Cookable

喺英國第一次過聖誕，好想搞啲嘢賀一賀佢，所以特登買舊牛silverside，整個意式肉醬。再用簡單腌啲雞槌夜晚BBQ；加埋沙律菜同cold cut，都算豐豐地富。

意式肉醬應該用牛肋骨，但我覺得貴，所以簡咗適合用嚟慢煮、肉質比較瘦嘅silverside 。至於烤雞槌，可惜落雨，冇得開燒烤爐，唯有焗咗佢。

➡️意式肉醬⬅️
🚹6人份量🚺

🐂牛肉0.6kg
🧅洋蔥1個
🥕紅蘿蔔3條
防風草2條
🍅罐頭蕃茄2罐

1️⃣用鹽、點椒腌好牛肉，多啲都唔怕，然後煎封六面待用
2️⃣所有蔬菜切粒，炒香
3️⃣加入蕃茄及1杯水
4️⃣加3片月桂葉
5️⃣將牛肉切條，不用太細，放入蔬菜一齊煮
6️⃣加入適量羅勒葉
7️⃣煮滾後可選擇細火焗2小時，或180度焗2小時，睇你電費定煤氣費貴啲🤦‍♂️
8️⃣煮完後試味，睇吓落幾多鹽
9️⃣見議一朝或早一日煮定，因為凍咗番煮啲肉會更淋同成煲嘢都更入味

🔟可選擇配意粉或包，今次我揀咗用包

➡️烤雞槌⬅️

幾多隻都好，腌料都係同一比例
2：2：1
鹽：紅椒粉：黑椒

1️⃣腌半日，焗前落橄欖油揸勻雞槌
2️⃣焗爐預熱180度，焗25分鐘，放架焗，另雞槌較乾身
3️⃣焗15分鐘反一反
4️⃣焗至20分鐘，焗爐校到200度
5️⃣焗至25分鐘完成

呢兩味簡單又易煮，大人細路都啱食😋。除夕如果開party，或者想煮餐好嘢畀屋企人食，都可以試吓。可惜今次冇得用炭燒，否則雞槌肯定更好味。

《阿女豪食雞屎忽》

做冬點都要有隻雞，今次焗咗隻啤酒雞，用紅椒粉，鹽，黑椒，牛油，迷迭香搽勻成隻雞，腌至少半個鐘，可以腌過夜都得，啤酒半罐架入蒜頭兩粒，牛油；焗盤底放西蘭花，洋蔥，想放咩蔬菜都得。

180度焗50分鐘，中途轉一轉隻雞，最後搽蜜糖焗多5分鐘就搞掂。啲雞汁流晒落啲蔬菜度，啲蔬菜吸收晒啲雞嘅精華，十分好味。

英國啲雞普遍都大隻，由其下盤，個屎忽同對髀勁大，唔想浪費食物，我同老婆又唔食雞屎忽，咁唯有益阿女，仲拍埋片，當然，佢唔知自己食緊嗰舊係雞屎忽😎食得好滋味，仲吮埋舊骨，係，我今日先知雞屎忽有骨。

當同佢講佢食嗰舊係屎忽嗰陣，佢差啲崩潰，就係佢疑惑中就想喊嘅時候，唯有同佢講：「黐線咩，點會係雞屎忽吖🙂」就係咁，阿女第一次食雞屎忽印象良好✌️

#雞屎忽
#冬至

阿寶我自三月後就冇出過post，係因為小弟同家人忙住準備離開，冇時間煮嘢食，亦冇時間揾唔同餐廳介紹畀大家。

依家已經到咗英國兩個月，一切都仲習慣緊，但撞正小弟牛一，就算啲KOL話英國出街食貴，都要去賀一賀。老實講，喺香港好多年冇特別去慶祝，因為真係諗唔到有乜好做，但嚟到英國，揸住架車揾嘢食團火又燃起咗，今次特登揀啲另類少少嘅食物，埃塞俄比亞菜。

想食埃塞俄比亞菜，係因為Injera。Injera個樣成卷毛巾咁，食落好似鬆軟版嘅熱香餅，帶啲微微發酵嘅酸味。上網見人搣一塊仔，再夾啲配菜食，十分滋味。

今次嚟到呢間餐廳叫mesob，位於sheffield嘅london road。由於第一次試，所以就叫咗個乜都有嘅餐，有牛、羊、雞、菜、豆，睇落以為係好濃香料味，但食落又唔係，牛偏辣，帶少酸；咖哩羊味道温和，羊味突出；雞嘅汁料同牛有啲似，但食落似中式滷水滷咗幾日咁，雞槌啖啖肉；食完肉，酸酸地嘅波菜同豆可再開胃；紅菜頭可以清清口腔，其實成餐食物都帶微酸，盤中嘅芝士正可起到中和作用。最後加杯埃塞俄比亞㗎啡，呢餐生日飯好圓滿。

嚟到彼邦，好多香港人都求食一餐打邊爐，整叉燒，焗燒肉，清湯腩，羊腩煲，飲茶，我都係。但如果可以的話，其實英國係有好多唔同國家菜式，而且出去食係有平有貴，今餐三個人食咗24鎊，我諗唔算貴啩。嚟到地球另一邊，要把握機會出外見識多啲，相信食唔同菜式都算係一種好體驗。

之後我會出多啲post，但可能唔只食，希望大家多多支持啦。

洋蔥汁雞扒飯

呢排病病地，都係叫外賣多，食得多都諗唔到食乜，咁啱睇yt睇到星星師傅搞整個萬用汁，所以試吓。

個汁好簡單，整完真係同茶餐廳好似，好好味，撈飯一流，食好少肉嘅阿女仲食晒雞扒上面啲汁。

汁嘅材料有洋蔥，雞湯，麵粉，茄膏，老抽，做法可參考呢條片
https://youtu.be/_QLUy15NXPA

兩塊雞扒就簡單用生抽，老抽，糖，鹽，蒜蓉，胡椒粉腌兩個鐘。焗前抹乾層皮，落啲鹽，焗爐180度焗10分鐘，再220度焗3分鐘等個皮好食啲。

可能大家覺得茶餐廳嘢叫外賣咪得囉，但我整三碟成本都係五六十蚊，而且冇味精，鹹酸又可以自己較，雞扒份量又多啲絕對抵玩。

茶餐廳食物始終係香港食得最多嘅嘢，如果可以自己都煮得到八九成似，喺冇夜市堂食嘅時候，或者喺外國冇港式茶餐廳嘅地方，可以幫吓大家止吓心癮。

#茶餐廳

成年冇出post，但今日食咗個好嘢，點都要出個post。

今日幫襯咗 嘅非洲雞煲，呢間喺重慶大廈嘅加納餐廳已經去過幾次，啲食物好啱我呢啲濃味L，可惜依家疫情關係，好難再去，難得出咗雞煲，仲送到大埔，冇理由唔試。

叫咗小辣，下次可以食辣啲都得，唔似香港啲雞煲重蔥蒜味，非洲雞煲有蕃茄香味，而且用料十足，食完啲雞仲有大煲汁，可以用嚟打邊爐。問過老闆娘，佢話有客第二日用嚟撈麵食，其實嗰汁係有啲啲鹹，所以食得濃味嘅，用嚟撈飯撈麵一流，怕鹹可以加少少水煲番熱都好惹味。

其實 之前已經唔少傳媒介紹過，禁晚市前去食都要book，因為佢哋裝修後太少位，上次都係啱啱有位先食到。依家禁埋晚市，佢哋靠外賣撐住，今日個雞煲仲係老闆阿Paul親自送嚟，一日送幾區真係辛苦佢，大家鍾意食雞煲，又想新嚐試的話，不妨試吓 嘅非洲雞煲啦。