Anup Jose

പണ്ട് സ്റ്റാർ മൂവീസ് ചാനലിൽ ഫാസ്റ്റ് and ദി ഫ്യൂരിസ് എന്നൊരു സിനിമ ആദ്യമായ് കണ്ടപ്പോൾ കിട്ടിയ ഒരു തരിപ്പ് ഉണ്ടായിരുന്നു.

കസേരയിൽ ഇരുന്നല്ല നിന്നും നിലത്തിരുന്നും ഒക്കെയായിരുന്നു ആ സിനിമ അന്ന് കണ്ടത്.

അതിന് ശേഷം 2 Fast 2 Furious എന്നൊരു രണ്ടാം ഭാഗം ഉണ്ടെന്ന് അറിഞ്ഞപ്പോൾ അതും എപ്പഴോ ഇതേപോലെ ടീവിയിൽ കണ്ടു.

പിന്നീട് ടോക്യോ ഡ്രിഫ്ട് എന്ന മൂന്നാം ഭാഗം കാണുന്നത് കമ്പ്യൂട്ടറിൽ സിഡി ഇട്ടായിരുന്നു, ആദ്യ രണ്ട് ഭാഗങ്ങളുമായി അന്ന് ബന്ധം ഒന്നുമില്ലാതിരുന്ന മൂന്നാം ഭാഗവും നന്നായി തന്നെ ഇഷ്ടപ്പെട്ടു.

പിന്നെ ദേ നാല്, അഞ്ച്, ആറ് ഇങ്ങനെ ചറപറാ ഓരോ പാർട്ട്‌ വരാൻ തുടങ്ങി, നാലാം ഭാഗം കുറച്ചു എന്തോ കണ്ട് നിർത്തിയതാണ്, പിന്നെ ഇറങ്ങിയതിന്റെ ഒക്കെ ട്രോളുകളും ഏതാനും രംഗങ്ങളും കണ്ടിട്ടുണ്ട് എന്നല്ലാതെ കാണാൻ തോന്നിയിട്ടേ ഇല്ല.

ഒരു സ്ട്രീറ്റ് ലെവൽ അനധികൃത കാർ റേസിംഗും ചില്ലറ മോഷണവും ഒക്കെ കാണിച്ചു തുടങ്ങിയ ഫാസ്റ്റ് and ഫ്യൂരിയസ് പൊന്മുട്ട ഇടുന്ന താറവാണെന്ന് പ്രൊഡക്ഷൻ സ്റ്റുഡിയോയ്ക്ക് മനസിലായതോടെ തെരുവിൽ കൂടി കാർ ഓടിച്ചു നടന്ന മച്ചാന്മാരെ,

സ്പേസിൽ വരെ പോയി ലോകത്തെ രക്ഷിക്കുന്ന സൂപ്പർഹീറോ പരിവേഷത്തിലേക്ക് മാറ്റി.

വർഷം പത്തിരുപത് കഴിഞ്ഞെങ്കിലും അവരുടെ കഥ ഇപ്പോഴും തീർന്നിട്ടില്ല.

ദൃശ്യത്തിന്റെ പേർസണൽ ഒപിന്യൻ എന്ന് പറഞ്ഞിട്ട് എന്തിനാ ഇതൊക്കെ പറയുന്നേ എന്ന് സംശയം ഉണ്ടെങ്കിൽ,

ഏതാണ്ട് ഇതേപോലെ ഒരു ഫീലാണ് ദൃശ്യം 3 കണ്ട് കഴിഞ്ഞപ്പോൾ എനിക്ക് തോന്നിയത്.

ഇത് മൂന്നാം ഭാഗം കൊണ്ടൊന്നും നിർത്താൻ പദ്ധതി ഇല്ലായെന്ന് തോന്നുന്നു, ജിത്തു ജോസഫിനു ഇനി എപ്പോഴെങ്കിലും ഒരു കഥ തോന്നിയാൽ നാലും അഞ്ചും ഒക്കെ സംഭവിക്കാം, ഏതാണ്ട് ഫാസ്റ്റ് ആൻഡ് ഫ്യൂരിയസ് പോലെ വേറെ ലെവലിൽ ഒക്കെ കഥ പോയേക്കാം എന്നൊരു തോന്നൽ.

ഇങ്ങനെ പറഞ്ഞു എന്നുകരുതി ദൃശ്യം 3 ഒരിക്കലും ഒരു മോശം സിനിമയല്ല, എന്നാലും ഇങ്ങനെ ഒക്കെ വേണമായിരുന്നോ, അല്പം കൂടിപ്പോയില്ലേ, അല്ലെങ്കിൽ മറ്റൊരു തരത്തിൽ ഇതേ ആശയം പറയാൻ കഴിയുമായിരുന്നില്ലേ എന്നൊരു തോന്നൽ.

ഒരുപക്ഷെ ഇങ്ങനെ ഒരെണ്ണം ഇപ്പോൾ തന്നെ വേണമെന്ന് ഇത്തിരി പ്രെഷർ ഇട്ട് എഴുതിയത് പോലൊരു ഫീൽ പലയിടത്തും ഉണ്ടായിരുന്നു.

Still it's a watchable one, 1 and 2 ന്റെ പോലെ വീണ്ടും വീണ്ടും കാണാനുള്ള ആ ഒരിത് ഇതിൽ മിസ്സിംഗ്‌ ആണ്.

ഇതൊക്കെ എന്റെ വ്യക്തിപരമായ അഭിപ്രായം മാത്രമാണ്, ഇതിനോട് യോജിക്കുന്നവരും വിയോജിക്കുന്നവരും കമന്റ്‌ ചെയ്യുമല്ലോ...

Kydyuzhini - ഇങ്ങനെ ഒരു പേര് കേട്ടിട്ടുണ്ടോ, ആൾ അറിയപ്പെടുന്നത് നമ്മൾ ഒന്നും ഇതുവരെ ഉപയോഗിചിട്ടില്ലാത്ത ചില gadget ഒക്കെ,

അവയുടെ പരസ്യ വീഡിയോ കണ്ടിട്ട് വാങ്ങി ഉപയോഗിച്ച് നോക്കി അതിന്റെ റിവ്യൂ പോലെ ഒരു വീഡിയോ ഇട്ട് വൈറൽ ആയിട്ടാണ്.

വെറും 100 വീഡിയോ കൊണ്ട് മില്യൺ follower മാരെ സൃഷ്ടിക്കാൻ ഇദ്ദേഹത്തിന് കഴിഞ്ഞു.

ഇതൊക്കെ കണ്ടിട്ട് മറ്റ് പലരും ഇദ്ദേഹത്തെ അനുകരിച്ചു ഇതുപോലെ വീഡിയോ ചെയ്യാൻ തുടങ്ങിയിട്ടുണ്ട്, പക്ഷേ അവരും ഇദ്ദേഹവും ആയിട്ടുള്ള പ്രധാന വ്യത്യാസം,

ഇദ്ദേഹം താൻ വാങ്ങുന്ന gadget എല്ലാം 3 ആയിട്ട് തരം തിരിക്കും, ഏറ്റവും മികച്ചവ ഗോൾഡ്, തരക്കേടില്ലെങ്കിൽ സിൽവർ, ഉടായിപ്പ് ആണെങ്കിൽ ബ്രോൺസ്.

ഇദ്ദേഹത്തിന്റെ വീഡിയോ കാണാനുള്ള ഏറ്റവും പ്രധാന കാരണവും ഇത് തന്നെയാണ്, ഒരു വസ്തുവിന്റെ ഇൻട്രോ കാണുമ്പോൾ അത് നല്ലതാണോ ചീത്തയാണോ എന്നറിയാൻ സ്വാഭാവികമായും നമ്മൾക്ക് ഒരു കൗതുകം തോന്നും.

എന്നാൽ കോപ്പി ചെയ്തവരുടെ അക്കൗണ്ട് നോക്കിയാൽ അവർ ഇതിന്റെ ബിസിനസ്സ് സാധ്യത മാത്രം മുന്നിൽ കണ്ടിട്ട് എല്ലാത്തിനും പോസിറ്റീവ് മാത്രമാണ് പറയുന്നത്,

അല്ലെങ്കിൽ പോസിറ്റീവ് ഐറ്റം മാത്രമേ അവരുടെ വിഡിയോയിൽ ഉപയോഗിക്കുകയുള്ളൂ. അതിനാൽ തന്നെ ഒർജിനൽ ആളുടെ വീഡിയോ കാണാനുള്ള curiosity നമ്മൾക്ക് ഉണ്ടാവില്ല.

Gadget ഈ രീതിയിൽ നല്ലതും ചീത്തയുമായി തരം തിരിക്കാൻ ഒരു പ്രശ്നവുമില്ല, അത് കാണുന്ന ആർക്കും വ്യത്യസ്തമായി അഭിപ്രായം വരാനും സാധ്യതയില്ല.

കാരണം അവ പ്രവർത്തിക്കുന്നുണ്ടോ എന്ന് നോക്കുമ്പോൾ എല്ലാവർക്കും ഒരേപോലെ തന്നെയായിരിക്കും വിലയിരുത്താൻ കഴിയുക. വീഡിയോ ചെയ്ത ആൾ ഒരു ടോർച് വാങ്ങി, അത് തെളിച്ചു നോക്കിയിട്ട് വെളിച്ചം ഇല്ലെങ്കിൽ നമ്മൾ തെളിച്ചാലും അങ്ങനെ തന്നെയായിരിക്കും.

ഏതാണ്ട് ഇതേപോലെയാണ് സിനിമ കണ്ടിട്ട് അഭിപ്രായം പറയുന്നവരുടെ കാര്യവും.

തീർച്ചയായും നല്ല സിനിമയും മോശം സിനിമകളും ഉണ്ട്, മോശം എന്ന് വച്ചാൽ തട്ടിക്കൂട്ടി മറ്റ് പല ഉദ്ദേശത്തിന്റെ പുറത്തും എടുക്കുന്ന സിനിമകൾ.

പൊതുവേ അത്തരം സിനിമകൾ ഇറങ്ങുന്നത് നമ്മൾ അറിയുക പോലുമില്ല, അവയെ ഒന്നും ഈ അഭിപ്രായം പറഞ്ഞു വീഡിയോ ചെയ്യുന്ന ആളുകളും ഉപയോഗിക്കാറില്ല.

അതിനാൽ അത്തരം മോശം സിനിമകളെ മാറ്റി നിർത്തി ബാക്കി ഉള്ളവയെ പറ്റി സംസാരിച്ചാൽ,

അതിനെ മോശം നല്ലത് എന്ന് സർട്ടിഫിക്കറ്റ് നൽകാൻ ഒരാൾക്കും പറ്റില്ല, ചില ആളുകൾക്ക് ഇഷ്ടം ആകുന്നത് മറ്റ് ചിലർക്ക് ഇഷ്ടമാകില്ല.

സൂര്യയുടെ കങ്കുവാ എന്നൊരു സിനിമ ഇറങ്ങിയിരുന്നു, അതൊന്നും അവർ തട്ടിക്കൂട്ടി എടുത്ത സിനിമയല്ല, പക്ഷേ മൊത്തത്തിൽ ഔട്ട്‌ വന്നപ്പോൾ കുറച്ചു പാളിച്ചകൾ വന്നു ഭൂരിപക്ഷം ആളുകൾക്കും ഇഷ്ടമായില്ല.

നല്ല ഒരു സിനിമ എടുക്കാൻ വേണ്ടി പരിശ്രമിച്ചിട്ട് ഭൂരിപക്ഷം ആളുകളെയും തൃപ്തിപ്പെടുത്താൻ കഴിഞ്ഞില്ലെങ്കിൽ ആ സിനിമ തീർച്ചയായും തിയേറ്ററിൽ പരാജയപ്പെടും.

അതൊന്നും ഓൺലൈൻ ആയിട്ട് അഭിപ്രായം പറയുന്ന ആളുകളുടെ വീഡിയോ കണ്ടിട്ട് പരാജയപ്പെടുന്നതല്ല.

ഒരു reviewer ന് ആളുകളെ ആദ്യ ദിവസം theatre ലേക്ക് കയറ്റാനും തടയാനും ചെറിയൊരു influence ഉണ്ടാകാം, പക്ഷേ ഒരു സിനിമയെ വിജയിപ്പിക്കാനോ പരാജയപ്പെടുത്താനോ ഒടുവിൽ തീരുമാനിക്കുന്നത് പ്രേക്ഷകർ തന്നെയാണ്.
കാരണം review കേട്ട് കയറുന്ന ആളും ഒടുവിൽ സ്വന്തം അഭിപ്രായം ഉണ്ടാക്കും.

ഒരു സിനിമ ശരിക്കും ആളുകൾക്ക് connect ആയാൽ പിന്നെ അതിനെ രക്ഷിക്കാൻ PR വേണ്ട, തകർക്കാൻ reviewers നും പറ്റില്ല.

ചിത്രത്തിൽ ഈ ഹൈവേയിലൂടെ ഓടുന്നത് ഒരു യഥാർത്ഥ കാർ അല്ല, Tanna Dhaval എന്നൊരു വ്യക്തി സ്വന്തമായി നിർമ്മിച്ച സൂപ്പർ കാറിന്റെ ഒരു replica ആണ്.

അതായത് ഒരു സാധാരണ കാറിനെ അടിമുടി പൊളിച്ചു പണിത് രൂപ മാറ്റം വരുത്തിയിട്ടാണ് ഹൈവേയിലൂടെ നമ്പർ പ്ലേറ്റ് പോലുമില്ലാതെ ഓടിച്ചു കൊണ്ട് നടക്കുന്നത്.

അത് മാത്രമല്ല ഇതിന്റെ എല്ലാം വീഡിയോ അദ്ദേഹം സമൂഹ മാധ്യമങ്ങളിലൂടെ പങ്ക് വയ്ക്കുന്നും ഉണ്ട്, ഒരു സോഷ്യൽ മീഡിയ താരം കൂടിയാണ് ആൾ.

ഗുജറാത്ത്‌ സ്വദേശിയായ ഇദ്ദേഹം ഇത്തരത്തിൽ ധാരാളം ബൈക്കുകളും കാറുകളും രൂപ മാറ്റം വരുത്തി നിർമ്മിച്ചിട്ടുണ്ട്.

അതിൽ ചിലതിന്റെ വിവരങ്ങൾ കൂടി ചുവടെ നൽകട്ടെ.

ലാംബോർഗിനി ടെർസോ മില്ലേനിയോ (Lamborghini Terzo Millennio): ഒരു ഹോണ്ട സിവിക് (Honda Civic) കാർ ഉപയോഗിച്ച് വെറും 12.5 ലക്ഷം രൂപ ചിലവിലാണ് കോടികൾ വിലമതിക്കുന്ന ലാംബോർഗിനി സൂപ്പർകാറിന്റെ റെപ്ലിക്ക ഇദ്ദേഹം നിർമ്മിച്ചത്. ഈ പ്രോജക്റ്റിലൂടെയാണ് ഇദ്ദേഹം ഇന്ത്യയൊട്ടാകെ വൈറലായത്.

ലൈക്കാൻ ഹൈപ്പർസ്പോർട്സ് (Lykan Hypersport): 'ഫാസ്റ്റ് ആൻഡ് ഫ്യൂരിയസ്' സിനിമയിലൂടെ പ്രശസ്തമായ ഈ ഹൈപ്പർ കാറിന്റെ റെപ്ലിക്കയും ഇദ്ദേഹം കൈകൊണ്ട് നിർമ്മിച്ചിട്ടുണ്ട്.

ബുഗാട്ടി ലാ വോയിച്ചർ നോയർ (Bugatti La Voiture Noire): ബുഗാട്ടിയുടെ അതിപ്രശസ്തമായ മോഡലുകളിലൊന്നിന്റെ നിർമ്മാണവും ഇദ്ദേഹം നടത്തിയിട്ടുണ്ട്.

ഹോംമേഡ് സ്പോർട്സ് ബൈക്ക്: സാധാരണ ബൈക്കുകളുടെ ഭാഗങ്ങൾ ചേർത്ത് 800cc എഞ്ചിനുള്ള സ്പോർട്സ് ബൈക്കും ഇദ്ദേഹം സ്വന്തമായി നിർമ്മിച്ചിട്ടുണ്ട്

കേന്ദ്ര നിയമം മോഡിഫിക്കേഷന് എതിരാണ്, ആ നിയമം തന്നെയാണ് കേരളത്തിലും ഗുജറാത്തിലും എങ്കിൽ ഇദ്ദേഹം ഇപ്പോൾ ഒരു സൂപ്പർ കാർ വാങ്ങാനുള്ള തുക ഫൈൻ ആയി നൽകേണ്ടി വന്നേനെ.

എന്നിട്ടും ഇതൊക്കെ എങ്ങനെ സാധിക്കുന്നു എന്നതിന് ആർക്കെങ്കിലും വ്യക്തമായ ഒരു ഉത്തരം നൽകാൻ കഴിയുമോ?

ഇത്തരത്തിൽ ഒരു വാഹനത്തിന്റെ ഘടന തന്നെ മാറ്റി നമ്പർ പ്ലേറ്റ് പോലുമില്ലാതെ റോഡിൽ ഇറക്കുന്നതിനോട് ഒട്ടും യോജിപ്പില്ല, അത്തരത്തിൽ ഒരു നിയമ ഭേദഗതി ഇവിടെ വരണമെന്നും ആഗ്രഹിക്കുന്നില്ല.

പക്ഷേ കേന്ദ്രത്തിന്റെ കീഴിലാണ്, ഇവിടെ ഒരു മാറ്റവും വരില്ല എന്ന് പറയുന്നവർ മറ്റുള്ള സംസ്ഥാനങ്ങളിലെ കാഴ്ചകൾ കൂടി ഒന്ന് ശ്രദ്ധിക്കുന്നത് നല്ലതാണ്.

അവരൊക്കെ കളർ ഡ്രസ്സ്‌ ഇട്ട് നടക്കുമ്പോൾ നമ്മൾ മാത്രം യൂണിഫോം ഇട്ട് നടക്കുന്നത് ശരിയാണോ... 😌

ഇപ്പോ ഒരു സംഭവം ഉണ്ടായി, ഒരേട്ടുമണി ആയപ്പോ ഒരു തോന്നൽ മാന്നനം പള്ളി വരെ ഒന്ന് പോകാനായിട്ട്. നേരെ ബുള്ളറ്റും എടുത്ത് മാന്നാനത്തേക്ക് വച്ചു പിടിച്ചു.

പള്ളിയിലേക്കുള്ള വഴിയേ കയറുന്നത് വരെ എല്ലാം സാധാരണ പോലെ, പക്ഷേ കുറച്ചു അങ്ങ് ചെന്ന് കഴിഞ്ഞു ഈ വഴി രണ്ടായിട്ട് തിരിയുന്ന ഒരിടമുണ്ട്, KE കോളേജിലേക്ക് നേരെയും പള്ളിയിലേക്ക് ഇടത് വശത്തേക്ക് വളഞ്ഞും കയറണം.

അങ്ങനെ ഞാൻ വളവ് തിരിഞ്ഞതും അവിടെ കുറച്ചു പട്ടികൾ റോഡിൽ കിടക്കുന്നത് കണ്ടു. അവിടെയൊക്കെ അങ്ങനെ സ്ഥിരമായി കാണാറുള്ളത് കൊണ്ട് അതിനെ മൈൻഡ് ചെയ്യാതെ മുന്നോട്ട് പോകാൻ തുടങ്ങിയതും അതിൽ ഒരു മൂന്ന് നാലെണ്ണം കുരച്ചു കൊണ്ട് ഒപ്പം ഓടാൻ തുടങ്ങി.

ഓടുന്ന ബൈക്ക് കണ്ടിട്ടാണ് ഇങ്ങനെ വരുന്നത് നമ്മൾ നിർത്തിയാൽ ഇവയൊക്കെ പേടിച്ചു പോകും എന്നൊക്കെ കേട്ടിട്ടുണ്ടെങ്കിലും സാഹചര്യം അത്ര അനുകൂലം അല്ലായിരുന്നു, അതിനാൽ പെട്ടന്ന് സ്പീഡ് കൂട്ടി അതിങ്ങളിൽ നിന്നും രക്ഷപെട്ടു പള്ളിയുടെ മുറ്റത്ത് എത്തി.

അവിടെ ചെന്നപ്പോ മറ്റൊരു പ്രശ്നമുണ്ട്, തിരിച്ചും അതേ വഴിയേ വേണം എനിക്ക് പോകാൻ, പട്ടികളെ നേരിടാതെ വേറെ വഴിയില്ല, എന്നാപ്പിന്നെ എന്തിനാ പോകാൻ നേരത്തേക്ക് ആക്കുന്നത് ഇപ്പോൾ തന്നെ ആക്കിയേക്കാം എന്നും കരുതി കട്ട കലിപ്പിൽ ഞാൻ അങ്ങോട്ടേക്ക് നടന്നു.

മനസ്സിൽ മറ്റേ പ്രേമത്തിലെ പാട്ടുമുണ്ട്, കണ്ണ് ചുവക്കണ് പല്ല് കടിക്കണ്, പേശികളാകെ വലിഞ്ഞു മുറുകണ്...

വഴിയല്ലേ നിറയെ കല്ല് കാണുമെന്നുള്ള ധാരണയിലാണ് ഞാൻ പറന്നു അങ്ങോട്ട് ചെല്ലുന്നത്, ഇറങ്ങി ചെന്നപ്പോഴേ ഒരു കല്ല് കിട്ടി, അപ്പോഴേക്കും പട്ടികൾ എന്നെ കണ്ടു, മൂന്ന് നാലല്ല, ഒരു എഴേട്ടെണ്ണമുണ്ട്, എല്ലാം എന്നേ കണ്ട് എന്റെ നേരെ ഓടി വരാനും തുടങ്ങി.

പിന്നെ എന്താ ചെയ്യുക, തിരിഞ്ഞു ഓടിയാൽ എട്ടിന്റെ പണി കിട്ടും, അപ്പോഴും എനിക്ക് ഫുൾ ധൈര്യമാണ്, ഉണ്ടായിരുന്ന കല്ല് വലിച്ചെറിഞ്ഞു ഞാനും മുന്നോട്ട് തന്നെ ഓടിയപ്പോൾ അവ ഓട്ടം നിർത്തി.

യെവൻ പ്രശ്നമാണെന്ന് പരസ്പരം പറഞ്ഞു, അപ്പോഴാണ് ട്വിസ്റ്റ്‌, ഒരൊറ്റ കല്ല് പോലുമില്ല 😬

പണി പാളിയോ എന്ന് ഞാനും പട്ടികളും അങ്ങോട്ടും ഇങ്ങോട്ടും നോക്കി നിൽക്കുന്ന ഒരു അവസ്ഥ...

അപ്പോഴാണ് അടുത്ത ട്വിസ്റ്റ്‌, ഞാൻ ആദ്യം എറിഞ്ഞ കല്ല് നേരെ പോയി കൊണ്ടത് കുറച്ചു മുന്നിൽ ഉണ്ടായിരുന്ന ഇലക്ട്രിക് പോസ്റ്റിൽ ആയിരുന്നു.

അത് അവിടെ എവിടേലും ഉണ്ടോയെന്നു നോക്കിയപ്പോ ദേ കുറച്ചു മുന്നിലായി ഉള്ളത് പോലെ തോന്നി.

പിന്നെ എന്താണ്, പ്രതിസന്ധികൾ ഉണ്ടാവുമ്പോഴാണ് യഥാർത്ഥ നായകന്മാർ ഉണ്ടാവുന്നത് എന്ന ഡയലോഗ് മനസ്സിൽ ധ്യാനിച്ചു നിലത്ത് നിന്ന് വീണ്ടും കല്ലെടുത്തു വരുന്നത് പോലെ അഭിനയിച്ചു കൊണ്ട് വീണ്ടും മുന്നോട്ട് ചെന്നു.

അഭിനയം വശമില്ലെങ്കിലും പട്ടികൾ അല്ലേ, അവിടെ അത് ഏറ്റു, എനിക്ക് ഒർജിനൽ കല്ല് കയ്യിൽ കിട്ടി, ഒരുമാതിരി സിനിമ ക്ലൈമാക്സിൽ നായകന് ശക്തി തിരിച്ചു കിട്ടിയപോലത്തെ ഫീലാണ് അന്നേരം എനിക്ക്.

രണ്ടും കല്പിച്ചു നിലത്ത് കൂടി ബൗൺസ് ചെയ്യുന്ന രീതിയിൽ ഒരിക്കൽ കൂടി ആ കല്ലെടുത്തു എറിഞ്ഞപ്പോൾ സംഭവം ഏറ്റു. എല്ലാം കണ്ടം വഴി ഓടി.

പക്ഷേ ശരിക്കുള്ള ട്വിസ്റ്റ്‌ അന്നേരമായിരുന്നു, ഈ സംഭവം കഴിഞ്ഞതും അതിലെ വന്ന ബൈക്കുകൾ, അതിൽ ഒക്കെ തന്നെ പ്രായമായ ആളുകളും കുട്ടികളും, സ്ത്രീകളും ഒക്കെയായിരുന്നു.

ഒരുപക്ഷെ എന്നെപ്പോലെ ഇവയെ ഒഴിവാക്കി പോകാൻ അവർക്ക് കഴിഞ്ഞെന്ന് വരില്ല, എന്തോ എന്നേ അവിടെ ആ സമയത്തു എത്തിച്ചത് വെറുതെ ഒരു തോന്നൽ അല്ലായിരുന്നു എന്ന് തോന്നിപ്പോയി...

ഇതെല്ലാം കഴിഞ്ഞു പള്ളിയിൽ കയറി തിരിച്ചു പോരാൻ നേരമാണ് മറ്റൊരു കാര്യം ശ്രദ്ധിക്കുന്നത്, എന്റെ കയ്യിൽ ഒരു നൈറ്റ്‌ വിഷൻ ഗ്ലാസ്‌ ഉണ്ടായിരുന്നു, അതിന്റെ ഒരു ചില്ല് ഇപ്പോൾ കാണുന്നില്ല.

സംഭവം ഞാൻ ആദ്യത്തെ കല്ല് എറിഞ്ഞപ്പോൾ ഇത് നിലത്തേക്ക് വീണിരുന്നു, ആ വഴിക്ക് പോയതാണെന്ന് ഉറപ്പാണ്.

എന്തായാലും യുദ്ധഭൂമിയിൽ പോയി ഒന്ന് തിരയാമെന്ന് കരുതിയതും ദേ കറന്റ്‌ ഒരൊറ്റ പോക്ക്.

അതും ആ പരിസരം മുഴുവൻ ഫുൾ ഇരുട്ട്, എന്നാലും ഇത്രയും ഒക്കെ ചെയ്തതല്ലേ എന്നുള്ള ധൈര്യത്തിൽ ഫോണിൽ ടോർച്ചും തെളിച്ചു അങ്ങോട്ടേക്ക് നടന്നു.
നേരത്തെ ഓടിയ പട്ടികൾ അവിടെ വീണ്ടും വന്നോയെന്ന് കാണാൻ പോലും പറ്റാത്ത അവസ്ഥ. എന്നാലും അങ്ങോട്ട് ചെന്ന് തപ്പി സംഭവം കണ്ട് കിട്ടിയപ്പോ ശരിക്കും ഒരു സിനിമയുടെ ക്ലൈമാക്സ്‌ കണ്ട അവസ്ഥയായിരുന്നു.

അപ്പോഴേക്കും കറന്റും വന്നു, ശുഭപര്യവസാനം...

ശരിക്കും ഒരൊറ്റ രാഷ്ട്രീയ പാർട്ടി പോലും വിചാരിച്ചു കാണില്ല മോഡിഫിക്കേഷൻ എന്ന് പറയുന്നതിന് നാട്ടിൽ ഇത്രയും ഫാൻസ്‌ ഉണ്ടെന്ന്.

ഇതുവരെ എന്തോ സാമൂഹിക വിരുദ്ധരെ പോലെയാണ് മോഡിഫൈ ചെയ്യുന്നവരെ കണ്ടിരുന്നത്, എന്നാൽ തിരഞ്ഞെടുപ്പിന് മുൻപും ശേഷവും മുഖ്യമന്ത്രി VD സതീശന്റെ പ്രതികരണങ്ങൾ വേറെ ലെവൽ വൈറൽ ആകുകയാണ്.

ഇതൊക്കെ നേരത്തെ അറിഞ്ഞിരുന്നെങ്കിൽ എല്ലാ പാർട്ടിയും അവരുടെ പ്രകടന പത്രികയിൽ എന്തെങ്കിലും ഒക്കെ പറഞ്ഞേനെ എന്ന് തോന്നുന്നു.

അടുത്ത ഇലക്ഷനിൽ യുവാക്കളുടെ വോട്ട് ലഭിക്കാൻ വേണ്ടി എന്തായാലും ഈ ഒരു കാര്യം എല്ലാവരും ഉപയോഗിക്കാൻ സാധ്യതയുണ്ട്.

Zomato പോലെ ഡെലിവറി ജോലി ചെയ്യുന്നവർ ഉണ്ടെങ്കിൽ ഒന്ന് ശ്രദ്ധിക്കുക, ട്രിപ്പ്‌ പോകാൻ താല്പര്യം ഉള്ളവർ ആണെങ്കിൽ പ്രത്യേകിച്ചും.

ബൈക്കിൽ ഗ്രൂപ്പ്‌ റൈഡ് പോകുന്നത് ശ്രദ്ധിച്ചിട്ടുണ്ടോ, നല്ല അച്ചടക്കത്തോടെ എല്ലാ സുരക്ഷാ മുൻകരുതലുകളും സ്വീകരിച്ചു പോകുന്ന പ്രൊഫഷണൽ റൈഡർമാരെ.

അതുപോലെ ഒക്കെ റൈഡ് പോകാൻ താല്പര്യം ഉള്ളവർക്ക് വേണ്ടി കഴിഞ്ഞ വർഷം ഒരു കൂട്ടായ്മ ആരംഭിച്ചിരുന്നു, വെറും 10 ദിവസം കൊണ്ട് 5000 പേരാണ് അതിലേക്ക് വന്നു ചേർന്നത്.

ആ കൂട്ടായ്മയുടെ അടുത്ത പടിയായി ഇങ്ങനെ ഗ്രൂപ്പ്‌ റൈഡ് പോകാൻ താല്പര്യം ഉള്ള സാധാരണ ആളുകൾക്ക് വേണ്ടി,

അതായത് സാധാരണ ബൈക്ക് അല്ലെങ്കിൽ സ്കൂട്ടർ ഒക്കെ ഉള്ളവർക്ക് വേണ്ടി കുറച്ചു റൈഡ് ഒക്കെ നടത്താൻ ഉദ്ദേശിക്കുന്നു.

ഇതിന്റെ ഭാഗമായി പ്രവർത്തിക്കാൻ എല്ലാ ജില്ലയിലും കുറച്ചു ആളുകളെ വേണം, ആദ്യം എറണാകുളം വച്ചിട്ട് തുടങ്ങാനും പിന്നെ ഓരോ ജില്ലയിലേക്ക് വ്യാപിക്കുന്ന രീതിയിലുമാണ് ഉദ്ദേശിക്കുന്നത്.

എല്ലാ ജില്ലയും എന്ന് വെറുതെ പറഞ്ഞതല്ല, നേരത്തെ പറഞ്ഞ 5000 പേരിൽ എല്ലാ ജില്ലയിൽ നിന്നും ഉള്ളവരുണ്ട്.

അപ്പോ ബൈക്ക് ഓടിക്കാനും ട്രിപ്പ്‌ പോകാനും ഒക്കെ ഇഷ്ടമുള്ള, എന്നാൽ അതൊരു പാർട്ട്‌ ടൈം ജോലി പോലെ ചെയ്യാൻ താല്പര്യം ഉള്ളവരെ നമ്മുടെ ക്ലബ്ബിന്റെ ഭാഗമായി ചേർന്ന് പ്രവർത്തിക്കാൻ ക്ഷണിക്കുകയാണ്.

റൈഡ് പോയി എക്സ്പീരിയൻസ് വേണമെന്ന് നിർബന്ധം ഒന്നുമില്ല, അതൊക്കെ നമ്മൾക്ക് പഠിപ്പിച്ചു എടുക്കാൻ സംവിധാനങ്ങൾ ഉണ്ട്.

അപ്പോൾ ഇങ്ങനെ പ്രവർത്തിക്കാൻ താല്പര്യം ഉള്ളവരും, റൈഡ് പോകാൻ താല്പര്യം ഉള്ളവരും എല്ലാം ക്ലബ്ബിന്റെ വാട്സ്ആപ്പ് ചാനലിൽ കേറിക്കോ, ബാക്കിയുള്ള നിർദ്ദേശങ്ങൾ ഒക്കെ അവിടെ വരുന്നതാണ്.

നമ്മുടെ ക്ലബ്ബിന് 2 ഭാഗങ്ങൾ ഉണ്ട്, ഒന്ന് എക്സ്പീരിയൻസ് ഉള്ള റൈഡർസ് തനിയെ പോകുന്ന റൈഡ്.

രണ്ട് എക്സ്പീരിയൻസ് ഇല്ലാത്ത സാധാരണ ആളുകൾക്ക് വേണ്ടിയുള്ള റൈഡുകൾ, ഇനി പുതിയ കുറച്ചു പരിപാടികൾ ആരംഭിക്കാനും അത് എല്ലാ ജില്ലയിലേക്ക് വ്യാപിപ്പിക്കാനും വേണ്ടിയാണ് ഈ പോസ്റ്റ്‌.

Nb:- ഈ പോസ്റ്റ്‌ ഇടുമ്പോൾ കുറെ പരിഭവം വരുമെന്ന് ഉറപ്പാണ് 😅 ക്ലബ് തുടങ്ങിയ അന്ന് മുതൽ റൈഡ് പോകാൻ കണ്ണിൽ എണ്ണയൊഴിച്ചു കാത്തിരിക്കുന്ന കുറെ ആളുകളുണ്ട് 😌, കുറച്ചു നാൾ കൂടി ക്ഷമിക്കുക എല്ലാത്തിനും പോംവഴി ദാ വരുന്നു.

വിഴിഞ്ഞം പോർട്ട്‌ ആയിട്ട് ബന്ധപ്പെട്ട് എന്തെങ്കിലും ബിസിനസ്സ് അവസരം നോക്കുന്നവർക്ക് വേണ്ടി,

തിരുവനന്തപുരം ജില്ലയിലെ ഏതാനും യുവാക്കളും Kerala Startup Garage കൂട്ടായ്മയും കൂടി ചേർന്ന് ഒരു പ്രോഗ്രാം നടത്തുന്നുണ്ട് ഈ വരുന്ന ശനിയാഴ്ച തിരുവനന്തപുരത്ത് വച്ചിട്ട്.

പ്രോഗ്രാം തികച്ചും സൗജന്യമായിരിക്കും, വിഴിഞ്ഞം തുറമുഖമായി ബന്ധപ്പെട്ട സാധ്യതകളെ പറ്റി ചർച്ച ചെയ്യാനും പഠിക്കാനും വേണ്ടിയുള്ള ഒരു അവസരമായിരിക്കും ഇത്.

നിലവിൽ പോർട്ട്‌ ആയിട്ട് ബന്ധപ്പെട്ട എല്ലാ അവസരങ്ങളും ഉപയോഗപ്പെടുത്തുന്നത് കേരളത്തിന്‌ പുറത്ത് ഉള്ളവരാണ്, അതിന് കാരണം അവർക്ക് അത് എങ്ങനെ വേണമെന്ന് അറിയാം,

നമ്മുടെ നാട്ടിൽ ഉള്ളവർക്ക് അത്ര ധാരണയുമില്ല, പ്രോഗ്രാമിൽ പങ്കെടുക്കാൻ താല്പര്യം ഉള്ളവർക്ക് വേണ്ടി കൂടുതൽ വിവരങ്ങൾ KSG യുടെ വാട്സ്ആപ്പ് ചാനലിൽ നൽകുന്നതാണ്. ആദ്യം രജിസ്റ്റർ ചെയ്യുന്നവർക്ക് ആയിരിക്കും മുൻഗണന.

സീരിയസ് ആയിട്ട് അവസരങ്ങൾ നോക്കുന്നവർ ശ്രദ്ധിക്കുക...

Kerala Startup Garage - KSG
Trivandrum Indian

എന്തെങ്കിലും ബിസിനസ്സ് ചെയ്യാൻ നോക്കുന്നവർക്ക് പറ്റിയ ഒരു സംഭവം പറയാം.

Snitch എന്ന പേരിൽ ഒരു ബ്രാൻഡ് കണ്ടിട്ടുണ്ടോ, ബാംഗ്ലൂരിൽ നിന്ന് ആരംഭിച്ച പുരുഷന്മാരുടെ ഒരു ഫാഷൻ ബ്രാൻഡ് ആണ്.

സാധാരണ ബ്രാൻഡ് പോലെ ഫിറ്റ്‌ ആയിട്ടുള്ളവർക്ക് വേണ്ടി മാത്രമല്ല അല്പം വണ്ണം ഉള്ളവർക്ക് പറ്റിയ ഐറ്റംസ് ഉണ്ട്, വസ്ത്രങ്ങൾക്ക് ഒപ്പം ബാഗുകളും ചെരുപ്പും ഷൂസും ഒക്കെയുണ്ട്.

ഇവരുടെ ഇതുവരെ കണ്ട എല്ലാം എനിക്ക് ഇഷ്ടപ്പെട്ടു, ബഡ്ജറ്റ് ഫ്രണ്ട്‌ലിയുമാണ്.

പക്ഷേ ഒരൊറ്റ കുഴപ്പമേ ഉള്ളു, സൗത്ത് ഇന്ത്യയിൽ ഏതാണ്ട് 100 ന് മുകളിൽ ബ്രാഞ്ച് ഉണ്ടെങ്കിലും കേരളത്തിൽ ആകെ 2 എണ്ണമേ ഉള്ളു, അതിൽ ഒരെണ്ണം തിരുവനന്തപുരത്തും പിന്നെ ഉള്ളത് കോഴിക്കോടും.

ഇത് രണ്ടും അല്പം ദൂരെ ആയതിനാൽ കൊച്ചിയിൽ ഒരെണ്ണം വരുന്നതും കാത്തിരിക്കാൻ തുടങ്ങിയിട്ട് നാള് കുറേയായി. ദതാണ് ഞാൻ പറയാൻ വന്ന ബിസിനസ്സ് അവസരം.

ഈ പോസ്റ്റ്‌ കാണുന്ന ആരെങ്കിലും ഒക്കെ കൊച്ചിയിൽ ഇതിന്റെ ഒരു franchise കൊണ്ടുവരിക ആണെങ്കിൽ കച്ചവടത്തിന്റെ കാര്യത്തിൽ ഗ്യാരന്റിയാണ്.

നിങ്ങൾക്ക് ഒരു ബിസിനസ്സും ആകും നമ്മൾക്ക് കുറച്ചു കിടിലൻ ഐറ്റംസ് വാങ്ങാൻ എളുപ്പവുമാകും.

Nb:- 2020 ൽ ആരംഭിച്ചു വെറും 6 വർഷം കൊണ്ടാണ് ഈ ബ്രാൻഡ് ഇത്രയും വളർന്നത്, ഫാഷൻ മേഖലയിലെ നല്ലൊരു സ്റ്റാർട്ടപ്പ് കൂടിയാണ് ഈ ബ്രാൻഡ്.

താരതമ്യേനെ പ്രായം കുറഞ്ഞ KG രാമചന്ദ്രൻ സീനിയർ നേതാക്കളെ മറികടന്നു മുഖ്യമന്ത്രിയായി ചുമതല ഏൽക്കുന്നു.

ഇതിനെതിരെ സ്വന്തം പാർട്ടിയുടെ ഉള്ളിൽ തന്നെ നേതാക്കളുടെ ഇടയിൽ എതിർപ്പുകൾ ഉണ്ടാവുന്നു. പാർട്ടിയുടെ ഉള്ളിൽ പിന്തുണ ഇല്ലെങ്കിലും ജനങ്ങളുടെ പിന്തുണ ഉണ്ടെന്ന് കണ്ടിട്ടാണ് അദ്ദേഹത്തേ തന്നെ മുഖ്യമന്ത്രി ആക്കുന്നത്.

ഇത്തിരി കണിശക്കാരനായ രാമചന്ദ്രൻ മുഖ്യമന്ത്രി ആയ ഉടനെ തനിക്ക് പോലീസ് എസ്കോർട് ഒന്നും ആവശ്യമില്ല എന്ന് പറയുന്നു.

എന്നാൽ പ്രോട്ടോകോൾ പ്രകാരം അങ്ങനെ പറ്റില്ല എന്ന് പറഞ്ഞു ഡിജിപി എതിർക്കുന്നു.

നിലവിൽ നടക്കുന്ന സംഭവങ്ങളും ഓഗസ്റ്റ് 1 എന്ന സിനിമയുമായി നല്ല സാമ്യം തോന്നുന്നു..

നമ്മുടെ കയ്യിൽ ഒരു സ്വിഫ്റ്റ് കാർ ഉണ്ടെന്ന് കരുതുക, നമ്മൾക്കു നിലവിൽ അതിൽ ചെയ്യാൻ കഴിയുന്ന modifcation ആകെ 2 പരിപാടികളാണ്.

ഒന്ന് അതിന്റെ കളർ മാറ്റാം, രണ്ടാമതായി സ്വിഫ്റ്റിന്റെ തന്നെ കൂടിയ മോഡലിന്റെ ഭാഗങ്ങൾ ഘടിപ്പിക്കാം.

എന്നാൽ ഈ സ്വിഫ്റ്റിന് സ്പോർട്സ് മോഡൽ എന്നൊരു കൂടിയ മോഡൽ കൂടിയുണ്ട്, അത് പക്ഷേ അവർ ഇന്ത്യയിലേക്ക് കൊണ്ടുവരുന്നില്ല, കാരണം ഒരു 25 - 30 ലക്ഷം രൂപ വില വന്നേക്കാം എന്നുള്ളതാണ് എന്ന് തോന്നുന്നു.

ഈ സ്വിഫ്റ്റ് സ്പോർട്സ് മോഡലിന്റെ കിറ്റ് ആണ് വ്യാപകമായി ഇവിടെ എല്ലാവരും മോഡിഫിക്കേഷൻ ചെയ്യാനായി ഉപയോഗിക്കുന്നത്.

ഈ സ്വിഫ്റ്റ് സ്പോർട്സ് ഒർജിനൽ മോഡൽ ഇന്ത്യയിൽ ഇറങ്ങിയിട്ടില്ല എന്ന ഒറ്റ കാരണം കൊണ്ട് ഇത്തരം മോഡിഫിക്കേഷൻ നിയമവിരുദ്ധമായി മാറി.

അത് വാഹനത്തിന്റെ കുഴപ്പമല്ല ഇവിടുത്തെ നിയമത്തിൽ വ്യക്തത ഇല്ലാത്തതിനാലാണ്.

ഇതുപോലെ മറ്റൊന്നാണ് ബൈക്കിൽ ഘടിപ്പിക്കുന്ന വിവിധ ഹാൻഡിൽ ബാറുകൾ, അതുപോലെ സൈഡ് മിറർ എന്നിവ.

വില കൂടിയ വാഹനങ്ങൾക്ക് മിറർ, ഹാൻഡിൽ ബാർ എന്നിവ ഇഷ്ടമുള്ളത് തിരഞ്ഞെടുക്കാൻ കമ്പനി തന്നെ അവസരം നൽകുന്നുണ്ട്.

അത്തരം ബൈക്കിൽ സൈഡ് മിറർ ഹാൻഡിൽ ബാറിന്റെ അറ്റത്ത് സ്ഥാപിച്ചാലോ താഴേക്ക് ഇരുന്നാലോ ഒന്നും നിയമപ്രശ്നമില്ല.

എന്നാൽ മറ്റ് ഏതെങ്കിലും ബൈക്കിൽ ഇങ്ങനെ ചെയ്താൽ നിയമവിരുദ്ധ പ്രവർത്തിയായി.

ഇത്തരം ചില നിയമക്കുരുക്കുകൾ ഒഴിവാക്കി നൽകിയാൽ തന്നെ സന്തോഷം, ഇലക്ഷന് മുന്നിൽ കണ്ട് പ്രഖ്യാപിച്ച ഒരു നയം ആയതിനാൽ എന്നെങ്കിലും കിട്ടിയാൽ കിട്ടി എന്നും വിചാരിച്ചു ഇരിക്കുമ്പോഴാണ് ഇന്ന് തന്നെ ഒരു വാർത്ത കണ്ടത്.

"യു ഡി എഫിന്റെ പ്രകടനപത്രികയിൽ യുവാക്കളെ ഏറെ ആകർഷിച്ച വാഹന രൂപമാറ്റ വാഗ്ദാനം നടപ്പാക്കാൻ മോട്ടോർ വാഹന വകുപ്പ് ഒരുങ്ങുന്നു. അനുവദിക്കാവുന്ന രൂപമാറ്റങ്ങൾ ഏതൊക്കെയെന്ന് പഠിക്കാൻ വിദഗ്ധ സമിതിയെ നിയോഗിക്കാനാണ് തീരുമാനം."

ഇങ്ങനെ ഒക്കെ നടന്നാൽ സന്തോഷം... 😌

എന്റെ ഇടത് സുഹൃത്തുക്കളുടെ ഇടയിൽ നിന്നൊരു വാർത്ത കേട്ടു, KC മത്സരിക്കാൻ വന്നാൽ എതിരെ നിൽക്കാൻ അവർ തീരുമാനിച്ചിരിക്കുന്ന സ്ഥാനാർഥിയുടെ പേരാണ് കേട്ടത്...

ഒറ്റ വാക്കിൽ പറഞ്ഞാൽ ഞെട്ടിച്ചു എന്നുവേണം പറയാൻ, സംഭവം ഉള്ളതാണേൽ കിടുക്കും, സ്ഥിതീകരിക്കാത്ത വിവരം ആയതിനാൽ ഗോസിപ്പ് പോലെ ഇവിടെ പേര് പറയാൻ ആഗ്രഹിക്കുന്നില്ല.

പക്ഷേ കുറച്ചു സൂചനകൾ നൽകാം, ചിഹ്നം അരിവാൾ ചുറ്റിക ആയിരിക്കില്ല, ഒരു ഘടകകക്ഷിയുടെ നേതാവ് ആയിരിക്കും KC ക്ക് എതിരെ മത്സരിക്കാൻ ഇറങ്ങുന്നത്.

വടക്കൻ സംസ്ഥാനങ്ങളിൽ ബിജെപി യുടെ വളർച്ച കാണുമ്പോൾ ഇടക്ക് EvM നെ സംശയം തോന്നിയിരുന്നു, എന്നാൽ കേരളത്തിലെ സംഭവങ്ങൾ നേരിട്ട് കണ്ടതോടെ അതങ്ങ് മാറിയിട്ടുണ്ട്.

ജനങ്ങളുടെ പൾസ് അറിയാതെ ഇമ്മാതിരി ഊളത്തരങ്ങൾ കാണിച്ചിട്ട് ഞങ്ങൾ ഹൈകമാൻഡ് ആണ് ഞങ്ങൾക്കാണ് പവർ എന്നും പറഞ്ഞു ഇരിക്കാം.

ഒരു ഹൈകമാൻൻഡിനും അല്ല പവർ, ജനാധിപത്യത്തിൽ ജനങ്ങൾക്ക് തന്നെയാണ് പവർ. അതിന്റെ പൾസ് അറിഞ്ഞു കളിക്കുന്നവർക്ക് മാത്രമേ വിജയിക്കാൻ കഴിയു.