමැති රනිල්ගේ සභාපතීත්වයෙන් දූෂණ විරෝධී කමිටුව (Anti-Corruption Committee) කියලා එකක් පටන් ගත්තා. මේ රටේ බුද්ධියක් තියෙන මිනිස්සුන්ට ඒක අමතක නැතුව ඇති.
මහා පරිමාණ වංචා සහ දූෂණ ගැන මහජන පැමිණිලි භාර ගැනීමත්, ඒවා ගැන මූලික විමර්ශන කරලා පොලිස් මූල්‍ය අපරාධ කොට්ඨාසය (FCID) හෝ අල්ලස් හෝ දූෂණ චෝදනා විමර්ශන කොමිෂන් සභාව වෙත යොමු කිරීම ඒකේ අරමුණ කියලා රනිල් එදා කිව්වා.
ඒ කමිටු සාමාජිකයෝ කවුද කියලා මතකද? අග්‍රාමාත්‍ය රනිල් වික්‍රමසිංහ සභාපති වෙච්ච මේ කමිටුවේදී රනිල් ළඟින්ම තියං හිටපු දෙන්නෙක් හිටියා, අනුර කුමාර දිසානායකයි. ආනන්ද විජේපාලයි. ඒ දූෂණ විරෝධී කමිටුවේ අධ්‍යක්ෂවරයා විදිහට රනිල් සහ අනුර එකතුවෙලා පත්කළේ ආනන්ද විජේපාල උන්නැහේව.
ඒකේ අනිත් සමාජිකයෝ වෙච්ච මංගල සමරවීර, විජයදාස රාජපක්ෂ, ආර්. සම්බන්ධන්, සරත් ෆොන්සේකාවගේ අයට වඩා අනුරටයි, ආනන්දටයි රනිල් වගකීම් දුන්නා.
රනිල් එක කළේ යටි අරමුණක් එක්ක. රනිල් තේරුම්අරන් හිටියා, අනාගතේ කිසිම දවසක එයාට මහජන ඡන්දයකින් මේ රටේ පාලකය වෙන්න බෑ කියලා.
ඒක නිසා එයාට ඕන උනා තමන්ට මේ රටේ ජනාධිපති වෙන්න ඉඩ නොදී වලකපපු ඔක්කොටමත්, UNP යේ කිසිම කෙනෙකුටවත් ජනාධිපති වෙන්න නොදී කෙලවලාම ගෙදර යන්න.
ඒකට එයා පාරවල් දෙකක් තෝර ගත්තා.
ඒකේ එක පාරක් තමයි යහපාලනය කියලා මිනිස්සු දහසකුත් එකක් බලාපොරොත්තු තියාගෙන පත්කරගත්ත ආණ්ඩුවට කෙළවෙන්න ඉඩහැරීම. ඒකෙදී මෛත්‍රීපාල ජනාධිපති එක්ක විරසකයක් ඇති කරගත්ත රනිල්, ඒ ආණ්ඩුවට සම්බන්ධ සියළුදෙනා ගැනම ජනතාව තුළ වෛරයක් ඇති වෙන්න ඉඩහැරියා.
ඊළඟට මෛත්‍රීපාල ජනාධිපතිවරයා හොරු අල්ලනවා කියලා රටට දුන්න පොරොන්දු පොල් මල පොලවේ ගැහුවා වගේ සී, සී කඩ විසිරෙන්න හොරුන්ගේ ෆයිල් පිටින් රනිල් යට ගැහුවා.

රනිල් ඒක කළේ අන්න අර අපි කියපු එයාගේ සුහච කීකරු අනුර සහ ආනන්ද කියන දකුණත් සව්, වමත් සව් එක්ක එකතු වෙලා.
තමන්ටත් කෙළ වෙනවා කියලා දැන, දැනම රනිල් ඒක කළේ දීර්ඝ කාලීන සැලසුමක් ඇතිව.
මට නැත්නම් වෙන එකෙකුටවත් එපා කියන මතයේ හිටපු රනිල් වික්‍රමසිංහ ඒ වෙනුවෙන් පැලකරපු බීජ, ඒවා තාවමත් මේ මහපොළවේ දළු දානවා.
අනුර කුමාර එක්ක එදා සිටම පස මිතුරු සමාගමක් රටට පෙන්වපු රනිල්, අදටත් තමන්ගේ සැබෑ මිත්‍රත්වය පවත්වාගෙන යනවා.

රනිල් කියන්නේ, පළිගන්න ඕනනම් ඒක කොහොම හරි, කවදාකම හරි පූර්ණය කරගන්නා මිනිහෙක්. එයා එක ගලෙන් ඔක්කොම කුරුල්ලෝ බිම දාන විදිහේ දඩයක්කාරයෙක්.
ඒ අනුව පලිගන්න ඕන වෙච්ච, වෛරයක් හිතේ තදකරන් හිටපු මිනිස්සු කිහිප දෙනෙක් රනිල්ගේ ලිස්ට් එකේ හිටියා.
ඉන් එක්කෙනෙක් මහින්ද, දෙක සජිත්, තුන කිලී මහරාජා, හතර මෛත්‍රීපාල සිරිසේන, පහ කරූ ජයසූරිය.
මේ හැමෝටම රනිල් ගැහුවේ එක ගලයි.

2005 ජනාධිපතිවරණ පරාජයෙන් පස්සේ තමන්ට කිසිදිනෙක ජනතා කැමැත්තෙන් බලයට එන්නට බැරි බව තේරුම් ගත්ත රනිල්, තමන්ගේ පළමු හතුරා වෙච්ච මහින්දට ෂොට් එක දෙන්න 2010 දී යොදා ගත්තේ සරත් ෆොන්සේකාව.
සුදු කොඩි, මානව හිමිකම් කථා කියමින් රාජපක්ෂලාවත්, මේ රටේ ආරක්ෂක හමුදාවත් ෆොන්සේකා ලවා ජාත්‍යන්තරය ඉදිරියේ නිරුවත් කරපු රනිල්, ශ්‍රී ලංකාවට එරෙහිව ජිනිවා යන්නට NGO නඩය උසිගැන්නුවා.
රනිල්ගේ ඒ 2010 මෙහෙයුමේ ප්‍රථිඵල ලැබුණේ හරියට 2015. ඒ ජනාධිපතිවරණය තමන් ඉල්ලුව නම් පරදින බව දන්නා රනිල්, තිරය පිටිපස්සේ ඉඳන් කපටි ගේමක් ගැහුවා.

එක්සත් ජාතික පක්ෂය ජයග්‍රහණය කරන්න නම් ක්‍රමයේ වෙනස් අවශ්‍ය කියලා කරූ ඇතුළු පිරිසක් කියද්දී ඊට එරෙහි වෙච්ච රනිල් එක්සත් ජාතික පක්ෂයෙන් පිට අපේක්ෂකයකු වූ මෛත්‍රීපාල සිරිසේනට අපේක්ෂකත්වය පිරිනැමුවා. කරූ ජයසූරිය අපේක්ෂකයා විදිහට නම් කළා නම් කරූට 2015 මේ රටේ ජනාධිපති වෙන්න තිබුනා.
ඒත් රනිල් ඒක ඉතාම සූක්ෂම විදිහට නතර කළේ, තමන්ට පක්ෂ නායකත්වය රැකගන්න ඕන නිසා.
ඒකේ අවසාන ප්‍රතිඵලය වුණේ, මේ රටේ ජනාධිපති පුටුවේ වාඩි වෙන්න තිබුණ කරූට කථානායක පුටුවේ වාඩිවෙලා දේශපාලනයෙන් සමු අරගෙන යන්න සිද්ධවීමයි.

රනිල්ගේ ගල ඊළඟට වැදුනේ මෛත්‍රීපාලට. මෛත්‍රීව ජනපති පුටුවේ වාඩි කළත් “මට නොලැබුණු පුටුවේ මම උඹටත් ඉන්න දෙන්නෙ නෑ” කියන යටි සිතේ තිබුණ සිතුවිල්ලේ අවසන් ප්‍රතිඵලය විදිහට රනිල්-මෛත්‍රී ගැටුමක් ඇති වෙලා මෛත්‍රීගේ යහපාලන ආණ්ඩුව සුණු විසුණු කරන්න රනිල් කටයුතු කළා.
“යන යකා කොරහත් බිඳගෙන යනවා” කියන පරණ කියමන ඇත්තක් කරමින්, මහබැංකු බැඳුම්කර මගඩියට උඩගෙඩි දීපු රනිල් සමස්ථ එක්සත් ජාතික පක්ෂයටම හොරු කියන ලේබල් එක ඇලෙව්වා.
යහපාලනයයි, UNP යයි, කුල්ල කුජීත කරමින් තමන්ගේ වෛරය පිරිමහ ගත්ත රනිල්, ආපහු කිසිම දවසක කොළපාට නායකයකුට ජනාධිපති පුටුවේ නොලැබෙන විදිහට වැඩ කරලා 2020 ගෙදර ගියා.

රනිල්ට ඕන වුනේ එයාට නොලැබුන ජනාධිපති පුටුව තමන් විසින් හදාවඩා ගත්ත සුහච කීකරු අනුරට කොහොම හරි අරන් දෙන්න.
රනිල් + අනුර ඩීල් එකේ ප්‍රතිඵල විදිහ තමයි ඔය කුප්‍රකට අනුරගේ කැබ් එක පුරවලා තියෙනවා කිව්ව ෆයිල් කථාව කරළියට එන්නේ.
යහපාලන කාලේ දූෂණ විරෝධී කමිටුවේ ප්‍රධානියා විදිහට රනිල් පත් කරපු ආනන්ද විජේපාලයි, රනිල්ගේ සට්ටම්බි රාළ වෙච්ච අනුරයි රට වටේ ගිහින් කැබ්එකක් පුරවල ෆයිල් තියෙනවා කියලා ඡන්ද ටික ගත්තට, දැන් අවුරුදු 2ක් ගිහිල්ලා ඒ ෆයිල් එකක් හරහා දාපු කිසිම නඩුවක් නෑ.

ඒ ඔක්කොම රනිල් අනුරට අරන්දීපු ආයුධ. අනුර 2019 ඉඳන් හතර වටේට නෙලන්නේ ඒ ආයුධවලින්.
2019 ජනාධිපතිවරණයේදී තමන්ගේ පක්ෂයේ නියෝජ්‍ය නායකයා වෙච්ච සජිත් ප්‍රේමදාසයව අපේක්ෂකයා විදිහට නම් කරන්න රනිල්ව අරන් ගියේ, නාවන්න බල්ලෙක් ඇදගෙන යනවා වගේ.
රටට මූනිච්චාවට සජිත්ව ජනාධිපතිවරණ අපේක්ෂකයා කළාට රනිල් මැතිවරණය පුරාම කළේ කකුලෙන් ඇදපු එක.

ඒ “ජනතා ඡන්දයෙන් මට දිනන්නට බැරිනම් උඹටත් දිනන්න දෙන්නේ නෑ” කියන යටි සිතේ කැකැරුණු වෛරය නිසා.
අපි මේකෙදී කිව්වා කිලී මහරාජා එක්ක වෛරයෙන් හිටියා කියලා, රනිල් කිලීගෙන් පළිගත්තේ වෙළඳ දැන්වීම් නතර කරලා.
පැරදිලා ගෙදර හිටපු රනිල්ට ගෝඨාභයගේ අදක්ෂකම නිසා පිං ජනාධිපති වෙන්න අවස්ථාව ලැබුනම එයා කළේ, තමන් ගහපු ගල තවපාරක් අහුලගෙන හතර වටේට ගහන කියලා එයාගේ සට්ටැඹි රාළ වෙච්ච අනුරට පවරපු එක.
රාජපක්ෂවරුන්ගේ ෆයිල් ටික තමා සතු බවත්, මහින්ද රාජපක්ෂ චීන සමාගමෙන් සල්ලි ගත්ත චෙක් අංකය පවා තමන්ට මතකයෙන් කීමට හැකි බවත් අනුර කීවේය. උගන්ඩාවට ඩොලර් අරන් ගියේ ගුවන් යානයෙන් බවත් අනුර කීවේය. අනුර කිව්වේ තමන් ඒ ගැන පරීක්ෂණ සිදුකර රාජපක්ෂලා හිරේ යවනා බවය.

අනුරගේ එවැනි කථාවලට රැවටුණු මේ රටේ ජනතාව පොලිමේ ගිහින් අනුරට කතිරය ගැසුවේ 76 වසරක ශාපය නිමා කරන්නට පැමිණි කුමාරයා රජ කරවන්නටය.
අනුර කුමාර ජනතා විමුක්ති පෙරමුණේ නායකත්වයට පත්වුණේ 2014 පෙබරවාරි 02 වනදාය. එතැන් සිට පිටුපස සෙවනැල්ල මෙන් සිටිමින් අනුරව ජනපති පුටුව දක්වා රැගෙන ආවේ රනිල්ය.
මේ ලිපිය ආරම්භයේම අප සඳහන් කළ ‘පස මිතුරු’ නාටකය කරළියට එන්නේ එතැන් සිටය.

2015 යහපාලන රජය හරහා රනිල්ගේ ආශිර්වාදයෙන් සහ අනුදැනුමින් සියළු තැන්වලට අතපොවනා අනුර රනිල්ගේ කොන්ත්‍රාත්තුව හරියටම ඉටු කළේය.
මහින්දලාට කුඩුවෙන්නට ගැසූ අනුර, යහපාලනය සහ මෛත්‍රීපාලව පෙට්ටියට දමා ඇණ ගැසුවේය. බැඳුම්කරය හරහා එජාපයත්, එම පක්ෂයට සම්බන්ධ දේශපාලඥයින්ගේත්, පාක්ෂිකයින්ගේත් අනාගතය අඳුරු කර දැමූ රනිල් ඒ හරහා කොළපාට කඳවුරේ මිනිසෙකුට මේ රටේ පාලකයා වීමට ඇති මාවත අහුරා දැමුවේය.

අනුර ජනාධිපතිවරණ වේදිකාවේ පාරම් බෑවේ “මේක කියන්න නෙමෙයි හිටියේ, ඒත් අහපු නිසා කියනවා, රනිල්… ඔයා මා මිත්‍ර අනුර කිව්වට, මහබැංකුව කඩපු එකට ඔයාව හිරේට ගෙනියනවා රනිල්”
අනුර එහෙම කියුවත්, කිසිදු මොහොතක බැඳුම්කරයට අදාළව රනිල්ව අත්අඩංගුවට ගත්තේ නැත. රනිල්ව අත්අඩංගුවට ගත්තේ කෙහෙවත් නැති රට සවාරියකටය.
ඊළගට ආණ්ඩුව පත්වූ සැණින් බටලන්දක් කරළියට ගෙන ආවේය… ඒ බටලන්ද දැන් ආණ්ඩුවට අමතකය.
ඒ සියල්ල රනිල්ගේ + අනුරගේ නාටක පිටපත්ය.
රනිල් අද නෙමෙයි හෙට කියමින්, නින්දට යන යළි උදේට අවදිවන මේ රටේ මිනිසුන්ට 2029 ජනාධිපතිවරණයේදීත් අනුර ගෙනෙන සටන් පාඨ අතර මහබැංකුව සහ බටලන්ද ද තිබෙනු නොඅනුමානය.

අනුරගේ මාලිමා ආණ්ඩුවට මේ වසර දෙකේදී දූෂණ චෝදනා රැසක් එල්ලවී ඇත.
බාල ගල්අඟුරු වංචාව, මහබැංකුවේ ඩොලර් මිලියන 2.5 හොරකම් කිරීම, ඇමරිකාණු තැපැල් දෙපාර්තමේන්තුවට ගෙවන්නට තිබූ ඩොලර් 6 ලක්ෂක් හොරකම් කිරීම, වරායෙන් කන්ටේනර් 323ක් පැන්නීම, මන්නාරමේ සුළං විදුලි බලාගාර ටෙන්ඩරය, වැඩි මිලට ඩීසල් මිලදී ගැනීම, එකී, මෙකී, නොකී දූෂණ චෝදනා අනුරගේ ආණ්ඩුවට තිබුනත් කිසිම දවසක රනිල් ඒවා ගැන කටක් අරින අයුරු ඔබ දැක තිබේ ද ?

අනුර + රනිල් ඩීල්එකේ සත්‍යය ඒකය…
රනිල් හිරේ දමන බවට බොරු සමාජයට මුදාහරින අනුරත්, අනුරගේ හොරකම් ගැන නොදුටු සේ සිටින රනිලුත් රටට කරන්නේ එකම බොරුවය.
ඒත් රටේ රාළ නමින් පෙනී සිටින, ප්‍රියන්ජිත් විතාරණලාට මේ ඇත්ත ලියන්නට පෑනේ තීන්ද නැත.

විමල් වීරවංශගේ ජාතික නිදහස් පෙරමුණේ හිටපු මහලේකම් ප්‍රියන්ජිත් විතාරණලා අවුරුදු ගණනක් සිද්ධවෙන මේ ඇත්ත ඩීල් ගැන කට අරින්න බය ඇයි ද? අපටද ප්‍රශ්ණයක් ය.
රටේ රාළ කරන්නේ, ඇති ඩීල් යට ගසමින්, නැති ඩීල් ගැන සමාජයේ මත සෑදීමය.
රටේ රාළ පසුගිය දිනෙක අලුතින් ආටිකල් එකක් ලියලා තිබුණේය…
ඊට මාතෘකාව යොදලා තිබුණේ ‘මාලිමාව දෙවෙනි ඉනිම නාමල්ගෙන් අරඹයි.’ කියාය.

රටේ රාළ නොහොත් ප්‍රියන්ජිත් විතාරණ කියන්නේ නාමල්ව මේ විදිහට අත්අඩංගුවට ගත්තේ සජිත් සහ අනුර අතර තියෙන ඩීල්එකක් නිසා කියාය. එහෙම කියන මේ රාළ ලිපිය මැද මෙහෙමත් කියා තිබුණේය.

උපුටා ගැනීම :
කොහොම හරි දැන් ජවිපෙ සැලැස්ම ඉතාමත්ම පැහැදිලියි.නාමල්ගෙන් පස්සේ අත්අඩංගුවට ගැනීම් වැලක් කරන්න නියමිතයි.ඊයෙන් පටන් ගත්තා කියලා හිතුවොත් එක ජොන්ස්ටන්,දෙක නාමල්,ඔය අතර තව ගොඩක් අය එයි. රාජපක්ෂලා තව කීපදෙනෙක් අනිවාර්යයි.ඒ අතරින් ගෝඨාභයගේ තත්ත්වය වඩාත් අවධානම්.
මාලිමා ආණ්ඩුවෙන් අන්තිමටම අත්අඩංගුවට ගන්න කෙනා සජිත් ප්‍රේමදාස වෙන්න පුළුවන්. ඒ මාලිමාවේ දේශපාලන ගමනට සජිත් ගෙන් ගන්න ඕනි සියලු තක්කඩි උදව් ටික කරගත්තට පස්සෙ.

උපුටා ගැනීම අවසන් :
මේකට අනුව අනුර සජිත්වවත් අත්අඩංගුවට ගන්නා බව කියන රටේ රාළට නිකමටවත් රනිල්ව අත්අඩංගුවට ගනීවි කියලා හිතුනේ නැත්තේ ඇයි ?
මේ රාළලා ඔක්කොම දන්නවා ඩීල් එක මොකක්ද?, ඒක පිටිපස්සේ ඉන්නේ කවුද? කියලා, ඒත් ඒක රටට කියන්නේ නෑ.
අපි ලිපිය පුරා කියපු රනිල් ගහපු ගල තමයි මේ තාම වදින්නේ, ඒක රාජපක්ෂලට ගහන්නේ අනුර, එතකොට රනිල්ගේ අත් පිරිසිදුයි, ඒ ගල සජිත්ට ගහන්නේ අනුර, එතකොට රනිල්ගේ අත් ඒකෙනුත් පිරිසිදුයි. ඒ ගල් UNP යේ අකිලට, රවීට ගහන්නේ අනුර එතකොට රනිල්ගේ අත් පිරිසිදුයි.
අපිට අනුරගෙන් අහන්න තියෙන්නේ, සාගල පිරිසිදු ද? වජිර පිරිසිදු ද? මලික් පිරිසිදු ද? ආ… එතකොට රනිල් කෝ බැඳුම්කරේට ඇතුලේ දැම්මද? නෑ නේද?… රාළ ඔයැයිට ඒක පෙනුනේ නැද්ද? අනුන්ගේ පව් සහ අනුන්ගේ කොන්ත්‍රාත් තව එකෙක් පිටින් යවන්න ඉස්සෙල්ලා හිතපං මං මේ රටට කියන්නේ ඇත්තම ද? නැත්නම් මම මේ සල්ලිවලට මිනිස්සුන්ගේ ජීවිත එක්ක සෙල්ලම් කරනව ද? කියලා…

2014 ඉඳන් අනුර එක්ක ඩීල් ගහපු රතු අලි පැටියා ගැන ඇත්ත ලියන්නට රටේ රාළට නුවණැස පහළවේවායි ප්‍රාර්ථනා කරමි.

මීට ගමේ රාළ

ඇම්බැක්කේත් නැති අලුත් කැටයම් ගැන ඔබත් රචනාවක් ලියනවා ද?

නිකිණි පුර පසලොස්වක පොහෝ දිනය අගොස්තු 27 වනදාට යෙදී තිබුණි.

පෙර රජදවස මෙන්ම කප් සිදුවීමෙන් පසු පුරා දින 15 පැවැත්වූ මහනුවර ඇසළ පෙරහැර මංගල්‍යයේ අවසන් රන්දෝලි පෙරහැර වීදි සංචාරය කළේ පසුගිය බ්‍රහස්පතින්දාය, එනම් නිකිණි පොහෝ දිනයේය.

අවසන් රන්දෝලි පෙරහැරටත් වඩා එදා කතාබහට ලක්වුණේ, පෙරහැර ආරම්භයට තත්ත්පර 10 ක් තිබියදී, ජනාධිපති අනුර ඇතුළු කණ්ඩායමක් පෙරහැර මාර්ගය Cress කරමින් පැවැත්වූ සිනමා ජවනිකාවය.

ජනතාවට සමීප ජනාධිපතිවරයකු බව පෙන්වන්නට පෙරහැර නැරඹූ ලක්ෂ ගණනක් අතරින් තමන් ඉදිරියේ මාර්ගය එහා පැත්තේ සිටි ජනතාව අතරින් 10,15 දෙනෙකුට ආයුබෝවන් කියන්නට අනුරට එකපාරටම සිතුනේ ඇයි ?

ඒ නාටකයට කණ කොකා හැඬුවේ, චාරිත්‍රාණුකූලව කහදියර ඉස පිරිසිදු කර තිබූ පෙරහැර මාර්ගය හරහා එහා මෙහා ගිය අනුර ඇතුළු පිරිවර ගැනත් හූණු බිජුවක තරම් මොළයක් නැතිව එවැන්නක් සිදුකළ පාලකයා හොඳින් දෘෂ්‍යමාන වූ වීඩියෝවක් නිසාය.

පෙරහැර ආරම්භයට ඔන්න මෙන්න කියා තිබියදී කැමරා කණ්ඩායමට Stand by සංඥාව ලබාදෙමින් තිබියදී, රටේ පාලකයා දළදාව වැඳපුදා ගැනීම වෙනුවට, බලය උදෙසා ජනතාව වැඳපුදා ගන්නට පාර පැනීම මේ රටේ ලක්ෂ සංඛ්‍යාත ජනතාවට සියැසින් දැකබලා ගැනීමට අවස්ථාව උදාවී තිබුණි.

පෙරහැරේ සජීවී ආවරණය සිදු කළ කැමරා ශිල්පියෙකු හෝ එම තාක්ෂණික කණ්ඩායමේ යම් අයෙකු එම සිදුවීමට අදාළව නියම පිළිතුරක් දුන් අයුරු රටටම ඒ වීඩියෝවෙන් අසන්නට ලැබුණි.

භාහිර විකාශන මැදිරියෙන් “Stand by, 10 seconds” කියනු ඇසේ, ඒ සංඥාවෙන් කියවුනේ තත්ත්පර 10 කින් පෙරහැර ආරම්භ වන බවය. එම සංඥාවට පෙරලා ලැබුණු පිළිතුරු හරි අපූරුවිය “ Stand by කරලා තියන් හිටපන් පොඩි චිත්‍රපටියක් යනෝ” ඒ කියවුනේ රටේ මුල් පුරවැසියා වන, දළදාවේ නීත්‍යානුකූල භාරකරුවා වන, මේ රටේ රාජ්‍ය නායකයා පෙරහැර ආරම්භයට තත්පර ගණනක් තිබියදී කෙළපු පිස්සුව ගැනය.

ඊට අමතරව රැජින හෝටලයෙන් බැස මහමග සිට පෙරහැර නැරඹූ රටේ පළමු පාලකයා තමන් බවට අනුර ඇතුළු නඩය කැම්පේන් කළේය.

සැලසුම් සහගතව තැනූ පීඨිකාවේ නොසිට රැජින හෝටලයේ සිට අනුර පෙරහැර නැරඹුවේ නම් ඒ අයුරින් එක්වරම පාර පැනගොස් ජනතාව අතරට ගිය ජනාධිපති වීමට ඔහුට නොහැකි වනු ඇත.

එහෙත් අනුර ඇතුළු පැලවත්ත බලකායට රෙද්දේ රෙවුනේ පෙරහැර අවසන් වෙන්නටත් පෙරමය, ඒ මංගල හස්ථිරාජයා මත තැන්පත් කළ සධාතුක කරඬුවට ජනාධිපති අනුර කුමාර දිසානායක වැඳ නමස්කාර නොකළ බවට සමාජ මාධ්‍යයේ වාර්තා පළවීමත් සමගය.

“ඒක බොරුවක් මෙන්න මම වැන්දා” කියන්නට තරම්වත් ඡායාරූපයක් අනුරලාට සමාජ මාධ්‍යට හෝ තමන්ගේ මුහුණු පොතටවත් මුදා හරින්නට බැරිවිය. ඒ ඇත්තටම අනුර ජනාධිපතිවරයා ලෙස හෝ දළදාවේ නීත්‍යානුකූල භාරකරුවා ලෙස හෝ දළදා කරඬුවට වැඳ නමස්කාර නොකිරීම නිසාය.

ඉන්පසු තවත් ප්‍රවෘත්තියක් වාර්තා වුණේ, පෙරහැර අවසන්වීමට තියා, අඩුම තරමේ දියවඩන නිළමේවරයා තමන් පසුකොට යනතුරුවත් පුටුවේ හිඳගෙන ඉන්නට නොහැකි තරමේ කඩි කුලප්පුවක් අනුරට ඇතිවූ බවටය.

සැබවින්ම දියවඩන නිලමේ පීඨිකාව ඉදිරියෙන් යනවිටත් ජනාධිපතිගේ පුටුව හිස්ය.

පෙර වසරවලදී පෙරහැර අසිරියෙන් සමාජ මාධ්‍ය ජාලා පිරෙන ඉතිහාසයක, ජනපතිවරයෙක් කළ පිස්සු වැඩවලින් සමාජ මාධ්‍ය ජාලා පිරෙද්දී අනුර ඇතුළු පැලවත්ත මේ නාපු නෑම යටපත් කරගන්නට උපායක් කල්පනා කළේය.

ඒ අනුව 28 වනදාට එළිවද්දී අනුරගේ පෙරහැර වික්‍රමයන්ගෙන් මුහුණු පොත පිරෙද්දී එය යටපත් කර ගැනීමට උපායක් සිතූ පැලවත්ත, දහවල් පෙරහැරෙන් පසු චාරිත්‍රානුකූලව සිදුකරන පෙරහැරේ දස්කම් දැක්වූ ශිල්පීන්ට ඇගයීම් තිළිණ ප්‍රධානය කරන අවස්ථාව නාට්‍යයක් කරගන්නට තීරණය කළේය.

ඇම්බැක්කේත් නැති කැටයම් ජනපති අනුරගෙන් එළියට එන්නේ ඒ අනුවය.

ඒ අනුව විටෙක පෙරහැරේ නර්ථන ශිල්පීන්ගේ සහ හේවිසි ශිල්පීන්ගේ දෑත් අල්ලාගෙන පිරිමදින ජනාධිපති අනුරගේ වීඩියෝවකින් සමාජ මාධ්‍යයේ පිරී ගියේය.

සමරු තිළිණ ලබාගන්නට ජනාධිපති අසලට ආ හොරණෑ ශිල්පියෙකු “පුතේ” කියා ආමන්ත්‍රණය කළ බව කියමින් තවත් වීඩියෝවක් සමාජ මාධ්‍යයේ පිම්මේ දුවන අයුරුද පෙනෙන්නට විය.

පුතේ කියූ බව කියන වීඩියෝවෙන් පසු එය දැන් කුලවාදයට සහ සමාජ පන්ති මට්ටමට පරිවර්ථනය වී තිබෙන අයුරුද පෙනෙන්නට ඇත්තේය.

ඒ ගැන රචනා, නිසදැස්, කවි, සදැස් අතොරක් නැත. ආචාර්ය, මහාචාර්යවරු පවා කුලය, වංශය, පැලැන්තිය ගැන රචනා ලියන අයුරු දකින්නට තිබේ.

එහෙම බලද්දී පැලවත්තේ උපක්‍රමය සාර්ථක වී ඇත.

* පෙරහැර පටන්ගන්නට තත්ත්පර 10 තිබියදී පෙරහැර මර්ගය හරහා පිරිවර සමඟ ගොස් පිස්සු කෙළපු ජනාධිපති අද නැත.
* දළදා කරඬුවට වැඳ නමස්කාර කරන්නට දෑත් එක් නොවූ ජනාධිපති අද නැත.
* පෙරහැර අවසන් වෙන්නෙ පෙර හුනස්නෙන් නැගිට ගිය ජනාධිපති අද නැත.
* දියවඩන නිලමේ පෙරහැරේ වඩින තුරුවත් ඉවසා වදාරන්නට නොහැකි වූ ජනාධිපති අද නැත.
* අද ඉන්නේ ජනාධිපතිට පුතේ කියා ආමන්ත්‍රණය කළ හොරණෑ ශිල්පියා සහ ඒ ආමන්ත්‍රණය හරහා කණ්ඩනය වූ කුලවාදය සහ අපේ පන්තිය කියන කතා ටික පමණය.

ගරිල්ලා මකටිං අලුත් වර්ෂන් එක මේකය. අනුර ප්‍රමුඛ පැලවත්ත මේකට අති දක්ෂයින්ය.

වයස්ගත හේවිසි ශිල්පීන් හොරණෑ ශිල්පීන් ළඟ හිත උණු වෙන අනුරට, තමන්ට ජවිපේ නායක පුටුවට එන්නට පාර පෙන්නූ මිනිසා ගැන ඔය ලෙසින් හිත උණු වුනේ නැත.

ජවිපේ තහනම් වෙද්දීත්, විදෙස් ගතව සිටිමින් පක්ෂය සංවිධානය කළ සෝමවංශ අමරසිංහ නම් ජවිපේ යළි නගා සිටවූ ඒ වයස්ගත නායකයාට අවසන් සමයේ පැලවත්තේ දොර වසා දමන්නට තරම් අනුර අකාරුණික වූ අයුරු බොහෝ අයට අද අමතකය.

සෑම ජනාධිපති කෙනෙක්ම ඔය අයුරින් පෙරහැර ශිල්පීන්ට උපහාර දුන් සම්ප්‍රදායක් පෙර රජදවස සිටම පැවත ආවේය.

අනුර ජනාධිපතිද 2025 වසරේ ඔය ලෙසට, ඔතනම සිට ඔය ශිල්පීන්ටම ඇගයීම් තිළිණ පිරිනැමුවේය.

එහෙත් මීට වසරකට පෙර ඔය නර්ථන ශිල්පීන් ඉදිරියේ අනුරගේ හදවන උණු වූයේ නැත.

ඒත් රං බණ්ඩා ගෙ පුතා, තනි සිග්නල් කණුවේ සිට කුලවාදය, පන්තිභේදය, බලය උදෙසා යළිත් කරළියට ගෙන එන්නට සූදානම් බවනම් පැහැදිලිය.

ඒ අනුර ඇතුළු පැලවත්තේ හැටිය, තමන්ගේ ලාභ දේශපාලනයට අහිංසක මිනිස්සුන් පවා උගසට තියන ඔවුන් 76 වසරක ශාපයක් කියමින් පුරවැසියා සහ දේශපාලඥයා අතර විරසකය ඇති කළේය.

ඒ බලය සඳහාය, බලය ගත් පසු සිවිල් සංවිධාන පිළිබඳවත්, රාජ්‍ය සේවය පිළිබඳවත්, ආගමික නායකයින් පිළිබඳවත්, නීතීඥයින් පිළිබඳවත් සමාජයේ පුරවැසි විරෝධයක් ගොඩනැගූ ඔවුන් දැන් අවසාන වශයෙන් අත තබා ඇත්තේ අධිකරණයේ විනිසුරුවරුන්ටය.

ආණ්ඩු බලය ලැබුනත්, රාජ්‍ය බලය නොලැබුණු බවට පුරවැසි මනසේ බීජ වැපිරූ ඔවුන්, දැන් කෙමෙන්, කෙමෙන්, සමාජය තුළ යළිත්, කුලය, බලය, වංශය, උස්, මිටි තැන් කබල්ගාමින් මේ සැරසෙන්නේ බලය උදෙසා උත්තේජනය කළ හැකි සියළු සියම් තැන් ස්පර්ෂ කරන්නටය.

ඒ හැර ඔවුන්ට විකල්පයක් නැත, වසර දෙකක් තුළ තමන් කළ බවට රට හමුවේ තහවුරු කළ හැකි කිසිවක් ඔවුන් උපයා නොමැති කළ මේ සමාජයේ සියම් තැන් ස්පර්ෂ කරනු විනා අන් කවරක් සමාජ ගත කරන්න ද?

මේ සැබෑ අනුරය…සමාජ මාධ්‍ය තුළින් ඇම්බැක්කේත් නැති කැටයම් පෙන්වමින් අනුර මේ සැරසෙන්නේ තමන්ගේ දෙවැනි අවුරුදු 5 ගොඩදා ගන්නටය…

ඇත්ත දකින්න… අන්ධ නොවන්න…