Easy make

Group design proposal vs. Me adding my design

ស្ថាបត្យករពសុធា | មាតិកាស្ថាបត្យកម្មបូរាណ
>>> ក្បួនសាងដំបូលព្រះវិហារបែបបុរាណ
នៅក្នុងស្ថាបត្យកម្មខ្មែរបុរាណ “ ដំបូល ” គឺជាផ្នែកដ៏សំខាន់បំផុត ដែលគ្រប់ប្រភេទនៃស្ថាបត្យកម្មខ្មែរទាំងអស់ មិនថាជា ផ្ទះ សាលា ព្រះវិហារ មណ្ឌប ប្រាសាទ ផ្នែកដំបូល សុទ្ធសឹងតែត្រូវបានគេយកចិត្តទុកដាក់រចនាលម្អ និង សម្រិតសម្រាំង ប្រកបដោយបច្ចេកទេសសាងសង់ដ៏គួរឱ្យចាប់អារម្មណ៍ និង មានរូបរាងដ៏ទាក់ទាញយ៉ាងប្លែកពិសេស ។
និយាយចំពោះពេលបច្ចុប្បន្ន គេអាចត្រឹមតែយល់ថា ការសាងដំបូលព្រះវិហារ គ្រាន់តែរាងចោត ត្រង់ៗ គឺដូចបុរាណ ជាលទ្ធផល បើស្ថាបត្យកម្មថ្មី និង ស្ថាបត្យកម្មបុរាណនៅក្បែរគ្នា យើងនឹងអាចឃើញភ្លាមថា “ ស្ថាបត្យកម្មថ្មី ពុំមានលក្ខណៈសម្បត្តិគ្រប់គ្រាន់នឹងធៀបនឹង ស្ថាបត្យកម្មបុរាណបានឡើយ មិនថាចំពោះទាំងសោភ័ណភាព ទាំងបច្ចេកទេសសាងសង់ ក៏ទាំងសមាមាត្រ ។ ហេតុនេះហើយទើបបានជា ការអភិរក្សស្ថាបត្យកម្មព្រះវិហារបុរាណ គឺជារឿងដ៏ចាំបាច់សម្រាប់ជាមត៌កវប្បធម៌ ឃ្លាំងចំណេះដឹង ក៏ដូចជាសាក្សីប្រវត្តិសាស្រ្តសម្រាប់អ្នកជំនាន់ក្រោយ ។
នេះនឹងនិយាយអំពី “ លក្ខណៈដំបូលព្រះវិហារបុរាណ វត្តសំរឹទ្ធិជយារាម ” ដែលសាងសង់កាលពីឆ្នាំ ១៨៩៩ ។ ដំបូលនៃព្រះវិហារបុរាណនេះ បានអួតបង្ហាញនូវប្រណីតភាព និង សោភ័ណភាពនៃដំបូលព្រះវិហារខ្មែរបុរាណ ពិសេសតំបន់សិល្បៈកំពង់ចាម ។ ក្នុងផ្នែកនេះ យើងសូមលើកយកតែ “ ផ្នែកដំបូលគ្រឹះ ” មកនិយាយប៉ុណ្ណោះ ។
ដំបូលគ្រឹះនៃព្រះវិហារបុរាណ បានបង្ហាញឱ្យយើងអំពី “ ភាពរស់នៃសិល្បៈរចនា ” ដោយសិល្បករខ្មែរបុរាណ មិននិយមខ្សែខ្លែងតែម្ដងទេ តែគឺជា “ ខ្សែខ្លែង-ង-ខាងចុង ” ។ ចូរសង្កេតមើល ៖
ខ្សែខ្លែងព្រំដំបូលថ្នាក់លើ គេរចនាជា “ រាងបាតទូក ” ៖
គេសាងលួចភ្នែក ឱ្យខាងចុងដំបូលទាំងសង្ខាង “ ង-ឡើងបន្តិច ” ។ ការធ្វើឱ្យ-ង-នេះ គេពុំមែនធ្វើតែឱ្យឃើញព្រំដំបូល-ង-តែម្ដងគ្រាន់តែឱ្យឃើញទេ គឺ-ង-អ៊ែន តាំងតែពីការសាងគ្រឿងទិព្វសម្ភារមកម្ល៉េះ ខណៈសម័យបច្ចុប្បន្ន សាងត្រង់យកតែម្ដង ។
ខ្សែខ្លែងព្រំដំបូលថ្នាក់ក្រោម គេរចនាជា “ រាងរមាំងផ្អើល ” ៖
គេសាងឱ្យខាងចុងដំបូល “ ងើយងើបឡើង ” ស្ទុះដូចសត្វរមាំងផ្អើល ។ បើធៀបនឹងខ្សែខ្លែងថ្នាក់លើ យើងនឹងឃើញថា ខ្សែខ្លែងថ្នាក់ក្រោមនេះ ង-ខាងខ្លាំង ដូចជាយើងងើយតែម្ដង ។
ខ្សែខ្លែងជម្រាលដំបូលគ្រឹះ ៖
ខាងចុងជម្រាលដំបូលទាំងសង្ខាង គេធ្វើឱ្យ “ ង-រលាស់ ” ។ ការធ្វើបែបនេះ ក៏ដើម្បីជាភាពរស់នៃសិល្បៈរចនា ក៏ជាបច្ចេកទេសទប់ក្បឿង និង រំដោះទឹកភ្លៀងពីដំបូលឱ្យអស់ ។
បុរាណបច្ចេកទេស លោកសាងដំបូលព្រះវិហារបានល្អខ្លាំងណាស់ ជាបចេ្ចកទេសលួចភ្នែក ឱ្យមើលយល់ថា ត្រង់ តែជាខ្សែត្រង់ដែលមានជីវិត គឺជា “ បច្ចេកទេស-ង-ខ្សែខ្លែង ” ដ៏ពិសេស រហូតដល់ថា យើងបច្ចុប្បន្ន យល់តែជា ខ្សែត្រង់ យកតែម្ដង ។
>>> ការស្គាល់ពីខ្លួនច្បាស់ នឹងធ្វើឱ្យយើងក្លាយជាអ្នកបន្តវេនដ៏ល្អបំផុត ៕
មាតិកាដោយ ៖ ស្ថាបត្យករពសុធា - posothea architects
ទាក់ទងរចនាតាមរយៈលេខទូរសព្ទ ឬ តេឡេក្រាម ៖
០៩៣ ២៩៦ ៧៩៧ ( Telegram ) / ០៦១ ៣ ៩៩៩៩ ៦
#ពសុធា #ស្ថាបត្យករពសុធា
#ស្ថាបត្យកម្ម #ស្ថាបត្យកម្មបុរាណ #ព្រះវិហារបុរាណ
#ដំបូល #ព្រះវិហារបុរាណ #វត្តសំរឹទ្ធិជយារាម
#កម្ពុជា #ខ្មែរ