PMA Sameer

ചരിത്രത്തിന് നൽകാവുന്ന ഏറ്റവും വലിയ നീതി അത് വിസ്മൃതിയിലാണ്ടുപോകാതെ കാത്തുസൂക്ഷിക്കുക എന്നതാണ്!
സംസ്ഥാന ബജറ്റിലെ 'മമ്പുറം പൈതൃക പദ്ധതി' പ്രഖ്യാപനം ആ അർത്ഥത്തിൽ ഏറെ പ്രതീക്ഷ നൽകുന്ന ഒന്നാണ്. കേവലമൊരു ബജറ്റ് വകയിരുത്തൽ എന്നതിലുപരി, കേരളത്തിന്റെ മതേതര-സമര ചരിത്രത്തോടുള്ള വലിയൊരു ആദരവ് കൂടിയാണിത്.

മലബാറിന്റെ കൊളോണിയൽ വിരുദ്ധ പോരാട്ടങ്ങളുടെ ചരിത്രം പറയുമ്പോൾ മാറ്റിവെക്കാനാവാത്ത പേരാണ് മമ്പുറം. ബ്രിട്ടീഷ് സാമ്രാജ്യത്വത്തിന്റെ തോക്കിൻകുഴലുകൾക്ക് മുന്നിൽ നെഞ്ചുവിരിച്ചു നിൽക്കാൻ അന്നാട്ടിലെ സാധാരണക്കാരായ കർഷകരെയും മാപ്പിളമാരെയും പ്രാപ്തരാക്കിയത് മമ്പുറം സയ്യിദ് അലവി തങ്ങളുടെയും ഫസൽ പൂക്കോയ തങ്ങളുടെയും നേതൃത്വമായിരുന്നു. ആത്മീയതയെ മനുഷ്യന്റെ വിമോചനത്തിനായുള്ള സമരമാർഗ്ഗമാക്കി മാറ്റിയ ചരിത്രഭൂമിയാണത്.

ആ പോരാട്ടങ്ങൾക്ക് സമാനതകളില്ലാത്ത ഒരു മാനവിക മുഖമുണ്ടായിരുന്നു. അത് അവിടുത്തെ മതമൈത്രിയാണ്. മമ്പുറം തങ്ങളുടെ വിശ്വസ്തനായ കാര്യസ്ഥൻ കോന്തുനായരിലൂടെയും, തങ്ങളെ കാണാനും സങ്കടങ്ങൾ പറയാനുമായി ജാതിമത ഭേദമന്യേ ഒഴുകിയെത്തിയിരുന്ന ആയിരങ്ങളിലൂടെയും കേരളം ദർശിച്ചത് പരസ്പര സ്നേഹത്തിന്റെ അനശ്വരമായ ഏടുകളായിരുന്നു. അവർണർക്കും അടിച്ചമർത്തപ്പെട്ടവർക്കും വേണ്ടി നിലകൊണ്ട, മനുഷ്യനെ മനുഷ്യനായി മാത്രം കണ്ട ഒരു വലിയ പാരമ്പര്യത്തിന്റെ തുടർച്ചയാണ് മമ്പുറം.

ഈയൊരു പശ്ചാത്തലത്തിലാണ് സർക്കാരിന്റെ പുതിയ പൈതൃക പദ്ധതി പ്രസക്തമാകുന്നത്. കേവലമൊരു സ്മാരക നിർമ്മിതിക്കപ്പുറം, മലബാറിന്റെ യഥാർത്ഥ ചരിത്രം ലോകത്തിന് മുന്നിൽ തുറന്നുകാട്ടുന്ന ഒരു മികച്ച 'ഹെറിറ്റേജ് ടൂറിസം കോറിഡോർ' ആക്കി മമ്പുറത്തെയും തിരൂരങ്ങാടിയും പരപ്പനങ്ങാടിയും ഉൾപ്പെടുന്ന അനുബന്ധ ദേശങ്ങളെയും മാറ്റിയെടുക്കാൻ ഈ പദ്ധതിക്ക് സാധിക്കും.
പദ്ധതി യാഥാർത്ഥ്യമാകുന്നതിലൂടെ നമ്മുടെ ചരിത്രവിദ്യാർത്ഥികൾക്കും ഗവേഷകർക്കും ലോകസഞ്ചാരികൾക്കും മുന്നിൽ തുറക്കപ്പെടുന്നത് കേരളത്തിന്റെ സാംസ്കാരിക മഹിമയുടെ ജീവിക്കുന്ന പുസ്തകമായിരിക്കും. പ്രാദേശിക സമ്പദ്‌വ്യവസ്ഥയ്ക്കും അത് വലിയ മുതൽക്കൂട്ടാകും.

ചരിത്രത്തെ വെട്ടിമാറ്റാനും തങ്ങൾക്ക് അനുകൂലമായി വളച്ചൊടിക്കാനും ബോധപൂർവ്വമായ ശ്രമങ്ങൾ നടക്കുന്ന ഈ കെട്ടകാലത്ത്, ഇത്തരം പൈതൃകങ്ങളെ അതിന്റെ യഥാർത്ഥ ശോഭയോടെ നിലനിർത്തേണ്ടത് കാലത്തിന്റെ അനിവാര്യതയാണ്. ഈ ബജറ്റ് പ്രഖ്യാപനം സമയബന്ധിതമായിത്തന്നെ പൂർത്തിയാക്കാൻ സാധിക്കുമെന്ന് പ്രത്യാശിക്കുന്നു.

നമ്മുടെ ചരിത്രമാണ് നമ്മുടെ കരുത്ത്!

മതമൈത്രിയുടെയും മാനവികതയുടെയും പ്രതീകമായ മമ്പുറത്തിന്റെ പൈതൃകം ഇനി കൂടുതൽ തിളക്കത്തോടെ. 'മമ്പുറം പൈതൃക പദ്ധതി' യാഥാർത്ഥ്യമാക്കാൻ ബജറ്റിൽ തുക നീക്കിവെച്ചു. നമ്മുടെ നാടിന് അഭിമാനകരമായ മറ്റൊരു നാഴികക്കല്ല് കൂടി.

തിരൂരങ്ങാടിയുടെ ആരോഗ്യ മേഖലയ്ക്ക് പുതിയൊരു ചരിത്ര നേട്ടം കൂടി!
ഏറെക്കാലത്തെ നമ്മുടെ കാത്തിരിപ്പിന് ഫലം കണ്ടുകൊണ്ട് തിരൂരങ്ങാടി താലൂക്ക് ആശുപത്രിയെ ജനറൽ ആശുപത്രിയായി ഉയർത്തുന്നു.
വാഗ്ദാനങ്ങൾ ഓരോന്നായി യാഥാർത്ഥ്യമാക്കിക്കൊണ്ട് മണ്ഡലത്തിന്റെ സമഗ്ര വികസനത്തിനായി നമുക്ക് ഒന്നിച്ച് മുന്നോട്ട് പോകാം.

നമ്മുടെ മണ്ഡലത്തിലെ LBS IIST ക്ക് ആദ്യഘട്ട ഫണ്ടായി 5 കോടി രൂപ സർക്കാർ അനുവദിച്ചു. വിദ്യാർത്ഥികൾക്ക് മികച്ച ഉന്നത വിദ്യാഭ്യാസ സൗകര്യങ്ങൾ നാട്ടിൽ തന്നെ ഒരുക്കുക എന്ന ലക്ഷ്യത്തിലേക്കുള്ള വലിയൊരു ചുവടുവെപ്പാണിത്.നൽകിയ വാഗ്ദാനങ്ങൾ ഓരോന്നായി യാഥാർത്ഥ്യമാക്കിക്കൊണ്ട് നമുക്ക് മുന്നോട്ട് പോകാം.

നമ്മുടെ നാട്ടിൽ ഷിഗെല്ല രോഗബാധ റിപ്പോർട്ട് ചെയ്ത സാഹചര്യത്തിൽ നാം കൂടുതൽ ജാഗ്രത പുലർത്തേണ്ടതുണ്ട്. ഭയപ്പെടേണ്ട സാഹചര്യമില്ലെങ്കിലും, ചെറിയൊരു അശ്രദ്ധ പോലും രോഗവ്യാപനത്തിന് കാരണമാകാം. വയറ്റിൽ നിന്നും രക്തവും കഫവും പോവുക , കടുത്ത വയറുവേദന, പനി, ഛർദ്ദി എന്നിവയാണ് ഈ ബാക്ടീരിയൽ രോഗത്തിന്റെ പ്രധാന ലക്ഷണങ്ങൾ.

മലിനമായ ജലത്തിലൂടെയും ആഹാരത്തിലൂടെയുമാണ് ഇത് പടരുന്നത് എന്നതിനാൽ ഹോട്ടലുകൾ, കല്യാണവീടുകൾ, മറ്റ് പൊതുചടങ്ങുകൾ എന്നിവിടങ്ങളിലെ കുടിവെള്ളവും ഭക്ഷണവും അതീവ ശുദ്ധമാണെന്ന് ഉറപ്പുവരുത്തണം. വീട്ടിൽ പൂർണ്ണമായും തിളപ്പിച്ചാറ്റിയ വെള്ളം മാത്രം കുടിക്കാനും, ആഹാരം എപ്പോഴും അടച്ചുവെക്കാനും ശ്രദ്ധിക്കുക.
കുട്ടികളിലോ മുതിർന്നവരിലോ ലക്ഷണങ്ങൾ കണ്ടാൽ ഒട്ടും വൈകിക്കാതെ തൊട്ടടുത്തുള്ള കുടുംബാരോഗ്യ കേന്ദ്രങ്ങളിലോ സർക്കാർ ആശുപത്രികളിലോ എത്തിച്ച് വിദഗ്ദ്ധ ചികിത്സ ഉറപ്പാക്കണം. വ്യക്തിശുചിത്വം കർശനമായി പാലിച്ചുകൊണ്ടും ആരോഗ്യവകുപ്പിന്റെ നിർദ്ദേശങ്ങൾ അനുസരിച്ചുകൊണ്ടും നമുക്ക് ഈ രോഗവ്യാപനത്തെ ഒന്നിച്ച് ചെറുക്കാം.