JBC enfo

Lansman ofisyèl Pati Sèvitè Ayisyen ( PSA)

Pati Sèvitè Ayisyen (PSA) fè lansman ofisyèl li dimanch 22 dawout 2026 la nan Parc Sportif Manquette, nan vil Wanament, depatman Nòdès. Aktivite a te rasanble plizyè patisipan ki te vin temwen prezantasyon nouvo fòmasyon politik la, nan yon demach pou kòmanse mete estrikti ak vizyon pati a devan piblik la.

Marcel Volmar, youn nan manm fondatè PSA, mete aksan sou direksyon ak angajman nouvo pati a nan lavi politik peyi a. Atravè lansman sa a, PSA vle ranfòse prezans li nan espas politik la epi kontinye fè konnen objektif ak pwopozisyon li yo bay popilasyon ayisyèn nan.

Pou garanti plis transparans nan finansman kanpay elektoral yo, Minis Jistis la, Patrick Pélissier, mande UCREF pou ranfòse kontwòl sou gwo don ak tranzaksyon bankè yo. Nan yon sikilè ki soti 12 out 2026, li presize tout don ki egal oswa depase 250 000 goud dwe fèt pa chèk oswa transfè labank. UCREF gen pou rapòte bay Pakè yo nenpòt tranzaksyon li konsidere kòm sispèk, pou otorite jidisyè yo pran mezi legal ki apwopriye.

Plizye sòlda ki fè pati Fòs Represyon Gang (FRG) rive nan depatman Latibonit ak elikoptè epi machin blende, pou etabli baz operasyon yo nan vil Gonayiv nan lide pou ede PNH rezoud problèm ensekirite a.

Konsèy Elektoral Pwovizwa (KEP) pibliye, lendi 27 jiyè 2026 la, kalandriye ofisyèl operasyon elektoral yo pou peryòd 2026-2027.

Daprè kalandriye sa a, premye tou eleksyon prezidansyèl la, eleksyon lejislatif yo, ansanm ak konsiltasyon popilè sou chanjman yo pwopoze fè nan Konstitisyon an, pwograme pou fèt 13 desanm 2026.

KEP fè konnen tou dezyèm tou eleksyon prezidansyèl ak lejislatif yo, ansanm ak eleksyon pou kolektivite teritoryal yo, prevwa pou fèt 21 fevriye 2027. Sepandan, enstitisyon an presize òganizasyon eleksyon sa yo depann de de kondisyon esansyèl: tabli yon klima sekirite ki akseptab epi mete resous finansye ki nesesè yo disponib.

Ayiti: Nan yon jès solidarite anvè pèp venezyelyen an, gouvènman Alix Didier Fils-Aimé a voye, madi 7 jiyè 2026 la, yon delegasyon medikal nan peyi Venezyela aprè tranblemantè ki te frape peyi a 24 jen pase a. Delegasyon an, ki dirije pa Minis Sante Piblik la, Doktè Sinal Bertrand, gen ladan l 31 pwofesyonèl sante, tankou medsen ak espesyalis.

Primati ak Konsèy Elektoral Pwovizwa (KEP) dakò sou yon bidjè 120 milyon dola ameriken pou finanse òganizasyon pwochen eleksyon yo an Ayiti. Antant sa a sòti apre plizyè reyinyon ki te fèt anba direksyon Premye Minis Alix Didier Fils-Aimé ak prezidan KEP a Jacques Desrosiers, avèk sipò teknik Ministè Ekonomi ak Finans (MEF), kote yo te analize tout depans ki gen rapò ak pwosesis elektoral la.

*Latibonit/ Edikasyon: anviwon 24 mil elèv pral patisipe nan egzamen 9èm Ane Fondamantal yo.*

Direksyon Depatmantal Edikasyon Latibonit lan anonse tout dispozisyon deja pran pou òganizasyon egzamen ofisyèl 9èm Ane Fondamantal yo pou ane akademik 2025-2026 la. Pandan yon konferans ak laprès vandredi 26 jen 2026, Direktris depatmantal la, Mme Blandine Lebrun, fè konnen 24 090 kandida ap patisipe nan egzamen yo, ki pral fèt nan 169 sant ak 1 211 sal klas atravè depatman an.

Konsèy Elektoral Provizwa (KEP) adopte yon mezi konsèvatwa kont Uder Antoine, direktè egzekitif enstitisyon an, 8 sou 9 manm Konsèy la siyen pou entèdi li antre nan lokal KEP a jiska nouvèl òd.
Mezi sa a vini aprè non Uder Antoine te kòmanse sikile nan medya yo kòm Direktè Jeneral KEP a, yon pòs gouvènman Alix Didier Fils-Aimé a chwazi pou li.

Nan kad pwogram P4000+ la, 1 192 nouvo polisye, pami yo 238 fanm gradye, vandredi 29 me 2026 la nan 36e pwomosyon Polis Nasyonal dayiti a, nan Lekòl Nasyonal Polis la nan komin Petyonvil.

Premye minis Alix Didier Fils-Aimé, ki te patisipe nan seremoni an, fè konnen nouvo pwomosyon sa a ap ede ranfòse kapasite fòs sekirite yo nan batay kont gang ame yo ak nan retablisman otorite Leta a ansanm ak Fòs Lame dayiti ak lòt inite espesyal yo. Chèf gouvènman an estime demach sa a enpòtan pou retounen lapè nan peyi a epi kreye kondisyon pou òganize eleksyon lib ak kredib an Ayiti.

Pati politik Initiative des Combattants pour l’Avancement et le Progrès d’Haïti (ICAP) denonse egzijans 30 mil goud manm KEP yo mande pati politik yo pou yo ka patisipe nan eleksyon yo.

Prezidan pati a pwofesè Jean Chrisnel Décime kwè kondisyon sa a kapab mete anpil òganizasyon politik sou kote nan pwosesis demokratik la. Nan yon dokiman 18 paj, ICAP pwopoze yon kreyasyon twa gwo blòk politik an Ayiti : Sant, Dwat ak Gòch, yon inisyativ òm politik la konsidere kòm yon mwayen pou redwi dezòd kap afebli lavi politik peyi a depi plizyè lane.