Mayor Kozhikode

മഴക്കാല മുന്നൊരുക്കത്തിൻ്റെ ഭാഗമായി നഗരത്തിൽ സമഗ്ര ശുചീകരണ പ്രവർത്തനങ്ങൾ നടത്തുന്നതിന് കോർപ്പറേഷൻ ആക്ഷൻ പ്ലാൻ തയ്യാറാക്കി നടപ്പിലാക്കാൻ ഒരുങ്ങുകയാണ്.
കോർപ്പറേഷൻ പരിധിയിലുള്ള റസിഡന്റ് അസോസിയേഷനുകളുടെ യോഗം വിളിച്ചു ചേർത്ത് ഇതിൻ്റെ രൂപരേഖ ചർച്ച ചെയ്തു. കോർപ്പറേഷൻ സെക്രട്ടറി സ്വാഗതം പറഞ്ഞ യോഗത്തിൽ ഡെപ്യൂട്ടി മേയർ ഡോ എസ് ജയശ്രീ,വിവിധ സ്റ്റാൻഡിങ് കമ്മറ്റി ചെയർപേഴ്സന്മാരായ വി പി മനോജ്‌, സുജാത കൂടത്തിങ്കൽ, വിനീത സജീവ്,അഡ്വ സാറ ജാഫർ, കൌൺസിൽ പാർട്ടി നേതാക്കളായ നമ്പിടി നാരായണൻ, മനക്കൽ ശശി,എന്നിവർ സംസാരിച്ചു. റസിഡൻസ് അസോസിയേഷൻ പ്രതിനിധികൾ ചർച്ചയിൽ പങ്കെടുത്തു.

ഏപ്രിൽ 28, 29 തീയതികളിലായി വാർഡ് തല യോഗങ്ങൾ സംഘടിപ്പിക്കും. ഓരോ വാർഡിൻ്റെയും സമഗ്ര ശുചീകരണത്തിന് പ്രത്യേകമായി പ്രവർത്തനങ്ങൾ ആസൂത്രണം ചെയ്തു നടപ്പിലാക്കുന്നതാണ്.
കോർപ്പറേഷൻ തല പ്രവർത്തനങ്ങൾക്ക് ഏപ്രിൽ 30-ന് പുതിയ ബസ് സ്റ്റാൻഡിൽ വച്ച് തുടക്കം കുറിക്കും. മേയ് 2-ന് വാർഡ് തല ശുചീകരണത്തിലൂടെ
വാർഡുകളിലെ പൊതു ഇടങ്ങൾ വൃത്തിയാക്കും. വീടുകളുടെയും പരിസരങ്ങളുടെയും സമഗ്ര ശുചീകരണത്തിന് മാത്രമായി ഒരു ദിവസം മാറ്റിവയ്ക്കും. വാർഡ് കൗൺസിലർമാരുടെ നേതൃത്വത്തിൽ പ്രവർത്തനങ്ങൾ ഏകോപിപ്പിക്കുന്നതിന് സർക്കിൾ, സോണൽ ഹെൽത്ത് ഇൻസ്പെക്ടർമാർക്ക് ഇതിനകം നിർദ്ദേശം നൽകി കഴിഞ്ഞു.
👉 നഗരത്തിൽ രോഗപ്രതിരോധവും ശുചിത്വവും ഉറപ്പാക്കുന്നതിനായി പൊതുജനങ്ങളുടെ സജീവ സഹകരണം അനിവാര്യമാണ്. നഗരസഭയിലെ ഓരോരുത്തരും തങ്ങളുടെ വീടും പരിസരവും പ്രദേശവും വൃത്തിയാക്കി ഈ സദുദ്യമത്തിൽ പങ്കാളികളാവണം.

കോഴിക്കോട് പുതിയ ബസ് സ്റ്റാൻഡിൽ ദിവസേന എത്തിച്ചേരുന്ന യാത്രക്കാരുടെ സൗകര്യത്തിനായി ഒരുക്കിയിരിക്കുന്ന ഇരിപ്പിടങ്ങളിൽ പലതും കേടുപാടുകൾ സംഭവിച്ചിട്ടുണ്ടെന്നും നിലവിലുള്ള ഇരിപ്പിടങ്ങൾ ആവശ്യത്തിന് പോരാത്തതുമാണെന്നും കോർപ്പറേഷന്റെ ശ്രദ്ധയിൽ പെട്ടിട്ടുണ്ട് .
ഈ പ്രശ്നത്തിന്റെ ഗൗരവം പരിഗണിച്ച് ആവശ്യമായ ഇരിപ്പിടങ്ങൾ സജ്ജീകരിക്കുന്നതിന് നി‍‍‍ർദ്ദേശം നൽകിയിട്ടുള്ളതാണ്.
25.04.2026-ന് വെള്ളിയാഴ്ചക്കകം ഇരിപ്പിടങ്ങൾ സ്ഥാപിക്കുന്നതിനുള്ള നടപടികൾ പൂർത്തിയാക്കുന്നതാണ്.
ഇതോടൊപ്പം, ഭാവിയിൽ ഇത്തരം പ്രശ്നങ്ങൾ ആവർത്തിക്കാതിരിക്കാൻ സ്ഥിരമായ പരിശോധനയും പരിപാലനവും ഉറപ്പാക്കുന്നതിന് ബന്ധപ്പെട്ട ഉദ്യോഗസ്ഥർക്ക് നിർദേശം നൽകിയിട്ടുമുണ്ട്.

മാവൂർ റോഡിൽ മൊഫ്യൂസൽ ബസ്സ് സ്റ്റാൻ്റിന് സമീപം നടപ്പാതയിലെ ഇരുമ്പ് ഗ്രിൽ ദ്രവിച്ച സംഭവം ശ്രദ്ധയിൽപ്പെട്ടതിനെ തുടർന്ന് അവിടെ താൽക്കാലിക സംവിധാനം എന്ന നിലയ്ക്ക് സ്ലാബിട്ട് അപകട സാധ്യത ഒഴിവാക്കിയിട്ടുണ്ട്. പൊതുമരാമത്ത് റോഡ്സ് വിഭാഗത്തിന്റെ കീഴിലുള്ള റോഡ് ആയതിനാൽ അവിടെ കൂടുതൽ ഉറപ്പുള്ള ഗ്രില്ലുകൾ സ്ഥാപിച്ച് ഇക്കാര്യം ശാശ്വതമായി പരിഹരിക്കുന്നതിന് നടപടി സ്വീകരിക്കുന്നതിന് പൊതുമരാമത്ത് റോഡ്സ് വിഭാഗത്തിന് കത്ത് നൽകുകയും ചെയ്തിട്ടുണ്ട്. ഇത് യഥാസമയം ശ്രദ്ധയിൽ പെടുത്തിയവരുടെ ഇടപെടൽ തീർച്ചയായും മാതൃകാപരമാണ്. ഇത്തരത്തിൽ തുടർന്നും കാര്യങ്ങൾ ശ്രദ്ധയിൽ പെടുത്തുന്ന മുറക്ക് ആയത് പരിഹരിക്കുന്നതിന് കോർപ്പറേഷൻ അടിയന്തിര നടപടി സ്വീകരിക്കുന്നതാണ്.