iTM Computer

សូមមិត្តទាំងអស់គ្នាមើលអត្តបទមួយនេះបន្តិចទៅមើរ ព្រោះខ្ញុំយល់ថាវាមាន ប្រយោជន៍ និង ល្អ ដល់យើងទាំងអស់គ្នា។
សូមអរគុណ។

គន្លឹះជោគជ័យទាំង១០របស់មហាសេដ្ឋី Warren Buffet

លោក Warren Buffet គឺជាមហាសេដ្ឋីដ៏ល្បីឈ្មោះម្នាក់ ក្នុងចំណោមមហាសេដ្ឋីល្បីៗក្នុងពិភពលោក។ ខាងក្រោមនេះគឺជាគន្លឹះនៃការជំរុញទឹកចិត្ត ដែលលោកបានចែករំលែក។
សូមសិក្សាអំពីចំណុចទាំងនេះដូចតទៅ៖

១. វិនិយោគលើខ្លួនអ្នកមុនអ្នកដទៃ

ការវិនិយោគក្នុងកិច្ចការទាំងឡាយគឺជារឿងសំខាន់ណាស់ ព្រោះវានឹងនាំមកនូវទ្រព្យសម្បត្តិ និងសេចក្ដីសុខដល់អ្នក ប៉ុន្តែវាមិនប្រសើរជាងការដែលអ្នកវិនិយោគលើខ្លួនអ្នកឡើយ។ ការផ្ដល់ឱកាសគ្រប់គ្រាន់សម្រាប់រៀនសូត្រគឺជាការវិនិយោគលើខ្លួនអ្នក ហើយវានឹងធ្វើឱ្យលោកអ្នករីកចម្រើនបានជារៀងរហូត។

២. លុបទម្លាប់អាក្រក់របស់អ្នកជាមុន

មនុស្សខ្លះចំណាយច្រើនជាងអ្វីដែលគេរកបាន នេះហើយគឺជាទម្លាប់មិនល្អសោះសម្រាប់លោក អ្នក ព្រោះវានឹងធ្វើឱ្យអ្នកជំពាក់បំណុលគេយ៉ាងធ្ងន់ធ្ងរ។ ដូច្នេះលោកអ្នកត្រូវតែស្វែងយល់ពីទម្លាប់មិនល្អរបស់ខ្លួន ហើយព្យាយាមកែលម្អ។

៣. ស្វែងរកអ្នកផ្ដល់ប្រឹក្សា

ស្វែងរកមនុស្សម្នាក់ដែលអ្នកគោរព និងកោតសរសើរ ដើម្បីស្នើសុំការប្រឹក្សាយោបល់ចំពោះ បញ្ហាទាំងឡាយក្នុងជីវិតរបស់អ្នក នោះអ្នកនឹងទទួលបានជំនួយមួយយ៉ាងល្អ។

៤. ដឹងអំពីចំណុចខ្លាំងរបស់អ្នក

អ្នកមិនចាំបាច់ក្លាយទៅជាអ្នកជំនាញលើផ្នែកអ្វីមួយឡើយ ប៉ុន្តែការដឹងថាអ្វីដែលអ្នកចេះ និងអ្វីដែលអ្នកមិនចេះនោះគឺជារឿងសំខាន់ណាស់។

៥. ធ្វើអ្វីដែលអ្នកស្រឡាញ់

ការចំណាយពេលវេលារបស់អ្នកក្នុងភាពមិនច្បាស់លាស់ គឺជាខាតពេលវេលា ដូច្នេះសូមលោកអ្នកធ្វើការងារណាដែលអ្នកស្រឡាញ់ ជាជាងធ្វើការដើម្បីរកលុយបានច្រើន ប៉ុន្តែមិនទទួលបានសុភមង្គលក្នុងជីវិត។

៦. កុំបោះបង់របស់ដែលសំខាន់ទៅចាប់យករបស់ដែលមិនសំខាន់

រឿងសំខាន់ច្រើនណាស់ដែលត្រូវបានគេយល់ច្រលំជារឿងមិនសំខាន់ ឯរឿងមិនសំខាន់ក៏ត្រូវបានគេច្រលំថាជារឿងសំខាន់ផងដែរ។ ដូច្នេះសូមលោកអ្នកប្រើសមត្ថភាពនៃការថ្លឹងថ្លែងរបស់អ្នកដើម្បីបែងចែកថា តើអ្វីទៅជារឿងសំខាន់ និងរឿងមិនសំខាន់ ចៀសវាងបោះបង់ការងារដែលសំខាន់ ស្រវាចាប់ការងារដែលបន្ទាប់បន្សំទៅវិញ។

៧. កុំឱ្យឱកាសល្អកន្លងផុត

ពេលខ្លះឱកាសល្អមានតែម្ដងប៉ុណ្ណោះក្នុងមួយជីវិតរបស់អ្នក។ ដូច្នេះសូមកុំឱ្យពេលវេលាដ៏ល្អ នោះកន្លងផុតទៅដោយមិនមានការខិតខំប្រឹងប្រែងរបស់អ្នកឱ្យសោះ។

៨. គ្រប់គ្រងពេលវេលា

គេតែងតែនិយាយថាពេលវេលាគឺជាទ្រព្យសម្បត្តិដ៏មានតម្លៃបំផុត។ ហើយបើសិនជាលោកអ្នកបានដឹងពីរឿងនេះ លោកអ្នកនឹងចាប់ផ្ដើមការពារពេលវេលារបស់លោកអ្នកជាមិនខាន។ ជំនាញដ៏ល្អមួយដែលលោកអ្នកត្រូវចាប់ផ្ដើមធ្វើនោះគឺ ការគ្រប់គ្រងពេលវេលាឱ្យបានល្អប្រសើរ។

៩. ចៀសវាងការប្រើប្រាស់ Credit Card

សូមអ្នករៀនប្រើប្រាស់ក្រដាសប្រាក់ ជាជាងការប្រើប្រាស់ Credit Card ព្រោះវាជារបៀបនៃការគ្រប់គ្រងលុយកាក់ដ៏ល្អរបស់វា។

១០. សូមមានចិត្តសប្បុរស

ចិត្តសប្បុរសគឺជាសិល្បៈដ៏ល្អនៃការរស់នៅក្នុងសង្គម។ បើសិនជាលោកអ្នកចេះចែករំលែកសេចក្ដីសុខដល់អ្នកដទៃនៅក្នុងសង្គម សង្គមរបស់លោកអ្នកនឹងផ្ដល់ភាពកក់ក្ដៅដល់អ្នកវិញជាមិនខាន។

ប្រែសម្រួលដោយ៖ ប៊ុន លាភ
ប្រភព www.cool1007.com/article/1277