G Ravi books

മലബാറിലെ പ്രബല നാടുവാഴിയായിരുന്നു കൂത്താളി വാഴുന്നോർ വല്ലഭൻചാത്തൻ കുഞ്ഞിരാമൻ മൂപ്പിൽ നായർ.

വയനാടു മുതൽ പെരിഞ്ചേരിക്കടവു വരെ അതിവിശാലമായ ഭൂമിക്കുടയോൻ. കൊല്ലിനും കൊലയ്ക്കും അധികാരമുള്ള നാടുവാഴി.അദ്ദേഹത്തിൻ്റെ അനുമതിയോടെ കൃഷി ചെയ്ത് ഉപജീവനം നടത്തിയവരായിരുന്നു കർഷകരിൽ ഭൂരിഭാഗവും.

1936 ൽ നാടുവാഴിയുടെ മരണത്തോടെ അവകാശികളില്ലാതായ കൂത്താളി സ്വരൂപത്തിൻ്റെ സ്വത്തുവകകൾ
ആറ്റാലടക്ക നിയമപ്രകാരം ബ്രിട്ടീഷ് സർക്കാർ ഏറ്റെടുത്തു. കൃഷി സമ്പൂർണ്ണമായി നിരോധിച്ചു.

ഉപജീവനത്തിനു മറ്റു വഴികളൊന്നുമില്ലാതിരുന്ന പാവപ്പെട്ട കർഷകർ സമരപാതയിലേക്കെത്തി.

കൃഷി ചെയ്യാനുള്ള അവകാശത്തിനു വേണ്ടി ആരംഭിച്ചതാണെങ്കിലും, പിന്നീടത് കൃഷിഭൂമിക്കുവേണ്ടിയുള്ള സമരമായി വളർന്നു.

വൈദേശിക ശക്തികൾക്കെതിരെയുള്ള നേർക്കുനേർ പോരാട്ടമായിരുന്നു ഇത്. മറ്റു കർഷകസമരങ്ങളിൽ നിന്നും കൂത്താളി സമരത്തെ വേർതിരിച്ചു നിർത്തുന്ന പ്രധാന ഘടകവുമിതാണ്. കർഷകർക്ക് അവകാശങ്ങൾ നേടിയെടുക്കാൻ സ്വാതന്ത്ര്യാനന്തരവും സമരം ചെയ്യേണ്ടിവന്നുവെന്നത് ചരിത്രം.
കൊടിയ മർദ്ദനങ്ങൾ അഴിച്ചു വിട്ടിട്ടും, സമരസേനാനികളെ ചതിവിൽ കൊലപ്പെടുത്തിയിട്ടും ഒടുങ്ങാത്ത വീര്യത്തോടെ പോരാടിയ കർഷകരുടെ വിജയഗാഥ.

ആ ചരിത്രമാണ് കൂത്താളി ദേശം എന്ന നോവലിൽ ആവിഷ്ക്കരിക്കാൻ ശ്രമിക്കുന്നത്.

എഴുതി പൂർത്തിയാക്കിയതിൻ്റെ സന്തോഷം പ്രിയരുമായി പങ്കുവെക്കുന്നു.

സ്നേഹാദരം
ജി രവി.
13/5/25