EAGE Suez University Student Chapter

كل سنة وانتوا طيبين وتعود علينا الأيام باليمن والبركات ويارب ديما بخير.💚

كل سنة وانتوا طيبين رمضان كريم علينا كلنا وربنا يعوده علينا بالخير.💚🌙

بما إن رمضان السنة دي هيكون مختلف بالنسبة لمعظمنا ف إحنا في EAGE قررنا إنه يكون مختلف عندنا إحنا كمان استنونا في مفاجأتنا ليكوا في رمضان 2021.😉

انتو كمان قولولنا هتعموا إيه مختلف عن كل سنة؟🤔





Waiting us🔥🔥

النوم الطبيعي للناس بيتراوح بين 6 أو 8 ساعات يومياً، بس في ناس بتحب النوم جداً لدرجة إنهم ممكن يناموا 12 ساعة أو 16 مثلاً، طب عمرك تتخيل إن في ناس نامت 6 أيام أيوه بالظبط زي ماشوفتوا كده تعالوا نعرف ده حصل إزاي.🤷🏻‍♀️

سنة 2013 شمال كازاخستان في قرية "كاليتشي" ظهر وباء غريب من نوعه، كانت أعراضه النوم لمدة طويلة ومش مدة طويلة عادية لا دي بتوصل لأيام، المشكلة مش هنا المشكلة إن المريض بيصحى مش فاكر أي حاجة.

بداية الوباء كانت مع شخص اسمه "ليبو فولابيوكا" دخل فجأة في حالة نوم عميق وفاق من الحالة دي بعد حولي 6 أيام، وبدأت أعداد الناس تزيد لحد ما وصلوا ل 120 شخص.🤦🏻‍♀️

الموضوع كان غريب مش بس للبشر لا ده كمان الوباء سيطر على الحيوانات، والخوف زاد لما ظهر في قرية "كراسنوجورسك" المجاورة "لكاليتشي" حالات نوم عميق برضو، وبدأت الناس تسيب القرى وتهاجر ومنهم حوالي 40 أسرة هاجرت بمجرد ظهور الوباء.

هيجي سؤال طبيعي إننا نسأله وفين الحكومة في كل اللي بيحصل ده؟🙄

السلطات مكانتش فاهمة إيه المرض ده، بس قاموا بعزل المرضى وعملوا اختبارات ومسحات بيئية وكمان اختبارات فيروسية وبكتيرية، وبدأوا يشوفوا إيه سبب الوباء ده.

اشتبهوا في كذا حاجه يعني شكوا إن ممكن تكون الخمور الفاسدة هي السبب بس في حالات من المرضى مكنتش بتشرب خمور أصلاً، بعدين قالوا إن ممكن تكون دي هيستريا جماعية زي اللي اتسببت في وباء الضحك سنة 1962. 👀

طب وبعد كل ده كان إيه السبب الحقيقي للوباء ده؟🤔

الفحوصات الجديدة اكتشفت إن الوباء ده سببه مناجم اليورانيوم وبالتالي ده أدي لوجود مستويات عاليه جداً من أول أكسيد الكروبون والهيدروكوبونات اللي طالعه منها، وده أدى لارتباط أول أكسيد الكربون بالدم بشكل أسرع 200مرة من الأكسجين.

ومع ارتفاع نسبة الغازات دي كلها في الدم الدماغ بتتحرم من الأكسجين فبيحصل إحساس بالتعب والدماغ بتقف، والجسم علشان يحارب كل ده بيلجأ للنوم العميق.😴

دايما في أوبئة غريبة ظهرت ولسه بتظهر بس المرة دي وباء لذيذ وغريب في نفس الوقت يلا منشن لصاحبك اللي بيحب النوم وعرفه هينام براحته إزاي.😂

"المصري طول عمره بنا شاطر
المصريين بيبنوا والبنى بيعيش لآلاف السنين، مصر بتبذل جهود جبارة للحفاظ على أثارها لكل الإنسانية، وفي نفس الوقت بتبني الجديد".👷🏻‍♂️

وده كان جزء من حوار قاله الفنان المصري خالد النبوي في الفيلم الوثائقي اللي تم عرضه يوم السبت ٣ أبريل بمناسبة موكب المومياوات الملكية.

بتتمثل أهمية الحدث ده في إنه قدر بيربط بين حضارتين وكل واحده فيهم قدرت تبني وتعمر في مصر بشكل عظيم، الحضارة الفرعونية وهي أقدم وأعرق حضارة في العالم واللي بتتميز ببراعة الفراعنة في كل العلوم اللي موجوده ولغايه دلوقتي بنتعلم منهم، وأسرارها اللي لحد دلوقتي العالم مش قادر يوصل لحل للأسرار دي وأشهرها هو سر التحنيط.🤷🏻‍♀️

والحضارة المصرية الحديثة اللي بتتمثل في البنا والتعمير بالشكل الحديث ووضح ده بشكل كبير قدام العالم كله في إنشاء أكبر مشروع حضاري في القرن ال ٢١ وهو "المتحف القومي للحضارة المصرية في الفسطاط".

تقدر تقول الموكب ده هيتحط من ضمن أهم الأحداث اللي حصلت على مستوى العالم وعشان كده تم بث الحدث العظيم ده على ٤٠٠ قناة تليفزيونية في العالم، كل رؤساء وممثلي وكبار سياسي الدول حضروه، ده كمان معظم رؤوساء العالم و ملوكه تابعوا الموكب واتكلموا عن عظمته وطبعاً كتير من الصحف العالمية إن لم تكن كلها اتكلمت عن الموكب ده وعظمةمصر.🇪🇬

تعالى ناخدك شويه لأحداث الموكب فبدأت بنقل ٢٢ مومياء ملكية، ١٨ ملك و٤ ملكات في عربات مزينة برسومات ونقوش فرعونية وعليها اسم كل ملك وملكة من الفراعنة بالعربية والهيروغليفية والإنجليزية، في جو خاص بيحتوي على النيتروجين عشان يبقى جو مناسب لنقل المومياوات.

وتقدم الموكب فرق الموسيقى العسكرية المرتدية للملابس الفرعونية، وبدأوا يتحركوا من المتحف المصري بميدان التحرير إلى المتحف القومي للحضارة المصرية بالفسطاط، عشان يتم استقبالهم بإطلاق ٢١ طلقة تعظيم ليهم، ويقوم الرئيس عبد الفتاح السيسي باستقبال المومياوات بنفسه، في جو يسوده عروض موسيقية وضوئية مهيبة محصلتش قبل كده.😌

المومياوات ال ٢٢ بيقود موكبهم عربة الملك سقنن رع، وهو أحد أعظم ملوك الأسرة ال ١٧ قبل الميلاد ووالد الملك أحمس، ووصولاً لأخر عربة واللي كان فيها مومياء الملك رمسيس التاسع، وشمل الموكب عدد كبير من ملوك وملكات الأسر ال ١٧ وال ١٨ وال ١٩ وال ٢٠ قبل الميلاد بالترتيب.

المومياوات دي تم اكتشفها على مرحلتين، المرحلة الأولى واللي بتتسمى بالخبيئة الملكية كانت في معبد الدير البحري، أما المرحلة التانية فكانت في مقبرة في وادي الملوك.

الموكب كان بيضم كلا من هؤلاء الملوك:🤴🏼
الملك سقنن رع، والملك رمسيس الثاني،والثالث، والرابع، والخامس،والسادس، والتاسع، والملك تحتمس الأول، والثاني، والثالث، والرابع، والملك امنحتب الأول، والثاني، والثالث، والملك سيتي الأول، والثاني، والملك مرنبتاح.

أما عن الملكات فهم كانوا:👸🏻
الملكة تي، والملكة حتشبسوت، الملكه أحمس نفرتاري، والملكة مريت آمون.

ولو اتكلمنا على اللي بيميز المومياوات دي فممكن نلخصها في جملة حضارة ٧٠٠٠ سنة، وملوك عظام استطاعوا تشكيل التاريخ، وحضارة اتبنت على العلم واتبنت على قيم ومبادئ وعقيدة قوية تؤمن بالبعث، وتؤمن بالحساب، وتؤمن بالخير والحق.💚

الوصفة السحرية لتعديل المزاج والاحساس بالسعادة والاطمئنان والنشاط لمعظم الناس وعشان كده اتسمت مراحل صناعتها بمراحل صناعة السعادة أكيد طبعاً عرفتوا هي مين.🍫🤷🏻‍♀️

عرف العالم الشيكولاته في عصور ما قبل الميلاد في منطقة موجوده بدولة المكسيك دلوقتي، اعتقد شعوب المنطقة دي إن حبوب الكاكاو هدية من آلهة الحكمة اللي كانوا بيعبدوها، وعشان كده ربطوا اكلها بالصحة والسعادة.

تناول المكسيكيون الشوكولاتة في شكل مشروب مر ومحطوط معاه البهارات، لكن الأسبان هما اللي ضافوا للمشروب السكر، وبعد كده اتحول مشروب الشوكولاتة في الوقت ده لجزء أساسي على موائد الأرستقراطيين في أوروبا.

وبعد كده بدأت بعض الدراسات العلمية في إنها تبحث في إنها تعرف العلاقة اللي بتربط بين الشوكولاتة والصحة والسعادة؟🤔

باعتبار الكاكاو هو المكون الأساسي للشوكولاتة فهو مفيد بشكل كبير لصحة القلب والأوعية الدموية وده بسبب احتواءه على مادة اسمها بولي فينول Polyphenol.

ومن المعروف إن المادة دي بتساعد على التقليل من ضغط الدم وهي عموما مادة مضادة للأكسدة وتلف الخلايا.🤷🏻‍♀️

طب ياسيدي دي عرفناها إيه بقى العلاقة بين الشيكولاته وعورك بالسعادة اول ما تأكلها؟🙄

العلم بيقول إن الشوكولاتة فيها كميات قليلة من الحمض الأميني التريبتوفان اللي بيزيد من إفراز هرمون سيروتونين في الجسم وهو من أهم هرمونات السعادة للبشر.

لكن الحقيقة غير كده وهي إن مشاعرنا ناحية الشوكولاتة هي اللي بتوجه سلوكنا معاها، يعني إحنا في معظم الوقت ده إذا مكنش دايماً بنربطها بالمكافأة والاحتفال ووقت الراحة.🤷🏻‍♀️

العلاقة دي بقى بتوضح إننا بنحس بالحاجة اللي بنحتاجها زي السعادة لما ناكل الشوكولاتة، وده اللي بيعمل صعوبة في التحكم في الكمية اللي بناكلها من الشوكولاتة.

قولي طب إزاي هتحسسني بالقوة والنشاط؟🙄

بكل بساطة الشيكولاتة بيدخل فيها السكر والكافيين اللي هو اصلا مادة منبهه فعشان كده أنت بتحس إنك عندك طاقه كبيره جدا ولكن ده بيكون تأثيره مؤقت.

وطبعاً زي ما بنقول إن كل حاجة أما بتزيد عن حدها بتتقلب ضددها، فأكيد مش عشان تحس بالسعادة وتحافظ على صحة القلب إنك طول النهار والليل تاكل في الشيكولاته، الاعتدال في الشئ هو اللي هيوصلك لأحسن نتيجه له، قولنا بقى إيه النوع اللي بينتجلك السعادة؟🍫🤔

مبنى أعلى من الهرم الأكبر بحوالي 43 متر، أطلق عليه الأمريكيون لقب "شوكة عبد الناصر"، بس المصريين كان ليهم رأي تاني في تسميته ياترى عرفتوا بتكلم عن إيه؟........ بالظبط كده هو برج القاهرة.🤷🏻‍♀️

وبما إن مصر في الفترة دي كانت كل حاجة بتنفذها بحساب وبعد تفكير عميق فبرج القاهرة هو واحد من ضمن أبرز المعالم اللي تم تنفيذها في القاهرة، واللي اتبنى فى عهد الرئيس جمال عبد الناصر على جزيرة الزمالك، من سنة 1956لسنة 1962 على قاعدة من أحجار الجرانيت اللي كان بيستخدموها المصريين القدماء في بناء معابدهم ومقابرهم وبيوصل ارتفاع البرج لحوالي 187متر.

أما بقى بالنسبة لتصميمه فكان على شكل زهرة اللوتس المصرية واللي صممه هو المهندس نعوم شبيب، واتنفذ البرج بتكلفة 6 مليون جنيه مصري.

السؤال بقى إزاى البرج اتكلف 6 مليون جنيه في وقت كان الإقتصاد بتاعنا لسه بيقوم؟ 🤔

نقولك إحنا بقى في الوقت ده كانت الثورة الجزائرية بدأت، وكانت مصر من أكبر المناصرين والمؤيدين للجزائر عشان تحصل على استقلالها، فقررت الولايات المتحدة الأمريكية تقديم المبلغ ده لمصر وده مش لله وللوطن طبعاً لا ده في مقابل إن مصر تتخلى عن القضية الجزائرية.💁🏻‍♀️

لكن اللي حصل إن مصر رفضت تتخلى عن شقيقتها وبدأت تبني برج القاهرة بالمبلغ ده، عبد الناصر كان عايز البرج يكون سياحي وضخم بس يكون فيه كام دور كده عشان يبقوا معهد تدريب المخابرات العامة المصرية.

وكمان من أبرز الحاجات اللي فكر فيها عبد الناصر إنه يبني بناء يفضل شئ بارز مع مرور الزمن بيوضح وبيأكد كرامة المصريين حتى وهما في أشد الاحتياج للمال فكان برج القاهرة هو كلمة الرفض وعدم الاستسلام ونصرة الدولة الشقيقة الجزائر في ثورتها.🇩🇿

في الستينيات البرج مكانش بس مكان سياحي لا ده القيادة المصرية حولته لمركز رئيسي بيقوم ببث الإذاعات السرية والعلنية، اللي طلعت من القاهرة واللي كانت بتدعم حركات التحرر الوطني في البلاد، وكانت الإذاعات الثورية دي من ضمن مبررات العدوان الثلاثي على مصر في عام 1956.

بيتكون البرج من 16 طابق، وعشان توصل لقمته هتاخد حوالي 45ث بالمصعد، هتلاقي في الدور ال 14 مطعم سياحي بمنصة دوارة، المنصة الدوارة دي بقى قادره إنها تخليك شايف معالم مصر البارزة يعني هتقدر تشوف مبنى التليفزيون، وأبو الهول، والنيل، وقلعة صلاح الدين الأيوبي، والأزهر، والأهرامات.😌

ياترى كنتوا شايفين برج القاهرة بالعظمة دي أو إنه اتبني بتفكير و تكتيك معين ولا لا؟👀

مين مننا مبيجيش قبل ماينام ويبدأ مخه يفكره بمواقف وحشه حصلتله من يوم ما اتولد، ويقعد يفكر في أسئلة ملهاش إجابه.......... أيوه زي مافكرت هي لعنه ال overthinking. 🤷‍♀

طب في البداية كده يعني إيه ”overthinking”:

هو التحليل والتفكير في موضوع من المواضيع المختلفة بشكل مبالغ فيه لدرجه ممكن تأثر على تركيزك وشغلك ودراستك.
‏
‏ال “overthinking” ده له نوعين واللي هما:👇🏻

النوع الأول: هو إن الشخص يكون بيفكر في أسئلة غريبة ويفضل يدورلها على إجابات، أما أسئلة وجودية يعني زي كيف بدأ الخلق؟ أو احنا عايشين ليه؟ طب مين جه الأول البيضه ولا الفرخه.🤔

أو ممكن تكون أسئلة ملهاش إجابه بالفعل زي لو إحنا بنشوف الماء ومبنشوفش الهوا فهل السمك بيشوف الهوا ومبيشوفش المايه؟

والنوع الثاني: هو التفكير في مواقف حصلتلنا في الماضي ونفضل نلوم نفسنا على ارتكاب الأخطاء وليه متصرفناش صح ومعرفناش نرد الرد المناسب.🤷🏻‍♀️

الـ«Overthinking» ممكن يسبب مشاكل كتير ، مش بس إنه سبب رئيسي للأرق وقلة النوم ده كمان بيزود التوتر، وبيصعب عملية التصرف في الأمور السهلة، وبيخليك تفكر في الحاجات السلبية على طول.

طب إزاي أقدر اتغلب على ال overthinking؟🙄

بص ياسيدي أول حاجة حاول إنك تفكر بإيجابية في أوقات كتير بيكون الOver thinking بسبب الخوف من حاجة معينة فلازم دايما نفكر بإيجابية وإن الأمور مهما كانت كبيره فهي هتتحل كده كده.

2) أشغل وقتك دايما سواء بالشغل، المذاكره، ممارسة الرياضة ، التأمل، أو الرسم وغيره من الأنشطة.

3) حط الأمور في حجمها الطبيعي يعني متدهاش أكبر من حجمها وأسأل نفسك هو الموضوع ده يستاهل كل التعب والمجهود ده.🤔

4) واجه خوفك و أوعي تخاف من المحاولة، وافتكر أن كل محاولة أو فرصة هي بداية جديدة.

5) حط خطة زمنية لشغلك وخلي عندك وقت إضافي للإنتهاء.

6) أوعي تتنبأ بالمستقبل أعمل اللي عليك ومتفكرش في النتيجة كتير.

7) أقبل نفسك بتصرفاتك وطريقه تفكيرك ومتندمش علي خطوه اخدتها أو تصرف قومت بيه خليك أنت بطبيعتك وبس.

الـ «Overthinking» ممكن يحصل لأي شخص مش لشخص معين أو في سن معين، لكن لو كان عندك نظام كويس بتتعامل بيه وقتها على الأقل هتقدر تتخلص من التوتر والضغط اللي هيسببه ليك.

قلنا بقي إيه الأسئلة اللي بتفكر فيها قبل النوم؟👀