M K Raghavan

ഏഷ്യൻ ഗെയിംസ് ഷൂട്ടിംഗിൽ വെള്ളി മെഡൽ നേടുന്ന ആദ്യ മലയാളി എന്ന ചരിത്രനേട്ടം കൈവരിച്ച വിദർശ കെ വിനോദിന് ഹൃദയം നിറഞ്ഞ അഭിനന്ദനങ്ങൾ! 🇮🇳🥈🎯

ശ്രീ നാരായണ ഗുരുദേവന്റെ പവിത്രമായ സമാധി ദിനത്തിൽ അവിടുത്തെ ദിവ്യസ്മരണയ്ക്ക് മുന്നിൽ പ്രണാമം അർപ്പിക്കുന്നു.

സാഹോദര്യത്തിന്റെയും സമത്വത്തിന്റെയും വെളിച്ചം പകർന്നു നൽകി, കേരളീയ സമൂഹത്തെ നവോത്ഥാന പാതയിലൂടെ നയിച്ച യുഗപുരുഷനായിരുന്നു ശ്രീ നാരായണ ഗുരു.

"അവനവനാത്മസുഖത്തിനാചരിക്കുന്നവ അപരന് സുഖത്തിനായി വരേണം" എന്ന് 'ആത്മോപദേശ ശതക'ത്തിലൂടെ പഠിപ്പിച്ച ഗുരുദേവന്റെ അമൂല്യമായ അധ്യാപനം ഏതൊരു കാലഘട്ടത്തിലും മാനവികതയുടെ വഴികാട്ടിയാണ്. ജാതി-മത ചിന്തകൾക്കതീതമായി, സ്വന്തം സുഖം പോലെ സഹജീവികളുടെ സന്തോഷവും കാണാൻ പഠിപ്പിച്ച ആ മഹാനുഭാവന്റെ വാക്കുകൾ ഇന്നും നമ്മുടെ വഴികാട്ടുന്ന ദീപശിഖയായി നിലകൊള്ളുന്നു.

വിദ്യാഭ്യാസത്തിലൂടെയും സംഘടനയിലൂടെയും അറിവും ശക്തിയും നേടാൻ ആഹ്വാനം ചെയ്ത ഗുരുദേവൻ, സമൂഹത്തിലെ താഴെത്തട്ടിലുള്ളവരുടെ ഉന്നമനത്തിനായി ജീവിതം സമർപ്പിച്ചു. അവിടുത്തെ ചിന്തകളും നിലപാടുകളും ഇന്നും നമ്മെ പ്രചോദിപ്പിച്ചുകൊണ്ടിരിക്കുന്നു.

ശ്രീനാരായണ ഗുരുവിന്റെ‌ സന്ദേശങ്ങൾ ആഗോളതലത്തിൽ പ്രചരിപ്പിക്കുന്നതിനായി 'യൂണിവേഴ്സൽ ബ്രദർഹുഡ്' ദിനമായി ഗുരു ജയന്തി ആചരിക്കുന്നതിന് ഐക്യരാഷ്ട്ര സഭയിൽ കേന്ദ്ര സർക്കാർ സമ്മർദ്ദം ചെലുത്തണമെന്ന് നേരത്തെ പാർലമെന്റിൽ റൂൾ 377 പ്രകാരം ആവശ്യമുന്നയിച്ചിരുന്നു. ഈ കാര്യം കേന്ദ്ര സർക്കാർ പരിഗണിക്കണമെന്ന് ഗുരു സമാധി ദിനത്തിൽ ആവർത്തിക്കുകയാണ്.

ഗുരുദേവൻ പകർന്നുനൽകിയ ഐക്യത്തിന്റെയും സ്നേഹത്തിന്റെയും സന്ദേശങ്ങൾ ഉൾക്കൊണ്ട്, കൂടുതൽ സമത്വപൂർണ്ണവും നീതിയുക്തവുമായ ഒരു സമൂഹം കെട്ടിപ്പടുക്കാൻ ഈ പുണ്യദിനത്തിൽ നമുക്ക് പ്രതിജ്ഞയെടുക്കാം.

മുതിർന്ന കോൺഗ്രസ് നേതാവും കെ.പി.സി.സി മുൻ ജനറൽ സെക്രട്ടറിയുമായ ശ്രീ. ഹിദുർ മുഹമ്മദ് ഇനി ഓർമ.

സഹപ്രവർത്തകനും സുഹൃത്തുകൂടിയായ ഹിദുർ മുഹമ്മദിന്റെ പൊതുരംഗത്തെ സേവനങ്ങളും നേതൃപാടവവും എന്നും സ്മരിക്കപ്പെടും.

കുടുംബാംഗങ്ങളുടെ ദുഃഖത്തിൽ പങ്കുചേരുന്നു.

ആദരാഞ്ജലികൾ..

കോഴിക്കോട് എത്തിയ മലേഷ്യൻ പ്രധാന മന്ത്രി അൻവർ ഇബ്രാഹിമുമായി കൂടിക്കാഴ്ച നടത്തി. അദ്ദേഹത്തിൻറെ ഓഫീസിന്റെ ക്ഷണം സ്വീകരിച്ച് വിവിധ മേഖലകളിൽ നേതൃത്വം നൽകുന്ന ആളുകളുമായി നടത്തിയ ചർച്ചയിൽ പങ്കാളിയായി.

മലേഷ്യയും കേരളവും വിശിഷ്യാ മലബാറും തമ്മിലുള്ള ബന്ധത്തിന് ചരിത്രപരമായി തന്നെ ഏറെ ആഴമുണ്ട്. തെക്കുകിഴക്കൻ ഏഷ്യയിലെ സംസ്കാരത്തെ രൂപപ്പെടുത്തുന്നതിൽ നിർണായക പങ്കുവഹിച്ച വ്യാപാരം, മതം, ശാസ്ത്രം, വിദ്യാഭ്യാസം എന്നിവയുടെ സംഗമസ്ഥാനമായിരുന്നു ഒരു കാലത്ത് മലബാർ. ഈ ചരിത്രപരമായ ബന്ധത്തെ കൂടുതൽ ശക്തമായ സാമ്പത്തിക സഹകരണമാക്കി മാറ്റേണ്ടതുണ്ടെന്ന് അദ്ദേഹം പറഞ്ഞു.

എന്റെ ജനനവും കുട്ടിക്കാലവും മലേഷ്യയിലായിരുന്നു. ജനിച്ചു വളർന്ന മലയ നാടുമായും അവിടത്തെ ജനങ്ങളുമായുമുള്ള എന്റെ ബന്ധവും സൗഹൃദ ചർച്ചക്കിടെ അദ്ദേഹവുമായി പങ്കുവെച്ചു.

മലബാറിന്റെ വളരെ സുപ്രധാനമായ ഒരാവശ്യം അദ്ദേഹത്തിൻറെ ശ്രദ്ധയിൽപ്പെടുത്താൻ ഈ അവസരം വിനിയോഗിച്ചു. കോഴിക്കോട് - ക്വോലലംപൂർ സെക്‌ടറിൽ മലേഷ്യൻ സർക്കാരിന്റെ ഫ്ലാഗ് കാരിയറായ മലേഷ്യ എയർലൈൻസിന്റെ നേരിട്ടുള്ള വിമാന സർവീസ് ആരംഭിക്കണമെന്ന ആവശ്യം ഉന്നയിച്ചു.

കേരളത്തിലെ കിഴക്കൻ ഏഷ്യൻ രാജ്യങ്ങളിലുള്ള പ്രവാസികളിൽ ബഹു ഭൂരിപക്ഷവും മലബാറിൽ നിന്നുള്ളവരാണ്. ടൂറിസം, ബിസിനസ്, വിദ്യാഭ്യാസ ആവശ്യങ്ങൾക്കായി മലബാറിൽ നിന്ന് നിരവധി ആളുകൾ ഇപ്പോൾ കിഴക്കനേഷ്യൻ രാജ്യങ്ങളിലേക്ക് യാത്രക്കാരായുണ്ട്. ആസിയാൻ രാജ്യങ്ങളുടെ കവാടമായ മലേഷ്യയിലേക്ക് നേരത്തെ ഉണ്ടായിരുന്ന യാത്രക്കാരുടെ മികച്ച പ്രതികരണവും നേരിട്ടുള്ള സർവീസിന്റെ പ്രാധാന്യവും അദ്ദേഹത്തിൻറെ ശ്രദ്ധയിൽപ്പെടുത്താൻ സാധിച്ചു.

ഉന്നയിച്ച കാര്യങ്ങൾ വളരെ താല്പര്യപൂർവ്വം ശ്രദ്ധിച്ച അദ്ദേഹം അനുഭാവ പൂർവം പരിഗണിക്കാൻ ബന്ധപ്പെട്ട ഉദ്യോഗസ്ഥർക്ക് നിർദേശവും നൽകി.

മലേഷ്യയും മലബാർ ജനതയും തമ്മിലുള്ള ദീർഘകാല സൗഹൃദത്തിലെ സുപ്രധാന നാഴികക്കല്ലായി ഈ ചരിത്ര നഗരത്തിലെ അദ്ദേഹത്തിൻറെ സന്ദർശനം എന്നും ഓർമ്മിക്കപ്പെടും. കോഴിക്കോട്ടേക്കുള്ള അദ്ദേഹത്തിന്റെ സൗഹാർദ്ദ സന്ദർശനത്തിന് ഹൃദയം നിറഞ്ഞ നന്ദി രേഖപ്പെടുത്തി.

😎

കോഴിക്കോട് സാമൂതിരി രാജ PK കേരള വർമ്മ രാജക്ക്‌ ആദരാഞ്ജലികൾ..

ചിറ്റൂർ മുൻ എം.എൽ.എയും മുതിർന്ന കോൺഗ്രസ് നേതാവുമായ ശ്രീ. കെ. അച്യുതന്റെ നിര്യാണത്തിൽ ആഴത്തിലുള്ള ദുഃഖവും അനുശോചനവും രേഖപ്പെടുത്തുന്നു.

ജനപ്രതിനിധി എന്ന നിലയിലും പൊതുപ്രവർത്തകൻ എന്ന നിലയിലും ചിറ്റൂരിന്റെയും പാലക്കാടിന്റെയും വികസനത്തിന് അദ്ദേഹം നൽകിയ സംഭാവനകൾ അവിസ്മരണീയമാണ്.

ലളിതമായ ജീവിതശൈലിയും സാധാരണക്കാരായ ജനങ്ങളുമായുള്ള അടുത്ത ബന്ധവും കൊണ്ട് എല്ലാവരുടെയും സ്നേഹബഹുമാനങ്ങൾ നേടിയെടുത്ത പ്രിയ നേതാവായിരുന്നു അദ്ദേഹം.

കുടുംബാംഗങ്ങളുടെയും സഹപ്രവർത്തകരുടെയും ദുഃഖത്തിൽ പങ്കുചേരുന്നു.

ആദരാഞ്ജലികൾ🙏💐

അറിവിന്റെ വെളിച്ചം പകർന്ന്, ജീവിതവഴികളിൽ വഴികാട്ടിയായി നിലകൊള്ളുന്ന പ്രിയപ്പെട്ട അധ്യാപകർക്ക് ഹൃദയം നിറഞ്ഞ അദ്ധ്യാപക ദിനാശംസകൾ...

ഏവർക്കും ശ്രീകൃഷ്ണ ജയന്തി ആശംസകൾ..

പ്രിയങ്കരനായ എം. വീരാൻകുട്ടി വിട പറയുമ്പോൾ...

പതിറ്റാണ്ടുകളുടെ ആത്മബന്ധമാണ് പ്രിയ സുഹൃത്ത് അഡ്വ. എം. വീരാൻകുട്ടിയുമായി ഉണ്ടായിരുന്നത്. കോഴിക്കോടിന്റെ ചുമതലയുള്ള കെ.പി.സി.സി ജന. സെക്രട്ടറി ആയിരിക്കെ അന്ന് ജില്ലയുടെ ഡി.സി.സി അധ്യക്ഷനായിരുന്ന വീരാൻ കുട്ടിക്കൊപ്പം ദീർഘ കാലം സംഘടനാ പ്രവർത്തനവുമായി ജില്ലയുടെ വിവിധ ഭാഗങ്ങളിൽ പ്രവർത്തിക്കാൻ എനിക്ക് സാധിച്ചിട്ടുണ്ട്.

വിദ്യാർത്ഥി കാലഘട്ടത്തിൽ സോഷ്യലിസ്റ്റ് പ്രസ്ഥാനമായ ഐ.എസ്.ഓയിലൂടെ പൊതു പ്രവർത്തനം ആരംഭിച്ച വീരാൻ കുട്ടി കേരള വിദ്യാർത്ഥി യൂണിയനിലൂടെ കോൺഗ്രസ് പ്രസ്ഥാനത്തിലെത്തി. പിന്നീടങ്ങോട്ട് കോൺഗ്രസ് പാർട്ടിയുടെ ശക്തമായ മുഖമായി അദ്ദേഹം മാറി. കോൺഗ്രസ് പാർട്ടിയിലെ പിളർപ്പുകളുടെ കാലങ്ങളിൽ പാർട്ടിക്കൊപ്പം ശക്തമായി നിലകൊണ്ട് പ്രതിസന്ധികളിൽ എന്നും പാർട്ടിയുടെ കരുത്തായി അദ്ദേഹം മാറി.

മലബാറിൽ വിശിഷ്യാ കോഴിക്കോട് ജില്ലയിൽ കോൺഗ്രസ് പാർട്ടിയെ ശക്തിപ്പെടുത്തുന്നതിൽ നിർണായക പങ്ക് വഹിച്ച അദ്ദേഹം, ജില്ലാ കോൺഗ്രസ് അധ്യക്ഷൻ എന്ന നിലയിൽ മികച്ച പ്രവർത്തനം കാഴ്ചവെച്ചു. സംസ്ഥാനത്ത് ആദ്യമായി ന്യൂനപക്ഷ കമ്മീഷൻ രൂപീകരിച്ചപ്പോൾ ക്യാബിനറ്റ് പദവിയോടെ പ്രഥമ ചെയർമാനായി അദ്ദേഹം നിയമിക്കപ്പെട്ടു. ദളിത് ന്യൂനപക്ഷങ്ങളുടെ സാമൂഹ്യ പുരോഗതിക്കായി മികച്ച ഇടപെടലുകൾ ഇക്കാലയളവിൽ അദ്ദേഹത്തിൽ നിന്ന് ഉണ്ടായി. മികച്ച സംഘാടകനായിരുന്ന വീരാൻ കുട്ടി കോൺഗ്രസ് പ്രസ്ഥാനത്തിന്റെ കരുത്തായിരുന്നു.

പ്രിയ സ്നേഹിതന് ഹൃദയത്തിൽ നിന്നും ആദരാഞ്ജലികൾ...