Mawbima.lk

වැඩි විස්තර- https://youtu.be/WCsciXBnYWA

ඉන්දියාවේ, දිල්ලි අගනුවර පිහිටි හෝටලයක ඇති වූ ගින්නකින් විදේශ ජාතිකයින් ඇතුළුව අවම වශයෙන් පුද්ගලයින් 21 දෙනෙකු ජීවිතක්ෂයට පත්වී තිබේ.

විදෙස් මාධ්‍ය වාර්තා කර ඇත්තේ, පුද්ගලයන් 40 දෙනෙකු පමණ තුවාල ලබා රෝහල්ගත කර ඇති බව ය.

ගිනි නිවන භටයින් ගින්න පාලනය කර ඇති අතර ගලවා ගැනීමේ මෙහෙයුම් තවමත් අඛණ්ඩව සිදුවෙමින් පවතින බව විදෙස් මාධ්‍ය වාර්තා කර තිබේ.

මෙම හෝටලයේ දෙවන සහ තෙවන මහල්වල සිටි ඇතැම් පුද්ගලයන් තම ජීවිත බේරා ගැනීම සඳහා ගිනිගන්නා ගොඩනැගිල්ලෙන් පහළට පැන ඇති බව විදෙස් මාධ්‍ය වාර්තා කරයි.

එම මාධ්‍ය පවසන්නේ, වෛද්‍ය ප්‍රතිකාර සඳහා දිල්ලි වෙත පැමිණි දකුණු ආසියානු රටවල විදේශිකයන් මෙලෙස ජීවිතක්ෂයට පත්වී ඇති බව ය.

කොළඹ රිමාන්ඩ් බන්ධනාගාරයේ සිට අලුත් කඩේ මහේස්ත්‍රාත් අධිකරණය වෙත ඉදිරිපත් කළ සැකකරුවෙකුට පැනයාමට සැලසුම් සකස් කළ බව කියන එම සැකකරුගේ බිරිය හා සැකකරු රැගෙන යාමට අධිකරණය ඉදිරිපිටට පැමිණි මෝටර් රථයේ රියදුරු ජුනි මස 6 දින දක්වා රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් අසංග එස්. බෝදරගම අද (ජුනි 3) නියෝග කළේ ය.

සැකකරුගේ බිරිය වන තක්ෂිලා තුෂාණි හා මෝටර් රථයේ රියදුරු වන මොහොමඩ් රිෆාන් මොහොමඩ් රියාද් නැමැති සැකකරුවන් දෙදෙනෙකු එසේ රක්ෂිත බන්ධනාගාරගත කෙරුණි.

මෙම සිද්ධියේ ප්‍රධාන සැකකාරිය වන තක්ෂිලා තුෂානි නමැත්තියගේ සැමියා වන දිල්ශාන් නිමේෂ් නමැත්තා අයිස් මත්ද්‍රව්‍ය ග්‍රෑම් තුනකට අධික ප්‍රමාණයක් සන්තකයේ තබා ගැනීමේ සිද්ධිය සම්බන්ධයෙන් කොළඹ රිමාණ්ඩ් බන්ධනාගාරයේ රඳවා සිට ඇති බව ද සිද්ධිය සම්බන්ධයෙන් කරුණු දක්වමින් කෙසෙල්වත්ත පොලිසිය අධිකරණයට දැන්වීය.

බන්ධනාගාර නිලධාරීන් විසින් එම සැකකරු ඉකුත් 15 දින අලුත්කඩේ මහේස්ත්‍රාත් අධිකරණය වෙත ඉදිරිපත් කිරීමට රැගෙන පැමිණි අවස්ථාවේදී ඔහුගේ බිරිය වන තක්ෂිලා නැමැත්තියගේ සැලසුමකට අනුව අධිකරණය ඉදිරිපිටදී ම ඔහුව මෝටර් රථයක දමාගෙන රැගෙන යාමට කටයුතු කර ඇති බව ද පොලිසිය පැවසීය.

මෙම සිද්ධියේ දෙවන සැකකරු වන මෝටර් රථයේ රියදුරු විසින් සැකකරුව රැගෙන යන අතරතුරදී බන්ධනාගාර නිලධාරීන් විසින් පළා ගිය පුද්ගලයා මෙන්ම ඔහුගේ බිරිය හා රියදුරු ද අත්අඩංගුවට ගෙන ඇති බව පොලිසිය අධිකරණයට දැන්වීය.

බන්ධනාගාර නිලධාරින් විසින් සිද්ධිය සම්බන්ධයෙන් කෙසෙල්වත්ත පොලීසිය දැනුවත් කර ඇති බවත් ඒ අනුව පොලිසිය බන්ධනාගාරගත කර සිටි සැකකරුගෙන් සිදුකළ ප්‍රශ්න කිරීම්වලදී ඔහුගේ බිරිය විසින් ඔහුට පළායාමේ සැලසුම සකස් කර ඇති බව ඔහු ප්‍රකාශයක් ලබා දෙමින් පවසා ඇති බව ද පොලිසිය අධිකරණය හමුවේ පැවසීය.

කොළඹ රිමාන්ඩ් බන්ධනාගාරයේ රඳවා සිටිි සැකකරු සූම් තාක්ෂණය ඔස්සේ අධිකරණය වෙත ඉදිරිපත් කරන ලෙසට කොළඹ අංක දෙක මහේස්ත්‍රාත් අධිකරණය නියෝගයක් ලබා දී තිබියදී බන්ධනාගාර නිලධාරීන් විසින් ඉකුත් 15 දින ඔහුව එම අධිකරණය වෙත ඉදිරිපත් කිරීමට රැගෙන ඒම සම්බන්ධයෙන් පූර්ණ විමර්ශනයක් සිදුකර අධිකරණයට වාර්තාවක් ඉදිරිපත් කරන ලෙස ද ප්‍රධාන මහේස්ත්‍රාත්වරයා කෙසෙල්වත්ත පොලිසියට නියෝග කළේ ය.

කෙසෙල්වත්ත පොලිසියේ 74907 අබේසිංහ හා 99090 මධුශාන් යන කොස්තාපල්වරුන් දෙදෙනා සිද්ධිය සම්බන්ධයෙන් අධිකරණයට කරුණු දැක්විය.

හෙට (4) දිනයේදී බස්නාහිර සහ සබරගමුව පළාත්වලත්, ගාල්ල, මාතර, මහනුවර සහ නුවරඑළිය දිස්ත්‍රික්කවලත් ඇතැම් ස්ථානවලට මි.මී 100 ක පමණ තද වැසි ඇති විය හැකි බව කාලගුණ විද්‍යා දෙපාර්තමේන්තුව සඳහන් කර

ශ්‍රී ලංකාව ඇතුළු රටවල් 60කින් ආනයනය කරන භාණ්ඩ සඳහා සියයට 10 සිට සියයට 12.5 දක්වා අතිරේක ආනයන බදු පැනවීමට අමෙරිකානු පරිපාලනය යෝජනා කර ඇත.

බලහත්කාර ශ්‍රමය භාවිතයෙන් නිෂ්පාදිත භාණ්ඩ ආනයනය වැළැක්වීම සඳහා ප්‍රමාණවත් ක්‍රියාමාර්ග නොගැනීම සහ ඒ හේතුවෙන් අමෙරිකානු වෙළෙඳ කටයුතුවලට අසාධාරණ බලපෑම් එල්ල වන බව පෙන්වා දෙමින් මෙම යෝජනාව ඉදිරිපත් කර ඇති බව විදෙස් මාධ්‍ය වාර්තා කරයි.

කැනඩාව, මෙක්සිකෝව, පකිස්තානය, බංග්ලාදේශය, මැලේසියාව ඇතුළු රටවල් කිහිපයකින් ආනයනය කරන භාණ්ඩ සඳහා සියයට 10ක අතිරේක බද්දක් පැනවීමට යෝජනා කර තිබේ. එමෙන්ම ශ්‍රී ලංකාව ඇතුළු තවත් රටවල් 45ක් සඳහා සියයට 12.5ක අතිරේක බද්දක් පැනවීමට යෝජනා කර ඇත.

ශ්‍රී ලංකාව බලහත්කාර ශ්‍රමයෙන් නිෂ්පාදිත භාණ්ඩ ආනයනය තහනම් කිරීම සහ එම නීති ඵලදායී ලෙස ක්‍රියාත්මක කිරීම සම්බන්ධයෙන් ප්‍රමාණවත් පියවර ගෙන නොමැති බව විමර්ශනයකදී අනාවරණය වූ බව අමෙරිකානු වෙළෙඳ නියෝජිත කාර්යාලය පවසයි.

ඇඟලුම් සහ රෙදිපිළි ආනයනය සඳහා අඩු බදු අනුපාත යටතේ යම් ප්‍රමාණයක් අමෙරිකානු වෙළෙඳපොළට ඇතුළත් කිරීමට ඉඩ සලසන විශේෂ යාන්ත්‍රණයක් ද යෝජනා කර තිබේ. ඒ සම්බන්ධ වැඩිදුර තොරතුරු මෙතෙක් ප්‍රකාශයට පත් කර නොමැත.

මෙම යෝජනා සම්බන්ධයෙන් මහජන අදහස් ජූලි 6 වැනිදා දක්වා භාරගන්නා අතර, ජූලි 7 වැනිදා ඒ පිළිබඳ මහජන විභාගයක් පැවැත්වීමට නියමිත ය.

අද (3) උදෑසන කිරිඇල්ල මාටුවාගල මුදුන්කොටුව ප්‍රදේශයේ වෙඩි තැබීමක් සිදුව තිබේ.

දෙපාර්ශවයක් අතර ඇති වූ ගැටුමකදී එක් පාර්ශවයක පුද්ගලයෙකු විසින් අහසට වෙඩි තබා ඇති බව පොලීසිය සඳහන් කළේ ය. පිස්තෝල වර්ගයේ රිවෝල්වරයකින් අදාළ වෙඩි තැබීම සිදුකර ඇති අතර ඉන් කිසිවෙකුටත් හානියක් සිදුව නොමැත.

දෙපාර්ශවය අතර සිදු වූ ගැටුම හේතුවෙන් එක් පුද්ගලයෙකු තුවාල ලබා රත්නපුර රෝහල වෙත ඇතුළත් කර ඇති අතර සිද්ධියට අදාළව වෙඩි තැබීම සිදුකළ රිවෝල්වරය සහ සැකකරු කිරිඇල්ල පොලීසිය විසින් අත්අඩංගුවට ගෙන තිබේ.

තවත් සැකකරුවෙකු සොයා විමර්ශන ආරම්භ කර ඇති බව වාර්තා වේ. අත්අඩංගුවට ගත් සැකකරු රත්නපුර මහේස්ත්‍රාත් අධිකරණයට ඉදිරිපත් කිරීමට නියමිත ය.

අපරාධ පරීක්ෂණ දෙපාර්තමේන්තුව විසින් ත්‍රස්තවාදය වැළැක්වීමේ පනත යටතේ රඳවා ප්‍රශ්න කරන විශ්‍රාමික මේජර් ජෙනරාල් තුවාන් සුරේෂ් සලේ සියදිවි නසා ගැනීමේ ප්‍රවණතාවයක් තිබෙන බව මෝසමක් ගොනු කරමින් ඔහු වෙනුවෙන් අධිකරණයේ පෙනි සිටි ජනාධිපති නීතිඥ ශාවේන්ද්‍ර ප්‍රනාන්දු අද (ජුනි 3) කොටුව මහේස්ත්‍රාත් පසන් අමරසේන හමුවේ දැන්වූයේ ය.

සිද්ධියට අදාළ මෝසමක් ගොනු කරමින් ජනාධිපති නීතිඥවරයා සඳහන් කර සිටියේ, අධිකරණ වෛද්‍ය වාර්තා අනුව විශාදය, සංකාව, පශ්චාත් කම්පන ආතතිය අක්‍රමිකතාවය යන තත්ත්වයෙන් තම සේවාදායකයා පෙළෙන බැවින් සියදිවි නසාගැනීමේ අවදානමක් තිබෙන බව ය.

තව ද, ජනාධිපති නීතිඥවරයා සඳහන් කර සිටියේ, රැදවුම් නියෝග මත සිටින තම සේවාදායකයා මානසික ප්‍රතිකාරවලට සුදුසු පරිසරයක තබන ලෙසට අධිකරණයෙන් ඉල්ලා සිටියේ ය.

එම අවස්ථාවේදී මෙම හදිසි තත්ත්වයක් ලෙස සලකා බලා මහේස්ත්‍රාත්වරයා හෙට පස්වරු 2:00ට නඩුව කැඳවීමට නියෝග කළා.

මෙම නඩුවේ පැමිණිලිකාර පාර්ශ්වයට නොතිසි ද නිකුත් කළේ ය.

ඉරාන ඩ්‍රෝන ප්‍රහාරයක් කුවේට් ජාත්‍යන්තර ගුවන්තොටුපළට එල්ල වූ බවට වාර්තා වීමෙන් පසු කුවේටය වාණිජ ගුවන් ගමන් අත්හිටුවා තිබේ.

කුවේට් රාජ්‍යයට එල්ල වූ මිසයිල සහ ඩ්‍රෝන ප්‍රහාරවලින් එරට ජාත්‍යන්තර ගුවන්තොටුපළේ පර්යන්තයකට සැලකිය යුතු ලෙස හානි සිදුව ඇත. ඒ හේතුවෙන් ගුවන් ගමන් තාවකාලිකව අත්හිටුවන බව කුවේට් හි සිවිල් ගුවන් සේවා අධිකාරියෙන් නිවේදනයක් නිකුත් කර තිබේ. නැවත දැනුම් දෙන තුරු ගුවන් යානා විකල්ප ගුවන්තොටුපළවල් වෙත හරවා යවා ඇති බව විදෙස් මාධ්‍ය වාර්තා කරයි.

ශ්‍රී ලංකාව සහ ඔස්ට්‍රේලියාව අතර අගෝස්තු මස සිට ඍජු ගුවන්ගමන් ආරම්භ කිරීමට එරට රජය බලාපොරොත්තු වන බව විදේශ කටයුතු අමාත්‍ය විජිත හේරත් පවසයි.

සිය ඔස්ට්‍රේලියානු සහ නවසීලන්ත නිල සංචාරය අවසන් කරමින් කැන්බරා නුවර පිහිටි ශ්‍රී ලංකා මහ කොමසාරිස් කාර්යාලයේදී අමාත්‍යවරයා මේ බව සඳහන් කළේ ය.

එසේ ම, ලොව විශාලතම නිදහස් වෙළඳ ගිවිසුම වන RCEP (Regional Comprehensive Economic Partnership) සංවිධානයේ සාමාජිකත්වය ලබා ගැනීම සඳහා ශ්‍රී ලංකාව රාජ්‍යතාන්ත්‍රික පියවර සාර්ථකව ගෙන ඇති බව ද හෙතෙම පෙන්වා දුන්නේ ය.

මෙම සංචාරය අතරතුර සුවිශේෂී ප්‍රගතියක් අත්කර ගනිමින්, RCEP සංවිධානයේ ප්‍රධාන සාමාජිකයන් වන ඔස්ට්‍රේලියාව සහ නවසීලන්තය, ශ්‍රී ලංකාවට එහි සාමාජිකත්වය ලබා ගැනීම සඳහා පූර්ණ සහයෝගය ලබා දීමට එකඟතාව පළ කර ඇති බව ද අමාත්‍යවරයා සඳහන් කළේ ය.

ගෝලීය ජනගහනය මෙන් ම ආර්ථික නිපැයුම් සඳහා ලොව විශාලතම නිදහස් වෙළඳ ගිවිසුම ලෙස සැලකෙන RCEP ආසියානු පැසිපික් කලාපයේ ආර්ථික සහයෝගීතාවය ඉහළ නැංවීම සඳහා රටවල් 15ක සහභාගීත්වයෙන් පිහිටුවා ඇත.

මෙයට බෲනායි, කාම්බෝජය, ඉන්දුනීසියාව, ලාඕසය, මලයාසියාව, මියන්මාරය, පිලිපීනය, සිංගප්පූරුව, තායිලන්තය සහ වියට්නාමය යන ආසියාන් (ASEAN) කලාපීය සාමාජික රටවල් 10 මෙන්ම ඔස්ට්‍රේලියාව, නවසීලන්තය, ජපානය, චීනය සහ දකුණු කොරියාව යන සෙසු ප්‍රධාන ආර්ථික බලවතුන් ද ඇතුළත් වේ.