SORA Update

'ആകാശംലോ ഒക താര'
നവംബർ 20ന്
തിയേറ്ററുകളിലേക്ക്

ഹൈദരാബാദ്: ദുൽഖർ സൽമാനെ നായകനാക്കി പവൻ സാദിനേനി സംവിധാനം ചെയ്യുന്ന ഏറ്റവും പുതിയ തെലുങ്ക് ചിത്രം 'ആകാശംലോ ഒക താര'യുടെ ആഗോള റിലീസ് തീയതി പ്രഖ്യാപിച്ചു. ചിത്രം 2026 നവംബർ 20ന് തിയേറ്ററുകളിൽ പ്രദർശനത്തിനെത്തും. തെലുങ്ക്, തമിഴ്, മലയാളം, ഹിന്ദി ഭാഷകളിൽ പാൻ ഇന്ത്യൻ റിലീസായാണ് ചിത്രം പ്രേക്ഷകരിലേക്ക് എത്തുന്നത്.

നൂതനമായ കഥപറച്ചിൽ രീതി കൊണ്ട് ശ്രദ്ധേയനായ പവൻ സാദിനേനി ഒരുക്കുന്ന ഈ ചിത്രത്തിൽ പുതുമുഖ താരം സാത്വിക വീരവല്ലിയാണ് ദുൽഖറിന്റെ നായികയാകുന്നത്. പ്രശസ്ത നടി ശ്രുതി ഹാസനും ചിത്രത്തിൽ മറ്റൊരു സുപ്രധാന കഥാപാത്രത്തെ അവതരിപ്പിക്കുന്നുണ്ട്. ദുൽഖർ സൽമാൻ 'കൃഷ്ണ' എന്ന കഥാപാത്രത്തെയാണ് ചിത്രത്തിൽ അവതരിപ്പിക്കുന്നത്.

വലിയ ബജറ്റിൽ ഒരുങ്ങുന്ന ചിത്രം സന്ദീപ് ഗണ്ണവും രമ്യ ഗണ്ണവും ചേർന്നാണ് നിർമ്മിക്കുന്നത്. തെലുങ്കിലെ മുൻനിര നിർമ്മാണ കമ്പനികളായ ഗീത ആർട്സ്, സ്വപ്ന സിനിമ, ലൈറ്റ്ബോക്സ് മീഡിയ എന്നിവർ സംയുക്തമായാണ് ചിത്രം തിയേറ്ററുകളിലേക്ക് എത്തിക്കുന്നത്. ജി. വി. പ്രകാശ് കുമാറാണ് ചിത്രത്തിന് സംഗീത സംവിധാനം നിർവ്വഹിച്ചിരിക്കുന്നത്.

നേരത്തെ ദുൽഖറിന്റെ ജന്മദിനത്തോടനുബന്ധിച്ച് ജൂലൈ 28ന് പുറത്തിറങ്ങിയ 'കുട്ടി കുട്ടി പൂവേ' എന്ന ഗാനം സോഷ്യൽ മീഡിയയിൽ വലിയ തരംഗമായി മാറിയിരുന്നു. ചിത്രത്തിൽ ദുൽഖറും സാത്വികയും അവതരിപ്പിക്കുന്ന കഥാപാത്രങ്ങളുടെ പ്രണയവും ജീവിത യാത്രയുമാണ് സിനിമയുടെ പ്രധാന പ്രമേഹമെന്ന സൂചന ഈ ഗാനത്തിലൂടെ അണിയറപ്രവർത്തകർ നൽകിയിരുന്നു.

'മഹാനടി', 'സീതാ രാമം', 'ലക്കി ഭാസ്കർ' എന്നീ സൂപ്പർഹിറ്റ് ചിത്രങ്ങൾക്ക് ശേഷം ദുൽഖർ തെലുങ്കിൽ നായകനായി എത്തുന്ന ചിത്രമെന്ന നിലയിൽ വലിയ പ്രതീക്ഷയാണ് സിനിമാ ലോകത്തുള്ളത്. 'കൽക്കി 2898 എഡി' എന്ന വൻകിട ചിത്രത്തിലെ അതിഥി വേഷത്തിന് ശേഷം ദുൽഖർ അഭിനയിക്കുന്ന ഈ ചിത്രം റിലീസിന് മുന്നേ തന്നെ പ്രേക്ഷകശ്രദ്ധ നേടിക്കഴിഞ്ഞു.

ഹാലൻഡിന്റെ മെഡിറ്റേഷൻ പോസ്
ശൈലിയിൽ‌
ആഘോഷിച്ച് അഭിഷേക് ശർമ്മ

ന്യൂഡൽഹി: അഫ്ഗാനിസ്ഥാനെതിരായ മൂന്നാം ടി20 മത്സരത്തിൽ ബാറ്റിംഗ് വെടിക്കെട്ടുമായി തകർപ്പൻ സെഞ്ചുറി നേടിയതിന് പിന്നാലെ വ്യത്യസ്തമായ ആഘോഷ ശൈലിയുമായി ഇന്ത്യൻ ഓപ്പണർ അഭിഷേക് ശർമ്മ. മാഞ്ചസ്റ്റർ സിറ്റി ഫുട്ബോൾ താരം എർലിങ് ഹാലൻഡിന്റെ വിഖ്യാതമായ 'മെഡിറ്റേഷൻ പോസ്' അനുകരിച്ചാണ് താരം തന്റെ സ്വപ്ന സെഞ്ചുറി ആഘോഷമാക്കിയത്.

മത്സരത്തിൽ വെറും 30 പന്തുകളിൽ നിന്ന് മൂന്നക്കം കടന്ന 26കാരനായ അഭിഷേക്, ഐ.സി.സി ഫുൾ മെമ്പർ രാജ്യങ്ങളിലെ ഒരു ബാറ്ററുടെ ഏറ്റവും വേഗതയേറിയ ടി20 സെഞ്ചുറി എന്ന ചരിത്ര റെക്കോർഡ് തന്റെ പേരിലാക്കി. ഇതിനു പുറമെ മുൻ ക്യാപ്റ്റൻ രോഹിത് ശർമ്മയുടെ പേരിലുണ്ടായിരുന്ന ഇന്ത്യക്കാരന്റെ ഏറ്റവും വേഗതയേറിയ ടി20 സെഞ്ചുറിയെന്ന വിഖ്യാത റെക്കോർഡും താരം മറികടന്നു. അന്താരാഷ്ട്ര ടി20 കരിയറിലെ അഭിഷേകിന്റെ മൂന്നാമത്തെ സെഞ്ചുറിയാണിത്.

മോശം ഫോമിലൂടെ കടന്നുപോവുകയും മലയാളി താരം സഞ്ജു സാംസൺ, യുവതാരം വൈഭവ് സൂര്യവംശി എന്നിവരിൽ നിന്ന് ഓപ്പണിങ് സ്ഥാനത്തിനായി കടുത്ത മത്സരം നേരിടുകയും ചെയ്യുന്ന ഘട്ടത്തിലാണ് അഭിഷേകിന്റെ ഈ വൻ തിരിച്ചുവരവ്. മുൻപത്തെ ഏഴ് ഇന്നിങ്സുകളിൽ അർദ്ധസെഞ്ചുറി നേടാനാകാതെ സമ്മർദ്ദത്തിലായിരുന്ന താരത്തിന് ഈ പരമ്പരയിലെ പ്രകടനം ഏറെ നിർണ്ണായകമായിരുന്നു.

അഫ്ഗാൻ ബൗളർമാരെ പൂർണ്ണമായും നിലംപരിശാക്കിയ അഭിഷേക് മൈതാനത്തിന്റെ എല്ലാ ഭാഗത്തേക്കും സിക്സറുകൾ പായിച്ചു. പവർപ്ലേയിലെ ആറ് ഓവറുകളിൽ മാത്രം വെറും 22 പന്തുകളിൽ നിന്ന് 76 റൺസാണ് താരം അടിച്ചുകൂട്ടിയത്. വെറും 16 പന്തിൽ അർദ്ധസെഞ്ചുറി കടന്ന താരം ഒടുവിൽ 34 പന്തുകളിൽ നിന്ന് 11 സിക്സറുകളും 9 ഫോറുമടക്കം 108 റൺസെടുത്താണ് പുറത്തായത്.

മത്സരത്തിൽ 40 പന്തുകളിൽ താഴെ രണ്ട് രാജ്യാന്തര ടി20 സെഞ്ചുറികൾ തികയ്ക്കുന്ന ലോകത്തിലെ ആദ്യ ബാറ്ററെന്ന അപൂർവ്വ നേട്ടവും ഈ ഇന്നിങ്സോടെ അഭിഷേക് സ്വന്തമാക്കി. അഭിഷേകിന്റെയും സഞ്ജുവിന്റെയും തകർപ്പൻ ബാറ്റിംഗ് മികവിൽ അഫ്ഗാനിസ്ഥാനെതിരായ ടി20 പരമ്പര ഇന്ത്യ ആധികാരികമായി സ്വന്തമാക്കുകയും ചെയ്തു.

പരമ്പര 3-0ത്തിന്
തൂത്തുവാരി ഇന്ത്യ

അഫ്ഗാനെതിരായ
മൂന്നാം മത്സരത്തിൽ
127 റൺസിന്റെ തക‌ർപ്പൻ ജയം

ന്യൂഡൽഹി: അഫ്ഗാനിസ്ഥാനെതിരായ മൂന്നാം ടി20 മത്സരത്തിൽ 127 റൺസിന്റെ കൂറ്റൻ ജയത്തോടെ പരമ്പര 3-0ത്തിന് ഇന്ത്യ തൂത്തുവാരി. ദില്ലി അരുൺ ജെയ്റ്റ്‌ലി സ്റ്റേഡിയത്തിൽ നടന്ന മത്സരത്തിൽ ഇന്ത്യ മുന്നോട്ടുവെച്ച 222 റൺസ് വിജയലക്ഷ്യം പിന്തുടർന്ന അഫ്ഗാനിസ്ഥാൻ വെറും 94 റൺസിന് പുറത്താകുകയായിരുന്നു. ഓപ്പണർ അഭിഷേക് ശർമയുടെ വെടിക്കെട്ട് സെഞ്ചുറിയും ബൗളർമാരുടെ മികച്ച പ്രകടനവുമാണ് ഇന്ത്യക്ക് അനായാസ വിജയം സമ്മാനിച്ചത്.

ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യയ്ക്ക് വേണ്ടി ഒന്നാം വിക്കറ്റിൽ അഭിഷേക് ശർമയും സഞ്ജു സാംസണും ചേർന്ന് തകർപ്പൻ തുടക്കമാണ് നൽകിയത്. സഞ്ജുവിനെ കാഴ്ചക്കാരനാക്കി അഫ്ഗാൻ ബൗളർമാരെ കടന്നാക്രമിച്ച അഭിഷേക് 34 പന്തിൽ 11 സിക്സറുകളും 9 ഫോറുമടക്കം 104 റൺസ് നേടി. 35 പന്തിൽ 50 റൺസ് നേടിയ സഞ്ജുവിനൊപ്പം ഒന്നാം വിക്കറ്റിൽ 142 റൺസിന്റെ കൂട്ടുകെട്ടാണ് അഭിഷേക് കൂട്ടിച്ചേർത്തത്.

എന്നാൽ പത്താം ഓവറിന്റെ അവസാന പന്തിൽ അഭിഷേക് പുറത്തായതിന് പിന്നാലെ ഇന്ത്യൻ ബാറ്റിംഗ് നിരയ്ക്ക് പ്രതീക്ഷിച്ച സ്കോറിലേക്ക് എത്താനായില്ല. ഒരു ഘട്ടത്തിൽ 300 കടക്കുമെന്ന് കരുതിയ സ്കോർ നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 221 റൺസിൽ ഒതുങ്ങുകയായിരുന്നു. മധ്യനിരയിൽ ശ്രേയസ് അയ്യർ (29) മാത്രമാണ് പിന്നീട് അൽപ്പമെങ്കിലും തിളങ്ങിയത്. തിലക് വർമ (2), ശിവം ദുബെ (14), ഇഷാൻ കിഷൻ (10) എന്നിവർക്ക് വലിയ സ്കോർ കണ്ടെത്താനായില്ല.

222 റൺസ് വിജയലക്ഷ്യവുമായി മറുപടി ബാറ്റിംഗിനിറങ്ങിയ അഫ്ഗാനിസ്ഥാൻ തുടക്കം മുതൽ ഇന്ത്യൻ ബൗളിംഗ് ആക്രമണത്തിന് മുന്നിൽ പതറുന്ന കാഴ്ചയാണ് കണ്ടത്. 25 റൺസ് നേടിയ ക്യാപ്റ്റൻ ഇബ്രാഹിം സദ്രാൻ മാത്രമാണ് അഫ്ഗാൻ നിരയിലെ ടോപ് സ്കോറർ. റഹ്മാനുള്ള ഗുർബാസ് (15), അസ്മതുള്ള ഒമർസായ് (17) എന്നിവർ ഒഴികെ മറ്റ് ബാറ്റർമാർക്കാർക്കും രണ്ടക്കം തികയ്ക്കാനായില്ല.

ഇന്ത്യയ്ക്കായി നിതീഷ് കുമാർ റെഡ്ഡി, രവി ബിഷ്‌ണോയി എന്നിവർ മൂന്ന് വിക്കറ്റ് വീതം വീഴ്ത്തി അഫ്ഗാൻ ബാറ്റിംഗ് നിരയുടെ നട്ടെല്ലൊടിച്ചു. അക്‌സർ പട്ടേൽ രണ്ട് വിക്കറ്റുകൾ നേടി മികച്ച പിന്തുണ നൽകി. ബാറ്റിംഗിലും ബൗളിംഗിലും ഒരുപോലെ ആധിപത്യം പുലർത്തിയ ഇന്ത്യ, പരമ്പരയിലെ മൂന്ന് മത്സരങ്ങളും ആധികാരികമായി വിജയിച്ചാണ് പരമ്പര സ്വന്തമാക്കിയത്.

സ്ത്രീകളെ അക്രമികൾ ബലമായി വിവസ്ത്രരാക്കി

കൊച്ചി: കൊച്ചി നഗരമധ്യത്തിൽ ജനങ്ങളെ നടുക്കിയ ക്രൂരമായ കവർച്ചയും അതിക്രമവും. പാലാരിവട്ടം സംസ്‌കാര ജങ്‌ഷനു സമീപം അതിഥിത്തൊഴിലാളികൾ വാടകയ്ക്ക് താമസിച്ചിരുന്ന കെട്ടിടത്തിൽ അതിക്രമിച്ചുകയറിയ അഞ്ചംഗ സംഘമാണ് കത്തിമുനയിൽ നിർത്തി വൻ കവർച്ച നടത്തിയത്. കവർച്ചയ്ക്ക് പുറമെ വീട്ടിലുണ്ടായിരുന്ന സ്ത്രീകളെ അക്രമികൾ ബലമായി വിവസ്ത്രരാക്കുകയും ചെയ്തു.

അസം, പശ്ചിമബംഗാൾ സ്വദേശികളായ മൂന്ന് സ്ത്രീകളും നാല് പുരുഷന്മാരും അടക്കം ഏഴുപേർ താമസിച്ചിരുന്ന വാടകമുറിയിലാണ് വ്യാഴാഴ്ച പുലർച്ചെയോടെ നാടകീയമായ അക്രമം നടന്നത്. വാതിൽ അകത്തുനിന്ന് പൂട്ടിയ ശേഷം വീട്ടുകാരെ മാരകായുധങ്ങൾ കാട്ടി ഭീഷണിപ്പെടുത്തുകയും മർദ്ദിക്കുകയുമായിരുന്നു. ആക്രമണത്തിന് ശേഷം മൂന്ന് ഇതരസംസ്ഥാന സ്ത്രീകളുടെയും വസ്ത്രങ്ങൾ അക്രമികൾ ബലപ്രയോഗത്തിലൂടെ അഴിച്ചുമാറ്റി.

കവർച്ചയിൽ 1.80 ലക്ഷം രൂപ വിലമതിക്കുന്ന സ്വർണാഭരണങ്ങളും 3.50 ലക്ഷത്തോളം രൂപയുടെ പണവും പത്തോളം മൊബൈൽ ഫോണുകളും നഷ്ടപ്പെട്ടു. ഇതിനുപുറമെ, ഭീഷണിപ്പെടുത്തി ക്രെഡൻഷ്യലുകൾ കൈക്കലാക്കി യു.പി.ഐ ട്രാൻസ്ഫർ വഴി പ്രതികളുടെ അക്കൗണ്ടിലേക്ക് പണം അയപ്പിക്കുകയും ചെയ്തു. ആകെ ആറു ലക്ഷത്തിലധികം രൂപയുടെ സാമ്പത്തിക നഷ്ടമാണ് ഇരയായവർക്കുണ്ടായത്.

സംഭവത്തിന് പിന്നിൽ മുൻപരിചയമുള്ളവരാണെന്നാണ് പോലീസിന്റെ പ്രാഥമിക നിഗമനം. അതിക്രമത്തിന് ഇരയായവരും അക്രമികളും തമ്മിൽ നേരത്തെ സാമ്പത്തിക ഇടപാടുകളും തർക്കങ്ങളും നിലനിന്നിരുന്നതായി പോലീസ് വ്യക്തമാക്കുന്നു. അക്രമികളിൽ നാലുപേർ മലയാളികളും ഒരാൾ ഇതരസംസ്ഥാനക്കാരനുമാണെന്ന് തിരിച്ചറിഞ്ഞിട്ടുണ്ട്.

സംഭവത്തിൽ പാലാരിവട്ടം പൊലീസ് കേസെടുത്ത് അന്വേഷണം ഊർജ്ജിതമാക്കിയിട്ടുണ്ട്. അക്രമികളിൽ പ്രധാനിയായ ഒരാളെ പൊലീസ് തിരിച്ചറിഞ്ഞിട്ടുണ്ടെന്നും ഒളിവിൽ കഴിയുന്ന പ്രതികളെ ഉടൻ തന്നെ വലയിലാക്കുമെന്നും അന്വേഷണ സംഘം അറിയിച്ചു.

വെള്ളി നിരക്കിലും വർദ്ധനവ്

തിരുവനന്തപുരം: സംസ്ഥാനത്ത് സ്വർണവിലയിൽ വൻ കുതിച്ചുചാട്ടം. ഉപഭോക്താക്കൾക്കും നിക്ഷേപകർക്കും ഒരുപോലെ കനത്ത തിരിച്ചടി നൽകി 22 കാരറ്റ് ഒരു ഗ്രാം സ്വർണത്തിന് ഇന്ന് 145 രൂപയുടെ വർദ്ധനവാണ് രേഖപ്പെടുത്തിയത്. ഇതോടെ ഒരു ഗ്രാം സ്വർണത്തിന്റെ വിപണി വില 14,155 രൂപയായി ഉയർന്നു.

ഗ്രാം വില വർദ്ധിച്ചതോടെ സംസ്ഥാനത്ത് ഒരു പവൻ സ്വർണത്തിന്റെ നിരക്ക് 1,13,240 രൂപയിലെത്തി നിൽക്കുകയാണ്. ഇന്നലെ ഒരു ഗ്രാം സ്വർണത്തിന് 14,010 രൂപയിലും ഒരു പവന് 1,12,080 രൂപയിലുമായിരുന്നു വ്യാപാരം പുരോഗമിച്ചിരുന്നത്. ഒറ്റ ദിവസം കൊണ്ട് പവൻ വിലയിൽ വലിയ ഉയർച്ചയാണ് രേഖപ്പെടുത്തിയത്.

അന്താരാഷ്ട്ര വിപണിയിലുണ്ടാകുന്ന സാമ്പത്തിക വ്യതിയാനങ്ങളും ഡോളറിന്റെ മൂല്യത്തിലുണ്ടാകുന്ന മാറ്റങ്ങളുമാണ് പ്രാദേശിക വിപണിയിലും സ്വർണവില കുതിച്ചുയരാൻ പ്രധാന കാരണമായത്. ആഗോളതലത്തിൽ നിക്ഷേപകർ സുരക്ഷിത നിക്ഷേപമെന്ന നിലയിൽ സ്വർണത്തിലേക്ക് ശ്രദ്ധ കേന്ദ്രീകരിക്കുന്നത് വില വർദ്ധനവിന്റെ വേഗത കൂട്ടുന്നു.

സ്വർണവിലയിലെ വർദ്ധനവിന് പിന്നാലെ സംസ്ഥാനത്ത് വെള്ളി നിരക്കിലും മുന്നേറ്റം ദൃശ്യമായിട്ടുണ്ട്. നിലവിൽ ഒരു ഗ്രാം വെള്ളിക്ക് 250 രൂപയിലാണ് വ്യാപാരം നടക്കുന്നത്. 10 ഗ്രാം വെള്ളിക്ക് 2,500 രൂപയും ഒരു കിലോഗ്രാം വെള്ളിക്ക് 2,50,000 രൂപയുമാണ് വിപണിയിലെ ഇന്നത്തെ നിരക്ക്.

വരും ദിവസങ്ങളിലും അന്താരാഷ്ട്ര വിപണിയിലെ ചലനങ്ങൾക്കനുസരിച്ച് സ്വർണ-വെള്ളി വിലയിൽ മാറ്റങ്ങൾ ഉണ്ടാകാൻ സാധ്യതയുണ്ടെന്നാണ് വിപണി വിദഗ്ദ്ധരുടെ വിലയിരുത്തൽ. വിവാഹ ആവശ്യങ്ങൾക്കും മറ്റുമായി സ്വർണം വാങ്ങാൻ കാത്തിരിക്കുന്ന സാധാരണക്കാർക്ക് നിലവിലെ വിലവർദ്ധനവ് വലിയ സാമ്പത്തിക ബാധ്യതയാണ് സൃഷ്ടിക്കുന്നത്.

'ലോ ആൻഡ് ഓർഡർ'
ഇന്ന് ബി​ഗ്സ്ക്രീനിൽ

കൊച്ചി: മലയാളി പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന പ്രശസ്ത സംവിധായകൻ രഞ്ജിത്തിന്റെ പുതിയ ചിത്രം 'ലോ ആൻഡ് ഓർഡർ' സെപ്റ്റംബർ 18ന് ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തുന്നു. വലിയ മുതൽമുടക്കിൽ വിശാലമായ കാൻവാസിലാണ് ചിത്രം ഒരുക്കിയിരിക്കുന്നത്.

റിയലിസ്റ്റിക് ആക്ഷൻ ത്രില്ലർ വിഭാഗത്തിൽപ്പെടുന്ന ഈ ചിത്രം തികച്ചും വേറിട്ടൊരു അനുഭവമായിരിക്കും പ്രേക്ഷകർക്ക് സമ്മാനിക്കുകയെന്ന് അണിയറപ്രവർത്തകർ അവകാശപ്പെടുന്നു. സമൂഹത്തിലെ ക്രമസമാധാന പാലനവും അതിനു പിന്നിലെ സങ്കീർണ്ണമായ സംഭവവികാസങ്ങളുമാണ് ചിത്രത്തിന്റെ പ്രധാന പ്രമേയം.

രഞ്ജിത്തിന്റെ മുൻകാല ചിത്രങ്ങളിൽ നിന്നും വ്യത്യസ്തമായി ആക്ഷനും ത്രില്ലിംഗ് മുഹൂർത്തങ്ങൾക്കും ഒരുപോലെ പ്രാധാന്യം നൽകിയാണ് ഈ ചിത്രം നിർമ്മിച്ചിരിക്കുന്നത്. മികച്ച സാങ്കേതിക പ്രവർത്തകരുടെ പങ്കാളിത്തവും വലിയ താരനിരയും ചിത്രത്തിന്റെ മാറ്റുകൂട്ടുന്നു.

ചിത്രത്തിന്റെ ചിത്രീകരണവും നിർമ്മാണാനന്തര പ്രവർത്തനങ്ങളും പൂർത്തിയായിക്കഴിഞ്ഞു. റിലീസ് തീയതി ഔദ്യോഗികമായി പ്രഖ്യാപിച്ചതോടെ പ്രേക്ഷകരും ആരാധകരും വലിയ ആവേശത്തിലാണ്. വലിയ ബജറ്റിൽ തിയേറ്റർ അനുഭവത്തിന് പ്രാധാന്യം നൽകിയാണ് ചിത്രം നിർമ്മിച്ചിരിക്കുന്നത്.
ഇന്ത്യയ്ക്ക് പുറമെ വിദേശ വിപണികളിലും ചിത്രം ഒരേസമയം റിലീസ് ചെയ്യും. സിനിമയുടെ കൂടുതൽ വിവരങ്ങളും ടീസറും വരും ദിവസങ്ങളിൽ പുറത്തുവിടുമെന്ന് അണിയറപ്രവർത്തകർ അറിയിച്ചു.

ആന്റോ അഗസ്റ്റിനെ
മാനന്തവാടി ജില്ലാ
ജയിലിലേക്ക് മാറ്റി

കൽപ്പറ്റ: അനധികൃതമായി മദ്യശേഖരം കൈവശം വെച്ച കേസിൽ അറസ്റ്റിലായ റിപ്പോർട്ടർ ടിവി എം.ഡി ആന്റോ അഗസ്റ്റിനെ കോടതി 14 ദിവസത്തേക്ക് റിമാൻഡ് ചെയ്തു. കൊച്ചിയിലെ ചാനൽ ഓഫീസിൽ നിന്ന് എക്സൈസ് അറസ്റ്റ് ചെയ്ത ഇയാളെ വൈകിട്ടോടെ സുൽത്താൻ ബത്തേരി കോടതിയിൽ ഹാജരാക്കുകയായിരുന്നു. കോടതി നടപടികൾ പൂർത്തിയാക്കിയ ശേഷം രാത്രിയോടെ പ്രതിയെ മാനന്തവാടി ജില്ലാ ജയിലിലേക്ക് മാറ്റി.

വയനാട് വാഴവറ്റയിലുള്ള ആന്റോ അഗസ്റ്റിന്റെ വീട്ടിൽ നിന്ന് എക്സൈസ് സംഘം നടത്തിയ പരിശോധനയിലാണ് വൻ മദ്യശേഖരം കണ്ടെടുത്തത്. പിടിച്ചെടുത്ത മദ്യത്തിൽ 12.75 ലിറ്റർ വ്യാജമദ്യമാണെന്ന് അന്വേഷണ സംഘം വ്യക്തമാക്കുന്നു. എക്സൈസ് അസിസ്റ്റന്റ് കമ്മീഷണർ ബൈജുവിന്റെ നേതൃത്വത്തിലുള്ള സംഘമാണ് കൊച്ചിയിലെത്തി അറസ്റ്റ് നടപടികൾ സ്വീകരിച്ചത്.

കോടതിയിൽ നടന്ന വാദപ്രതിവാദങ്ങൾക്കിടെ മദ്യം കണ്ടെടുത്ത വീട് ആന്റോ അഗസ്റ്റിന്റെ ഉടമസ്ഥതയിലുള്ളതാണെന്ന് പ്രോസിക്യൂഷൻ ശക്തമായി വാദിച്ചു. ഇത് തെളിയിക്കുന്നതിനായി 2025ൽ അടച്ച കെട്ടിടനികുതി രേഖകളും പ്രോസിക്യൂഷൻ കോടതിയിൽ ഹാജരാക്കി. വാഴവറ്റയിലെ വസതിയിൽ നിന്നു പിടിച്ചെടുത്തത് വ്യാജമദ്യമാണെന്ന കണ്ടെത്തലും കോടതിയുടെ ശ്രദ്ധയിൽപ്പെടുത്തി.

എന്നാൽ, വീടിന്റെ ഉടമസ്ഥാവകാശവുമായി ബന്ധപ്പെട്ട് 2025ന് മുൻപുള്ള രേഖകളാണ് പ്രതിഭാഗം കോടതിയിൽ സമർപ്പിച്ചത്. കേസിൽ തങ്ങൾക്ക് യാതൊരു പങ്കുമില്ലെന്നും ജാമ്യം അനുവദിക്കണമെന്നും പ്രതിഭാഗം അഭിഭാഷകൻ ആവശ്യപ്പെട്ടു. ഇരുഭാഗത്തിന്റെയും വാദം കേട്ട കോടതി പ്രതിയുടെ ജാമ്യാപേക്ഷയിൽ ഇന്ന് വിധി പറയാനായി മാറ്റി വെക്കുകയായിരുന്നു.

അറസ്റ്റ് രേഖപ്പെടുത്തിയ ശേഷം വൈകിട്ട് അഞ്ചു മണിയോടെ കോടതിയിൽ ഹാജരാക്കിയ ആന്റോ അഗസ്റ്റിന്റെ റിമാൻഡ് ഉത്തരവ് രാത്രി ഏഴു മണിയോടെയാണ് പുറത്തുവന്നത്. തുടർന്ന് പോലീസ് സംരക്ഷണത്തിൽ രാത്രി ഒമ്പതരയോടെ ഇയാളെ മാനന്തവാടി ജില്ലാ ജയിലിൽ എത്തിക്കുകയായിരുന്നു. ജാമ്യാപേക്ഷയിലെ ഇന്ന് വിധി കേസിൽ ഏറെ നിർണായകമാകും.

തട്ടിപ്പിന് മുൻ ഇടതുപക്ഷ
സർക്കാരും കൂട്ടുനിന്നിരുന്നുവെന്നും വെള്ളാപ്പള്ളി

തിരുവനന്തപുരം: അനധികൃതമായി വൻതോതിൽ മദ്യം കൈവശം വെച്ച കേസിൽ റിപ്പോർട്ടർ ടിവി എം.ഡി ആന്റോ അഗസ്റ്റിൻ അറസ്റ്റിലായ പശ്ചാത്തലത്തിൽ സർക്കാരിനെ അഭിനന്ദിച്ച് സന്തോഷം പ്രകടിപ്പിച്ച് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. മാധ്യമ സ്ഥാപനങ്ങളുടെ തണലിൽ എന്തും ചെയ്യാമെന്ന ധാർഷ്ട്യത്തിനാണ് ഇതോടെ തിരിച്ചടിയേറ്റിരിക്കുന്നതെന്നും നടേശൻ പറഞ്ഞു. എസ്.എൻ.ഡി.പി യോഗം മുഖമാസികയായ 'യോഗനാദ'ത്തിലെഴുതിയ മുഖപ്രസംഗത്തിലാണ് വെള്ളാപ്പള്ളിയുടെ പ്രതികരണം.

തട്ടിപ്പുകാരും പലിശ രാജാക്കന്മാരും ക്രിമിനലുകളും മാധ്യമ സ്ഥാപനങ്ങൾ തുടങ്ങി സമൂഹത്തിൽ മാന്യന്മാരാകാൻ ശ്രമിക്കുന്നതിന്റെ പരിണിതഫലമാണ് കേരളം ഇപ്പോൾ കണ്ടുകൊണ്ടിരിക്കുന്നത്. മാധ്യമ മുതലാളിമാരായാൽ അതിന്റെ മറവിൽ അനധികൃത ഇടപാടുകൾ നടത്താമെന്നും ആരെയും ഭയക്കേണ്ടതില്ലെന്നും ഇക്കൂട്ടർ കരുതുന്നു.

മെസ്സിയുടെ പേരിൽ നടന്ന തട്ടിപ്പിന് പിന്നാലെ വയനാട് വാഴവറ്റയിലുള്ള ആന്റോ അഗസ്റ്റിന്റെ വസതിയിൽ വിജിലൻസും പോലീസും നടത്തിയ പരിശോധനയിലാണ് വൻ മദ്യശേഖരം കണ്ടെത്തിയത്. തുടർന്ന് എക്സൈസ് കൊച്ചിയിലെ ചാനൽ ഓഫീസിലെത്തി ആന്റോ അഗസ്റ്റിന്റെ അറസ്റ്റ് രേഖപ്പെടുത്തുകയായിരുന്നു. പിടിച്ചെടുത്തതിൽ 12.75 ലിറ്റർ വ്യാജമദ്യവും വിദേശ നിർമ്മിത മദ്യവും ഉൾപ്പെടുന്നുവെന്ന് എക്സൈസ് കോടതിയെ അറിയിച്ചു.

കേസിൽ അറസ്റ്റിലായ ആന്റോ അഗസ്റ്റിനെ 14 ദിവസത്തേക്ക് വിചാരണക്കോടതി റിമാൻഡ് ചെയ്തു മാനന്തവാടി ജില്ലാ ജയിലിലേക്ക് അയച്ചു. വസതി ആന്റോയുടെ പേരിലുള്ളതാണെന്ന നികുതി രേഖകൾ പ്രോസിക്യൂഷൻ കോടതിയിൽ ഹാജരാക്കി. കസ്റ്റഡിയിലെടുത്ത മദ്യശേഖരം വ്യാജമദ്യമാണെന്ന പ്രാഥമിക റിപ്പോർട്ടും കോടതിക്ക് കൈമാറിയിട്ടുണ്ട്. പ്രതിഭാഗം സമർപ്പിച്ച ജാമ്യാപേക്ഷയിൽ കോടതി നാളെ വിധി പ്രസ്താവിക്കും.

അതേസമയം, മെസ്സിയെ കേരളത്തിലെത്തിക്കാമെന്ന് പറഞ്ഞ് നടത്തിയ തട്ടിപ്പിന് മുൻ ഇടതുപക്ഷ സർക്കാരും കൂട്ടുനിന്നിരുന്നുവെന്ന് വെള്ളാപ്പള്ളി നടേശൻ കുറ്റപ്പെടുത്തി. മാധ്യമത്തിന്റെ മറവിൽ നടത്തിയ സാമ്പത്തിക തട്ടിപ്പുകളും നിയമവിരുദ്ധ പ്രവർത്തനങ്ങളും ശക്തമായ അന്വേഷണത്തിലൂടെ പുറത്തുകൊണ്ടുവന്ന സംസ്ഥാന സർക്കാരിന്റെയും ആഭ്യന്തര വകുപ്പിന്റെയും നടപടിയെ പൂർണ്ണമായും പിന്തുണയ്ക്കുന്നുവെന്ന് വ്യക്തമാക്കിക്കൊണ്ടാണ് നടേശൻ നിലപാട് അവസാനിപ്പിച്ചത്.

പിടിച്ചെടുത്ത
തെളിവുകൾ
ഇന്ന് കോടതിയിൽ

കൊച്ചി: ഫുട്ബോൾ താരം ലിയോണൽ മെസ്സിയുടെയും അർജന്റീന ടീമിന്റെയും വരവുമായി ബന്ധപ്പെടുത്തി നടന്ന കോടികളുടെ സാമ്പത്തിക തട്ടിപ്പ് കേസിൽ അന്വേഷണം കൂടുതൽ വിപുലീകരിച്ച് പ്രത്യേക അന്വേഷണ സംഘം. കേസുമായി ബന്ധപ്പെട്ട് അന്വേഷണ ഉദ്യോഗസ്ഥനായ എസ്.പി വിക്രമന്റെ നേതൃത്വത്തിൽ പിടിച്ചെടുത്ത രേഖകളുടെ വിശദമായ പരിശോധന ആരംഭിച്ചു.

റിപ്പോർട്ടർ ടിവി ഓഫീസിൽ നടത്തിയ നീണ്ട പരിശോധനയ്ക്കൊടുവിൽ പൊലീസ് കസ്റ്റഡിയിലെടുത്ത സുപ്രധാന രേഖകൾ ഇന്ന് വിചാരണക്കോടതിയിൽ ഹാജരാക്കും. റെയ്ഡിൽ പിടിച്ചെടുത്ത മൊബൈൽ ഫോണുകൾ, മെമ്മറി കാർഡുകൾ, ലാപ്ടോപ്പുകൾ അടക്കമുള്ള ഡിജിറ്റൽ തെളിവുകൾ ശാസ്ത്രീയമായി പരിശോധിച്ച് വിവരങ്ങൾ വീണ്ടെടുക്കുന്നതിനായി ഫോറൻസിക് ലബോറട്ടറിയിലേക്ക് അയക്കാനുള്ള അപേക്ഷയും പോലീസ് ഇന്ന് കോടതിയിൽ സമർപ്പിക്കും.

കേസിലെ നിർണായക ഘട്ടമെന്ന നിലയിൽ മുൻ കായിക മന്ത്രി വി. അബ്ദുറഹ്മാനെയും ജി.എസ്.ടി വകുപ്പിലെ മുതിർന്ന ഉദ്യോഗസ്ഥരെയും വൈകാതെ ചോദ്യം ചെയ്യുമെന്നാണ് അന്വേഷണ സംഘത്തിൽ നിന്ന് ലഭിക്കുന്ന വിവരം. സാമ്പത്തിക ഇടപാടുകളുമായി ബന്ധപ്പെട്ട് ജി.എസ്.ടി വകുപ്പിൽ നിന്ന് ലഭിക്കേണ്ട വിവരങ്ങൾ കൂടി ശേഖരിച്ച ശേഷമായിരിക്കും ചോദ്യം ചെയ്യലിന്റെ അടുത്ത നടപടികളിലേക്ക് കടക്കുക.

മുൻ കായിക മന്ത്രിയെ ചോദ്യം ചെയ്യുന്നതിനൊപ്പം തന്നെ പിടിച്ചെടുത്ത രേഖകൾ വിശദമായി പരിശോധിച്ച് കഴിഞ്ഞാൽ ജി.സി.ഡി.എ, സ്പോർട്സ് കേരള ഫൗണ്ടേഷൻ എന്നീ സ്ഥാപനങ്ങളെ കേന്ദ്രീകരിച്ചുള്ള അന്വേഷണത്തിനും എസ്.ഐ.ടി തുടക്കമിടും. മെസ്സിയെ കൊണ്ടുവരുന്നതിന്റെ മറവിൽ കലൂർ അന്താരാഷ്ട്ര സ്റ്റേഡിയവുമായി ബന്ധപ്പെട്ട കരാറുകളിലും കൈമാറ്റങ്ങളിലും ക്രമക്കേട് നടന്നിട്ടുണ്ടോ എന്നാണ് അന്വേഷണ സംഘം പ്രധാനമായും പരിശോധിക്കുന്നത്.

റിപ്പോർട്ടർ ടിവിക്കും ആന്റോ അഗസ്റ്റിനുമെതിരെ
സാബു എം. ജേക്കബ്

കൊച്ചി: റിപ്പോർട്ടർ ടിവി ഉടമ ആന്റോ അഗസ്റ്റിനും ചാനലിനുമെതിരെ ഗുരുതര ആരോപണങ്ങളുമായി ട്വന്റി20 പാർട്ടി പ്രസിഡന്റും കിറ്റെക്സ് ഗ്രൂപ്പ് മാനേജിംഗ് ഡയറക്ടറുമായ സാബു എം. ജേക്കബ്. ആന്റോ അഗസ്റ്റിൻ നടത്തിയ സാമ്പത്തിക തട്ടിപ്പുകളും ക്രമക്കേടുകളും തെളിയിക്കുന്ന 800 പേജുകളുള്ള നിർണായക തെളിവുകൾ തന്റെ കൈവശമുണ്ടെന്നാണ് സാബു ജേക്കബ് മാധ്യമങ്ങൾക്ക് മുന്നിൽ അവകാശപ്പെട്ടത്.

നിലവിൽ റിപ്പോർട്ടർ ടിവിക്ക് കേന്ദ്ര സർക്കാരിന്റെ ദേശീയ സുരക്ഷാ ക്ലിയറൻസോ നിയമപരമായ ബ്രോഡ്കാസ്റ്റിംഗ് ലൈസൻസോ ഇല്ലെന്ന് അദ്ദേഹം ആരോപിച്ചു. സുരക്ഷാ മാനദണ്ഡങ്ങൾ പാലിക്കാതെയും കേന്ദ്ര വാർത്താവിതരണ മന്ത്രാലയത്തിന്റെ കൃത്യമായ അനുമതിയില്ലാതെയുമാണ് ചാനൽ ഇപ്പോൾ പ്രവർത്തിക്കുന്നതെന്നാണ് സാബു ജേക്കബിന്റെ പ്രധാന വെളിപ്പെടുത്തൽ.

ലയണൽ മെസ്സിയെ കേരളത്തിൽ എത്തിക്കാമെന്ന വാഗ്ദാനത്തിന് പിന്നിലും വൻ ഗൂഢാലോചന നടന്നിട്ടുണ്ടെന്ന് അദ്ദേഹം പറഞ്ഞു. മെസ്സി തട്ടിപ്പിന്റെ മറവിൽ കൊച്ചി കലൂർ ജവഹർലാൽ നെഹ്റു അന്താരാഷ്ട്ര സ്റ്റേഡിയം കൈവശപ്പെടുത്താനായിരുന്നു നീക്കം. കഴിഞ്ഞ അഞ്ച് വർഷത്തെ ചാനലിന്റെ സാമ്പത്തിക ഇടപാടുകൾ അന്വേഷിച്ചാൽ കൂടുതൽ തട്ടിപ്പുകൾ പുറത്തുവരുമെന്നും എൻഫോഴ്സ്മെന്റ് ഉദ്യോഗസ്ഥരെയും രാഷ്ട്രീയ നേതാക്കളെയും സ്വാധീനിച്ചാണ് പ്രവർത്തനമെന്നും അദ്ദേഹം കൂട്ടിച്ചേർത്തു.

വിഷയവുമായി ബന്ധപ്പെട്ട് സാബു എം. ജേക്കബ് സമർപ്പിച്ച ഹർജിയിൽ കേരള ഹൈക്കോടതി കേന്ദ്ര വാർത്താവിതരണ മന്ത്രാലയത്തോട് വിശദീകരണം തേടിയിട്ടുണ്ട്. ചാനലിന്റെ ഉടമസ്ഥാവകാശവും ലൈസൻസും കൈമാറിയതിൽ ഗുരുതരമായ ചട്ടലംഘനം നടന്നിട്ടുണ്ടെന്നാണ് ഹൈക്കോടതിയിൽ സമർപ്പിച്ച ഹർജിയിലെ പ്രധാന വാദം.

നേരത്തെ, സാബു എം. ജേക്കബിനും കിറ്റെക്സ് ഗ്രൂപ്പിനുമെതിരെ അപകീർത്തികരമായ വാർത്തകൾ സംപ്രേഷണം ചെയ്യുന്നതിൽ നിന്ന് റിപ്പോർട്ടർ ചാനലിനെ പെരുമ്പാവൂർ സബ് കോടതി വിലക്കിയിരുന്നു. ഇതിനുപിന്നാലെയാണ് ആന്റോ അഗസ്റ്റിനെയും ചാനൽ മാനേജ്‌മെന്റിനെയും കൂടുതൽ പ്രതിരോധത്തിലാക്കുന്ന പുതിയ ആരോപണങ്ങളുമായി സാബു ജേക്കബ് രംഗത്തെത്തിയിരിക്കുന്നത്.