Sethakech News

ទឹកភ្នែកម្ចាស់ចម្ការនៅស្វាយរៀង! ខំសន្សំលុយទាំងលំបាកយកទៅដាំកៅស៊ូមិនទាន់បានផលផង ត្រូវភ្លើងឆេះហិនហោច សង្ស័យមានគេលួចដុត👈

ខេត្តស្វាយរៀង​ ៖​ ទឹកប្រាក់ដែលខំសន្សំទាំងលំបាកលំបិន ដើម្បីយកមកវិនិយោគលើវិស័យកសិកម្ម ត្រូវរលាយសាបសូន្យត្រឹមមួយប៉ព្រិចភ្នែក។ ដើមកៅស៊ូសាកល្បងដាំរាប់រយដើម នៅក្នុងដីចម្ការមួយកន្លែង ស្ថិតក្នុងខេត្តស្វាយរៀង ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្តាលឱ្យខូចខាតស្ទើរទាំងស្រុង ខណៈម្ចាស់ចម្ការដាក់ការសង្ស័យខ្ពស់ថា ជាករណីមានជនខិលខូចលួចដុតបំផ្លាញដោយចេតនា។
ហេតុការណ៍ដ៏គួរឱ្យសោកស្តាយនេះ បានកើតឡើងកាលពីរសៀលថ្ងៃទី២៨ ខែឧសភា ឆ្នាំ២០២៦ ស្ថិតនៅចំណុចភូមិម្រាក់ទាប ឃុំត្រស់ ស្រុករមាសហែក ខេត្តស្វាយរៀង។
បើតាមការរៀបរាប់ទាំងក្តុកក្តួលពីម្ចាស់ដីចម្ការរងគ្រោះ បានឱ្យដឹងថា លោកមានដីចម្ការមួយកន្លែងដែលមានផ្ទៃដីសរុបជាង១ ហិកតា។ ដោយសារចង់សាកល្បងរកចំណូលលើវិស័យកសិកម្ម លោកបានសម្រេចចិត្តបោះទុនទិញកូនកៅស៊ូចំនួនជាង២,០០០ ដើម យកមកដាំដុះសាកល្បងនៅលើទឹកដីខេត្តស្វាយរៀងនេះ។
ចាប់តាំងពីថ្ងៃដាំដុះមក លោកនិងក្រុមគ្រួសារ តែងតែយកចិត្តទុកដាក់មើលថែទាំ ជ្រំដី ដាក់ជី និងស្រោចទឹកជាប្រចាំ ដោយនៅក្នុងនោះ លោកបានពឹងពាក់ប្អូនប្រុសរបស់លោកឱ្យស្នាក់នៅប្រចាំការ និងជួយមើលថែទាំចម្ការនោះផ្ទាល់តែម្តង។ លុះមកដល់ថ្ងៃកើតហេតុ អ្វីៗដែលធ្លាប់តែរំពឹងទុក ក៏ត្រូវរលាយបាត់បង់ បន្ទាប់ពីភ្លើងបានលេបត្របាក់ដើមកៅស៊ូអស់រាប់រយដើម។
ជុំវិញមូលហេតុនៃគ្រោះអគ្គិភ័យនេះ ម្ចាស់ចម្ការបានដាក់ការសង្ស័យយ៉ាងខ្លាំងថា មិនមែនជាគ្រោះថ្នាក់ដែលកើតឡើងដោយឯកឯង ឬជាការឆេះព្រៃធម្មតានោះឡើយ។ លោកបានទម្លាយឱ្យដឹងពីតម្រុយខ្លះៗថា នៅមុនពេលកើតហេតុបន្តិច គេបានឃើញបុរសមិនស្គាល់អត្តសញ្ញាណម្នាក់ បានមកដើរក្រឡឹង និងឈរនៅក្បែរទីតាំងដីចម្ការរបស់លោកក្នុងទម្រង់គួរឱ្យសង្ស័យ។
លុះឈានចូលមកដល់វេលារសៀលថ្ងៃដដែល ក៏ស្រាប់តែមានអណ្តាតភ្លើងចាប់ផ្តើមឆាបឆេះយ៉ាងសន្ធោសន្ធៅ ចេញពីចំណុចគំនរឈើងាប់មួយកន្លែងដែលនៅក្បែរនោះ។ ធាតុអាកាសក្តៅ និងមានខ្យល់បក់ផង បានធ្វើឱ្យអណ្តាតភ្លើងរាលដាលយ៉ាងលឿនដូចព្រួញ ចូលមកក្នុងចម្ការកៅស៊ូរបស់លោក បណ្តាលឱ្យឆេះរោល និងខ្លោចដើមកៅស៊ូអស់រាប់រយដើម មើលទៅគួរឱ្យសង្វេគជាពន់ពេក។
នៅក្នុងគ្រាអាសន្ននោះ បន្ទាប់ពីបានឃើញផ្សែងហុយទ្រលោម និងអណ្តាតភ្លើងកំពុងរាលដាលខ្លាំង ប្អូនប្រុសម្ចាស់ចម្ការ រួមជាមួយបងប្អូនប្រជាពលរដ្ឋជិតខាង ដែលរស់នៅក្បែរនោះ បានប្រញាប់ប្រញាល់រត់មកជួយអន្តរាគមន៍។
ដោយសារស្ថានភាពផ្លូវ និងខ្វះខាតមធ្យោបាយពន្លត់អគ្គិភ័យទំនើប អ្នកភូមិបានប្រើប្រាស់វិធីសាស្ត្រតាមបែបស្រុកស្រែ ដោយខ្លះស្ទុះស្ទារដងទឹកជះ ខ្លះទាញទុយោបាញ់ទឹក និងខ្លះទៀតបានកាច់មែកឈើស្រស់ៗរត់ទៅជួយវាយបំបែកភ្លើង ដើម្បីទប់ស្កាត់កុំឱ្យអណ្តាតភ្លើងបន្តរាលដាលកាន់តែខ្លាំងទៅផ្នែកផ្សេងទៀតនៃចម្ការ។ ក្រោយពីការខិតខំប្រឹងប្រែងទាំងប្រថុយប្រថាន ភ្លើងក៏ត្រូវបានគ្រប់គ្រងបានទាំងស្រុង ប៉ុន្តែវាបានបន្សល់ទុកនូវការខូចខាតយ៉ាងដំណំ។
ក្រោយពេលកើតហេតុ ម្ចាស់ចម្ការខាងលើបានសម្តែងការសោកស្តាយជាខ្លាំងចំពោះការបាត់បង់មួយនេះ។ លោកបានធ្វើការអំពាវនាវយ៉ាងទទូចទៅដល់សមត្ថកិច្ចពាក់ព័ន្ធ ព្រមទាំងអាជ្ញាធរមូលដ្ឋានគ្រប់លំដាប់ថ្នាក់ សូមមេត្តាជួយចុះអន្តរាគមន៍ពិនិត្យទីតាំងកើតហេតុ បើកការស៊ើបអង្កេតឱ្យបានហ្មត់ចត់ ដើម្បីស្វែងរកការពិត និងវែកមុខជនសង្ស័យដែលនៅពីក្រោយខ្នងមកផ្តន្ទាទោសតាមច្បាប់។
ថវិកាទាំងនេះ ជាញើសឈាមដែលខ្ញុំខំរកមកទាំងលំបាកលំបិន។ ខ្ញុំមិនទាន់បានប្រមូលផល ឬចំណេញមួយរៀលពីចម្ការនេះផង បែរជាត្រូវមកជួបរឿងអយុត្តិធម៌ និងខ្លោចផ្សាបែបនេះទៅវិញ។ ខ្ញុំសង្ឃឹមថា សមត្ថកិច្ចនឹងជួយរកយុត្តិធម៌ជូនគ្រួសារខ្ញុំ។ នេះជាសម្តីរៀបរាប់ទាំងអួលដើមករបស់ម្ចាស់ចម្ការ។
បច្ចុប្បន្ន ករណីនេះកំពុងស្ថិតក្រោមការរង់ចាំការពិនិត្យ និងចំណាត់ការពីអាជ្ញាធរមានសមត្ថកិច្ច ខណៈប្រជាពលរដ្ឋនៅក្នុងមូលដ្ឋានក៏បានសម្តែងការហួសចិត្ត និងថ្កោលទោសចំពោះទង្វើរបស់ជនអនាមិក ប្រសិនបើជាការលួចដុតពិតមែន ដែលបានបំផ្លាញទ្រព្យសម្បត្តិ និងការខិតខំប្រឹងប្រែងរបស់អ្នកដទៃបែបនេះ៕
ដោយ​ ៖​ មាស​ តុលា

ឯកឧត្តម ឧត្តមសេនីយ៍ឯក ឃឹង សារ៉ាត់ អញ្ជើញចុះសួរសុខទុក្ខ និងនាំយកថវិកាចំនួន ៣០លានរៀល និងបាច់ផ្ការបស់ ឯកឧត្តម នាយឧត្តមសេនីយ៍ ស ថេត និងលោកជំទាវ ប្រគល់ជូន វីរនគរបាលបង្ក្រាបគ្រឿងញៀន ដែលកំពុងបន្តសម្រាកព្យាលជំងឺ ដល់គេហដ្ឋាន

រាជធានីភ្នំពេញ ៖ អនុវត្តតាមអនុសាសន៍ណែនាំ ដ៏ដូចជាការយកចិត្តខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ នាថ្ងៃទី៣០ ខែឧសភា ឆ្នាំ២០២៦ នេះ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បានដឹកនាំនាយនគរបាល ចុះមកសាកសួរសុខទុក្ខ និងនាំយកថវិកាចំនួន ៣០លានរៀល និងបាច់ផ្ការបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ស ស៊ីណា ស ថេត ជូនលោកអនុសេនីយ៍ឯក ធាង ឧត្តម ដល់គេហដ្ឋាន ស្ថិតនៅផ្ទះលេខ២៤៧ ផ្លូវបេតុង ភូមិមិត្ដភាព ឃុំព្រែកឯង ខណ្ឌច្បារអំពៅ រាជធានីភ្នំពេញ ដែលទើបត្រឡប់មកពីសម្រាកព្យាបាល នៅប្រទេសវៀតណាម។

នាឱកាសនោះ ឯកឧត្តម ឧត្តមសេនីយ៍ឯក ឃឹង សារ៉ាត់ មានប្រសាសន៍ថា បើទោះបីកងកម្លាំងរបស់យើងរងរបួសនៅពេលចុះប្រតិបត្ដិការណ៍បង្ក្រាបបទល្មើសក្នុងកម្រិតណាក៏ដោយ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងលោកជំទាវ និងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ព្រមទាំងថ្នាក់ដឹកនាំ របស់យើងគ្រប់លំដាប់ថ្នាក់ មិនទុកមន្ត្រីរូបណាចោលនោះទេ គឺតែងតែយកចិត្តទុកដាក់ ជំរុញ ការមើលថែ ការព្យាបាល និងការសួរសុខទុក្ខជានិច្ច ជាក់ស្ដែងដូចជាករណីនេះជាដើម។

ក្នុងនោះដែរ លោកអនុសេនីយ៍ឯក ធាង ឧត្តម និងក្រុមគ្រួសារ បានសម្ដែងនូវក្ដីរំភើបឥតឧបមា និងថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តមេត្តាធម៌ របស់ថ្នាក់ដឹកនាំ ដែលបានផ្តល់ភាពកក់ក្តៅដល់រូបលោក និងក្រុមគ្រួសារដោយមិនបោះបង់ឱ្យនៅឯកោ នោះឡើយ និងបានជួយទំនុបបំរ៉ុងរហូតមក។

គូសបញ្ជាក់ថា ៖ វីរនគរបាល លោកអនុសេនីយ៍ឯក ធាង ឧត្តម (អត្តលេខ ៦៨៧៣១) បានរងរបួសយ៉ាងធ្ងន់ធ្ងរ ក្នុងពេលចុះប្រតិបត្តិការស្រាវជ្រាវ និងបង្ក្រាបសំបុកឧក្រិដ្ឋជនជួញដូរគ្រឿងញៀនប្រដាប់អាវុធ កាលពីថ្ងៃទី២ ខែមេសា ឆ្នាំ២០២៦ កន្លងទៅ ស្ថិតនៅចំណុចភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ។

នៅទីបញ្ចប់ លោកអនុសេនីយ៍ឯក ធាង ឧត្តម បានលើកហត្ថប្រណម្យបួងសួងដល់គុណព្រះរតនត្រ័យ សូមប្រទានពរជ័យជូនដល់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងលោកជំទាវ និងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកជំទាវ ព្រមទាំងឯកឧត្តម ឧត្តមសេនីយ៍ឯក ឃឹង សារ៉ាត់ និងគណៈប្រតិភូទាំងអស់ សូមទទួលបានជោគជ័យគ្រប់ភារកិច្ចបម្រើជាតិ និងប្រជាជនជានិច្ចនិរន្តរ៍៕

អាជីវករ និងពលរដ្ឋរិះគន់! ទីតាំងហ្គេមបាញ់ត្រី និងល្បែងស៊ីសងខុសច្បាប់បើកលេងយ៉ាងរលូននៅជាន់ទី៣ ផ្សារទំនើបអ៊ីអន១ ខណៈសមត្ថកិច្ចរក្សាភាពស្ងៀមស្ងាត់

រាជធានីភ្នំពេញ៖ ប្រភពពីប្រជាពលរដ្ឋ ក៏ដូចជាអាជីវករលក់ដូរនៅក្នុងផ្សារទំនើបអ៊ីអន១ (Aeon Mall 1) បានសម្តែងការមិនពេញចិត្ត និងរិះគន់ចំៗទៅលើអាជ្ញាធរ និងសមត្ថកិច្ចមូលដ្ឋាន បន្ទាប់ពីឃើញមានទីតាំងល្បែងស៊ីសងហ្គេមបាញ់ត្រីខុសច្បាប់ និងល្បែងជាច្រើនប្រភេទទៀត កំពុងបើកដំណើរការយ៉ាងគគ្រឹកគគ្រេងនៅជាន់ទី៣ នៃផ្សារទំនើបមួយនេះ ដោយគ្មានការទប់ស្កាត់។
ទីតាំងល្បែងស៊ីសងដែលរងការរិះគន់នេះ ស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។ ក្រុមអ្នកញៀនល្បែងទាំងក្មេង ចាស់ ប្រុស ស្រី ត្រូវបានគេរាយការណ៍ថា បានប្រមូលផ្តុំគ្នាចូលលេងទាំងយប់ទាំងថ្ងៃ យ៉ាងអនាធិបតេយ្យបំផុត។
មហាជន និងប្រជាពលរដ្ឋបានលើកឡើងថា ការបណ្តោយឱ្យទីតាំងល្បែងស៊ីសងនេះបើកដំណើរការ គឺហាក់បីដូចជាកំពុងផ្គើនទៅនឹងបទបញ្ជាដ៏ម៉ឺងម៉ាត់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
សូមរំលឹកថា​ កាលពីថ្ងៃទី១៨ ខែកុម្ភៈ ឆ្នាំ២០២៤​ សម្តេចធិបតី ហ៊ុន ម៉ាណែត បានដាក់បទបញ្ជាក្តៅដល់អភិបាលរាជធានី-ខេត្តទាំងអស់នៅទូទាំងប្រទេស ឱ្យបញ្ឈប់ និងបិទអាជីវកម្មល្បែងស៊ីសងគ្រប់ប្រភេទ រួមទាំងតាមប្រព័ន្ធអនឡាញទាំងអស់ជាបន្ទាន់ ដោយគ្មានការលើកលែង ទោះបីជាមានច្បាប់ ឬគ្មានច្បាប់អនុញ្ញាតក៏ដោយ។
ផ្ទុយទៅវិញ រហូតមកទល់ពេលនេះ គេមិនទាន់ឃើញមានចំណាត់ការទប់ស្កាត់ ឬការចុះបង្ក្រាបណាមួយពីសំណាក់អាជ្ញាធរ និងសមត្ថកិច្ចពាក់ព័ន្ធទាំងក្នុងកម្រិតសង្កាត់ និងខណ្ឌចំការមននៅឡើយទេ ដែលនេះបង្កើតជាសំណួរ និងភាពងឿងឆ្ងល់ដល់សាធារណជនយ៉ាងខ្លាំង។
ដោយសារតែវត្តមាននៃទីតាំងល្បែងស៊ីសងដុះស្លែមួយនេះ អាជីវករ និងប្រជាពលរដ្ឋដែលរស់នៅក្នុងមូលដ្ឋានខាងលើ បានសម្តែងការព្រួយបារម្ភ និងភ័យខ្លាចយ៉ាងខ្លាំងចំពោះអំពើចោរកម្ម​ ដូចជាចោរលួច ចោរឆក់ ចោរប្លន់ និងចោរគាស់ផ្ទះ។ ម្យ៉ាងទៀតអំពើហិង្សាក្នុងគ្រួសារ និងគ្រឿងញៀន​ ដែលជាផលវិបាកផ្ទាល់កើតចេញពីការវក់នឹងល្បែងស៊ីសង។
ដើម្បីស្តារសន្តិសុខ សុវត្ថិភាព និងភាពសុខសាន្តជូនប្រជាពលរដ្ឋឡើងវិញ អាជីវករ និងពលរដ្ឋក្នុងមូលដ្ឋាន សូមគោរពស្នើសុំយ៉ាងទទូចដល់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ​ ព្រមទាំងលោក ឃួង ស្រេង អភិបាលនៃគណៈអភិបាលរាជធានីភ្នំពេញ
មេត្តាចាត់កម្លាំងជំនាញក្រោមឱវាទ ចុះធ្វើការស្រាវជ្រាវ ស៊ើបអង្កេត និងបង្ក្រាបទីតាំងហ្គេមបាញ់ត្រីខុសច្បាប់នៅជាន់ទី៣ នៃផ្សារទំនើបអ៊ីអន១ នេះឱ្យមានប្រសិទ្ធភាពខ្ពស់ ស្របតាមគោលនយោបាយ "ភូមិ-ឃុំ-សង្កាត់មានសុវត្ថិភាពទាំង ៧ ចំណុច" របស់ក្រសួងមហាផ្ទៃ និងដើម្បីរក្សាលំនឹងសណ្តាប់ធ្នាប់សង្គមស្របតាមប្រសាសន៍ដឹកនាំដ៏ខ្ពង់ខ្ពស់របស់ប្រមុខរាជរដ្ឋាភិបាល៕
ដោយ​ ៖​ មេទ័ពខ្លា

ក្តីរំភើបពលរដ្ឋសង្កាត់សាក់សំពៅ! ថ្ងៃនេះបានទទួលប្លង់រឹងស្របច្បាប់ ខណៈភ្នំពេញនៅសល់តែខណ្ឌមួយគត់មិនទាន់បញ្ចប់ការចុះបញ្ជីដីធ្លី

រាជធានីភ្នំពេញ៖ នាព្រឹកថ្ងៃទី១៨ ខែឧសភា ឆ្នាំ២០២៦ យុទ្ធនាការផ្តល់ប័ណ្ណកម្មសិទ្ធិដីធ្លីជូនប្រជាពលរដ្ឋនៅតែបន្តធ្វើឡើងយ៉ាងសកម្ម ដោយនៅក្នុងនោះ ពិធីចែកវិញ្ញាបនបត្រសម្គាល់ម្ចាស់អចលនវត្ថុ និងការប្រកាសមោឃភាពនៃប័ណ្ណសំគាល់សិទ្ធិកាន់កាប់ប្រើប្រាស់ដីធ្លី ឬប័ណ្ណសំគាល់សិទ្ធិកាន់កាប់អចលនវត្ថុ (ប្លង់ចាស់) ត្រូវបានប្រារព្ធឡើងស្ថិតនៅក្នុងបរិវេណវត្តកំពង់ក្តុល ក្នុងសង្កាត់សាក់សំពៅ ខណ្ឌដង្កោ រាជធានីភ្នំពេញ។
ពិធីនេះ ត្រូវបានរៀបចំឡើងក្រោមអធិបតីភាព និងមានការអញ្ជើញចូលរួមពីមន្ត្រីជាន់ខ្ពស់ និងអាជ្ញាធរមូលដ្ឋាន រួមមានលោក ប៊ិន សុឈី អនុប្រធាននៃមន្ទីររៀបចំដែនដី នគរូបនីយកម្មសំណង់ និងសុរិយោដី រាជធានីភ្នំពេញ។ លោកស្រី គឹម ញឹប អភិបាលនៃគណៈអភិបាលខណ្ឌដង្កោ។ លោក ប៉ុក បញ្ញាធិ ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលខណ្ឌកំបូល។
កម្មវិធីនេះក៏មានការចូលរួមយ៉ាងកុះករពីសំណាក់បងប្អូនប្រជាពលរដ្ឋដែលជាម្ចាស់ក្បាលដី រស់នៅក្នុងសង្កាត់សាក់សំពៅ ខណ្ឌដង្កោ ទាំងមូល ដែលបានមកជួបជុំគ្នាយ៉ាងសប្បាយរីករាយ ដើម្បីរង់ចាំទទួលយកប័ណ្ណកម្មសិទ្ធិស្របច្បាប់របស់ខ្លួន។
នៅក្នុងឱកាសនោះផងដែរ លោក ប៊ិន សុឈី អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ បានឡើងមានប្រសាសន៍សំណេះសំណាល ក៏ដូចជាថ្លែងការណ៍ស្តីពីវឌ្ឍនភាពការងារដីធ្លី។ លោកបានបញ្ជាក់ឱ្យដឹងថា មកទល់ពេលនេះ ការងារចុះវាស់វែង និងចុះបញ្ជីដីធ្លីជាប្រព័ន្ធនៅក្នុងភូមិសាស្ត្ររាជធានីភ្នំពេញ គឺសម្រេចបានស្ទើរតែទាំងស្រុង ១០០% ទៅហើយ។
លោក ប៊ិន សុឈី បានសង្កត់ធ្ងន់ថា​ បច្ចុប្បន្ន ខណ្ឌទាំងអស់នៅក្នុងរាជធានីភ្នំពេញ គឺទទួលបានការចុះវាស់វែង និងចុះបញ្ជីដីធ្លីរួចរាល់អស់ហើយ ដោយនៅក្នុងនោះគឺនៅសេសសល់តែ ខណ្ឌ៧មករា មួយប៉ុណ្ណោះ។ មន្ទីរជំនាញកំពុងតែបន្តរៀបចំធ្វើជាប្រព័ន្ធ ដើម្បីចុះវាស់វែង និងចុះបញ្ជីដីធ្លីជូនប្រជាពលរដ្ឋនៅខណ្ឌដែលនៅសេសសល់មួយនេះឱ្យបានឆាប់រហ័សនាពេលខាងមុខ។
ការចែកវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង) នាពេលនេះ មិនត្រឹមតែជាការផ្តល់នូវសុវត្ថិភាពគតិយុត្ត និងធានានូវសិទ្ធិស្របច្បាប់ពេញលេញក្នុងការគ្រប់គ្រងអចលនទ្រព្យរបស់ប្រជាពលរដ្ឋប៉ុណ្ណោះទេ ប៉ុន្តែវាក៏ជាការប្រកាសមោឃភាពដោយស្វ័យប្រវត្តិនូវរាល់ប័ណ្ណសម្គាល់សិទ្ធិកាន់កាប់ប្រើប្រាស់ដីធ្លី ឬប័ណ្ណចាស់ៗកន្លងមកផងដែរ ដើម្បីចៀសវាងការភាន់ច្រឡំ ឬការប្រើប្រាស់ប័ណ្ណជាន់គ្នា។
ពិធីនេះបានបញ្ចប់ទៅក្រោមបរិយាកាសរីករាយ និងស្និទ្ធស្នាលជាទីបំផុត ដោយប្រជាពលរដ្ឋម្នាក់ៗបានបង្ហាញពីក្តីរំភើបសប្បាយរីករាយ ដែលទទួលបានប័ណ្ណកម្មសិទ្ធិដីធ្លីជាផ្លូវការ ដែលជាទ្រព្យសម្បត្តិដ៏មានតម្លៃ និងជាបង្អែកសេដ្ឋកិច្ចដ៏រឹងមាំសម្រាប់គ្រួសាររៀងៗខ្លួន៕
ដោយ​ ៖​ មេទ័ពខ្លា

តើហាងកាហ្វេអរុណរះ ជាកន្លែងសម្រាក ឬជាជម្រកល្បែងស៊ីសង? ប្រជាពលរដ្ឋសំណូមពរឱ្យអាជ្ញាធរខណ្ឌទួលគោកចុះពិនិត្យជាបន្ទាន់!

រាជធានីភ្នំពេញ​ ៖ ភាពមិនប្រក្រតីមួយបានកើតឡើងនៅចំណុចផ្ទះលេខ ៣៩១ កែងផ្លូវ ២១៥ ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក ដែលបច្ចុប្បន្នជាទីតាំងនៃ «ហាងកាហ្វេអរុណរះ»។
យោងតាមប្រភពព័ត៌មានពីបងប្អូនប្រជាពលរដ្ឋក្នុងមូលដ្ឋាន បានដាក់ការសង្ស័យ និងរាយការណ៍ថា ទីតាំងនេះកំពុងបង្កប់នូវសកម្មភាពល្បែងស៊ីសងខុសច្បាប់តាមប្រព័ន្ធអនឡាញយ៉ាងអនាធិបតេយ្យ។
តាមការបញ្ជាក់ពីប្រភពដដែល ទីតាំងនេះហាក់មានការបើកទទួលភ្ញៀវឱ្យចូលលេងជារៀងរាល់ថ្ងៃ ដែលបង្កជាក្ដីបារម្ភយ៉ាងខ្លាំងដល់សន្តិសុខសណ្ដាប់ធ្នាប់ក្នុងមូលដ្ឋាន​ ជាពិសេសពាក់ព័ន្ធនឹងបញ្ហាល្បែងស៊ីសង និងគ្រឿងញៀន ដែលជាមេរោគសង្គមយ៉ាងគ្រោះថ្នាក់។
ក្រោមពាក្យស្លោក «ភូមិ-ឃុំ-សង្កាត់មានសុវត្ថិភាពទាំង៧ ចំណុច» បងប្អូនប្រជាពលរដ្ឋបានសម្ដែងនូវសេចក្ដីសង្ឃឹមយ៉ាងមុតមាំ និងគោរពស្នើសុំដល់លោកអភិបាលខណ្ឌទួលគោក​ និងលោកអធិការខណ្ឌទួលគោក​ មេត្តាដាក់កម្លាំងចុះត្រួតពិនិត្យ និងមានវិធានការបង្ក្រាបឱ្យបានទាន់ពេលវេលា ដើម្បីធានាបាននូវភាពសុខសាន្តជូនប្រជាពលរដ្ឋ និងដើម្បីពង្រឹងច្បាប់ឱ្យមានប្រសិទ្ធភាពខ្ពស់។
«យើងរួមគ្នា លុបបំបាត់ល្បែងស៊ីសង ដើម្បីសុវត្ថិភាពសហគមន៍យើង!»

«សក់ដែលចាប់ផ្ដើមប្រែពណ៌បន្តិចម្ដងៗ មិនមែនគ្រាន់តែជាសញ្ញានៃវ័យនោះទេ ប៉ុន្តែវាគឺជាសក្ខីភាពនៃបន្ទុកដ៏ធ្ងន់ធ្ងរដែលបានលះបង់ដើម្បីបុព្វហេតុមាតុភូមិ។ ទោះបីការងារជាតិខ្លះនៅមិនទាន់សម្រេចបាន ១០០% តាមការគ្រោងទុក ប៉ុន្តែអ្វីដែលយើងមើលឃើញច្បាស់គឺ "ជំហានសន្តិភាព" ដែលកាន់តែមានភាពហាប់ណែន និងរឹងមាំបំផុត។
ការប្រកាសជំហរយ៉ាងដាច់អហង្ការរបស់ សម្តេចបវរធិបតី ហ៊ុន ម៉ាណែត លើបញ្ហាព្រំដែន គឺជាការបញ្ជាក់ប្រាប់ពិភពលោកថា កម្ពុជាជាប្រជាជាតិដែលស្រឡាញ់សន្តិភាព ប៉ុន្តែមិនមែនទន់ជ្រាយឡើយ។ នេះគឺជាមោទនភាព និងជាកិត្តិយសដ៏ខ្ពង់ខ្ពស់ដែលប្រជាជនខ្មែរគ្រប់រូបផ្តល់តម្លៃជូនដល់ថ្នាក់ដឹកនាំដែលយកបេះដូងមកបម្រើជាតិ។»