Sharp Swords

🎯 የክብር ዘመቻው የመጨረሻው 10 ሜትር፦ ከጭንቀት ወደ ንግስና!

​ለንጋቱ ፀሐዮች፣ ለ2018 ዓ.ል የ6ኛ እና 8ኛ ክፍል የከተማ አቀፍ ሚኒስትሪ ፈተና ተፈታኞች በሙሉ! 🎓✨

​🔶 ክፍል ❶፦ መግቢያ፦ ለውድድር ሳይሆን ለታሪክ የተፈጠራችሁ የነገው አበቦች!
​ይህ ታላቅ ዕለት የውድድር መድረክ ሳይሆን፣ እናንተ ለታሪክ የተፈጠራችሁ ድንቅ ትውልድ መሆናችሁን ለዓለም የምታበስሩበት የክብር መጀመሪያ ነው! ዛሬ ግንቦት 27 ቀን 2018 ዓ.ል ላይ ቆመን ወደፊት ስንመለከት፣ ወደዚያ ታላቅ የድል አደባባይ ለመድረስ የቀሩን ቀናት ከ10 አይበልጡም። የ6ኛ ክፍል ሰኔ 8፣ 9 እና 10፤ የ8ኛ ክፍል ደግሞ ሰኔ 11 እና 12 የውሳኔ ቀናቶቻችሁ ናቸው። ይህ የሚኒስትሪ ፈተና እናንተን ለመመዘን ወይም ለማስፈራራት የሚመጣ ጠላት ሳይሆን፣ ለአመታት በክፍል ውስጥ ያፈሰሳችሁትን የትጋት ላብ፣ ያደራችሁበትን የሌሊት ጥረት እና የወላጆቻችሁን ተስፋ በታላቅ ውጤት የምታክሱበት፣ የታላቁ ስኬታችሁ ባለቤት የምትሆኑበት ወርቃማ አጋጣሚ ነው።
​ከፊት ለፊታችሁ የሚጠብቃችሁ ፈተና ፍርሃትን ሳይሆን ስኬትን የሰነቀ፣ የትላንት ጥረታችሁ ዛሬ አብቦ ነገ ፍሬ የሚያፈራበት የከፍታ ማማ ነው። እናንተ የምድር ጨው፣ የሀገር ኩራት እና የነገዋ ማራኪ ማለዳ ናችሁ! ይህ መመሪያ ለእናንተ የተዘጋጀ የመጨረሻው ስልታዊ የድል ጎዳና ነው፤ እንደ ሰይፍ የሳለ፣ በአላህ ፍቃድ እንደ ሚሳኤል ያለ ስህተት ግቡን የሚመታ። ይህንን የመጨረሻ 10 ሜትር በልበ-ሙሉነት፣ በፈገግታ እና በድል አድራጊነት እንዴት እንደምትሻገሩት እነሆ በተግባር የተፈተኑ መመሪያዎች።

​📚 ክፍል ❷፦ የቀሩትን 10 ቀናት "መጨቅለቅ" (The Ultimate Crunch Time)
​ጊዜው የሰከንድ ሳንቲሞች የሚቆጠሩበት ወርቃማ ወቅት ነው። አሁን አዲስ መጽሐፍ የምታገላብጡበት ሳይሆን፣ የነበራችሁን እውቀት የምታጠቁሩበት ጊዜ ነው።
​◆ የጊዜ አጠቃቀም (Time Compression): የቀሩትን ቀናት በሰዓታት ከፋፍሏቸው። በእያንዳንዱ ሰዓት ላይ ምን እንደምታነቡ ግልጽ እቅድ ይኑራችሁ።
​◆ የአንበሳው ድርሻ ለዋናው ርዕስ: ከፍተኛ ማርክ ሊያስገኙ የሚችሉ ዋና ዋና አርዕስቶችን ለይታችሁ አጥኑ።
​◆ ትኩረትን ሰብሰብ ማድረግ: ማህበራዊ ሚዲያ እና ትኩረት የሚሰርቁ ነገሮችን ለነዚህ 10 ቀናት በቁልፍ አስቀምጧቸው። ታላቁ ሳይንቲስት አልበርት አንስታይን እንደተናገረው፦
​"በጣም ብልህ ስለሆንኩ ሳይሆን፣ ከችግሮች ጋር ረዘም ላለ ጊዜ አብሬ ስለማቆይ ነው!"
አሁን ካጠኑት ርዕስ ጋር ብቻ አብሮ የመቆያ ጊዜ ነው።

​🔄 ክፍል ❸፦ የክለሳ ጥበብ እና የሞዴል ፈተናዎች ስልታዊ ውጊያ
​ማንበብ ብቻውን አይበቃም፤ ያነበቡትን ማስታወስና ለፈተናው ማዋቀር የድል ቁልፍ ነው።
​✅ በማጠቃለያ መክለስ (Active Recall): የያዛችኋቸውን አጫጭር ማስታወሻዎች (Summary Notes) ብቻ በዓይን እያነበቡ በፍጥነት መሮጥ።
​✅ የሞዴል ጥያቄዎች ጋጋታ: ላለፉት ጥቂት ወራት የተሰጡ የሞዴል ፈተናዎችን እና ያለፉት ዓመታት የሚኒስትሪ ጥያቄዎችን ሰዓት እያዩ መስራት። ይህ ፈተናው ላይ የሚመጣውን ድባብ በጭንቅላታችሁ ውስጥ አስቀድሞ ይቀርጻል።
​✅ ስህተትን ማረሚያ ደብተር: በሞዴል ጥያቄዎች ላይ የተሳሳታችሁትን ነጥብ ደግማችሁ እዩት። ስህተት አሁን ሲታረም ለፈተናው ዕለት ትልቅ ስጦታ ይሆናል።

​🧠 ክፍል ❹፦ በራስ መተማመን እና በአላህ መመካት (Effort + Trust)
​በራስ መተማመን የሚመጣው ካለምክንያት አይደለም። ለአመታት ካፈሰሳችሁት ላብ፣ ካደራችሁበት ሌሊት እና ካደረጋችሁት ከፍተኛ ጥረት የሚቀዳ ነው።
​🔶 ከትጋት በኋላ መመካት፦ ሙሉ አቅማችሁን አውጥታችሁ ካጠናችሁ፣ ከለፋችሁና ከደከማችሁ በኋላ፣ በራሳችሁ ጥረት ላይ ሙሉ እምነት ይኑራችሁ።
​🔶 ቀሪውን ለባለቤቱ መስጠት፦ ሰበቡን (ምክንያቱን) በሚገባ ካደረሳችሁ በኋላ፣ ቀሪውን ነገር ሙሉ በሙሉ በአላህ ላይ ጣሉት (ተወኩል አድርጉ)። ጥረታችሁን አምኖ ፈጣሪ ላይ የተደገፈ ተማሪ መቼም አይወድቅም። ያኔ ፍርሃት ቦታውን ለውስጥ ሰላም ይለቃል።

​🛡️ ክፍል ❺፦ የጭንቀትና የውጥረት ሚሳኤል መከላከያ (Psychological Armor)
​ፈተናው ሲቃረብ የልብ ትርታ መጨመርና "ሁሉንም ነገር የረሳሁት መሰለኝ" የሚል ስሜት መፈጠሩ ተፈጥሯዊ ነው። ይህ የውሸት ስሜት ነው። ጭንቅላታችሁ መረጃዎችን እያደራጀ መሆኑን ማሳያ እንጂ የመርሳት ምልክት አይደለም።
​♦️ አዎንታዊ ንግግር (Positive Self-Talk): "እችላለሁ! ተዘጋጅቻለሁ! የለፋሁበትን ውጤት አገኛለሁ!" እያላችሁ ለራሳችሁ ንገሩ።
​♦️ የኢማሙ አሕመድ ድንቅ ምክር: ታላቁ ሊቅ ኢማሙ አሕመድ የተረጋጋ አእምሮ ስላለው ስኬት ሲናገሩ፦
​❝በጎ ነገርን አስብ፤ ሁልጊዜም በበጎ ነገር ላይ ትሆናለህ።❞
ጭንቀትን በአዎንታዊ አስተሳሰብ አሸንፉት።
​♦️ ከአሉታዊ ሰዎች መራቅ: "ፈተናው ይከብዳል" የሚሉ፣ ፍርሃትን የሚዘሩ ጓደኞችን ለነዚህ ቀናት በሩቁ በሏቸው። አሁን የሚጠቅማችሁ ብርታትና ተስፋ ብቻ ነው።

​🕋 ክፍል ❻፦ የሰበብ ማድረስ ትርጉም (የአላህ ቃል ማጠናከሪያ)
​ሙስሊም ተማሪዎችም ሆናችሁ የሌላ እምነት ተከታዮች፣ የሰው ልጅ ግዴታ መጣርና መጣር ብቻ ነው። ውጤቱን የሚወስነው ግን ፈጣሪ ነው። አላህ በቁርዓኑ እንዲህ ይላል፦
❝​...በአላህም ላይ የሚጠጋ ሰው እርሱ በቂው ነው፤ አላህ ትዕዛዙን አድራሽ ነው...❞ (ሱረቱ አጥ-ጠላቅ፡ 3)

​እናንተ ሰበቡን አድርሱ፤ ቀሪውን ለፈጣሪ ተዉት፣ ፍጹም ሰላምና መረጋጋት ያቅፋችኋል።

​🤲 ክፍል ❼፦ የዒባዳ፣ የዱዓ እና የወላጆች ምርቃን ኃይል
​እውቀት የፈጣሪ ስጦታ ነው፤ ያንን ስጦታ ደግሞ በዱዓ እና በጸሎት እንለምነዋለን። የወላጆቻችሁ ምርቃን ደግሞ የተዘጋውን በር ሁሉ የመክፈት ምስጢራዊ ኃይል አለው።
​◆ በዒባዳ መበርታት: ፈርደ ሰላቶቻችሁን በወቅቱ ስገዱ፤ በሱጁድ ላይ እውቀትንና መረጋጋትን ለምኑ።
​◆ የነቢዩ (ሶለላሁ ዐለይሂ ወሰልም) መመሪያ: የአላህ መልክተኛ እንዲህ ብለዋል፦
​❝ለአንተ የሚጠቅምህን ነገር ላይ ጉጉ ሁን (ትጋ)፤ በአላህም ታገዝ፤ አትስነፍም!❞ (ሶሒሕ ሙስሊም፡ 2664)

​◆ የወላጆች ዱዓ: ዛሬውኑ ወደ ውድ ወላጆቻችሁ ሂዱና ዱዓና ምርቃታቸውን ለምኑ። የወላጆች ዱዓ በቀጥታ ተቀባይነት አለው፤ መንገድን ያቀናል፣ አእምሮን ይከፍታል።

​💤 ክፍል ❽፦ በቂ እረፍት እና የእንቅልፍ ወሳኝነት (The Brain Recharge)
​ብዙ ተማሪዎች የሚሳሳቱበት ትልቁ ስህተት ሌሊቱን ሙሉ ባለመተኛት አእምሯቸውን ማድከማቸው ነው። የተዳከመ አእምሮ ፈተና ላይ መረጃዎችን ማውጣት አይችልም።
​✅ ከ6-8 ሰዓት እንቅልፍ: በእነዚህ 10 ቀናት ውስጥ በተለይም በፈተናው ዋዜማ በቂ እንቅልፍ መተኛት ግዴታ ነው።
​✅ የአንጎል ሳይንስ: እንቅልፍ ስትተኙ ያጠናችሁት ነገር ከአጭር ጊዜ ማህደረ-ትውስታ ወደ ረጅም ጊዜ ማህደረ-ትውስታ ይሸጋገራል።
​✅ የኢብኑ ተይሚያህ ድንቅ ጥቅስ: ታላቁ ሊቅ ኢብኑ ተይሚያህ ስለ ነፍስና አካል እረፍት ሲናገሩ፦
​"ነፍስ እረፍት ስታገኝ ትበረታለች፤ ስትደክም ግን ትጠፋለች።"
አካላችሁንና አእምሯችሁን በቂ እረፍት በመስጠት አድሱት።

​📝 ክፍል ➒፦ የፈተና ዕለት ተግባራዊ ስነ-ስርዓት (Exam Day Readiness)
​♦️ ቁሳቁሶችን ማዘጋጀት፦ የእርሳስ፣ የላጲስ፣ የመቅረጫ እና የመግቢያ ካርዳችሁን (Admission Card) በዋዜማው ምሽት አዘጋጅታችሁ አስቀምጡ።

​♦️ አመጋገብና ውሃ፦ በፈተናው ጥዋት ቀለል ያለ ቁርስ መመገብን አትርሱ። አእምሯችሁ ንቁ እንዲሆን በቂ ውሃ ጠጡ።

​♦️ የሰዓት እና የፈተና አያያዝ ስልት፦ ፈተናው ሲጀምር መጀመሪያ የምታውቋቸውን ጥያቄዎች በፍጥነት በመስራት በራስ መተማመናችሁን አሳድጉ። በአንድ አስቸጋሪ ጥያቄ ላይ ከሁለት ደቂቃ በላይ በማባከን ሰዓታችሁን አትጨርሱ። የከበዳችሁን ጥያቄ ምልክት አድርጋችሁ አልፉት፤ ሁሉንም ከሰራችሁ በኋላ ወደ እሱ ትመለሳላችሁ።
​♦️ በሰዓቱ መገኘት፦ ጥዋት ሳይደናገጡና ሳይጣደፉ በሰዓቱ (ከተቻለ 30 ደቂቃ ቀድሞ) በመፈተኛ ጣቢያ መገኘት አእምሮ ሰላም እንዲሆን ያደርጋል።

​🏅 ክፍል ➓፦ መዝጊያ፦ ወደ ድል አደባባይ ሂዱ!
​ውድ አበቦቻችን! ይህ ምናልባትም ከፈተናው በፊት የምንለዋወጠው የመጨረሻው ትልቅ መልዕክታችን ሊሆን ይችላል። እኛ በበኩላችን ሙሉ እምነት ጥለንባችኋል። እናንተ የታሪካችን አዲስ ምዕራፎች ናችሁ።
​ሰኔ 8 (ለ6ኛ ክፍል) እና ሰኔ 11 (ለ8ኛ ክፍል) ወደ ፈተና ክፍሉ ስትገቡ፣ ትከሻችሁን ቀና አድርጋችሁ፣ ፈገግ ብላችሁ፣ በፈጣሪ ስም ተማምናችሁ ግቡ። ይህንን ያህል የለፋችሁለት ስኬት በእጃችሁ ላይ ይወድቃል።
​የስኬት ቃል ኪዳን፦ "ያለፈውን ጊዜ በሚገባ ተጠቅሜያለሁ፤ አሁንም ያለኝን ጊዜ እጠቀማለሁ። ፈጣሪዬን አምኜ የላቀ ውጤት አመጣለሁ!"
​መልካም የፈተና እና የድል ቀናት ይሁኑላችሁ! እናንተ የነገዎቹ አሸናፊዎች ናችሁ! 🏆 ያ አላህ ተፈታኝ ተማሪዎቻችንን በድል አጅባቸው! አሚን።

🤲 ​ያ አላህ! ያ ረብ! 🤲
​እነዚህ የነገው ንጋት ብሩህ ፀሐዮች የሆኑት ውድ ተማሪዎቻችን ላለፉት ዓመታት የለፉበትን ድካም ከንቱ አታድርግባቸው። በፍርሃት ፈንታ ፍጹም መረጋጋትን በልባቸው ውስጥ አስፍር።
​ያ አላህ! በፈተናው ዕለት አእምሯቸውን አብራው፤ ማህደረ-ትውስታቸውን ክፈትላቸው። ያጠኑትን ነገር ሁሉ በፈተናው ወረቀት ላይ በትክክለኛው ሰዓት እንዲያስታውሱት ቀናውን መንገድ ምራቸው። ብዕሮቻቸውን ወደ ትክክለኛው መልስ አቅናላቸው።
​ፈጣሪ ሆይ! ከፈተናው አዳራሽ በታላቅ ድልና በፈገግታ እንዲወጡ አድርጋቸው። የወላጆቻቸውን ልብ በደስታ አርስ፤ የትምህርት ቤታቸውን እና የአስተማሪዎቻቸውን ድካም በላቀ ውጤት አጅበው። የወደፊት ጉዟቸውን የከፍታና የብርሃን ማማ አድርገው!
​አሚን! ያ ረበል ዓለሚን! 🤲

══════════════
✍️ ረሻድ ኢብኑ ሙዘሚል

ለ2018 ዓ.ል የ6ኛ እና 8ኛ ክፍል ከተማ አቀፍ ፈተና ተፈታኞች በሙሉ! 🎓✨

​የአዲስ አበባ ከተማ አስተዳደር የ2018 የትምህርት ዘመን የ6ኛ ክፍል የአንደኛ ደረጃ እና የ8ኛ ክፍል የመካከለኛ ደረጃ ማጠናቀቂያ ከተማ አቀፍ ፈተናዎች የሚሰጡበትን ጊዜ በይፋ አሳውቋል።
​ትምህርት የማህበረሰባችን የውበት እና የእድገት መሰረት ነው። ውድ ተማሪዎቻችን ያካበቱትን እውቀት የሚያሳዩበት እና ወደ ላቀ የህይወት ምዕራፍ የሚሸጋገሩበት የፈተና ቀናት እንደሚከተለው ተወስነዋል፦

​📌 የፈተና ቀናት፦
📚 ​የ6ኛ ክፍል ፈተና፦ ሰኔ 8፣ 9 እና 10 ቀን 2018 ዓ.ል የሚሰጥ ሲሆን

📚 ​የ8ኛ ክፍል ፈተና፦ ሰኔ 11 እና 12 ቀን 2018 ዓ.ል ይሰጣል!

​📊 የዘንድሮው ዝግጅት በቁጥር፦
​6ኛ ክፍል፦ 84,882 ተማሪዎች በ199 የመፈተኛ ጣቢያዎች ፈተናውን ይወስዳሉ።
​8ኛ ክፍል፦ 86,808 ተማሪዎች በ201 የመፈተኛ ጣቢያዎች ፈተናውን ይወስዳሉ።

​💡 ለወላጆች እና ለተማሪዎች፦
​ለተማሪዎች፦ እውቀት መፈለግ እና መትጋት ትልቅ ክብር አለው። አላህን በመፍራት፣ በዱዓ፣ በራስ መተማመን እና በጽናት ተዘጋጁ። ድል የናንተ ነው! 📚🤲
​ለወላጆችና፦ ልጆቻችን የነገ ተስፋዎቻችን ናቸው። በዚህ የፈተና ወቅት ተገቢውን የሞራል እና የሀሳብ ድጋፍ በማድረግ፣ አእምሯቸው በሰላም እንዲፈተን የበኩላችንን እንወጣ። ፈጣሪ ጥረታቸውን ይባርክ! 🤝❤️

​ለሁሉም ተፈታኝ ተማሪዎቻችን መልካምና የተሳካ የፈተና ወቅት ይሁንላችሁ! ✅

═══════════════
◆ ጥረት ካለ ስኬት አይርቅም፤ ትጋት ካለ ድል አይታጣም!!
✅ ስኬት ለልጆቻችን፣ ለአበቦች፣ ለአንፀባራቂ ኮከቦች!

ወደ ስኬት ማማ የሚወስደው ወርቃማው ድልድይ!

​(የሞዴል ፈተና ሚስጥር)
​════════════════
​አሰላሙ አለይኩም ወራህመቱላሂ ወበረካቱህ!

​📚 ውድ የዕውቀት ፈላጊዎች፣ የነገ ሀገር ተስፋዎችና የዚህ ዘመን የለውጥ ፀሐዮች!
​ይህ መልዕክት ለዛሬ ወይም ለነገ ብቻ ሳይሆን፣ አላህ በሰጠን የዕውቀት ጎዳና ላይ እስካለን ድረስ ዘወትር የሚሰራ እውነተኛ የህይወት ስንቅ ነው። ልባችሁን ሰፋ አድርጋችሁ፣ በአላህ ፈቃድ ሕይወትን የሚያናውጸውን ይህንን ውብ ሀሳብ አጣጥሙት፤ አላህም ማስተዋሉንና ማስተርጎሙን ይክፈትላችሁ። 🤲

​1. ራስን የመመልከቻው "እውነተኛው መስታወት"
ብዙዎቻችን የምንሰናከለው ባለማወቃችን ሳይሆን፣ "አውቃለሁ" በሚል ስሜት ውስጥ ስለሚዘናጋን ነው። ሞዴል ፈተና ማለት የውሸት ካባችንን አውልቆ፣ ትክክለኛውን የእውቀት ደረጃችንን የሚያሳይ ጥርት ያለ መስታወት ነው።

​የድክመት ካርታ፦ ሞዴል ፈተና የትኛው የእውቀት ክምችትህ ላይ ክፍተት እንዳለ የሚጠቁም ጠቋሚ መሳሪያ (Compass) ነው። ክፍተቱ ሳይንስ ላይ ነው? ወይስ ቋንቋ ላይ? ዋናው ፈተና መጥቶ ሳይነግርህ በፊት በሞዴል ፈተና እራስን መገምገም ትልቁ ጥበብ ነው።

​2. የስነ-ልቦናው "ሰላምና እርጋታ" (Peace of Mind)
ፈተና ማለት እውቀት ብቻ አይደለም፤ የስነ-ልቦና ዝግጅትም ጭምር ነው። ብዙ ተማሪዎች ጎበዝ ቢሆኑም፣ የፈተና ክፍል ሲገቡ ግን ይርበተበታሉ።

​ድንጋጤን ማራቅ፦ ሞዴል ፈተናን በተደጋጋሚ መውሰድ አዕምሮን ከ"አዲስ ነገር" ድንጋጤ ያላቅቀዋል። ልክ ዋናተኛ ውሃ ውስጥ ከመግባቱ በፊት ሰውነቱን እንደሚያላምደው፣ እናንተም የፈተና ወረቀት ሲሰጣችሁ ልባችሁ በተረጋጋና በሰከነ ሁኔታ እንዲመታ ያደርጋል።

​3. ጊዜን የመግራት ብልሃት ሰዓቱ ሲሮጥ ማየት ያስጨንቃል።
ሞዴል ፈተና ግን ከሰዓቱ ጋር አብሮ መጓዝን ያስተምረናል። አንድን ጥያቄ ለመመለስ ስንት ደቂቃ እንደሚያስፈልግህ በደመ-ነፍስ እንድታውቅ ያደርግሃል።

​ጊዜ እንደ ወርቅ ነው፦ በአግባቡ ካልተጠቀምንበት ይባክናል። ጊዜን መግደል አንችልም፤ በአግባቡ ካልያዝነው ግን እሱው ጥሎን ይበርራል። ሞዴል ፈተና ይህንን ውድ ጊዜ እንዴት በብልሃት እንደምትጠቀሙበት መንገዱን ያሳያችኋል።

​4. አዕምሮን ማጎልበትና ማነቃቃት
አንድ ስፖርተኛ ለውድድር ከመቅረቡ በፊት ሰውነቱን ያሟሙቃል። ለምን? ብቁ ለመሆን! የኛም አዕምሮ ዝግጅት ያስፈልገዋል።

​የማስታወስ አቅም፦ ሞዴል ፈተና ስትሰሩ፣ አዕምሮአችሁ በመጋዘኑ ውስጥ ያስቀመጠውን መረጃ በፍጥነት ፈልጎ የማውጣት ልምምድ ያደርጋል። መጽሐፍን ዝም ብሎ ደጋግሞ ከማንበብ ይልቅ፣ እራስን መፈተን የማስታወስ ችሎታንና የመረዳት አቅምን በከፍተኛ ሁኔታ ይጨምራል።

​5. ከስህተት የመማር "ወርቃማው ሚስጥር"
ፈተናውን መውሰድ ብቻውን ሙሉ አይሆንም፤ ትልቁ ትምህርት የሚገኘው ከፈተናው በኋላ ነው።

​ስህተትን ማረም፦ በሞዴል ፈተና ላይ መሳሳት ወንጀል አይደለም፤ ስህተትን አለማረም ግን ዋናው ፈተና ላይ ዋጋ ያስከፍላል። ፈተናውን ከጨረሳችሁ በኋላ የተሳሳታችሁትን ጥያቄዎች ለምን እንደተሳሳታችሁ መለስ ብሎ መመርመርና መምህራንን መጠየቅ ለስኬት ዋነኛው ቁልፍ ነው።

​6. በራስ መተማመን እና የድል መንፈስ
አንድን ተራራ ከመውጣትህ በፊት፣ የመንገዱን ካርታ የሚያውቅ ሰው ልበ-ሙሉነቱ ልዩ ነው።

​የአሸናፊነት ስሜት፦ በአላህ እገዛ በሞዴል ፈተና ጥሩ ውጤት ስታመጡ፣ ውስጣችሁ "እችለዋለሁ!" የሚል ኃይለኛ ተነሳሽነት ይገነባል። ይህ ስሜት በዋናው ፈተና ቀን እንደ ጋሻ ሆኖ ከጭንቀት ይጠብቃችኋል።

​መረጋጋት (ሰኪና)፦ በደንብ የተዘጋጀ ተማሪ አይጣደፍም። እርጋታው እራሱ ለሌሎች ተማሪዎች ያስቀናል። ይህ እርጋታ የሚመጣው ከቅድመ-ዝግጅት ነው።

​🔥 የልብ መልዕክት

​ሞዴል ፈተናን እንደ "ሸክም" አትዩት። እንደ "ወርቃማ እድል" ቁጠሩት። ዛሬ ላይ ተሳሳቱ፣ ዛሬ ላይ ተደናገጡ፣ ዛሬ ላይ ጊዜ ይለቅባችሁ። ምክንያቱም ዛሬ በአላህ ፈቃድ ማረም ይቻላል! በዋናው ፈተና ቀን ግን ስህተትን ማረም አይቻልም፤ የሚቻለው ውጤትን መቀበል ብቻ ነው።
​ይህንን እድል ተጠቅማችሁ፣ እራሳችሁን አብቅታችሁ፣ ድክመታችሁን አርማችሁ ለድል ብቁ እንድትሆኑ አደራ። ትምህርት የኢባዳ (የአምልኮ) አካል ነው፤ ጠንክሮ መማር ደግሞ "ኢህሳን" (ምርጥ ስራ) ነው። ስኬታችንም ሆነ ጥረታችን ሙሉ የሚሆነው በአላህ እገዛና ቸርነት ብቻ መሆኑን አንዘንጋ።

​🤲 ዱዓ

​ያ የዓለማት ጌታ የሆነው አላህ ሆይ! ይህንን ለወገኖቻቸው፣ ለሀገራቸውና ለራሳቸው ብለው ሌት ተቀን የሚደክሙ ተማሪዎችን ልፋት አንተ ባርክላቸው።
​ጌታዬ ሆይ! በፈተና ሰዓት የመረጋጋትን መንፈስ አውርድላቸው። የረሱትን አስታውሳቸው፣ የከበዳቸውን አቅልላቸው። እውቀታቸው በወረቀት ላይ ብቻ ሳይሆን በህይወታቸውም ላይ ብርሃን ሆኖ እንዲፈነጥቅ አድርግላቸው።
​ለወላጆቻቸው የዓይን ማረፊያ፣ ለሀገራቸው የጀርባ አጥንት፣ ለዲናቸውም ጋሻና መከታ አድርገህ ያማረ ውጤትን ወፍቃቸው። አሚን! 🤲

​📖 ማጠቃለያ (መለኮታዊ ቃል)

​ንግግሬን የምዘጋው ሁሉን በሚያውቀውና ስኬትን ሁሉ በእጁ በያዘው ጌታችን በአላህ ቃል ነው። የሰው ልጅ የሚለፋው ለራሱ ነው፤ ውጤቱንም የሚያገኘው በአላህ ፍቃድ እንደ ልፋቱ ልክ ነው።

​"ለሰውም ሁሉ የሠራው እንጂ ሌላ የለውም። ሥራውም ወደ ፊት (በቂያማ ቀን) በእርግጥ ይታያል። ከዚያም ሙሉውን ዋጋ ይመነዳል።"
(ሱረቱ አን-ነጅም፡ 39-41)

​በልበ ሙሉነትና በአላህ ተስፋ ተዘጋጁ! የስኬት ማማ በጌታችን እገዛ እጃችሁ ላይ ነው!

✨━━━━━━━━━━━━✨
🌈 ꧂ ✍️ ረሻድ ኢብኑ ሙዘሚል ꧁ 🌈

📚 ርዕስ: ከፈተና በፊትና በኋላ ማድረግ የሚገቡን ነገሮች

ውድ የ6ኛ፣ የ8ኛ እና የ12 ክፍል ተማሪዎች፤ የፊታችን ግንቦት 10 እስከ 12/2018 ዓ.ል ለምትወስዱት የሞዴል ፈተና እንዲሁም ለቀጣዩ የሚኒስትሪ ፈተና እንዲሁም ለ12ኛ ክፍሎች ደግሞ የዩኒቨርሲቲ መግቢያ (Entrance) ፈተና ስንቅ ይሆን ዘንድ፣ ይህንን አጭር እና ጠቃሚ ምክር በጥንቃቄ አንብቡት።
የፈተና ጊዜ ሲቃረብ ሁላችንም በመጠኑ መጨነቅ እና ከወትሮው ከፍ ባለ መጠን ውጥረት ውስጥ መግባታችን የተለመደ እና ተፈጥሯዊ ነገር ነው። ይህንን አይነቱን ከፍተኛ ውጥረት መቆጣጠር የምትችሉበትን መንገድ አንድ በአንድ እንመልከት።

1. ከፈተና በፊት ማድረግ የሚገቡን ወርቃማ ዘዴዎች
♦️አመለካከትን ማስተካከል፡ ፈተና ማለት ከዚህ ቀደም ከተማርነው ነገር የተረዳነውን እና የቀሰምነውን እውቀት የምንለካበት መመዘኛ እንጂ የኛ የህይወት ምዕራፍ ማብቂያ ወይም አጠቃላይ ችሎታችንን የሚያመላክት አለመሆኑን መረዳት ያስፈልጋል። መሳሳትን አትፍሩ፤ ሁሌም ለማወቅ እና ራስን ለማሻሻል ዝግጁ መሆን የብልህ ተማሪ መገለጫ ነው።
♦️የጋራ ጥናት፡ ከጓደኞቻችን ወይም ከወላጆቻችን ጋር ያጠናነውን ነገር በጋራ ሆነን መጠያየቅ እና እርስ በርስ ያወቅነውን ነገር መለዋወጥ ትልቅ ጥቅም አለው። ይህ ዘዴ የማስታወስ ብቃታችንን በከፍተኛ ደረጃ እንደሚጨምር እና የተጠያየቅነው ነገር እንዳይረሳን ያደርጋል።
♦️በቂ እረፍት እና እንቅልፍ፡ የፈተና ቀን ሲቃረብ እንደ ወትሮው ዘና ማለት እና በቂ እረፍትና በቂ እንቅልፍ መተኛት ጭንቀትን ይቀንስልናል፤ እንዲሁም ተረጋግተን ያጠናነውን ነገር አስበን እንድንሰራ ይረዳናል።

💡የሳይንቲስቶች እይታ፡ "እንቅልፍ የተማርነውን አዲስ እውቀት ወደ ዘላቂ ማህደረ-ትውስታ (Long-term memory) የምናሸጋግርበት ወርቃማ ድልድይ ነው።" ስለዚህ በቂ እንቅልፍ ማግኘት ያጠናነውን እንዳንረሳ ያደርገናል።

2. በፈተና ወቅት መከተል ያለብን ጥበቦች
♦️ቅድመ ዝግጅት፡ ወደ ፈተና ከመሄዳችን ቀደም ብለን ለፈተና የሚረዱንን መሳሪያዎች እና የመፈተኛ ቁሶችን ማዘጋጀት አለብን።
♦️ድንገተኛ ጭንቀትን ማሸነፍ፡ በፈተና ጊዜ ድንገተኛ ጭንቀት እና ድንጋጤ ከገጠመን ወዲያው የምንሰራውን ገታ አድርገን በጥልቀት አየር በአፍንጫችን ስበን ወደ ሳንባ እያስገባን መልሰን ማስወጣት ይኖርብናል። ይህንንም እስክንረጋጋ መደጋገም ወሳኝ ነው።

📖 ነቢዩ ሙሳ (ዐ.ሰ) ከባድ ሀላፊነት ሲገጥማቸው አላህን እንዲህ ብለው ተማጸኑ፦ ❝ጌታዬ ሆይ! ልቤን አስፋልኝ፤ ነገሬንም ለእኔ አግራልኝ።❞ (ሱረቱ ጣሀ፡ 25-26)። እናንተም በፈተና ወንበር ላይ ስትቀመጡ ይህንን በማሰብ አላህ ነገራችሁን እንዲያገራላችሁ ጠይቁ።

♦️ራስን ማረጋጋት፡ "እኔ የምችለውን አድርጌያለሁ (ሰበብ አድርሼያለሁ)፣ የቀረውን ለአላህ ሰጥቼዋለሁ!" በማለት የማረጋጊያ ቃላትን ለራሳችሁ ንገሩ።
♦️የጥያቄ አያያዝ ስልት፡ ግራ ያጋባንን እና እርግጠኛ ያልሆንበትን ጥያቄ በይለፍ ማቆየት እና ወደ ቀጣዩ ጥያቄ መሄድ ጊዜያችንን በአግባቡ እንድንጠቀም ይረዳናል። ፈተናውን ወደ ማገባደድ ስንደርስ በይለፍ ያስቀመጥናቸውን ግራ ያጋቡንን ጥያቄዎች ጥቂት አስበንበት መልስ መስጠት፤ ካልሆነም ደግሞ ብልሀት ተጠቅመን የግምት መልስ ሰጥተን ወደ ቀጣዩ ጥያቄ መሄድ ይገባናል። በተደጋጋሚ ሰአት በቃን አልበቃን እያልን መጨነቅ የለብንም።
🔴 መሰረዝና መደለዝን መቀነስ፡ ስንደነግጥ እና ስንጨነቅ የምናውቀውን መልስ ትተን ሌላ መልስ እንድንሰጥ ስለሚያረግ፣ በተመሳሳይ እርግጠኛ ያልሆልንበትን መልስ ላይ ተደናግጠን መሰረዝ እና መደለዝን መቀነስ አለብን።

3. ከፈተና በኋላ...
አብዝተን ፈተናን እና የምናመጣውን ነጥብ ስሌት መገመት አይገባንም።
ፈተና ስንጨርስ የተሳሳትነውን ጥያቄ አብዝቶ ማሰብ እና ሌላ ተማሪ መጠየቅ ጭንቀት ውስጥ ስለሚከተን፣ ከዚህ ይልቅ እረፍት ማድረግ እና ለቀጣይ ፈተና መዘጋጀት ይመከራል። አሁን የምንፈተነው ፈተና እንዳሰብነው እንኳን ውጤቱ ባያስደስት ለቀጣይ ማስተካከል እና ማሻሻል እንደሚቻል ማመን አለብን።

⭐💫 ማጠቃለያ
ሁሌም ልናስታውሰው የሚገባን ትልቁ እውነት፡- ፈተና ማለት ለጀነት ማለፊያ ትኬት እንዳልሆነ እርግጠኛ መሆን ነው። ሁሉም ነገር አላህ ከወሰነው ውጭ እንደማይሆን ማመን አለብን። ከኛ የሚጠበቀው የአቅማችንን ያህል ማድረግ፣ ሌላውን ለአላህ መተው ነው። አላህ በናንተው ጥረት ብቻ ሳይሆን በሱ እዝነት መልካም የሆነ ውጤትን ይሰጣችኋል።

🤲 ዱዓ
ያ አላህ! አንተ እውቀትን ሰጪ፣ ልብን ከፋች አምላክ ነህና ለእነዚህ ልጆች ልባቸውን አስፋላቸው። ያጠኑትን ወደ አእምሮአቸው መልስላቸው፤ ያልገባቸውን አብራራላቸው። በፈተና ወቅት የሚመጣን ጭንቀት እና መደናገር አንሳላቸው። በጥረታቸው ብቻ ሳይሆን በአንተ ሰፊ እዝነት፣ ልፋታቸውን አሳምረህ አስደሳች እና ያማረ ውጤት ወፍቃቸው። ያረብ... ቀጣዩን የህይወት ዘመናቸውንም በስኬት፣ በኢማን እና በጥበብ የተሞላ አድርግላቸው! አሚን! 🤲

═══════════════
◆ ጥረት ካለ ስኬት አይርቅም፤ ትጋት ካለ ድል አይታጣም!!
✅ ስኬት ለልጆቻችን፣ ለአበቦች፣ ለአንፀባራቂ ኮከቦች!
✨━━━━━━━━━━━━✨
🌈 ꧂ ✍️ ረሻድ ኢብኑ ሙዘሚል ꧁ 🌈

🌟 የተስፋ ኃይል፡ የፍርሃትን ገበያ የሚያከስረው "አንዱ" ምክንያት! 🌟

​🔶 የፍርሃት ገበያ ላይ ተስፋ ለመቁረጥ ሺህ ምክንያቶችን ልናገኝ እንችላለን... ነገር ግን ተስፋ ላለመቁረጥ አንድ ምክንያት በቂ ነው!!

​በዙሪያችን ያለው ዓለም አንዳንዴ "የፍርሃት ገበያ" ይመስላል። በዚህ ገበያ ውስጥ ውድቀት፣ ጥርጣሬ፣ ሰነፍ ጓደኞች እና "አትችሉም" የሚሉ ድምፆች በብዛት ይቸበቸባሉ። ተስፋ እንድንቆርጥ የሚያደርጉ ሺህ ምክንያቶች እንደ ሸቀጥ ተደርድረው "ግዙን" ይሉናል። ነገር ግን እኛ በዚህ ገበያ ውስጥ ገብተን ተስፋ መቁረጥን አንገዛም!
​ታላቁ ሊቅ ኢብኑል ቀይም (ረሒመሁላህ) የልብንና የተስፋን ሚዛን እንዲህ ሲሉ ይገልጹታል፦

​"ልብ ወደ አላህ በሚያደርገው ጉዞ ልክ እንደ ወፍ ነው፤ አላህን መውደድ ጭንቅላቱ ሲሆን፣ ፍርሃትና ተስፋ ደግሞ ሁለት ክንፎቹ ናቸው።"

​ወፍ በአንድ ክንፍ መብረር አትችልም። ፍርሃት ብቻውን ሲነግስ ሽባ ያደርገናል። ተስፋ መቁረጥ ደግሞ ክንፋችንን ሰብሮ መሬት ላይ ይጥለናል፤ ጉዞአችንንም ያሰናክላል። ስለዚህ በሺህ የፍርሃት ምክንያቶች መካከል ያችን "አንዲት" የተስፋ ክንፋችንን አጥብቀን መያዝ አለብን።
​ያች ተስፋ እንዳንቆርጥ በቂ የሆነችው "አንዲት ምክንያት" ምንድን ናት? እርሷማ ከአላህ ዘንድ የሚመጣው ድልና እገዛ ናት! አላህ (ሱ.ወ) በቅዱስ ቁርኣኑ ውስጥ የፍርሃታችንንና የጭንቀታችንን ግንብ እንደ ሚሳኤል ግቡን በሚመታ ቃል እንዲህ ይፈታዋል፦

​"ከችግርም ጋር በእርግጥ ምቾት አለ።" (አሽ-ሸርህ፡ 5)

​ይህ አንቀፅ የሚነግረን ችግርና ምቾት አይለያዩም፤ አብረው ናቸው። ፈተናው ሲመጣ መፍትሄውም አብሮ ተልኳል። ይህን ካወቅን ተስፋ ለመቁረጥ ሺህ ምክንያቶች ቢደረደሩልንም፣ "አላህ ከመከራው ጀርባ ድልን ደብቆልናል" በሚል አንዲት ምክንያት ሁሉንም እናሸንፋለን።
​ለስኬታችን ደግሞ እንደ ሰይፍ የሳለ እና ተግባራዊ ሰዎች የሚያደርገንን የአላህ መልክተኛን (ﷺ) መመሪያ እንያዝ፦

​"የሚጠቅምህን ነገር ለማግኘት ጉጉት ይኑርህ፣ በአላህም ተመካ፣ አቅመ-ቢስም አትሁን (ተስፋ አትቁረጥ)።" (ሶሂህ ሙስሊም)

​ይህ ሀዲስ ዝም ብለን ለተቀመጥን ሰዎች አይደለም። የሚጠቅመንን (ትምህርታችንን፣ ስራችንን፣ ራዕያችንን) ለማሳካት እንደ ውሃ ጠጥተነው በውስጣችን ሊሰርፅ የሚገባ የጥንካሬ ቀመራችን ነው። "አቅመ-ቢስ አትሁን" የሚለው የአላህ መልክተኛ (ﷺ) ቃል ተስፋ መቁረጥንና መሸነፍን ሙልጭ አድርጎ የሚቆርጥ ሰይፍ ነው።
​ብዙዎቻችን ፈተና ሲበዛብን አላህ የረሳን ይመስለናል። ነገር ግን ሸይኹል ኢስላም ኢብኑ ተይሚያህ (ረሒመሁላህ) እንዲህ ይላሉ፦

​"ፈተናዎች ወደ አላህ የሚያቃርቡህ ከሆነ ካንተ የተሰወሩ ፀጋዎች ናቸው።"

​🚀 ከፍርሃት ገበያ ወደ ተስፋ ሜዳ የምንሸጋገርባቸው 3 እርምጃዎች፦

​አሁን ካለንበት የተስፋ መቁረጥ ስሜት ወጥተን ወደ ስኬት ጎዳና ለመመለስ እነዚህን ሦስት ተግባራዊ ነጥቦች በጋራ እንተግብራቸው፦

❶ ​ልባችንን እንጠግን፦ በየቀኑ ፈጣሪያችንን በማውሳት (ዚክር) የፍርሃትን ድምፅ እናጥፋው። አላህ እንዲህ ይላልና፦ "ልቦች አላህን በማውሳት ይረካሉና።" (አር-ራዕድ፡ 28)። የልብ መርጋት የተስፋ መጀመሪያ ነው።

❷ ​አካባቢያችንን እንመርምር፦ ሁሌም "አይቻልም" የሚሉንንና ተስፋችንን የሚሰርቁንን "የፍርሃት ነጋዴዎች" እንራቃቸው። በተስፋ ከሚሞሉን፣ ራዕይ ካላቸውና አብረውን ከሚተጉ ሰዎች ጋር እንቀላቀል።

❸ ​በትንሿ እርምጃ እንጀምር፦ ትልቁን ተራራ አይተን አንደንግጥ፤ ዛሬ መራመድ የምንችላትን አንዲት እርምጃ ብቻ እንራመድ። ግቡ ላይ ለመድረስ ሺህ ኪሎ ሜትር መጓዝ ካለብን፣ በዛሬዋ አንዲት እርምጃ መጀመር ግድ ይለናል። የተቀረውን ለፈጣሪያችን እንተው!

♦️​የመጨረሻ መልዕክታችን፦
ትላንት የተሳሳትንባቸው ስህተቶች፣ ዛሬ የገጠሙን መሰናክሎች እና ነገ የሚመጡት ስጋቶች በሙሉ የፍርሃት ገበያ ሸቀጦች ናቸው። እኛ ግን ከእኛ ጋር ያለውን ጌታ፣ ውስጣችን ያለውን አቅም እና ከፊታችን ያለውን ብሩህ ቀን እናስብ። ያ "አንዱ ምክንያት" ሺህ የፍርሃት ሰራዊትን ለማሸነፍ በቂ ነው!

​ተስፋ አንቁረጥ! ጉዞአችንን እንቀጥል!
✨━━━━━━━━━━━━✨

🌈 ꧂ ✍️ ረሻድ ኢብኑ ሙዘሚል ꧁ 🌈

📢 የልጆቻችን ስኬት "ሁለገብ" ቀመር

መግቢያ፦
​ውድና የተከበራችሁ ወላጆች፤ ልጆቻችንን ወደ ትምህርት ቤት ስንልካቸው አእምሯቸውን ለዕውቀት፣ ልባቸውን ለሥነ-ምግባር አሳልፈን እየሰጠን ነው። ነገር ግን ትምህርት ቤት ዘሩን የሚዘራበት "ማሳ" እንጂ፣ ፍሬው እንዲበቅል የሚያደርገው ብቸኛው "ዝናብ" አይደለም። እውነተኛው ለውጥ የሚመጣው በትምህርት ቤት የተጀመረው ብርሃን በቤት ውስጥ ባለው የጥናት ሥርዓትና በወላጆች ጥበብ የታከለበት ክትትል ሲታጀብ ከሁሉ በላይ ደግሞ በጌታችን አላህ (ሱ.ወ) እገዛና በረካ ሲባረክ ብቻ ነው።
​ይህ መልዕክት ውጤት ላይ ብቻ ያተኮረውን ጭንቀት ገሸሽ አድርጎ፣ በአላህ ፈቃድ ለልጆቻችን ስኬት መሠረት የሚሆንና የልብ ለልብ ጥሪን የሚያስተላልፍ መመሪያ ነው።

​ክፍል 1፦ የትምህርት ቤትና የቤት "ቅንጅታዊ ሚስጥር"
​ትምህርት ቤት መሄድና ወርሃዊ ክፍያን መክፈል የተማሪን ሕይወት ለመቀየር የመጀመርያው እርምጃ እንጂ የመጨረሻው ግብ አይደለም። ብዙዎቻችን "ውድ ትምህርት ቤት አስገብተን ለምን ለውጥ የለም?" ብለን እንጠይቃለን። እውነታው ግን፤ እውቀት በትምህርት ቤት ተቀምሮ ቤት ውስጥ ካልተከለሰ፣ ልክ እንደ ውሃ ላይ ምስል ቶሎ ይረሳል። ትምህርት ቤት ግብዓትን (Information) ይሰጣል፤ ቤት ደግሞ ያንን መረጃ ወደ እውቀት (Knowledge) እና ወደ ስብዕና (Character) የሚቀይርበት ማብሰያ ኩሽና ነው።
​ያለ ቤት እገዛ ትምህርት ቤት ብቻውን እንዲለወጥ መጠበቅ፣ ያለ ውሃ መሬት ላይ ዘር ጥሎ ፍሬ እንደመጠበቅ ነው። እውቀት በክፍል ውስጥ ይዘራል፣ በቤት ውስጥ ይኮተኮታል፣ በፈተና ወቅት ደግሞ ይታጨዳል። ኮተኮታው (ቤት ውስጥ ያለው ክትትል) ከሌለ ግን አዝመራው እንክርዳድ የመሆን ዕድሉ ሰፊ ነው።
​♦️ ከዚህም ባለፈ ወላጆች በዓመት አንዴ የካርድ ቀን ብቻ ሳይሆን፣ አልፎ አልፎ ትምህርት ቤት ብቅ እያሉ ከመምህራን ጋር አጫጭር ውይይት በማድረግ የልጆቻቸውን ጠንካራና ደካማ ጎን በትብብር መከታተል አለባቸው።

​🎤 ​ታላቁ ሊቅ ሼይኩል ኢስላም ኢብኑ ተይሚያህ (ረሂመሁላህ) እንዲህ ይላሉ፦ "እውቀት ማለት መረጃን መደርደር ሳይሆን፣ አላህ በልብ ውስጥ የሚጥለውና ወደ ተግባር የሚመራ ብርሃን ነው።" ይህ ብርሃን ደግሞ በወላጅ ፍቅርና ክትትል ካልታጀበ በስተቀር በትምህርት ቤቱ ድካም ብቻ አይመጣም።

​⁉️ የነፍስ ጥያቄ፦ እኔ ለልጄ "ወላጅ" ነኝ ወይስ "ባንክ"? ልጄ ከትምህርት ቤት ሲመጣ የምጠይቀው ስለደኅንነቱ ነው ወይስ ስለ ውጤቱ?

​🔶 የተግባር እርምጃ፦ ዛሬ ማታ ልጃችሁ ሲመጣ ቢያንስ ለ 15 ደቂቃ ስለ ውጤት ሳታነሱ፣ ትምህርት ቤት ውስጥ ስላሳለፈው ስሜትና ስለገጠመው አዲስ ነገር ብቻ በጥሞና አዳምጡት።

​ክፍል 2፦ የ"በረካማ ወቅቶች" እና የአእምሮ ፊዚዮሎጂ
​በትምህርት ቤቱ በኩል በኮሙኒኬሽን ደብተራቸው ላይ የተዘጋጀው የጥናት ፕሮግራም ሁለት ወሳኝ ወቅቶችን ታሳቢ ያደረገ ነው። ከሱብሂ በኋላ (ጧት) አእምሮ አዲስ መረጃን ለመቅዳት ንጹሕ ነው፤ ከኢሻዕ በኋላ (ማታ) ደግሞ የዋለበትን ትምህርት በአእምሮው ውስጥ ለማደራጀት (Memory Consolidation) ወሳኝ ሰዓት ነው። አእምሮአችን እንደ ባትሪ ነው። ጧት ላይ ሙሉ ኃይል አለው፤ ማታ ላይ ደግሞ ተሞልቶ (በእንቅልፍ) ራሱን እንዲያድስ ይፈልጋል።
​ሳይንሱ እንደሚነግረን በጧት ክፍለ ጊዜ የአእምሮ ንቃት ደረጃ (Alertness) እጅግ ከፍተኛ ነው። በዚህ ሰዓት የሚጠና ትምህርት በቀላሉ የመያዝ ዕድሉ ሰፊ ነው። ማታ ላይ ደግሞ አእምሮ ወደ ጥልቅ እንቅልፍ ከመሄዱ በፊት ያነበበውን ነገር እንደ ፋይል የማደራጀት ተፈጥሮ አለው። ልጆቻችን ጧት ተኝተው የሚረፍዱ ከሆነ፣ ቀኑን ሙሉ የዛለና ያልተነቃቃ አእምሮ ይዘው ነው የሚውሉት።

​▶ የአላህ መልክተኛ (ﷺ) እንዲህ ብለዋል፦
❝አላህ ሆይ! ለኡመቴ በጧት ጊዜያቸው ላይ በረካን አድርግላቸው።❞ [አቡ ዳውድና ቲርሚዚ ዘግበውታል]
​
⁉️ የነፍስ ጥያቄ፦ የቤቴ ድባብ ለበረካማው የጧት ጊዜ ምቹ ነው? ወይስ ልጆቼ በእንቅልፍ እጦት እየዛሉ ነው የሚነቁት?

​ክፍል 3፦ የጥናት ቀመር፦ ጥራት ከሰዓት ይበልጣል
ልጆቻችን እንዲያጠኑ ስንነግራቸው "ለሰዓታት ተቀመጡ" ማለት ሳይሆን "በትኩረት ስሩ" ማለት ነው። በትምህርት ቤቱ የተዘጋጀው የጥናት ቀመር ሳይንሳዊ መሠረት አለው። የአንድ ተማሪ ትኩረት (Attention Span) ውሱን ነው። አእምሮ ልክ እንደ ጡንቻ ነው፤ ለረጅም ሰዓት ያለ እረፍት ሲሠራ ይዝላል።

◉ በፕሮግራሙ መሠረት ልጆች ማታ ላይ ብቻ ሊያጠኑ የሚገባው የጊዜ እርዝማኔ፦
♦️ 1ኛ እና 2ኛ ክፍል፦ለማታ ጥናት 1፡30 ሰዓት
♦️ 3ኛ እና 4ኛ ክፍል፦ ለማታ ጥናት 2፡15 ሰዓት
♦️ 5ኛ እና 6ኛ ክፍል፦ ለማታ ጥናት 2፡30 ሰዓት
♦️ 7ኛ እና 8ኛ ክፍል፦ለማታ ጥናት 2፡45 ሰዓት
የፖሞዶሮ (Pomodoro) ቴክኒክ እንደሚያረጋግጠው፣ አእምሮ ለረጅም ሰዓት ካለእረፍት እንዲያጠና ከተገደደ፣ መረጃን ከመቀበል ይልቅ ራሱን መከላከል (Shut down) ይጀምራል። አጫጭር እረፍቶች አእምሮን እንደገና ለማነቃቃት (Brain Reboot) ይረዳሉ። ታዋቂው የፈጠራ ሰው ቶማስ ኤዲሰን እንኳ ለረጅም ሰዓት ከመሥራት ይልቅ አጫጭር እረፍቶችን በመውሰድ ለፈጠራ አእምሮውን ያድስ ነበር። ጥራት ያለው ጥናት ማለት የተቀመጡበት ሰዓት ሳይሆን፣ አእምሮ የተቀበለው እውቀት ነው።

⁉️ የነፍስ ጥያቄ፦ ልጄ መጽሐፍ ደፍቶ ስለታየኝ ብቻ እያጠና ነው ብዬ አምናለሁ? ወይስ የጥናቱን ጥራት እከታተላለሁ?

🔶 የተግባር እርምጃ፦ በቤታችሁ ውስጥ የጥናት ሰዓት ሲጀምር በሰዓት (Timer) በመታገዝ ልጁ ትኩረት አድርጎ እንዲሠራና በፕሮግራሙ መሠረት እረፍት እንዲያደርግ አበረታቱት።
♦️ የማታ ጥናቱ እስከ ሦስት ትምህርቶችን ሊያካትት ስለሚችል፣ ልጆች ከላይ የተጠቀሰውን የጊዜ ገደብ አሟልተው ጧት በንቃት እንዲነሱ፤ 1ኛ እና 2ኛ ክፍል ቢበዛ 3:00 ሰዓት ላይ፣ 3ኛ እና 4ኛ ክፍል እስከ 3:30-4:00 ሰዓት ባለው፣ እንዲሁም ከ5ኛ ክፍል በላይ ያሉ ተማሪዎች ከ4:00 - 5: 00 ሰዓት ባለው እንዲተኙ ቋሚ ሥርዓት ይዘርጉ።

​ክፍል 4፦ "የአቅም ልክ" እና ቁርኣናዊው ፍትሕ
​አንዱ ልጅ በሒሳብ ጎበዝ ሲሆን፣ ሌላው በቋንቋ ወይም በስነ-ጥበብ ድንቅ ይሆናል። ሁሉም ልጅ 100/100 እንዲያመጣ መጠበቅ፣ የተፈጥሮን ሕግ እንደመጋፋት ይቆጠራል። እያንዳንዱ ልጅ የተሰጠው አቅም የተወሰነ ነው። አላህ ሰዎችን የፈጠረው በተለያዩ ችሎታዎችና አቅሞች ነው።
​አንድ ተማሪ ሒሳብ ላይ 60 አምጥቶ ስነ-ጽሁፍ ላይ 95 ካመጣ፣ ያ ልጅ ደካማ ሳይሆን ተሰጥኦው ሌላ ቦታ ነው ማለት ነው። አቅሙን ያላገናዘበ ጫና መፍጠር ልጁ በትምህርቱ ላይ ጥላቻ እንዲያድርበትና በራስ መተማመኑ እንዲጠፋ ያደርጋል። ወላጅ መሆን ማለት የልጁን "ጣሪያ" ማወቅና ከዚያ በላይ አለመጫን ማለት ነው።

​ጌታችን በቅዱስ ቁርኣን እንዲህ ይላል፦
❝አላህ ማንኛይቱንንም ነፍስ ከችሎታዋ በላይ አያስገድዳትም (አይጭንባትም)።❞ [አል-በቀራህ 2፡286]

⁉️ የነፍስ ጥያቄ፦ እኔ ልጄን የምመዝነው በራሱ አቅም ነው ወይስ ጎረቤት ካለው ተማሪ ጋር በማወዳደር?

​🔶 የተግባር እርምጃ፦ ባለፉት ሦስት ወራት ልጃችሁ የትኛው ትምህርት ላይ የተሻለ ዝንባሌ እንዳለው መዝግቡ። ደካማ በሆነበት ላይ ድጋፍ አድርጉ እንጂ ወቀሳ አታውርዱበት።

​ክፍል 5፦ የተሰጥኦ ሚስጥር፦ "እያንዳንዱ ለተፈጠረለት ይገራል"
​እያንዳንዱ ልጅ ለተፈጠረለት አላማ የተመቻቸ ነው። ወላጅ የልጁን ደካማ ጎን ብቻ ከመመልከት ይልቅ፣ ጠንካራ ተሰጥኦውን መፈለግ አለበት። የአላህ መልክተኛ (ﷺ) ሶሐባዎቻቸውን የገመገሙት በተለያየ መስክ ነበር። አቡበክር (ረ.ዐ) በለገስነታቸው፣ ዑመር (ረ.ዐ) በጥንካሬያቸው፣ ኻሊድ ኢብኑል ወሊድ በጦር መሪነታቸው እንደተመሰገኑት ሁሉ፤ የእናንተም ልጅ ነገ ለዓለም የሚተርፍበት የራሱ መስክ ይኖረዋል።
​ሳይንቲስቱ አልበርት አንስታይን እንዲህ ይላል፦ "ሁሉም ሰው ሊቅ ነው፤ ነገር ግን አንዲትን አሳ ዛፍ ላይ የመውጣት ችሎታዋን መለኪያ አድርገህ ብትመዝናት፣ እድሜዋን ሙሉ ጅል እንደሆነች አስባ ትኖራለች።" የልጃችሁን የ"ዋናተኛነት" ተፈጥሮ ሳታዩ ለምን እንደ ዝንጀሮ ዛፍ ላይ አልወጣህም ብላችሁ አትውቀሱት።
​▶ የአላህ መልክተኛ (ﷺ) እንዲህ ብለዋል፦
❝ስሩ፤ እያንዳንዱ ሰው ለተፈጠረለት ነገር የተገራ/የተመቻቸለት ነው።❞ [ቡኻሪና ሙስሊም]

​⁉️ የነፍስ ጥያቄ፦ የልጄ "የተገራለት" (ተፈጥሯዊ) ዝንባሌ ምንድነው? እኔስ እሱን ለማሳደግ ምን አድርጌያለሁ?
​
🔶 የተግባር እርምጃ፦ ልጁ ከትምህርት ውጪ የሚያሳያቸውን የፈጠራ ስራዎች በጥሞና ተከታተሉና አድናቆት ስጡ።

​ክፍል 6፦ የኢብኑል ቀይም (ረሂመሁላህ) የትምህርት ፍልስፍና
​የልጆቻችንን አቅም እንዴት መገምገም እንዳለብን ሊቃውንት ትልቅ ጥቆማ ሰጥተውናል። ትምህርት ማለት የመረጃ ጭነት ሳይሆን የተሰጥኦ ጥበቃ ነው። የልጁን ተፈጥሯዊ ዝንባሌ ማስተዋልና እሱን ማሳደግ ከሁሉ በላይ ዋጋ አለው።
​ሳይንቲስቱ ሃዋርድ ጋርድነር "የብዝሃ-እውቀት" ቲዎሪውን ሲያቀርብ፣ ሰው በስምንት የተለያዩ መንገዶች ሊቅ ሊሆን እንደሚችል አረጋግጧል። ሒሳብ ላይ 100 ያላመጣ ልጅ በንግግር፣ ከሰው ጋር በመግባባት ወይም በቴክኖሎጂ አቻ የሌለው ሊቅ ሊሆን ይችላል።
​🎤 ​​ኢብኑል ቀይም (ረሂመሁላህ) እንዲህ ይላሉ፦ "ወላጅ የልጁን የተፈጥሮ ዝንባሌ ማስተዋል አለበት። ልጁ ዝንባሌ በሌለው ትምህርት በግድ እንዲወጠር ማድረግ የለበትም። ዝንባሌውን ያገኘ ልጅ በዚያ መስክ የላቀ ይሆናል፤ የማይወደውን የተጫነ ግን ሁለቱንም ያጣል (አዲሱንም አያውቅም፣ የራሱንም ተሰጥኦ ይገድላል)።"
​
⁉️ የነፍስ ጥያቄ፦ እኔ የምገነባው የልጄን ስብዕና ነው ወይስ የእኔን ያልተሳካ ህልም በእሱ ላይ ለመጫን እየሞከርኩ ነው?
​
🔶 የተግባር እርምጃ፦ ልጃችሁ የማይወደውን ትምህርት ለምን እንደማይወደው በረጋ መንፈስ ጠይቁት። ችግሩ ከተፈጥሮ ዝንባሌ ከሆነ አማራጭ መንገዶችን ፈልጉ።

​ክፍል 7፦ "ጥረት" ከ "ውጤት" ይበልጣል
​እንደ ወላጅ ትኩረታችን መሆን ያለበት ልጆቻችን ባመጡት "ቁጥር" ላይ ሳይሆን፣ ባሳዩት "ጥረት" ላይ ነው። ውጤት በብዙ ነገሮች ሊለዋወጥ ይችላል፤ ጥረት ግን ቋሚ ስብዕና ነው። ቶማስ ኤዲሰን መብራትን ከመፍጠሩ በፊት 10,000 ጊዜ ወድቆ ነበር። እናቱ ግን "ውድቀት" ብላ አልጠራችውም፤ "ለመስራት የማይችሉ 10,000 መንገዶችን አገኘህ" ብላ አበረታታችው እንጂ። ዛሬ በጥረት ያገኘው 80፣ ነገ ወደ 100 ያደርሰዋል። ጥረትን ማድነቅ ተማሪው ተስፋ እንዳይቆርጥ ያደርገዋል።
​🎤 ​ኢማም አሽ-ሻፊዒ (ረሂመሁላህ) እንዲህ ይላሉ፦ "እውቀት ማለት መረጃን በቃል መያዝ ሳይሆን፣ ለተግባር የሚጠቅመውና ሰውን የሚቀይረው ነው።"

​⁉️ የነፍስ ጥያቄ፦ ልጄ ዛሬ ቢለፋም ውጤቱ ባይመጣ፣ ጥረቱን አይቼ "አይዞህ" እለዋለሁ? ወይስ "ጊዜዬን አባከንክ" ብዬ እገስጻለሁ?
​
🔶 የተግባር እርምጃ፦ "100 ስላመጣህ ጎበዝ ነህ" ከማለት ይልቅ "ዛሬ 40 ደቂቃ ሙሉ በጥሞና ስላጠናህ ኩራት ይሰማኛል" የሚለውን አገላለጽ ተጠቀሙ።

​ክፍል 8፦ የቤት ድባብ፦ የዕውቀት ቤተ-ሙከራ
​ቤት የዕውቀት ድባብ ከሌለው ትምህርት ቤት የሰጠው እውቀት ይከስማል። እናንተ ስልካችሁን እያያችሁ ልጁን "አጥና" ብትሉት ውጤት የለውም። የልጁ አርአያ እናንተ ናችሁ። ልጁ በሚያጠናበት 40 ደቂቃ ውስጥ እናንተም መጽሐፍ ወይም ቁርኣን በመያዝ የንባብ ድባብ ፍጠሩ። ቤቱ የቲቪና የስልክ ጫጫታ ከሆነ፣ የልጁ አእምሮ በትምህርቱ ላይ ሊያተኩር አይችልም።
​♦️ በተጨማሪም የጥናት ቦታው አካላዊ ዝግጅት ወሳኝ ነው። ልጆች አልጋ ላይ ተኝተው እንዳያጠኑ ማሳሰብ ይገባል፤ አእምሮ አልጋን ከእንቅልፍ ጋር ስለሚያያይዘው ትኩረት ይበተናል። ጸጥታ ያለበት፣ በቂ ብርሃንና ንጹህ አየር ያለው ማዕዘን ለጥናት ሊመደብላቸው ይገባል።
​🎤 ​ኢብኑ ኡሰይሚን (ረሂመሁላህ) እንዲህ ይላሉ፦ "ወላጅ ለልጁ ምሳሌ የሚሆን ተግባር ካላሳየ ምክሩ ብቻውን ፍሬ አያፈራም።"

​⁉️ የነፍስ ጥያቄ፦ ቤቴ የዕውቀት ማዕከል ነው ወይስ የመዝናኛ ስፍራ? ልጆቼ ሲያጠኑ እኔ ምን እያደረግኩ ነው?
​
🔶 የተግባር እርምጃ፦ የጥናት ሰዓት ሲጀምር በቤቱ ውስጥ ያሉ የኤሌክትሮኒክስ መሣሪያዎችን (ቲቪ፣ ስልክ) በሙሉ ለተወሰነ ሰዓት የመዝጋት ልማድ አዳብሩ።

​ክፍል 9፦ ስሜታዊ ደኅንነት፦ የመማር ቁልፍ
​አእምሮ ስጋትና ጭንቀት ውስጥ ሲሆን የመማር አቅሙ ይዘጋል። ልጆች በትምህርታቸው ውጤት ካላመጡ ምናልባት ውስጣቸው ሰላም አጥቶ ሊሆን ይችላል። የአላህ መልክተኛ (ﷺ) ለልጆች የነበራቸው ርህራሄና ፍቅር ልባቸውን እንዲከፍቱ ያደርጋቸው ነበር። ፍቅርና መረጋጋት ባለበት ቤት ውስጥ ተማሪው የትምህርት ቤት ፕሮግራሙን ለመተግበር አይቸገርም።
​♦️ ልጆች ውጤት ሲቀንስባቸው ቤት ውስጥ የሚኖረው መሸማቀቅ (ፍርሃት) ለቀጣይ ውድቀት ይዳርጋቸዋል። ከስህተት መማር እንደሚቻል ማሳየት ያስፈልጋል። በተለይም ከ1ኛ-8ኛ ክፍል ባለው የዕድሜ እርከን (በተለይ ወደ 7ኛ እና 8ኛ ክፍል ሲጠጉ) የራሳቸው የሆነ ስሜታዊ ሽግግርና የጓደኛ ግፊት ውስጥ ስለሚገቡ፣ ወላጅ "አዛዥ" ከመሆን ይልቅ "አማካሪ እና ጓደኛ" መሆን አለበት። ልጆቻችሁን "ለምን አልመጣህም?" ብላችሁ ከመውቀሳችሁ በፊት፣ "ለማጥናት ምን ጎደለህ/ሽ? ምን የሚያስጨንቅሽ ነገር አለ?" ብላችሁ በጥበብ ጠይቁ።

​⁉️ የነፍስ ጥያቄ፦ ልጄ እኔን የሚያየኝ እንደ "አስፈሪ ዳኛ" ነው ወይስ እንደ "አጋዥ ደጋፊ"?
​
🔶 የተግባር እርምጃ፦ በሳምንት አንድ ቀን ከትምህርት ውጪ በሆነ ጉዳይ ላይ ከልጃችሁ ጋር ብቻችሁን ጊዜ አሳልፉ።

​ክፍል 10፦ የቴክኖሎጂ እና የስክሪን አስተዳደር
​በአሁኑ ዘመን የወላጆች ትልቁ ፈተና ቴክኖሎጂ ነው። ስልክ፣ ጌም እና ቴሌቪዥን የልጆችን ጊዜና ትኩረት በከፍተኛ ሁኔታ ይሰርቃሉ። ነገር ግን ቴክኖሎጂን ከማጥፊያነት ወደ ማሳደጊያ መሣሪያነት መቀየር ይቻላል። ለምሳሌ ለጥናት የሚረዱ ትምህርታዊ ቪዲዮዎችን እንዲያዩ በማድረግ በሥርዓት እንዲጠቀሙ መምራት ያስፈልጋል። ቴክኖሎጂን ያለ ገደብ መልቀቅ የልጆችን ተፈጥሯዊ የመማር ፍላጎት ያደነዝዛል።
​
⁉️ የነፍስ ጥያቄ፦ የቤቴ ቴክኖሎጂ ልጆቼን እያሳደጋቸው ነው ወይስ ትኩረታቸውን እየሰረቀ?
​
🔶 የተግባር እርምጃ፦ ልጆች ስክሪን የሚያዩበትን ሰዓት ገደብ በማውጣት፣ ከትምህርት ጋር የተገናኙ ጠቃሚ ይዘቶችን ብቻ እንዲከታተሉ መምራት።

​ክፍል 11፦ ማጠቃለያና የነፍስ ቃል
​ውድ ወላጆች፤ ልጆቻችን የአላህ አማናዎች ናቸው። በትምህርት ቤታችን የተሰጠው የጥናት መርሐ ግብር (Schedule) እናንተን ለማገዝ የተዘጋጀ "ካርታ" ነው። ይህን ካርታ በፍቅር፣ በትዕግስትና በእምነት ተጠቀሙበት። የልጆቻችሁን ልዩ ተሰጥኦ እዩላቸው፣ ጥረታቸውን አድንቁላቸው። ዛሬ የምታሳዩአቸው ርህራሄና የምትሰጧቸው ማበረታቻ፣ ነገ ለሚገነቡት ታላቅ ስብዕና ዋነኛው ግብዓት ነው።

​➤ የድርጊት ቃል ኪዳን፦ ይህን መልዕክት ካነበባችሁ በኋላ፣ ዛሬውኑ ማታ ከልጆቻችሁ ጋር አዲስ የፍቅርና የክትትል ምዕራፍ ጀምሩ።

​
​🌸 አላህ ይርዳችሁ እና ትምህርታችሁንም ይባርክላችሁ። ዛሬ የምታደርጉት እያንዳንዱ ትንሽ ጥረት ነገ ብሩህ ስኬት ይሆናል! 🌸 🤲 🤲

━━━━━━━━━━━━━━
​📢 ለልጆቻችን ስኬትና ብሩህ ተስፋ!

​✅ ይህ መመሪያ በአላህ ፈቃድና እገዛ የልጆቻችንን ሁለገብ ስኬት ለማገዝ የቀረበ አነስተኛ ጥረት ነው። ሁሉም ስኬት የሚገኘው በአላህ ፈቃድ ነውና፣ ይህ መልዕክትም ለልጆቻችን እድገት ሰበብ እንዲሆንልን እንመኛለን።
​➡ መልዕክቱ 11 ወሳኝ ክፍሎችን የያዘ በመሆኑ ረዘም ሊል ይችላል፤ ሆኖም እያንዳንዱ ነጥብ ለልጆቻችን ስኬትና ሥነ-ምግባር ትልቅ ፋይዳ ይኖረዋል ተብሎ የታሰበ ነው። ኢንሻአላህ!!

​💡 ትኩረት ለልጆቻችን ስኬት፦ እነዚህን ነጥቦች በአግባቡ ለማደራጀትና ጠቃሚ መረጃዎችን ለማሰባሰብ ረጅም ሰዓታት ቢፈጁም፤ እናንተ ለልጆቻችሁ ስኬት ሲባል ጥቂት ደቂቃዎችን ሰጥታችሁ አስራ አንዱንም ክፍሎች ብታነቧቸው፣ በአላህ ፈቃድ ለትልቅ ለውጥ መነሻ ይሆናል።

​መልካም ንባብ!
✨━━━━━━━━━━━━✨
🌈 ꧂ ✍️ ረሻድ ኢብኑ ሙዘሚል ꧁ 🌈

✅ አላፊው ብልጭልጭ እና ዘላለማዊው ስኬት

♦️​በሀራም ስኬትና ደስታ የደመቁ የሚመስሉ ሰዎችን አይተህ በራስህ ህይወት ላይ አትጠራጠር። የቱንም ያህል የደስታ ማማ ላይ የወጡ ቢመስሉም፤ እመነኝ በዚህች አላፊ ዓለም ውስጥ ዲንህን አጥተህ የምታተርፈው ምንም አይነት ምድራዊ ፀጋ የለም።

​ጌታችን አላህ (ﷻ) የዱንያን ብልጭልጭ እውነተኛ መልክ እንዲህ ሲል ይገልጽልናል፦
​❝እነርሱንም በእርሱ ልንፈትናቸው (ለአንዳንድ) ጥንዶች ከእነርሱ ዘንድ ወዳጣቀምናቸው ወደ ቅርቢቱ ሕይወት አበባ (ጌጥ) ዓይኖችህን አትዘርጋ፤ የጌታህም ሲሳይ (በጀነት) በላጭና ይበልጥ ቋሚ ነው።❞ (ሱረቱ ጣሃ፡ 131)

​የአላህ መልክተኛም (ﷺ) የዚህችን ዓለም ኢምንትነትና አላፊነት በድንቅ ምሳሌ እንዲህ ያስረዱናል፦
​“በአላህ እምላለሁ! ይህች ዓለም ከአኺራ አንጻር ሲታይ፣ አንደኛችሁ ጣቱን በባህር ውስጥ እንደነከረና መልሶ እንደሚያወጣው ያህል ብቻ ነው፤ ጣቱ ምን ይዞ እንደሚመለስ (ያቺ ጠብታ ከባህሩ ጋር ሲነፃፀር ምን እንደምትመዝን) ይመልከት።” (ሰሒህ ሙስሊም፡ 2858)

✍️ ረሻድ ኢብኑ ሙዘሚል

⭐ የነገው ብርሃን ፋናዎች ተስፋዎች፡ የትውልድ ግንባታና የኢኽላስ ጥበብ

✅ መግቢያ:
ትምህርት ማለት መረጃን ከአንድ አእምሮ ወደ ሌላው ማጋዘን ብቻ ሳይሆን፣ የአላህ ስጦታ የሆኑትን የነገ ኮከቦች ማድመቅና የነፍስን ውበት መቅረጽ ነው። እያንዳንዱ የትምህርት ሂደት፣ እያንዳንዱ በክፍል ውስጥ የሚነገር ቃልና እያንዳንዱ የተቋም ውሳኔ በትውልድ ህይወት ላይ የማይረሳ በጎ አሻራ ያሳርፋል።
ዛሬ የምንገነባቸው ትምህርት ቤቶችና የምንሰጣቸው ትምህርቶች የነገዋን አገርና የነገውን ስብዕና የሚወስኑ የጥበብ ማዕከላት ናቸው። መምህርነትና የትምህርት አመራርነት ደግሞ የሰው ልጅ ሊሰማራባቸው ከሚችሉ ታላላቅና ክቡር ተግባራት መካከል በቀዳሚነት ይጠቀሳሉ።
ይህ ጽሑፍ ዓላማው የዚህን ታላቅ ሙያ ክብርና በውስጡ ያለውን መንፈሳዊ በረከት ማስታወስ ነው። ትምህርትን ከግል ስኬት አልፎ ለኡማውና ለትውልድ የሚተርፍ ታላቅ "ዒባዳ" (አምልኮ) የምናደርግበትን የጥበብ መንገድ አብረን እንቃኛለን። ሁላችንም—መምህራን፣ የተቋም መሪዎችና ወላጆች—እጅ ለእጅ ተያይዘን የነገ አበቦችን (ተማሪዎቻችንን) በኢኽላስና በውበት የምናፈካበትን ብሩህ ተስፋ እንሰንቃለን።
የነገው ስኬት ዛሬ በምንዘራው የቅንነትና የጥበብ ዘር ላይ የተመሰረተ ነው!

♦️ ክፍል አንድ፦ የኒያ (ዓላማ) ኢኽላስ—ስራን ከልማድ ወደ አምልኮ መቀየር
ትምህርት መስጠትም ሆነ የትምህርት ተቋም ማቋቋም ተራ የንግድ ስራ ወይም የዕለት ተዕለት ልማድ አይደለም። የሰው ልጅን አእምሮ መቅረጽ ታላቅ የዒባዳ (አምልኮ) ዘርፍ ነው። ስራው ውጤታማ የሚሆነውና በረከት የሚኖረው ደግሞ "ኒያ" (ዓላማ) ሲስተካከል ነው። ብዙዎች ስራውን የገቢ ምንጭ ብቻ ሲያደርጉት፣ ጥቂቶች ግን አላህ ዘንድ የሚከፈልበት ታላቅ ንግድ ያደርጉታል።
ኒያህን ስታስተካክል ድካምህ ሁሉ አጅር ይሆንልሃል። መምህሩ ወደ ክፍል ሲገባ "ትውልድን ከጨለማ አወጣለሁ" ብሎ ካሰበ እያንዳንዱ ንግግሩ ተስቢህ ይሆንለታል። ተቋሙም "ለኡማው የሚጠቅም ዜጋ አመርታለሁ" ካለ የህንፃው ኪራይና የሰራተኛው ደመወዝ ሁሉ የአላህ መንገድ ወጪ (ፊ ሰቢሊላህ) ይሆንለታል።
ነቢዩ (ﷺ) እንዲህ ብለዋል፦
"(ተግባራት ሁሉ የሚለኩት በውሳጣዊ ዓላማቸው (ኒያ) ነው።)" [ቡኻሪና ሙስሊም]

🎤 ሸይኹል ኢስላም ኢብኑ ተይሚያህ (رحمه الله) እንዲህ ይላሉ፦ "ልብ በትክክለኛ አምልኮና በንጹህ ዓላማ ካልተሞላች፣ በስሜትና በዱንያ ፍቅር ትሞላለች።"

⁉️ የልብ ምርመራ፦ ዛሬ ወደ ስራ ስሰማራ ወይም ተቋሜን ስከፍት ትኩረቴ በፈጣሪ ዘንድ የምሰራው ስራ ላይ ነበር ወይስ በሚገባኝ ገቢ ላይ ብቻ?

📍ተግባራዊ እርምጃ፦ ዛሬ ስራ ከመጀመርህ በፊት "ጌታዬ ሆይ! ስራዬን ለአንተ ብዬ የሰራሁት አድርግልኝ" የሚል ኒያህን በልብህ አድስ።

♦️ክፍል ሁለት፦ የነገ አበቦች አጸድ — የተማሪዎች ክብርና የነፍስ ዋጋ
ተማሪዎቻችን በጃችን ያሉ አደራዎች (አማናህ) ናቸው። እንደ አትክልተኛ አበቦቹን እንደሚንከባከብ ሁሉ፣ መምህርና ተቋምም ተማሪዎቹን በስስት ሊያያቸው ይገባል። ተማሪን እንደ "ደንበኛ" ብቻ ማየት ለነፍሱ የሚገባውን ስብዕና መንፈግ ነው። እያንዳንዱ ልጅ በውስጡ ዓለምን ሊቀይር የሚችል ታላቅ አቅም አላህ አስቀምጦበታል።
ተማሪው በትምህርት ቤቱ ቅጥር ግቢ ውስጥ ሲገኝ አካላዊ ደህንነቱ ብቻ ሳይሆን ስነ-ልቦናዊ ክብሩ ሊጠበቅ ይገባል። ስድብ፣ ዝቅ አድርጎ ማየትና ተስፋን መስለብ የአላህን ስጦታ ማቃለል ነው።

🎤 ኢብኑል ቀይም (رحمه الله) እንዲህ ይላሉ፦ "አስተማሪ ለተማሪው እንደ አባት ነው። ይልቁንም ከመካከለኛው አባት በላይ የነፍስ አባት ነው። ምክንያቱም አባት ለዚህች ዓለም ህይወት ሰበብ ሲሆን፣ መምህር ግን ለዘላለም ህይወት ስኬት ሰበብ ነው።"

⁉️ የልብ ምርመራ፦ ዛሬ ተማሪዎቼን ሳያቸው የአላህ አደራዎች መሆናቸውን አስታውሻለሁ ወይስ የክፍያ መታወቂያቸውን?

📍ተግባራዊ እርምጃ፦ ዛሬ በክፍልህ ውስጥ ዝቅ ተደርጎ የሚታይ ወይም ተስፋ የቆረጠ ተማሪ ካለ ለብቻው አግኝተህ አበረታታው።

♦️ክፍል ሶስት፦ ከብር ጩኸት በላይ የነፍስ ጸጥታ — የቁሳዊነትን ሰንሰለት መስበር
ሀብት መፈለግ በራሱ ክፋት የለውም፤ ነገር ግን ሀብት "ብቸኛ ዓላማ" ሲሆንና ትውልድን "መሸቀጫ" ሲያደርገው አደጋው ይጀምራል። የትምህርት ጥራትና የተማሪዎች ስኬት በገቢ ስሌት ውስጥ ሲጨፈለቁ፣ የምንገነባው ህንፃ እንጂ ስብዕና አይሆንም። ቁሳዊነት ሲነግስ መምህሩ ለደመወዙ ብቻ፣ ተቋሙ ለትርፉ ብቻ የሚሮጡ ከሆነ ትምህርቱ በረከቱን ያጣል።
ቁርዓን እንዲህ ያስጠነቅቃል፡
"ገንዘብና ልጆች የቅርቢቱ ሕይወት ጌጦች ናቸው፤ ቀሪዎቹ መልካም ሥራዎች ግን ጌታህ ዘንድ በምንዳ በላጭ ናቸው።" (አል-ካህፍ፡ 46)

🎤 ኢማሙ አሻፊዒይ (رحمه الله) እንዲህ ይላሉ፦ "ዕውቀትን ለዱንያ ጥቅም ብሎ የፈለገ ሰው ዕውቀቱ አይባረክለትም። ዕውቀትን ነፍሱን ለማነጽና ሰዎችን ለመጥቀም የፈለገ ግን ስኬታማ ይሆናል።"

⁉️ የልብ ምርመራ፦ ዛሬ ያገኘሁት ትርፍ ነገ አላህ ፊት የሚያስጠይቀኝ ይሆን ወይስ የሚያስመሰግነኝ?

📍 ተግባራዊ እርምጃ፦ ዛሬ ለትርፍ ስትል ጥራት ልታጓድል የምትችልባቸውን አጋጣሚዎች በታማኝነት እለፋቸው።

♦️ክፍል አራት፦ የነቢያት ተተኪዎች — የመምህርነት ልዕልናና የአደራው ክብደት
መምህርነት ተራ ስራ አይደለም። ነቢያት ወርቅና ብርን አላወረሱም፤ ዕውቀትንና ስነ-ምግባርን እንጂ። መምህራንና የትምህርት ተቋማት መሪዎች የዚህ ታላቅ ውርስ ተረካቢዎች ናቸው። መምህር በክፍል ውስጥ ሲቆም የነቢያትን ስራ እየሰራ መሆኑን ማሰብ አለበት። ይህ ክብር ደግሞ ትልቅ አደራን ይጭናል።
ተቋማትም ለመምህራን የሚገባቸውን ክብርና ማበረታቻ ሊሰጡ ይገባል። መምህር ሲከበር እውቀት ይከበራል፤ እውቀት ሲከበር ደግሞ ትውልድ ይከበራል።

🎤 ኢማሙ አህመድ ቢን ሀንበል (رحمه الله) እንዲህ ይላሉ፦ "ዕውቀትን መፈለግ ለሚችል ሰው ከላቁ ስራዎች አንዱ ነው። ይህም ዓላማው ትክክል ሲሆን ነው፤ ማለትም ካለማወቅ ራሱንና ሌላውን ነጻ ለማውጣት ሲያስብ።"

⁉️ የልብ ምርመራ፦ ራሴን የምመለከተው እንደ ተራ ሰራተኛ ነው ወይስ የነቢያት ውርስ ተረካቢና አስተላላፊ?

📍 ተግባራዊ እርምጃ፦ ዛሬ ስታስተምር ተማሪዎችህ እውቀቱን ብቻ ሳይሆን ካንተ ስነ-ምግባርህን እንዲማሩ ምሳሌ ሁን።

♦️ክፍል አምስት፦ ስውሩ ግድያ — ተስፋንና ስብዕናን የመግደል አደጋ
ትውልድን መግደል ሲባል በስለት ማረድ ብቻ አይደለም። የተማሪን ህልም ማጨለም፣ ለገንዘብ ሲባል ጥራትን ማጓደልና ስነ-ምግባርን ችላ ማለት ትውልድን በቁም መግደል ነው። ተቋማት የገንዘብ ማሽን ብቻ ሲሆኑ፣ የተማሪው ነፍስ ትራባለች። መምህር ተማሪውን "አትረባም" ሲለው አንድን ትልቅ ተስፋ እየገደለ መሆኑን ሊያውቅ ይገባል።

🎤 ኢማሙ ማሊክ (رحمه الله) እንዲህ ይላሉ፦ "ዕውቀት ብርሃን ነው፤ አላህ በሚወደው ልብ ውስጥ ብቻ የሚያስቀምጠው።" ይህ ብርሃን እንዳይጠፋ ጥንቃቄ ማድረግ የአደራ ጠባቂነት ግዴታ ነው።

⁉️ የልብ ምርመራ፦ ዛሬ የምሰራው ስራ የተማሪዬን ተስፋ የሚያለመልም ነው ወይስ የሚያከስም?

📍 ተግባራዊ እርምጃ፦ ዛሬ ለተማሪዎችህ በምትናገረው ቃል ውስጥ "ትችትን" ቀንሰህ "ተስፋን" የሚዘሩ ቃላትን አብዛ።

♦️ ክፍል ስድስት፦ የበረከት ሚስጥር— ጥቂት በቅንነት ሲሰራ እንዴት ይበዛል?
ሰዎች ወደ ብር የሚያደሉት "ብዙ ካላገኘሁ አይበቃኝም" በሚል ስጋት ነው። ነገር ግን በረከት (Barakah) ማለት ጥቂቱ ነገር የብዙውን ስራ መስራት መቻሉ ነው። በአሻጥርና ትውልድን ችላ በማለት የሚገኝ ብዙ ሀብት መጨረሻው ውድመትና የልብ መረበሽ ነው። መምህሩ በቅንነት ሲያስተምር የሚሰጠው ጥቂት ደመወዝ ለቤቱ በረከት ይሆንለታል።
ሀብት የሚለካው በቁጥሩ ሳይሆን በውጤቱ (በረከቱ) ነው! በሀላል የሚገኝ ጥቂት ገቢ፣ ሀቅ ተበልቶ ከሚገኝ ብዙ ክምችት ይበልጣል።

⁉️ የልብ ምርመራ፦ በረከት የሌለው ሺህ ብር ይሻለኛል ወይስ በረከት ያለው መቶ ብር? የቤተሰቤንና የነፍሴን ሰላም በየትኛው እፈልገዋለሁ?

📍 ተግባራዊ እርምጃ፦ ዛሬ በገቢህ ውስጥ ላሉ ጥቂት ብሮች ምስጋና (ሹክር) አቅርብ፤ አላህ በረከቱን እንዲጨምርልህም ለምነው።

♦️ ክፍል ሰባት፦ የትውልድ ድልድዮች — የተቋማትና የወላጆች የጋራ አደራ
የትምህርት ተቋም ማለት የህዝብ ተስፋ የሚገነባበት ድልድይ ነው። ይህ ድልድይ ጠንካራ ካልሆነ ማህበረሰቡ ይወድቃል። አመራሮች የትርፍ ስሌታቸውን ከአላህ ውዴታ ስር ሊያደርጉት ይገባል።
ትምህርት ቤት ብቻውን ትውልድ አይቀርጽም። ወላጆች የዚህ ሂደት 50% ባለቤትና ቀዳሚ መምህራን ናቸው። ወላጅ ልጁን ትምህርት ቤት ሲልክ ኒያውን በትክክል ካልቀረጸና ቤቱ ውስጥ የእውቀት ፍቅር ካልዘራ፣ የተቋሙ ጥረት ብቻውን አያዋጣም። ትምህርት ቤትና ቤት የአንድ ሳንቲም ሁለት ገጽታዎች መሆን አለባቸው።

🎤 ኢብኑ ባዝ (رحمه الله) እንዲህ ይላሉ፦ "ትውልድን ማረም ማለት ሀገርንና ሃይማኖትን ማረም ነው። ይህ ደግሞ የሚጀምረው ከቁሳዊ ጥቅም በላቀ መልኩ የአላህን ውዴታ ከማስቀደም ነው።"

⁉️ የልብ ምርመራ፦ እንደ ወላጅ ወይም እንደ ተቋም መሪ፣ የተማሪውን ስኬት ከገቢ ስሌት በላይ አድርጌዋለሁ?

📍 ተግባራዊ እርምጃ፦
➤ ዛሬ ለተማሪህ/ለልጅህ ስነ-ምግባር ማማር ከአላህ ፊት ዱዓ አድርግ።
► ዛሬ ልጃችሁ ከትምህርት ቤት ሲመለስ ስለ ውጤቱ ብቻ ሳይሆን፣ "ዛሬ ምን ጥሩ ነገር ሰራህ?" ብላችሁ በመጠየቅ ለስነ-ምግባር ትኩረት ስጡ።

♦️ክፍል ስምንት፦ የአደብ (ስነ-ምግባር) ቀዳሚነት — የዘመኑን ፈተና ማሸነፍ
ትምህርት ያለ አደብ ስልጣን ያለ ፍትህ እንደማለት ነው። ዛሬ መምህራን በተማሪዎች ስነ-ምግባር መላሸቅና በሶሻል ሚዲያ ተጽዕኖ ከፍተኛ ፈተና ውስጥ ይገኛሉ። ተማሪው በትምህርቱ ላይ ትኩረት እንዳያደርግ የቴክኖሎጂ ሱስና የተሳሳቱ የባህል ተጽዕኖዎች ልቡን ሰርቀውታል። ስለዚህ ዛሬ ከመረጃው በፊት "አደብን" ማስቀደም የግድ የሚልበት ወቅት ላይ ነን።

🎤 ኢማሙ ማሊክ (رحمه الله) ለአንድ ወጣት የመከሩት፦ "እውቀትን ከመማርህ በፊት አደብን (ስነ-ምግባርን) ተማር።"

⁉️ የልብ ምርመራ፦ በተማሪዎቼ ውጤት ላይ እንደምጨነቀው ሁሉ በሶሻል ሚዲያ በሚሰረቀው ስነ-ምግባራቸው እጨነቃለሁ?

📍 ተግባራዊ እርምጃ፦ ዛሬ በክፍልህ ውስጥ ተማሪዎች ቴክኖሎጂን ለጥፋት ሳይሆን ለበጎ ተግባር እንዴት እንደሚጠቀሙበት አጭር ምክር ስጥ።

♦️ክፍል ዘጠኝ፦ የማይደርቀው ምንጭ — ሰደቀተል ጃሪያህ ስሌት
ዛሬ በትምህርት ዘርፍ ላይ የምናሳርፈው ማንኛውም በጎ አሻራ እኛ ከሞትን በኋላም የሚከተለን "ሰደቀተል ጃሪያህ" (ተቋራጭ የሌለው ምንዳ) ነው። በአንድ ተማሪ ውስጥ የምንዘራው መልካም ነገር፣ ያ ተማሪ ነገ ለሚሰራው መልካም ስራ ሁሉ እኛም ድርሻ አለን። ይህ ትልቁና ትርፋማው "ቢዝነስ" ነው።
ተቋም ያቋቋመ ሰው ከዚያ ተቋም ተምረው የሚወጡት ተማሪዎች የሚያደርጉት መልካም ስራ ሁሉ በሞተበት ይደርሰዋል። መምህሩም ያስተማረው እውቀት ትውልድ በተሻገረ ቁጥር አጅሩ ይጎርፍለታል።

🎤 አቡ ሃኒፋ (رحمه الله) እንዲህ ይላሉ፦ "መምህርነትና ትምህርት የዱንያ ጌጥ መፈለጊያ ሳይሆን፣ የነፍስ ሐሴትና የተቋረጠውን መልካም ስራ የመቀጠያ መንገድ ነው።"

⁉️ የልብ ምርመራ፦ ከሞትኩ በኋላም የሚከተለኝ ስንቅ ዛሬ እያዘጋጀሁ ነው?

📍 ተግባራዊ እርምጃ፦ ዛሬ ስትሰራ "ይህ ስራ ለነገው ቀብሬ ስንቅ ይሆነኛል" የሚል ፅኑ ተስፋ ይኑርህ።

♦️ክፍል አስር፦ የንጋት ጥሪ — ተስፋ፣ ዱዓና የለውጥ ጅምር
ለውጥ የሚጀምረው ከእኔና ከእናንተ ነው። ዛሬ የምናደርገው ዱዓና የምንወስነው ውሳኔ ለነገው ትውልድ ስኬት መሰረት ነው። ይህ መልዕክት ለማንም ግለሰብ የተሰነዘረ ጦር ሳይሆን፣ ለሁላችንም የቀረበ የፍቅርና የአደራ ጥሪ ነው። አላህ በጎ ሰበቦች ያድርገን።

ማጠቃለያ:
ከኒያ ማስተካከል ጀምሮ እስከ ሰደቀተል ጃሪያህ ድረስ ያለውን ጉዞ ስንመለከት፣ ትምህርት ማለት ተራ ስራ ሳይሆን ዘላለማዊ ትርፍ የሚገኝበት ንግድ መሆኑን እንረዳለን። ዛሬ ከነዚህ አሥር ክፍሎች መካከል አንዲቷን ነጥብ ብቻ በተግባር ላይ ብናውላት፣ በትውልዳችን ላይ ትልቅ ለውጥ እናመጣለን። የነገው ብርሃን ዛሬ በምንዘራው ዘር ውስጥ ነውና ለዘሩ ጥራት እንትጋ።

ዱዓ
አላህ ሆይ! ከንቱና ትውልድን ከሚገድል፣ ተስፋን ከሚያጨልም ስራ ጠብቀን። 🤲
ጌታችን ሆይ! የነገ አበቦችን፣ አንፀባራቂ ኮከቦችን የሚገድል ስራ ከመስራት አላህ ይጠብቀን! 🤲
ትኩረታችንን ዱንያ ሳይሆን ያንተን ፊት ፈልገን ለእነዚያ አበቦችና አንፀባራቂ ኮከቦች (ለተማሪዎቻችን) ስኬትና እድገት የምንተጋ አድርገን። 🤲
የነገው የህይወት ጉዟቸው በስኬት እንዲበሽበሽና እንዲሞላ እኛን በጎ ሰበቦች አድርገን። 🤲
ልባችንን ከቁሳዊ ጥቅም ጥማት አጽዳው፤ ስራችንንም ለሁለቱም ዓለም ስኬት የሚበቃ አድርገው። 🤲
አሚን!

✍️ረሻድ ኢብኑ ሙዘሚል