Next Politics

ඇත්තටම සජිත් මොනවද මේ කරන්නේ…

රටේ රාළ සිය මුහුණු පොතේ ඵල කර තිබූ සටහනකට ප්‍රස්තුතය කරගෙන තිබුණේ සජිත්ගේ දේශපාලන භූමිකාවය…

උපුටා ගැනීම :

“ ශ්‍රී ලංකාව ඉතිහාසයේ දරුණුතම ආර්ථික,සමාජීය සහ ව්‍යවස්ථාපිත අර්බුදයකට මුහුණ පාමින් ඉන්නවා. මිලියන 22ක ජනතාවක් තමන්ගේ සහ රටේ අනාගතය පිළිබඳව අවිනිශ්චිතතාවයෙන් පෙළෙද්දී, ප්‍රජාතන්ත්‍රවාදී රටක විකල්ප රාජ්‍ය නායකයා හෙවත් විපක්ෂ නායකයාගේ භූමිකාව අතිශය තීරණාත්මක,ඍජු සහ දූරදර්ශී එකක් වෙන්න ඕනි.හැබැයි අපේ විපක්ෂ නායක සජිත් ප්‍රේමදාසගේ දේශපාලන හැසිරීම්, තීරණාත්මක මොහොතකදී දක්වන උපක්‍රමශීලී නිහඬතාවය සහ ප්‍රමුඛතා හඳුනාගැනීමේ බරපතළ දුර්වලතා දිහා බලනකොට ඒ ගැන කතා නොකර ඉන්න බෑ.”

උපුටා ගැනීම අවසන් :

රටේ රාළ කියන විදිහට අපේ රට අර්බුද තුනක් මත තමයි තියෙන්නේ, ඒක ඇත්ත…එය ඔහුගේ වචන වලින්ම කියනවා නම්
”ආර්ථික,සමාජීය සහ ව්‍යවස්ථාපිත අර්බුදයකට මුහුණ පාමින් ඉන්නවා”.

හරි එහෙම උනාම මොකක්ද වෙන්නේ, රට කඩාගෙන වැටෙනවා, අතේ මිටේ සල්ලි නැති වෙනවා, තැන, තැන විරෝධතා ඇති වෙනවා, පෝලිම් එනවා, ජනතාව හොරකම් කරන්න පෙළඹෙනවා, නීතිය කඩා වැටෙනවා, ජාත්‍යන්තරයෙන් සම්බාධක වැටෙනවා, ජාත්‍යන්තර වර්ගීකරණ වලින් අපි පහළටම වැටෙනවා, අපි ආයෙත් බංකොලොත් රටක් කියලා නම් කරනවා, මේ හැම එකකින්ම පීඩා විඳින්ගේ මේ රටේ මිලියන 22 ක් වෙච්ච අහිංසක මිනිස්සු.

රට බංකොලොත් වෙලා, පෝලිම්වල ඉඳලා හෙම්බත් වෙලා, දරුවන්ගේ OL/ AL දින නියමයක් නැතුව කල් ගිහිල්ලා, පොදු දේපළ විනාශ කරලා, ගෙවල් ගිණි තියලා, මිනිස්සු ගහලා මරලා…, බලය ගන්න කරන පුළුවන් ඕනම දෙයක් කරන තිරිසන් සමාජයකට තමයි අද පාලන බලය හොබවන අය එදා විපක්ෂයේ ඉන්නකොට මිනිස්සු ඇදගෙන ගියේ.

එහෙම විපක්ෂයක් නිසා අන්තිමට උනේ මොකක්ද? මේ රටේ අහිංසක මිනිස්සුන්ට යථා තත්ත්වයට එන්න අවුරුදු ගණන් දුක්විඳින්න වෙච්ච එක.

එහෙම කරලා බලය ගන්න පුළුවන් වෙයි, ඒත් රටේ කීර්තිය, ආයෝජකයින්ගේ උනන්දුව, ලෝකේ ඇතුලේ Ratings වලින් අපිට හිමිවෙන තැන සීග්‍රයෙන් කඩන් වැටෙයි.

රටේ රාළ කියන්න වගේ මේ රටේ ප්‍රශ්ණ තුනක් තියෙනවා… මම ආයෙත් ඒක මතක් කරනවා “ආර්ථික,සමාජීය සහ ව්‍යවස්ථාපිත අර්බුද” ඒත් මේ රටේ ඔය හැම එකකටම උඩින් ව්‍යවස්ථාව සහ ප්‍රජාතන්ත්‍රවාදය කියලා එකකුත් තියෙනවා.

සජිත් විපක්ෂ නායකවරයගේ භූමිකාව හොඳින් අධ්‍යනය කරනවා නම් අන්න ඒ දේත් එක්ක සන්සන්ධනය කරලා බලන්න කියලා අපි රටේ රාළගෙනුත්, සජිත් පණ මදි කියන අනිත් අයගෙනුත් ඉල්ලනවා.

අපි අහනවා මේ රටේ මිලියන 22 ක් වෙච්ච අහිංසක මිනිස්සුන්ගෙන්, ආයෙත් මේ රටට එක ඩොලර් එකක් එවන්න එපා කියලා සජිත් කිව්වොත් මොකද වෙන්නේ, ආර්ථිකය තවත් කඩාගෙන වැටෙනවා නේද?, වෘත්තීය සමිති පාරට බස්සලා විරෝධතා කළොත් මොකද වෙන්නේ, රටේ දෛනික කටයුතුවලට බාධා වෙලා රට ගව් ගණනක් ආපස්සට යනවා නේද? ගුරුවරු පාරට බස්සලා විරෝධතා කළොත් මොකද වෙන්නේ, ඔබේ අහිංසක දරුවන්ගේ අධ්‍යාපනය කඩා කප්පල් වෙලා, සාමාන්‍යපෙළ, උසස් පෙළ දින නියමයක් නැතුව කල් යනවා නේද? පාරවල් වහගෙන තැන තැන විරෝධතා සිද්ධ කළොත් මොකද වෙන්නේ, සංචාරකයෝ රටට එන්නේ නෑ, රට ගැන ජාත්‍යන්තරයට යන චිත්‍රයත් හරි නෑ නේද? එහෙම කරද්දී ඇත්තටම ආණ්ඩුවට රිදේවි, ඒක ඇත්ත, ඒත් එනපොට හොඳ නෑ කියලා තේරෙද්දී IMF තවත් කොන්දේසි දාලා අපෙන් ණය ටික අයකර ගන්න වැඩ කරාවි, එතකොට අපහසුතාවයට පත් වෙන්නේ කවුද? ආණ්ඩුව තව, තවත් පටි තද කරලා පොකට් එකම හූරන් කන්නේ කාගෙද? ඒ මේ රටේ මිලියන 22 ක් වෙච්ච අහිංසක ඔබගේ. ඉතිං සජිත්ට කොන්ද පණ නෑ කිය, කිය හැමෝම සජිත්ව තල්ලු කරන්න හදන්නේ කොහාටද? මේ රටේ අර්බුදය වැඩි කරලා ජනතාවට පීඩාව ගෙන දෙන තැනකට රට අරන් යන්න කියලා.

ඒක තමයි ආණ්ඩුව කෙරෙහි ජනතා අප්‍රසාදය ගොඩනගන්න පුළුවන්, ආණ්ඩුව ගෙදර යවන්න පුළුවන් ලේසිම ක්‍රමය.

ඒත් එහෙම කළාම ජනතාව මහ පාරේ දුක් විඳිද්දී, දරුවන්ගේ අධ්‍යාපනය කඩාකප්පල් වෙද්දී, කන්න බොන්න නැතුව පොලීම් ඇති වෙද්දී ගන්න බලයෙන් වැඩක් තියෙනවද?

සජිත් මේක හොඳ හැටි දන්නවා…

මේ රටේ ජනතාව ආයෙත් එහෙම දේකට සූදානම් නෑ කියලත් සජිත් දන්නවා. රටේ මිලියන 22න් ඡන්දයට හිමිකම් කියන මිනිස්සු නියමිත වෙලාවෙදී ප්‍රජාතන්ත්‍රවාදී විදිහට තමන්ගේ ජන මතය ප්‍රකාශ කරාවි.

ඒත් එක, එක රාළලට ඕන සජිත්ව පළිහක් කරගෙන ඒකට මුවා වෙලා තමන්ගේ දේශපාලන සූදුව කරන්න.

මේක කියවන මේ රටේ මධ්‍යස්ථ මිනිස්සුන්ගෙන් මම නිකමට හිතන්න කියලා ඉල්ලනවා, සජිත්ට කොන්ද පණ නෑ කියලා හරි, හරියට කියවන්නේ කවුද?

1. ආණ්ඩුවේ 159
2. සජිත් ළඟ ඉඳලා විසි වෙච්ච පාර්ලිමේන්තුව නියෝජනය නොකරන පිරිස
3. ආණ්ඩුව මොන වරද කළත් ඒක සුද්ද කරමින් සජිත්ට පහරදෙන මාධ්‍ය ආයතන
4. සල්ලිවලට ඕන දෙයක් ප්ලාන්ට් කරන සමාජ මාධ්‍ය
5. සජිත්ගේ ළඟට ලංවෙන්න බැරුව ඉන්න දේශපාලන අනාථයෝ ටික

හත්වලාමේ බලන් ගියහම මේ හැමෝම සජිත් විරෝධීන් නේ. ඉතිං එයාලගේ ඩියුටිය තමයි සජිත්ව මේ දේශපාලන පිටියෙන් ඉවත් කරන එක.

සජිත්ගේ කොන්ද පණ මදිනම්, ආණ්ඩුවට එරෙහිව විපක්ෂ නායකකම හරියට කරන්නේ නැත්නම් ඇයි මෙයාලා මේ තරම් අඬන්නේ, දඟලන්නේ, ඒක නෙමෙයි ඇත්ත, මේ හැමෝම දන්නවා සජිත් ළඟ තියෙන ඡන්ද බේස් එක.

ඔය දිනපතා, පණ නෑ, සජිත්ට කොන්ද නෑ කියලා ගහන්නේ අන්න ඒක කඩා ගන්න.

දැන් අපි බලමුද? ආණ්ඩු දණ ගස්සන්න සජිත් වැඩ කරලම නැද්ද කියලා. අපි ඒක සජිත්ගේ 2020 විපක්ෂ නායක භූමිකාවේ ඉඳන්ම සාකච්ජා කරමු ද?

මේ රටට ලොකුම බලපෑම වුණේ ආර්ථික අර්බුදයෙන්, එදා කොවිඩ් එද්දී මිනිස්සුන්ගේ ජීවිත ආරක්ෂා කරගන්න වෙලාවට එන්නත් ටික ගහන්න කියලා බය නැතුව ඉස්සරහට ඇවිත් කිව්වේ සජිත් විතරයි.

ගඟට මුට්ටි දාද්දී, කොරෝනා වඳ කරන්න පැනි පොවද්දී බය නැතුව ඒවට විරුද්ධ වුණේ එදා විපක්ෂ නායක සජිත් විතරයි.

අද ආණ්ඩු බලයේ ඉන්න අනුර ඇතුළු මාලිමාව කළේ කොරෝනා අස්සෙත් වැඩි පඩි ඉල්ලලා ගුරුවරු පාරට බස්සලා දරුවන්ට ඉස්කොලේ යන එකයි, ඔන්ලයින් උගන්නපු එකයි නැත්තටම නැති කරපු එක විතරයි.

ඒ කරපු විනාශයේ ප්‍රතිඵල නිසා තමයි තවමත්, OL/ AL නිසි කාලයේ තියාගන්න බැරුව ආණ්ඩු තවමත් දඟලන්නේ.

එදා සජිත්ට බැනපු ආණ්ඩුවට අන්තිමට සජිත් කියපු දේම කරන්න සිද්ධ වුනා.

පැණි පොවන එක පැත්කක දමලා, ගඟට මුට්ටි දාන එක පැත්තක දමලා ලෝකය පුරා කොරෝනා මඩින්න හදපු වැක්සින් අපේ රටටත් ගේන්න ගෝඨාභයගේ ආණ්ඩුවටත් අන්තිමට සිද්ධ වුනා.

ඔහොම යද්දී මේ රටේ ආර්ථිකය කඩන් වැටුනා, ඒකට වගකියන්න ඕන කවුද කියලා හෙළි කරන්න කියලා ශ්‍රේෂ්ඨාධිකරණයට ගියේ සජිත් ප්‍රමුඛ සමගි ජන බලවේගය විතරයි.

අන්තිමට රට ආර්ථික වශයෙන් කඩා වැටෙන්න හේතු වුණේ එදා ගෝඨාභය ආණ්ඩුවේ වැරදි ආර්ථික තීන්දු තීරණ කියලා ඔප්පු කරන්න සජිත්ට පුළුවන් වුනා.

ඒක ප්‍රතිඵලයක් විදියට ගෝඨාභයට එරෙහිව Gota Go Home කියලා ජනාධිපති ලේකම් කාර්යාලය මුළින්ම වැටළුවෙත් සජිත් ඇතුළු සජබය.

එදා අනුරලා, පෙරෙට්ටෝ, රැට්ටෝ, බැට්ටෝ ඔක්කොම හිටියේ ගෝඨාභයට බයේ හැංගිලා, ඒත් සජිත් දුන්න ගැම්මෙන් අන්තිමට එයාලා අරගලයකුත් පටන් ගත්තා.

ඒත් හැම වෙලාවකම ප්‍රජාතන්ත්‍රවාදී විදහට නීතිය ඇතුළේ ඉඳගෙන තමයි සජිත් පොලිටිකල් ගේම් එක ප්ලේ කළේ.

ඒක බුද්ධිමත් මිනිස්සුන්ට, දේශපාලනය තේරෙන මිනිස්සුන්ට තේරුණාට එදාවේල චූන් වෙන අයට මේ ක්‍රමය එච්චර ගෝචර නෑ… තව වචනයකින් කියනවා නම් එයාලට සෙට් නෑ…

එයාලා බලන්නේ සාම්ප්‍රදායික විදිහට මිනිස්සු පාරට බස්සන දේශපාලනය, ගිණි තියන, කුඩු කරන දේශපාලනය, පාරේ නිදියන දේශපාලනය, දරුවන්ගේ අනාගතය එක්ක සෙල්ලම් කරන දේශපාලනය.

එතනදී සජිත් ෆේල් තමයි…මොකද සජිත් කැමති නෑ රට තව, තවත් කඩා වැටෙනවට, සජිත් කැමති නෑ දරුවන්ගේ අධ්‍යාපනය කඩාකප්පල් වෙනවට, සජිත් කැමති නෑ තමන්ගේ පුරවැසියා අපහසුතාවයට පත් වෙනවට.

ගෝඨාභය ජනාධිපතිගේ කාලේ රට බංකොලොත් වෙන්න ඉස්සෙල්ලා IMF යන්න කියලා මුලින්ම කිව්වේ සජිත්, ඒ 2021 දෙසැම්බර්, ඒත් ගෝඨාභයලා ඒකට විහිළු කළා, අන්තිමට රට වැටුනා, ගෝඨාභයට IMF යන්න වුනා.

කොරෝනා ආවා, සජිත් එන්නත් ගේන්න කිව්වා, සජිත්ට හිනා වුනා, මිනිස්සු මැරුණා, අන්තිමට එන්නත් ගේන්න සිද්ධ වුනා.

සජිත් ප්‍රමුඛ සමගිය, කෙහෙළියට විශ්වාසභංගයක් ගෙනාවා,ඒක පරද්දපු ආණ්ඩුව සජිත්ට හිනා වුනා, ඊට පස්සේ සජිත් ප්‍රමුඛ සජබය අධිකරණයට ගියා, නඩුව අහලා ඉවර වෙද්දී කෙහෙළිය හිරේ ගියා.

දේශබන්දු පොලිස්පති පුටුවට නුසුදුසුයි කියලා සජිත් ඒ පත්කිරීමට විරුද්ධ වුනා. සජිත්ට හිනා වුනා, අන්තිමට සජිත් ප්‍රමුඛ සජබ ශ්‍රේෂ්ඨාධිකරණයට ගියා, දේශබන්දු ගෙදර ගියා.

ඔය ගෝඨාභයගේ කාලේ සජිත් නීතිය ඇතුලේ ඉඳන් රටේ ජනතාව මිනිස් පළිහක් කර නොගෙන ආණ්ඩුව, ආණ්ඩු මට්ටු කරන ගහපු ගේම්වලින් ටිකක්.

අද පාලන බලයේ ඉන්න අනුර ඇතුළු මාලිමාව ඔය එකක්වත් කළේ නෑ. එයාලා කළේම ජනප්‍රිය දේශපාලනය.

ඒ කියන්නේ පාරවල් වහන දේශපාලනය, පාසැල් වහන දේශපාලනය, ඩොලර් එවන්න එපා කියන දේශපාලනය, සමස්ථයක් විදිහට රටේ ආර්ථිකය කඩා වට්ටන දේශපාලනය.

ඒකෙන් චූන් වෙන පිරිසක් නැතුවම නෙමෙයි, ඒකෙන් විපක්ෂය නියමයි වගේ අදහසක් ජනිත නොවෙනවා නෙමෙයි. ඒත් විපක්ෂයටත්, රටේ මිනිස්සුන්ටත් දේශපාලනය කරන්න රටක් තියෙන්න ඕන, දේශපාලනය කරන්නත් රටේ මිනිස්සු ජීවත්වෙලා ඉන්න ඕන, ඒක තමයි සජිත්ගේ තියරි එක.

එහෙම බලද්දී සජිත් විපක්ෂ නායකයා විදිහට හැම වෙලාවෙම හිතන්නේ ඔන්න ඔය ලයින් එක පන්නන්නේ නැතිව දේශපාලනය කරන්නේ කොහොමද කියන එකයි.

සජිත්ට මිනිස්සු පාරට බස්සන්න, ඉස්කෝල ටික වහන්න, ඩොලර් එවන්න එපා කියන්න, තානාපතිවරු කැඳවලා ආණ්ඩුවට විරුද්ධව කතා කියන්න ඕන තරම් පුළුවන්.

තමන්ගේ X ගිණුමෙන් රට ගැනත්, ආණ්ඩුව ගැනත් Negative vibe එකක් ජෙනරේට් වෙන comment එකක් දැම්මනම් ලෝකයේම අවධානය ගන්නත්, ලෝකයටම රට ගැන වැරදි චිත්‍රයක් ජනගත කරන්නත් පුළුවන්.

ඒත් සජිත්ගේ ළඟ අන්න ඒ තුනයි පනහේ දේශපාලනය නෑ.

මතකද සරත් ෆොන්සේකගේ සුදු කොඩි කතාව, අදටත් අපේ රණවිරුවන් අසරණ කරන ඒ කතාව කිසිම විදිහකට ගලවන්න බැරි කළු පැල්ලමක්.

සජිත් ඒ දේශපාලනය ප්‍රතික්ෂේප කරපු මිනිහෙක්. සජිත් ඒ දේශපාලනය ප්‍රතික්ෂේප කරපු විපක්ෂ නායකවරයෙක්.

ජනාධිපතිතුමාගේ වචනයෙන්ම කියනවා නම් දැන් ටිකක් කල්පනා කරලා බලන්න මේ ආණ්ඩුවේ ගෙවුණු මාස 20ට, සජිත් ඇතුළු විපක්ෂය බාල ගල්අඟුරු වංචාව රටට හෙළිදරව් කරලා ආණ්ඩුව විගණකාධිපති වාර්තාව ඉස්සරහ තියලා දණ ගස්සපු හැටි.

කන්ටේනර් 323 පන්නපු හැටි, මහභාණ්ඩාගාරයේ ඩොලර් හොරකම් කරපු හැටි, වැඩි මිලට තෙල් අරන් පාඩු කරපු හැටි, ඒකී, මෙකී, නොකී වංචා ගොඩ පාර්ලිමේන්තුවේදී ඇදලා අරන් සමාජය ඇතුලේ කතාබහට ලක් කරලා ආණ්ඩුව දූෂිතයි කියලා ජනගත කළේ කවුද? සජිත් ඇතුළු සජබයද? නැත්නම් ඔය ඒකාබද්ධ, ඒකාබද්ධ කියන අයද කියලා මේ රටේ ඔළුවක් තියෙන, අතීතය මතක තියෙන ජනතාවගෙන් අපි අහනවා.

හැබැයි එක දෙයක්, එදා ගෝඨාභයගේ ආණ්ඩුවට විරුද්ධව නීතිය ඇතුළේ ඉඳන්, ව්‍යවස්ථාව ඇතුළේ ඉඳන් සටන් කරලා සජිත් දිනාදීපු දේවල් කර තියාගෙන ගිහින් බලය ගත්තේ අහක හිටපු අනුර.

අදත් ඒකම වෙයිද කියලා අපිට සැකයක් නැතුවාම නෙමෙයි, මේ ආණ්ඩුවේ ගල්අඟුරු වංචාව හෙළිකරද්දී මීක් නැතුව හිටපු සමහරු අද එළියට බැහැලා එයාලා වංචාව හෙළි කලා වගේ කෑ මොර දෙනවා. ඒත් ඇත්තටම රජයේ නිළධාරීන් ගෙනල්ල, එකින් එක ප්‍රශ්ණ කරලා, ගල්අඟුරු බාලයි, මේකේ වංචාව සිද්ධ වෙලා කියලා තහවුරු කරගත්තේ සජිත් ඇතුළු සජබය කියන එක හරිම පැහැදිලීයි.

ඒ වගේම තමයි බහාලුම් 323 හොරකමත්, මහාභාණ්ඩාගාරයේ ඩොලර් හොරකමත් කරුණු සහිතව ඔප්පු කරමින් මාලිමා ආණ්ඩුව බිත්තිය මුල්ලටම හේත්තු කරලා තියෙන්නෙත් සජිත් ප්‍රමුඛ සමගි ජන බලවේගයම තමයි.

එහෙම කරපු විපක්ෂ නායක සජිත්ට තමයි කොන්දක් නෑ කියලා මෙයාලා මඩක් ගහන්නේ… ඒක මඩක් නෙමෙයි කැම්පේන් එකක්. අපිට මතකයි 2005 රනිල්ට විරුද්ධව ගෙනාවා කැම්පේන් එකක් ‘රනිල්ට බෑ’ කියලා. අද සජිත්ට වැරුද්දවත් වෙන විදිහකට මෙයාලා ගෙන්නේ ඒකමයි, ‘ සජිත්ට බෑ’.

ඇත්තටම සජිත්ට බැරිද? අපි ඒකත් මේ ගමන්ම බලමු ද?

රටේ රාළ ගේ මුහුණු පොතෙන්ම කොටසක් උපුටලා අරන් මේ ගැන කතා කරමු

උපුටා ගැනීම :

“ විපක්ෂ නායක සජිත්ගේ ලොකුම දේශපාලන දුර්වලතාවය විදිහට රටේ රාළ දකින්නේ රටේ තියන කේන්ද්‍රීය ප්‍රශ්න (Core Issues) වෙනුවට,පරිධියේ ඈත කෙළවරේ ඇති ද්විතීයික කාරණා (Peripheral Issues) තමන්ගේ ප්‍රධාන දේශපාලන සටන් පාඨ කරගැනීමයි.ඇත්තටම සජිත්ට දේශපාලනය ප්‍රමුඛතා හඳුනාගැනීමේ නොහැකියාවක් තියනවා.රටේ මැක්‍රෝ - ආර්ථික බිඳවැටීම, ණය ප්‍රතිව්‍යුහගතකරණය,උද්ධමනය,බදු බර වගේම උත්රීතර ආයතනවල ව්‍යවස්ථාපිත අර්බුද පවතින මොහොතක, විපක්ෂ නායකයෙකු සැබෑ විකල්ප ප්‍රතිපත්තිමය විසඳුමත් එක්ක සටනේ පෙරමුණේ ඉන්න ඕනි.”

මේක ඇත්ත ආර්ථිකය සහ ව්‍යවස්ථාපිත ආයතනවල දැන් අර්බුදයක් ගොඩනැගෙමින් තියෙනවා. ඉතිං සජිත් කතා කරන්නෙත් මේ ගැනම තමයි. සජිත් හැම අවස්ථාවකම පෙනී ඉන්නේ දේශපාලන අවශ්‍යතාවයට ( Political Interest ) වඩා ජාතික අවශ්‍යතාවය ( National Interest ) ටයි.

රටක ආර්ථිකයක් ගොඩනගද්දී පිස්කල් පොලිසි එකයි, මොනිටරි පොලිසි එකයි ඉතාම වැදගත්. ඒ වගේම තමයි ලෝ ඇන්ඩ් ඕඩර් සහ ඉන්ඩස්ට්‍රියෙල් ජොබ් ක්‍රියේට් කරන එක. ඉතිං සජිත් හැම වෙලාවෙම කතා කරන්නේ, පෙනී ඉන්නේ මේ දේවල් ධනාත්මකව ඉහළ දාන්නේ කොහොමද කියන කාරණයත් එක්ක.

මේක තමයි National Interest එක. ඒකයි සජිත් කියන්නේ Political Interest එකට වඩා National Interest එක ගව් ගණනක් උඩින් තියෙන්න ඕන කියලා.

සජිත්ට ඕන GDP එකට සාපේක්ෂව රටේ රාජ්‍ය ආදායම වැඩි කරන්න. සජිත්ට ඕන ලක්ෂ 10 අලුත් තරුණ ව්‍යවසායකයින් බිහි කරන්න. සජිත්ට ඕන, නව කර්මාන්ත ලියාපදිංචිය සරල කරන්න One-Stop Shop ගෙනල්ලා ආයෝජකයින්ට එකම තැනකින් සේවාව ලබාදීලා Traffic එක අඩුකරන්න.

අපි උගුරට හොරා බෙහෙත් බොන්න ඕන නෑ, ශ්‍රී ලංකාව කියන්නේ තනිව දෙපයින් නැගී ඉන්න බැරි රටක්, මැතිවරණ වේදිකාවල මිනිස්සු චූන් කරන්න කවුරු මොන සුරංගනා කථා කිව්වත්, තිත්ත ඇත්ත ඒක තමයි.

දැන් කල්පනා කරලා බලන්න 1965 ඉඳන් ජවිපේ මේ රටේ ඉන්දීය ව්‍යාප්තවාදයක් ගැන කථා කළා, පසු කාලීනව අනුර ඒක හැඳින්නුවේ හොර ගිවිසුම් ගහනවා කියලා, ඒත් අනුර පත්වෙලා ඉන්දියාව එක්ක ගිවිසුම් 7ක් අත්සන් කළා අද වෙනකම් කවුරුත් ඒවා මොනවද? ඒවා නිසා අපේ රටට වෙන්නේ මොනවද කියලා දන්නෙත් නෑ. ඉතිං ඔන්න සජිත්ට Political Interest එක අංක එක කරගෙන පාරවල් වහලා, බස් පුච්චලා, ඉන්දියන් විරෝධයක් හදන්න පුළුවන්, ඒත් අසරණ වෙන්නේ කවුද? මේ රටේ අහිංසක මිනිස්සුමයි.

ඔය ගිවිසුම් බලයට පත්වෙන පාලකයෝ නිසා වෙනස් වෙන්නේ නෑ, ඒවා වෙනස් වෙන්නේ National Policy එකත් එක්ක. ඒක නිසා බොරු බිල්ලෝ මවලා අරගන්න බලය තාවකාලිකයි, අනුරගේ ආණ්ඩුවට උනෙත් ඒක, ගෝඨාභයගේ ආණ්ඩුවට උනෙත් ඒක. සජිත් මේ කතාව හොඳටම දන්නවා. සජිත් කළබල නැත්තේ ඒකයි. මේ රටේ මිනිස්සු ඉස්සරහදී තෝරන්නේ බොරු සටන් පාඨ කරුවෝ නෙමෙයි. මේ රටේ මිනිස්සු හොයන්නේ, කරන්න යන දේ හරියට කියන, කියන දේ හරියට කරන මිනිහා කවුද කියලා. මිනිස්සු බලන්ගේ එයාගේ Political Interest එක මොකක්ද කියන එක නෙමෙයි, එයාගේ National Interest එක මොකක්ද කියලා.

එතකදී, ඔය කතා කරන කාටත් වඩා සජිත් ඉස්සරහින් ඉන්නවා කියන එක මේ රටේ මිනිස්සු දැන් දන්නවා.

රටේ රාළගේ කතාවෙන් උපුටා ගන්න අන්තිම කෑල්ල,

උපුටා ගැනීම :

“නායකයෙක් සමාජය ඇතුළේ හාස්‍යයට ලක්වූනාට පස්සේ එයා කෙරෙහි ඇති මහජන විශ්වාසනීයත්වය (Credibility) මුළුමනින්ම බිඳ වැටෙනවා. සජිත්ට අනුර දිහා බලලාවත් මේ යථාර්ථය තේරුම් ගන්න බැරි ඇයි?”

රටේ රාළත් හොඳටම දන්නවා මම මේ සටහන මැදදි කිව්ව එක කාරණයක්, ඒ තමයි රනිල්ට බෑ කිව්ව අයමයි දැන් සජිත්ට බෑ කියලා කියන්නෙත්…

ඉතිං රටේ රාළලා ඇතුළු මේ රටට ආදරේ කරන අයට කරන්න තියෙන්නේ සජිත්ට බෑ කියන Negative Campaign එක කර තියාගෙන යන එකද? නැත්නම් සජිත්ට තමයි පුළුවන් කියලා Positive Campaign එකක් Create කරන එකද?

තීරණය රටේ රාළ ඇතුළු රටට ආදරේ කරනවා කියන ඔබට බාරයි…!

ආ… අන්තිමටම සජිත්ගේ අඩුපාඩුවකුත් කියලම කතාව ඉවර කරන්නම්, රටේ රාළ කියලා තිබුණා

උපුටා ගැනීම : “ විපක්ෂ නායක සජිත්ගේ ලොකුම දේශපාලන දුර්වලතාවය විදිහට රටේ රාළ දකින්නේ රටේ තියන කේන්ද්‍රීය ප්‍රශ්න (Core Issues) වෙනුවට,පරිධියේ ඈත කෙළවරේ ඇති ද්විතීයික කාරණා (Peripheral Issues) තමන්ගේ ප්‍රධාන දේශපාලන සටන් පාඨ කරගැනීමයි.” කියලා.

ඒක අර්ධ සත්‍යයක්, ඇයි මම 50% ට 50% තියලා ඒක කියන්නේ, සජිත්ගේ තියෙන ආමන්ත්‍රණය කිරීමේ දුර්වලතාවයක් මමත් දකිනවා. සජිත් ඕනම කාරණයක් සරලව විස්තර කරන්න යාම තමයි ප්‍රශ්ණය. එයා හිතනවා ගමේ මනුස්සයත්, නගරයේ මනුස්සයත්, ඉහළ අධ්‍යාපනයක් ලබපු කෙනාත්, පහළ අධ්‍යාපනයක් ලබපු කෙනාත්, එයාගේ කතාව සරලව තේරුම් ගත යුතුයි කියලා.

ඔන්න ඔතනදී තමයි ගැටුම එන්නේ. සජිත් ඕනම කාරණයක කේන්ද්‍රය ඉලක්ක කරන්න ඉස්සෙල්ලා පරිධියේ කාරණා ටිකත් විස්තර කරන්න යන එක බොහෝ අයට දිරවන්නේ නෑ. මොකද එයාලා මේ ප්‍රශ්ණයේ පරිධියත්, කේන්ද්‍රයත් මොකක්ද කියලා දන්නවා. ඒත් සජිත්ට ඕන රටේ හැමෝටම ඒ ප්‍රශ්ණය පැහැදිලි කරන්න. ඔන්න ඕක තමයි සජිත්ගේ තියෙන ලොකුම සහ එකම දුර්වලතාවය.

ඉතිං ගොඩක් අයට සජිත්ව දිරවන්නේ නැත්තේ ඔන්න ඕක නිසා. නැත්නම් සජිත් පසුගිය අවුරුදු 7 ඇතුළේ කියපු හැමදේම අද සත්‍ය වෙලා ඉවරයි.

පෑඩ් කථා, කොරෝනා කථා, IMF යන්න කියපු කථා, රට බංකොලොත් වෙනවා කියූ කථා, ඇමරිකන් ටැරීෆ් කථා, දිත්වා වන්දි කථා, බාල ගල්අඟුරු කථා, කන්ටේනර් 323ක් පන්නපු කථා… සජිත් පහුගිය දවසේ කිව්වා ආයෙත් IMF එකත් එක්ක, අනුප්‍රාප්තික වැඩසටහනකට යන්න කියලා, ඔබට මතක ඇති. අනේ Please ඔයාගේ උපදෙස් එපා කියන අනුර ජනාධිපතිවරයා හොරෙන්ම ඕක කරන්නේ නැද්ද කියලා බලන්න කියලා අපි මේ රටේ මිලියන 22ට ආරාධනා කරනවා.

ඕක තමයි ඇත්ත. Sajith, is a futuristic leader.

සටහන - NJ

අද (21) විදියේ $ වටිනාකම රුපියල් 369.00