Ebc

BULTII GAARII
•••••••••••••••

Waan kudhan bultii tee ni tolchaa itti fayyadami:

1. Jaarsa ykn jaartii tee hojii gaarii isaa itti himii qudhiif. Baguma kiyya taate! Baguma tiyya taate! Hojiin kee sun na gammachiise ja’iin.

2. Jaalala tee ammas ammas itti himi. “Sin jaaladha” ja’iin. Eega ilmaan 4 ykn 8 dhaltanis sin jaaladha jechuun akka jaalalli isaaf ykn isiif qabdu hin irratin itti himi.

3. Dhageeyfadhu. Haasawa isii ykn haasawa isaa qalbiin caqasi. Haasawa yaada fedhu yoo taate yaada gaarii kenniif. Haasawa akka seenaa taatu, seenaa gaarii naaf himte jedhiin.

4. Amala badaa, hojii hamtuu jaarsa kee ykn jaartii teetirraa argame dhoysi. Amma ammaa ati tan akkasii, ati akkan akkanaa jechuun badii dabre kaasaa hin oolin. Waan gaarii isin jidduu jiru hin irraanfatin. Sheeyxaanaaf mana kee bantee aduwwummaa hin naqin.

5. Waan Rabbi siif qoode wajjiin gammadii jiraadhu. Mana tahuu, qabeenya tahuu, uffata tahuu, dheerinaa fii gabaabina tahuu waan ati qabdu saniin gammadi. Warri abaluu akkasi, jaartiin abaluu akkasi, jaartiin abaluu akkasi hin ja’iin. Jaalalleen Rasuulaa sallallaahu aleeyhi wasallam Aa’ishaan, “mana keenya ibiddi manaan ibsanii fii nyaata itti nyaatanis baatii lama sadii osoo hin qabsiifamin gaafa dabru qaba” jette. Rasuulli sallallaahu aleeyhi wasallam osoo isii jaalatu, isiinis osoo jaalattu ada bahan. Jannatatti walitti deebi’uuf jiraatan akkuma Rabbiin beellama seeneef. Ati yoo hanga eeysaa jaartii tee fii jaarsa kee wajji gammchuun jiraachuu feeeta? Hanga qabeenyi jiruu? Moo hanga Jannataati?

6. Obsi. Jaarsa keetiif obsi, jaartii teetiif obsi. Waan si dallanisiisu arguu keetu mala. Guyyaan duniyaa tokko gammachuun dabru tokko waan nama hin gammachiifneen dhufa. Guyyaa obsaatu jira. Suni sadarkaa tee Rabbi biratti ol fuudhe, jaalala kee ammoo warra kee biratti dabala.

7. Waan hin dandeenye beellama hin seenin. Waan beellama seentu ammoo guuti. Barana hajjiin si geeysa jettee jirtaa dandeeysu malee hin ja’iin. Dandeenyaan geeysi.

8. Ajaja jaarsa keetii waan Rabbi hin khallafiniin fudhu. Gorsa jaartii teetii waan Rabbi hin khallafiniin fudhu. Wal dhagayuu kheeysa barakhaa jira, wal mormii fii wal morkii keeysa kasaaraa jirra.

9. Haadha tahuun sadarkaa Rabbi siif kennee beekhi. Itti gammadi! Dhaloota amantii fii adunyaa waliigalaaf bu’aa qabu hundi haadhaa jabduu if duubaa qabaa beekhi. Ilmaan kee keeysa teeyse guddisuun xiqqeenya sagaleen jettu hundi sagalee sheeyxaaanaatii beekhi. Abbaa tahuun sadarkaa guddoo ilmaan kee jaartii tee wajjiin guddisuu hin qaanfatin. Dhiirummaan jaartii tee wajjiin ilmaan guddisuun sirraa buutii, ni xiqqaatti wanni sin jedhu hundi waswaasa sheeyxaanaa tahuu hubadhu.

10. Wal dhabbii tee abadan jarjartee ala baasuun hin fiigin. Kheeysattuu maatii teetiin daftee hin dhaqqabin. Mana kheeysatti mariin fixuu hunda caala. Hedduu kan jarjaraan maatiitti roorroo hoggas itti dhagayamtu himee booda osoo wal jaalatu maatii jidduu seentee bultii isaanii diiyde. Bultiin maatii gama lamaaniitiin diigamtu hedduu tahuu beekhi. Gaafa nagayaa fii jaalalli jirtu jaarsa kee/jaartii tee yoo dallante maal akka irraa jaalattu fii hin jaalanne itti himi.

Kana waan dubbifnee fii waan ifiif agarrerraa isiniiif qoodne. Itti fayyadamtu jijjirama ajaaibaa arguu dandeeysa.

By: Jafar Beyan